|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 63
|
1. Info |
| To: | 1-11: indra; 12: indra, devās |
|
| From: | pragātha kāṇva | |
| Metres: | 1st set of styles: virāḍanuṣṭup (1, 4, 7); virāḍgāyatrī (2, 3, 6); nicṛdgāyatrī (8, 9, 11); nicṛdanuṣṭup (5); gāyatrī (10); triṣṭup (12) 2nd set of styles: gāyatrī (2, 3, 6, 8-11); anuṣṭubh (1, 4, 5, 7); triṣṭubh (12) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.063.01 (Mandala. Sukta. Rik)
6.4.42.01 (Ashtaka. Adhyaya. Varga. Rik)
08.07.051 (Mandala. Anuvāka. Rik)
Samhita Devanagari Accented
स पू॒र्व्यो म॒हानां॑ वे॒नः क्रतु॑भिरानजे ।
यस्य॒ द्वारा॒ मनु॑ष्पि॒ता दे॒वेषु॒ धिय॑ आन॒जे ॥
Samhita Devanagari Nonaccented
स पूर्व्यो महानां वेनः क्रतुभिरानजे ।
यस्य द्वारा मनुष्पिता देवेषु धिय आनजे ॥
Samhita Transcription Accented
sá pūrvyó mahā́nām venáḥ krátubhirānaje ǀ
yásya dvā́rā mánuṣpitā́ devéṣu dhíya ānajé ǁ
Samhita Transcription Nonaccented
sa pūrvyo mahānām venaḥ kratubhirānaje ǀ
yasya dvārā manuṣpitā deveṣu dhiya ānaje ǁ
Padapatha Devanagari Accented
सः । पू॒र्व्यः । म॒हाना॑म् । वे॒नः । क्रतु॑ऽभिः । आ॒न॒जे॒ ।
यस्य॑ । द्वारा॑ । मनुः॑ । पि॒ता । दे॒वेषु॑ । धियः॑ । आ॒न॒जे ॥
Padapatha Devanagari Nonaccented
सः । पूर्व्यः । महानाम् । वेनः । क्रतुऽभिः । आनजे ।
यस्य । द्वारा । मनुः । पिता । देवेषु । धियः । आनजे ॥
Padapatha Transcription Accented
sáḥ ǀ pūrvyáḥ ǀ mahā́nām ǀ venáḥ ǀ krátu-bhiḥ ǀ ānaje ǀ
yásya ǀ dvā́rā ǀ mánuḥ ǀ pitā́ ǀ devéṣu ǀ dhíyaḥ ǀ ānajé ǁ
Padapatha Transcription Nonaccented
saḥ ǀ pūrvyaḥ ǀ mahānām ǀ venaḥ ǀ kratu-bhiḥ ǀ ānaje ǀ
yasya ǀ dvārā ǀ manuḥ ǀ pitā ǀ deveṣu ǀ dhiyaḥ ǀ ānaje ǁ
08.063.02 (Mandala. Sukta. Rik)
6.4.42.02 (Ashtaka. Adhyaya. Varga. Rik)
08.07.052 (Mandala. Anuvāka. Rik)
Samhita Devanagari Accented
दि॒वो मानं॒ नोत्स॑द॒न्त्सोम॑पृष्ठासो॒ अद्र॑यः ।
उ॒क्था ब्रह्म॑ च॒ शंस्या॑ ॥
Samhita Devanagari Nonaccented
दिवो मानं नोत्सदन्त्सोमपृष्ठासो अद्रयः ।
उक्था ब्रह्म च शंस्या ॥
Samhita Transcription Accented
divó mā́nam nótsadantsómapṛṣṭhāso ádrayaḥ ǀ
