|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 69
|
1. Info |
| To: | 1-10, 13-18: indra; 11: viśve devās (a); varuṇa (b); 12: varuṇa |
|
| From: | priyamedha āṅgirasa | |
| Metres: | 1st set of styles: nicṛdanuṣṭup (7, 9, 12, 13, 15); virāḍanuṣṭup (1, 3, 10); nicṛdgāyatrī (4, 5); nicṛduṣṇik (2); gāyatrī (6); pādanicṛdanuṣṭup (8); paṅktiḥ (11); anuṣṭup (14); nicṛtpaṅkti (16); bṛhatī (17); virāḍbṛhatī (18) 2nd set of styles: anuṣṭubh (1, 3, 7-10, 12-15); gāyatrī (4-6); paṅkti (11, 16); bṛhatī (17, 18); uṣṇih (2) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.069.01 (Mandala. Sukta. Rik)
6.5.05.01 (Ashtaka. Adhyaya. Varga. Rik)
08.07.142 (Mandala. Anuvāka. Rik)
Samhita Devanagari Accented
प्रप्र॑ वस्त्रि॒ष्टुभ॒मिषं॑ मं॒दद्वी॑रा॒येंद॑वे ।
धि॒या वो॑ मे॒धसा॑तये॒ पुरं॒ध्या वि॑वासति ॥
Samhita Devanagari Nonaccented
प्रप्र वस्त्रिष्टुभमिषं मंदद्वीरायेंदवे ।
धिया वो मेधसातये पुरंध्या विवासति ॥
Samhita Transcription Accented
prápra vastriṣṭúbhamíṣam mandádvīrāyéndave ǀ
dhiyā́ vo medhásātaye púraṃdhyā́ vivāsati ǁ
Samhita Transcription Nonaccented
prapra vastriṣṭubhamiṣam mandadvīrāyendave ǀ
dhiyā vo medhasātaye puraṃdhyā vivāsati ǁ
Padapatha Devanagari Accented
प्रऽप्र॑ । वः॒ । त्रि॒ऽस्तुभ॑म् । इष॑म् । म॒न्दत्ऽवी॑राय । इन्द॑वे ।
धि॒या । वः॒ । मे॒धऽसा॑तये । पुर॑म्ऽध्या । आ । वि॒वा॒स॒ति॒ ॥
Padapatha Devanagari Nonaccented
प्रऽप्र । वः । त्रिऽस्तुभम् । इषम् । मन्दत्ऽवीराय । इन्दवे ।
धिया । वः । मेधऽसातये । पुरम्ऽध्या । आ । विवासति ॥
Padapatha Transcription Accented
prá-pra ǀ vaḥ ǀ tri-stúbham ǀ íṣam ǀ mandát-vīrāya ǀ índave ǀ
dhiyā́ ǀ vaḥ ǀ medhá-sātaye ǀ púram-dhyā ǀ ā́ ǀ vivāsati ǁ
Padapatha Transcription Nonaccented
pra-pra ǀ vaḥ ǀ tri-stubham ǀ iṣam ǀ mandat-vīrāya ǀ indave ǀ
dhiyā ǀ vaḥ ǀ medha-sātaye ǀ puram-dhyā ǀ ā ǀ vivāsati ǁ
08.069.02 (Mandala. Sukta. Rik)
6.5.05.02 (Ashtaka. Adhyaya. Varga. Rik)
08.07.143 (Mandala. Anuvāka. Rik)
Samhita Devanagari Accented
न॒दं व॒ ओद॑तीनां न॒दं योयु॑वतीनां ।
पतिं॑ वो॒ अघ्न्या॑नां धेनू॒नामि॑षुध्यसि ॥
Samhita Devanagari Nonaccented
नदं व ओदतीनां नदं योयुवतीनां ।
पतिं वो अघ्न्यानां धेनूनामिषुध्यसि ॥
Samhita Transcription Accented
nadám va ódatīnām nadám yóyuvatīnām ǀ
pátim vo ághnyānām dhenūnā́miṣudhyasi ǁ
Samhita Transcription Nonaccented
nadam va odatīnām nadam yoyuvatīnām ǀ
patim vo aghnyānām dhenūnāmiṣudhyasi ǁ
Padapatha Devanagari Accented
न॒दम् । वः॒ । ओद॑तीनाम् । न॒दम् । योयु॑वतीनाम् ।
पति॑म् । वः॒ । अघ्न्या॑नाम् । धे॒नू॒नाम् । इ॒षु॒ध्य॒सि॒ ॥
Padapatha Devanagari Nonaccented
नदम् । वः । ओदतीनाम् । नदम् । योयुवतीनाम् ।
पतिम् । वः । अघ्न्यानाम् । धेनूनाम् । इषुध्यसि ॥
Padapatha Transcription Accented
nadám ǀ vaḥ ǀ ódatīnām ǀ nadám ǀ yóyuvatīnām ǀ
pátim ǀ vaḥ ǀ ághnyānām ǀ dhenūnā́m ǀ iṣudhyasi ǁ
