|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 79
|
1. Info |
| To: | soma | |
| From: | kṛtnu bhārgava | |
| Metres: | 1st set of styles: gāyatrī (4, 5, 7, 8); nicṛdgāyatrī (1, 2, 6); virāṭgāyatrī (3); nicṛdanuṣṭup (9) 2nd set of styles: gāyatrī (1-8); anuṣṭubh (9) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.079.01 (Mandala. Sukta. Rik)
6.5.33.01 (Ashtaka. Adhyaya. Varga. Rik)
08.08.131 (Mandala. Anuvāka. Rik)
Samhita Devanagari Accented
अ॒यं कृ॒त्नुरगृ॑भीतो विश्व॒जिदु॒द्भिदित्सोमः॑ ।
ऋषि॒र्विप्रः॒ काव्ये॑न ॥
Samhita Devanagari Nonaccented
अयं कृत्नुरगृभीतो विश्वजिदुद्भिदित्सोमः ।
ऋषिर्विप्रः काव्येन ॥
Samhita Transcription Accented
ayám kṛtnúrágṛbhīto viśvajídudbhídítsómaḥ ǀ
ṛ́ṣirvípraḥ kā́vyena ǁ
Samhita Transcription Nonaccented
ayam kṛtnuragṛbhīto viśvajidudbhiditsomaḥ ǀ
ṛṣirvipraḥ kāvyena ǁ
Padapatha Devanagari Accented
अ॒यम् । कृ॒त्नुः । अगृ॑भीतः । वि॒श्व॒ऽजित् । उ॒त्ऽभित् । इत् । सोमः॑ ।
ऋषिः॑ । विप्रः॑ । काव्ये॑न ॥
Padapatha Devanagari Nonaccented
अयम् । कृत्नुः । अगृभीतः । विश्वऽजित् । उत्ऽभित् । इत् । सोमः ।
ऋषिः । विप्रः । काव्येन ॥
Padapatha Transcription Accented
ayám ǀ kṛtnúḥ ǀ ágṛbhītaḥ ǀ viśva-jít ǀ ut-bhít ǀ ít ǀ sómaḥ ǀ
ṛ́ṣiḥ ǀ vípraḥ ǀ kā́vyena ǁ
Padapatha Transcription Nonaccented
ayam ǀ kṛtnuḥ ǀ agṛbhītaḥ ǀ viśva-jit ǀ ut-bhit ǀ it ǀ somaḥ ǀ
ṛṣiḥ ǀ vipraḥ ǀ kāvyena ǁ
08.079.02 (Mandala. Sukta. Rik)
6.5.33.02 (Ashtaka. Adhyaya. Varga. Rik)
08.08.132 (Mandala. Anuvāka. Rik)
Samhita Devanagari Accented
अ॒भ्यू॑र्णोति॒ यन्न॒ग्नं भि॒षक्ति॒ विश्वं॒ यत्तु॒रं ।
प्रेमं॒धः ख्य॒न्निः श्रो॒णो भू॑त् ॥
Samhita Devanagari Nonaccented
अभ्यूर्णोति यन्नग्नं भिषक्ति विश्वं यत्तुरं ।
प्रेमंधः ख्यन्निः श्रोणो भूत् ॥
Samhita Transcription Accented
abhyū́rṇoti yánnagnám bhiṣákti víśvam yátturám ǀ
prémandháḥ khyanníḥ śroṇó bhūt ǁ
Samhita Transcription Nonaccented
abhyūrṇoti yannagnam bhiṣakti viśvam yatturam ǀ
premandhaḥ khyanniḥ śroṇo bhūt ǁ
Padapatha Devanagari Accented
अ॒भि । ऊ॒र्णो॒ति॒ । यत् । न॒ग्नम् । भि॒षक्ति॑ । विश्व॑म् । यत् । तु॒रम् ।
