|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 88
|
1. Info |
| To: | soma pavamāna | |
| From: | uśanas kāvya | |
| Metres: | 1st set of styles: virāṭtrisṭup (2, 4, 8); nicṛttriṣṭup (3, 6, 7); sataḥpaṅkti (1); triṣṭup (5) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.088.01 (Mandala. Sukta. Rik)
7.3.24.01 (Ashtaka. Adhyaya. Varga. Rik)
09.05.058 (Mandala. Anuvāka. Rik)
Samhita Devanagari Accented
अ॒यं सोम॑ इंद्र॒ तुभ्यं॑ सुन्वे॒ तुभ्यं॑ पवते॒ त्वम॑स्य पाहि ।
त्वं ह॒ यं च॑कृ॒षे त्वं व॑वृ॒ष इंदुं॒ मदा॑य॒ युज्या॑य॒ सोमं॑ ॥
Samhita Devanagari Nonaccented
अयं सोम इंद्र तुभ्यं सुन्वे तुभ्यं पवते त्वमस्य पाहि ।
त्वं ह यं चकृषे त्वं ववृष इंदुं मदाय युज्याय सोमं ॥
Samhita Transcription Accented
ayám sóma indra túbhyam sunve túbhyam pavate tvámasya pāhi ǀ
tvám ha yám cakṛṣé tvám vavṛṣá índum mádāya yújyāya sómam ǁ
Samhita Transcription Nonaccented
ayam soma indra tubhyam sunve tubhyam pavate tvamasya pāhi ǀ
tvam ha yam cakṛṣe tvam vavṛṣa indum madāya yujyāya somam ǁ
Padapatha Devanagari Accented
अ॒यम् । सोमः॑ । इ॒न्द्र॒ । तुभ्य॑म् । सु॒न्वे॒ । तुभ्य॑म् । प॒व॒ते॒ । त्वम् । अ॒स्य॒ । पा॒हि॒ ।
त्वम् । ह॒ । यम् । च॒कृ॒षे । त्वम् । व॒वृ॒षे । इन्दु॑म् । मदा॑य । युज्या॑य । सोम॑म् ॥
Padapatha Devanagari Nonaccented
अयम् । सोमः । इन्द्र । तुभ्यम् । सुन्वे । तुभ्यम् । पवते । त्वम् । अस्य । पाहि ।
त्वम् । ह । यम् । चकृषे । त्वम् । ववृषे । इन्दुम् । मदाय । युज्याय । सोमम् ॥
Padapatha Transcription Accented
ayám ǀ sómaḥ ǀ indra ǀ túbhyam ǀ sunve ǀ túbhyam ǀ pavate ǀ tvám ǀ asya ǀ pāhi ǀ
tvám ǀ ha ǀ yám ǀ cakṛṣé ǀ tvám ǀ vavṛṣé ǀ índum ǀ mádāya ǀ yújyāya ǀ sómam ǁ
Padapatha Transcription Nonaccented
ayam ǀ somaḥ ǀ indra ǀ tubhyam ǀ sunve ǀ tubhyam ǀ pavate ǀ tvam ǀ asya ǀ pāhi ǀ
tvam ǀ ha ǀ yam ǀ cakṛṣe ǀ tvam ǀ vavṛṣe ǀ indum ǀ madāya ǀ yujyāya ǀ somam ǁ
09.088.02 (Mandala. Sukta. Rik)
7.3.24.02 (Ashtaka. Adhyaya. Varga. Rik)
09.05.059 (Mandala. Anuvāka. Rik)
Samhita Devanagari Accented
स ईं॒ रथो॒ न भु॑रि॒षाळ॑योजि म॒हः पु॒रूणि॑ सा॒तये॒ वसू॑नि ।
आदीं॒ विश्वा॑ नहु॒ष्या॑णि जा॒ता स्व॑र्षाता॒ वन॑ ऊ॒र्ध्वा न॑वंत ॥
