|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 98
|
1. Info |
| To: | soma pavamāna | |
| From: | ambarīṣa vārṣāgira; ṛjiśvan bhāradvāja | |
| Metres: | 1st set of styles: anuṣṭup (1, 2, 4, 7, 10); nicṛdanuṣṭup (3, 5, 9); virāḍanuṣṭup (6, 12); aarchiswaraadnushtup (8); nicṛdbṛhatī (11) 2nd set of styles: anuṣṭubh (1-10, 12); bṛhatī (11) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.098.01 (Mandala. Sukta. Rik)
7.4.23.01 (Ashtaka. Adhyaya. Varga. Rik)
09.06.059 (Mandala. Anuvāka. Rik)
Samhita Devanagari Accented
अ॒भि नो॑ वाज॒सात॑मं र॒यिम॑र्ष पुरु॒स्पृहं॑ ।
इंदो॑ स॒हस्र॑भर्णसं तुविद्यु॒म्नं वि॑भ्वा॒सहं॑ ॥
Samhita Devanagari Nonaccented
अभि नो वाजसातमं रयिमर्ष पुरुस्पृहं ।
इंदो सहस्रभर्णसं तुविद्युम्नं विभ्वासहं ॥
Samhita Transcription Accented
abhí no vājasā́tamam rayímarṣa puruspṛ́ham ǀ
índo sahásrabharṇasam tuvidyumnám vibhvāsáham ǁ
Samhita Transcription Nonaccented
abhi no vājasātamam rayimarṣa puruspṛham ǀ
indo sahasrabharṇasam tuvidyumnam vibhvāsaham ǁ
Padapatha Devanagari Accented
अ॒भि । नः॒ । वा॒ज॒ऽसात॑मम् । र॒यिम् । अ॒र्ष॒ । पु॒रु॒ऽस्पृह॑म् ।
इन्दो॒ इति॑ । स॒हस्र॑ऽभर्णसम् । तु॒वि॒ऽद्यु॒म्नम् । वि॒भ्व॒ऽसह॑म् ॥
Padapatha Devanagari Nonaccented
अभि । नः । वाजऽसातमम् । रयिम् । अर्ष । पुरुऽस्पृहम् ।
इन्दो इति । सहस्रऽभर्णसम् । तुविऽद्युम्नम् । विभ्वऽसहम् ॥
Padapatha Transcription Accented
abhí ǀ naḥ ǀ vāja-sā́tamam ǀ rayím ǀ arṣa ǀ puru-spṛ́ham ǀ
índo íti ǀ sahásra-bharṇasam ǀ tuvi-dyumnám ǀ vibhva-sáham ǁ
Padapatha Transcription Nonaccented
abhi ǀ naḥ ǀ vāja-sātamam ǀ rayim ǀ arṣa ǀ puru-spṛham ǀ
indo iti ǀ sahasra-bharṇasam ǀ tuvi-dyumnam ǀ vibhva-saham ǁ
09.098.02 (Mandala. Sukta. Rik)
7.4.23.02 (Ashtaka. Adhyaya. Varga. Rik)
09.06.060 (Mandala. Anuvāka. Rik)
Samhita Devanagari Accented
परि॒ ष्य सु॑वा॒नो अ॒व्ययं॒ रथे॒ न वर्मा॑व्यत ।
इंदु॑र॒भि द्रुणा॑ हि॒तो हि॑या॒नो धारा॑भिरक्षाः ॥
Samhita Devanagari Nonaccented
परि ष्य सुवानो अव्ययं रथे न वर्माव्यत ।
इंदुरभि द्रुणा हितो हियानो धाराभिरक्षाः ॥
Samhita Transcription Accented
pári ṣyá suvānó avyáyam ráthe ná vármāvyata ǀ
índurabhí drúṇā hitó hiyānó dhā́rābhirakṣāḥ ǁ
Samhita Transcription Nonaccented
pari ṣya suvāno avyayam rathe na varmāvyata ǀ
indurabhi druṇā hito hiyāno dhārābhirakṣāḥ ǁ
Padapatha Devanagari Accented
परि॑ । स्यः । सु॒वा॒नः । अ॒व्यय॑म् । रथे॑ । न । वर्म॑ । अ॒व्य॒त॒ ।
