|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 49
|
1. Info |
| To: | indra | |
| From: | praskaṇva kāṇva | |
| Metres: | 1st set of styles: nicṛtpaṅkti (4, 6, 8, 10); nicṛdbṛhatī (7, 9); bṛhatī (1); paṅktiḥ (2); virāḍbṛhatī (3); bhurigbṛhatī (5) 2nd set of styles: bṛhatī (1, 3, 5, 7, 9); satobṛhatī (2, 4, 6, 8, 10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.049.01 (Mandala. Sukta. Rik)
6.4.14.01 (Ashtaka. Adhyaya. Varga. Rik)
08.06.172 (Mandala. Anuvāka. Rik)
Samhita Devanagari Accented
अ॒भि प्र वः॑ सु॒राध॑स॒मिंद्र॑मर्च॒ यथा॑ वि॒दे ।
यो ज॑रि॒तृभ्यो॑ म॒घवा॑ पुरू॒वसुः॑ स॒हस्रे॑णेव॒ शिक्ष॑ति ॥
Samhita Devanagari Nonaccented
अभि प्र वः सुराधसमिंद्रमर्च यथा विदे ।
यो जरितृभ्यो मघवा पुरूवसुः सहस्रेणेव शिक्षति ॥
Samhita Transcription Accented
abhí prá vaḥ surā́dhasamíndramarca yáthā vidé ǀ
yó jaritṛ́bhyo maghávā purūvásuḥ sahásreṇeva śíkṣati ǁ
Samhita Transcription Nonaccented
abhi pra vaḥ surādhasamindramarca yathā vide ǀ
yo jaritṛbhyo maghavā purūvasuḥ sahasreṇeva śikṣati ǁ
Padapatha Devanagari Accented
अ॒भि । प्र । वः॒ । सु॒ऽराध॑सम् । इन्द्र॑म् । अ॒र्च॒ । यथा॑ । वि॒दे ।
यः । ज॒रि॒तृऽभ्यः॑ । म॒घऽवा॑ । पु॒रु॒ऽवसुः॑ । स॒हस्रे॑णऽइव । शिक्ष॑ति ॥
Padapatha Devanagari Nonaccented
अभि । प्र । वः । सुऽराधसम् । इन्द्रम् । अर्च । यथा । विदे ।
यः । जरितृऽभ्यः । मघऽवा । पुरुऽवसुः । सहस्रेणऽइव । शिक्षति ॥
Padapatha Transcription Accented
abhí ǀ prá ǀ vaḥ ǀ su-rā́dhasam ǀ índram ǀ arca ǀ yáthā ǀ vidé ǀ
yáḥ ǀ jaritṛ́-bhyaḥ ǀ maghá-vā ǀ puru-vásuḥ ǀ sahásreṇa-iva ǀ śíkṣati ǁ
Padapatha Transcription Nonaccented
abhi ǀ pra ǀ vaḥ ǀ su-rādhasam ǀ indram ǀ arca ǀ yathā ǀ vide ǀ
yaḥ ǀ jaritṛ-bhyaḥ ǀ magha-vā ǀ puru-vasuḥ ǀ sahasreṇa-iva ǀ śikṣati ǁ
08.049.02 (Mandala. Sukta. Rik)
6.4.14.02 (Ashtaka. Adhyaya. Varga. Rik)
08.06.173 (Mandala. Anuvāka. Rik)
Samhita Devanagari Accented
श॒तानी॑केव॒ प्र जि॑गाति धृष्णु॒या हंति॑ वृ॒त्राणि॑ दा॒शुषे॑ ।
गि॒रेरि॑व॒ प्र रसा॑ अस्य पिन्विरे॒ दत्रा॑णि पुरु॒भोज॑सः ॥
Samhita Devanagari Nonaccented