Samhita Devanagari Nonaccented
स ईं रथो न भुरिषाळयोजि महः पुरूणि सातये वसूनि ।
आदीं विश्वा नहुष्याणि जाता स्वर्षाता वन ऊर्ध्वा नवंत ॥
Samhita Transcription Accented
sá īm rátho ná bhuriṣā́ḷayoji maháḥ purū́ṇi sātáye vásūni ǀ
ā́dīm víśvā nahuṣyā́ṇi jātā́ svárṣātā vána ūrdhvā́ navanta ǁ
Samhita Transcription Nonaccented
sa īm ratho na bhuriṣāḷayoji mahaḥ purūṇi sātaye vasūni ǀ
ādīm viśvā nahuṣyāṇi jātā svarṣātā vana ūrdhvā navanta ǁ
Padapatha Devanagari Accented
सः । ई॒मिति॑ । रथः॑ । न । भु॒रि॒षाट् । अ॒यो॒जि॒ । म॒हः । पु॒रूणि॑ । सा॒तये॑ । वसू॑नि ।
आत् । ई॒मिति॑ । विश्वा॑ । न॒हु॒ष्या॑णि । जा॒ता । स्वः॑ऽसाता । वने॑ । ऊ॒र्ध्वा । न॒व॒न्त॒ ॥
Padapatha Devanagari Nonaccented
सः । ईमिति । रथः । न । भुरिषाट् । अयोजि । महः । पुरूणि । सातये । वसूनि ।
आत् । ईमिति । विश्वा । नहुष्याणि । जाता । स्वःऽसाता । वने । ऊर्ध्वा । नवन्त ॥
Padapatha Transcription Accented
sáḥ ǀ īmíti ǀ ráthaḥ ǀ ná ǀ bhuriṣā́ṭ ǀ ayoji ǀ maháḥ ǀ purū́ṇi ǀ sātáye ǀ vásūni ǀ
ā́t ǀ īmíti ǀ víśvā ǀ nahuṣyā́ṇi ǀ jātā́ ǀ sváḥ-sātā ǀ váne ǀ ūrdhvā́ ǀ navanta ǁ
Padapatha Transcription Nonaccented
saḥ ǀ īmiti ǀ rathaḥ ǀ na ǀ bhuriṣāṭ ǀ ayoji ǀ mahaḥ ǀ purūṇi ǀ sātaye ǀ vasūni ǀ
āt ǀ īmiti ǀ viśvā ǀ nahuṣyāṇi ǀ jātā ǀ svaḥ-sātā ǀ vane ǀ ūrdhvā ǀ navanta ǁ
09.088.03 (Mandala. Sukta. Rik)
7.3.24.03 (Ashtaka. Adhyaya. Varga. Rik)
09.05.060 (Mandala. Anuvāka. Rik)
Samhita Devanagari Accented
वा॒युर्न यो नि॒युत्वाँ॑ इ॒ष्टया॑मा॒ नास॑त्येव॒ हव॒ आ शंभ॑विष्ठः ।
वि॒श्ववा॑रो द्रविणो॒दा इ॑व॒ त्मन्पू॒षेव॑ धी॒जव॑नोऽसि सोम ॥
Samhita Devanagari Nonaccented
वायुर्न यो नियुत्वाँ इष्टयामा नासत्येव हव आ शंभविष्ठः ।
विश्ववारो द्रविणोदा इव त्मन्पूषेव धीजवनोऽसि सोम ॥
Samhita Transcription Accented
vāyúrná yó niyútvām̐ iṣṭáyāmā nā́satyeva háva ā́ śámbhaviṣṭhaḥ ǀ
viśvávāro draviṇodā́ iva tmánpūṣéva dhījávano’si soma ǁ
Samhita Transcription Nonaccented
vāyurna yo niyutvām̐ iṣṭayāmā nāsatyeva hava ā śambhaviṣṭhaḥ ǀ
viśvavāro draviṇodā iva tmanpūṣeva dhījavano’si soma ǁ
Padapatha Devanagari Accented
वा॒युः । न । यः । नि॒युत्वा॑न् । इ॒ष्टऽया॑मा । नास॑त्याऽइव । हवे॑ । आ । शम्ऽभ॑विष्ठः ।