ukthā́ bráhma ca śáṃsyā ǁ
Samhita Transcription Nonaccented
divo mānam notsadantsomapṛṣṭhāso adrayaḥ ǀ
ukthā brahma ca śaṃsyā ǁ
Padapatha Devanagari Accented
दि॒वः । मान॑म् । न । उत् । स॒द॒न् । सोम॑ऽपृष्ठासः । अद्र॑यः ।
उ॒क्था । ब्रह्म॑ । च॒ । शंस्या॑ ॥
Padapatha Devanagari Nonaccented
दिवः । मानम् । न । उत् । सदन् । सोमऽपृष्ठासः । अद्रयः ।
उक्था । ब्रह्म । च । शंस्या ॥
Padapatha Transcription Accented
diváḥ ǀ mā́nam ǀ ná ǀ út ǀ sadan ǀ sóma-pṛṣṭhāsaḥ ǀ ádrayaḥ ǀ
ukthā́ ǀ bráhma ǀ ca ǀ śáṃsyā ǁ
Padapatha Transcription Nonaccented
divaḥ ǀ mānam ǀ na ǀ ut ǀ sadan ǀ soma-pṛṣṭhāsaḥ ǀ adrayaḥ ǀ
ukthā ǀ brahma ǀ ca ǀ śaṃsyā ǁ
08.063.03 (Mandala. Sukta. Rik)
6.4.42.03 (Ashtaka. Adhyaya. Varga. Rik)
08.07.053 (Mandala. Anuvāka. Rik)
Samhita Devanagari Accented
स वि॒द्वाँ अंगि॑रोभ्य॒ इंद्रो॒ गा अ॑वृणो॒दप॑ ।
स्तु॒षे तद॑स्य॒ पौंस्यं॑ ॥
Samhita Devanagari Nonaccented
स विद्वाँ अंगिरोभ्य इंद्रो गा अवृणोदप ।
स्तुषे तदस्य पौंस्यं ॥
Samhita Transcription Accented
sá vidvā́m̐ áṅgirobhya índro gā́ avṛṇodápa ǀ
stuṣé tádasya páuṃsyam ǁ
Samhita Transcription Nonaccented
sa vidvām̐ aṅgirobhya indro gā avṛṇodapa ǀ
stuṣe tadasya pauṃsyam ǁ
Padapatha Devanagari Accented
सः । वि॒द्वान् । अङ्गि॑रःऽभ्यः । इन्द्रः॑ । गाः । अ॒वृ॒णो॒त् । अप॑ ।
स्तु॒षे । तत् । अ॒स्य॒ । पौंस्य॑म् ॥
Padapatha Devanagari Nonaccented
सः । विद्वान् । अङ्गिरःऽभ्यः । इन्द्रः । गाः । अवृणोत् । अप ।
स्तुषे । तत् । अस्य । पौंस्यम् ॥
Padapatha Transcription Accented
sáḥ ǀ vidvā́n ǀ áṅgiraḥ-bhyaḥ ǀ índraḥ ǀ gā́ḥ ǀ avṛṇot ǀ ápa ǀ
stuṣé ǀ tát ǀ asya ǀ páuṃsyam ǁ
Padapatha Transcription Nonaccented
saḥ ǀ vidvān ǀ aṅgiraḥ-bhyaḥ ǀ indraḥ ǀ gāḥ ǀ avṛṇot ǀ apa ǀ
stuṣe ǀ tat ǀ asya ǀ pauṃsyam ǁ
08.063.04 (Mandala. Sukta. Rik)
6.4.42.04 (Ashtaka. Adhyaya. Varga. Rik)
08.07.054 (Mandala. Anuvāka. Rik)
Samhita Devanagari Accented
स प्र॒त्नथा॑ कविवृ॒ध इंद्रो॑ वा॒कस्य॑ व॒क्षणिः॑ ।
शि॒वो अ॒र्कस्य॒ होम॑न्यस्म॒त्रा गं॒त्वव॑से ॥
Samhita Devanagari Nonaccented
स प्रत्नथा कविवृध इंद्रो वाकस्य वक्षणिः ।
