|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 68
|
1. Info |
| To: | soma pavamāna | |
| From: | vatsaprī bhālandana | |
| Metres: | 1st set of styles: nicṛjjagatī (1, 3, 6, 7); jagatī (2, 4, 5, 9); virāḍjagatī (8); triṣṭup (10) 2nd set of styles: jagatī (1-9); triṣṭubh (10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.068.01 (Mandala. Sukta. Rik)
7.2.19.01 (Ashtaka. Adhyaya. Varga. Rik)
09.04.001 (Mandala. Anuvāka. Rik)
Samhita Devanagari Accented
प्र दे॒वमच्छा॒ मधु॑मंत॒ इंद॒वोऽसि॑ष्यदंत॒ गाव॒ आ न धे॒नवः॑ ।
ब॒र्हि॒षदो॑ वच॒नावं॑त॒ ऊध॑भिः परि॒स्रुत॑मु॒स्रिया॑ नि॒र्णिजं॑ धिरे ॥
Samhita Devanagari Nonaccented
प्र देवमच्छा मधुमंत इंदवोऽसिष्यदंत गाव आ न धेनवः ।
बर्हिषदो वचनावंत ऊधभिः परिस्रुतमुस्रिया निर्णिजं धिरे ॥
Samhita Transcription Accented
prá devámácchā mádhumanta índavó’siṣyadanta gā́va ā́ ná dhenávaḥ ǀ
barhiṣádo vacanā́vanta ū́dhabhiḥ parisrútamusríyā nirṇíjam dhire ǁ
Samhita Transcription Nonaccented
pra devamacchā madhumanta indavo’siṣyadanta gāva ā na dhenavaḥ ǀ
barhiṣado vacanāvanta ūdhabhiḥ parisrutamusriyā nirṇijam dhire ǁ
Padapatha Devanagari Accented
प्र । दे॒वम् । अच्छ॑ । मधु॑ऽमन्तः । इन्द॑वः । असि॑स्यदन्त । गावः॑ । आ । न । धे॒नवः॑ ।
ब॒र्हि॒ऽसदः॑ । व॒च॒नाऽव॑न्तः । ऊध॑ऽभिः । प॒रि॒ऽस्रुत॑म् । उ॒स्रियाः॑ । निः॒ऽनिज॑म् । धि॒रे॒ ॥
Padapatha Devanagari Nonaccented
प्र । देवम् । अच्छ । मधुऽमन्तः । इन्दवः । असिस्यदन्त । गावः । आ । न । धेनवः ।
बर्हिऽसदः । वचनाऽवन्तः । ऊधऽभिः । परिऽस्रुतम् । उस्रियाः । निःऽनिजम् । धिरे ॥
Padapatha Transcription Accented
prá ǀ devám ǀ áccha ǀ mádhu-mantaḥ ǀ índavaḥ ǀ ásisyadanta ǀ gā́vaḥ ǀ ā́ ǀ ná ǀ dhenávaḥ ǀ
barhi-sádaḥ ǀ vacanā́-vantaḥ ǀ ū́dha-bhiḥ ǀ pari-srútam ǀ usríyāḥ ǀ niḥ-níjam ǀ dhire ǁ
Padapatha Transcription Nonaccented
pra ǀ devam ǀ accha ǀ madhu-mantaḥ ǀ indavaḥ ǀ asisyadanta ǀ gāvaḥ ǀ ā ǀ na ǀ dhenavaḥ ǀ
barhi-sadaḥ ǀ vacanā-vantaḥ ǀ ūdha-bhiḥ ǀ pari-srutam ǀ usriyāḥ ǀ niḥ-nijam ǀ dhire ǁ
09.068.02 (Mandala. Sukta. Rik)
7.2.19.02 (Ashtaka. Adhyaya. Varga. Rik)
09.04.002 (Mandala. Anuvāka. Rik)
Samhita Devanagari Accented
