|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 48
|
1. Info |
| To: | soma | |
| From: | pragātha kāṇva | |
| Metres: | 1st set of styles: triṣṭup (4, 6, 10, 11, 14); virāṭtrisṭup (3, 7-9); pādanicṛttriṣṭup (1, 2, 13); paṅktiḥ (12, 15); virāṭjagatī (5) 2nd set of styles: triṣṭubh (1-4, 6-15); jagatī (5) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.048.01 (Mandala. Sukta. Rik)
6.4.11.01 (Ashtaka. Adhyaya. Varga. Rik)
08.06.157 (Mandala. Anuvāka. Rik)
Samhita Devanagari Accented
स्वा॒दोर॑भक्षि॒ वय॑सः सुमे॒धाः स्वा॒ध्यो॑ वरिवो॒वित्त॑रस्य ।
विश्वे॒ यं दे॒वा उ॒त मर्त्या॑सो॒ मधु॑ ब्रु॒वंतो॑ अ॒भि सं॒चरं॑ति ॥
Samhita Devanagari Nonaccented
स्वादोरभक्षि वयसः सुमेधाः स्वाध्यो वरिवोवित्तरस्य ।
विश्वे यं देवा उत मर्त्यासो मधु ब्रुवंतो अभि संचरंति ॥
Samhita Transcription Accented
svādórabhakṣi váyasaḥ sumedhā́ḥ svādhyó varivovíttarasya ǀ
víśve yám devā́ utá mártyāso mádhu bruvánto abhí saṃcáranti ǁ
Samhita Transcription Nonaccented
svādorabhakṣi vayasaḥ sumedhāḥ svādhyo varivovittarasya ǀ
viśve yam devā uta martyāso madhu bruvanto abhi saṃcaranti ǁ
Padapatha Devanagari Accented
स्वा॒दोः । अ॒भ॒क्षि॒ । वय॑सः । सु॒ऽमे॒धाः । सु॒ऽआ॒ध्यः॑ । व॒रि॒वो॒वित्ऽत॑रस्य ।
विश्वे॑ । यम् । दे॒वाः । उ॒त । मर्त्या॑सः । मधु॑ । ब्रु॒वन्तः॑ । अ॒भि । स॒म्ऽचर॑न्ति ॥
Padapatha Devanagari Nonaccented
स्वादोः । अभक्षि । वयसः । सुऽमेधाः । सुऽआध्यः । वरिवोवित्ऽतरस्य ।
विश्वे । यम् । देवाः । उत । मर्त्यासः । मधु । ब्रुवन्तः । अभि । सम्ऽचरन्ति ॥
Padapatha Transcription Accented
svādóḥ ǀ abhakṣi ǀ váyasaḥ ǀ su-medhā́ḥ ǀ su-ādhyáḥ ǀ varivovít-tarasya ǀ
víśve ǀ yám ǀ devā́ḥ ǀ utá ǀ mártyāsaḥ ǀ mádhu ǀ bruvántaḥ ǀ abhí ǀ sam-cáranti ǁ
Padapatha Transcription Nonaccented
svādoḥ ǀ abhakṣi ǀ vayasaḥ ǀ su-medhāḥ ǀ su-ādhyaḥ ǀ varivovit-tarasya ǀ
viśve ǀ yam ǀ devāḥ ǀ uta ǀ martyāsaḥ ǀ madhu ǀ bruvantaḥ ǀ abhi ǀ sam-caranti ǁ
08.048.02 (Mandala. Sukta. Rik)
6.4.11.02 (Ashtaka. Adhyaya. Varga. Rik)
08.06.158 (Mandala. Anuvāka. Rik)
Samhita Devanagari Accented
अं॒तश्च॒ प्रागा॒ अदि॑तिर्भवास्यवया॒ता हर॑सो॒ दैव्य॑स्य ।
इंद॒विंद्र॑स्य स॒ख्यं जु॑षा॒णः श्रौष्टी॑व॒ धुर॒मनु॑ रा॒य ऋ॑ध्याः ॥
Samhita Devanagari Nonaccented
अंतश्च प्रागा अदितिर्भवास्यवयाता हरसो दैव्यस्य ।
इंदविंद्रस्य सख्यं जुषाणः श्रौष्टीव धुरमनु राय ऋध्याः ॥
Samhita Transcription Accented
antáśca prā́gā áditirbhavāsyavayātā́ háraso dáivyasya ǀ
índavíndrasya sakhyám juṣāṇáḥ śráuṣṭīva dhúramánu rāyá ṛdhyāḥ ǁ
Samhita Transcription Nonaccented
antaśca prāgā aditirbhavāsyavayātā haraso daivyasya ǀ
indavindrasya sakhyam juṣāṇaḥ śrauṣṭīva dhuramanu rāya ṛdhyāḥ ǁ
Padapatha Devanagari Accented
अ॒न्तरिति॑ । च॒ । प्र । अगाः॑ । अदि॑तिः । भ॒वा॒सि॒ । अ॒व॒ऽया॒ता । हर॑सः । दैव्य॑स्य ।
इन्दो॒ इति॑ । इन्द्र॑स्य । स॒ख्यम् । जु॒षा॒णः । श्रौष्टी॑ऽइव । धुर॑म् । अनु॑ । रा॒ये । ऋ॒ध्याः॒ ॥
Padapatha Devanagari Nonaccented
अन्तरिति । च । प्र । अगाः । अदितिः । भवासि । अवऽयाता । हरसः । दैव्यस्य ।
