|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 39
|
1. Info |
| To: | agni | |
| From: | nābhāka kāṇva | |
| Metres: | 1st set of styles: svarāṭtriṣṭup (4, 6-8); bhuriktriṣṭup (1, 3, 5); virāṭtrisṭup (2); nicṛjjagatī (9); triṣṭup (10) 2nd set of styles: mahāpaṅkti |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.039.01 (Mandala. Sukta. Rik)
6.3.22.01 (Ashtaka. Adhyaya. Varga. Rik)
08.05.134 (Mandala. Anuvāka. Rik)
Samhita Devanagari Accented
अ॒ग्निम॑स्तोष्यृ॒ग्मिय॑म॒ग्निमी॒ळा य॒जध्यै॑ ।
अ॒ग्निर्दे॒वाँ अ॑नक्तु न उ॒भे हि वि॒दथे॑ क॒विरं॒तश्चर॑ति दू॒त्यं१॒॑ नभं॑तामन्य॒के स॑मे ॥
Samhita Devanagari Nonaccented
अग्निमस्तोष्यृग्मियमग्निमीळा यजध्यै ।
अग्निर्देवाँ अनक्तु न उभे हि विदथे कविरंतश्चरति दूत्यं नभंतामन्यके समे ॥
Samhita Transcription Accented
agnímastoṣyṛgmíyamagnímīḷā́ yajádhyai ǀ
agnírdevā́m̐ anaktu na ubhé hí vidáthe kavírantáścárati dūtyám nábhantāmanyaké same ǁ
Samhita Transcription Nonaccented
agnimastoṣyṛgmiyamagnimīḷā yajadhyai ǀ
agnirdevām̐ anaktu na ubhe hi vidathe kavirantaścarati dūtyam nabhantāmanyake same ǁ
Padapatha Devanagari Accented
अ॒ग्निम् । अ॒स्तो॒षि॒ । ऋ॒ग्मिय॑म् । अ॒ग्निम् । ई॒ळा । य॒जध्यै॑ ।
अ॒ग्निः । दे॒वान् । अ॒न॒क्तु॒ । नः॒ । उ॒भे इति॑ । हि । वि॒दथे॒ इति॑ । क॒विः । अ॒न्तरिति॑ । चर॑ति । दू॒त्य॑म् । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
अग्निम् । अस्तोषि । ऋग्मियम् । अग्निम् । ईळा । यजध्यै ।
अग्निः । देवान् । अनक्तु । नः । उभे इति । हि । विदथे इति । कविः । अन्तरिति । चरति । दूत्यम् । नभन्ताम् । अन्यके । समे ॥
Padapatha Transcription Accented
agním ǀ astoṣi ǀ ṛgmíyam ǀ agním ǀ īḷā́ ǀ yajádhyai ǀ
agníḥ ǀ devā́n ǀ anaktu ǀ naḥ ǀ ubhé íti ǀ hí ǀ vidáthe íti ǀ kavíḥ ǀ antáríti ǀ cárati ǀ dūtyám ǀ nábhantām ǀ anyaké ǀ same ǁ
Padapatha Transcription Nonaccented
agnim ǀ astoṣi ǀ ṛgmiyam ǀ agnim ǀ īḷā ǀ yajadhyai ǀ
agniḥ ǀ devān ǀ anaktu ǀ naḥ ǀ ubhe iti ǀ hi ǀ vidathe iti ǀ kaviḥ ǀ antariti ǀ carati ǀ dūtyam ǀ nabhantām ǀ anyake ǀ same ǁ
08.039.02 (Mandala. Sukta. Rik)
6.3.22.02 (Ashtaka. Adhyaya. Varga. Rik)
08.05.135 (Mandala. Anuvāka. Rik)