Padapatha Transcription Nonaccented
nadam ǀ vaḥ ǀ odatīnām ǀ nadam ǀ yoyuvatīnām ǀ
patim ǀ vaḥ ǀ aghnyānām ǀ dhenūnām ǀ iṣudhyasi ǁ
08.069.03 (Mandala. Sukta. Rik)
6.5.05.03 (Ashtaka. Adhyaya. Varga. Rik)
08.07.144 (Mandala. Anuvāka. Rik)
Samhita Devanagari Accented
ता अ॑स्य॒ सूद॑दोहसः॒ सोमं॑ श्रीणंति॒ पृश्न॑यः ।
जन्मं॑दे॒वानां॒ विश॑स्त्रि॒ष्वा रो॑च॒ने दि॒वः ॥
Samhita Devanagari Nonaccented
ता अस्य सूददोहसः सोमं श्रीणंति पृश्नयः ।
जन्मंदेवानां विशस्त्रिष्वा रोचने दिवः ॥
Samhita Transcription Accented
tā́ asya sū́dadohasaḥ sómam śrīṇanti pṛ́śnayaḥ ǀ
jánmandevā́nām víśastriṣvā́ rocané diváḥ ǁ
Samhita Transcription Nonaccented
tā asya sūdadohasaḥ somam śrīṇanti pṛśnayaḥ ǀ
janmandevānām viśastriṣvā rocane divaḥ ǁ
Padapatha Devanagari Accented
ताः । अ॒स्य॒ । सूद॑ऽदोहसः । सोम॑म् । श्री॒ण॒न्ति॒ । पृश्न॑यः ।
जन्म॑न् । दे॒वाना॑म् । विशः॑ । त्रि॒षु । आ । रो॒च॒ने । दि॒वः ॥
Padapatha Devanagari Nonaccented
ताः । अस्य । सूदऽदोहसः । सोमम् । श्रीणन्ति । पृश्नयः ।
जन्मन् । देवानाम् । विशः । त्रिषु । आ । रोचने । दिवः ॥
Padapatha Transcription Accented
tā́ḥ ǀ asya ǀ sū́da-dohasaḥ ǀ sómam ǀ śrīṇanti ǀ pṛ́śnayaḥ ǀ
jánman ǀ devā́nām ǀ víśaḥ ǀ triṣú ǀ ā́ ǀ rocané ǀ diváḥ ǁ
Padapatha Transcription Nonaccented
tāḥ ǀ asya ǀ sūda-dohasaḥ ǀ somam ǀ śrīṇanti ǀ pṛśnayaḥ ǀ
janman ǀ devānām ǀ viśaḥ ǀ triṣu ǀ ā ǀ rocane ǀ divaḥ ǁ
08.069.04 (Mandala. Sukta. Rik)
6.5.05.04 (Ashtaka. Adhyaya. Varga. Rik)
08.07.145 (Mandala. Anuvāka. Rik)
Samhita Devanagari Accented
अ॒भि प्र गोप॑तिं गि॒रेंद्र॑मर्च॒ यथा॑ वि॒दे ।
सू॒नुं स॒त्यस्य॒ सत्प॑तिं ॥
Samhita Devanagari Nonaccented
अभि प्र गोपतिं गिरेंद्रमर्च यथा विदे ।
सूनुं सत्यस्य सत्पतिं ॥
Samhita Transcription Accented
abhí prá gópatim giréndramarca yáthā vidé ǀ
sūnúm satyásya sátpatim ǁ
Samhita Transcription Nonaccented
abhi pra gopatim girendramarca yathā vide ǀ
sūnum satyasya satpatim ǁ
Padapatha Devanagari Accented
अ॒भि । प्र । गोऽप॑तिम् । गि॒रा । इन्द्र॑म् । अ॒र्च॒ । यथा॑ । वि॒दे ।
सू॒नुम् । स॒त्यस्य॑ । सत्ऽप॑तिम् ॥
Padapatha Devanagari Nonaccented
अभि । प्र । गोऽपतिम् । गिरा । इन्द्रम् । अर्च । यथा । विदे ।
सूनुम् । सत्यस्य । सत्ऽपतिम् ॥
Padapatha Transcription Accented
abhí ǀ prá ǀ gó-patim ǀ girā́ ǀ índram ǀ arca ǀ yáthā ǀ vidé ǀ
sūnúm ǀ satyásya ǀ sát-patim ǁ
Padapatha Transcription Nonaccented
abhi ǀ pra ǀ go-patim ǀ girā ǀ indram ǀ arca ǀ yathā ǀ vide ǀ
sūnum ǀ satyasya ǀ sat-patim ǁ
08.069.05 (Mandala. Sukta. Rik)
6.5.05.05 (Ashtaka. Adhyaya. Varga. Rik)
08.07.146 (Mandala. Anuvāka. Rik)
Samhita Devanagari Accented
आ हर॑यः ससृज्रि॒रेऽरु॑षी॒रधि॑ ब॒र्हिषि॑ ।
यत्रा॒भि सं॒नवा॑महे ॥
Samhita Devanagari Nonaccented
आ हरयः ससृज्रिरेऽरुषीरधि बर्हिषि ।
यत्राभि संनवामहे ॥
Samhita Transcription Accented
ā́ hárayaḥ sasṛjriré’ruṣīrádhi barhíṣi ǀ
yátrābhí saṃnávāmahe ǁ