स रोरु॑वद॒भि पूर्वा॑ अचिक्रददुपा॒रुहः॑ श्र॒थय॑न्त्स्वादते॒ हरिः॑ ।
ति॒रः प॒वित्रं॑ परि॒यन्नु॒रु ज्रयो॒ नि शर्या॑णि दधते दे॒व आ वरं॑ ॥
Samhita Devanagari Nonaccented
स रोरुवदभि पूर्वा अचिक्रददुपारुहः श्रथयन्त्स्वादते हरिः ।
तिरः पवित्रं परियन्नुरु ज्रयो नि शर्याणि दधते देव आ वरं ॥
Samhita Transcription Accented
sá róruvadabhí pū́rvā acikradadupārúhaḥ śratháyantsvādate háriḥ ǀ
tiráḥ pavítram pariyánnurú jráyo ní śáryāṇi dadhate devá ā́ váram ǁ
Samhita Transcription Nonaccented
sa roruvadabhi pūrvā acikradadupāruhaḥ śrathayantsvādate hariḥ ǀ
tiraḥ pavitram pariyannuru jrayo ni śaryāṇi dadhate deva ā varam ǁ
Padapatha Devanagari Accented
सः । रोरु॑वत् । अ॒भि । पूर्वाः॑ । अ॒चि॒क्र॒द॒त् । उ॒प॒ऽआ॒रुहः॑ । श्र॒थय॑न् । स्वा॒द॒ते॒ । हरिः॑ ।
ति॒रः । प॒वित्र॑म् । प॒रि॒ऽयन् । उ॒रु । ज्रयः॑ । नि । शर्या॑णि । द॒ध॒ते॒ । दे॒वः । आ । वर॑म् ॥
Padapatha Devanagari Nonaccented
सः । रोरुवत् । अभि । पूर्वाः । अचिक्रदत् । उपऽआरुहः । श्रथयन् । स्वादते । हरिः ।
तिरः । पवित्रम् । परिऽयन् । उरु । ज्रयः । नि । शर्याणि । दधते । देवः । आ । वरम् ॥
Padapatha Transcription Accented
sáḥ ǀ róruvat ǀ abhí ǀ pū́rvāḥ ǀ acikradat ǀ upa-ārúhaḥ ǀ śratháyan ǀ svādate ǀ háriḥ ǀ
tiráḥ ǀ pavítram ǀ pari-yán ǀ urú ǀ jráyaḥ ǀ ní ǀ śáryāṇi ǀ dadhate ǀ deváḥ ǀ ā́ ǀ váram ǁ
Padapatha Transcription Nonaccented
saḥ ǀ roruvat ǀ abhi ǀ pūrvāḥ ǀ acikradat ǀ upa-āruhaḥ ǀ śrathayan ǀ svādate ǀ hariḥ ǀ
tiraḥ ǀ pavitram ǀ pari-yan ǀ uru ǀ jrayaḥ ǀ ni ǀ śaryāṇi ǀ dadhate ǀ devaḥ ǀ ā ǀ varam ǁ
09.068.03 (Mandala. Sukta. Rik)
7.2.19.03 (Ashtaka. Adhyaya. Varga. Rik)
09.04.003 (Mandala. Anuvāka. Rik)
Samhita Devanagari Accented
वि यो म॒मे य॒म्या॑ संय॒ती मदः॑ साकं॒वृधा॒ पय॑सा पिन्व॒दक्षि॑ता ।
म॒ही अ॑पा॒रे रज॑सी वि॒वेवि॑ददभि॒व्रज॒न्नक्षि॑तं॒ पाज॒ आ द॑दे ॥
Samhita Devanagari Nonaccented
वि यो ममे यम्या संयती मदः साकंवृधा पयसा पिन्वदक्षिता ।
मही अपारे रजसी विवेविददभिव्रजन्नक्षितं पाज आ ददे ॥
Samhita Transcription Accented
ví yó mamé yamyā́ saṃyatī́ mádaḥ sākaṃvṛ́dhā páyasā pinvadákṣitā ǀ
mahī́ apāré rájasī vivévidadabhivrájannákṣitam pā́ja ā́ dade ǁ
