|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 74
|
1. Info |
| To: | 1-12: agni; 13-15: śrutarvan ārkṣya’s dānastuti |
|
| From: | gopavana ātreya | |
| Metres: | 1st set of styles: nicṛdgāyatrī (5, 6, 8, 9, 12); virāḍanuṣṭup (4, 13-15); nicṛdanuṣṭup (1, 10); gāyatrī (2, 11); virāḍgāyatrī (3); pādanicṛdanuṣṭup (7) 2nd set of styles: gāyatrī (2, 3, 5, 6, 8, 9, 11, 12); anuṣṭubh (1, 4, 7, 10, 13-15) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.074.01 (Mandala. Sukta. Rik)
6.5.21.01 (Ashtaka. Adhyaya. Varga. Rik)
08.08.067 (Mandala. Anuvāka. Rik)
Samhita Devanagari Accented
वि॒शोवि॑शो वो॒ अति॑थिं वाज॒यंतः॑ पुरुप्रि॒यं ।
अ॒ग्निं वो॒ दुर्यं॒ वचः॑ स्तु॒षे शू॒षस्य॒ मन्म॑भिः ॥
Samhita Devanagari Nonaccented
विशोविशो वो अतिथिं वाजयंतः पुरुप्रियं ।
अग्निं वो दुर्यं वचः स्तुषे शूषस्य मन्मभिः ॥
Samhita Transcription Accented
viśóviśo vo átithim vājayántaḥ purupriyám ǀ
agním vo dúryam vácaḥ stuṣé śūṣásya mánmabhiḥ ǁ
Samhita Transcription Nonaccented
viśoviśo vo atithim vājayantaḥ purupriyam ǀ
agnim vo duryam vacaḥ stuṣe śūṣasya manmabhiḥ ǁ
Padapatha Devanagari Accented
वि॒शःऽवि॑शः । वः॒ । अति॑थिम् । वा॒ज॒ऽयन्तः॑ । पु॒रु॒ऽप्रि॒यम् ।
अ॒ग्निम् । वः॒ । दुर्य॑म् । वचः॑ । स्तु॒षे । शू॒षस्य॑ । मन्म॑ऽभिः ॥
Padapatha Devanagari Nonaccented
विशःऽविशः । वः । अतिथिम् । वाजऽयन्तः । पुरुऽप्रियम् ।
अग्निम् । वः । दुर्यम् । वचः । स्तुषे । शूषस्य । मन्मऽभिः ॥
Padapatha Transcription Accented
viśáḥ-viśaḥ ǀ vaḥ ǀ átithim ǀ vāja-yántaḥ ǀ puru-priyám ǀ
agním ǀ vaḥ ǀ dúryam ǀ vácaḥ ǀ stuṣé ǀ śūṣásya ǀ mánma-bhiḥ ǁ
Padapatha Transcription Nonaccented
viśaḥ-viśaḥ ǀ vaḥ ǀ atithim ǀ vāja-yantaḥ ǀ puru-priyam ǀ
agnim ǀ vaḥ ǀ duryam ǀ vacaḥ ǀ stuṣe ǀ śūṣasya ǀ manma-bhiḥ ǁ
08.074.02 (Mandala. Sukta. Rik)
6.5.21.02 (Ashtaka. Adhyaya. Varga. Rik)
08.08.068 (Mandala. Anuvāka. Rik)
Samhita Devanagari Accented
यं जना॑सो ह॒विष्मं॑तो मि॒त्रं न स॒र्पिरा॑सुतिं ।
प्र॒शंसं॑ति॒ प्रश॑स्तिभिः ॥
Samhita Devanagari Nonaccented
यं जनासो हविष्मंतो मित्रं न सर्पिरासुतिं ।
प्रशंसंति प्रशस्तिभिः ॥
Samhita Transcription Accented
yám jánāso havíṣmanto mitrám ná sarpírāsutim ǀ
praśáṃsanti práśastibhiḥ ǁ