प्र । ई॒म् । अ॒न्धः । ख्य॒त् । निः । श्रो॒णः । भू॒त् ॥
Padapatha Devanagari Nonaccented
अभि । ऊर्णोति । यत् । नग्नम् । भिषक्ति । विश्वम् । यत् । तुरम् ।
प्र । ईम् । अन्धः । ख्यत् । निः । श्रोणः । भूत् ॥
Padapatha Transcription Accented
abhí ǀ ūrṇoti ǀ yát ǀ nagnám ǀ bhiṣákti ǀ víśvam ǀ yát ǀ turám ǀ
prá ǀ īm ǀ andháḥ ǀ khyat ǀ níḥ ǀ śroṇáḥ ǀ bhūt ǁ
Padapatha Transcription Nonaccented
abhi ǀ ūrṇoti ǀ yat ǀ nagnam ǀ bhiṣakti ǀ viśvam ǀ yat ǀ turam ǀ
pra ǀ īm ǀ andhaḥ ǀ khyat ǀ niḥ ǀ śroṇaḥ ǀ bhūt ǁ
08.079.03 (Mandala. Sukta. Rik)
6.5.33.03 (Ashtaka. Adhyaya. Varga. Rik)
08.08.133 (Mandala. Anuvāka. Rik)
Samhita Devanagari Accented
त्वं सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्यः ।
उ॒रु यं॒तासि॒ वरू॑थं ॥
Samhita Devanagari Nonaccented
त्वं सोम तनूकृद्भ्यो द्वेषोभ्योऽन्यकृतेभ्यः ।
उरु यंतासि वरूथं ॥
Samhita Transcription Accented
tvám soma tanūkṛ́dbhyo dvéṣobhyo’nyákṛtebhyaḥ ǀ
urú yantā́si várūtham ǁ
Samhita Transcription Nonaccented
tvam soma tanūkṛdbhyo dveṣobhyo’nyakṛtebhyaḥ ǀ
uru yantāsi varūtham ǁ
Padapatha Devanagari Accented
त्वम् । सो॒म॒ । त॒नू॒कृत्ऽभ्यः॑ । द्वेषः॑ऽभ्यः । अ॒न्यऽकृ॑तेभ्यः ।
उ॒रु । य॒न्ता । अ॒सि॒ । वरू॑थम् ॥
Padapatha Devanagari Nonaccented
त्वम् । सोम । तनूकृत्ऽभ्यः । द्वेषःऽभ्यः । अन्यऽकृतेभ्यः ।
उरु । यन्ता । असि । वरूथम् ॥
Padapatha Transcription Accented
tvám ǀ soma ǀ tanūkṛ́t-bhyaḥ ǀ dvéṣaḥ-bhyaḥ ǀ anyá-kṛtebhyaḥ ǀ
urú ǀ yantā́ ǀ asi ǀ várūtham ǁ
Padapatha Transcription Nonaccented
tvam ǀ soma ǀ tanūkṛt-bhyaḥ ǀ dveṣaḥ-bhyaḥ ǀ anya-kṛtebhyaḥ ǀ
uru ǀ yantā ǀ asi ǀ varūtham ǁ
08.079.04 (Mandala. Sukta. Rik)
6.5.33.04 (Ashtaka. Adhyaya. Varga. Rik)
08.08.134 (Mandala. Anuvāka. Rik)
Samhita Devanagari Accented
त्वं चि॒त्ती तव॒ दक्षै॑र्दि॒व आ पृ॑थि॒व्या ऋ॑जीषिन् ।
यावी॑र॒घस्य॑ चि॒द्द्वेषः॑ ॥
Samhita Devanagari Nonaccented
त्वं चित्ती तव दक्षैर्दिव आ पृथिव्या ऋजीषिन् ।
यावीरघस्य चिद्द्वेषः ॥
Samhita Transcription Accented
tvám cittī́ táva dákṣairdivá ā́ pṛthivyā́ ṛjīṣin ǀ
yā́vīraghásya ciddvéṣaḥ ǁ
Samhita Transcription Nonaccented