इन्दुः॑ । अ॒भि । द्रुणा॑ । हि॒तः । हि॒या॒नः । धारा॑भिः । अ॒क्षा॒रिति॑ ॥
Padapatha Devanagari Nonaccented
परि । स्यः । सुवानः । अव्ययम् । रथे । न । वर्म । अव्यत ।
इन्दुः । अभि । द्रुणा । हितः । हियानः । धाराभिः । अक्षारिति ॥
Padapatha Transcription Accented
pári ǀ syáḥ ǀ suvānáḥ ǀ avyáyam ǀ ráthe ǀ ná ǀ várma ǀ avyata ǀ
índuḥ ǀ abhí ǀ drúṇā ǀ hitáḥ ǀ hiyānáḥ ǀ dhā́rābhiḥ ǀ akṣāríti ǁ
Padapatha Transcription Nonaccented
pari ǀ syaḥ ǀ suvānaḥ ǀ avyayam ǀ rathe ǀ na ǀ varma ǀ avyata ǀ
induḥ ǀ abhi ǀ druṇā ǀ hitaḥ ǀ hiyānaḥ ǀ dhārābhiḥ ǀ akṣāriti ǁ
09.098.03 (Mandala. Sukta. Rik)
7.4.23.03 (Ashtaka. Adhyaya. Varga. Rik)
09.06.061 (Mandala. Anuvāka. Rik)
Samhita Devanagari Accented
परि॒ ष्य सु॑वा॒नो अ॑क्षा॒ इंदु॒रव्ये॒ मद॑च्युतः ।
धारा॒ य ऊ॒र्ध्वो अ॑ध्व॒रे भ्रा॒जा नैति॑ गव्य॒युः ॥
Samhita Devanagari Nonaccented
परि ष्य सुवानो अक्षा इंदुरव्ये मदच्युतः ।
धारा य ऊर्ध्वो अध्वरे भ्राजा नैति गव्ययुः ॥
Samhita Transcription Accented
pári ṣyá suvānó akṣā índurávye mádacyutaḥ ǀ
dhā́rā yá ūrdhvó adhvaré bhrājā́ náiti gavyayúḥ ǁ
Samhita Transcription Nonaccented
pari ṣya suvāno akṣā induravye madacyutaḥ ǀ
dhārā ya ūrdhvo adhvare bhrājā naiti gavyayuḥ ǁ
Padapatha Devanagari Accented
परि॑ । स्यः । सु॒वा॒नः । अ॒क्षा॒रिति॑ । इन्दुः॑ । अव्ये॑ । मद॑ऽच्युतः ।
धारा॑ । यः । ऊ॒र्ध्वः । अ॒ध्व॒रे । भ्रा॒जा । न । एति॑ । ग॒व्य॒ऽयुः ॥
Padapatha Devanagari Nonaccented
परि । स्यः । सुवानः । अक्षारिति । इन्दुः । अव्ये । मदऽच्युतः ।
धारा । यः । ऊर्ध्वः । अध्वरे । भ्राजा । न । एति । गव्यऽयुः ॥
Padapatha Transcription Accented
pári ǀ syáḥ ǀ suvānáḥ ǀ akṣāríti ǀ índuḥ ǀ ávye ǀ máda-cyutaḥ ǀ
dhā́rā ǀ yáḥ ǀ ūrdhváḥ ǀ adhvaré ǀ bhrājā́ ǀ ná ǀ éti ǀ gavya-yúḥ ǁ
Padapatha Transcription Nonaccented
pari ǀ syaḥ ǀ suvānaḥ ǀ akṣāriti ǀ induḥ ǀ avye ǀ mada-cyutaḥ ǀ
dhārā ǀ yaḥ ǀ ūrdhvaḥ ǀ adhvare ǀ bhrājā ǀ na ǀ eti ǀ gavya-yuḥ ǁ
09.098.04 (Mandala. Sukta. Rik)
7.4.23.04 (Ashtaka. Adhyaya. Varga. Rik)
09.06.062 (Mandala. Anuvāka. Rik)
Samhita Devanagari Accented
स हि त्वं दे॑व॒ शश्व॑ते॒ वसु॒ मर्ता॑य दा॒शुषे॑ ।
इंदो॑ सह॒स्रिणं॑ र॒यिं श॒तात्मा॑नं विवाससि ॥
Samhita Devanagari Nonaccented
स हि त्वं देव शश्वते वसु मर्ताय दाशुषे ।
इंदो सहस्रिणं रयिं शतात्मानं विवाससि ॥
Samhita Transcription Accented
sá hí tvám deva śáśvate vásu mártāya dāśúṣe ǀ
índo sahasríṇam rayím śatā́tmānam vivāsasi ǁ