Samhita Transcription Nonaccented
ā harayaḥ sasṛjrire’ruṣīradhi barhiṣi ǀ
yatrābhi saṃnavāmahe ǁ
Padapatha Devanagari Accented
आ । हर॑यः । स॒सृ॒ज्रि॒रे॒ । अरु॑षीः । अधि॑ । ब॒र्हिषि॑ ।
यत्र॑ । अ॒भि । स॒म्ऽनवा॑महे ॥
Padapatha Devanagari Nonaccented
आ । हरयः । ससृज्रिरे । अरुषीः । अधि । बर्हिषि ।
यत्र । अभि । सम्ऽनवामहे ॥
Padapatha Transcription Accented
ā́ ǀ hárayaḥ ǀ sasṛjrire ǀ áruṣīḥ ǀ ádhi ǀ barhíṣi ǀ
yátra ǀ abhí ǀ sam-návāmahe ǁ
Padapatha Transcription Nonaccented
ā ǀ harayaḥ ǀ sasṛjrire ǀ aruṣīḥ ǀ adhi ǀ barhiṣi ǀ
yatra ǀ abhi ǀ sam-navāmahe ǁ
08.069.06 (Mandala. Sukta. Rik)
6.5.06.01 (Ashtaka. Adhyaya. Varga. Rik)
08.07.147 (Mandala. Anuvāka. Rik)
Samhita Devanagari Accented
इंद्रा॑य॒ गाव॑ आ॒शिरं॑ दुदु॒ह्रे व॒ज्रिणे॒ मधु॑ ।
यत्सी॑मुपह्व॒रे वि॒दत् ॥
Samhita Devanagari Nonaccented
इंद्राय गाव आशिरं दुदुह्रे वज्रिणे मधु ।
यत्सीमुपह्वरे विदत् ॥
Samhita Transcription Accented
índrāya gā́va āśíram duduhré vajríṇe mádhu ǀ
yátsīmupahvaré vidát ǁ
Samhita Transcription Nonaccented
indrāya gāva āśiram duduhre vajriṇe madhu ǀ
yatsīmupahvare vidat ǁ
Padapatha Devanagari Accented
इन्द्रा॑य । गावः॑ । आ॒ऽशिर॑म् । दु॒दु॒ह्रे । व॒ज्रिणे॑ । मधु॑ ।
यत् । सी॒म् । उ॒प॒ऽह्व॒रे । वि॒दत् ॥
Padapatha Devanagari Nonaccented
इन्द्राय । गावः । आऽशिरम् । दुदुह्रे । वज्रिणे । मधु ।
यत् । सीम् । उपऽह्वरे । विदत् ॥
Padapatha Transcription Accented
índrāya ǀ gā́vaḥ ǀ ā-śíram ǀ duduhré ǀ vajríṇe ǀ mádhu ǀ
yát ǀ sīm ǀ upa-hvaré ǀ vidát ǁ
Padapatha Transcription Nonaccented
indrāya ǀ gāvaḥ ǀ ā-śiram ǀ duduhre ǀ vajriṇe ǀ madhu ǀ
yat ǀ sīm ǀ upa-hvare ǀ vidat ǁ
08.069.07 (Mandala. Sukta. Rik)
6.5.06.02 (Ashtaka. Adhyaya. Varga. Rik)
08.07.148 (Mandala. Anuvāka. Rik)
Samhita Devanagari Accented
उद्यद्ब्र॒ध्नस्य॑ वि॒ष्टपं॑ गृ॒हमिंद्र॑श्च॒ गन्व॑हि ।
मध्वः॑ पी॒त्वा स॑चेवहि॒ त्रिः स॒प्त सख्युः॑ प॒दे ॥
Samhita Devanagari Nonaccented
उद्यद्ब्रध्नस्य विष्टपं गृहमिंद्रश्च गन्वहि ।
मध्वः पीत्वा सचेवहि त्रिः सप्त सख्युः पदे ॥
Samhita Transcription Accented
údyádbradhnásya viṣṭápam gṛhámíndraśca gánvahi ǀ
mádhvaḥ pītvā́ sacevahi tríḥ saptá sákhyuḥ padé ǁ
Samhita Transcription Nonaccented
udyadbradhnasya viṣṭapam gṛhamindraśca ganvahi ǀ
madhvaḥ pītvā sacevahi triḥ sapta sakhyuḥ pade ǁ
Padapatha Devanagari Accented
उत् । यत् । ब्र॒ध्नस्य॑ । वि॒ष्टप॑म् । गृ॒हम् । इन्द्रः॑ । च॒ । गन्व॑हि ।
मध्वः॑ । पी॒त्वा । स॒चे॒व॒हि॒ । त्रिः । स॒प्त । सख्युः॑ । प॒दे ॥
Padapatha Devanagari Nonaccented
उत् । यत् । ब्रध्नस्य । विष्टपम् । गृहम् । इन्द्रः । च । गन्वहि ।
मध्वः । पीत्वा । सचेवहि । त्रिः । सप्त । सख्युः । पदे ॥
Padapatha Transcription Accented
út ǀ yát ǀ bradhnásya ǀ viṣṭápam ǀ gṛhám ǀ índraḥ ǀ ca ǀ gánvahi ǀ
mádhvaḥ ǀ pītvā́ ǀ sacevahi ǀ tríḥ ǀ saptá ǀ sákhyuḥ ǀ padé ǁ
Padapatha Transcription Nonaccented