tvam cittī tava dakṣairdiva ā pṛthivyā ṛjīṣin ǀ
yāvīraghasya ciddveṣaḥ ǁ
Padapatha Devanagari Accented
त्वम् । चि॒त्ती । तव॑ । दक्षैः॑ । दि॒वः । आ । पृ॒थि॒व्याः । ऋ॒जी॒षि॒न् ।
यावीः॑ । अ॒घस्य॑ । चि॒त् । द्वेषः॑ ॥
Padapatha Devanagari Nonaccented
त्वम् । चित्ती । तव । दक्षैः । दिवः । आ । पृथिव्याः । ऋजीषिन् ।
यावीः । अघस्य । चित् । द्वेषः ॥
Padapatha Transcription Accented
tvám ǀ cittī́ ǀ táva ǀ dákṣaiḥ ǀ diváḥ ǀ ā́ ǀ pṛthivyā́ḥ ǀ ṛjīṣin ǀ
yā́vīḥ ǀ aghásya ǀ cit ǀ dvéṣaḥ ǁ
Padapatha Transcription Nonaccented
tvam ǀ cittī ǀ tava ǀ dakṣaiḥ ǀ divaḥ ǀ ā ǀ pṛthivyāḥ ǀ ṛjīṣin ǀ
yāvīḥ ǀ aghasya ǀ cit ǀ dveṣaḥ ǁ
08.079.05 (Mandala. Sukta. Rik)
6.5.33.05 (Ashtaka. Adhyaya. Varga. Rik)
08.08.135 (Mandala. Anuvāka. Rik)
Samhita Devanagari Accented
अ॒र्थिनो॒ यंति॒ चेदर्थं॒ गच्छा॒निद्द॒दुषो॑ रा॒तिं ।
व॒वृ॒ज्युस्तृष्य॑तः॒ कामं॑ ॥
Samhita Devanagari Nonaccented
अर्थिनो यंति चेदर्थं गच्छानिद्ददुषो रातिं ।
ववृज्युस्तृष्यतः कामं ॥
Samhita Transcription Accented
arthíno yánti cédártham gácchāníddadúṣo rātím ǀ
vavṛjyústṛ́ṣyataḥ kā́mam ǁ
Samhita Transcription Nonaccented
arthino yanti cedartham gacchāniddaduṣo rātim ǀ
vavṛjyustṛṣyataḥ kāmam ǁ
Padapatha Devanagari Accented
अ॒र्थिनः॑ । यन्ति॑ । च॒ । इत् । अर्थ॑म् । गच्छा॑न् । इत् । द॒दुषः॑ । रा॒तिम् ।
व॒वृ॒ज्युः । तृष्य॑तः । काम॑म् ॥
Padapatha Devanagari Nonaccented
अर्थिनः । यन्ति । च । इत् । अर्थम् । गच्छान् । इत् । ददुषः । रातिम् ।
ववृज्युः । तृष्यतः । कामम् ॥
Padapatha Transcription Accented
arthínaḥ ǀ yánti ǀ ca ǀ ít ǀ ártham ǀ gácchān ǀ ít ǀ dadúṣaḥ ǀ rātím ǀ
vavṛjyúḥ ǀ tṛ́ṣyataḥ ǀ kā́mam ǁ
Padapatha Transcription Nonaccented
arthinaḥ ǀ yanti ǀ ca ǀ it ǀ artham ǀ gacchān ǀ it ǀ daduṣaḥ ǀ rātim ǀ
vavṛjyuḥ ǀ tṛṣyataḥ ǀ kāmam ǁ
08.079.06 (Mandala. Sukta. Rik)
6.5.34.01 (Ashtaka. Adhyaya. Varga. Rik)
08.08.136 (Mandala. Anuvāka. Rik)
Samhita Devanagari Accented
वि॒दद्यत्पू॒र्व्यं न॒ष्टमुदी॑मृता॒युमी॑रयत् ।
प्रेमायु॑स्तारी॒दती॑र्णं ॥
Samhita Devanagari Nonaccented
विदद्यत्पूर्व्यं नष्टमुदीमृतायुमीरयत् ।
प्रेमायुस्तारीदतीर्णं ॥
Samhita Transcription Accented
