|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 74
|
1. Info |
| To: | soma pavamāna | |
| From: | kakṣīvat dairghatamasa | |
| Metres: | 1st set of styles: pādanicṛjjgatī (1, 3); virāḍjagatī (2, 6); jagatī (4, 7); nicṛjjagatī (5, 9); nicṛttriṣṭup (8) 2nd set of styles: jagatī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.074.01 (Mandala. Sukta. Rik)
7.2.31.01 (Ashtaka. Adhyaya. Varga. Rik)
09.04.058 (Mandala. Anuvāka. Rik)
Samhita Devanagari Accented
शिशु॒र्न जा॒तोऽव॑ चक्रद॒द्वने॒ स्व१॒॑र्यद्वा॒ज्य॑रु॒षः सिषा॑सति ।
दि॒वो रेत॑सा सचते पयो॒वृधा॒ तमी॑महे सुम॒ती शर्म॑ स॒प्रथः॑ ॥
Samhita Devanagari Nonaccented
शिशुर्न जातोऽव चक्रदद्वने स्वर्यद्वाज्यरुषः सिषासति ।
दिवो रेतसा सचते पयोवृधा तमीमहे सुमती शर्म सप्रथः ॥
Samhita Transcription Accented
śíśurná jātó’va cakradadváne sváryádvājyáruṣáḥ síṣāsati ǀ
divó rétasā sacate payovṛ́dhā támīmahe sumatī́ śárma sapráthaḥ ǁ
Samhita Transcription Nonaccented
śiśurna jāto’va cakradadvane svaryadvājyaruṣaḥ siṣāsati ǀ
divo retasā sacate payovṛdhā tamīmahe sumatī śarma saprathaḥ ǁ
Padapatha Devanagari Accented
शिशुः॑ । न । जा॒तः । अव॑ । च॒क्र॒द॒त् । वने॑ । स्वः॑ । यत् । वा॒जी । अ॒रु॒षः । सिसा॑सति ।
दि॒वः । रेत॑सा । स॒च॒ते॒ । प॒यः॒ऽवृधा॑ । तम् । ई॒म॒हे॒ । सु॒ऽम॒ती । शर्म॑ । स॒ऽप्रथः॑ ॥
Padapatha Devanagari Nonaccented
शिशुः । न । जातः । अव । चक्रदत् । वने । स्वः । यत् । वाजी । अरुषः । सिसासति ।
दिवः । रेतसा । सचते । पयःऽवृधा । तम् । ईमहे । सुऽमती । शर्म । सऽप्रथः ॥
Padapatha Transcription Accented
śíśuḥ ǀ ná ǀ jātáḥ ǀ áva ǀ cakradat ǀ váne ǀ sváḥ ǀ yát ǀ vājī́ ǀ aruṣáḥ ǀ sísāsati ǀ
diváḥ ǀ rétasā ǀ sacate ǀ payaḥ-vṛ́dhā ǀ tám ǀ īmahe ǀ su-matī́ ǀ śárma ǀ sa-práthaḥ ǁ
Padapatha Transcription Nonaccented
śiśuḥ ǀ na ǀ jātaḥ ǀ ava ǀ cakradat ǀ vane ǀ svaḥ ǀ yat ǀ vājī ǀ aruṣaḥ ǀ sisāsati ǀ
divaḥ ǀ retasā ǀ sacate ǀ payaḥ-vṛdhā ǀ tam ǀ īmahe ǀ su-matī ǀ śarma ǀ sa-prathaḥ ǁ
09.074.02 (Mandala. Sukta. Rik)
7.2.31.02 (Ashtaka. Adhyaya. Varga. Rik)
09.04.059 (Mandala. Anuvāka. Rik)
Samhita Devanagari Accented
दि॒वो यः स्कं॒भो ध॒रुणः॒ स्वा॑तत॒ आपू॑र्णो अं॒शुः प॒र्येति॑ वि॒श्वतः॑ ।