शतानीकेव प्र जिगाति धृष्णुया हंति वृत्राणि दाशुषे ।
गिरेरिव प्र रसा अस्य पिन्विरे दत्राणि पुरुभोजसः ॥
Samhita Transcription Accented
śatā́nīkeva prá jigāti dhṛṣṇuyā́ hánti vṛtrā́ṇi dāśúṣe ǀ
girériva prá rásā asya pinvire dátrāṇi purubhójasaḥ ǁ
Samhita Transcription Nonaccented
śatānīkeva pra jigāti dhṛṣṇuyā hanti vṛtrāṇi dāśuṣe ǀ
gireriva pra rasā asya pinvire datrāṇi purubhojasaḥ ǁ
Padapatha Devanagari Accented
श॒तानी॑काऽइव । प्र । जि॒गा॒ति॒ । धृ॒ष्णु॒ऽया । हन्ति॑ । वृ॒त्राणि॑ । दा॒शुषे॑ ।
गि॒रेःऽइ॑व । प्र । रसाः॑ । अ॒स्य॒ । पि॒न्वि॒रे॒ । दत्रा॑णि । पु॒रु॒ऽभोज॑सः ॥
Padapatha Devanagari Nonaccented
शतानीकाऽइव । प्र । जिगाति । धृष्णुऽया । हन्ति । वृत्राणि । दाशुषे ।
गिरेःऽइव । प्र । रसाः । अस्य । पिन्विरे । दत्राणि । पुरुऽभोजसः ॥
Padapatha Transcription Accented
śatā́nīkā-iva ǀ prá ǀ jigāti ǀ dhṛṣṇu-yā́ ǀ hánti ǀ vṛtrā́ṇi ǀ dāśúṣe ǀ
giréḥ-iva ǀ prá ǀ rásāḥ ǀ asya ǀ pinvire ǀ dátrāṇi ǀ puru-bhójasaḥ ǁ
Padapatha Transcription Nonaccented
śatānīkā-iva ǀ pra ǀ jigāti ǀ dhṛṣṇu-yā ǀ hanti ǀ vṛtrāṇi ǀ dāśuṣe ǀ
gireḥ-iva ǀ pra ǀ rasāḥ ǀ asya ǀ pinvire ǀ datrāṇi ǀ puru-bhojasaḥ ǁ
08.049.03 (Mandala. Sukta. Rik)
6.4.14.03 (Ashtaka. Adhyaya. Varga. Rik)
08.06.174 (Mandala. Anuvāka. Rik)
Samhita Devanagari Accented
आ त्वा॑ सु॒तास॒ इंद॑वो॒ मदा॒ य इं॑द्र गिर्वणः ।
आपो॒ न व॑ज्रि॒न्नन्वो॒क्यं१॒॑ सरः॑ पृ॒णंति॑ शूर॒ राध॑से ॥
Samhita Devanagari Nonaccented
आ त्वा सुतास इंदवो मदा य इंद्र गिर्वणः ।
आपो न वज्रिन्नन्वोक्यं सरः पृणंति शूर राधसे ॥
Samhita Transcription Accented
ā́ tvā sutā́sa índavo mádā yá indra girvaṇaḥ ǀ
ā́po ná vajrinnánvokyám sáraḥ pṛṇánti śūra rā́dhase ǁ
Samhita Transcription Nonaccented
ā tvā sutāsa indavo madā ya indra girvaṇaḥ ǀ
āpo na vajrinnanvokyam saraḥ pṛṇanti śūra rādhase ǁ
Padapatha Devanagari Accented
आ । त्वा॒ । सु॒तासः॑ । इन्द॑वः । मदाः॑ । ये । इ॒न्द्र॒ । गि॒र्व॒णः॒ ।
आपः॑ । न । व॒ज्रि॒न् । अनु॑ । ओ॒क्य॑म् । सरः॑ । पृ॒णन्ति॑ । शू॒र॒ । राध॑से ॥
Padapatha Devanagari Nonaccented
आ । त्वा । सुतासः । इन्दवः । मदाः । ये । इन्द्र । गिर्वणः ।