Samhita Devanagari Accented
न्य॑ग्ने॒ नव्य॑सा॒ वच॑स्त॒नूषु॒ शंस॑मेषां ।
न्यरा॑ती॒ ररा॑व्णां॒ विश्वा॑ अ॒र्यो अरा॑तीरि॒तो यु॑च्छंत्वा॒मुरो॒ नभं॑तामन्य॒के स॑मे ॥
Samhita Devanagari Nonaccented
न्यग्ने नव्यसा वचस्तनूषु शंसमेषां ।
न्यराती रराव्णां विश्वा अर्यो अरातीरितो युच्छंत्वामुरो नभंतामन्यके समे ॥
Samhita Transcription Accented
nyágne návyasā vácastanū́ṣu śáṃsameṣām ǀ
nyárātī rárāvṇām víśvā aryó árātīritó yucchantvāmúro nábhantāmanyaké same ǁ
Samhita Transcription Nonaccented
nyagne navyasā vacastanūṣu śaṃsameṣām ǀ
nyarātī rarāvṇām viśvā aryo arātīrito yucchantvāmuro nabhantāmanyake same ǁ
Padapatha Devanagari Accented
नि । अ॒ग्ने॒ । नव्य॑सा । वचः॑ । त॒नूषु॑ । शंस॑म् । ए॒षा॒म् ।
नि । अरा॑तीः । ररा॑व्णाम् । विश्वाः॑ । अ॒र्यः । अरा॑तीः । इ॒तः । यु॒च्छ॒न्तु॒ । आ॒ऽमुरः॑ । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
नि । अग्ने । नव्यसा । वचः । तनूषु । शंसम् । एषाम् ।
नि । अरातीः । रराव्णाम् । विश्वाः । अर्यः । अरातीः । इतः । युच्छन्तु । आऽमुरः । नभन्ताम् । अन्यके । समे ॥
Padapatha Transcription Accented
ní ǀ agne ǀ návyasā ǀ vácaḥ ǀ tanū́ṣu ǀ śáṃsam ǀ eṣām ǀ
ní ǀ árātīḥ ǀ rárāvṇām ǀ víśvāḥ ǀ aryáḥ ǀ árātīḥ ǀ itáḥ ǀ yucchantu ǀ ā-múraḥ ǀ nábhantām ǀ anyaké ǀ same ǁ
Padapatha Transcription Nonaccented
ni ǀ agne ǀ navyasā ǀ vacaḥ ǀ tanūṣu ǀ śaṃsam ǀ eṣām ǀ
ni ǀ arātīḥ ǀ rarāvṇām ǀ viśvāḥ ǀ aryaḥ ǀ arātīḥ ǀ itaḥ ǀ yucchantu ǀ ā-muraḥ ǀ nabhantām ǀ anyake ǀ same ǁ
08.039.03 (Mandala. Sukta. Rik)
6.3.22.03 (Ashtaka. Adhyaya. Varga. Rik)
08.05.136 (Mandala. Anuvāka. Rik)
Samhita Devanagari Accented
अग्ने॒ मन्मा॑नि॒ तुभ्यं॒ कं घृ॒तं न जु॑ह्व आ॒सनि॑ ।
स दे॒वेषु॒ प्र चि॑किद्धि॒ त्वं ह्यसि॑ पू॒र्व्यः शि॒वो दू॒तो वि॒वस्व॑तो॒ नभं॑तामन्य॒के स॑मे ॥
Samhita Devanagari Nonaccented
अग्ने मन्मानि तुभ्यं कं घृतं न जुह्व आसनि ।
स देवेषु प्र चिकिद्धि त्वं ह्यसि पूर्व्यः शिवो दूतो विवस्वतो नभंतामन्यके समे ॥
Samhita Transcription Accented
ágne mánmāni túbhyam kám ghṛtám ná juhva āsáni ǀ
sá devéṣu prá cikiddhi tvám hyási pūrvyáḥ śivó dūtó vivásvato nábhantāmanyaké same ǁ
