|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 72
|
1. Info |
| To: | agni or a praise to sacrifice | |
| From: | haryata prāgātha | |
| Metres: | 1st set of styles: nicṛdgāyatrī (4-6, 11, 13-15, 17); gāyatrī (1, 3, 8-10, 12, 16); virāḍgāyatrī (7, 18); gāyatrī (pādanicṛdgāyatrī) (2) 2nd set of styles: gāyatrī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.072.01 (Mandala. Sukta. Rik)
6.5.14.01 (Ashtaka. Adhyaya. Varga. Rik)
08.08.031 (Mandala. Anuvāka. Rik)
Samhita Devanagari Accented
ह॒विष्कृ॑णुध्व॒मा ग॑मदध्व॒र्युर्व॑नते॒ पुनः॑ ।
वि॒द्वाँ अ॑स्य प्र॒शास॑नं ॥
Samhita Devanagari Nonaccented
हविष्कृणुध्वमा गमदध्वर्युर्वनते पुनः ।
विद्वाँ अस्य प्रशासनं ॥
Samhita Transcription Accented
havíṣkṛṇudhvamā́ gamadadhvaryúrvanate púnaḥ ǀ
vidvā́m̐ asya praśā́sanam ǁ
Samhita Transcription Nonaccented
haviṣkṛṇudhvamā gamadadhvaryurvanate punaḥ ǀ
vidvām̐ asya praśāsanam ǁ
Padapatha Devanagari Accented
ह॒विः । कृ॒णु॒ध्व॒म् । आ । ग॒म॒त् । अ॒ध्व॒र्युः । व॒न॒ते॒ । पुन॒रिति॑ ।
वि॒द्वान् । अ॒स्य॒ । प्र॒ऽशास॑नम् ॥
Padapatha Devanagari Nonaccented
हविः । कृणुध्वम् । आ । गमत् । अध्वर्युः । वनते । पुनरिति ।
विद्वान् । अस्य । प्रऽशासनम् ॥
Padapatha Transcription Accented
havíḥ ǀ kṛṇudhvam ǀ ā́ ǀ gamat ǀ adhvaryúḥ ǀ vanate ǀ púnaríti ǀ
vidvā́n ǀ asya ǀ pra-śā́sanam ǁ
Padapatha Transcription Nonaccented
haviḥ ǀ kṛṇudhvam ǀ ā ǀ gamat ǀ adhvaryuḥ ǀ vanate ǀ punariti ǀ
vidvān ǀ asya ǀ pra-śāsanam ǁ
08.072.02 (Mandala. Sukta. Rik)
6.5.14.02 (Ashtaka. Adhyaya. Varga. Rik)
08.08.032 (Mandala. Anuvāka. Rik)
Samhita Devanagari Accented
नि ति॒ग्मम॒भ्यं१॒॑शुं सीद॒द्धोता॑ म॒नावधि॑ ।
जु॒षा॒णो अ॑स्य स॒ख्यं ॥
Samhita Devanagari Nonaccented
नि तिग्ममभ्यंशुं सीदद्धोता मनावधि ।
जुषाणो अस्य सख्यं ॥
Samhita Transcription Accented
ní tigmámabhyáṃśúm sī́daddhótā manā́vádhi ǀ
juṣāṇó asya sakhyám ǁ
Samhita Transcription Nonaccented
ni tigmamabhyaṃśum sīdaddhotā manāvadhi ǀ
juṣāṇo asya sakhyam ǁ
Padapatha Devanagari Accented
नि । ति॒ग्मम् । अ॒भि । अं॒शुम् । सीद॑त् । होता॑ । म॒नौ । अधि॑ ।
जु॒षा॒णः । अ॒स्य॒ । स॒ख्यम् ॥
Padapatha Devanagari Nonaccented
नि । तिग्मम् । अभि । अंशुम् । सीदत् । होता । मनौ । अधि ।
जुषाणः । अस्य । सख्यम् ॥
Padapatha Transcription Accented
ní ǀ tigmám ǀ abhí ǀ aṃśúm ǀ sī́dat ǀ hótā ǀ manáu ǀ ádhi ǀ
juṣāṇáḥ ǀ asya ǀ sakhyám ǁ