आपः । न । वज्रिन् । अनु । ओक्यम् । सरः । पृणन्ति । शूर । राधसे ॥
Padapatha Transcription Accented
ā́ ǀ tvā ǀ sutā́saḥ ǀ índavaḥ ǀ mádāḥ ǀ yé ǀ indra ǀ girvaṇaḥ ǀ
ā́paḥ ǀ ná ǀ vajrin ǀ ánu ǀ okyám ǀ sáraḥ ǀ pṛṇánti ǀ śūra ǀ rā́dhase ǁ
Padapatha Transcription Nonaccented
ā ǀ tvā ǀ sutāsaḥ ǀ indavaḥ ǀ madāḥ ǀ ye ǀ indra ǀ girvaṇaḥ ǀ
āpaḥ ǀ na ǀ vajrin ǀ anu ǀ okyam ǀ saraḥ ǀ pṛṇanti ǀ śūra ǀ rādhase ǁ
08.049.04 (Mandala. Sukta. Rik)
6.4.14.04 (Ashtaka. Adhyaya. Varga. Rik)
08.06.175 (Mandala. Anuvāka. Rik)
Samhita Devanagari Accented
अ॒ने॒हसं॑ प्र॒तर॑णं वि॒वक्ष॑णं॒ मध्वः॒ स्वादि॑ष्ठमीं पिब ।
आ यथा॑ मंदसा॒नः कि॒रासि॑ नः॒ प्र क्षु॒द्रेव॒ त्मना॑ धृ॒षत् ॥
Samhita Devanagari Nonaccented
अनेहसं प्रतरणं विवक्षणं मध्वः स्वादिष्ठमीं पिब ।
आ यथा मंदसानः किरासि नः प्र क्षुद्रेव त्मना धृषत् ॥
Samhita Transcription Accented
anehásam pratáraṇam vivákṣaṇam mádhvaḥ svā́diṣṭhamīm piba ǀ
ā́ yáthā mandasānáḥ kirā́si naḥ prá kṣudréva tmánā dhṛṣát ǁ
Samhita Transcription Nonaccented
anehasam prataraṇam vivakṣaṇam madhvaḥ svādiṣṭhamīm piba ǀ
ā yathā mandasānaḥ kirāsi naḥ pra kṣudreva tmanā dhṛṣat ǁ
Padapatha Devanagari Accented
अ॒ने॒हस॑म् । प्र॒ऽतर॑णम् । वि॒वक्ष॑णम् । मध्वः॑ । स्वादि॑ष्ठम् । ई॒म् । पि॒ब॒ ।
आ । यथा॑ । म॒न्द॒सा॒नः । कि॒रासि॑ । नः॒ । प्र । क्षु॒द्राऽइ॑व । त्मना॑ । धृ॒षत् ॥
Padapatha Devanagari Nonaccented
अनेहसम् । प्रऽतरणम् । विवक्षणम् । मध्वः । स्वादिष्ठम् । ईम् । पिब ।
आ । यथा । मन्दसानः । किरासि । नः । प्र । क्षुद्राऽइव । त्मना । धृषत् ॥
Padapatha Transcription Accented
anehásam ǀ pra-táraṇam ǀ vivákṣaṇam ǀ mádhvaḥ ǀ svā́diṣṭham ǀ īm ǀ piba ǀ
ā́ ǀ yáthā ǀ mandasānáḥ ǀ kirā́si ǀ naḥ ǀ prá ǀ kṣudrā́-iva ǀ tmánā ǀ dhṛṣát ǁ
Padapatha Transcription Nonaccented
anehasam ǀ pra-taraṇam ǀ vivakṣaṇam ǀ madhvaḥ ǀ svādiṣṭham ǀ īm ǀ piba ǀ
ā ǀ yathā ǀ mandasānaḥ ǀ kirāsi ǀ naḥ ǀ pra ǀ kṣudrā-iva ǀ tmanā ǀ dhṛṣat ǁ
08.049.05 (Mandala. Sukta. Rik)
6.4.14.05 (Ashtaka. Adhyaya. Varga. Rik)
08.06.176 (Mandala. Anuvāka. Rik)
Samhita Devanagari Accented