Samhita Transcription Nonaccented
vi yo mame yamyā saṃyatī madaḥ sākaṃvṛdhā payasā pinvadakṣitā ǀ
mahī apāre rajasī vivevidadabhivrajannakṣitam pāja ā dade ǁ
Padapatha Devanagari Accented
वि । यः । म॒मे । य॒म्या॑ । सं॒य॒ती इति॑ स॒म्ऽय॒ती । मदः॑ । सा॒क॒म्ऽवृधा॑ । पय॑सा । पि॒न्व॒त् । अक्षि॑ता ।
म॒ही इति॑ । अ॒पा॒रे इति॑ । रज॑सी॒ इति॑ । वि॒ऽवेवि॑दत् । अ॒भि॒ऽव्रज॑न् । अक्षि॑तम् । पाजः॑ । आ । द॒दे॒ ॥
Padapatha Devanagari Nonaccented
वि । यः । ममे । यम्या । संयती इति सम्ऽयती । मदः । साकम्ऽवृधा । पयसा । पिन्वत् । अक्षिता ।
मही इति । अपारे इति । रजसी इति । विऽवेविदत् । अभिऽव्रजन् । अक्षितम् । पाजः । आ । ददे ॥
Padapatha Transcription Accented
ví ǀ yáḥ ǀ mamé ǀ yamyā́ ǀ saṃyatī́ íti sam-yatī́ ǀ mádaḥ ǀ sākam-vṛ́dhā ǀ páyasā ǀ pinvat ǀ ákṣitā ǀ
mahī́ íti ǀ apāré íti ǀ rájasī íti ǀ vi-vévidat ǀ abhi-vrájan ǀ ákṣitam ǀ pā́jaḥ ǀ ā́ ǀ dade ǁ
Padapatha Transcription Nonaccented
vi ǀ yaḥ ǀ mame ǀ yamyā ǀ saṃyatī iti sam-yatī ǀ madaḥ ǀ sākam-vṛdhā ǀ payasā ǀ pinvat ǀ akṣitā ǀ
mahī iti ǀ apāre iti ǀ rajasī iti ǀ vi-vevidat ǀ abhi-vrajan ǀ akṣitam ǀ pājaḥ ǀ ā ǀ dade ǁ
09.068.04 (Mandala. Sukta. Rik)
7.2.19.04 (Ashtaka. Adhyaya. Varga. Rik)
09.04.004 (Mandala. Anuvāka. Rik)
Samhita Devanagari Accented
स मा॒तरा॑ वि॒चर॑न्वा॒जय॑न्न॒पः प्र मेधि॑रः स्व॒धया॑ पिन्वते प॒दं ।
अं॒शुर्यवे॑न पिपिशे य॒तो नृभिः॒ सं जा॒मिभि॒र्नस॑ते॒ रक्ष॑ते॒ शिरः॑ ॥
Samhita Devanagari Nonaccented
स मातरा विचरन्वाजयन्नपः प्र मेधिरः स्वधया पिन्वते पदं ।
अंशुर्यवेन पिपिशे यतो नृभिः सं जामिभिर्नसते रक्षते शिरः ॥
Samhita Transcription Accented
sá mātárā vicáranvājáyannapáḥ prá médhiraḥ svadháyā pinvate padám ǀ
aṃśúryávena pipiśe yató nṛ́bhiḥ sám jāmíbhirnásate rákṣate śíraḥ ǁ
Samhita Transcription Nonaccented
sa mātarā vicaranvājayannapaḥ pra medhiraḥ svadhayā pinvate padam ǀ
aṃśuryavena pipiśe yato nṛbhiḥ sam jāmibhirnasate rakṣate śiraḥ ǁ
Padapatha Devanagari Accented
सः । मा॒तरा॑ । वि॒ऽचर॑न् । वा॒जय॑न् । अ॒पः । प्र । मेधि॑रः । स्व॒धया॑ । पि॒न्व॒ते॒ । प॒दम् ।
अं॒शुः । यवे॑न । पि॒पि॒शे॒ । य॒तः । नृऽभिः॑ । सम् । जा॒मिऽभिः॑ । नस॑ते । रक्ष॑ते । शिरः॑ ॥