वि॒श्वऽवा॑रः । द्र॒वि॒णो॒दाःऽइ॑व । त्मन् । पू॒षाऽइ॑व । धी॒ऽजव॑नः । अ॒सि॒ । सो॒म॒ ॥
Padapatha Devanagari Nonaccented
वायुः । न । यः । नियुत्वान् । इष्टऽयामा । नासत्याऽइव । हवे । आ । शम्ऽभविष्ठः ।
विश्वऽवारः । द्रविणोदाःऽइव । त्मन् । पूषाऽइव । धीऽजवनः । असि । सोम ॥
Padapatha Transcription Accented
vāyúḥ ǀ ná ǀ yáḥ ǀ niyútvān ǀ iṣṭá-yāmā ǀ nā́satyā-iva ǀ háve ǀ ā́ ǀ śám-bhaviṣṭhaḥ ǀ
viśvá-vāraḥ ǀ draviṇodā́ḥ-iva ǀ tmán ǀ pūṣā́-iva ǀ dhī-jávanaḥ ǀ asi ǀ soma ǁ
Padapatha Transcription Nonaccented
vāyuḥ ǀ na ǀ yaḥ ǀ niyutvān ǀ iṣṭa-yāmā ǀ nāsatyā-iva ǀ have ǀ ā ǀ śam-bhaviṣṭhaḥ ǀ
viśva-vāraḥ ǀ draviṇodāḥ-iva ǀ tman ǀ pūṣā-iva ǀ dhī-javanaḥ ǀ asi ǀ soma ǁ
09.088.04 (Mandala. Sukta. Rik)
7.3.24.04 (Ashtaka. Adhyaya. Varga. Rik)
09.05.061 (Mandala. Anuvāka. Rik)
Samhita Devanagari Accented
इंद्रो॒ न यो म॒हा कर्मा॑णि॒ चक्रि॑र्हं॒ता वृ॒त्राणा॑मसि सोम पू॒र्भित् ।
पै॒द्वो न हि त्वमहि॑नाम्नां हं॒ता विश्व॑स्यासि सोम॒ दस्योः॑ ॥
Samhita Devanagari Nonaccented
इंद्रो न यो महा कर्माणि चक्रिर्हंता वृत्राणामसि सोम पूर्भित् ।
पैद्वो न हि त्वमहिनाम्नां हंता विश्वस्यासि सोम दस्योः ॥
Samhita Transcription Accented
índro ná yó mahā́ kármāṇi cákrirhantā́ vṛtrā́ṇāmasi soma pūrbhít ǀ
paidvó ná hí tvámáhināmnām hantā́ víśvasyāsi soma dásyoḥ ǁ
Samhita Transcription Nonaccented
indro na yo mahā karmāṇi cakrirhantā vṛtrāṇāmasi soma pūrbhit ǀ
paidvo na hi tvamahināmnām hantā viśvasyāsi soma dasyoḥ ǁ
Padapatha Devanagari Accented
इन्द्रः॑ । न । यः । म॒हा । कर्मा॑णि । चक्रिः॑ । ह॒न्ता । वृ॒त्राणा॑म् । अ॒सि॒ । सो॒म॒ । पूः॒ऽभित् ।
पै॒द्वः । न । हि । त्वम् । अहि॑ऽनाम्नाम् । ह॒न्ता । विश्व॑स्य । अ॒सि॒ । सो॒म॒ । दस्योः॑ ॥
Padapatha Devanagari Nonaccented
इन्द्रः । न । यः । महा । कर्माणि । चक्रिः । हन्ता । वृत्राणाम् । असि । सोम । पूःऽभित् ।
पैद्वः । न । हि । त्वम् । अहिऽनाम्नाम् । हन्ता । विश्वस्य । असि । सोम । दस्योः ॥
Padapatha Transcription Accented
índraḥ ǀ ná ǀ yáḥ ǀ mahā́ ǀ kármāṇi ǀ cákriḥ ǀ hantā́ ǀ vṛtrā́ṇām ǀ asi ǀ soma ǀ pūḥ-bhít ǀ
paidváḥ ǀ ná ǀ hí ǀ tvám ǀ áhi-nāmnām ǀ hantā́ ǀ víśvasya ǀ asi ǀ soma ǀ dásyoḥ ǁ
Padapatha Transcription Nonaccented