सेमे म॒ही रोद॑सी यक्षदा॒वृता॑ समीची॒ने दा॑धार॒ समिषः॑ क॒विः ॥
Samhita Devanagari Nonaccented
दिवो यः स्कंभो धरुणः स्वातत आपूर्णो अंशुः पर्येति विश्वतः ।
सेमे मही रोदसी यक्षदावृता समीचीने दाधार समिषः कविः ॥
Samhita Transcription Accented
divó yáḥ skambhó dharúṇaḥ svā́tata ā́pūrṇo aṃśúḥ paryéti viśvátaḥ ǀ
sémé mahī́ ródasī yakṣadāvṛ́tā samīcīné dādhāra sámíṣaḥ kavíḥ ǁ
Samhita Transcription Nonaccented
divo yaḥ skambho dharuṇaḥ svātata āpūrṇo aṃśuḥ paryeti viśvataḥ ǀ
seme mahī rodasī yakṣadāvṛtā samīcīne dādhāra samiṣaḥ kaviḥ ǁ
Padapatha Devanagari Accented
दि॒वः । यः । स्क॒म्भः । ध॒रुणः॑ । सुऽआ॑ततः । आऽपू॑र्णः । अं॒शुः । प॒रि॒ऽएति॑ । वि॒श्वतः॑ ।
सः । इ॒मे इति॑ । म॒ही इति॑ । रोद॑सी॒ इति॑ । य॒क्ष॒त् । आ॒ऽवृता॑ । स॒मी॒ची॒ने इति॑ स॒म्ऽई॒ची॒ने । दा॒धा॒र॒ । सम् । इषः॑ । क॒विः ॥
Padapatha Devanagari Nonaccented
दिवः । यः । स्कम्भः । धरुणः । सुऽआततः । आऽपूर्णः । अंशुः । परिऽएति । विश्वतः ।
सः । इमे इति । मही इति । रोदसी इति । यक्षत् । आऽवृता । समीचीने इति सम्ऽईचीने । दाधार । सम् । इषः । कविः ॥
Padapatha Transcription Accented
diváḥ ǀ yáḥ ǀ skambháḥ ǀ dharúṇaḥ ǀ sú-ātataḥ ǀ ā́-pūrṇaḥ ǀ aṃśúḥ ǀ pari-éti ǀ viśvátaḥ ǀ
sáḥ ǀ imé íti ǀ mahī́ íti ǀ ródasī íti ǀ yakṣat ǀ ā-vṛ́tā ǀ samīcīné íti sam-īcīné ǀ dādhāra ǀ sám ǀ íṣaḥ ǀ kavíḥ ǁ
Padapatha Transcription Nonaccented
divaḥ ǀ yaḥ ǀ skambhaḥ ǀ dharuṇaḥ ǀ su-ātataḥ ǀ ā-pūrṇaḥ ǀ aṃśuḥ ǀ pari-eti ǀ viśvataḥ ǀ
saḥ ǀ ime iti ǀ mahī iti ǀ rodasī iti ǀ yakṣat ǀ ā-vṛtā ǀ samīcīne iti sam-īcīne ǀ dādhāra ǀ sam ǀ iṣaḥ ǀ kaviḥ ǁ
09.074.03 (Mandala. Sukta. Rik)
7.2.31.03 (Ashtaka. Adhyaya. Varga. Rik)
09.04.060 (Mandala. Anuvāka. Rik)
Samhita Devanagari Accented
महि॒ प्सरः॒ सुकृ॑तं सो॒म्यं मधू॒र्वी गव्यू॑ति॒रदि॑तेर्ऋ॒तं य॒ते ।
ईशे॒ यो वृ॒ष्टेरि॒त उ॒स्रियो॒ वृषा॒पां ने॒ता य इ॒तऊ॑तिर्ऋ॒ग्मियः॑ ॥
Samhita Devanagari Nonaccented
महि प्सरः सुकृतं सोम्यं मधूर्वी गव्यूतिरदितेर्ऋतं यते ।
ईशे यो वृष्टेरित उस्रियो वृषापां नेता य इतऊतिर्ऋग्मियः ॥
Samhita Transcription Accented
máhi psáraḥ súkṛtam somyám mádhūrvī́ gávyūtiráditerṛtám yaté ǀ
ī́śe yó vṛṣṭéritá usríyo vṛ́ṣāpā́m netā́ yá itáūtirṛgmíyaḥ ǁ