Padapatha Devanagari Nonaccented
सः । मातरा । विऽचरन् । वाजयन् । अपः । प्र । मेधिरः । स्वधया । पिन्वते । पदम् ।
अंशुः । यवेन । पिपिशे । यतः । नृऽभिः । सम् । जामिऽभिः । नसते । रक्षते । शिरः ॥
Padapatha Transcription Accented
sáḥ ǀ mātárā ǀ vi-cáran ǀ vājáyan ǀ apáḥ ǀ prá ǀ médhiraḥ ǀ svadháyā ǀ pinvate ǀ padám ǀ
aṃśúḥ ǀ yávena ǀ pipiśe ǀ yatáḥ ǀ nṛ́-bhiḥ ǀ sám ǀ jāmí-bhiḥ ǀ násate ǀ rákṣate ǀ śíraḥ ǁ
Padapatha Transcription Nonaccented
saḥ ǀ mātarā ǀ vi-caran ǀ vājayan ǀ apaḥ ǀ pra ǀ medhiraḥ ǀ svadhayā ǀ pinvate ǀ padam ǀ
aṃśuḥ ǀ yavena ǀ pipiśe ǀ yataḥ ǀ nṛ-bhiḥ ǀ sam ǀ jāmi-bhiḥ ǀ nasate ǀ rakṣate ǀ śiraḥ ǁ
09.068.05 (Mandala. Sukta. Rik)
7.2.19.05 (Ashtaka. Adhyaya. Varga. Rik)
09.04.005 (Mandala. Anuvāka. Rik)
Samhita Devanagari Accented
सं दक्षे॑ण॒ मन॑सा जायते क॒विर्ऋ॒तस्य॒ गर्भो॒ निहि॑तो य॒मा प॒रः ।
यूना॑ ह॒ संता॑ प्रथ॒मं वि ज॑ज्ञतु॒र्गुहा॑ हि॒तं जनि॑म॒ नेम॒मुद्य॑तं ॥
Samhita Devanagari Nonaccented
सं दक्षेण मनसा जायते कविर्ऋतस्य गर्भो निहितो यमा परः ।
यूना ह संता प्रथमं वि जज्ञतुर्गुहा हितं जनिम नेममुद्यतं ॥
Samhita Transcription Accented
sám dákṣeṇa mánasā jāyate kavírṛtásya gárbho níhito yamā́ paráḥ ǀ
yū́nā ha sántā prathamám ví jajñaturgúhā hitám jánima némamúdyatam ǁ
Samhita Transcription Nonaccented
sam dakṣeṇa manasā jāyate kavirṛtasya garbho nihito yamā paraḥ ǀ
yūnā ha santā prathamam vi jajñaturguhā hitam janima nemamudyatam ǁ
Padapatha Devanagari Accented
सम् । दक्षे॑ण । मन॑सा । जा॒य॒ते॒ । क॒विः । ऋ॒तस्य॑ । गर्भः॑ । निऽहि॑तः । य॒मा । प॒रः ।
यूना॑ । ह॒ । सन्ता॑ । प्र॒थ॒मम् । वि । ज॒ज्ञ॒तुः॒ । गुहा॑ । हि॒तम् । जनि॑म । नेम॑म् । उत्ऽय॑तम् ॥
Padapatha Devanagari Nonaccented
सम् । दक्षेण । मनसा । जायते । कविः । ऋतस्य । गर्भः । निऽहितः । यमा । परः ।
यूना । ह । सन्ता । प्रथमम् । वि । जज्ञतुः । गुहा । हितम् । जनिम । नेमम् । उत्ऽयतम् ॥
Padapatha Transcription Accented
sám ǀ dákṣeṇa ǀ mánasā ǀ jāyate ǀ kavíḥ ǀ ṛtásya ǀ gárbhaḥ ǀ ní-hitaḥ ǀ yamā́ ǀ paráḥ ǀ
yū́nā ǀ ha ǀ sántā ǀ prathamám ǀ ví ǀ jajñatuḥ ǀ gúhā ǀ hitám ǀ jánima ǀ némam ǀ út-yatam ǁ