vidádyátpūrvyám naṣṭámúdīmṛtāyúmīrayat ǀ
prémā́yustārīdátīrṇam ǁ
Samhita Transcription Nonaccented
vidadyatpūrvyam naṣṭamudīmṛtāyumīrayat ǀ
premāyustārīdatīrṇam ǁ
Padapatha Devanagari Accented
वि॒दत् । यत् । पू॒र्व्यम् । न॒ष्टम् । उत् । ई॒म् । ऋ॒त॒ऽयुम् । ई॒र॒य॒त् ।
प्र । ई॒म् । आयुः॑ । ता॒री॒त् । अती॑र्णम् ॥
Padapatha Devanagari Nonaccented
विदत् । यत् । पूर्व्यम् । नष्टम् । उत् । ईम् । ऋतऽयुम् । ईरयत् ।
प्र । ईम् । आयुः । तारीत् । अतीर्णम् ॥
Padapatha Transcription Accented
vidát ǀ yát ǀ pūrvyám ǀ naṣṭám ǀ út ǀ īm ǀ ṛta-yúm ǀ īrayat ǀ
prá ǀ īm ǀ ā́yuḥ ǀ tārīt ǀ átīrṇam ǁ
Padapatha Transcription Nonaccented
vidat ǀ yat ǀ pūrvyam ǀ naṣṭam ǀ ut ǀ īm ǀ ṛta-yum ǀ īrayat ǀ
pra ǀ īm ǀ āyuḥ ǀ tārīt ǀ atīrṇam ǁ
08.079.07 (Mandala. Sukta. Rik)
6.5.34.02 (Ashtaka. Adhyaya. Varga. Rik)
08.08.137 (Mandala. Anuvāka. Rik)
Samhita Devanagari Accented
सु॒शेवो॑ नो मृळ॒याकु॒रदृ॑प्तक्रतुरवा॒तः ।
भवा॑ नः सोम॒ शं हृ॒दे ॥
Samhita Devanagari Nonaccented
सुशेवो नो मृळयाकुरदृप्तक्रतुरवातः ।
भवा नः सोम शं हृदे ॥
Samhita Transcription Accented
suśévo no mṛḷayā́kurádṛptakraturavātáḥ ǀ
bhávā naḥ soma śám hṛdé ǁ
Samhita Transcription Nonaccented
suśevo no mṛḷayākuradṛptakraturavātaḥ ǀ
bhavā naḥ soma śam hṛde ǁ
Padapatha Devanagari Accented
सु॒ऽशेवः॑ । नः॒ । मृ॒ळ॒याकुः॑ । अदृ॑प्तऽक्रतुः । अ॒वा॒तः ।
भव॑ । नः॒ । सो॒म॒ । शम् । हृ॒दे ॥
Padapatha Devanagari Nonaccented
सुऽशेवः । नः । मृळयाकुः । अदृप्तऽक्रतुः । अवातः ।
भव । नः । सोम । शम् । हृदे ॥
Padapatha Transcription Accented
su-śévaḥ ǀ naḥ ǀ mṛḷayā́kuḥ ǀ ádṛpta-kratuḥ ǀ avātáḥ ǀ
bháva ǀ naḥ ǀ soma ǀ śám ǀ hṛdé ǁ
Padapatha Transcription Nonaccented
su-śevaḥ ǀ naḥ ǀ mṛḷayākuḥ ǀ adṛpta-kratuḥ ǀ avātaḥ ǀ
bhava ǀ naḥ ǀ soma ǀ śam ǀ hṛde ǁ
08.079.08 (Mandala. Sukta. Rik)
6.5.34.03 (Ashtaka. Adhyaya. Varga. Rik)
08.08.138 (Mandala. Anuvāka. Rik)
Samhita Devanagari Accented
मा नः॑ सोम॒ सं वी॑विजो॒ मा वि बी॑भिषथा राजन् ।
मा नो॒ हार्दि॑ त्वि॒षा व॑धीः ॥
Samhita Devanagari Nonaccented
मा नः सोम सं वीविजो मा वि बीभिषथा राजन् ।
मा नो हार्दि त्विषा वधीः ॥