शिवो अर्कस्य होमन्यस्मत्रा गंत्ववसे ॥
Samhita Transcription Accented
sá pratnáthā kavivṛdhá índro vākásya vakṣáṇiḥ ǀ
śivó arkásya hómanyasmatrā́ gantvávase ǁ
Samhita Transcription Nonaccented
sa pratnathā kavivṛdha indro vākasya vakṣaṇiḥ ǀ
śivo arkasya homanyasmatrā gantvavase ǁ
Padapatha Devanagari Accented
सः । प्र॒त्नऽथा॑ । क॒वि॒ऽवृ॒धः । इन्द्रः॑ । वा॒कस्य॑ । व॒क्षणिः॑ ।
शि॒वः । अ॒र्कस्य॑ । होम॑नि । अ॒स्म॒ऽत्रा । ग॒न्तु॒ । अव॑से ॥
Padapatha Devanagari Nonaccented
सः । प्रत्नऽथा । कविऽवृधः । इन्द्रः । वाकस्य । वक्षणिः ।
शिवः । अर्कस्य । होमनि । अस्मऽत्रा । गन्तु । अवसे ॥
Padapatha Transcription Accented
sáḥ ǀ pratná-thā ǀ kavi-vṛdháḥ ǀ índraḥ ǀ vākásya ǀ vakṣáṇiḥ ǀ
śiváḥ ǀ arkásya ǀ hómani ǀ asma-trā́ ǀ gantu ǀ ávase ǁ
Padapatha Transcription Nonaccented
saḥ ǀ pratna-thā ǀ kavi-vṛdhaḥ ǀ indraḥ ǀ vākasya ǀ vakṣaṇiḥ ǀ
śivaḥ ǀ arkasya ǀ homani ǀ asma-trā ǀ gantu ǀ avase ǁ
08.063.05 (Mandala. Sukta. Rik)
6.4.42.05 (Ashtaka. Adhyaya. Varga. Rik)
08.07.055 (Mandala. Anuvāka. Rik)
Samhita Devanagari Accented
आदू॒ नु ते॒ अनु॒ क्रतुं॒ स्वाहा॒ वर॑स्य॒ यज्य॑वः ।
श्वा॒त्रम॒र्का अ॑नूष॒तेंद्र॑ गो॒त्रस्य॑ दा॒वने॑ ॥
Samhita Devanagari Nonaccented
आदू नु ते अनु क्रतुं स्वाहा वरस्य यज्यवः ।
श्वात्रमर्का अनूषतेंद्र गोत्रस्य दावने ॥
Samhita Transcription Accented
ā́dū nú te ánu krátum svā́hā várasya yájyavaḥ ǀ
śvātrámarkā́ anūṣaténdra gotrásya dāváne ǁ
Samhita Transcription Nonaccented
ādū nu te anu kratum svāhā varasya yajyavaḥ ǀ
śvātramarkā anūṣatendra gotrasya dāvane ǁ
Padapatha Devanagari Accented
आत् । ऊं॒ इति॑ । नु । ते॒ । अनु॑ । क्रतु॑म् । स्वाहा॑ । वर॑स्य । यज्य॑वः ।
श्वा॒त्रम् । अ॒र्काः । अ॒नू॒ष॒त॒ । इन्द्र॑ । गो॒त्रस्य॑ । दा॒वने॑ ॥
Padapatha Devanagari Nonaccented
आत् । ऊं इति । नु । ते । अनु । क्रतुम् । स्वाहा । वरस्य । यज्यवः ।
श्वात्रम् । अर्काः । अनूषत । इन्द्र । गोत्रस्य । दावने ॥
Padapatha Transcription Accented
ā́t ǀ ūṃ íti ǀ nú ǀ te ǀ ánu ǀ krátum ǀ svā́hā ǀ várasya ǀ yájyavaḥ ǀ
śvātrám ǀ arkā́ḥ ǀ anūṣata ǀ índra ǀ gotrásya ǀ dāváne ǁ