indraḥ ǀ na ǀ yaḥ ǀ mahā ǀ karmāṇi ǀ cakriḥ ǀ hantā ǀ vṛtrāṇām ǀ asi ǀ soma ǀ pūḥ-bhit ǀ
paidvaḥ ǀ na ǀ hi ǀ tvam ǀ ahi-nāmnām ǀ hantā ǀ viśvasya ǀ asi ǀ soma ǀ dasyoḥ ǁ
09.088.05 (Mandala. Sukta. Rik)
7.3.24.05 (Ashtaka. Adhyaya. Varga. Rik)
09.05.062 (Mandala. Anuvāka. Rik)
Samhita Devanagari Accented
अ॒ग्निर्न यो वन॒ आ सृ॒ज्यमा॑नो॒ वृथा॒ पाजां॑सि कृणुते न॒दीषु॑ ।
जनो॒ न युध्वा॑ मह॒त उ॑प॒ब्दिरिय॑र्ति॒ सोमः॒ पव॑मान ऊ॒र्मिं ॥
Samhita Devanagari Nonaccented
अग्निर्न यो वन आ सृज्यमानो वृथा पाजांसि कृणुते नदीषु ।
जनो न युध्वा महत उपब्दिरियर्ति सोमः पवमान ऊर्मिं ॥
Samhita Transcription Accented
agnírná yó vána ā́ sṛjyámāno vṛ́thā pā́jāṃsi kṛṇute nadī́ṣu ǀ
jáno ná yúdhvā mahatá upabdíríyarti sómaḥ pávamāna ūrmím ǁ
Samhita Transcription Nonaccented
agnirna yo vana ā sṛjyamāno vṛthā pājāṃsi kṛṇute nadīṣu ǀ
jano na yudhvā mahata upabdiriyarti somaḥ pavamāna ūrmim ǁ
Padapatha Devanagari Accented
अ॒ग्निः । न । यः । वने॑ । आ । सृ॒ज्यमा॑नः । वृथा॑ । पाजां॑सि । कृ॒णु॒ते॒ । न॒दीषु॑ ।
जनः॑ । न । युध्वा॑ । म॒ह॒तः । उ॒प॒ब्दिः । इय॑र्ति । सोमः॑ । पव॑मानः । ऊ॒र्मिम् ॥
Padapatha Devanagari Nonaccented
अग्निः । न । यः । वने । आ । सृज्यमानः । वृथा । पाजांसि । कृणुते । नदीषु ।
जनः । न । युध्वा । महतः । उपब्दिः । इयर्ति । सोमः । पवमानः । ऊर्मिम् ॥
Padapatha Transcription Accented
agníḥ ǀ ná ǀ yáḥ ǀ váne ǀ ā́ ǀ sṛjyámānaḥ ǀ vṛ́thā ǀ pā́jāṃsi ǀ kṛṇute ǀ nadī́ṣu ǀ
jánaḥ ǀ ná ǀ yúdhvā ǀ mahatáḥ ǀ upabdíḥ ǀ íyarti ǀ sómaḥ ǀ pávamānaḥ ǀ ūrmím ǁ
Padapatha Transcription Nonaccented
agniḥ ǀ na ǀ yaḥ ǀ vane ǀ ā ǀ sṛjyamānaḥ ǀ vṛthā ǀ pājāṃsi ǀ kṛṇute ǀ nadīṣu ǀ
janaḥ ǀ na ǀ yudhvā ǀ mahataḥ ǀ upabdiḥ ǀ iyarti ǀ somaḥ ǀ pavamānaḥ ǀ ūrmim ǁ
09.088.06 (Mandala. Sukta. Rik)
7.3.24.06 (Ashtaka. Adhyaya. Varga. Rik)
09.05.063 (Mandala. Anuvāka. Rik)
Samhita Devanagari Accented
ए॒ते सोमा॒ अति॒ वारा॒ण्यव्या॑ दि॒व्या न कोशा॑सो अ॒भ्रव॑र्षाः ।
वृथा॑ समु॒द्रं सिंध॑वो॒ न नीचीः॑ सु॒तासो॑ अ॒भि क॒लशाँ॑ असृग्रन् ॥
Samhita Devanagari Nonaccented
एते सोमा अति वाराण्यव्या दिव्या न कोशासो अभ्रवर्षाः ।
वृथा समुद्रं सिंधवो न नीचीः सुतासो अभि कलशाँ असृग्रन् ॥