Samhita Transcription Nonaccented
mahi psaraḥ sukṛtam somyam madhūrvī gavyūtiraditerṛtam yate ǀ
īśe yo vṛṣṭerita usriyo vṛṣāpām netā ya itaūtirṛgmiyaḥ ǁ
Padapatha Devanagari Accented
महि॑ । प्सरः॑ । सुऽकृ॑तम् । सो॒म्यम् । मधु॑ । उ॒र्वी । गव्यू॑तिः । अदि॑तेः । ऋ॒तम् । य॒ते ।
ईशे॑ । यः । वृ॒ष्टेः । इ॒तः । उ॒स्रियः॑ । वृषा॑ । अ॒पाम् । ने॒ता । यः । इ॒तःऽऊ॑तिः । ऋ॒ग्मियः॑ ॥
Padapatha Devanagari Nonaccented
महि । प्सरः । सुऽकृतम् । सोम्यम् । मधु । उर्वी । गव्यूतिः । अदितेः । ऋतम् । यते ।
ईशे । यः । वृष्टेः । इतः । उस्रियः । वृषा । अपाम् । नेता । यः । इतःऽऊतिः । ऋग्मियः ॥
Padapatha Transcription Accented
máhi ǀ psáraḥ ǀ sú-kṛtam ǀ somyám ǀ mádhu ǀ urvī́ ǀ gávyūtiḥ ǀ áditeḥ ǀ ṛtám ǀ yaté ǀ
ī́śe ǀ yáḥ ǀ vṛṣṭéḥ ǀ itáḥ ǀ usríyaḥ ǀ vṛ́ṣā ǀ apā́m ǀ netā́ ǀ yáḥ ǀ itáḥ-ūtiḥ ǀ ṛgmíyaḥ ǁ
Padapatha Transcription Nonaccented
mahi ǀ psaraḥ ǀ su-kṛtam ǀ somyam ǀ madhu ǀ urvī ǀ gavyūtiḥ ǀ aditeḥ ǀ ṛtam ǀ yate ǀ
īśe ǀ yaḥ ǀ vṛṣṭeḥ ǀ itaḥ ǀ usriyaḥ ǀ vṛṣā ǀ apām ǀ netā ǀ yaḥ ǀ itaḥ-ūtiḥ ǀ ṛgmiyaḥ ǁ
09.074.04 (Mandala. Sukta. Rik)
7.2.31.04 (Ashtaka. Adhyaya. Varga. Rik)
09.04.061 (Mandala. Anuvāka. Rik)
Samhita Devanagari Accented
आ॒त्म॒न्वन्नभो॑ दुह्यते घृ॒तं पय॑ ऋ॒तस्य॒ नाभि॑र॒मृतं॒ वि जा॑यते ।
स॒मी॒ची॒नाः सु॒दान॑वः प्रीणंति॒ तं नरो॑ हि॒तमव॑ मेहंति॒ पेर॑वः ॥
Samhita Devanagari Nonaccented
आत्मन्वन्नभो दुह्यते घृतं पय ऋतस्य नाभिरमृतं वि जायते ।
समीचीनाः सुदानवः प्रीणंति तं नरो हितमव मेहंति पेरवः ॥
Samhita Transcription Accented
ātmanvánnábho duhyate ghṛtám páya ṛtásya nā́bhiramṛ́tam ví jāyate ǀ
samīcīnā́ḥ sudā́navaḥ prīṇanti tám náro hitámáva mehanti péravaḥ ǁ
Samhita Transcription Nonaccented
ātmanvannabho duhyate ghṛtam paya ṛtasya nābhiramṛtam vi jāyate ǀ
samīcīnāḥ sudānavaḥ prīṇanti tam naro hitamava mehanti peravaḥ ǁ
Padapatha Devanagari Accented
आ॒त्म॒न्ऽवत् । नभः॑ । दु॒ह्य॒ते॒ । घृ॒तम् । पयः॑ । ऋ॒तस्य॑ । नाभिः॑ । अ॒मृत॑म् । वि । जा॒य॒ते॒ ।
स॒म्ऽई॒ची॒नाः । सु॒ऽदान॑वः । प्री॒ण॒न्ति॒ । तम् । नरः॑ । हि॒तम् । अव॑ । मे॒ह॒न्ति॒ । पेर॑वः ॥
Padapatha Devanagari Nonaccented
आत्मन्ऽवत् । नभः । दुह्यते । घृतम् । पयः । ऋतस्य । नाभिः । अमृतम् । वि । जायते ।