Samhita Transcription Nonaccented
yam janāso haviṣmanto mitram na sarpirāsutim ǀ
praśaṃsanti praśastibhiḥ ǁ
Padapatha Devanagari Accented
यम् । जना॑सः । ह॒विष्म॑न्तः । मि॒त्रम् । न । स॒र्पिःऽआ॑सुतिम् ।
प्र॒ऽशंस॑न्ति । प्रश॑स्तिऽभिः ॥
Padapatha Devanagari Nonaccented
यम् । जनासः । हविष्मन्तः । मित्रम् । न । सर्पिःऽआसुतिम् ।
प्रऽशंसन्ति । प्रशस्तिऽभिः ॥
Padapatha Transcription Accented
yám ǀ jánāsaḥ ǀ havíṣmantaḥ ǀ mitrám ǀ ná ǀ sarpíḥ-āsutim ǀ
pra-śáṃsanti ǀ práśasti-bhiḥ ǁ
Padapatha Transcription Nonaccented
yam ǀ janāsaḥ ǀ haviṣmantaḥ ǀ mitram ǀ na ǀ sarpiḥ-āsutim ǀ
pra-śaṃsanti ǀ praśasti-bhiḥ ǁ
08.074.03 (Mandala. Sukta. Rik)
6.5.21.03 (Ashtaka. Adhyaya. Varga. Rik)
08.08.069 (Mandala. Anuvāka. Rik)
Samhita Devanagari Accented
पन्यां॑सं जा॒तवे॑दसं॒ यो दे॒वता॒त्युद्य॑ता ।
ह॒व्यान्यैर॑यद्दि॒वि ॥
Samhita Devanagari Nonaccented
पन्यांसं जातवेदसं यो देवतात्युद्यता ।
हव्यान्यैरयद्दिवि ॥
Samhita Transcription Accented
pányāṃsam jātávedasam yó devátātyúdyatā ǀ
havyā́nyáirayaddiví ǁ
Samhita Transcription Nonaccented
panyāṃsam jātavedasam yo devatātyudyatā ǀ
havyānyairayaddivi ǁ
Padapatha Devanagari Accented
पन्यां॑सम् । जा॒तऽवे॑दसम् । यः । दे॒वऽता॑ति । उत्ऽय॑ता ।
ह॒व्यानि॑ । ऐर॑यत् । दि॒वि ॥
Padapatha Devanagari Nonaccented
पन्यांसम् । जातऽवेदसम् । यः । देवऽताति । उत्ऽयता ।
हव्यानि । ऐरयत् । दिवि ॥
Padapatha Transcription Accented
pányāṃsam ǀ jātá-vedasam ǀ yáḥ ǀ devá-tāti ǀ út-yatā ǀ
havyā́ni ǀ áirayat ǀ diví ǁ
Padapatha Transcription Nonaccented
panyāṃsam ǀ jāta-vedasam ǀ yaḥ ǀ deva-tāti ǀ ut-yatā ǀ
havyāni ǀ airayat ǀ divi ǁ
08.074.04 (Mandala. Sukta. Rik)
6.5.21.04 (Ashtaka. Adhyaya. Varga. Rik)
08.08.070 (Mandala. Anuvāka. Rik)
Samhita Devanagari Accented
आग॑न्म वृत्र॒हंत॑मं॒ ज्येष्ठ॑म॒ग्निमान॑वं ।
यस्य॑ श्रु॒तर्वा॑ बृ॒हन्ना॒र्क्षो अनी॑क॒ एध॑ते ॥
Samhita Devanagari Nonaccented
आगन्म वृत्रहंतमं ज्येष्ठमग्निमानवं ।
यस्य श्रुतर्वा बृहन्नार्क्षो अनीक एधते ॥
Samhita Transcription Accented
ā́ganma vṛtrahántamam jyéṣṭhamagnímā́navam ǀ
yásya śrutárvā bṛhánnārkṣó ánīka édhate ǁ
Samhita Transcription Nonaccented
āganma vṛtrahantamam jyeṣṭhamagnimānavam ǀ