Padapatha Transcription Nonaccented
ni ǀ tigmam ǀ abhi ǀ aṃśum ǀ sīdat ǀ hotā ǀ manau ǀ adhi ǀ
juṣāṇaḥ ǀ asya ǀ sakhyam ǁ
08.072.03 (Mandala. Sukta. Rik)
6.5.14.03 (Ashtaka. Adhyaya. Varga. Rik)
08.08.033 (Mandala. Anuvāka. Rik)
Samhita Devanagari Accented
अं॒तरि॑च्छंति॒ तं जने॑ रु॒द्रं प॒रो म॑नी॒षया॑ ।
गृ॒भ्णंति॑ जि॒ह्वया॑ स॒सं ॥
Samhita Devanagari Nonaccented
अंतरिच्छंति तं जने रुद्रं परो मनीषया ।
गृभ्णंति जिह्वया ससं ॥
Samhita Transcription Accented
antáricchanti tám jáne rudrám paró manīṣáyā ǀ
gṛbhṇánti jihváyā sasám ǁ
Samhita Transcription Nonaccented
antaricchanti tam jane rudram paro manīṣayā ǀ
gṛbhṇanti jihvayā sasam ǁ
Padapatha Devanagari Accented
अ॒न्तः । इ॒च्छ॒न्ति॒ । तम् । जने॑ । रु॒द्रम् । प॒रः । म॒नी॒षया॑ ।
गृ॒भ्णन्ति॑ । जि॒ह्वया॑ । स॒सम् ॥
Padapatha Devanagari Nonaccented
अन्तः । इच्छन्ति । तम् । जने । रुद्रम् । परः । मनीषया ।
गृभ्णन्ति । जिह्वया । ससम् ॥
Padapatha Transcription Accented
antáḥ ǀ icchanti ǀ tám ǀ jáne ǀ rudrám ǀ paráḥ ǀ manīṣáyā ǀ
gṛbhṇánti ǀ jihváyā ǀ sasám ǁ
Padapatha Transcription Nonaccented
antaḥ ǀ icchanti ǀ tam ǀ jane ǀ rudram ǀ paraḥ ǀ manīṣayā ǀ
gṛbhṇanti ǀ jihvayā ǀ sasam ǁ
08.072.04 (Mandala. Sukta. Rik)
6.5.14.04 (Ashtaka. Adhyaya. Varga. Rik)
08.08.034 (Mandala. Anuvāka. Rik)
Samhita Devanagari Accented
जा॒म्य॑तीतपे॒ धनु॑र्वयो॒धा अ॑रुह॒द्वनं॑ ।
दृ॒षदं॑ जि॒ह्वयाव॑धीत् ॥
Samhita Devanagari Nonaccented
जाम्यतीतपे धनुर्वयोधा अरुहद्वनं ।
दृषदं जिह्वयावधीत् ॥
Samhita Transcription Accented
jāmyátītape dhánurvayodhā́ aruhadvánam ǀ
dṛṣádam jihváyā́vadhīt ǁ
Samhita Transcription Nonaccented
jāmyatītape dhanurvayodhā aruhadvanam ǀ
dṛṣadam jihvayāvadhīt ǁ
Padapatha Devanagari Accented
जा॒मि । अ॒ती॒त॒पे॒ । धनुः॑ । व॒यः॒ऽधाः । अ॒रु॒ह॒त् । वन॑म् ।
दृ॒षद॑म् । जि॒ह्वया॑ । आ । अ॒व॒धी॒त् ॥
Padapatha Devanagari Nonaccented
जामि । अतीतपे । धनुः । वयःऽधाः । अरुहत् । वनम् ।
दृषदम् । जिह्वया । आ । अवधीत् ॥
Padapatha Transcription Accented
jāmí ǀ atītape ǀ dhánuḥ ǀ vayaḥ-dhā́ḥ ǀ aruhat ǀ vánam ǀ
dṛṣádam ǀ jihváyā ǀ ā́ ǀ avadhīt ǁ
Padapatha Transcription Nonaccented
jāmi ǀ atītape ǀ dhanuḥ ǀ vayaḥ-dhāḥ ǀ aruhat ǀ vanam ǀ
dṛṣadam ǀ jihvayā ǀ ā ǀ avadhīt ǁ
08.072.05 (Mandala. Sukta. Rik)
6.5.14.05 (Ashtaka. Adhyaya. Varga. Rik)
08.08.035 (Mandala. Anuvāka. Rik)
Samhita Devanagari Accented
चर॑न्व॒त्सो रुश॑न्नि॒ह नि॑दा॒तारं॒ न विं॑दते ।