सम्ऽईचीनाः । सुऽदानवः । प्रीणन्ति । तम् । नरः । हितम् । अव । मेहन्ति । पेरवः ॥
Padapatha Transcription Accented
ātman-vát ǀ nábhaḥ ǀ duhyate ǀ ghṛtám ǀ páyaḥ ǀ ṛtásya ǀ nā́bhiḥ ǀ amṛ́tam ǀ ví ǀ jāyate ǀ
sam-īcīnā́ḥ ǀ su-dā́navaḥ ǀ prīṇanti ǀ tám ǀ náraḥ ǀ hitám ǀ áva ǀ mehanti ǀ péravaḥ ǁ
Padapatha Transcription Nonaccented
ātman-vat ǀ nabhaḥ ǀ duhyate ǀ ghṛtam ǀ payaḥ ǀ ṛtasya ǀ nābhiḥ ǀ amṛtam ǀ vi ǀ jāyate ǀ
sam-īcīnāḥ ǀ su-dānavaḥ ǀ prīṇanti ǀ tam ǀ naraḥ ǀ hitam ǀ ava ǀ mehanti ǀ peravaḥ ǁ
09.074.05 (Mandala. Sukta. Rik)
7.2.31.05 (Ashtaka. Adhyaya. Varga. Rik)
09.04.062 (Mandala. Anuvāka. Rik)
Samhita Devanagari Accented
अरा॑वीदं॒शुः सच॑मान ऊ॒र्मिणा॑ देवा॒व्यं१॒॑ मनु॑षे पिन्वति॒ त्वचं॑ ।
दधा॑ति॒ गर्भ॒मदि॑तेरु॒पस्थ॒ आ येन॑ तो॒कं च॒ तन॑यं च॒ धाम॑हे ॥
Samhita Devanagari Nonaccented
अरावीदंशुः सचमान ऊर्मिणा देवाव्यं मनुषे पिन्वति त्वचं ।
दधाति गर्भमदितेरुपस्थ आ येन तोकं च तनयं च धामहे ॥
Samhita Transcription Accented
árāvīdaṃśúḥ sácamāna ūrmíṇā devāvyám mánuṣe pinvati tvácam ǀ
dádhāti gárbhamáditerupástha ā́ yéna tokám ca tánayam ca dhā́mahe ǁ
Samhita Transcription Nonaccented
arāvīdaṃśuḥ sacamāna ūrmiṇā devāvyam manuṣe pinvati tvacam ǀ
dadhāti garbhamaditerupastha ā yena tokam ca tanayam ca dhāmahe ǁ
Padapatha Devanagari Accented
अरा॑वीत् । अं॒शुः । सच॑मानः । ऊ॒र्मिणा॑ । दे॒व॒ऽअ॒व्य॑म् । मनु॑षे । पि॒न्व॒ति॒ । त्वच॑म् ।
दधा॑ति । गर्भ॑म् । अदि॑तेः । उ॒पऽस्थे॑ । आ । येन॑ । तो॒कम् । च॒ । तन॑यम् । च॒ । धाम॑हे ॥
Padapatha Devanagari Nonaccented
अरावीत् । अंशुः । सचमानः । ऊर्मिणा । देवऽअव्यम् । मनुषे । पिन्वति । त्वचम् ।
दधाति । गर्भम् । अदितेः । उपऽस्थे । आ । येन । तोकम् । च । तनयम् । च । धामहे ॥
Padapatha Transcription Accented
árāvīt ǀ aṃśúḥ ǀ sácamānaḥ ǀ ūrmíṇā ǀ deva-avyám ǀ mánuṣe ǀ pinvati ǀ tvácam ǀ
dádhāti ǀ gárbham ǀ áditeḥ ǀ upá-sthe ǀ ā́ ǀ yéna ǀ tokám ǀ ca ǀ tánayam ǀ ca ǀ dhā́mahe ǁ
Padapatha Transcription Nonaccented
arāvīt ǀ aṃśuḥ ǀ sacamānaḥ ǀ ūrmiṇā ǀ deva-avyam ǀ manuṣe ǀ pinvati ǀ tvacam ǀ
dadhāti ǀ garbham ǀ aditeḥ ǀ upa-sthe ǀ ā ǀ yena ǀ tokam ǀ ca ǀ tanayam ǀ ca ǀ dhāmahe ǁ
09.074.06 (Mandala. Sukta. Rik)