yasya śrutarvā bṛhannārkṣo anīka edhate ǁ
Padapatha Devanagari Accented
आ । अ॒ग॒न्म॒ । वृ॒त्र॒हन्ऽत॑मम् । ज्येष्ठ॑म् । अ॒ग्निम् । आन॑वम् ।
यस्य॑ । श्रु॒तर्वा॑ । बृ॒हन् । आ॒र्क्षः । अनी॑के । एध॑ते ॥
Padapatha Devanagari Nonaccented
आ । अगन्म । वृत्रहन्ऽतमम् । ज्येष्ठम् । अग्निम् । आनवम् ।
यस्य । श्रुतर्वा । बृहन् । आर्क्षः । अनीके । एधते ॥
Padapatha Transcription Accented
ā́ ǀ aganma ǀ vṛtrahán-tamam ǀ jyéṣṭham ǀ agním ǀ ā́navam ǀ
yásya ǀ śrutárvā ǀ bṛhán ǀ ārkṣáḥ ǀ ánīke ǀ édhate ǁ
Padapatha Transcription Nonaccented
ā ǀ aganma ǀ vṛtrahan-tamam ǀ jyeṣṭham ǀ agnim ǀ ānavam ǀ
yasya ǀ śrutarvā ǀ bṛhan ǀ ārkṣaḥ ǀ anīke ǀ edhate ǁ
08.074.05 (Mandala. Sukta. Rik)
6.5.21.05 (Ashtaka. Adhyaya. Varga. Rik)
08.08.071 (Mandala. Anuvāka. Rik)
Samhita Devanagari Accented
अ॒मृतं॑ जा॒तवे॑दसं ति॒रस्तमां॑सि दर्श॒तं ।
घृ॒ताह॑वन॒मीड्यं॑ ॥
Samhita Devanagari Nonaccented
अमृतं जातवेदसं तिरस्तमांसि दर्शतं ।
घृताहवनमीड्यं ॥
Samhita Transcription Accented
amṛ́tam jātávedasam tirástámāṃsi darśatám ǀ
ghṛtā́havanamī́ḍyam ǁ
Samhita Transcription Nonaccented
amṛtam jātavedasam tirastamāṃsi darśatam ǀ
ghṛtāhavanamīḍyam ǁ
Padapatha Devanagari Accented
अ॒मृत॑म् । जा॒तऽवे॑दसम् । ति॒रः । तमां॑सि । द॒र्श॒तम् ।
घृ॒तऽआ॑हवनम् । ईड्य॑म् ॥
Padapatha Devanagari Nonaccented
अमृतम् । जातऽवेदसम् । तिरः । तमांसि । दर्शतम् ।
घृतऽआहवनम् । ईड्यम् ॥
Padapatha Transcription Accented
amṛ́tam ǀ jātá-vedasam ǀ tiráḥ ǀ támāṃsi ǀ darśatám ǀ
ghṛtá-āhavanam ǀ ī́ḍyam ǁ
Padapatha Transcription Nonaccented
amṛtam ǀ jāta-vedasam ǀ tiraḥ ǀ tamāṃsi ǀ darśatam ǀ
ghṛta-āhavanam ǀ īḍyam ǁ
08.074.06 (Mandala. Sukta. Rik)
6.5.22.01 (Ashtaka. Adhyaya. Varga. Rik)
08.08.072 (Mandala. Anuvāka. Rik)
Samhita Devanagari Accented
स॒बाधो॒ यं जना॑ इ॒मे॒३॒॑ऽग्निं ह॒व्येभि॒रीळ॑ते ।
जुह्वा॑नासो य॒तस्रु॑चः ॥
Samhita Devanagari Nonaccented
सबाधो यं जना इमेऽग्निं हव्येभिरीळते ।
जुह्वानासो यतस्रुचः ॥
Samhita Transcription Accented
sabā́dho yám jánā imé’gním havyébhirī́ḷate ǀ
júhvānāso yatásrucaḥ ǁ
Samhita Transcription Nonaccented
sabādho yam janā ime’gnim havyebhirīḷate ǀ
juhvānāso yatasrucaḥ ǁ
Padapatha Devanagari Accented