Padapatha Transcription Nonaccented
āt ǀ ūṃ iti ǀ nu ǀ te ǀ anu ǀ kratum ǀ svāhā ǀ varasya ǀ yajyavaḥ ǀ
śvātram ǀ arkāḥ ǀ anūṣata ǀ indra ǀ gotrasya ǀ dāvane ǁ
08.063.06 (Mandala. Sukta. Rik)
6.4.42.06 (Ashtaka. Adhyaya. Varga. Rik)
08.07.056 (Mandala. Anuvāka. Rik)
Samhita Devanagari Accented
इंद्रे॒ विश्वा॑नि वी॒र्या॑ कृ॒तानि॒ कर्त्वा॑नि च ।
यम॒र्का अ॑ध्व॒रं वि॒दुः ॥
Samhita Devanagari Nonaccented
इंद्रे विश्वानि वीर्या कृतानि कर्त्वानि च ।
यमर्का अध्वरं विदुः ॥
Samhita Transcription Accented
índre víśvāni vīryā́ kṛtā́ni kártvāni ca ǀ
yámarkā́ adhvarám vidúḥ ǁ
Samhita Transcription Nonaccented
indre viśvāni vīryā kṛtāni kartvāni ca ǀ
yamarkā adhvaram viduḥ ǁ
Padapatha Devanagari Accented
इन्द्रे॑ । विश्वा॑नि । वी॒र्या॑ । कृ॒तानि॑ । कर्त्वा॑नि । च॒ ।
यम् । अ॒र्काः । अ॒ध्व॒रम् । वि॒दुः ॥
Padapatha Devanagari Nonaccented
इन्द्रे । विश्वानि । वीर्या । कृतानि । कर्त्वानि । च ।
यम् । अर्काः । अध्वरम् । विदुः ॥
Padapatha Transcription Accented
índre ǀ víśvāni ǀ vīryā́ ǀ kṛtā́ni ǀ kártvāni ǀ ca ǀ
yám ǀ arkā́ḥ ǀ adhvarám ǀ vidúḥ ǁ
Padapatha Transcription Nonaccented
indre ǀ viśvāni ǀ vīryā ǀ kṛtāni ǀ kartvāni ǀ ca ǀ
yam ǀ arkāḥ ǀ adhvaram ǀ viduḥ ǁ
08.063.07 (Mandala. Sukta. Rik)
6.4.43.01 (Ashtaka. Adhyaya. Varga. Rik)
08.07.057 (Mandala. Anuvāka. Rik)
Samhita Devanagari Accented
यत्पांच॑जन्यया वि॒शेंद्रे॒ घोषा॒ असृ॑क्षत ।
अस्तृ॑णाद्ब॒र्हणा॑ वि॒पो॒३॒॑ऽर्यो मान॑स्य॒ स क्षयः॑ ॥
Samhita Devanagari Nonaccented
यत्पांचजन्यया विशेंद्रे घोषा असृक्षत ।
अस्तृणाद्बर्हणा विपोऽर्यो मानस्य स क्षयः ॥
Samhita Transcription Accented
yátpā́ñcajanyayā viśéndre ghóṣā ásṛkṣata ǀ
ástṛṇādbarháṇā vipó’ryó mā́nasya sá kṣáyaḥ ǁ
Samhita Transcription Nonaccented
yatpāñcajanyayā viśendre ghoṣā asṛkṣata ǀ
astṛṇādbarhaṇā vipo’ryo mānasya sa kṣayaḥ ǁ
Padapatha Devanagari Accented
यत् । पाञ्च॑ऽजन्यया । वि॒शा । इन्द्रे॑ । घोषाः॑ । असृ॑क्षत ।
अस्तृ॑णात् । ब॒र्हणा॑ । वि॒पः । अ॒र्यः । मान॑स्य । सः । क्षयः॑ ॥
Padapatha Devanagari Nonaccented
यत् । पाञ्चऽजन्यया । विशा । इन्द्रे । घोषाः । असृक्षत ।