7.2.32.01 (Ashtaka. Adhyaya. Varga. Rik)
09.04.063 (Mandala. Anuvāka. Rik)
Samhita Devanagari Accented
स॒हस्र॑धा॒रेऽव॒ ता अ॑स॒श्चत॑स्तृ॒तीये॑ संतु॒ रज॑सि प्र॒जाव॑तीः ।
चत॑स्रो॒ नाभो॒ निहि॑ता अ॒वो दि॒वो ह॒विर्भ॑रंत्य॒मृतं॑ घृत॒श्चुतः॑ ॥
Samhita Devanagari Nonaccented
सहस्रधारेऽव ता असश्चतस्तृतीये संतु रजसि प्रजावतीः ।
चतस्रो नाभो निहिता अवो दिवो हविर्भरंत्यमृतं घृतश्चुतः ॥
Samhita Transcription Accented
sahásradhāré’va tā́ asaścátastṛtī́ye santu rájasi prajā́vatīḥ ǀ
cátasro nā́bho níhitā avó divó havírbharantyamṛ́tam ghṛtaścútaḥ ǁ
Samhita Transcription Nonaccented
sahasradhāre’va tā asaścatastṛtīye santu rajasi prajāvatīḥ ǀ
catasro nābho nihitā avo divo havirbharantyamṛtam ghṛtaścutaḥ ǁ
Padapatha Devanagari Accented
स॒हस्र॑ऽधारे । अव॑ । ताः । अ॒स॒श्चतः॑ । तृ॒तीये॑ । स॒न्तु॒ । रज॑सि । प्र॒जाऽव॑तीः ।
चत॑स्रः । नाभः॑ । निऽहि॑ताः । अ॒वः । दि॒वः । ह॒विः । भ॒र॒न्ति॒ । अ॒मृत॑म् । घृ॒त॒ऽश्चुतः॑ ॥
Padapatha Devanagari Nonaccented
सहस्रऽधारे । अव । ताः । असश्चतः । तृतीये । सन्तु । रजसि । प्रजाऽवतीः ।
चतस्रः । नाभः । निऽहिताः । अवः । दिवः । हविः । भरन्ति । अमृतम् । घृतऽश्चुतः ॥
Padapatha Transcription Accented
sahásra-dhāre ǀ áva ǀ tā́ḥ ǀ asaścátaḥ ǀ tṛtī́ye ǀ santu ǀ rájasi ǀ prajā́-vatīḥ ǀ
cátasraḥ ǀ nā́bhaḥ ǀ ní-hitāḥ ǀ aváḥ ǀ diváḥ ǀ havíḥ ǀ bharanti ǀ amṛ́tam ǀ ghṛta-ścútaḥ ǁ
Padapatha Transcription Nonaccented
sahasra-dhāre ǀ ava ǀ tāḥ ǀ asaścataḥ ǀ tṛtīye ǀ santu ǀ rajasi ǀ prajā-vatīḥ ǀ
catasraḥ ǀ nābhaḥ ǀ ni-hitāḥ ǀ avaḥ ǀ divaḥ ǀ haviḥ ǀ bharanti ǀ amṛtam ǀ ghṛta-ścutaḥ ǁ
09.074.07 (Mandala. Sukta. Rik)
7.2.32.02 (Ashtaka. Adhyaya. Varga. Rik)
09.04.064 (Mandala. Anuvāka. Rik)
Samhita Devanagari Accented
श्वे॒तं रू॒पं कृ॑णुते॒ यत्सिषा॑सति॒ सोमो॑ मी॒ढ्वाँ असु॑रो वेद॒ भूम॑नः ।
धि॒या शमी॑ सचते॒ सेम॒भि प्र॒वद्दि॒वस्कवं॑ध॒मव॑ दर्षदु॒द्रिणं॑ ॥
Samhita Devanagari Nonaccented
श्वेतं रूपं कृणुते यत्सिषासति सोमो मीढ्वाँ असुरो वेद भूमनः ।
धिया शमी सचते सेमभि प्रवद्दिवस्कवंधमव दर्षदुद्रिणं ॥
Samhita Transcription Accented
śvetám rūpám kṛṇute yátsíṣāsati sómo mīḍhvā́m̐ ásuro veda bhū́manaḥ ǀ