इन्दो इति । इन्द्रस्य । सख्यम् । जुषाणः । श्रौष्टीऽइव । धुरम् । अनु । राये । ऋध्याः ॥
Padapatha Transcription Accented
antáríti ǀ ca ǀ prá ǀ ágāḥ ǀ áditiḥ ǀ bhavāsi ǀ ava-yātā́ ǀ hárasaḥ ǀ dáivyasya ǀ
índo íti ǀ índrasya ǀ sakhyám ǀ juṣāṇáḥ ǀ śráuṣṭī-iva ǀ dhúram ǀ ánu ǀ rāyé ǀ ṛdhyāḥ ǁ
Padapatha Transcription Nonaccented
antariti ǀ ca ǀ pra ǀ agāḥ ǀ aditiḥ ǀ bhavāsi ǀ ava-yātā ǀ harasaḥ ǀ daivyasya ǀ
indo iti ǀ indrasya ǀ sakhyam ǀ juṣāṇaḥ ǀ śrauṣṭī-iva ǀ dhuram ǀ anu ǀ rāye ǀ ṛdhyāḥ ǁ
08.048.03 (Mandala. Sukta. Rik)
6.4.11.03 (Ashtaka. Adhyaya. Varga. Rik)
08.06.159 (Mandala. Anuvāka. Rik)
Samhita Devanagari Accented
अपा॑म॒ सोम॑म॒मृता॑ अभू॒माग॑न्म॒ ज्योति॒रवि॑दाम दे॒वान् ।
किं नू॒नम॒स्मान्कृ॑णव॒दरा॑तिः॒ किमु॑ धू॒र्तिर॑मृत॒ मर्त्य॑स्य ॥
Samhita Devanagari Nonaccented
अपाम सोमममृता अभूमागन्म ज्योतिरविदाम देवान् ।
किं नूनमस्मान्कृणवदरातिः किमु धूर्तिरमृत मर्त्यस्य ॥
Samhita Transcription Accented
ápāma sómamamṛ́tā abhūmā́ganma jyótirávidāma devā́n ǀ
kím nūnámasmā́nkṛṇavadárātiḥ kímu dhūrtíramṛta mártyasya ǁ
Samhita Transcription Nonaccented
apāma somamamṛtā abhūmāganma jyotiravidāma devān ǀ
kim nūnamasmānkṛṇavadarātiḥ kimu dhūrtiramṛta martyasya ǁ
Padapatha Devanagari Accented
अपा॑म । सोम॑म् । अ॒मृताः॑ । अ॒भू॒म॒ । अग॑न्म । ज्योतिः॑ । अवि॑दाम । दे॒वान् ।
किम् । नू॒नम् । अ॒स्मान् । कृ॒ण॒व॒त् । अरा॑तिः । किम् । ऊं॒ इति॑ । धू॒र्तिः । अ॒मृ॒त॒ । मर्त्य॑स्य ॥
Padapatha Devanagari Nonaccented
अपाम । सोमम् । अमृताः । अभूम । अगन्म । ज्योतिः । अविदाम । देवान् ।
किम् । नूनम् । अस्मान् । कृणवत् । अरातिः । किम् । ऊं इति । धूर्तिः । अमृत । मर्त्यस्य ॥
Padapatha Transcription Accented
ápāma ǀ sómam ǀ amṛ́tāḥ ǀ abhūma ǀ áganma ǀ jyótiḥ ǀ ávidāma ǀ devā́n ǀ
kím ǀ nūnám ǀ asmā́n ǀ kṛṇavat ǀ árātiḥ ǀ kím ǀ ūṃ íti ǀ dhūrtíḥ ǀ amṛta ǀ mártyasya ǁ
Padapatha Transcription Nonaccented
apāma ǀ somam ǀ amṛtāḥ ǀ abhūma ǀ aganma ǀ jyotiḥ ǀ avidāma ǀ devān ǀ
kim ǀ nūnam ǀ asmān ǀ kṛṇavat ǀ arātiḥ ǀ kim ǀ ūṃ iti ǀ dhūrtiḥ ǀ amṛta ǀ martyasya ǁ
08.048.04 (Mandala. Sukta. Rik)
6.4.11.04 (Ashtaka. Adhyaya. Varga. Rik)
08.06.160 (Mandala. Anuvāka. Rik)
Samhita Devanagari Accented
शं नो॑ भव हृ॒द आ पी॒त इं॑दो पि॒तेव॑ सोम सू॒नवे॑ सु॒शेवः॑ ।
सखे॑व॒ सख्य॑ उरुशंस॒ धीरः॒ प्र ण॒ आयु॑र्जी॒वसे॑ सोम तारीः ॥
Samhita Devanagari Nonaccented
शं नो भव हृद आ पीत इंदो पितेव सोम सूनवे सुशेवः ।
सखेव सख्य उरुशंस धीरः प्र ण आयुर्जीवसे सोम तारीः ॥
Samhita Transcription Accented
śám no bhava hṛdá ā́ pītá indo pitéva soma sūnáve suśévaḥ ǀ
sákheva sákhya uruśaṃsa dhī́raḥ prá ṇa ā́yurjīváse soma tārīḥ ǁ
Samhita Transcription Nonaccented
śam no bhava hṛda ā pīta indo piteva soma sūnave suśevaḥ ǀ
sakheva sakhya uruśaṃsa dhīraḥ pra ṇa āyurjīvase soma tārīḥ ǁ
Padapatha Devanagari Accented
शम् । नः॒ । भ॒व॒ । हृ॒दे । आ । पी॒तः । इ॒न्दो॒ इति॑ । पि॒ताऽइ॑व । सो॒म॒ । सू॒नवे॑ । सु॒ऽशेवः॑ ।
सखा॑ऽइव । सख्ये॑ । उ॒रु॒ऽशं॒स॒ । धीरः॑ । प्र । नः॒ । आयुः॑ । जी॒वसे॑ । सो॒म॒ । ता॒रीः॒ ॥
Padapatha Devanagari Nonaccented