अस्तृणात् । बर्हणा । विपः । अर्यः । मानस्य । सः । क्षयः ॥
Padapatha Transcription Accented
yát ǀ pā́ñca-janyayā ǀ viśā́ ǀ índre ǀ ghóṣāḥ ǀ ásṛkṣata ǀ
ástṛṇāt ǀ barháṇā ǀ vipáḥ ǀ aryáḥ ǀ mā́nasya ǀ sáḥ ǀ kṣáyaḥ ǁ
Padapatha Transcription Nonaccented
yat ǀ pāñca-janyayā ǀ viśā ǀ indre ǀ ghoṣāḥ ǀ asṛkṣata ǀ
astṛṇāt ǀ barhaṇā ǀ vipaḥ ǀ aryaḥ ǀ mānasya ǀ saḥ ǀ kṣayaḥ ǁ
08.063.08 (Mandala. Sukta. Rik)
6.4.43.02 (Ashtaka. Adhyaya. Varga. Rik)
08.07.058 (Mandala. Anuvāka. Rik)
Samhita Devanagari Accented
इ॒यमु॑ ते॒ अनु॑ष्टुतिश्चकृ॒षे तानि॒ पौंस्या॑ ।
प्राव॑श्च॒क्रस्य॑ वर्त॒निं ॥
Samhita Devanagari Nonaccented
इयमु ते अनुष्टुतिश्चकृषे तानि पौंस्या ।
प्रावश्चक्रस्य वर्तनिं ॥
Samhita Transcription Accented
iyámu te ánuṣṭutiścakṛṣé tā́ni páuṃsyā ǀ
prā́vaścakrásya vartaním ǁ
Samhita Transcription Nonaccented
iyamu te anuṣṭutiścakṛṣe tāni pauṃsyā ǀ
prāvaścakrasya vartanim ǁ
Padapatha Devanagari Accented
इ॒यम् । ऊं॒ इति॑ । ते॒ । अनु॑ऽस्तुतिः । च॒कृ॒षे । तानि॑ । पौंस्या॑ ।
प्र । आ॒वः॒ । च॒क्रस्य॑ । व॒र्त॒निम् ॥
Padapatha Devanagari Nonaccented
इयम् । ऊं इति । ते । अनुऽस्तुतिः । चकृषे । तानि । पौंस्या ।
प्र । आवः । चक्रस्य । वर्तनिम् ॥
Padapatha Transcription Accented
iyám ǀ ūṃ íti ǀ te ǀ ánu-stutiḥ ǀ cakṛṣé ǀ tā́ni ǀ páuṃsyā ǀ
prá ǀ āvaḥ ǀ cakrásya ǀ vartaním ǁ
Padapatha Transcription Nonaccented
iyam ǀ ūṃ iti ǀ te ǀ anu-stutiḥ ǀ cakṛṣe ǀ tāni ǀ pauṃsyā ǀ
pra ǀ āvaḥ ǀ cakrasya ǀ vartanim ǁ
08.063.09 (Mandala. Sukta. Rik)
6.4.43.03 (Ashtaka. Adhyaya. Varga. Rik)
08.07.059 (Mandala. Anuvāka. Rik)
Samhita Devanagari Accented
अ॒स्य वृष्णो॒ व्योद॑न उ॒रु क्र॑मिष्ट जी॒वसे॑ ।
यवं॒ न प॒श्व आ द॑दे ॥
Samhita Devanagari Nonaccented
अस्य वृष्णो व्योदन उरु क्रमिष्ट जीवसे ।
यवं न पश्व आ ददे ॥
Samhita Transcription Accented
asyá vṛ́ṣṇo vyódana urú kramiṣṭa jīváse ǀ
yávam ná paśvá ā́ dade ǁ
Samhita Transcription Nonaccented
asya vṛṣṇo vyodana uru kramiṣṭa jīvase ǀ
yavam na paśva ā dade ǁ
Padapatha Devanagari Accented