ut ǀ yat ǀ bradhnasya ǀ viṣṭapam ǀ gṛham ǀ indraḥ ǀ ca ǀ ganvahi ǀ
madhvaḥ ǀ pītvā ǀ sacevahi ǀ triḥ ǀ sapta ǀ sakhyuḥ ǀ pade ǁ
08.069.08 (Mandala. Sukta. Rik)
6.5.06.03 (Ashtaka. Adhyaya. Varga. Rik)
08.07.149 (Mandala. Anuvāka. Rik)
Samhita Devanagari Accented
अर्च॑त॒ प्रार्च॑त॒ प्रिय॑मेधासो॒ अर्च॑त ।
अर्चं॑तु पुत्र॒का उ॒त पुरं॒ न धृ॒ष्ण्व॑र्चत ॥
Samhita Devanagari Nonaccented
अर्चत प्रार्चत प्रियमेधासो अर्चत ।
अर्चंतु पुत्रका उत पुरं न धृष्ण्वर्चत ॥
Samhita Transcription Accented
árcata prā́rcata príyamedhāso árcata ǀ
árcantu putrakā́ utá púram ná dhṛṣṇvárcata ǁ
Samhita Transcription Nonaccented
arcata prārcata priyamedhāso arcata ǀ
arcantu putrakā uta puram na dhṛṣṇvarcata ǁ
Padapatha Devanagari Accented
अर्च॑त । प्र । अ॒र्च॒त॒ । प्रिय॑ऽमेधासः । अर्च॑त ।
अर्च॑न्तु । पु॒त्र॒काः । उ॒त । पुर॑म् । न । धृ॒ष्णु । अ॒र्च॒त॒ ॥
Padapatha Devanagari Nonaccented
अर्चत । प्र । अर्चत । प्रियऽमेधासः । अर्चत ।
अर्चन्तु । पुत्रकाः । उत । पुरम् । न । धृष्णु । अर्चत ॥
Padapatha Transcription Accented
árcata ǀ prá ǀ arcata ǀ príya-medhāsaḥ ǀ árcata ǀ
árcantu ǀ putrakā́ḥ ǀ utá ǀ púram ǀ ná ǀ dhṛṣṇú ǀ arcata ǁ
Padapatha Transcription Nonaccented
arcata ǀ pra ǀ arcata ǀ priya-medhāsaḥ ǀ arcata ǀ
arcantu ǀ putrakāḥ ǀ uta ǀ puram ǀ na ǀ dhṛṣṇu ǀ arcata ǁ
08.069.09 (Mandala. Sukta. Rik)
6.5.06.04 (Ashtaka. Adhyaya. Varga. Rik)
08.07.150 (Mandala. Anuvāka. Rik)
Samhita Devanagari Accented
अव॑ स्वराति॒ गर्ग॑रो गो॒धा परि॑ सनिष्वणत् ।
पिंगा॒ परि॑ चनिष्कद॒दिंद्रा॑य॒ ब्रह्मोद्य॑तं ॥
Samhita Devanagari Nonaccented
अव स्वराति गर्गरो गोधा परि सनिष्वणत् ।
पिंगा परि चनिष्कददिंद्राय ब्रह्मोद्यतं ॥
Samhita Transcription Accented
áva svarāti gárgaro godhā́ pári saniṣvaṇat ǀ
píṅgā pári caniṣkadadíndrāya bráhmódyatam ǁ
Samhita Transcription Nonaccented
ava svarāti gargaro godhā pari saniṣvaṇat ǀ
piṅgā pari caniṣkadadindrāya brahmodyatam ǁ
Padapatha Devanagari Accented
अव॑ । स्व॒रा॒ति॒ । गर्ग॑रः । गो॒धा । परि॑ । स॒नि॒स्व॒न॒त् ।
पिङ्गा॑ । परि॑ । च॒नि॒स्क॒द॒त् । इन्द्रा॑य । ब्रह्म॑ । उत्ऽय॑तम् ॥
Padapatha Devanagari Nonaccented
अव । स्वराति । गर्गरः । गोधा । परि । सनिस्वनत् ।
पिङ्गा । परि । चनिस्कदत् । इन्द्राय । ब्रह्म । उत्ऽयतम् ॥
Padapatha Transcription Accented
áva ǀ svarāti ǀ gárgaraḥ ǀ godhā́ ǀ pári ǀ sanisvanat ǀ
píṅgā ǀ pári ǀ caniskadat ǀ índrāya ǀ bráhma ǀ út-yatam ǁ
Padapatha Transcription Nonaccented
ava ǀ svarāti ǀ gargaraḥ ǀ godhā ǀ pari ǀ sanisvanat ǀ
piṅgā ǀ pari ǀ caniskadat ǀ indrāya ǀ brahma ǀ ut-yatam ǁ
08.069.10 (Mandala. Sukta. Rik)
6.5.06.05 (Ashtaka. Adhyaya. Varga. Rik)
08.07.151 (Mandala. Anuvāka. Rik)
Samhita Devanagari Accented
आ यत्पतं॑त्ये॒न्यः॑ सु॒दुघा॒ अन॑पस्फुरः ।
अ॒प॒स्फुरं॑ गृभायत॒ सोम॒मिंद्रा॑य॒ पात॑वे ॥
Samhita Devanagari Nonaccented
आ यत्पतंत्येन्यः सुदुघा अनपस्फुरः ।