शम् । नः । भव । हृदे । आ । पीतः । इन्दो इति । पिताऽइव । सोम । सूनवे । सुऽशेवः ।
सखाऽइव । सख्ये । उरुऽशंस । धीरः । प्र । नः । आयुः । जीवसे । सोम । तारीः ॥
Padapatha Transcription Accented
śám ǀ naḥ ǀ bhava ǀ hṛdé ǀ ā́ ǀ pītáḥ ǀ indo íti ǀ pitā́-iva ǀ soma ǀ sūnáve ǀ su-śévaḥ ǀ
sákhā-iva ǀ sákhye ǀ uru-śaṃsa ǀ dhī́raḥ ǀ prá ǀ naḥ ǀ ā́yuḥ ǀ jīváse ǀ soma ǀ tārīḥ ǁ
Padapatha Transcription Nonaccented
śam ǀ naḥ ǀ bhava ǀ hṛde ǀ ā ǀ pītaḥ ǀ indo iti ǀ pitā-iva ǀ soma ǀ sūnave ǀ su-śevaḥ ǀ
sakhā-iva ǀ sakhye ǀ uru-śaṃsa ǀ dhīraḥ ǀ pra ǀ naḥ ǀ āyuḥ ǀ jīvase ǀ soma ǀ tārīḥ ǁ
08.048.05 (Mandala. Sukta. Rik)
6.4.11.05 (Ashtaka. Adhyaya. Varga. Rik)
08.06.161 (Mandala. Anuvāka. Rik)
Samhita Devanagari Accented
इ॒मे मा॑ पी॒ता य॒शस॑ उरु॒ष्यवो॒ रथं॒ न गावः॒ सम॑नाह॒ पर्व॑सु ।
ते मा॑ रक्षंतु वि॒स्रस॑श्च॒रित्रा॑दु॒त मा॒ स्रामा॑द्यवयं॒त्विंद॑वः ॥
Samhita Devanagari Nonaccented
इमे मा पीता यशस उरुष्यवो रथं न गावः समनाह पर्वसु ।
ते मा रक्षंतु विस्रसश्चरित्रादुत मा स्रामाद्यवयंत्विंदवः ॥
Samhita Transcription Accented
imé mā pītā́ yaśása uruṣyávo rátham ná gā́vaḥ sámanāha párvasu ǀ
té mā rakṣantu visrásaścarítrādutá mā srā́mādyavayantvíndavaḥ ǁ
Samhita Transcription Nonaccented
ime mā pītā yaśasa uruṣyavo ratham na gāvaḥ samanāha parvasu ǀ
te mā rakṣantu visrasaścaritrāduta mā srāmādyavayantvindavaḥ ǁ
Padapatha Devanagari Accented
इ॒मे । मा॒ । पी॒ताः । य॒शसः॑ । उ॒रु॒ष्यवः॑ । रथ॑म् । न । गावः॑ । सम् । अ॒ना॒ह॒ । पर्व॑ऽसु ।
ते । मा॒ । र॒क्ष॒न्तु॒ । वि॒ऽस्रसः॑ । च॒रित्रा॑त् । उ॒त । मा॒ । स्रामा॑त् । य॒व॒य॒न्तु॒ । इन्द॑वः ॥
Padapatha Devanagari Nonaccented
इमे । मा । पीताः । यशसः । उरुष्यवः । रथम् । न । गावः । सम् । अनाह । पर्वऽसु ।
ते । मा । रक्षन्तु । विऽस्रसः । चरित्रात् । उत । मा । स्रामात् । यवयन्तु । इन्दवः ॥
Padapatha Transcription Accented
imé ǀ mā ǀ pītā́ḥ ǀ yaśásaḥ ǀ uruṣyávaḥ ǀ rátham ǀ ná ǀ gā́vaḥ ǀ sám ǀ anāha ǀ párva-su ǀ
té ǀ mā ǀ rakṣantu ǀ vi-srásaḥ ǀ carítrāt ǀ utá ǀ mā ǀ srā́māt ǀ yavayantu ǀ índavaḥ ǁ
Padapatha Transcription Nonaccented
ime ǀ mā ǀ pītāḥ ǀ yaśasaḥ ǀ uruṣyavaḥ ǀ ratham ǀ na ǀ gāvaḥ ǀ sam ǀ anāha ǀ parva-su ǀ
te ǀ mā ǀ rakṣantu ǀ vi-srasaḥ ǀ caritrāt ǀ uta ǀ mā ǀ srāmāt ǀ yavayantu ǀ indavaḥ ǁ
08.048.06 (Mandala. Sukta. Rik)
6.4.12.01 (Ashtaka. Adhyaya. Varga. Rik)
08.06.162 (Mandala. Anuvāka. Rik)
Samhita Devanagari Accented
अ॒ग्निं न मा॑ मथि॒तं सं दि॑दीपः॒ प्र च॑क्षय कृणु॒हि वस्य॑सो नः ।
अथा॒ हि ते॒ मद॒ आ सो॑म॒ मन्ये॑ रे॒वाँ इ॑व॒ प्र च॑रा पु॒ष्टिमच्छ॑ ॥
Samhita Devanagari Nonaccented
अग्निं न मा मथितं सं दिदीपः प्र चक्षय कृणुहि वस्यसो नः ।
अथा हि ते मद आ सोम मन्ये रेवाँ इव प्र चरा पुष्टिमच्छ ॥
Samhita Transcription Accented
agním ná mā mathitám sám didīpaḥ prá cakṣaya kṛṇuhí vásyaso naḥ ǀ
áthā hí te máda ā́ soma mánye revā́m̐ iva prá carā puṣṭímáccha ǁ
Samhita Transcription Nonaccented
agnim na mā mathitam sam didīpaḥ pra cakṣaya kṛṇuhi vasyaso naḥ ǀ
athā hi te mada ā soma manye revām̐ iva pra carā puṣṭimaccha ǁ