dhiyā́ śámī sacate sémabhí praváddiváskávandhamáva darṣadudríṇam ǁ
Samhita Transcription Nonaccented
śvetam rūpam kṛṇute yatsiṣāsati somo mīḍhvām̐ asuro veda bhūmanaḥ ǀ
dhiyā śamī sacate semabhi pravaddivaskavandhamava darṣadudriṇam ǁ
Padapatha Devanagari Accented
श्वे॒तम् । रू॒पम् । कृ॒णु॒ते॒ । यत् । सिसा॑सति । सोमः॑ । मी॒ढ्वान् । असु॑रः । वे॒द॒ । भूम॑नः ।
धि॒या । शमी॑ । स॒च॒ते॒ । सः । ई॒म् । अ॒भि । प्र॒ऽवत् । दि॒वः । कव॑न्धम् । अव॑ । द॒र्ष॒त् । उ॒द्रिण॑म् ॥
Padapatha Devanagari Nonaccented
श्वेतम् । रूपम् । कृणुते । यत् । सिसासति । सोमः । मीढ्वान् । असुरः । वेद । भूमनः ।
धिया । शमी । सचते । सः । ईम् । अभि । प्रऽवत् । दिवः । कवन्धम् । अव । दर्षत् । उद्रिणम् ॥
Padapatha Transcription Accented
śvetám ǀ rūpám ǀ kṛṇute ǀ yát ǀ sísāsati ǀ sómaḥ ǀ mīḍhvā́n ǀ ásuraḥ ǀ veda ǀ bhū́manaḥ ǀ
dhiyā́ ǀ śámī ǀ sacate ǀ sáḥ ǀ īm ǀ abhí ǀ pra-vát ǀ diváḥ ǀ kávandham ǀ áva ǀ darṣat ǀ udríṇam ǁ
Padapatha Transcription Nonaccented
śvetam ǀ rūpam ǀ kṛṇute ǀ yat ǀ sisāsati ǀ somaḥ ǀ mīḍhvān ǀ asuraḥ ǀ veda ǀ bhūmanaḥ ǀ
dhiyā ǀ śamī ǀ sacate ǀ saḥ ǀ īm ǀ abhi ǀ pra-vat ǀ divaḥ ǀ kavandham ǀ ava ǀ darṣat ǀ udriṇam ǁ
09.074.08 (Mandala. Sukta. Rik)
7.2.32.03 (Ashtaka. Adhyaya. Varga. Rik)
09.04.065 (Mandala. Anuvāka. Rik)
Samhita Devanagari Accented
अध॑ श्वे॒तं क॒लशं॒ गोभि॑र॒क्तं कार्ष्म॒न्ना वा॒ज्य॑क्रमीत्सस॒वान् ।
आ हि॑न्विरे॒ मन॑सा देव॒यंतः॑ क॒क्षीव॑ते श॒तहि॑माय॒ गोनां॑ ॥
Samhita Devanagari Nonaccented
अध श्वेतं कलशं गोभिरक्तं कार्ष्मन्ना वाज्यक्रमीत्ससवान् ।
आ हिन्विरे मनसा देवयंतः कक्षीवते शतहिमाय गोनां ॥
Samhita Transcription Accented
ádha śvetám kaláśam góbhiraktám kā́rṣmannā́ vājyákramītsasavā́n ǀ
ā́ hinvire mánasā devayántaḥ kakṣī́vate śatáhimāya gónām ǁ
Samhita Transcription Nonaccented
adha śvetam kalaśam gobhiraktam kārṣmannā vājyakramītsasavān ǀ
ā hinvire manasā devayantaḥ kakṣīvate śatahimāya gonām ǁ
Padapatha Devanagari Accented
अध॑ । श्वे॒तम् । क॒लश॑म् । गोभिः॑ । अ॒क्तम् । कार्ष्म॑न् । आ । वा॒जी । अ॒क्र॒मी॒त् । स॒स॒ऽवान् ।
आ । हि॒न्वि॒रे॒ । मन॑सा । दे॒व॒ऽयन्तः॑ । क॒क्षीव॑ते । श॒तऽहि॑माय । गोना॑म् ॥
Padapatha Devanagari Nonaccented