आ नः॒ स्तोम॒मुप॑ द्र॒वद्धि॑या॒नो अश्वो॒ न सोतृ॑भिः ।
यं ते॑ स्वधावन्त्स्व॒दयं॑ति धे॒नव॒ इंद्र॒ कण्वे॑षु रा॒तयः॑ ॥
Samhita Devanagari Nonaccented
आ नः स्तोममुप द्रवद्धियानो अश्वो न सोतृभिः ।
यं ते स्वधावन्त्स्वदयंति धेनव इंद्र कण्वेषु रातयः ॥
Samhita Transcription Accented
ā́ naḥ stómamúpa draváddhiyānó áśvo ná sótṛbhiḥ ǀ
yám te svadhāvantsvadáyanti dhenáva índra káṇveṣu rātáyaḥ ǁ
Samhita Transcription Nonaccented
ā naḥ stomamupa dravaddhiyāno aśvo na sotṛbhiḥ ǀ
yam te svadhāvantsvadayanti dhenava indra kaṇveṣu rātayaḥ ǁ
Padapatha Devanagari Accented
आ । नः॒ । स्तोम॑म् । उप॑ । द्र॒वत् । हि॒या॒नः । अश्वः॑ । न । सोतृ॑ऽभिः ।
यम् । ते॒ । स्व॒धा॒ऽव॒न् । स्व॒दय॑न्ति । धे॒नवः॑ । इन्द्र॑ । कण्वे॑षु । रा॒तयः॑ ॥
Padapatha Devanagari Nonaccented
आ । नः । स्तोमम् । उप । द्रवत् । हियानः । अश्वः । न । सोतृऽभिः ।
यम् । ते । स्वधाऽवन् । स्वदयन्ति । धेनवः । इन्द्र । कण्वेषु । रातयः ॥
Padapatha Transcription Accented
ā́ ǀ naḥ ǀ stómam ǀ úpa ǀ dravát ǀ hiyānáḥ ǀ áśvaḥ ǀ ná ǀ sótṛ-bhiḥ ǀ
yám ǀ te ǀ svadhā-van ǀ svadáyanti ǀ dhenávaḥ ǀ índra ǀ káṇveṣu ǀ rātáyaḥ ǁ
Padapatha Transcription Nonaccented
ā ǀ naḥ ǀ stomam ǀ upa ǀ dravat ǀ hiyānaḥ ǀ aśvaḥ ǀ na ǀ sotṛ-bhiḥ ǀ
yam ǀ te ǀ svadhā-van ǀ svadayanti ǀ dhenavaḥ ǀ indra ǀ kaṇveṣu ǀ rātayaḥ ǁ
08.049.06 (Mandala. Sukta. Rik)
6.4.15.01 (Ashtaka. Adhyaya. Varga. Rik)
08.06.177 (Mandala. Anuvāka. Rik)
Samhita Devanagari Accented
उ॒ग्रं न वी॒रं नम॒सोप॑ सेदिम॒ विभू॑ति॒मक्षि॑तावसुं ।
उ॒द्रीव॑ वज्रिन्नव॒तो न सिं॑च॒ते क्षरं॑तींद्र धी॒तयः॑ ॥
Samhita Devanagari Nonaccented
उग्रं न वीरं नमसोप सेदिम विभूतिमक्षितावसुं ।
उद्रीव वज्रिन्नवतो न सिंचते क्षरंतींद्र धीतयः ॥
Samhita Transcription Accented
ugrám ná vīrám námasópa sedima víbhūtimákṣitāvasum ǀ
udrī́va vajrinnavató ná siñcaté kṣárantīndra dhītáyaḥ ǁ
Samhita Transcription Nonaccented
ugram na vīram namasopa sedima vibhūtimakṣitāvasum ǀ
udrīva vajrinnavato na siñcate kṣarantīndra dhītayaḥ ǁ
Padapatha Devanagari Accented
उ॒ग्रम् । न । वी॒रम् । नम॑सा । उप॑ । से॒दि॒म॒ । विऽभू॑तिम् । अक्षि॑तऽवसुम् ।