Samhita Transcription Nonaccented
agne manmāni tubhyam kam ghṛtam na juhva āsani ǀ
sa deveṣu pra cikiddhi tvam hyasi pūrvyaḥ śivo dūto vivasvato nabhantāmanyake same ǁ
Padapatha Devanagari Accented
अग्ने॑ । मन्मा॑नि । तुभ्य॑म् । कम् । घृ॒तम् । न । जु॒ह्वे॒ । आ॒सनि॑ ।
सः । दे॒वेषु॑ । प्र । चि॒कि॒द्धि॒ । त्वम् । हि । असि॑ । पू॒र्व्यः । शि॒वः । दू॒तः । वि॒वस्व॑तः । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
अग्ने । मन्मानि । तुभ्यम् । कम् । घृतम् । न । जुह्वे । आसनि ।
सः । देवेषु । प्र । चिकिद्धि । त्वम् । हि । असि । पूर्व्यः । शिवः । दूतः । विवस्वतः । नभन्ताम् । अन्यके । समे ॥
Padapatha Transcription Accented
ágne ǀ mánmāni ǀ túbhyam ǀ kám ǀ ghṛtám ǀ ná ǀ juhve ǀ āsáni ǀ
sáḥ ǀ devéṣu ǀ prá ǀ cikiddhi ǀ tvám ǀ hí ǀ ási ǀ pūrvyáḥ ǀ śiváḥ ǀ dūtáḥ ǀ vivásvataḥ ǀ nábhantām ǀ anyaké ǀ same ǁ
Padapatha Transcription Nonaccented
agne ǀ manmāni ǀ tubhyam ǀ kam ǀ ghṛtam ǀ na ǀ juhve ǀ āsani ǀ
saḥ ǀ deveṣu ǀ pra ǀ cikiddhi ǀ tvam ǀ hi ǀ asi ǀ pūrvyaḥ ǀ śivaḥ ǀ dūtaḥ ǀ vivasvataḥ ǀ nabhantām ǀ anyake ǀ same ǁ
08.039.04 (Mandala. Sukta. Rik)
6.3.22.04 (Ashtaka. Adhyaya. Varga. Rik)
08.05.137 (Mandala. Anuvāka. Rik)
Samhita Devanagari Accented
तत्त॑द॒ग्निर्वयो॑ दधे॒ यथा॑यथा कृप॒ण्यति॑ ।
ऊ॒र्जाहु॑ति॒र्वसू॑नां॒ शं च॒ योश्च॒ मयो॑ दधे॒ विश्व॑स्यै दे॒वहू॑त्यै॒ नभं॑तामन्य॒के स॑मे ॥
Samhita Devanagari Nonaccented
तत्तदग्निर्वयो दधे यथायथा कृपण्यति ।
ऊर्जाहुतिर्वसूनां शं च योश्च मयो दधे विश्वस्यै देवहूत्यै नभंतामन्यके समे ॥
Samhita Transcription Accented
táttadagnírváyo dadhe yáthāyathā kṛpaṇyáti ǀ
ūrjā́hutirvásūnām śám ca yóśca máyo dadhe víśvasyai deváhūtyai nábhantāmanyaké same ǁ
Samhita Transcription Nonaccented
tattadagnirvayo dadhe yathāyathā kṛpaṇyati ǀ
ūrjāhutirvasūnām śam ca yośca mayo dadhe viśvasyai devahūtyai nabhantāmanyake same ǁ
Padapatha Devanagari Accented
तत्ऽत॑त् । अ॒ग्निः । वयः॑ । द॒धे॒ । यथा॑ऽयथा । कृ॒प॒ण्यति॑ ।
ऊ॒र्जाऽआ॑हुतिः । वसू॑नाम् । शम् । च॒ । योः । च॒ । मयः॑ । द॒धे॒ । विश्व॑स्यै । दे॒वऽहू॑त्यै । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