वेति॒ स्तोत॑व अं॒ब्यं॑ ॥
Samhita Devanagari Nonaccented
चरन्वत्सो रुशन्निह निदातारं न विंदते ।
वेति स्तोतव अंब्यं ॥
Samhita Transcription Accented
cáranvatsó rúśannihá nidātā́ram ná vindate ǀ
véti stótava ambyám ǁ
Samhita Transcription Nonaccented
caranvatso ruśanniha nidātāram na vindate ǀ
veti stotava ambyam ǁ
Padapatha Devanagari Accented
चर॑न् । व॒त्सः । रुश॑न् । इ॒ह । नि॒ऽदा॒तार॑म् । न । वि॒न्द॒ते॒ ।
वेति॑ । स्तोत॑वे । अ॒म्ब्य॑म् ॥
Padapatha Devanagari Nonaccented
चरन् । वत्सः । रुशन् । इह । निऽदातारम् । न । विन्दते ।
वेति । स्तोतवे । अम्ब्यम् ॥
Padapatha Transcription Accented
cáran ǀ vatsáḥ ǀ rúśan ǀ ihá ǀ ni-dātā́ram ǀ ná ǀ vindate ǀ
véti ǀ stótave ǀ ambyám ǁ
Padapatha Transcription Nonaccented
caran ǀ vatsaḥ ǀ ruśan ǀ iha ǀ ni-dātāram ǀ na ǀ vindate ǀ
veti ǀ stotave ǀ ambyam ǁ
08.072.06 (Mandala. Sukta. Rik)
6.5.15.01 (Ashtaka. Adhyaya. Varga. Rik)
08.08.036 (Mandala. Anuvāka. Rik)
Samhita Devanagari Accented
उ॒तो न्व॑स्य॒ यन्म॒हदश्वा॑व॒द्योज॑नं बृ॒हद् ।
दा॒मा रथ॑स्य॒ ददृ॑शे ॥
Samhita Devanagari Nonaccented
उतो न्वस्य यन्महदश्वावद्योजनं बृहद् ।
दामा रथस्य ददृशे ॥
Samhita Transcription Accented
utó nvásya yánmahádáśvāvadyójanam bṛhád ǀ
dāmā́ ráthasya dádṛśe ǁ
Samhita Transcription Nonaccented
uto nvasya yanmahadaśvāvadyojanam bṛhad ǀ
dāmā rathasya dadṛśe ǁ
Padapatha Devanagari Accented
उ॒तो इति॑ । नु । अ॒स्य॒ । यत् । म॒हत् । अश्व॑ऽवत् । योज॑नम् । बृ॒हत् ।
दा॒मा । रथ॑स्य । ददृ॑शे ॥
Padapatha Devanagari Nonaccented
उतो इति । नु । अस्य । यत् । महत् । अश्वऽवत् । योजनम् । बृहत् ।
दामा । रथस्य । ददृशे ॥
Padapatha Transcription Accented
utó íti ǀ nú ǀ asya ǀ yát ǀ mahát ǀ áśva-vat ǀ yójanam ǀ bṛhát ǀ
dāmā́ ǀ ráthasya ǀ dádṛśe ǁ
Padapatha Transcription Nonaccented
uto iti ǀ nu ǀ asya ǀ yat ǀ mahat ǀ aśva-vat ǀ yojanam ǀ bṛhat ǀ
dāmā ǀ rathasya ǀ dadṛśe ǁ
08.072.07 (Mandala. Sukta. Rik)
6.5.15.02 (Ashtaka. Adhyaya. Varga. Rik)
08.08.037 (Mandala. Anuvāka. Rik)
Samhita Devanagari Accented
दु॒हंति॑ स॒प्तैका॒मुप॒ द्वा पंच॑ सृजतः ।
ती॒र्थे सिंधो॒रधि॑ स्व॒रे ॥
Samhita Devanagari Nonaccented
दुहंति सप्तैकामुप द्वा पंच सृजतः ।
तीर्थे सिंधोरधि स्वरे ॥
Samhita Transcription Accented
duhánti saptáikāmúpa dvā́ páñca sṛjataḥ ǀ
tīrthé síndhorádhi svaré ǁ
Samhita Transcription Nonaccented
duhanti saptaikāmupa dvā pañca sṛjataḥ ǀ