Padapatha Transcription Nonaccented
sam ǀ dakṣeṇa ǀ manasā ǀ jāyate ǀ kaviḥ ǀ ṛtasya ǀ garbhaḥ ǀ ni-hitaḥ ǀ yamā ǀ paraḥ ǀ
yūnā ǀ ha ǀ santā ǀ prathamam ǀ vi ǀ jajñatuḥ ǀ guhā ǀ hitam ǀ janima ǀ nemam ǀ ut-yatam ǁ
09.068.06 (Mandala. Sukta. Rik)
7.2.20.01 (Ashtaka. Adhyaya. Varga. Rik)
09.04.006 (Mandala. Anuvāka. Rik)
Samhita Devanagari Accented
मं॒द्रस्य॑ रू॒पं वि॑विदुर्मनी॒षिणः॑ श्ये॒नो यदंधो॒ अभ॑रत्परा॒वतः॑ ।
तं म॑र्जयंत सु॒वृधं॑ न॒दीष्वाँ उ॒शंत॑मं॒शुं प॑रि॒यंत॑मृ॒ग्मियं॑ ॥
Samhita Devanagari Nonaccented
मंद्रस्य रूपं विविदुर्मनीषिणः श्येनो यदंधो अभरत्परावतः ।
तं मर्जयंत सुवृधं नदीष्वाँ उशंतमंशुं परियंतमृग्मियं ॥
Samhita Transcription Accented
mandrásya rūpám vividurmanīṣíṇaḥ śyenó yádándho ábharatparāvátaḥ ǀ
tám marjayanta suvṛ́dham nadī́ṣvā́m̐ uśántamaṃśúm pariyántamṛgmíyam ǁ
Samhita Transcription Nonaccented
mandrasya rūpam vividurmanīṣiṇaḥ śyeno yadandho abharatparāvataḥ ǀ
tam marjayanta suvṛdham nadīṣvām̐ uśantamaṃśum pariyantamṛgmiyam ǁ
Padapatha Devanagari Accented
म॒न्द्रस्य॑ । रू॒पम् । वि॒वि॒दुः॒ । म॒नी॒षिणः॑ । श्ये॒नः । यत् । अन्धः॑ । अभ॑रत् । प॒रा॒ऽवतः॑ ।
तम् । म॒र्ज॒य॒न्त॒ । सु॒ऽवृध॑म् । न॒दीषु॑ । आ । उ॒शन्त॑म् । अं॒शुम् । प॒रि॒ऽयन्त॑म् । ऋ॒ग्मिय॑म् ॥
Padapatha Devanagari Nonaccented
मन्द्रस्य । रूपम् । विविदुः । मनीषिणः । श्येनः । यत् । अन्धः । अभरत् । पराऽवतः ।
तम् । मर्जयन्त । सुऽवृधम् । नदीषु । आ । उशन्तम् । अंशुम् । परिऽयन्तम् । ऋग्मियम् ॥
Padapatha Transcription Accented
mandrásya ǀ rūpám ǀ vividuḥ ǀ manīṣíṇaḥ ǀ śyenáḥ ǀ yát ǀ ándhaḥ ǀ ábharat ǀ parā-vátaḥ ǀ
tám ǀ marjayanta ǀ su-vṛ́dham ǀ nadī́ṣu ǀ ā́ ǀ uśántam ǀ aṃśúm ǀ pari-yántam ǀ ṛgmíyam ǁ
Padapatha Transcription Nonaccented
mandrasya ǀ rūpam ǀ vividuḥ ǀ manīṣiṇaḥ ǀ śyenaḥ ǀ yat ǀ andhaḥ ǀ abharat ǀ parā-vataḥ ǀ
tam ǀ marjayanta ǀ su-vṛdham ǀ nadīṣu ǀ ā ǀ uśantam ǀ aṃśum ǀ pari-yantam ǀ ṛgmiyam ǁ
09.068.07 (Mandala. Sukta. Rik)
7.2.20.02 (Ashtaka. Adhyaya. Varga. Rik)
09.04.007 (Mandala. Anuvāka. Rik)
Samhita Devanagari Accented
त्वां मृ॑जंति॒ दश॒ योष॑णः सु॒तं सोम॒ ऋषि॑भिर्म॒तिभि॑र्धी॒तिभि॑र्हि॒तं ।