उ॒द्रीऽइ॑व । व॒ज्रि॒न् । अ॒व॒तः । न । सि॒ञ्च॒ते । क्षर॑न्ति । इ॒न्द्र॒ । धी॒तयः॑ ॥
Padapatha Devanagari Nonaccented
उग्रम् । न । वीरम् । नमसा । उप । सेदिम । विऽभूतिम् । अक्षितऽवसुम् ।
उद्रीऽइव । वज्रिन् । अवतः । न । सिञ्चते । क्षरन्ति । इन्द्र । धीतयः ॥
Padapatha Transcription Accented
ugrám ǀ ná ǀ vīrám ǀ námasā ǀ úpa ǀ sedima ǀ ví-bhūtim ǀ ákṣita-vasum ǀ
udrī́-iva ǀ vajrin ǀ avatáḥ ǀ ná ǀ siñcaté ǀ kṣáranti ǀ indra ǀ dhītáyaḥ ǁ
Padapatha Transcription Nonaccented
ugram ǀ na ǀ vīram ǀ namasā ǀ upa ǀ sedima ǀ vi-bhūtim ǀ akṣita-vasum ǀ
udrī-iva ǀ vajrin ǀ avataḥ ǀ na ǀ siñcate ǀ kṣaranti ǀ indra ǀ dhītayaḥ ǁ
08.049.07 (Mandala. Sukta. Rik)
6.4.15.02 (Ashtaka. Adhyaya. Varga. Rik)
08.06.178 (Mandala. Anuvāka. Rik)
Samhita Devanagari Accented
यद्ध॑ नू॒नं यद्वा॑ य॒ज्ञे यद्वा॑ पृथि॒व्यामधि॑ ।
अतो॑ नो य॒ज्ञमा॒शुभि॑र्महेमत उ॒ग्र उ॒ग्रेभि॒रा ग॑हि ॥
Samhita Devanagari Nonaccented
यद्ध नूनं यद्वा यज्ञे यद्वा पृथिव्यामधि ।
अतो नो यज्ञमाशुभिर्महेमत उग्र उग्रेभिरा गहि ॥
Samhita Transcription Accented
yáddha nūnám yádvā yajñé yádvā pṛthivyā́mádhi ǀ
áto no yajñámāśúbhirmahemata ugrá ugrébhirā́ gahi ǁ
Samhita Transcription Nonaccented
yaddha nūnam yadvā yajñe yadvā pṛthivyāmadhi ǀ
ato no yajñamāśubhirmahemata ugra ugrebhirā gahi ǁ
Padapatha Devanagari Accented
यत् । ह॒ । नू॒नम् । यत् । वा॒ । य॒ज्ञे । यत् । वा॒ । पृ॒थि॒व्याम् । अधि॑ ।
अतः॑ । नः॒ । य॒ज्ञम् । आ॒शुऽभिः॑ । म॒हे॒ऽम॒ते॒ । उ॒ग्रः । उ॒ग्रेभिः॑ । आ । ग॒हि॒ ॥
Padapatha Devanagari Nonaccented
यत् । ह । नूनम् । यत् । वा । यज्ञे । यत् । वा । पृथिव्याम् । अधि ।
अतः । नः । यज्ञम् । आशुऽभिः । महेऽमते । उग्रः । उग्रेभिः । आ । गहि ॥
Padapatha Transcription Accented
yát ǀ ha ǀ nūnám ǀ yát ǀ vā ǀ yajñé ǀ yát ǀ vā ǀ pṛthivyā́m ǀ ádhi ǀ
átaḥ ǀ naḥ ǀ yajñám ǀ āśú-bhiḥ ǀ mahe-mate ǀ ugráḥ ǀ ugrébhiḥ ǀ ā́ ǀ gahi ǁ
Padapatha Transcription Nonaccented
yat ǀ ha ǀ nūnam ǀ yat ǀ vā ǀ yajñe ǀ yat ǀ vā ǀ pṛthivyām ǀ adhi ǀ
ataḥ ǀ naḥ ǀ yajñam ǀ āśu-bhiḥ ǀ mahe-mate ǀ ugraḥ ǀ ugrebhiḥ ǀ ā ǀ gahi ǁ
08.049.08 (Mandala. Sukta. Rik)