स॒ऽबाधः॑ । यम् । जनाः॑ । इ॒मे । अ॒ग्निम् । ह॒व्येभिः॑ । ईळ॑ते ।
जुह्वा॑नासः । य॒तऽस्रु॑चः ॥
Padapatha Devanagari Nonaccented
सऽबाधः । यम् । जनाः । इमे । अग्निम् । हव्येभिः । ईळते ।
जुह्वानासः । यतऽस्रुचः ॥
Padapatha Transcription Accented
sa-bā́dhaḥ ǀ yám ǀ jánāḥ ǀ imé ǀ agním ǀ havyébhiḥ ǀ ī́ḷate ǀ
júhvānāsaḥ ǀ yatá-srucaḥ ǁ
Padapatha Transcription Nonaccented
sa-bādhaḥ ǀ yam ǀ janāḥ ǀ ime ǀ agnim ǀ havyebhiḥ ǀ īḷate ǀ
juhvānāsaḥ ǀ yata-srucaḥ ǁ
08.074.07 (Mandala. Sukta. Rik)
6.5.22.02 (Ashtaka. Adhyaya. Varga. Rik)
08.08.073 (Mandala. Anuvāka. Rik)
Samhita Devanagari Accented
इ॒यं ते॒ नव्य॑सी म॒तिरग्ने॒ अधा॑य्य॒स्मदा ।
मंद्र॒ सुजा॑त॒ सुक्र॒तोऽमू॑र॒ दस्माति॑थे ॥
Samhita Devanagari Nonaccented
इयं ते नव्यसी मतिरग्ने अधाय्यस्मदा ।
मंद्र सुजात सुक्रतोऽमूर दस्मातिथे ॥
Samhita Transcription Accented
iyám te návyasī matírágne ádhāyyasmádā́ ǀ
mándra sújāta súkrató’mūra dásmā́tithe ǁ
Samhita Transcription Nonaccented
iyam te navyasī matiragne adhāyyasmadā ǀ
mandra sujāta sukrato’mūra dasmātithe ǁ
Padapatha Devanagari Accented
इ॒यम् । ते॒ । नव्य॑सी । म॒तिः । अग्ने॑ । अधा॑यि । अ॒स्मत् । आ ।
मन्द्र॑ । सुऽजा॑त । सुक्र॑तो॒ इति॒ सुऽक्र॑तो । अमू॑र । दस्म॑ । अति॑थे ॥
Padapatha Devanagari Nonaccented
इयम् । ते । नव्यसी । मतिः । अग्ने । अधायि । अस्मत् । आ ।
मन्द्र । सुऽजात । सुक्रतो इति सुऽक्रतो । अमूर । दस्म । अतिथे ॥
Padapatha Transcription Accented
iyám ǀ te ǀ návyasī ǀ matíḥ ǀ ágne ǀ ádhāyi ǀ asmát ǀ ā́ ǀ
mándra ǀ sú-jāta ǀ súkrato íti sú-krato ǀ ámūra ǀ dásma ǀ átithe ǁ
Padapatha Transcription Nonaccented
iyam ǀ te ǀ navyasī ǀ matiḥ ǀ agne ǀ adhāyi ǀ asmat ǀ ā ǀ
mandra ǀ su-jāta ǀ sukrato iti su-krato ǀ amūra ǀ dasma ǀ atithe ǁ
08.074.08 (Mandala. Sukta. Rik)
6.5.22.03 (Ashtaka. Adhyaya. Varga. Rik)
08.08.074 (Mandala. Anuvāka. Rik)
Samhita Devanagari Accented
सा ते॑ अग्ने॒ शंत॑मा॒ चनि॑ष्ठा भवतु प्रि॒या ।
तया॑ वर्धस्व॒ सुष्टु॑तः ॥
Samhita Devanagari Nonaccented
सा ते अग्ने शंतमा चनिष्ठा भवतु प्रिया ।
तया वर्धस्व सुष्टुतः ॥
Samhita Transcription Accented
sā́ te agne śáṃtamā cániṣṭhā bhavatu priyā́ ǀ
táyā vardhasva súṣṭutaḥ ǁ
Samhita Transcription Nonaccented