अव्यो॒ वारे॑भिरु॒त दे॒वहू॑तिभि॒र्नृभि॑र्य॒तो वाज॒मा द॑र्षि सा॒तये॑ ॥
Samhita Devanagari Nonaccented
त्वां मृजंति दश योषणः सुतं सोम ऋषिभिर्मतिभिर्धीतिभिर्हितं ।
अव्यो वारेभिरुत देवहूतिभिर्नृभिर्यतो वाजमा दर्षि सातये ॥
Samhita Transcription Accented
tvā́m mṛjanti dáśa yóṣaṇaḥ sutám sóma ṛ́ṣibhirmatíbhirdhītíbhirhitám ǀ
ávyo vā́rebhirutá deváhūtibhirnṛ́bhiryató vā́jamā́ darṣi sātáye ǁ
Samhita Transcription Nonaccented
tvām mṛjanti daśa yoṣaṇaḥ sutam soma ṛṣibhirmatibhirdhītibhirhitam ǀ
avyo vārebhiruta devahūtibhirnṛbhiryato vājamā darṣi sātaye ǁ
Padapatha Devanagari Accented
त्वाम् । मृ॒ज॒न्ति॒ । दश॑ । योष॑णः । सु॒तम् । सोम॑ । ऋषि॑ऽभिः । म॒तिऽभिः॑ । धी॒तिऽभिः॑ । हि॒तम् ।
अव्यः॑ । वारे॑भिः । उ॒त । दे॒वहू॑तिऽभिः । नृऽभिः॑ । य॒तः । वाज॑म् । आ । द॒र्षि॒ । सा॒तये॑ ॥
Padapatha Devanagari Nonaccented
त्वाम् । मृजन्ति । दश । योषणः । सुतम् । सोम । ऋषिऽभिः । मतिऽभिः । धीतिऽभिः । हितम् ।
अव्यः । वारेभिः । उत । देवहूतिऽभिः । नृऽभिः । यतः । वाजम् । आ । दर्षि । सातये ॥
Padapatha Transcription Accented
tvā́m ǀ mṛjanti ǀ dáśa ǀ yóṣaṇaḥ ǀ sutám ǀ sóma ǀ ṛ́ṣi-bhiḥ ǀ matí-bhiḥ ǀ dhītí-bhiḥ ǀ hitám ǀ
ávyaḥ ǀ vā́rebhiḥ ǀ utá ǀ deváhūti-bhiḥ ǀ nṛ́-bhiḥ ǀ yatáḥ ǀ vā́jam ǀ ā́ ǀ darṣi ǀ sātáye ǁ
Padapatha Transcription Nonaccented
tvām ǀ mṛjanti ǀ daśa ǀ yoṣaṇaḥ ǀ sutam ǀ soma ǀ ṛṣi-bhiḥ ǀ mati-bhiḥ ǀ dhīti-bhiḥ ǀ hitam ǀ
avyaḥ ǀ vārebhiḥ ǀ uta ǀ devahūti-bhiḥ ǀ nṛ-bhiḥ ǀ yataḥ ǀ vājam ǀ ā ǀ darṣi ǀ sātaye ǁ
09.068.08 (Mandala. Sukta. Rik)
7.2.20.03 (Ashtaka. Adhyaya. Varga. Rik)
09.04.008 (Mandala. Anuvāka. Rik)
Samhita Devanagari Accented
प॒रि॒प्र॒यंतं॑ व॒य्यं॑ सुषं॒सदं॒ सोमं॑ मनी॒षा अ॒भ्य॑नूषत॒ स्तुभः॑ ।
यो धार॑या॒ मधु॑माँ ऊ॒र्मिणा॑ दि॒व इय॑र्ति॒ वाचं॑ रयि॒षाळम॑र्त्यः ॥
Samhita Devanagari Nonaccented
परिप्रयंतं वय्यं सुषंसदं सोमं मनीषा अभ्यनूषत स्तुभः ।
यो धारया मधुमाँ ऊर्मिणा दिव इयर्ति वाचं रयिषाळमर्त्यः ॥
Samhita Transcription Accented
pariprayántam vayyám suṣaṃsádam sómam manīṣā́ abhyánūṣata stúbhaḥ ǀ
yó dhā́rayā mádhumām̐ ūrmíṇā divá íyarti vā́cam rayiṣā́ḷámartyaḥ ǁ
Samhita Transcription Nonaccented