Samhita Transcription Accented
eté sómā áti vā́rāṇyávyā divyā́ ná kóśāso abhrávarṣāḥ ǀ
vṛ́thā samudrám síndhavo ná nī́cīḥ sutā́so abhí kaláśām̐ asṛgran ǁ
Samhita Transcription Nonaccented
ete somā ati vārāṇyavyā divyā na kośāso abhravarṣāḥ ǀ
vṛthā samudram sindhavo na nīcīḥ sutāso abhi kalaśām̐ asṛgran ǁ
Padapatha Devanagari Accented
ए॒ते । सोमाः॑ । अति॑ । वारा॑णि । अव्या॑ । दि॒व्या । न । कोशा॑सः । अ॒भ्रऽव॑र्षाः ।
वृथा॑ । स॒मु॒द्रम् । सिन्ध॑वः । न । नीचीः॑ । सु॒तासः॑ । अ॒भि । क॒लशा॑न् । अ॒सृ॒ग्र॒न् ॥
Padapatha Devanagari Nonaccented
एते । सोमाः । अति । वाराणि । अव्या । दिव्या । न । कोशासः । अभ्रऽवर्षाः ।
वृथा । समुद्रम् । सिन्धवः । न । नीचीः । सुतासः । अभि । कलशान् । असृग्रन् ॥
Padapatha Transcription Accented
eté ǀ sómāḥ ǀ áti ǀ vā́rāṇi ǀ ávyā ǀ divyā́ ǀ ná ǀ kóśāsaḥ ǀ abhrá-varṣāḥ ǀ
vṛ́thā ǀ samudrám ǀ síndhavaḥ ǀ ná ǀ nī́cīḥ ǀ sutā́saḥ ǀ abhí ǀ kaláśān ǀ asṛgran ǁ
Padapatha Transcription Nonaccented
ete ǀ somāḥ ǀ ati ǀ vārāṇi ǀ avyā ǀ divyā ǀ na ǀ kośāsaḥ ǀ abhra-varṣāḥ ǀ
vṛthā ǀ samudram ǀ sindhavaḥ ǀ na ǀ nīcīḥ ǀ sutāsaḥ ǀ abhi ǀ kalaśān ǀ asṛgran ǁ
09.088.07 (Mandala. Sukta. Rik)
7.3.24.07 (Ashtaka. Adhyaya. Varga. Rik)
09.05.064 (Mandala. Anuvāka. Rik)
Samhita Devanagari Accented
शु॒ष्मी शर्धो॒ न मारु॑तं पव॒स्वान॑भिशस्ता दि॒व्या यथा॒ विट् ।
आपो॒ न म॒क्षू सु॑म॒तिर्भ॑वा नः स॒हस्रा॑प्साः पृतना॒षाण्न य॒ज्ञः ॥
Samhita Devanagari Nonaccented
शुष्मी शर्धो न मारुतं पवस्वानभिशस्ता दिव्या यथा विट् ।
आपो न मक्षू सुमतिर्भवा नः सहस्राप्साः पृतनाषाण्न यज्ञः ॥
Samhita Transcription Accented
śuṣmī́ śárdho ná mā́rutam pavasvā́nabhiśastā divyā́ yáthā víṭ ǀ
ā́po ná makṣū́ sumatírbhavā naḥ sahásrāpsāḥ pṛtanāṣā́ṇná yajñáḥ ǁ
Samhita Transcription Nonaccented
śuṣmī śardho na mārutam pavasvānabhiśastā divyā yathā viṭ ǀ
āpo na makṣū sumatirbhavā naḥ sahasrāpsāḥ pṛtanāṣāṇna yajñaḥ ǁ
Padapatha Devanagari Accented
शु॒ष्मी । शर्धः॑ । न । मारु॑तम् । प॒व॒स्व॒ । अन॑भिऽशस्ता । दि॒व्या । यथा॑ । विट् ।
आपः॑ । न । म॒क्षु । सु॒ऽम॒तिः । भ॒व॒ । नः॒ । स॒हस्र॑ऽअप्साः । पृ॒त॒ना॒षाट् । न । य॒ज्ञः ॥
Padapatha Devanagari Nonaccented