अपस्फुरं गृभायत सोममिंद्राय पातवे ॥
Samhita Transcription Accented
ā́ yátpátantyenyáḥ sudúghā ánapasphuraḥ ǀ
apasphúram gṛbhāyata sómamíndrāya pā́tave ǁ
Samhita Transcription Nonaccented
ā yatpatantyenyaḥ sudughā anapasphuraḥ ǀ
apasphuram gṛbhāyata somamindrāya pātave ǁ
Padapatha Devanagari Accented
आ । यत् । पत॑न्ति । ए॒न्यः॑ । सु॒ऽदुघाः॑ । अन॑पऽस्फुरः ।
अ॒प॒ऽस्फुर॑म् । गृ॒भा॒य॒त॒ । सोम॑म् । इन्द्रा॑य । पात॑वे ॥
Padapatha Devanagari Nonaccented
आ । यत् । पतन्ति । एन्यः । सुऽदुघाः । अनपऽस्फुरः ।
अपऽस्फुरम् । गृभायत । सोमम् । इन्द्राय । पातवे ॥
Padapatha Transcription Accented
ā́ ǀ yát ǀ pátanti ǀ enyáḥ ǀ su-dúghāḥ ǀ ánapa-sphuraḥ ǀ
apa-sphúram ǀ gṛbhāyata ǀ sómam ǀ índrāya ǀ pā́tave ǁ
Padapatha Transcription Nonaccented
ā ǀ yat ǀ patanti ǀ enyaḥ ǀ su-dughāḥ ǀ anapa-sphuraḥ ǀ
apa-sphuram ǀ gṛbhāyata ǀ somam ǀ indrāya ǀ pātave ǁ
08.069.11 (Mandala. Sukta. Rik)
6.5.07.01 (Ashtaka. Adhyaya. Varga. Rik)
08.07.152 (Mandala. Anuvāka. Rik)
Samhita Devanagari Accented
अपा॒दिंद्रो॒ अपा॑द॒ग्निर्विश्वे॑ दे॒वा अ॑मत्सत ।
वरु॑ण॒ इदि॒ह क्ष॑य॒त्तमापो॑ अ॒भ्य॑नूषत व॒त्सं सं॒शिश्व॑रीरिव ॥
Samhita Devanagari Nonaccented
अपादिंद्रो अपादग्निर्विश्वे देवा अमत्सत ।
वरुण इदिह क्षयत्तमापो अभ्यनूषत वत्सं संशिश्वरीरिव ॥
Samhita Transcription Accented
ápādíndro ápādagnírvíśve devā́ amatsata ǀ
váruṇa ídihá kṣayattámā́po abhyánūṣata vatsám saṃśíśvarīriva ǁ
Samhita Transcription Nonaccented
apādindro apādagnirviśve devā amatsata ǀ
varuṇa idiha kṣayattamāpo abhyanūṣata vatsam saṃśiśvarīriva ǁ
Padapatha Devanagari Accented
अपा॑त् । इन्द्रः॑ । अपा॑त् । अ॒ग्निः । विश्वे॑ । दे॒वाः । अ॒म॒त्स॒त॒ ।
वरु॑णः । इत् । इ॒ह । क्ष॒य॒त् । तम् । आपः॑ । अ॒भि । अ॒नू॒ष॒त॒ । व॒त्सम् । सं॒शिश्व॑रीःऽइव ॥
Padapatha Devanagari Nonaccented
अपात् । इन्द्रः । अपात् । अग्निः । विश्वे । देवाः । अमत्सत ।
वरुणः । इत् । इह । क्षयत् । तम् । आपः । अभि । अनूषत । वत्सम् । संशिश्वरीःऽइव ॥
Padapatha Transcription Accented
ápāt ǀ índraḥ ǀ ápāt ǀ agníḥ ǀ víśve ǀ devā́ḥ ǀ amatsata ǀ
váruṇaḥ ǀ ít ǀ ihá ǀ kṣayat ǀ tám ǀ ā́paḥ ǀ abhí ǀ anūṣata ǀ vatsám ǀ saṃśíśvarīḥ-iva ǁ
Padapatha Transcription Nonaccented
apāt ǀ indraḥ ǀ apāt ǀ agniḥ ǀ viśve ǀ devāḥ ǀ amatsata ǀ
varuṇaḥ ǀ it ǀ iha ǀ kṣayat ǀ tam ǀ āpaḥ ǀ abhi ǀ anūṣata ǀ vatsam ǀ saṃśiśvarīḥ-iva ǁ
08.069.12 (Mandala. Sukta. Rik)
6.5.07.02 (Ashtaka. Adhyaya. Varga. Rik)
08.07.153 (Mandala. Anuvāka. Rik)
Samhita Devanagari Accented
सु॒दे॒वो अ॑सि वरुण॒ यस्य॑ ते स॒प्त सिंध॑वः ।
अ॒नु॒क्षरं॑ति का॒कुदं॑ सू॒र्म्यं॑ सुषि॒रामि॑व ॥
Samhita Devanagari Nonaccented
सुदेवो असि वरुण यस्य ते सप्त सिंधवः ।
अनुक्षरंति काकुदं सूर्म्यं सुषिरामिव ॥
Samhita Transcription Accented
sudevó asi varuṇa yásya te saptá síndhavaḥ ǀ
anukṣáranti kākúdam sūrmyám suṣirā́miva ǁ
Samhita Transcription Nonaccented