Padapatha Devanagari Accented
अ॒ग्निम् । न । मा॒ । म॒थि॒तम् । सम् । दि॒दी॒पः॒ । प्र । च॒क्ष॒य॒ । कृ॒णु॒हि । वस्य॑सः । नः॒ ।
अथ॑ । हि । ते॒ । मदे॑ । आ । सो॒म॒ । मन्ये॑ । रे॒वान्ऽइ॑व । प्र । च॒र॒ । पु॒ष्टिम् । अच्छ॑ ॥
Padapatha Devanagari Nonaccented
अग्निम् । न । मा । मथितम् । सम् । दिदीपः । प्र । चक्षय । कृणुहि । वस्यसः । नः ।
अथ । हि । ते । मदे । आ । सोम । मन्ये । रेवान्ऽइव । प्र । चर । पुष्टिम् । अच्छ ॥
Padapatha Transcription Accented
agním ǀ ná ǀ mā ǀ mathitám ǀ sám ǀ didīpaḥ ǀ prá ǀ cakṣaya ǀ kṛṇuhí ǀ vásyasaḥ ǀ naḥ ǀ
átha ǀ hí ǀ te ǀ máde ǀ ā́ ǀ soma ǀ mánye ǀ revā́n-iva ǀ prá ǀ cara ǀ puṣṭím ǀ áccha ǁ
Padapatha Transcription Nonaccented
agnim ǀ na ǀ mā ǀ mathitam ǀ sam ǀ didīpaḥ ǀ pra ǀ cakṣaya ǀ kṛṇuhi ǀ vasyasaḥ ǀ naḥ ǀ
atha ǀ hi ǀ te ǀ made ǀ ā ǀ soma ǀ manye ǀ revān-iva ǀ pra ǀ cara ǀ puṣṭim ǀ accha ǁ
08.048.07 (Mandala. Sukta. Rik)
6.4.12.02 (Ashtaka. Adhyaya. Varga. Rik)
08.06.163 (Mandala. Anuvāka. Rik)
Samhita Devanagari Accented
इ॒षि॒रेण॑ ते॒ मन॑सा सु॒तस्य॑ भक्षी॒महि॒ पित्र्य॑स्येव रा॒यः ।
सोम॑ राज॒न्प्र ण॒ आयूं॑षि तारी॒रहा॑नीव॒ सूर्यो॑ वास॒राणि॑ ॥
Samhita Devanagari Nonaccented
इषिरेण ते मनसा सुतस्य भक्षीमहि पित्र्यस्येव रायः ।
सोम राजन्प्र ण आयूंषि तारीरहानीव सूर्यो वासराणि ॥
Samhita Transcription Accented
iṣiréṇa te mánasā sutásya bhakṣīmáhi pítryasyeva rāyáḥ ǀ
sóma rājanprá ṇa ā́yūṃṣi tārīráhānīva sū́ryo vāsarā́ṇi ǁ
Samhita Transcription Nonaccented
iṣireṇa te manasā sutasya bhakṣīmahi pitryasyeva rāyaḥ ǀ
soma rājanpra ṇa āyūṃṣi tārīrahānīva sūryo vāsarāṇi ǁ
Padapatha Devanagari Accented
इ॒षि॒रेण॑ । ते॒ । मन॑सा । सु॒तस्य॑ । भ॒क्षी॒महि॑ । पित्र्य॑स्यऽइव । रा॒यः ।
सोम॑ । रा॒ज॒न् । प्र । नः॒ । आयूं॑षि । ता॒रीः॒ । अहा॑निऽइव । सूर्यः॑ । वा॒स॒राणि॑ ॥
Padapatha Devanagari Nonaccented
इषिरेण । ते । मनसा । सुतस्य । भक्षीमहि । पित्र्यस्यऽइव । रायः ।
सोम । राजन् । प्र । नः । आयूंषि । तारीः । अहानिऽइव । सूर्यः । वासराणि ॥
Padapatha Transcription Accented
iṣiréṇa ǀ te ǀ mánasā ǀ sutásya ǀ bhakṣīmáhi ǀ pítryasya-iva ǀ rāyáḥ ǀ
sóma ǀ rājan ǀ prá ǀ naḥ ǀ ā́yūṃṣi ǀ tārīḥ ǀ áhāni-iva ǀ sū́ryaḥ ǀ vāsarā́ṇi ǁ
Padapatha Transcription Nonaccented
iṣireṇa ǀ te ǀ manasā ǀ sutasya ǀ bhakṣīmahi ǀ pitryasya-iva ǀ rāyaḥ ǀ
soma ǀ rājan ǀ pra ǀ naḥ ǀ āyūṃṣi ǀ tārīḥ ǀ ahāni-iva ǀ sūryaḥ ǀ vāsarāṇi ǁ
08.048.08 (Mandala. Sukta. Rik)
6.4.12.03 (Ashtaka. Adhyaya. Varga. Rik)
08.06.164 (Mandala. Anuvāka. Rik)
Samhita Devanagari Accented
सोम॑ राजन्मृ॒ळया॑ नः स्व॒स्ति तव॑ स्मसि व्र॒त्या॒३॒॑स्तस्य॑ विद्धि ।
अल॑र्ति॒ दक्ष॑ उ॒त म॒न्युरिं॑दो॒ मा नो॑ अ॒र्यो अ॑नुका॒मं परा॑ दाः ॥
Samhita Devanagari Nonaccented
सोम राजन्मृळया नः स्वस्ति तव स्मसि व्रत्यास्तस्य विद्धि ।
अलर्ति दक्ष उत मन्युरिंदो मा नो अर्यो अनुकामं परा दाः ॥
Samhita Transcription Accented
sóma rājanmṛḷáyā naḥ svastí táva smasi vratyā́stásya viddhi ǀ
álarti dákṣa utá manyúrindo mā́ no aryó anukāmám párā dāḥ ǁ
Samhita Transcription Nonaccented