तत्ऽतत् । अग्निः । वयः । दधे । यथाऽयथा । कृपण्यति ।
ऊर्जाऽआहुतिः । वसूनाम् । शम् । च । योः । च । मयः । दधे । विश्वस्यै । देवऽहूत्यै । नभन्ताम् । अन्यके । समे ॥
Padapatha Transcription Accented
tát-tat ǀ agníḥ ǀ váyaḥ ǀ dadhe ǀ yáthā-yathā ǀ kṛpaṇyáti ǀ
ūrjā́-āhutiḥ ǀ vásūnām ǀ śám ǀ ca ǀ yóḥ ǀ ca ǀ máyaḥ ǀ dadhe ǀ víśvasyai ǀ devá-hūtyai ǀ nábhantām ǀ anyaké ǀ same ǁ
Padapatha Transcription Nonaccented
tat-tat ǀ agniḥ ǀ vayaḥ ǀ dadhe ǀ yathā-yathā ǀ kṛpaṇyati ǀ
ūrjā-āhutiḥ ǀ vasūnām ǀ śam ǀ ca ǀ yoḥ ǀ ca ǀ mayaḥ ǀ dadhe ǀ viśvasyai ǀ deva-hūtyai ǀ nabhantām ǀ anyake ǀ same ǁ
08.039.05 (Mandala. Sukta. Rik)
6.3.22.05 (Ashtaka. Adhyaya. Varga. Rik)
08.05.138 (Mandala. Anuvāka. Rik)
Samhita Devanagari Accented
स चि॑केत॒ सही॑यसा॒ग्निश्चि॒त्रेण॒ कर्म॑णा ।
स होता॒ शश्व॑तीनां॒ दक्षि॑णाभिर॒भीवृ॑त इ॒नोति॑ च प्रती॒व्यं१॒॑ नभं॑तामन्य॒के स॑मे ॥
Samhita Devanagari Nonaccented
स चिकेत सहीयसाग्निश्चित्रेण कर्मणा ।
स होता शश्वतीनां दक्षिणाभिरभीवृत इनोति च प्रतीव्यं नभंतामन्यके समे ॥
Samhita Transcription Accented
sá ciketa sáhīyasāgníścitréṇa kármaṇā ǀ
sá hótā śáśvatīnām dákṣiṇābhirabhī́vṛta inóti ca pratīvyám nábhantāmanyaké same ǁ
Samhita Transcription Nonaccented
sa ciketa sahīyasāgniścitreṇa karmaṇā ǀ
sa hotā śaśvatīnām dakṣiṇābhirabhīvṛta inoti ca pratīvyam nabhantāmanyake same ǁ
Padapatha Devanagari Accented
सः । चि॒के॒त॒ । सही॑यसा । अ॒ग्निः । चि॒त्रेण॑ । कर्म॑णा ।
सः । होता॑ । शश्व॑तीनाम् । दक्षि॑णाभिः । अ॒भिऽवृ॑तः । इ॒नोति॑ । च॒ । प्र॒ती॒व्य॑म् । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
सः । चिकेत । सहीयसा । अग्निः । चित्रेण । कर्मणा ।
सः । होता । शश्वतीनाम् । दक्षिणाभिः । अभिऽवृतः । इनोति । च । प्रतीव्यम् । नभन्ताम् । अन्यके । समे ॥
Padapatha Transcription Accented
sáḥ ǀ ciketa ǀ sáhīyasā ǀ agníḥ ǀ citréṇa ǀ kármaṇā ǀ
sáḥ ǀ hótā ǀ śáśvatīnām ǀ dákṣiṇābhiḥ ǀ abhí-vṛtaḥ ǀ inóti ǀ ca ǀ pratīvyám ǀ nábhantām ǀ anyaké ǀ same ǁ
Padapatha Transcription Nonaccented
saḥ ǀ ciketa ǀ sahīyasā ǀ agniḥ ǀ citreṇa ǀ karmaṇā ǀ
saḥ ǀ hotā ǀ śaśvatīnām ǀ dakṣiṇābhiḥ ǀ abhi-vṛtaḥ ǀ inoti ǀ ca ǀ pratīvyam ǀ nabhantām ǀ anyake ǀ same ǁ