sā te agne śaṃtamā caniṣṭhā bhavatu priyā ǀ
tayā vardhasva suṣṭutaḥ ǁ
Padapatha Devanagari Accented
सा । ते॒ । अ॒ग्ने॒ । शम्ऽत॑मा । चनि॑ष्ठा । भ॒व॒तु॒ । प्रि॒या ।
तया॑ । व॒र्ध॒स्व॒ । सुऽस्तु॑तः ॥
Padapatha Devanagari Nonaccented
सा । ते । अग्ने । शम्ऽतमा । चनिष्ठा । भवतु । प्रिया ।
तया । वर्धस्व । सुऽस्तुतः ॥
Padapatha Transcription Accented
sā́ ǀ te ǀ agne ǀ śám-tamā ǀ cániṣṭhā ǀ bhavatu ǀ priyā́ ǀ
táyā ǀ vardhasva ǀ sú-stutaḥ ǁ
Padapatha Transcription Nonaccented
sā ǀ te ǀ agne ǀ śam-tamā ǀ caniṣṭhā ǀ bhavatu ǀ priyā ǀ
tayā ǀ vardhasva ǀ su-stutaḥ ǁ
08.074.09 (Mandala. Sukta. Rik)
6.5.22.04 (Ashtaka. Adhyaya. Varga. Rik)
08.08.075 (Mandala. Anuvāka. Rik)
Samhita Devanagari Accented
सा द्यु॒म्नैर्द्यु॒म्निनी॑ बृ॒हदुपो॑प॒ श्रव॑सि॒ श्रवः॑ ।
दधी॑त वृत्र॒तूर्ये॑ ॥
Samhita Devanagari Nonaccented
सा द्युम्नैर्द्युम्निनी बृहदुपोप श्रवसि श्रवः ।
दधीत वृत्रतूर्ये ॥
Samhita Transcription Accented
sā́ dyumnáirdyumnínī bṛhádúpopa śrávasi śrávaḥ ǀ
dádhīta vṛtratū́rye ǁ
Samhita Transcription Nonaccented
sā dyumnairdyumninī bṛhadupopa śravasi śravaḥ ǀ
dadhīta vṛtratūrye ǁ
Padapatha Devanagari Accented
सा । द्यु॒म्नैः । द्यु॒म्निनी॑ । बृ॒हत् । उप॑ऽउप । श्रव॑सि । श्रवः॑ ।
दधी॑त । वृ॒त्र॒ऽतूर्ये॑ ॥
Padapatha Devanagari Nonaccented
सा । द्युम्नैः । द्युम्निनी । बृहत् । उपऽउप । श्रवसि । श्रवः ।
दधीत । वृत्रऽतूर्ये ॥
Padapatha Transcription Accented
sā́ ǀ dyumnáiḥ ǀ dyumnínī ǀ bṛhát ǀ úpa-upa ǀ śrávasi ǀ śrávaḥ ǀ
dádhīta ǀ vṛtra-tū́rye ǁ
Padapatha Transcription Nonaccented
sā ǀ dyumnaiḥ ǀ dyumninī ǀ bṛhat ǀ upa-upa ǀ śravasi ǀ śravaḥ ǀ
dadhīta ǀ vṛtra-tūrye ǁ
08.074.10 (Mandala. Sukta. Rik)
6.5.22.05 (Ashtaka. Adhyaya. Varga. Rik)
08.08.076 (Mandala. Anuvāka. Rik)
Samhita Devanagari Accented
अश्व॒मिद्गां र॑थ॒प्रां त्वे॒षमिंद्रं॒ न सत्प॑तिं ।
यस्य॒ श्रवां॑सि॒ तूर्व॑थ॒ पन्यं॑पन्यं च कृ॒ष्टयः॑ ॥
Samhita Devanagari Nonaccented
अश्वमिद्गां रथप्रां त्वेषमिंद्रं न सत्पतिं ।
यस्य श्रवांसि तूर्वथ पन्यंपन्यं च कृष्टयः ॥
Samhita Transcription Accented
áśvamídgā́m rathaprā́m tveṣámíndram ná sátpatim ǀ
yásya śrávāṃsi tū́rvatha pányampanyam ca kṛṣṭáyaḥ ǁ
Samhita Transcription Nonaccented