soma rājanmṛḷayā naḥ svasti tava smasi vratyāstasya viddhi ǀ
alarti dakṣa uta manyurindo mā no aryo anukāmam parā dāḥ ǁ
Padapatha Devanagari Accented
सोम॑ । रा॒ज॒न् । मृ॒ळय॑ । नः॒ । स्व॒स्ति । तव॑ । स्म॒सि॒ । व्र॒त्याः॑ । तस्य॑ । वि॒द्धि॒ ।
अल॑र्ति । दक्षः॑ । उ॒त । म॒न्युः । इ॒न्दो॒ इति॑ । मा । नः॒ । अ॒र्यः । अ॒नु॒ऽका॒मम् । परा॑ । दाः॒ ॥
Padapatha Devanagari Nonaccented
सोम । राजन् । मृळय । नः । स्वस्ति । तव । स्मसि । व्रत्याः । तस्य । विद्धि ।
अलर्ति । दक्षः । उत । मन्युः । इन्दो इति । मा । नः । अर्यः । अनुऽकामम् । परा । दाः ॥
Padapatha Transcription Accented
sóma ǀ rājan ǀ mṛḷáya ǀ naḥ ǀ svastí ǀ táva ǀ smasi ǀ vratyā́ḥ ǀ tásya ǀ viddhi ǀ
álarti ǀ dákṣaḥ ǀ utá ǀ manyúḥ ǀ indo íti ǀ mā́ ǀ naḥ ǀ aryáḥ ǀ anu-kāmám ǀ párā ǀ dāḥ ǁ
Padapatha Transcription Nonaccented
soma ǀ rājan ǀ mṛḷaya ǀ naḥ ǀ svasti ǀ tava ǀ smasi ǀ vratyāḥ ǀ tasya ǀ viddhi ǀ
alarti ǀ dakṣaḥ ǀ uta ǀ manyuḥ ǀ indo iti ǀ mā ǀ naḥ ǀ aryaḥ ǀ anu-kāmam ǀ parā ǀ dāḥ ǁ
08.048.09 (Mandala. Sukta. Rik)
6.4.12.04 (Ashtaka. Adhyaya. Varga. Rik)
08.06.165 (Mandala. Anuvāka. Rik)
Samhita Devanagari Accented
त्वं हि न॑स्त॒न्वः॑ सोम गो॒पा गात्रे॑गात्रे निष॒सत्था॑ नृ॒चक्षाः॑ ।
यत्ते॑ व॒यं प्र॑मि॒नाम॑ व्र॒तानि॒ स नो॑ मृळ सुष॒खा दे॑व॒ वस्यः॑ ॥
Samhita Devanagari Nonaccented
त्वं हि नस्तन्वः सोम गोपा गात्रेगात्रे निषसत्था नृचक्षाः ।
यत्ते वयं प्रमिनाम व्रतानि स नो मृळ सुषखा देव वस्यः ॥
Samhita Transcription Accented
tvám hí nastanváḥ soma gopā́ gā́tregātre niṣasátthā nṛcákṣāḥ ǀ
yátte vayám praminā́ma vratā́ni sá no mṛḷa suṣakhā́ deva vásyaḥ ǁ
Samhita Transcription Nonaccented
tvam hi nastanvaḥ soma gopā gātregātre niṣasatthā nṛcakṣāḥ ǀ
yatte vayam pramināma vratāni sa no mṛḷa suṣakhā deva vasyaḥ ǁ
Padapatha Devanagari Accented
त्वम् । हि । नः॒ । त॒न्वः॑ । सो॒म॒ । गो॒पाः । गात्रे॑ऽगात्रे । नि॒ऽस॒सत्थ॑ । नृ॒ऽचक्षाः॑ ।
यत् । ते॒ । व॒यम् । प्र॒ऽमि॒नाम॑ । व्र॒तानि॑ । सः । नः॒ । मृ॒ळ॒ । सु॒ऽस॒खा । दे॒व॒ । वस्यः॑ ॥
Padapatha Devanagari Nonaccented
त्वम् । हि । नः । तन्वः । सोम । गोपाः । गात्रेऽगात्रे । निऽससत्थ । नृऽचक्षाः ।
यत् । ते । वयम् । प्रऽमिनाम । व्रतानि । सः । नः । मृळ । सुऽसखा । देव । वस्यः ॥
Padapatha Transcription Accented
tvám ǀ hí ǀ naḥ ǀ tanváḥ ǀ soma ǀ gopā́ḥ ǀ gā́tre-gātre ǀ ni-sasáttha ǀ nṛ-cákṣāḥ ǀ
yát ǀ te ǀ vayám ǀ pra-minā́ma ǀ vratā́ni ǀ sáḥ ǀ naḥ ǀ mṛḷa ǀ su-sakhā́ ǀ deva ǀ vásyaḥ ǁ
Padapatha Transcription Nonaccented
tvam ǀ hi ǀ naḥ ǀ tanvaḥ ǀ soma ǀ gopāḥ ǀ gātre-gātre ǀ ni-sasattha ǀ nṛ-cakṣāḥ ǀ
yat ǀ te ǀ vayam ǀ pra-mināma ǀ vratāni ǀ saḥ ǀ naḥ ǀ mṛḷa ǀ su-sakhā ǀ deva ǀ vasyaḥ ǁ
08.048.10 (Mandala. Sukta. Rik)
6.4.12.05 (Ashtaka. Adhyaya. Varga. Rik)
08.06.166 (Mandala. Anuvāka. Rik)
Samhita Devanagari Accented
ऋ॒दू॒दरे॑ण॒ सख्या॑ सचेय॒ यो मा॒ न रिष्ये॑द्धर्यश्व पी॒तः ।
अ॒यं यः सोमो॒ न्यधा॑य्य॒स्मे तस्मा॒ इंद्रं॑ प्र॒तिर॑मे॒म्यायुः॑ ॥
Samhita Devanagari Nonaccented
ऋदूदरेण सख्या सचेय यो मा न रिष्येद्धर्यश्व पीतः ।