अ॒स्य । वृष्णः॑ । वि॒ऽओद॑ने । उ॒रु । क्र॒मि॒ष्ट॒ । जी॒वसे॑ ।
यव॑म् । न । प॒श्वः । आ । द॒दे॒ ॥
Padapatha Devanagari Nonaccented
अस्य । वृष्णः । विऽओदने । उरु । क्रमिष्ट । जीवसे ।
यवम् । न । पश्वः । आ । ददे ॥
Padapatha Transcription Accented
asyá ǀ vṛ́ṣṇaḥ ǀ vi-ódane ǀ urú ǀ kramiṣṭa ǀ jīváse ǀ
yávam ǀ ná ǀ paśváḥ ǀ ā́ ǀ dade ǁ
Padapatha Transcription Nonaccented
asya ǀ vṛṣṇaḥ ǀ vi-odane ǀ uru ǀ kramiṣṭa ǀ jīvase ǀ
yavam ǀ na ǀ paśvaḥ ǀ ā ǀ dade ǁ
08.063.10 (Mandala. Sukta. Rik)
6.4.43.04 (Ashtaka. Adhyaya. Varga. Rik)
08.07.060 (Mandala. Anuvāka. Rik)
Samhita Devanagari Accented
तद्दधा॑ना अव॒स्यवो॑ यु॒ष्माभि॒र्दक्ष॑पितरः ।
स्याम॑ म॒रुत्व॑तो वृ॒धे ॥
Samhita Devanagari Nonaccented
तद्दधाना अवस्यवो युष्माभिर्दक्षपितरः ।
स्याम मरुत्वतो वृधे ॥
Samhita Transcription Accented
táddádhānā avasyávo yuṣmā́bhirdákṣapitaraḥ ǀ
syā́ma marútvato vṛdhé ǁ
Samhita Transcription Nonaccented
taddadhānā avasyavo yuṣmābhirdakṣapitaraḥ ǀ
syāma marutvato vṛdhe ǁ
Padapatha Devanagari Accented
तत् । दधा॑नाः । अ॒व॒स्यवः॑ । यु॒ष्माभिः॑ । दक्ष॑ऽपितरः ।
स्याम॑ । म॒रुत्व॑तः । वृ॒धे ॥
Padapatha Devanagari Nonaccented
तत् । दधानाः । अवस्यवः । युष्माभिः । दक्षऽपितरः ।
स्याम । मरुत्वतः । वृधे ॥
Padapatha Transcription Accented
tát ǀ dádhānāḥ ǀ avasyávaḥ ǀ yuṣmā́bhiḥ ǀ dákṣa-pitaraḥ ǀ
syā́ma ǀ marútvataḥ ǀ vṛdhé ǁ
Padapatha Transcription Nonaccented
tat ǀ dadhānāḥ ǀ avasyavaḥ ǀ yuṣmābhiḥ ǀ dakṣa-pitaraḥ ǀ
syāma ǀ marutvataḥ ǀ vṛdhe ǁ
08.063.11 (Mandala. Sukta. Rik)
6.4.43.05 (Ashtaka. Adhyaya. Varga. Rik)
08.07.061 (Mandala. Anuvāka. Rik)
Samhita Devanagari Accented
बळृ॒त्विया॑य॒ धाम्न॒ ऋक्व॑भिः शूर नोनुमः ।
जेषा॑मेंद्र॒ त्वया॑ यु॒जा ॥
Samhita Devanagari Nonaccented
बळृत्वियाय धाम्न ऋक्वभिः शूर नोनुमः ।
जेषामेंद्र त्वया युजा ॥
Samhita Transcription Accented
báḷṛtvíyāya dhā́mna ṛ́kvabhiḥ śūra nonumaḥ ǀ
jéṣāmendra tváyā yujā́ ǁ
Samhita Transcription Nonaccented
baḷṛtviyāya dhāmna ṛkvabhiḥ śūra nonumaḥ ǀ
jeṣāmendra tvayā yujā ǁ
Padapatha Devanagari Accented
बट् । ऋ॒त्विया॑य । धाम्ने॑ । ऋक्व॑ऽभिः । शू॒र॒ । नो॒नु॒मः॒ ।