tīrthe sindhoradhi svare ǁ
Padapatha Devanagari Accented
दु॒हन्ति॑ । स॒प्त । एका॑म् । उप॑ । द्वा । पञ्च॑ । सृ॒ज॒तः॒ ।
ती॒र्थे । सिन्धोः॑ । अधि॑ । स्व॒रे ॥
Padapatha Devanagari Nonaccented
दुहन्ति । सप्त । एकाम् । उप । द्वा । पञ्च । सृजतः ।
तीर्थे । सिन्धोः । अधि । स्वरे ॥
Padapatha Transcription Accented
duhánti ǀ saptá ǀ ékām ǀ úpa ǀ dvā́ ǀ páñca ǀ sṛjataḥ ǀ
tīrthé ǀ síndhoḥ ǀ ádhi ǀ svaré ǁ
Padapatha Transcription Nonaccented
duhanti ǀ sapta ǀ ekām ǀ upa ǀ dvā ǀ pañca ǀ sṛjataḥ ǀ
tīrthe ǀ sindhoḥ ǀ adhi ǀ svare ǁ
08.072.08 (Mandala. Sukta. Rik)
6.5.15.03 (Ashtaka. Adhyaya. Varga. Rik)
08.08.038 (Mandala. Anuvāka. Rik)
Samhita Devanagari Accented
आ द॒शभि॑र्वि॒वस्व॑त॒ इंद्रः॒ कोश॑मचुच्यवीत् ।
खेद॑या त्रि॒वृता॑ दि॒वः ॥
Samhita Devanagari Nonaccented
आ दशभिर्विवस्वत इंद्रः कोशमचुच्यवीत् ।
खेदया त्रिवृता दिवः ॥
Samhita Transcription Accented
ā́ daśábhirvivásvata índraḥ kóśamacucyavīt ǀ
khédayā trivṛ́tā diváḥ ǁ
Samhita Transcription Nonaccented
ā daśabhirvivasvata indraḥ kośamacucyavīt ǀ
khedayā trivṛtā divaḥ ǁ
Padapatha Devanagari Accented
आ । द॒शऽभिः॑ । वि॒वस्व॑तः । इन्द्रः॑ । कोश॑म् । अ॒चु॒च्य॒वी॒त् ।
खेद॑या । त्रि॒ऽवृता॑ । दि॒वः ॥
Padapatha Devanagari Nonaccented
आ । दशऽभिः । विवस्वतः । इन्द्रः । कोशम् । अचुच्यवीत् ।
खेदया । त्रिऽवृता । दिवः ॥
Padapatha Transcription Accented
ā́ ǀ daśá-bhiḥ ǀ vivásvataḥ ǀ índraḥ ǀ kóśam ǀ acucyavīt ǀ
khédayā ǀ tri-vṛ́tā ǀ diváḥ ǁ
Padapatha Transcription Nonaccented
ā ǀ daśa-bhiḥ ǀ vivasvataḥ ǀ indraḥ ǀ kośam ǀ acucyavīt ǀ
khedayā ǀ tri-vṛtā ǀ divaḥ ǁ
08.072.09 (Mandala. Sukta. Rik)
6.5.15.04 (Ashtaka. Adhyaya. Varga. Rik)
08.08.039 (Mandala. Anuvāka. Rik)
Samhita Devanagari Accented
परि॑ त्रि॒धातु॑रध्व॒रं जू॒र्णिरे॑ति॒ नवी॑यसी ।
मध्वा॒ होता॑रो अंजते ॥
Samhita Devanagari Nonaccented
परि त्रिधातुरध्वरं जूर्णिरेति नवीयसी ।
मध्वा होतारो अंजते ॥
Samhita Transcription Accented
pári tridhā́turadhvarám jūrṇíreti návīyasī ǀ
mádhvā hótāro añjate ǁ
Samhita Transcription Nonaccented
pari tridhāturadhvaram jūrṇireti navīyasī ǀ
madhvā hotāro añjate ǁ
Padapatha Devanagari Accented
परि॑ । त्रि॒ऽधातुः॑ । अ॒ध्व॒रम् । जू॒र्णिः । ए॒ति॒ । नवी॑यसी ।
मध्वा॑ । होता॑रः । अ॒ञ्ज॒ते॒ ॥
Padapatha Devanagari Nonaccented
परि । त्रिऽधातुः । अध्वरम् । जूर्णिः । एति । नवीयसी ।
मध्वा । होतारः । अञ्जते ॥
Padapatha Transcription Accented