अयं यः सोमो न्यधाय्यस्मे तस्मा इंद्रं प्रतिरमेम्यायुः ॥
Samhita Transcription Accented
ṛdūdáreṇa sákhyā saceya yó mā ná ríṣyeddharyaśva pītáḥ ǀ
ayám yáḥ sómo nyádhāyyasmé tásmā índram pratíramemyā́yuḥ ǁ
Samhita Transcription Nonaccented
ṛdūdareṇa sakhyā saceya yo mā na riṣyeddharyaśva pītaḥ ǀ
ayam yaḥ somo nyadhāyyasme tasmā indram pratiramemyāyuḥ ǁ
Padapatha Devanagari Accented
ऋ॒दू॒दरे॑ण । सख्या॑ । स॒चे॒य॒ । यः । मा॒ । न । रिष्ये॑त् । ह॒रि॒ऽअ॒श्व॒ । पी॒तः ।
अ॒यम् । यः । सोमः॑ । नि । अधा॑यि । अ॒स्मे इति॑ । तस्मै॑ । इन्द्र॑म् । प्र॒ऽतिर॑म् । ए॒मि॒ । आयुः॑ ॥
Padapatha Devanagari Nonaccented
ऋदूदरेण । सख्या । सचेय । यः । मा । न । रिष्येत् । हरिऽअश्व । पीतः ।
अयम् । यः । सोमः । नि । अधायि । अस्मे इति । तस्मै । इन्द्रम् । प्रऽतिरम् । एमि । आयुः ॥
Padapatha Transcription Accented
ṛdūdáreṇa ǀ sákhyā ǀ saceya ǀ yáḥ ǀ mā ǀ ná ǀ ríṣyet ǀ hari-aśva ǀ pītáḥ ǀ
ayám ǀ yáḥ ǀ sómaḥ ǀ ní ǀ ádhāyi ǀ asmé íti ǀ tásmai ǀ índram ǀ pra-tíram ǀ emi ǀ ā́yuḥ ǁ
Padapatha Transcription Nonaccented
ṛdūdareṇa ǀ sakhyā ǀ saceya ǀ yaḥ ǀ mā ǀ na ǀ riṣyet ǀ hari-aśva ǀ pītaḥ ǀ
ayam ǀ yaḥ ǀ somaḥ ǀ ni ǀ adhāyi ǀ asme iti ǀ tasmai ǀ indram ǀ pra-tiram ǀ emi ǀ āyuḥ ǁ
08.048.11 (Mandala. Sukta. Rik)
6.4.13.01 (Ashtaka. Adhyaya. Varga. Rik)
08.06.167 (Mandala. Anuvāka. Rik)
Samhita Devanagari Accented
अप॒ त्या अ॑स्थु॒रनि॑रा॒ अमी॑वा॒ निर॑त्रसं॒तमि॑षीची॒रभै॑षुः ।
आ सोमो॑ अ॒स्माँ अ॑रुह॒द्विहा॑या॒ अग॑न्म॒ यत्र॑ प्रति॒रंत॒ आयुः॑ ॥
Samhita Devanagari Nonaccented
अप त्या अस्थुरनिरा अमीवा निरत्रसंतमिषीचीरभैषुः ।
आ सोमो अस्माँ अरुहद्विहाया अगन्म यत्र प्रतिरंत आयुः ॥
Samhita Transcription Accented
ápa tyā́ asthuránirā ámīvā níratrasantámiṣīcīrábhaiṣuḥ ǀ
ā́ sómo asmā́m̐ aruhadvíhāyā áganma yátra pratiránta ā́yuḥ ǁ
Samhita Transcription Nonaccented
apa tyā asthuranirā amīvā niratrasantamiṣīcīrabhaiṣuḥ ǀ
ā somo asmām̐ aruhadvihāyā aganma yatra pratiranta āyuḥ ǁ
Padapatha Devanagari Accented
अप॑ । त्याः । अ॒स्थुः॒ । अनि॑राः । अमी॑वाः । निः । अ॒त्र॒स॒न् । तमि॑षीचीः । अभै॑षुः ।
आ । सोमः॑ । अ॒स्मान् । अ॒रु॒ह॒त् । विऽहा॑याः । अग॑न्म । यत्र॑ । प्र॒ऽति॒रन्ते॑ । आयुः॑ ॥
Padapatha Devanagari Nonaccented
अप । त्याः । अस्थुः । अनिराः । अमीवाः । निः । अत्रसन् । तमिषीचीः । अभैषुः ।
आ । सोमः । अस्मान् । अरुहत् । विऽहायाः । अगन्म । यत्र । प्रऽतिरन्ते । आयुः ॥
Padapatha Transcription Accented
ápa ǀ tyā́ḥ ǀ asthuḥ ǀ ánirāḥ ǀ ámīvāḥ ǀ níḥ ǀ atrasan ǀ támiṣīcīḥ ǀ ábhaiṣuḥ ǀ
ā́ ǀ sómaḥ ǀ asmā́n ǀ aruhat ǀ ví-hāyāḥ ǀ áganma ǀ yátra ǀ pra-tiránte ǀ ā́yuḥ ǁ
Padapatha Transcription Nonaccented
apa ǀ tyāḥ ǀ asthuḥ ǀ anirāḥ ǀ amīvāḥ ǀ niḥ ǀ atrasan ǀ tamiṣīcīḥ ǀ abhaiṣuḥ ǀ
ā ǀ somaḥ ǀ asmān ǀ aruhat ǀ vi-hāyāḥ ǀ aganma ǀ yatra ǀ pra-tirante ǀ āyuḥ ǁ
08.048.12 (Mandala. Sukta. Rik)
6.4.13.02 (Ashtaka. Adhyaya. Varga. Rik)
08.06.168 (Mandala. Anuvāka. Rik)
Samhita Devanagari Accented
यो न॒ इंदुः॑ पितरो हृ॒त्सु पी॒तोऽम॑र्त्यो॒ मर्त्याँ॑ आवि॒वेश॑ ।
तस्मै॒ सोमा॑य ह॒विषा॑ विधेम मृळी॒के अ॑स्य सुम॒तौ स्या॑म ॥