pariprayantam vayyam suṣaṃsadam somam manīṣā abhyanūṣata stubhaḥ ǀ
yo dhārayā madhumām̐ ūrmiṇā diva iyarti vācam rayiṣāḷamartyaḥ ǁ
Padapatha Devanagari Accented
प॒रि॒ऽप्र॒यन्त॑म् । व॒य्य॑म् । सु॒ऽसं॒सद॑म् । सोम॑म् । म॒नी॒षाः । अ॒भि । अ॒नू॒ष॒त॒ । स्तुभः॑ ।
यः । धार॑या । मधु॑ऽमान् । ऊ॒र्मिणा॑ । दि॒वः । इय॑र्ति । वाच॑म् । र॒यि॒षाट् । अम॑र्त्यः ॥
Padapatha Devanagari Nonaccented
परिऽप्रयन्तम् । वय्यम् । सुऽसंसदम् । सोमम् । मनीषाः । अभि । अनूषत । स्तुभः ।
यः । धारया । मधुऽमान् । ऊर्मिणा । दिवः । इयर्ति । वाचम् । रयिषाट् । अमर्त्यः ॥
Padapatha Transcription Accented
pari-prayántam ǀ vayyám ǀ su-saṃsádam ǀ sómam ǀ manīṣā́ḥ ǀ abhí ǀ anūṣata ǀ stúbhaḥ ǀ
yáḥ ǀ dhā́rayā ǀ mádhu-mān ǀ ūrmíṇā ǀ diváḥ ǀ íyarti ǀ vā́cam ǀ rayiṣā́ṭ ǀ ámartyaḥ ǁ
Padapatha Transcription Nonaccented
pari-prayantam ǀ vayyam ǀ su-saṃsadam ǀ somam ǀ manīṣāḥ ǀ abhi ǀ anūṣata ǀ stubhaḥ ǀ
yaḥ ǀ dhārayā ǀ madhu-mān ǀ ūrmiṇā ǀ divaḥ ǀ iyarti ǀ vācam ǀ rayiṣāṭ ǀ amartyaḥ ǁ
09.068.09 (Mandala. Sukta. Rik)
7.2.20.04 (Ashtaka. Adhyaya. Varga. Rik)
09.04.009 (Mandala. Anuvāka. Rik)
Samhita Devanagari Accented
अ॒यं दि॒व इ॑यर्ति॒ विश्व॒मा रजः॒ सोमः॑ पुना॒नः क॒लशे॑षु सीदति ।
अ॒द्भिर्गोभि॑र्मृज्यते॒ अद्रि॑भिः सु॒तः पु॑ना॒न इंदु॒र्वरि॑वो विदत्प्रि॒यं ॥
Samhita Devanagari Nonaccented
अयं दिव इयर्ति विश्वमा रजः सोमः पुनानः कलशेषु सीदति ।
अद्भिर्गोभिर्मृज्यते अद्रिभिः सुतः पुनान इंदुर्वरिवो विदत्प्रियं ॥
Samhita Transcription Accented
ayám divá iyarti víśvamā́ rájaḥ sómaḥ punānáḥ kaláśeṣu sīdati ǀ
adbhírgóbhirmṛjyate ádribhiḥ sutáḥ punāná índurvárivo vidatpriyám ǁ
Samhita Transcription Nonaccented
ayam diva iyarti viśvamā rajaḥ somaḥ punānaḥ kalaśeṣu sīdati ǀ
adbhirgobhirmṛjyate adribhiḥ sutaḥ punāna indurvarivo vidatpriyam ǁ
Padapatha Devanagari Accented
अ॒यम् । दि॒वः । इ॒य॒र्ति॒ । विश्व॑म् । आ । रजः॑ । सोमः॑ । पु॒ना॒नः । क॒लशे॑षु । सी॒द॒ति॒ ।
अ॒त्ऽभिः । गोभिः॑ । मृ॒ज्य॒ते॒ । अद्रि॑ऽभिः । सु॒तः । पु॒ना॒नः । इन्दुः॑ । वरि॑वः । वि॒द॒त् । प्रि॒यम् ॥
Padapatha Devanagari Nonaccented
अयम् । दिवः । इयर्ति । विश्वम् । आ । रजः । सोमः । पुनानः । कलशेषु । सीदति ।