शुष्मी । शर्धः । न । मारुतम् । पवस्व । अनभिऽशस्ता । दिव्या । यथा । विट् ।
आपः । न । मक्षु । सुऽमतिः । भव । नः । सहस्रऽअप्साः । पृतनाषाट् । न । यज्ञः ॥
Padapatha Transcription Accented
śuṣmī́ ǀ śárdhaḥ ǀ ná ǀ mā́rutam ǀ pavasva ǀ ánabhi-śastā ǀ divyā́ ǀ yáthā ǀ víṭ ǀ
ā́paḥ ǀ ná ǀ makṣú ǀ su-matíḥ ǀ bhava ǀ naḥ ǀ sahásra-apsāḥ ǀ pṛtanāṣā́ṭ ǀ ná ǀ yajñáḥ ǁ
Padapatha Transcription Nonaccented
śuṣmī ǀ śardhaḥ ǀ na ǀ mārutam ǀ pavasva ǀ anabhi-śastā ǀ divyā ǀ yathā ǀ viṭ ǀ
āpaḥ ǀ na ǀ makṣu ǀ su-matiḥ ǀ bhava ǀ naḥ ǀ sahasra-apsāḥ ǀ pṛtanāṣāṭ ǀ na ǀ yajñaḥ ǁ
09.088.08 (Mandala. Sukta. Rik)
7.3.24.08 (Ashtaka. Adhyaya. Varga. Rik)
09.05.065 (Mandala. Anuvāka. Rik)
Samhita Devanagari Accented
राज्ञो॒ नु ते॒ वरु॑णस्य व्र॒तानि॑ बृ॒हद्ग॑भी॒रं तव॑ सोम॒ धाम॑ ।
शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम ॥
Samhita Devanagari Nonaccented
राज्ञो नु ते वरुणस्य व्रतानि बृहद्गभीरं तव सोम धाम ।
शुचिष्ट्वमसि प्रियो न मित्रो दक्षाय्यो अर्यमेवासि सोम ॥
Samhita Transcription Accented
rā́jño nú te váruṇasya vratā́ni bṛhádgabhīrám táva soma dhā́ma ǀ
śúciṣṭvámasi priyó ná mitró dakṣā́yyo aryamévāsi soma ǁ
Samhita Transcription Nonaccented
rājño nu te varuṇasya vratāni bṛhadgabhīram tava soma dhāma ǀ
śuciṣṭvamasi priyo na mitro dakṣāyyo aryamevāsi soma ǁ
Padapatha Devanagari Accented
राज्ञः॑ । नु । ते॒ । वरु॑णस्य । व्र॒तानि॑ । बृ॒हत् । ग॒भी॒रम् । तव॑ । सो॒म॒ । धाम॑ ।
शुचिः॑ । त्वम् । अ॒सि॒ । प्रि॒यः । न । मि॒त्रः । द॒क्षाय्यः॑ । अ॒र्य॒माऽइ॑व । अ॒सि॒ । सो॒म॒ ॥
Padapatha Devanagari Nonaccented
राज्ञः । नु । ते । वरुणस्य । व्रतानि । बृहत् । गभीरम् । तव । सोम । धाम ।
शुचिः । त्वम् । असि । प्रियः । न । मित्रः । दक्षाय्यः । अर्यमाऽइव । असि । सोम ॥
Padapatha Transcription Accented
rā́jñaḥ ǀ nú ǀ te ǀ váruṇasya ǀ vratā́ni ǀ bṛhát ǀ gabhīrám ǀ táva ǀ soma ǀ dhā́ma ǀ
śúciḥ ǀ tvám ǀ asi ǀ priyáḥ ǀ ná ǀ mitráḥ ǀ dakṣā́yyaḥ ǀ aryamā́-iva ǀ asi ǀ soma ǁ
Padapatha Transcription Nonaccented
rājñaḥ ǀ nu ǀ te ǀ varuṇasya ǀ vratāni ǀ bṛhat ǀ gabhīram ǀ tava ǀ soma ǀ dhāma ǀ
śuciḥ ǀ tvam ǀ asi ǀ priyaḥ ǀ na ǀ mitraḥ ǀ dakṣāyyaḥ ǀ aryamā-iva ǀ asi ǀ soma ǁ