sudevo asi varuṇa yasya te sapta sindhavaḥ ǀ
anukṣaranti kākudam sūrmyam suṣirāmiva ǁ
Padapatha Devanagari Accented
सु॒ऽदे॒वः । अ॒सि॒ । व॒रु॒ण॒ । यस्य॑ । ते॒ । स॒प्त । सिन्ध॑वः ।
अ॒नु॒ऽक्षर॑न्ति । का॒कुद॑म् । सू॒र्म्य॑म् । सु॒षि॒राम्ऽइ॑व ॥
Padapatha Devanagari Nonaccented
सुऽदेवः । असि । वरुण । यस्य । ते । सप्त । सिन्धवः ।
अनुऽक्षरन्ति । काकुदम् । सूर्म्यम् । सुषिराम्ऽइव ॥
Padapatha Transcription Accented
su-deváḥ ǀ asi ǀ varuṇa ǀ yásya ǀ te ǀ saptá ǀ síndhavaḥ ǀ
anu-kṣáranti ǀ kākúdam ǀ sūrmyám ǀ suṣirā́m-iva ǁ
Padapatha Transcription Nonaccented
su-devaḥ ǀ asi ǀ varuṇa ǀ yasya ǀ te ǀ sapta ǀ sindhavaḥ ǀ
anu-kṣaranti ǀ kākudam ǀ sūrmyam ǀ suṣirām-iva ǁ
08.069.13 (Mandala. Sukta. Rik)
6.5.07.03 (Ashtaka. Adhyaya. Varga. Rik)
08.07.154 (Mandala. Anuvāka. Rik)
Samhita Devanagari Accented
यो व्यतीँ॒रफा॑णय॒त्सुयु॑क्ताँ॒ उप॑ दा॒शुषे॑ ।
त॒क्वो ने॒ता तदिद्वपु॑रुप॒मा यो अमु॑च्यत ॥
Samhita Devanagari Nonaccented
यो व्यतीँरफाणयत्सुयुक्ताँ उप दाशुषे ।
तक्वो नेता तदिद्वपुरुपमा यो अमुच्यत ॥
Samhita Transcription Accented
yó vyátīm̐ráphāṇayatsúyuktām̐ úpa dāśúṣe ǀ
takvó netā́ tádídvápurupamā́ yó ámucyata ǁ
Samhita Transcription Nonaccented
yo vyatīm̐raphāṇayatsuyuktām̐ upa dāśuṣe ǀ
takvo netā tadidvapurupamā yo amucyata ǁ
Padapatha Devanagari Accented
यः । व्यती॑न् । अफा॑णयत् । सुऽयु॑क्तान् । उप॑ । दा॒शुषे॑ ।
त॒क्वः । ने॒ता । तत् । इत् । वपुः॑ । उ॒प॒ऽमा । यः । अमु॑च्यत ॥
Padapatha Devanagari Nonaccented
यः । व्यतीन् । अफाणयत् । सुऽयुक्तान् । उप । दाशुषे ।
तक्वः । नेता । तत् । इत् । वपुः । उपऽमा । यः । अमुच्यत ॥
Padapatha Transcription Accented
yáḥ ǀ vyátīn ǀ áphāṇayat ǀ sú-yuktān ǀ úpa ǀ dāśúṣe ǀ
takváḥ ǀ netā́ ǀ tát ǀ ít ǀ vápuḥ ǀ upa-mā́ ǀ yáḥ ǀ ámucyata ǁ
Padapatha Transcription Nonaccented
yaḥ ǀ vyatīn ǀ aphāṇayat ǀ su-yuktān ǀ upa ǀ dāśuṣe ǀ
takvaḥ ǀ netā ǀ tat ǀ it ǀ vapuḥ ǀ upa-mā ǀ yaḥ ǀ amucyata ǁ
08.069.14 (Mandala. Sukta. Rik)
6.5.07.04 (Ashtaka. Adhyaya. Varga. Rik)
08.07.155 (Mandala. Anuvāka. Rik)
Samhita Devanagari Accented
अतीदु॑ श॒क्र ओ॑हत॒ इंद्रो॒ विश्वा॒ अति॒ द्विषः॑ ।
भि॒नत्क॒नीन॑ ओद॒नं प॒च्यमा॑नं प॒रो गि॒रा ॥
Samhita Devanagari Nonaccented
अतीदु शक्र ओहत इंद्रो विश्वा अति द्विषः ।
भिनत्कनीन ओदनं पच्यमानं परो गिरा ॥
Samhita Transcription Accented
átī́du śakrá ohata índro víśvā áti dvíṣaḥ ǀ
bhinátkanī́na odanám pacyámānam paró girā́ ǁ
Samhita Transcription Nonaccented
atīdu śakra ohata indro viśvā ati dviṣaḥ ǀ
bhinatkanīna odanam pacyamānam paro girā ǁ
Padapatha Devanagari Accented
अति॑ । इत् । ऊं॒ इति॑ । श॒क्रः । ओ॒ह॒ते॒ । इन्द्रः॑ । विश्वाः॑ । अति॑ । द्विषः॑ ।
भि॒नत् । क॒नीनः॑ । ओ॒द॒नम् । प॒च्यमा॑नम् । प॒रः । गि॒रा ॥
Padapatha Devanagari Nonaccented
अति । इत् । ऊं इति । शक्रः । ओहते । इन्द्रः । विश्वाः । अति । द्विषः ।
भिनत् । कनीनः । ओदनम् । पच्यमानम् । परः । गिरा ॥