अध । श्वेतम् । कलशम् । गोभिः । अक्तम् । कार्ष्मन् । आ । वाजी । अक्रमीत् । ससऽवान् ।
आ । हिन्विरे । मनसा । देवऽयन्तः । कक्षीवते । शतऽहिमाय । गोनाम् ॥
Padapatha Transcription Accented
ádha ǀ śvetám ǀ kaláśam ǀ góbhiḥ ǀ aktám ǀ kā́rṣman ǀ ā́ ǀ vājī́ ǀ akramīt ǀ sasa-vā́n ǀ
ā́ ǀ hinvire ǀ mánasā ǀ deva-yántaḥ ǀ kakṣī́vate ǀ śatá-himāya ǀ gónām ǁ
Padapatha Transcription Nonaccented
adha ǀ śvetam ǀ kalaśam ǀ gobhiḥ ǀ aktam ǀ kārṣman ǀ ā ǀ vājī ǀ akramīt ǀ sasa-vān ǀ
ā ǀ hinvire ǀ manasā ǀ deva-yantaḥ ǀ kakṣīvate ǀ śata-himāya ǀ gonām ǁ
09.074.09 (Mandala. Sukta. Rik)
7.2.32.04 (Ashtaka. Adhyaya. Varga. Rik)
09.04.066 (Mandala. Anuvāka. Rik)
Samhita Devanagari Accented
अ॒द्भिः सो॑म पपृचा॒नस्य॑ ते॒ रसोऽव्यो॒ वारं॒ वि प॑वमान धावति ।
स मृ॒ज्यमा॑नः क॒विभि॑र्मदिंतम॒ स्वद॒स्वेंद्रा॑य पवमान पी॒तये॑ ॥
Samhita Devanagari Nonaccented
अद्भिः सोम पपृचानस्य ते रसोऽव्यो वारं वि पवमान धावति ।
स मृज्यमानः कविभिर्मदिंतम स्वदस्वेंद्राय पवमान पीतये ॥
Samhita Transcription Accented
adbhíḥ soma papṛcānásya te rásó’vyo vā́ram ví pavamāna dhāvati ǀ
sá mṛjyámānaḥ kavíbhirmadintama svádasvéndrāya pavamāna pītáye ǁ
Samhita Transcription Nonaccented
adbhiḥ soma papṛcānasya te raso’vyo vāram vi pavamāna dhāvati ǀ
sa mṛjyamānaḥ kavibhirmadintama svadasvendrāya pavamāna pītaye ǁ
Padapatha Devanagari Accented
अ॒त्ऽभिः । सो॒म॒ । प॒पृ॒चा॒नस्य॑ । ते॒ । रसः॑ । अव्यः॑ । वार॑म् । वि । प॒व॒मा॒न॒ । धा॒व॒ति॒ ।
सः । मृ॒ज्यमा॑नः । क॒विऽभिः॑ । म॒दि॒न्ऽत॒म॒ । स्वद॑स्व । इन्द्रा॑य । प॒व॒मा॒न॒ । पी॒तये॑ ॥
Padapatha Devanagari Nonaccented
अत्ऽभिः । सोम । पपृचानस्य । ते । रसः । अव्यः । वारम् । वि । पवमान । धावति ।
सः । मृज्यमानः । कविऽभिः । मदिन्ऽतम । स्वदस्व । इन्द्राय । पवमान । पीतये ॥
Padapatha Transcription Accented
at-bhíḥ ǀ soma ǀ papṛcānásya ǀ te ǀ rásaḥ ǀ ávyaḥ ǀ vā́ram ǀ ví ǀ pavamāna ǀ dhāvati ǀ
sáḥ ǀ mṛjyámānaḥ ǀ kaví-bhiḥ ǀ madin-tama ǀ svádasva ǀ índrāya ǀ pavamāna ǀ pītáye ǁ
Padapatha Transcription Nonaccented
at-bhiḥ ǀ soma ǀ papṛcānasya ǀ te ǀ rasaḥ ǀ avyaḥ ǀ vāram ǀ vi ǀ pavamāna ǀ dhāvati ǀ
saḥ ǀ mṛjyamānaḥ ǀ kavi-bhiḥ ǀ madin-tama ǀ svadasva ǀ indrāya ǀ pavamāna ǀ pītaye ǁ