pári ǀ tri-dhā́tuḥ ǀ adhvarám ǀ jūrṇíḥ ǀ eti ǀ návīyasī ǀ
mádhvā ǀ hótāraḥ ǀ añjate ǁ
Padapatha Transcription Nonaccented
pari ǀ tri-dhātuḥ ǀ adhvaram ǀ jūrṇiḥ ǀ eti ǀ navīyasī ǀ
madhvā ǀ hotāraḥ ǀ añjate ǁ
08.072.10 (Mandala. Sukta. Rik)
6.5.15.05 (Ashtaka. Adhyaya. Varga. Rik)
08.08.040 (Mandala. Anuvāka. Rik)
Samhita Devanagari Accented
सिं॒चंति॒ नम॑साव॒तमु॒च्चाच॑क्रं॒ परि॑ज्मानं ।
नी॒चीन॑बार॒मक्षि॑तं ॥
Samhita Devanagari Nonaccented
सिंचंति नमसावतमुच्चाचक्रं परिज्मानं ।
नीचीनबारमक्षितं ॥
Samhita Transcription Accented
siñcánti námasāvatámuccā́cakram párijmānam ǀ
nīcī́nabāramákṣitam ǁ
Samhita Transcription Nonaccented
siñcanti namasāvatamuccācakram parijmānam ǀ
nīcīnabāramakṣitam ǁ
Padapatha Devanagari Accented
सि॒ञ्चन्ति॑ । नम॑सा । अ॒व॒तम् । उ॒च्चाऽच॑क्रम् । परि॑ऽज्मानम् ।
नी॒चीन॑ऽबारम् । अक्षि॑तम् ॥
Padapatha Devanagari Nonaccented
सिञ्चन्ति । नमसा । अवतम् । उच्चाऽचक्रम् । परिऽज्मानम् ।
नीचीनऽबारम् । अक्षितम् ॥
Padapatha Transcription Accented
siñcánti ǀ námasā ǀ avatám ǀ uccā́-cakram ǀ pári-jmānam ǀ
nīcī́na-bāram ǀ ákṣitam ǁ
Padapatha Transcription Nonaccented
siñcanti ǀ namasā ǀ avatam ǀ uccā-cakram ǀ pari-jmānam ǀ
nīcīna-bāram ǀ akṣitam ǁ
08.072.11 (Mandala. Sukta. Rik)
6.5.16.01 (Ashtaka. Adhyaya. Varga. Rik)
08.08.041 (Mandala. Anuvāka. Rik)
Samhita Devanagari Accented
अ॒भ्यार॒मिदद्र॑यो॒ निषि॑क्तं॒ पुष्क॑रे॒ मधु॑ ।
अ॒व॒तस्य॑ वि॒सर्ज॑ने ॥
Samhita Devanagari Nonaccented
अभ्यारमिदद्रयो निषिक्तं पुष्करे मधु ।
अवतस्य विसर्जने ॥
Samhita Transcription Accented
abhyā́ramídádrayo níṣiktam púṣkare mádhu ǀ
avatásya visárjane ǁ
Samhita Transcription Nonaccented
abhyāramidadrayo niṣiktam puṣkare madhu ǀ
avatasya visarjane ǁ
Padapatha Devanagari Accented
अ॒भि॒ऽआर॑म् । इत् । अद्र॑यः । निऽसि॑क्तम् । पुष्क॑रे । मधु॑ ।
अ॒व॒तस्य॑ । वि॒ऽसर्ज॑ने ॥
Padapatha Devanagari Nonaccented
अभिऽआरम् । इत् । अद्रयः । निऽसिक्तम् । पुष्करे । मधु ।
अवतस्य । विऽसर्जने ॥
Padapatha Transcription Accented
abhi-ā́ram ǀ ít ǀ ádrayaḥ ǀ ní-siktam ǀ púṣkare ǀ mádhu ǀ
avatásya ǀ vi-sárjane ǁ
Padapatha Transcription Nonaccented
abhi-āram ǀ it ǀ adrayaḥ ǀ ni-siktam ǀ puṣkare ǀ madhu ǀ
avatasya ǀ vi-sarjane ǁ
08.072.12 (Mandala. Sukta. Rik)
6.5.16.02 (Ashtaka. Adhyaya. Varga. Rik)
08.08.042 (Mandala. Anuvāka. Rik)
Samhita Devanagari Accented