Padapatha Transcription Accented
áti ǀ ít ǀ ūṃ íti ǀ śakráḥ ǀ ohate ǀ índraḥ ǀ víśvāḥ ǀ áti ǀ dvíṣaḥ ǀ
bhinát ǀ kanī́naḥ ǀ odanám ǀ pacyámānam ǀ paráḥ ǀ girā́ ǁ
Padapatha Transcription Nonaccented
ati ǀ it ǀ ūṃ iti ǀ śakraḥ ǀ ohate ǀ indraḥ ǀ viśvāḥ ǀ ati ǀ dviṣaḥ ǀ
bhinat ǀ kanīnaḥ ǀ odanam ǀ pacyamānam ǀ paraḥ ǀ girā ǁ
08.069.15 (Mandala. Sukta. Rik)
6.5.07.05 (Ashtaka. Adhyaya. Varga. Rik)
08.07.156 (Mandala. Anuvāka. Rik)
Samhita Devanagari Accented
अ॒र्भ॒को न कु॑मार॒कोऽधि॑ तिष्ठ॒न्नवं॒ रथं॑ ।
स प॑क्षन्महि॒षं मृ॒गं पि॒त्रे मा॒त्रे वि॑भु॒क्रतुं॑ ॥
Samhita Devanagari Nonaccented
अर्भको न कुमारकोऽधि तिष्ठन्नवं रथं ।
स पक्षन्महिषं मृगं पित्रे मात्रे विभुक्रतुं ॥
Samhita Transcription Accented
arbhakó ná kumārakó’dhi tiṣṭhannávam rátham ǀ
sá pakṣanmahiṣám mṛgám pitré mātré vibhukrátum ǁ
Samhita Transcription Nonaccented
arbhako na kumārako’dhi tiṣṭhannavam ratham ǀ
sa pakṣanmahiṣam mṛgam pitre mātre vibhukratum ǁ
Padapatha Devanagari Accented
अ॒र्भ॒कः । न । कु॒मा॒र॒कः । अधि॑ । ति॒ष्ठ॒त् । नव॑म् । रथ॑म् ।
सः । प॒क्ष॒त् । म॒हि॒षम् । मृ॒गम् । पि॒त्रे । मा॒त्रे । वि॒भु॒ऽक्रतु॑म् ॥
Padapatha Devanagari Nonaccented
अर्भकः । न । कुमारकः । अधि । तिष्ठत् । नवम् । रथम् ।
सः । पक्षत् । महिषम् । मृगम् । पित्रे । मात्रे । विभुऽक्रतुम् ॥
Padapatha Transcription Accented
arbhakáḥ ǀ ná ǀ kumārakáḥ ǀ ádhi ǀ tiṣṭhat ǀ návam ǀ rátham ǀ
sáḥ ǀ pakṣat ǀ mahiṣám ǀ mṛgám ǀ pitré ǀ mātré ǀ vibhu-krátum ǁ
Padapatha Transcription Nonaccented
arbhakaḥ ǀ na ǀ kumārakaḥ ǀ adhi ǀ tiṣṭhat ǀ navam ǀ ratham ǀ
saḥ ǀ pakṣat ǀ mahiṣam ǀ mṛgam ǀ pitre ǀ mātre ǀ vibhu-kratum ǁ
08.069.16 (Mandala. Sukta. Rik)
6.5.07.06 (Ashtaka. Adhyaya. Varga. Rik)
08.07.157 (Mandala. Anuvāka. Rik)
Samhita Devanagari Accented
आ तू सु॑शिप्र दंपते॒ रथं॑ तिष्ठा हिर॒ण्ययं॑ ।
अध॑ द्यु॒क्षं स॑चेवहि स॒हस्र॑पादमरु॒षं स्व॑स्ति॒गाम॑ने॒हसं॑ ॥
Samhita Devanagari Nonaccented
आ तू सुशिप्र दंपते रथं तिष्ठा हिरण्ययं ।
अध द्युक्षं सचेवहि सहस्रपादमरुषं स्वस्तिगामनेहसं ॥
Samhita Transcription Accented
ā́ tū́ suśipra dampate rátham tiṣṭhā hiraṇyáyam ǀ
ádha dyukṣám sacevahi sahásrapādamaruṣám svastigā́manehásam ǁ
Samhita Transcription Nonaccented
ā tū suśipra dampate ratham tiṣṭhā hiraṇyayam ǀ
adha dyukṣam sacevahi sahasrapādamaruṣam svastigāmanehasam ǁ
Padapatha Devanagari Accented
आ । तु । सु॒ऽशि॒प्र॒ । द॒म्ऽप॒ते॒ । रथ॑म् । ति॒ष्ठ॒ । हि॒र॒ण्यय॑म् ।
अध॑ । द्यु॒क्षम् । स॒चे॒व॒हि॒ । स॒हस्र॑ऽपादम् । अ॒रु॒षम् । स्व॒स्ति॒ऽगाम् । अ॒ने॒हस॑म् ॥
Padapatha Devanagari Nonaccented
आ । तु । सुऽशिप्र । दम्ऽपते । रथम् । तिष्ठ । हिरण्ययम् ।
अध । द्युक्षम् । सचेवहि । सहस्रऽपादम् । अरुषम् । स्वस्तिऽगाम् । अनेहसम् ॥
Padapatha Transcription Accented
ā́ ǀ tú ǀ su-śipra ǀ dam-pate ǀ rátham ǀ tiṣṭha ǀ hiraṇyáyam ǀ
ádha ǀ dyukṣám ǀ sacevahi ǀ sahásra-pādam ǀ aruṣám ǀ svasti-gā́m ǀ anehásam ǁ