aśvamidgām rathaprām tveṣamindram na satpatim ǀ
yasya śravāṃsi tūrvatha panyampanyam ca kṛṣṭayaḥ ǁ
Padapatha Devanagari Accented
अश्व॑म् । इत् । गाम् । र॒थ॒ऽप्राम् । त्वे॒षम् । इन्द्र॑म् । न । सत्ऽप॑तिम् ।
यस्य॑ । श्रवां॑सि । तूर्व॑थ । पन्य॑म्ऽपन्यम् । च॒ । कृ॒ष्टयः॑ ॥
Padapatha Devanagari Nonaccented
अश्वम् । इत् । गाम् । रथऽप्राम् । त्वेषम् । इन्द्रम् । न । सत्ऽपतिम् ।
यस्य । श्रवांसि । तूर्वथ । पन्यम्ऽपन्यम् । च । कृष्टयः ॥
Padapatha Transcription Accented
áśvam ǀ ít ǀ gā́m ǀ ratha-prā́m ǀ tveṣám ǀ índram ǀ ná ǀ sát-patim ǀ
yásya ǀ śrávāṃsi ǀ tū́rvatha ǀ pányam-panyam ǀ ca ǀ kṛṣṭáyaḥ ǁ
Padapatha Transcription Nonaccented
aśvam ǀ it ǀ gām ǀ ratha-prām ǀ tveṣam ǀ indram ǀ na ǀ sat-patim ǀ
yasya ǀ śravāṃsi ǀ tūrvatha ǀ panyam-panyam ǀ ca ǀ kṛṣṭayaḥ ǁ
08.074.11 (Mandala. Sukta. Rik)
6.5.23.01 (Ashtaka. Adhyaya. Varga. Rik)
08.08.077 (Mandala. Anuvāka. Rik)
Samhita Devanagari Accented
यं त्वा॑ गो॒पव॑नो गि॒रा चनि॑ष्ठदग्ने अंगिरः ।
स पा॑वक श्रुधी॒ हवं॑ ॥
Samhita Devanagari Nonaccented
यं त्वा गोपवनो गिरा चनिष्ठदग्ने अंगिरः ।
स पावक श्रुधी हवं ॥
Samhita Transcription Accented
yám tvā gopávano girā́ cániṣṭhadagne aṅgiraḥ ǀ
sá pāvaka śrudhī hávam ǁ
Samhita Transcription Nonaccented
yam tvā gopavano girā caniṣṭhadagne aṅgiraḥ ǀ
sa pāvaka śrudhī havam ǁ
Padapatha Devanagari Accented
यम् । त्वा॒ । गो॒पव॑नः । गि॒रा । चनि॑ष्ठत् । अ॒ग्ने॒ । अ॒ङ्गि॒रः॒ ।
सः । पा॒व॒क॒ । श्रु॒धि॒ । हव॑म् ॥
Padapatha Devanagari Nonaccented
यम् । त्वा । गोपवनः । गिरा । चनिष्ठत् । अग्ने । अङ्गिरः ।
सः । पावक । श्रुधि । हवम् ॥
Padapatha Transcription Accented
yám ǀ tvā ǀ gopávanaḥ ǀ girā́ ǀ cániṣṭhat ǀ agne ǀ aṅgiraḥ ǀ
sáḥ ǀ pāvaka ǀ śrudhi ǀ hávam ǁ
Padapatha Transcription Nonaccented
yam ǀ tvā ǀ gopavanaḥ ǀ girā ǀ caniṣṭhat ǀ agne ǀ aṅgiraḥ ǀ
saḥ ǀ pāvaka ǀ śrudhi ǀ havam ǁ
08.074.12 (Mandala. Sukta. Rik)
6.5.23.02 (Ashtaka. Adhyaya. Varga. Rik)
08.08.078 (Mandala. Anuvāka. Rik)
Samhita Devanagari Accented
यं त्वा॒ जना॑स॒ ईळ॑ते स॒बाधो॒ वाज॑सातये ।
स बो॑धि वृत्र॒तूर्ये॑ ॥
Samhita Devanagari Nonaccented
यं त्वा जनास ईळते सबाधो वाजसातये ।
स बोधि वृत्रतूर्ये ॥
Samhita Transcription Accented