गाव॒ उपा॑वताव॒तं म॒ही य॒ज्ञस्य॑ र॒प्सुदा॑ ।
उ॒भा कर्णा॑ हिर॒ण्यया॑ ॥
Samhita Devanagari Nonaccented
गाव उपावतावतं मही यज्ञस्य रप्सुदा ।
उभा कर्णा हिरण्यया ॥
Samhita Transcription Accented
gā́va úpāvatāvatám mahī́ yajñásya rapsúdā ǀ
ubhā́ kárṇā hiraṇyáyā ǁ
Samhita Transcription Nonaccented
gāva upāvatāvatam mahī yajñasya rapsudā ǀ
ubhā karṇā hiraṇyayā ǁ
Padapatha Devanagari Accented
गावः॑ । उप॑ । अ॒व॒त॒ । अ॒व॒तम् । म॒ही इति॑ । य॒ज्ञस्य॑ । र॒प्सुदा॑ ।
उ॒भा । कर्णा॑ । हि॒र॒ण्यया॑ ॥
Padapatha Devanagari Nonaccented
गावः । उप । अवत । अवतम् । मही इति । यज्ञस्य । रप्सुदा ।
उभा । कर्णा । हिरण्यया ॥
Padapatha Transcription Accented
gā́vaḥ ǀ úpa ǀ avata ǀ avatám ǀ mahī́ íti ǀ yajñásya ǀ rapsúdā ǀ
ubhā́ ǀ kárṇā ǀ hiraṇyáyā ǁ
Padapatha Transcription Nonaccented
gāvaḥ ǀ upa ǀ avata ǀ avatam ǀ mahī iti ǀ yajñasya ǀ rapsudā ǀ
ubhā ǀ karṇā ǀ hiraṇyayā ǁ
08.072.13 (Mandala. Sukta. Rik)
6.5.16.03 (Ashtaka. Adhyaya. Varga. Rik)
08.08.043 (Mandala. Anuvāka. Rik)
Samhita Devanagari Accented
आ सु॒ते सिं॑चत॒ श्रियं॒ रोद॑स्योरभि॒श्रियं॑ ।
र॒सा द॑धीत वृष॒भं ॥
Samhita Devanagari Nonaccented
आ सुते सिंचत श्रियं रोदस्योरभिश्रियं ।
रसा दधीत वृषभं ॥
Samhita Transcription Accented
ā́ suté siñcata śríyam ródasyorabhiśríyam ǀ
rasā́ dadhīta vṛṣabhám ǁ
Samhita Transcription Nonaccented
ā sute siñcata śriyam rodasyorabhiśriyam ǀ
rasā dadhīta vṛṣabham ǁ
Padapatha Devanagari Accented
आ । सु॒ते । सि॒ञ्च॒त॒ । श्रिय॑म् । रोद॑स्योः । अ॒भि॒ऽश्रिय॑म् ।
र॒सा । द॒धी॒त॒ । वृ॒ष॒भम् ॥
Padapatha Devanagari Nonaccented
आ । सुते । सिञ्चत । श्रियम् । रोदस्योः । अभिऽश्रियम् ।
रसा । दधीत । वृषभम् ॥
Padapatha Transcription Accented
ā́ ǀ suté ǀ siñcata ǀ śríyam ǀ ródasyoḥ ǀ abhi-śríyam ǀ
rasā́ ǀ dadhīta ǀ vṛṣabhám ǁ
Padapatha Transcription Nonaccented
ā ǀ sute ǀ siñcata ǀ śriyam ǀ rodasyoḥ ǀ abhi-śriyam ǀ
rasā ǀ dadhīta ǀ vṛṣabham ǁ
08.072.14 (Mandala. Sukta. Rik)
6.5.16.04 (Ashtaka. Adhyaya. Varga. Rik)
08.08.044 (Mandala. Anuvāka. Rik)
Samhita Devanagari Accented
ते जा॑नत॒ स्वमो॒क्यं१॒॑ सं व॒त्सासो॒ न मा॒तृभिः॑ ।
मि॒थो न॑संत जा॒मिभिः॑ ॥
Samhita Devanagari Nonaccented
ते जानत स्वमोक्यं सं वत्सासो न मातृभिः ।
मिथो नसंत जामिभिः ॥
Samhita Transcription Accented
té jānata svámokyám sám vatsā́so ná mātṛ́bhiḥ ǀ
mithó nasanta jāmíbhiḥ ǁ
Samhita Transcription Nonaccented