Samhita Transcription Accented
mā́ naḥ soma sám vīvijo mā́ ví bībhiṣathā rājan ǀ
mā́ no hā́rdi tviṣā́ vadhīḥ ǁ
Samhita Transcription Nonaccented
mā naḥ soma sam vīvijo mā vi bībhiṣathā rājan ǀ
mā no hārdi tviṣā vadhīḥ ǁ
Padapatha Devanagari Accented
मा । नः॒ । सो॒म॒ । सम् । वी॒वि॒जः॒ । मा । वि । बी॒भि॒ष॒थाः॒ । रा॒ज॒न् ।
मा । नः॒ । हार्दि॑ । त्वि॒षा । व॒धीः॒ ॥
Padapatha Devanagari Nonaccented
मा । नः । सोम । सम् । वीविजः । मा । वि । बीभिषथाः । राजन् ।
मा । नः । हार्दि । त्विषा । वधीः ॥
Padapatha Transcription Accented
mā́ ǀ naḥ ǀ soma ǀ sám ǀ vīvijaḥ ǀ mā́ ǀ ví ǀ bībhiṣathāḥ ǀ rājan ǀ
mā́ ǀ naḥ ǀ hā́rdi ǀ tviṣā́ ǀ vadhīḥ ǁ
Padapatha Transcription Nonaccented
mā ǀ naḥ ǀ soma ǀ sam ǀ vīvijaḥ ǀ mā ǀ vi ǀ bībhiṣathāḥ ǀ rājan ǀ
mā ǀ naḥ ǀ hārdi ǀ tviṣā ǀ vadhīḥ ǁ
08.079.09 (Mandala. Sukta. Rik)
6.5.34.04 (Ashtaka. Adhyaya. Varga. Rik)
08.08.139 (Mandala. Anuvāka. Rik)
Samhita Devanagari Accented
अव॒ यत्स्वे स॒धस्थे॑ दे॒वानां॑ दुर्म॒तीरीक्षे॑ ।
राज॒न्नप॒ द्विषः॑ सेध॒ मीढ्वो॒ अप॒ स्रिधः॑ सेध ॥
Samhita Devanagari Nonaccented
अव यत्स्वे सधस्थे देवानां दुर्मतीरीक्षे ।
राजन्नप द्विषः सेध मीढ्वो अप स्रिधः सेध ॥
Samhita Transcription Accented
áva yátsvé sadhásthe devā́nām durmatī́rī́kṣe ǀ
rā́jannápa dvíṣaḥ sedha mī́ḍhvo ápa srídhaḥ sedha ǁ
Samhita Transcription Nonaccented
ava yatsve sadhasthe devānām durmatīrīkṣe ǀ
rājannapa dviṣaḥ sedha mīḍhvo apa sridhaḥ sedha ǁ
Padapatha Devanagari Accented
अव॑ । यत् । स्वे । स॒धऽस्थे॑ । दे॒वाना॑म् । दुः॒ऽम॒तीः । ईक्षे॑ ।
राज॑न् । अप॑ । द्विषः॑ । से॒ध॒ । मीढ्वः॑ । अप॑ । स्रिधः॑ । से॒ध॒ ॥
Padapatha Devanagari Nonaccented
अव । यत् । स्वे । सधऽस्थे । देवानाम् । दुःऽमतीः । ईक्षे ।
राजन् । अप । द्विषः । सेध । मीढ्वः । अप । स्रिधः । सेध ॥
Padapatha Transcription Accented
áva ǀ yát ǀ své ǀ sadhá-sthe ǀ devā́nām ǀ duḥ-matī́ḥ ǀ ī́kṣe ǀ
rā́jan ǀ ápa ǀ dvíṣaḥ ǀ sedha ǀ mī́ḍhvaḥ ǀ ápa ǀ srídhaḥ ǀ sedha ǁ
Padapatha Transcription Nonaccented
ava ǀ yat ǀ sve ǀ sadha-sthe ǀ devānām ǀ duḥ-matīḥ ǀ īkṣe ǀ
rājan ǀ apa ǀ dviṣaḥ ǀ sedha ǀ mīḍhvaḥ ǀ apa ǀ sridhaḥ ǀ sedha ǁ