yám tvā jánāsa ī́ḷate sabā́dho vā́jasātaye ǀ
sá bodhi vṛtratū́rye ǁ
Samhita Transcription Nonaccented
yam tvā janāsa īḷate sabādho vājasātaye ǀ
sa bodhi vṛtratūrye ǁ
Padapatha Devanagari Accented
यम् । त्वा॒ । जना॑सः । ईळ॑ते । स॒ऽबाधः॑ । वाज॑ऽसातये ।
सः । बो॒धि॒ । वृ॒त्र॒ऽतूर्ये॑ ॥
Padapatha Devanagari Nonaccented
यम् । त्वा । जनासः । ईळते । सऽबाधः । वाजऽसातये ।
सः । बोधि । वृत्रऽतूर्ये ॥
Padapatha Transcription Accented
yám ǀ tvā ǀ jánāsaḥ ǀ ī́ḷate ǀ sa-bā́dhaḥ ǀ vā́ja-sātaye ǀ
sáḥ ǀ bodhi ǀ vṛtra-tū́rye ǁ
Padapatha Transcription Nonaccented
yam ǀ tvā ǀ janāsaḥ ǀ īḷate ǀ sa-bādhaḥ ǀ vāja-sātaye ǀ
saḥ ǀ bodhi ǀ vṛtra-tūrye ǁ
08.074.13 (Mandala. Sukta. Rik)
6.5.23.03 (Ashtaka. Adhyaya. Varga. Rik)
08.08.079 (Mandala. Anuvāka. Rik)
Samhita Devanagari Accented
अ॒हं हु॑वा॒न आ॒र्क्षे श्रु॒तर्व॑णि मद॒च्युति॑ ।
शर्धां॑सीव स्तुका॒विनां॑ मृ॒क्षा शी॒र्षा च॑तु॒र्णां ॥
Samhita Devanagari Nonaccented
अहं हुवान आर्क्षे श्रुतर्वणि मदच्युति ।
शर्धांसीव स्तुकाविनां मृक्षा शीर्षा चतुर्णां ॥
Samhita Transcription Accented
ahám huvāná ārkṣé śrutárvaṇi madacyúti ǀ
śárdhāṃsīva stukāvínām mṛkṣā́ śīrṣā́ caturṇā́m ǁ
Samhita Transcription Nonaccented
aham huvāna ārkṣe śrutarvaṇi madacyuti ǀ
śardhāṃsīva stukāvinām mṛkṣā śīrṣā caturṇām ǁ
Padapatha Devanagari Accented
अ॒हम् । हु॒वा॒नः । आ॒र्क्षे । श्रु॒तर्व॑णि । म॒द॒ऽच्युति॑ ।
शर्धां॑सिऽइव । स्तु॒का॒ऽविना॑म् । मृ॒क्षा । शी॒र्षा । च॒तु॒र्णाम् ॥
Padapatha Devanagari Nonaccented
अहम् । हुवानः । आर्क्षे । श्रुतर्वणि । मदऽच्युति ।
शर्धांसिऽइव । स्तुकाऽविनाम् । मृक्षा । शीर्षा । चतुर्णाम् ॥
Padapatha Transcription Accented
ahám ǀ huvānáḥ ǀ ārkṣé ǀ śrutárvaṇi ǀ mada-cyúti ǀ
śárdhāṃsi-iva ǀ stukā-vínām ǀ mṛkṣā́ ǀ śīrṣā́ ǀ caturṇā́m ǁ
Padapatha Transcription Nonaccented
aham ǀ huvānaḥ ǀ ārkṣe ǀ śrutarvaṇi ǀ mada-cyuti ǀ
śardhāṃsi-iva ǀ stukā-vinām ǀ mṛkṣā ǀ śīrṣā ǀ caturṇām ǁ
08.074.14 (Mandala. Sukta. Rik)
6.5.23.04 (Ashtaka. Adhyaya. Varga. Rik)
08.08.080 (Mandala. Anuvāka. Rik)
Samhita Devanagari Accented
मां च॒त्वार॑ आ॒शवः॒ शवि॑ष्ठस्य द्रवि॒त्नवः॑ ।
सु॒रथा॑सो अ॒भि प्रयो॒ वक्ष॒न्वयो॒ न तुग्र्यं॑ ॥
Samhita Devanagari Nonaccented
मां चत्वार आशवः शविष्ठस्य द्रवित्नवः ।