08.039.06 (Mandala. Sukta. Rik)
6.3.23.01 (Ashtaka. Adhyaya. Varga. Rik)
08.05.139 (Mandala. Anuvāka. Rik)
Samhita Devanagari Accented
अ॒ग्निर्जा॒ता दे॒वाना॑म॒ग्निर्वे॑द॒ मर्ता॑नामपी॒च्यं॑ ।
अ॒ग्निः स द्र॑विणो॒दा अ॒ग्निर्द्वारा॒ व्यू॑र्णुते॒ स्वा॑हुतो॒ नवी॑यसा॒ नभं॑तामन्य॒के स॑मे ॥
Samhita Devanagari Nonaccented
अग्निर्जाता देवानामग्निर्वेद मर्तानामपीच्यं ।
अग्निः स द्रविणोदा अग्निर्द्वारा व्यूर्णुते स्वाहुतो नवीयसा नभंतामन्यके समे ॥
Samhita Transcription Accented
agnírjātā́ devā́nāmagnírveda mártānāmapīcyám ǀ
agníḥ sá draviṇodā́ agnírdvā́rā vyū́rṇute svā́huto návīyasā nábhantāmanyaké same ǁ
Samhita Transcription Nonaccented
agnirjātā devānāmagnirveda martānāmapīcyam ǀ
agniḥ sa draviṇodā agnirdvārā vyūrṇute svāhuto navīyasā nabhantāmanyake same ǁ
Padapatha Devanagari Accented
अ॒ग्निः । जा॒ता । दे॒वाना॑म् । अ॒ग्निः । वे॒द॒ । मर्ता॑नाम् । अ॒पी॒च्य॑म् ।
अ॒ग्निः । सः । द्र॒वि॒णः॒ऽदाः । अ॒ग्निः । द्वारा॑ । वि । ऊ॒र्णु॒ते॒ । सुऽआ॑हुतः । नवी॑यसा । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
अग्निः । जाता । देवानाम् । अग्निः । वेद । मर्तानाम् । अपीच्यम् ।
अग्निः । सः । द्रविणःऽदाः । अग्निः । द्वारा । वि । ऊर्णुते । सुऽआहुतः । नवीयसा । नभन्ताम् । अन्यके । समे ॥
Padapatha Transcription Accented
agníḥ ǀ jātā́ ǀ devā́nām ǀ agníḥ ǀ veda ǀ mártānām ǀ apīcyám ǀ
agníḥ ǀ sáḥ ǀ draviṇaḥ-dā́ḥ ǀ agníḥ ǀ dvā́rā ǀ ví ǀ ūrṇute ǀ sú-āhutaḥ ǀ návīyasā ǀ nábhantām ǀ anyaké ǀ same ǁ
Padapatha Transcription Nonaccented
agniḥ ǀ jātā ǀ devānām ǀ agniḥ ǀ veda ǀ martānām ǀ apīcyam ǀ
agniḥ ǀ saḥ ǀ draviṇaḥ-dāḥ ǀ agniḥ ǀ dvārā ǀ vi ǀ ūrṇute ǀ su-āhutaḥ ǀ navīyasā ǀ nabhantām ǀ anyake ǀ same ǁ
08.039.07 (Mandala. Sukta. Rik)
6.3.23.02 (Ashtaka. Adhyaya. Varga. Rik)
08.05.140 (Mandala. Anuvāka. Rik)
Samhita Devanagari Accented
अ॒ग्निर्दे॒वेषु॒ संव॑सुः॒ स वि॒क्षु य॒ज्ञिया॒स्वा ।
स मु॒दा काव्या॑ पु॒रु विश्वं॒ भूमे॑व पुष्यति दे॒वो दे॒वेषु॑ य॒ज्ञियो॒ नभं॑तामन्य॒के स॑मे ॥
Samhita Devanagari Nonaccented
अग्निर्देवेषु संवसुः स विक्षु यज्ञियास्वा ।