अत्ऽभिः । गोभिः । मृज्यते । अद्रिऽभिः । सुतः । पुनानः । इन्दुः । वरिवः । विदत् । प्रियम् ॥
Padapatha Transcription Accented
ayám ǀ diváḥ ǀ iyarti ǀ víśvam ǀ ā́ ǀ rájaḥ ǀ sómaḥ ǀ punānáḥ ǀ kaláśeṣu ǀ sīdati ǀ
at-bhíḥ ǀ góbhiḥ ǀ mṛjyate ǀ ádri-bhiḥ ǀ sutáḥ ǀ punānáḥ ǀ índuḥ ǀ várivaḥ ǀ vidat ǀ priyám ǁ
Padapatha Transcription Nonaccented
ayam ǀ divaḥ ǀ iyarti ǀ viśvam ǀ ā ǀ rajaḥ ǀ somaḥ ǀ punānaḥ ǀ kalaśeṣu ǀ sīdati ǀ
at-bhiḥ ǀ gobhiḥ ǀ mṛjyate ǀ adri-bhiḥ ǀ sutaḥ ǀ punānaḥ ǀ induḥ ǀ varivaḥ ǀ vidat ǀ priyam ǁ
09.068.10 (Mandala. Sukta. Rik)
7.2.20.05 (Ashtaka. Adhyaya. Varga. Rik)
09.04.010 (Mandala. Anuvāka. Rik)
Samhita Devanagari Accented
ए॒वा नः॑ सोम परिषि॒च्यमा॑नो॒ वयो॒ दध॑च्चि॒त्रत॑मं पवस्व ।
अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीरं॑ ॥
Samhita Devanagari Nonaccented
एवा नः सोम परिषिच्यमानो वयो दधच्चित्रतमं पवस्व ।
अद्वेषे द्यावापृथिवी हुवेम देवा धत्त रयिमस्मे सुवीरं ॥
Samhita Transcription Accented
evā́ naḥ soma pariṣicyámāno váyo dádhaccitrátamam pavasva ǀ
adveṣé dyā́vāpṛthivī́ huvema dévā dhattá rayímasmé suvī́ram ǁ
Samhita Transcription Nonaccented
evā naḥ soma pariṣicyamāno vayo dadhaccitratamam pavasva ǀ
adveṣe dyāvāpṛthivī huvema devā dhatta rayimasme suvīram ǁ
Padapatha Devanagari Accented
ए॒व । नः॒ । सो॒म॒ । प॒रि॒ऽसि॒च्यमा॑नः । वयः॑ । दध॑त् । चि॒त्रऽत॑मम् । प॒व॒स्व॒ ।
अ॒द्वे॒षे इति॑ । द्यावा॑पृथि॒वी इति॑ । हु॒वे॒म॒ । देवाः॑ । ध॒त्त । र॒यिम् । अ॒स्मे इति॑ । सु॒ऽवीर॑म् ॥
Padapatha Devanagari Nonaccented
एव । नः । सोम । परिऽसिच्यमानः । वयः । दधत् । चित्रऽतमम् । पवस्व ।
अद्वेषे इति । द्यावापृथिवी इति । हुवेम । देवाः । धत्त । रयिम् । अस्मे इति । सुऽवीरम् ॥
Padapatha Transcription Accented
evá ǀ naḥ ǀ soma ǀ pari-sicyámānaḥ ǀ váyaḥ ǀ dádhat ǀ citrá-tamam ǀ pavasva ǀ
adveṣé íti ǀ dyā́vāpṛthivī́ íti ǀ huvema ǀ dévāḥ ǀ dhattá ǀ rayím ǀ asmé íti ǀ su-vī́ram ǁ
Padapatha Transcription Nonaccented
eva ǀ naḥ ǀ soma ǀ pari-sicyamānaḥ ǀ vayaḥ ǀ dadhat ǀ citra-tamam ǀ pavasva ǀ
adveṣe iti ǀ dyāvāpṛthivī iti ǀ huvema ǀ devāḥ ǀ dhatta ǀ rayim ǀ asme iti ǀ su-vīram ǁ