सुरथासो अभि प्रयो वक्षन्वयो न तुग्र्यं ॥
Samhita Transcription Accented
mā́m catvā́ra āśávaḥ śáviṣṭhasya dravitnávaḥ ǀ
suráthāso abhí práyo vákṣanváyo ná túgryam ǁ
Samhita Transcription Nonaccented
mām catvāra āśavaḥ śaviṣṭhasya dravitnavaḥ ǀ
surathāso abhi prayo vakṣanvayo na tugryam ǁ
Padapatha Devanagari Accented
माम् । च॒त्वारः॑ । आ॒शवः॑ । शवि॑ष्ठस्य । द्र॒वि॒त्नवः॑ ।
सु॒ऽरथा॑सः । अ॒भि । प्रयः॑ । वक्ष॑न् । वयः॑ । न । तुग्र्य॑म् ॥
Padapatha Devanagari Nonaccented
माम् । चत्वारः । आशवः । शविष्ठस्य । द्रवित्नवः ।
सुऽरथासः । अभि । प्रयः । वक्षन् । वयः । न । तुग्र्यम् ॥
Padapatha Transcription Accented
mā́m ǀ catvā́raḥ ǀ āśávaḥ ǀ śáviṣṭhasya ǀ dravitnávaḥ ǀ
su-ráthāsaḥ ǀ abhí ǀ práyaḥ ǀ vákṣan ǀ váyaḥ ǀ ná ǀ túgryam ǁ
Padapatha Transcription Nonaccented
mām ǀ catvāraḥ ǀ āśavaḥ ǀ śaviṣṭhasya ǀ dravitnavaḥ ǀ
su-rathāsaḥ ǀ abhi ǀ prayaḥ ǀ vakṣan ǀ vayaḥ ǀ na ǀ tugryam ǁ
08.074.15 (Mandala. Sukta. Rik)
6.5.23.05 (Ashtaka. Adhyaya. Varga. Rik)
08.08.081 (Mandala. Anuvāka. Rik)
Samhita Devanagari Accented
स॒त्यमित्त्वा॑ महेनदि॒ परु॒ष्ण्यव॑ देदिशं ।
नेमा॑पो अश्व॒दात॑रः॒ शवि॑ष्ठादस्ति॒ मर्त्यः॑ ॥
Samhita Devanagari Nonaccented
सत्यमित्त्वा महेनदि परुष्ण्यव देदिशं ।
नेमापो अश्वदातरः शविष्ठादस्ति मर्त्यः ॥
Samhita Transcription Accented
satyámíttvā mahenadi páruṣṇyáva dediśam ǀ
némāpo aśvadā́taraḥ śáviṣṭhādasti mártyaḥ ǁ
Samhita Transcription Nonaccented
satyamittvā mahenadi paruṣṇyava dediśam ǀ
nemāpo aśvadātaraḥ śaviṣṭhādasti martyaḥ ǁ
Padapatha Devanagari Accented
स॒त्यम् । इत् । त्वा॒ । म॒हे॒ऽन॒दि॒ । परु॑ष्णि । अव॑ । दे॒दि॒श॒म् ।
न । ई॒म् । आ॒पः॒ । अ॒श्व॒ऽदात॑रः । शवि॑ष्ठात् । अ॒स्ति॒ । मर्त्यः॑ ॥
Padapatha Devanagari Nonaccented
सत्यम् । इत् । त्वा । महेऽनदि । परुष्णि । अव । देदिशम् ।
न । ईम् । आपः । अश्वऽदातरः । शविष्ठात् । अस्ति । मर्त्यः ॥
Padapatha Transcription Accented
satyám ǀ ít ǀ tvā ǀ mahe-nadi ǀ páruṣṇi ǀ áva ǀ dediśam ǀ
ná ǀ īm ǀ āpaḥ ǀ aśva-dā́taraḥ ǀ śáviṣṭhāt ǀ asti ǀ mártyaḥ ǁ
Padapatha Transcription Nonaccented
satyam ǀ it ǀ tvā ǀ mahe-nadi ǀ paruṣṇi ǀ ava ǀ dediśam ǀ
na ǀ īm ǀ āpaḥ ǀ aśva-dātaraḥ ǀ śaviṣṭhāt ǀ asti ǀ martyaḥ ǁ