जेषा॑म । इ॒न्द्र॒ । त्वया॑ । यु॒जा ॥
Padapatha Devanagari Nonaccented
बट् । ऋत्वियाय । धाम्ने । ऋक्वऽभिः । शूर । नोनुमः ।
जेषाम । इन्द्र । त्वया । युजा ॥
Padapatha Transcription Accented
báṭ ǀ ṛtvíyāya ǀ dhā́mne ǀ ṛ́kva-bhiḥ ǀ śūra ǀ nonumaḥ ǀ
jéṣāma ǀ indra ǀ tváyā ǀ yujā́ ǁ
Padapatha Transcription Nonaccented
baṭ ǀ ṛtviyāya ǀ dhāmne ǀ ṛkva-bhiḥ ǀ śūra ǀ nonumaḥ ǀ
jeṣāma ǀ indra ǀ tvayā ǀ yujā ǁ
08.063.12 (Mandala. Sukta. Rik)
6.4.43.06 (Ashtaka. Adhyaya. Varga. Rik)
08.07.062 (Mandala. Anuvāka. Rik)
Samhita Devanagari Accented
अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषाः॑ ।
यः शंस॑ते स्तुव॒ते धायि॑ प॒ज्र इंद्र॑ज्येष्ठा अ॒स्माँ अ॑वंतु दे॒वाः ॥
Samhita Devanagari Nonaccented
अस्मे रुद्रा मेहना पर्वतासो वृत्रहत्ये भरहूतौ सजोषाः ।
यः शंसते स्तुवते धायि पज्र इंद्रज्येष्ठा अस्माँ अवंतु देवाः ॥
Samhita Transcription Accented
asmé rudrā́ mehánā párvatāso vṛtrahátye bhárahūtau sajóṣāḥ ǀ
yáḥ śáṃsate stuvaté dhā́yi pajrá índrajyeṣṭhā asmā́m̐ avantu devā́ḥ ǁ
Samhita Transcription Nonaccented
asme rudrā mehanā parvatāso vṛtrahatye bharahūtau sajoṣāḥ ǀ
yaḥ śaṃsate stuvate dhāyi pajra indrajyeṣṭhā asmām̐ avantu devāḥ ǁ
Padapatha Devanagari Accented
अ॒स्मे इति॑ । रु॒द्राः । मे॒हना॑ । पर्व॑तासः । वृ॒त्र॒ऽहत्ये॑ । भर॑ऽहूतौ । स॒ऽजोषाः॑ ।
यः । शंस॑ते । स्तु॒व॒ते । धायि॑ । प॒ज्रः । इन्द्र॑ऽज्येष्ठाः । अ॒स्मान् । अ॒व॒न्तु॒ । दे॒वाः ॥
Padapatha Devanagari Nonaccented
अस्मे इति । रुद्राः । मेहना । पर्वतासः । वृत्रऽहत्ये । भरऽहूतौ । सऽजोषाः ।
यः । शंसते । स्तुवते । धायि । पज्रः । इन्द्रऽज्येष्ठाः । अस्मान् । अवन्तु । देवाः ॥
Padapatha Transcription Accented
asmé íti ǀ rudrā́ḥ ǀ mehánā ǀ párvatāsaḥ ǀ vṛtra-hátye ǀ bhára-hūtau ǀ sa-jóṣāḥ ǀ
yáḥ ǀ śáṃsate ǀ stuvaté ǀ dhā́yi ǀ pajráḥ ǀ índra-jyeṣṭhāḥ ǀ asmā́n ǀ avantu ǀ devā́ḥ ǁ
Padapatha Transcription Nonaccented
asme iti ǀ rudrāḥ ǀ mehanā ǀ parvatāsaḥ ǀ vṛtra-hatye ǀ bhara-hūtau ǀ sa-joṣāḥ ǀ
yaḥ ǀ śaṃsate ǀ stuvate ǀ dhāyi ǀ pajraḥ ǀ indra-jyeṣṭhāḥ ǀ asmān ǀ avantu ǀ devāḥ ǁ