स मुदा काव्या पुरु विश्वं भूमेव पुष्यति देवो देवेषु यज्ञियो नभंतामन्यके समे ॥
Samhita Transcription Accented
agnírdevéṣu sáṃvasuḥ sá vikṣú yajñíyāsvā́ ǀ
sá mudā́ kā́vyā purú víśvam bhū́meva puṣyati devó devéṣu yajñíyo nábhantāmanyaké same ǁ
Samhita Transcription Nonaccented
agnirdeveṣu saṃvasuḥ sa vikṣu yajñiyāsvā ǀ
sa mudā kāvyā puru viśvam bhūmeva puṣyati devo deveṣu yajñiyo nabhantāmanyake same ǁ
Padapatha Devanagari Accented
अ॒ग्निः । दे॒वेषु॑ । सम्ऽव॑सुः । सः । वि॒क्षु । य॒ज्ञिया॑सु । आ ।
सः । मु॒दा । काव्या॑ । पु॒रु । विश्व॑म् । भूम॑ऽइव । पु॒ष्य॒ति॒ । दे॒वः । दे॒वेषु॑ । य॒ज्ञियः॑ । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
अग्निः । देवेषु । सम्ऽवसुः । सः । विक्षु । यज्ञियासु । आ ।
सः । मुदा । काव्या । पुरु । विश्वम् । भूमऽइव । पुष्यति । देवः । देवेषु । यज्ञियः । नभन्ताम् । अन्यके । समे ॥
Padapatha Transcription Accented
agníḥ ǀ devéṣu ǀ sám-vasuḥ ǀ sáḥ ǀ vikṣú ǀ yajñíyāsu ǀ ā́ ǀ
sáḥ ǀ mudā́ ǀ kā́vyā ǀ purú ǀ víśvam ǀ bhū́ma-iva ǀ puṣyati ǀ deváḥ ǀ devéṣu ǀ yajñíyaḥ ǀ nábhantām ǀ anyaké ǀ same ǁ
Padapatha Transcription Nonaccented
agniḥ ǀ deveṣu ǀ sam-vasuḥ ǀ saḥ ǀ vikṣu ǀ yajñiyāsu ǀ ā ǀ
saḥ ǀ mudā ǀ kāvyā ǀ puru ǀ viśvam ǀ bhūma-iva ǀ puṣyati ǀ devaḥ ǀ deveṣu ǀ yajñiyaḥ ǀ nabhantām ǀ anyake ǀ same ǁ
08.039.08 (Mandala. Sukta. Rik)
6.3.23.03 (Ashtaka. Adhyaya. Varga. Rik)
08.05.141 (Mandala. Anuvāka. Rik)
Samhita Devanagari Accented
यो अ॒ग्निः स॒प्तमा॑नुषः श्रि॒तो विश्वे॑षु॒ सिंधु॑षु ।
तमाग॑न्म त्रिप॒स्त्यं मं॑धा॒तुर्द॑स्यु॒हंत॑मम॒ग्निं य॒ज्ञेषु॑ पू॒र्व्यं नभं॑तामन्य॒के स॑मे ॥
Samhita Devanagari Nonaccented
यो अग्निः सप्तमानुषः श्रितो विश्वेषु सिंधुषु ।
तमागन्म त्रिपस्त्यं मंधातुर्दस्युहंतममग्निं यज्ञेषु पूर्व्यं नभंतामन्यके समे ॥
Samhita Transcription Accented
yó agníḥ saptámānuṣaḥ śritó víśveṣu síndhuṣu ǀ
támā́ganma tripastyám mandhātúrdasyuhántamamagním yajñéṣu pūrvyám nábhantāmanyaké same ǁ
Samhita Transcription Nonaccented
yo agniḥ saptamānuṣaḥ śrito viśveṣu sindhuṣu ǀ
tamāganma tripastyam mandhāturdasyuhantamamagnim yajñeṣu pūrvyam nabhantāmanyake same ǁ
Padapatha Devanagari Accented