Samhita Devanagari Nonaccented
यो न इंदुः पितरो हृत्सु पीतोऽमर्त्यो मर्त्याँ आविवेश ।
तस्मै सोमाय हविषा विधेम मृळीके अस्य सुमतौ स्याम ॥
Samhita Transcription Accented
yó na índuḥ pitaro hṛtsú pītó’martyo mártyām̐ āvivéśa ǀ
tásmai sómāya havíṣā vidhema mṛḷīké asya sumatáu syāma ǁ
Samhita Transcription Nonaccented
yo na induḥ pitaro hṛtsu pīto’martyo martyām̐ āviveśa ǀ
tasmai somāya haviṣā vidhema mṛḷīke asya sumatau syāma ǁ
Padapatha Devanagari Accented
यः । नः॒ । इन्दुः॑ । पि॒त॒रः॒ । हृ॒त्ऽसु । पी॒तः । अम॑र्त्यः । मर्त्या॑न् । आ॒ऽवि॒वेश॑ ।
तस्मै॑ । सोमा॑य । ह॒विषा॑ । वि॒धे॒म॒ । मृ॒ळी॒के । अ॒स्य॒ । सु॒ऽम॒तौ । स्या॒म॒ ॥
Padapatha Devanagari Nonaccented
यः । नः । इन्दुः । पितरः । हृत्ऽसु । पीतः । अमर्त्यः । मर्त्यान् । आऽविवेश ।
तस्मै । सोमाय । हविषा । विधेम । मृळीके । अस्य । सुऽमतौ । स्याम ॥
Padapatha Transcription Accented
yáḥ ǀ naḥ ǀ índuḥ ǀ pitaraḥ ǀ hṛt-sú ǀ pītáḥ ǀ ámartyaḥ ǀ mártyān ǀ ā-vivéśa ǀ
tásmai ǀ sómāya ǀ havíṣā ǀ vidhema ǀ mṛḷīké ǀ asya ǀ su-matáu ǀ syāma ǁ
Padapatha Transcription Nonaccented
yaḥ ǀ naḥ ǀ induḥ ǀ pitaraḥ ǀ hṛt-su ǀ pītaḥ ǀ amartyaḥ ǀ martyān ǀ ā-viveśa ǀ
tasmai ǀ somāya ǀ haviṣā ǀ vidhema ǀ mṛḷīke ǀ asya ǀ su-matau ǀ syāma ǁ
08.048.13 (Mandala. Sukta. Rik)
6.4.13.03 (Ashtaka. Adhyaya. Varga. Rik)
08.06.169 (Mandala. Anuvāka. Rik)
Samhita Devanagari Accented
त्वं सो॑म पि॒तृभिः॑ संविदा॒नोऽनु॒ द्यावा॑पृथि॒वी आ त॑तंथ ।
तस्मै॑ त इंदो ह॒विषा॑ विधेम व॒यं स्या॑म॒ पत॑यो रयी॒णां ॥
Samhita Devanagari Nonaccented
त्वं सोम पितृभिः संविदानोऽनु द्यावापृथिवी आ ततंथ ।
तस्मै त इंदो हविषा विधेम वयं स्याम पतयो रयीणां ॥
Samhita Transcription Accented
tvám soma pitṛ́bhiḥ saṃvidānó’nu dyā́vāpṛthivī́ ā́ tatantha ǀ
tásmai ta indo havíṣā vidhema vayám syāma pátayo rayīṇā́m ǁ
Samhita Transcription Nonaccented
tvam soma pitṛbhiḥ saṃvidāno’nu dyāvāpṛthivī ā tatantha ǀ
tasmai ta indo haviṣā vidhema vayam syāma patayo rayīṇām ǁ
Padapatha Devanagari Accented
त्वम् । सो॒म॒ । पि॒तृऽभिः॑ । स॒म्ऽवि॒दा॒नः । अनु॑ । द्यावा॑पृथि॒वी इति॑ । आ । त॒त॒न्थ॒ ।
तस्मै॑ । ते॒ । इ॒न्दो॒ इति॑ । ह॒विषा॑ । वि॒धे॒म॒ । व॒यम् । स्या॒म॒ । पत॑यः । र॒यी॒णाम् ॥
Padapatha Devanagari Nonaccented
त्वम् । सोम । पितृऽभिः । सम्ऽविदानः । अनु । द्यावापृथिवी इति । आ । ततन्थ ।
तस्मै । ते । इन्दो इति । हविषा । विधेम । वयम् । स्याम । पतयः । रयीणाम् ॥
Padapatha Transcription Accented
tvám ǀ soma ǀ pitṛ́-bhiḥ ǀ sam-vidānáḥ ǀ ánu ǀ dyā́vāpṛthivī́ íti ǀ ā́ ǀ tatantha ǀ
tásmai ǀ te ǀ indo íti ǀ havíṣā ǀ vidhema ǀ vayám ǀ syāma ǀ pátayaḥ ǀ rayīṇā́m ǁ
Padapatha Transcription Nonaccented
tvam ǀ soma ǀ pitṛ-bhiḥ ǀ sam-vidānaḥ ǀ anu ǀ dyāvāpṛthivī iti ǀ ā ǀ tatantha ǀ
tasmai ǀ te ǀ indo iti ǀ haviṣā ǀ vidhema ǀ vayam ǀ syāma ǀ patayaḥ ǀ rayīṇām ǁ
08.048.14 (Mandala. Sukta. Rik)
6.4.13.04 (Ashtaka. Adhyaya. Varga. Rik)
08.06.170 (Mandala. Anuvāka. Rik)
Samhita Devanagari Accented
त्राता॑रो देवा॒ अधि॑ वोचता नो॒ मा नो॑ नि॒द्रा ई॑शत॒ मोत जल्पिः॑ ।