te jānata svamokyam sam vatsāso na mātṛbhiḥ ǀ
mitho nasanta jāmibhiḥ ǁ
Padapatha Devanagari Accented
ते । जा॒न॒त॒ । स्वम् । ओ॒क्य॑म् । सम् । व॒त्सासः॑ । न । मा॒तृऽभिः॑ ।
मि॒थः । न॒स॒न्त॒ । जा॒मिऽभिः॑ ॥
Padapatha Devanagari Nonaccented
ते । जानत । स्वम् । ओक्यम् । सम् । वत्सासः । न । मातृऽभिः ।
मिथः । नसन्त । जामिऽभिः ॥
Padapatha Transcription Accented
té ǀ jānata ǀ svám ǀ okyám ǀ sám ǀ vatsā́saḥ ǀ ná ǀ mātṛ́-bhiḥ ǀ
mitháḥ ǀ nasanta ǀ jāmí-bhiḥ ǁ
Padapatha Transcription Nonaccented
te ǀ jānata ǀ svam ǀ okyam ǀ sam ǀ vatsāsaḥ ǀ na ǀ mātṛ-bhiḥ ǀ
mithaḥ ǀ nasanta ǀ jāmi-bhiḥ ǁ
08.072.15 (Mandala. Sukta. Rik)
6.5.16.05 (Ashtaka. Adhyaya. Varga. Rik)
08.08.045 (Mandala. Anuvāka. Rik)
Samhita Devanagari Accented
उप॒ स्रक्वे॑षु॒ बप्स॑तः कृण्व॒ते ध॒रुणं॑ दि॒वि ।
इंद्रे॑ अ॒ग्ना नमः॒ स्वः॑ ॥
Samhita Devanagari Nonaccented
उप स्रक्वेषु बप्सतः कृण्वते धरुणं दिवि ।
इंद्रे अग्ना नमः स्वः ॥
Samhita Transcription Accented
úpa srákveṣu bápsataḥ kṛṇvaté dharúṇam diví ǀ
índre agnā́ námaḥ sváḥ ǁ
Samhita Transcription Nonaccented
upa srakveṣu bapsataḥ kṛṇvate dharuṇam divi ǀ
indre agnā namaḥ svaḥ ǁ
Padapatha Devanagari Accented
उप॑ । स्रक्वे॑षु । बप्स॑तः । कृ॒ण्व॒ते । ध॒रुण॑म् । दि॒वि ।
इन्द्रे॑ । अ॒ग्ना । नमः॑ । स्वः॑ ॥
Padapatha Devanagari Nonaccented
उप । स्रक्वेषु । बप्सतः । कृण्वते । धरुणम् । दिवि ।
इन्द्रे । अग्ना । नमः । स्वः ॥
Padapatha Transcription Accented
úpa ǀ srákveṣu ǀ bápsataḥ ǀ kṛṇvaté ǀ dharúṇam ǀ diví ǀ
índre ǀ agnā́ ǀ námaḥ ǀ sváḥ ǁ
Padapatha Transcription Nonaccented
upa ǀ srakveṣu ǀ bapsataḥ ǀ kṛṇvate ǀ dharuṇam ǀ divi ǀ
indre ǀ agnā ǀ namaḥ ǀ svaḥ ǁ
08.072.16 (Mandala. Sukta. Rik)
6.5.17.01 (Ashtaka. Adhyaya. Varga. Rik)
08.08.046 (Mandala. Anuvāka. Rik)
Samhita Devanagari Accented
अधु॑क्षत्पि॒प्युषी॒मिष॒मूर्जं॑ स॒प्तप॑दीम॒रिः ।
सूर्य॑स्य स॒प्त र॒श्मिभिः॑ ॥
Samhita Devanagari Nonaccented
अधुक्षत्पिप्युषीमिषमूर्जं सप्तपदीमरिः ।
सूर्यस्य सप्त रश्मिभिः ॥
Samhita Transcription Accented
ádhukṣatpipyúṣīmíṣamū́rjam saptápadīmaríḥ ǀ
sū́ryasya saptá raśmíbhiḥ ǁ
Samhita Transcription Nonaccented
adhukṣatpipyuṣīmiṣamūrjam saptapadīmariḥ ǀ
sūryasya sapta raśmibhiḥ ǁ
Padapatha Devanagari Accented
अधु॑क्षत् । पि॒प्युषी॑म् । इष॑म् । ऊर्ज॑म् । स॒प्तऽप॑दीम् । अ॒रिः ।
सूर्य॑स्य । स॒प्त । र॒श्मिऽभिः॑ ॥
Padapatha Devanagari Nonaccented