यः । अ॒ग्निः । स॒प्तऽमा॑नुषः । श्रि॒तः । विश्वे॑षु । सिन्धु॑षु ।
तम् । आ । अ॒ग॒न्म॒ । त्रि॒ऽप॒स्त्यम् । म॒न्धा॒तुः । द॒स्यु॒हन्ऽत॑मम् । अ॒ग्निम् । य॒ज्ञेषु॑ । पू॒र्व्यम् । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
यः । अग्निः । सप्तऽमानुषः । श्रितः । विश्वेषु । सिन्धुषु ।
तम् । आ । अगन्म । त्रिऽपस्त्यम् । मन्धातुः । दस्युहन्ऽतमम् । अग्निम् । यज्ञेषु । पूर्व्यम् । नभन्ताम् । अन्यके । समे ॥
Padapatha Transcription Accented
yáḥ ǀ agníḥ ǀ saptá-mānuṣaḥ ǀ śritáḥ ǀ víśveṣu ǀ síndhuṣu ǀ
tám ǀ ā́ ǀ aganma ǀ tri-pastyám ǀ mandhātúḥ ǀ dasyuhán-tamam ǀ agním ǀ yajñéṣu ǀ pūrvyám ǀ nábhantām ǀ anyaké ǀ same ǁ
Padapatha Transcription Nonaccented
yaḥ ǀ agniḥ ǀ sapta-mānuṣaḥ ǀ śritaḥ ǀ viśveṣu ǀ sindhuṣu ǀ
tam ǀ ā ǀ aganma ǀ tri-pastyam ǀ mandhātuḥ ǀ dasyuhan-tamam ǀ agnim ǀ yajñeṣu ǀ pūrvyam ǀ nabhantām ǀ anyake ǀ same ǁ
08.039.09 (Mandala. Sukta. Rik)
6.3.23.04 (Ashtaka. Adhyaya. Varga. Rik)
08.05.142 (Mandala. Anuvāka. Rik)
Samhita Devanagari Accented
अ॒ग्निस्त्रीणि॑ त्रि॒धातू॒न्या क्षे॑ति वि॒दथा॑ क॒विः ।
स त्रीँरे॑काद॒शाँ इ॒ह यक्ष॑च्च पि॒प्रय॑च्च नो॒ विप्रो॑ दू॒तः परि॑ष्कृतो॒ नभं॑तामन्य॒के स॑मे ॥
Samhita Devanagari Nonaccented
अग्निस्त्रीणि त्रिधातून्या क्षेति विदथा कविः ।
स त्रीँरेकादशाँ इह यक्षच्च पिप्रयच्च नो विप्रो दूतः परिष्कृतो नभंतामन्यके समे ॥
Samhita Transcription Accented
agnístrī́ṇi tridhā́tūnyā́ kṣeti vidáthā kavíḥ ǀ
sá trī́m̐rekādaśā́m̐ ihá yákṣacca pipráyacca no vípro dūtáḥ páriṣkṛto nábhantāmanyaké same ǁ
Samhita Transcription Nonaccented
agnistrīṇi tridhātūnyā kṣeti vidathā kaviḥ ǀ
sa trīm̐rekādaśām̐ iha yakṣacca piprayacca no vipro dūtaḥ pariṣkṛto nabhantāmanyake same ǁ
Padapatha Devanagari Accented
अ॒ग्निः । त्रीणि॑ । त्रि॒ऽधातू॑नि । आ । क्षे॒ति॒ । वि॒दथा॑ । क॒विः ।
सः । त्रीन् । ए॒का॒द॒शान् । इ॒ह । यक्ष॑त् । च॒ । पि॒प्रय॑त् । च॒ । नः॒ । विप्रः॑ । दू॒तः । परि॑ऽकृतः । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
अग्निः । त्रीणि । त्रिऽधातूनि । आ । क्षेति । विदथा । कविः ।
सः । त्रीन् । एकादशान् । इह । यक्षत् । च । पिप्रयत् । च । नः । विप्रः । दूतः । परिऽकृतः । नभन्ताम् । अन्यके । समे ॥