6.4.15.03 (Ashtaka. Adhyaya. Varga. Rik)
08.06.179 (Mandala. Anuvāka. Rik)
Samhita Devanagari Accented
अ॒जि॒रासो॒ हर॑यो॒ ये त॑ आ॒शवो॒ वाता॑ इव प्रस॒क्षिणः॑ ।
येभि॒रप॑त्यं॒ मनु॑षः प॒रीय॑से॒ येभि॒र्विश्वं॒ स्व॑र्दृ॒शे ॥
Samhita Devanagari Nonaccented
अजिरासो हरयो ये त आशवो वाता इव प्रसक्षिणः ।
येभिरपत्यं मनुषः परीयसे येभिर्विश्वं स्वर्दृशे ॥
Samhita Transcription Accented
ajirā́so hárayo yé ta āśávo vā́tā iva prasakṣíṇaḥ ǀ
yébhirápatyam mánuṣaḥ parī́yase yébhirvíśvam svárdṛśé ǁ
Samhita Transcription Nonaccented
ajirāso harayo ye ta āśavo vātā iva prasakṣiṇaḥ ǀ
yebhirapatyam manuṣaḥ parīyase yebhirviśvam svardṛśe ǁ
Padapatha Devanagari Accented
अ॒जि॒रासः॑ । हर॑यः । ये । ते॒ । आ॒शवः॑ । वाताः॑ऽइव । प्र॒ऽस॒क्षिणः॑ ।
येभिः॑ । अप॑त्यम् । मनु॑षः । प॒रि॒ऽईय॑से । येभिः॑ । विश्व॑म् । स्वः॑ । दृ॒शे ॥
Padapatha Devanagari Nonaccented
अजिरासः । हरयः । ये । ते । आशवः । वाताःऽइव । प्रऽसक्षिणः ।
येभिः । अपत्यम् । मनुषः । परिऽईयसे । येभिः । विश्वम् । स्वः । दृशे ॥
Padapatha Transcription Accented
ajirā́saḥ ǀ hárayaḥ ǀ yé ǀ te ǀ āśávaḥ ǀ vā́tāḥ-iva ǀ pra-sakṣíṇaḥ ǀ
yébhiḥ ǀ ápatyam ǀ mánuṣaḥ ǀ pari-ī́yase ǀ yébhiḥ ǀ víśvam ǀ sváḥ ǀ dṛśé ǁ
Padapatha Transcription Nonaccented
ajirāsaḥ ǀ harayaḥ ǀ ye ǀ te ǀ āśavaḥ ǀ vātāḥ-iva ǀ pra-sakṣiṇaḥ ǀ
yebhiḥ ǀ apatyam ǀ manuṣaḥ ǀ pari-īyase ǀ yebhiḥ ǀ viśvam ǀ svaḥ ǀ dṛśe ǁ
08.049.09 (Mandala. Sukta. Rik)
6.4.15.04 (Ashtaka. Adhyaya. Varga. Rik)
08.06.180 (Mandala. Anuvāka. Rik)
Samhita Devanagari Accented
ए॒ताव॑तस्त ईमह॒ इंद्र॑ सु॒म्नस्य॒ गोम॑तः ।
यथा॒ प्रावो॑ मघव॒न्मेध्या॑तिथिं॒ यथा॒ नीपा॑तिथिं॒ धने॑ ॥
Samhita Devanagari Nonaccented
एतावतस्त ईमह इंद्र सुम्नस्य गोमतः ।
यथा प्रावो मघवन्मेध्यातिथिं यथा नीपातिथिं धने ॥
Samhita Transcription Accented
etā́vatasta īmaha índra sumnásya gómataḥ ǀ
yáthā prā́vo maghavanmédhyātithim yáthā nī́pātithim dháne ǁ
Samhita Transcription Nonaccented
etāvatasta īmaha indra sumnasya gomataḥ ǀ
yathā prāvo maghavanmedhyātithim yathā nīpātithim dhane ǁ
Padapatha Devanagari Accented