Padapatha Transcription Nonaccented
ā ǀ tu ǀ su-śipra ǀ dam-pate ǀ ratham ǀ tiṣṭha ǀ hiraṇyayam ǀ
adha ǀ dyukṣam ǀ sacevahi ǀ sahasra-pādam ǀ aruṣam ǀ svasti-gām ǀ anehasam ǁ
08.069.17 (Mandala. Sukta. Rik)
6.5.07.07 (Ashtaka. Adhyaya. Varga. Rik)
08.07.158 (Mandala. Anuvāka. Rik)
Samhita Devanagari Accented
तं घे॑मि॒त्था न॑म॒स्विन॒ उप॑ स्व॒राज॑मासते ।
अर्थं॑ चिदस्य॒ सुधि॑तं॒ यदेत॑व आव॒र्तयं॑ति दा॒वने॑ ॥
Samhita Devanagari Nonaccented
तं घेमित्था नमस्विन उप स्वराजमासते ।
अर्थं चिदस्य सुधितं यदेतव आवर्तयंति दावने ॥
Samhita Transcription Accented
tám ghemitthā́ namasvína úpa svarā́jamāsate ǀ
ártham cidasya súdhitam yádétava āvartáyanti dāváne ǁ
Samhita Transcription Nonaccented
tam ghemitthā namasvina upa svarājamāsate ǀ
artham cidasya sudhitam yadetava āvartayanti dāvane ǁ
Padapatha Devanagari Accented
तम् । घ॒ । ई॒म् । इ॒त्था । न॒म॒स्विनः॑ । उप॑ । स्व॒ऽराज॑म् । आ॒स॒ते॒ ।
अर्थ॑म् । चि॒त् । अ॒स्य॒ । सुऽधि॑तम् । यत् । एत॑वे । आ॒ऽव॒र्तय॑न्ति । दा॒वने॑ ॥
Padapatha Devanagari Nonaccented
तम् । घ । ईम् । इत्था । नमस्विनः । उप । स्वऽराजम् । आसते ।
अर्थम् । चित् । अस्य । सुऽधितम् । यत् । एतवे । आऽवर्तयन्ति । दावने ॥
Padapatha Transcription Accented
tám ǀ gha ǀ īm ǀ itthā́ ǀ namasvínaḥ ǀ úpa ǀ sva-rā́jam ǀ āsate ǀ
ártham ǀ cit ǀ asya ǀ sú-dhitam ǀ yát ǀ étave ǀ ā-vartáyanti ǀ dāváne ǁ
Padapatha Transcription Nonaccented
tam ǀ gha ǀ īm ǀ itthā ǀ namasvinaḥ ǀ upa ǀ sva-rājam ǀ āsate ǀ
artham ǀ cit ǀ asya ǀ su-dhitam ǀ yat ǀ etave ǀ ā-vartayanti ǀ dāvane ǁ
08.069.18 (Mandala. Sukta. Rik)
6.5.07.08 (Ashtaka. Adhyaya. Varga. Rik)
08.07.159 (Mandala. Anuvāka. Rik)
Samhita Devanagari Accented
अनु॑ प्र॒त्नस्यौक॑सः प्रि॒यमे॑धास एषां ।
पूर्वा॒मनु॒ प्रय॑तिं वृ॒क्तब॑र्हिषो हि॒तप्र॑यस आशत ॥
Samhita Devanagari Nonaccented
अनु प्रत्नस्यौकसः प्रियमेधास एषां ।
पूर्वामनु प्रयतिं वृक्तबर्हिषो हितप्रयस आशत ॥
Samhita Transcription Accented
ánu pratnásyáukasaḥ priyámedhāsa eṣām ǀ
pū́rvāmánu práyatim vṛktábarhiṣo hitáprayasa āśata ǁ
Samhita Transcription Nonaccented
anu pratnasyaukasaḥ priyamedhāsa eṣām ǀ
pūrvāmanu prayatim vṛktabarhiṣo hitaprayasa āśata ǁ
Padapatha Devanagari Accented
अनु॑ । प्र॒त्नस्य॑ । ओक॑सः । प्रि॒यऽमे॑धासः । ए॒षा॒म् ।
पूर्वा॑म् । अनु॑ । प्रऽय॑तिम् । वृ॒क्तऽब॑र्हिषः । हि॒तऽप्र॑यसः । आ॒श॒त॒ ॥
Padapatha Devanagari Nonaccented
अनु । प्रत्नस्य । ओकसः । प्रियऽमेधासः । एषाम् ।
पूर्वाम् । अनु । प्रऽयतिम् । वृक्तऽबर्हिषः । हितऽप्रयसः । आशत ॥
Padapatha Transcription Accented
ánu ǀ pratnásya ǀ ókasaḥ ǀ priyá-medhāsaḥ ǀ eṣām ǀ
pū́rvām ǀ ánu ǀ prá-yatim ǀ vṛktá-barhiṣaḥ ǀ hitá-prayasaḥ ǀ āśata ǁ
Padapatha Transcription Nonaccented
anu ǀ pratnasya ǀ okasaḥ ǀ priya-medhāsaḥ ǀ eṣām ǀ
pūrvām ǀ anu ǀ pra-yatim ǀ vṛkta-barhiṣaḥ ǀ hita-prayasaḥ ǀ āśata ǁ