Padapatha Transcription Accented
agníḥ ǀ trī́ṇi ǀ tri-dhā́tūni ǀ ā́ ǀ kṣeti ǀ vidáthā ǀ kavíḥ ǀ
sáḥ ǀ trī́n ǀ ekādaśā́n ǀ ihá ǀ yákṣat ǀ ca ǀ pipráyat ǀ ca ǀ naḥ ǀ vípraḥ ǀ dūtáḥ ǀ pári-kṛtaḥ ǀ nábhantām ǀ anyaké ǀ same ǁ
Padapatha Transcription Nonaccented
agniḥ ǀ trīṇi ǀ tri-dhātūni ǀ ā ǀ kṣeti ǀ vidathā ǀ kaviḥ ǀ
saḥ ǀ trīn ǀ ekādaśān ǀ iha ǀ yakṣat ǀ ca ǀ piprayat ǀ ca ǀ naḥ ǀ vipraḥ ǀ dūtaḥ ǀ pari-kṛtaḥ ǀ nabhantām ǀ anyake ǀ same ǁ
08.039.10 (Mandala. Sukta. Rik)
6.3.23.05 (Ashtaka. Adhyaya. Varga. Rik)
08.05.143 (Mandala. Anuvāka. Rik)
Samhita Devanagari Accented
त्वं नो॑ अग्न आ॒युषु॒ त्वं दे॒वेषु॑ पूर्व्य॒ वस्व॒ एक॑ इरज्यसि ।
त्वामापः॑ परि॒स्रुतः॒ परि॑ यंति॒ स्वसे॑तवो॒ नभं॑तामन्य॒के स॑मे ॥
Samhita Devanagari Nonaccented
त्वं नो अग्न आयुषु त्वं देवेषु पूर्व्य वस्व एक इरज्यसि ।
त्वामापः परिस्रुतः परि यंति स्वसेतवो नभंतामन्यके समे ॥
Samhita Transcription Accented
tvám no agna āyúṣu tvám devéṣu pūrvya vásva éka irajyasi ǀ
tvā́mā́paḥ parisrútaḥ pári yanti svásetavo nábhantāmanyaké same ǁ
Samhita Transcription Nonaccented
tvam no agna āyuṣu tvam deveṣu pūrvya vasva eka irajyasi ǀ
tvāmāpaḥ parisrutaḥ pari yanti svasetavo nabhantāmanyake same ǁ
Padapatha Devanagari Accented
त्वम् । नः॒ । अ॒ग्ने॒ । आ॒युषु॑ । त्वम् । दे॒वेषु॑ । पू॒र्व्य॒ । वस्वः॑ । एकः॑ । इ॒र॒ज्य॒सि॒ ।
त्वाम् । आपः॑ । प॒रि॒ऽस्रुतः॑ । परि॑ । य॒न्ति॒ । स्वऽसे॑तवः । नभ॑न्ताम् । अ॒न्य॒के । स॒मे॒ ॥
Padapatha Devanagari Nonaccented
त्वम् । नः । अग्ने । आयुषु । त्वम् । देवेषु । पूर्व्य । वस्वः । एकः । इरज्यसि ।
त्वाम् । आपः । परिऽस्रुतः । परि । यन्ति । स्वऽसेतवः । नभन्ताम् । अन्यके । समे ॥
Padapatha Transcription Accented
tvám ǀ naḥ ǀ agne ǀ āyúṣu ǀ tvám ǀ devéṣu ǀ pūrvya ǀ vásvaḥ ǀ ékaḥ ǀ irajyasi ǀ
tvā́m ǀ ā́paḥ ǀ pari-srútaḥ ǀ pári ǀ yanti ǀ svá-setavaḥ ǀ nábhantām ǀ anyaké ǀ same ǁ
Padapatha Transcription Nonaccented
tvam ǀ naḥ ǀ agne ǀ āyuṣu ǀ tvam ǀ deveṣu ǀ pūrvya ǀ vasvaḥ ǀ ekaḥ ǀ irajyasi ǀ
tvām ǀ āpaḥ ǀ pari-srutaḥ ǀ pari ǀ yanti ǀ sva-setavaḥ ǀ nabhantām ǀ anyake ǀ same ǁ