अधुक्षत् । पिप्युषीम् । इषम् । ऊर्जम् । सप्तऽपदीम् । अरिः ।
सूर्यस्य । सप्त । रश्मिऽभिः ॥
Padapatha Transcription Accented
ádhukṣat ǀ pipyúṣīm ǀ íṣam ǀ ū́rjam ǀ saptá-padīm ǀ aríḥ ǀ
sū́ryasya ǀ saptá ǀ raśmí-bhiḥ ǁ
Padapatha Transcription Nonaccented
adhukṣat ǀ pipyuṣīm ǀ iṣam ǀ ūrjam ǀ sapta-padīm ǀ ariḥ ǀ
sūryasya ǀ sapta ǀ raśmi-bhiḥ ǁ
08.072.17 (Mandala. Sukta. Rik)
6.5.17.02 (Ashtaka. Adhyaya. Varga. Rik)
08.08.047 (Mandala. Anuvāka. Rik)
Samhita Devanagari Accented
सोम॑स्य मित्रावरु॒णोदि॑ता॒ सूर॒ आ द॑दे ।
तदातु॑रस्य भेष॒जं ॥
Samhita Devanagari Nonaccented
सोमस्य मित्रावरुणोदिता सूर आ ददे ।
तदातुरस्य भेषजं ॥
Samhita Transcription Accented
sómasya mitrāvaruṇóditā sū́ra ā́ dade ǀ
tádā́turasya bheṣajám ǁ
Samhita Transcription Nonaccented
somasya mitrāvaruṇoditā sūra ā dade ǀ
tadāturasya bheṣajam ǁ
Padapatha Devanagari Accented
सोम॑स्य । मि॒त्रा॒व॒रु॒णा॒ । उत्ऽइ॑ता । सूरे॑ । आ । द॒दे॒ ।
तत् । आतु॑रस्य । भे॒ष॒जम् ॥
Padapatha Devanagari Nonaccented
सोमस्य । मित्रावरुणा । उत्ऽइता । सूरे । आ । ददे ।
तत् । आतुरस्य । भेषजम् ॥
Padapatha Transcription Accented
sómasya ǀ mitrāvaruṇā ǀ út-itā ǀ sū́re ǀ ā́ ǀ dade ǀ
tát ǀ ā́turasya ǀ bheṣajám ǁ
Padapatha Transcription Nonaccented
somasya ǀ mitrāvaruṇā ǀ ut-itā ǀ sūre ǀ ā ǀ dade ǀ
tat ǀ āturasya ǀ bheṣajam ǁ
08.072.18 (Mandala. Sukta. Rik)
6.5.17.03 (Ashtaka. Adhyaya. Varga. Rik)
08.08.048 (Mandala. Anuvāka. Rik)
Samhita Devanagari Accented
उ॒तो न्व॑स्य॒ यत्प॒दं ह॑र्य॒तस्य॑ निधा॒न्यं॑ ।
परि॒ द्यां जि॒ह्वया॑तनत् ॥
Samhita Devanagari Nonaccented
उतो न्वस्य यत्पदं हर्यतस्य निधान्यं ।
परि द्यां जिह्वयातनत् ॥
Samhita Transcription Accented
utó nvásya yátpadám haryatásya nidhānyám ǀ
pári dyā́m jihváyātanat ǁ
Samhita Transcription Nonaccented
uto nvasya yatpadam haryatasya nidhānyam ǀ
pari dyām jihvayātanat ǁ
Padapatha Devanagari Accented
उ॒तो इति॑ । नु । अ॒स्य॒ । यत् । प॒दम् । ह॒र्य॒तस्य॑ । नि॒ऽधा॒न्य॑म् ।
परि॑ । द्याम् । जि॒ह्वया॑ । अ॒त॒न॒त् ॥
Padapatha Devanagari Nonaccented
उतो इति । नु । अस्य । यत् । पदम् । हर्यतस्य । निऽधान्यम् ।
परि । द्याम् । जिह्वया । अतनत् ॥
Padapatha Transcription Accented
utó íti ǀ nú ǀ asya ǀ yát ǀ padám ǀ haryatásya ǀ ni-dhānyám ǀ
pári ǀ dyā́m ǀ jihváyā ǀ atanat ǁ
Padapatha Transcription Nonaccented
uto iti ǀ nu ǀ asya ǀ yat ǀ padam ǀ haryatasya ǀ ni-dhānyam ǀ
pari ǀ dyām ǀ jihvayā ǀ atanat ǁ