ए॒ताव॑तः । ते॒ । ई॒म॒हे॒ । इन्द्र॑ । सु॒म्नस्य॑ । गोऽम॑तः ।
यथा॑ । प्र । आवः॑ । म॒घ॒ऽव॒न् । मेध्य॑ऽअतिथिम् । यथा॑ । नीप॑ऽअतिथिम् । धने॑ ॥
Padapatha Devanagari Nonaccented
एतावतः । ते । ईमहे । इन्द्र । सुम्नस्य । गोऽमतः ।
यथा । प्र । आवः । मघऽवन् । मेध्यऽअतिथिम् । यथा । नीपऽअतिथिम् । धने ॥
Padapatha Transcription Accented
etā́vataḥ ǀ te ǀ īmahe ǀ índra ǀ sumnásya ǀ gó-mataḥ ǀ
yáthā ǀ prá ǀ ā́vaḥ ǀ magha-van ǀ médhya-atithim ǀ yáthā ǀ nī́pa-atithim ǀ dháne ǁ
Padapatha Transcription Nonaccented
etāvataḥ ǀ te ǀ īmahe ǀ indra ǀ sumnasya ǀ go-mataḥ ǀ
yathā ǀ pra ǀ āvaḥ ǀ magha-van ǀ medhya-atithim ǀ yathā ǀ nīpa-atithim ǀ dhane ǁ
08.049.10 (Mandala. Sukta. Rik)
6.4.15.05 (Ashtaka. Adhyaya. Varga. Rik)
08.06.181 (Mandala. Anuvāka. Rik)
Samhita Devanagari Accented
यथा॒ कण्वे॑ मघवंत्र॒सद॑स्यवि॒ यथा॑ प॒क्थे दश॑व्रजे ।
यथा॒ गोश॑र्ये॒ अस॑नोर्ऋ॒जिश्व॒नींद्र॒ गोम॒द्धिर॑ण्यवत् ॥
Samhita Devanagari Nonaccented
यथा कण्वे मघवंत्रसदस्यवि यथा पक्थे दशव्रजे ।
यथा गोशर्ये असनोर्ऋजिश्वनींद्र गोमद्धिरण्यवत् ॥
Samhita Transcription Accented
yáthā káṇve maghavantrasádasyavi yáthā pakthé dáśavraje ǀ
yáthā góśarye ásanorṛjíśvanī́ndra gómaddhíraṇyavat ǁ
Samhita Transcription Nonaccented
yathā kaṇve maghavantrasadasyavi yathā pakthe daśavraje ǀ
yathā gośarye asanorṛjiśvanīndra gomaddhiraṇyavat ǁ
Padapatha Devanagari Accented
यथा॑ । कण्वे॑ । म॒घ॒ऽव॒न् । त्र॒सद॑स्यवि । यथा॑ । प॒क्थे । दश॑ऽव्रजे ।
यथा॑ । गोऽश॑र्ये । अस॑नोः । ऋ॒जिश्व॑नि । इन्द्र॑ । गोऽम॑त् । हिर॑ण्यऽवत् ॥
Padapatha Devanagari Nonaccented
यथा । कण्वे । मघऽवन् । त्रसदस्यवि । यथा । पक्थे । दशऽव्रजे ।
यथा । गोऽशर्ये । असनोः । ऋजिश्वनि । इन्द्र । गोऽमत् । हिरण्यऽवत् ॥
Padapatha Transcription Accented
yáthā ǀ káṇve ǀ magha-van ǀ trasádasyavi ǀ yáthā ǀ pakthé ǀ dáśa-vraje ǀ
yáthā ǀ gó-śarye ǀ ásanoḥ ǀ ṛjíśvani ǀ índra ǀ gó-mat ǀ híraṇya-vat ǁ
Padapatha Transcription Nonaccented
yathā ǀ kaṇve ǀ magha-van ǀ trasadasyavi ǀ yathā ǀ pakthe ǀ daśa-vraje ǀ
yathā ǀ go-śarye ǀ asanoḥ ǀ ṛjiśvani ǀ indra ǀ go-mat ǀ hiraṇya-vat ǁ