व॒यं सोम॑स्य वि॒श्वह॑ प्रि॒यासः॑ सु॒वीरा॑सो वि॒दथ॒मा व॑देम ॥
Samhita Devanagari Nonaccented
त्रातारो देवा अधि वोचता नो मा नो निद्रा ईशत मोत जल्पिः ।
वयं सोमस्य विश्वह प्रियासः सुवीरासो विदथमा वदेम ॥
Samhita Transcription Accented
trā́tāro devā ádhi vocatā no mā́ no nidrā́ īśata mótá jálpiḥ ǀ
vayám sómasya viśváha priyā́saḥ suvī́rāso vidáthamā́ vadema ǁ
Samhita Transcription Nonaccented
trātāro devā adhi vocatā no mā no nidrā īśata mota jalpiḥ ǀ
vayam somasya viśvaha priyāsaḥ suvīrāso vidathamā vadema ǁ
Padapatha Devanagari Accented
त्राता॑रः । दे॒वाः॒ । अधि॑ । वो॒च॒त॒ । नः॒ । मा । नः॒ । नि॒ऽद्रा । ई॒श॒त॒ । मा । उ॒त । जल्पिः॑ ।
व॒यम् । सोम॑स्य । वि॒श्वह॑ । प्रि॒यासः॑ । सु॒ऽवीरा॑सः । वि॒दथ॑म् । आ । व॒दे॒म॒ ॥
Padapatha Devanagari Nonaccented
त्रातारः । देवाः । अधि । वोचत । नः । मा । नः । निऽद्रा । ईशत । मा । उत । जल्पिः ।
वयम् । सोमस्य । विश्वह । प्रियासः । सुऽवीरासः । विदथम् । आ । वदेम ॥
Padapatha Transcription Accented
trā́tāraḥ ǀ devāḥ ǀ ádhi ǀ vocata ǀ naḥ ǀ mā́ ǀ naḥ ǀ ni-drā́ ǀ īśata ǀ mā́ ǀ utá ǀ jálpiḥ ǀ
vayám ǀ sómasya ǀ viśváha ǀ priyā́saḥ ǀ su-vī́rāsaḥ ǀ vidátham ǀ ā́ ǀ vadema ǁ
Padapatha Transcription Nonaccented
trātāraḥ ǀ devāḥ ǀ adhi ǀ vocata ǀ naḥ ǀ mā ǀ naḥ ǀ ni-drā ǀ īśata ǀ mā ǀ uta ǀ jalpiḥ ǀ
vayam ǀ somasya ǀ viśvaha ǀ priyāsaḥ ǀ su-vīrāsaḥ ǀ vidatham ǀ ā ǀ vadema ǁ
08.048.15 (Mandala. Sukta. Rik)
6.4.13.05 (Ashtaka. Adhyaya. Varga. Rik)
08.06.171 (Mandala. Anuvāka. Rik)
Samhita Devanagari Accented
त्वं नः॑ सोम वि॒श्वतो॑ वयो॒धास्त्वं स्व॒र्विदा वि॑शा नृ॒चक्षाः॑ ।
त्वं न॑ इंद ऊ॒तिभिः॑ स॒जोषाः॑ पा॒हि प॒श्चाता॑दु॒त वा॑ पु॒रस्ता॑त् ॥
Samhita Devanagari Nonaccented
त्वं नः सोम विश्वतो वयोधास्त्वं स्वर्विदा विशा नृचक्षाः ।
त्वं न इंद ऊतिभिः सजोषाः पाहि पश्चातादुत वा पुरस्तात् ॥
Samhita Transcription Accented
tvám naḥ soma viśváto vayodhā́stvám svarvídā́ viśā nṛcákṣāḥ ǀ
tvám na inda ūtíbhiḥ sajóṣāḥ pāhí paścā́tādutá vā purástāt ǁ
Samhita Transcription Nonaccented
tvam naḥ soma viśvato vayodhāstvam svarvidā viśā nṛcakṣāḥ ǀ
tvam na inda ūtibhiḥ sajoṣāḥ pāhi paścātāduta vā purastāt ǁ
Padapatha Devanagari Accented
त्वम् । नः॒ । सो॒म॒ । वि॒श्वतः॑ । व॒यः॒ऽधाः । त्वम् । स्वः॒ऽवित् । आ । वि॒श॒ । नृ॒ऽचक्षाः॑ ।
त्वम् । नः॒ । इ॒न्दो॒ इति॑ । ऊ॒तिऽभिः॑ । स॒ऽजोषाः॑ । पा॒हि । प॒श्चाता॑त् । उ॒त । वा॒ । पु॒रस्ता॑त् ॥
Padapatha Devanagari Nonaccented
त्वम् । नः । सोम । विश्वतः । वयःऽधाः । त्वम् । स्वःऽवित् । आ । विश । नृऽचक्षाः ।
त्वम् । नः । इन्दो इति । ऊतिऽभिः । सऽजोषाः । पाहि । पश्चातात् । उत । वा । पुरस्तात् ॥
Padapatha Transcription Accented
tvám ǀ naḥ ǀ soma ǀ viśvátaḥ ǀ vayaḥ-dhā́ḥ ǀ tvám ǀ svaḥ-vít ǀ ā́ ǀ viśa ǀ nṛ-cákṣāḥ ǀ
tvám ǀ naḥ ǀ indo íti ǀ ūtí-bhiḥ ǀ sa-jóṣāḥ ǀ pāhí ǀ paścā́tāt ǀ utá ǀ vā ǀ purástāt ǁ
Padapatha Transcription Nonaccented
tvam ǀ naḥ ǀ soma ǀ viśvataḥ ǀ vayaḥ-dhāḥ ǀ tvam ǀ svaḥ-vit ǀ ā ǀ viśa ǀ nṛ-cakṣāḥ ǀ
tvam ǀ naḥ ǀ indo iti ǀ ūti-bhiḥ ǀ sa-joṣāḥ ǀ pāhi ǀ paścātāt ǀ uta ǀ vā ǀ purastāt ǁ