Samhita Transcription Nonaccented
sa hi tvam deva śaśvate vasu martāya dāśuṣe ǀ
indo sahasriṇam rayim śatātmānam vivāsasi ǁ
Padapatha Devanagari Accented
सः । हि । त्वम् । दे॒व॒ । शश्व॑ते । वसु॑ । मर्ता॑य । दा॒शुषे॑ ।
इन्दो॒ इति॑ । स॒ह॒स्रिण॑म् । र॒यिम् । श॒तऽआ॑त्मानम् । वि॒वा॒स॒सि॒ ॥
Padapatha Devanagari Nonaccented
सः । हि । त्वम् । देव । शश्वते । वसु । मर्ताय । दाशुषे ।
इन्दो इति । सहस्रिणम् । रयिम् । शतऽआत्मानम् । विवाससि ॥
Padapatha Transcription Accented
sáḥ ǀ hí ǀ tvám ǀ deva ǀ śáśvate ǀ vásu ǀ mártāya ǀ dāśúṣe ǀ
índo íti ǀ sahasríṇam ǀ rayím ǀ śatá-ātmānam ǀ vivāsasi ǁ
Padapatha Transcription Nonaccented
saḥ ǀ hi ǀ tvam ǀ deva ǀ śaśvate ǀ vasu ǀ martāya ǀ dāśuṣe ǀ
indo iti ǀ sahasriṇam ǀ rayim ǀ śata-ātmānam ǀ vivāsasi ǁ
09.098.05 (Mandala. Sukta. Rik)
7.4.23.05 (Ashtaka. Adhyaya. Varga. Rik)
09.06.063 (Mandala. Anuvāka. Rik)
Samhita Devanagari Accented
व॒यं ते॑ अ॒स्य वृ॑त्रह॒न्वसो॒ वस्वः॑ पुरु॒स्पृहः॑ ।
नि नेदि॑ष्ठतमा इ॒षः स्याम॑ सु॒म्नस्या॑ध्रिगो ॥
Samhita Devanagari Nonaccented
वयं ते अस्य वृत्रहन्वसो वस्वः पुरुस्पृहः ।
नि नेदिष्ठतमा इषः स्याम सुम्नस्याध्रिगो ॥
Samhita Transcription Accented
vayám te asyá vṛtrahanváso vásvaḥ puruspṛ́haḥ ǀ
ní nédiṣṭhatamā iṣáḥ syā́ma sumnásyādhrigo ǁ
Samhita Transcription Nonaccented
vayam te asya vṛtrahanvaso vasvaḥ puruspṛhaḥ ǀ
ni nediṣṭhatamā iṣaḥ syāma sumnasyādhrigo ǁ
Padapatha Devanagari Accented
व॒यम् । ते॒ । अ॒स्य । वृ॒त्र॒ऽह॒न् । वसो॒ इति॑ । वस्वः॑ । पु॒रु॒ऽस्पृहः॑ ।
नि । नेदि॑ष्ठऽतमाः । इ॒षः । स्याम॑ । सु॒म्नस्य॑ । अ॒ध्रि॒गो॒ इत्य॑ध्रिऽगो ॥
Padapatha Devanagari Nonaccented
वयम् । ते । अस्य । वृत्रऽहन् । वसो इति । वस्वः । पुरुऽस्पृहः ।
नि । नेदिष्ठऽतमाः । इषः । स्याम । सुम्नस्य । अध्रिगो इत्यध्रिऽगो ॥
Padapatha Transcription Accented
vayám ǀ te ǀ asyá ǀ vṛtra-han ǀ váso íti ǀ vásvaḥ ǀ puru-spṛ́haḥ ǀ
ní ǀ nédiṣṭha-tamāḥ ǀ iṣáḥ ǀ syā́ma ǀ sumnásya ǀ adhrigo ítyadhri-go ǁ
Padapatha Transcription Nonaccented
vayam ǀ te ǀ asya ǀ vṛtra-han ǀ vaso iti ǀ vasvaḥ ǀ puru-spṛhaḥ ǀ
ni ǀ nediṣṭha-tamāḥ ǀ iṣaḥ ǀ syāma ǀ sumnasya ǀ adhrigo ityadhri-go ǁ
09.098.06 (Mandala. Sukta. Rik)
7.4.23.06 (Ashtaka. Adhyaya. Varga. Rik)
09.06.064 (Mandala. Anuvāka. Rik)
Samhita Devanagari Accented
द्विर्यं पंच॒ स्वय॑शसं॒ स्वसा॑रो॒ अद्रि॑संहतं ।
प्रि॒यमिंद्र॑स्य॒ काम्यं॑ प्रस्ना॒पयं॑त्यू॒र्मिणं॑ ॥
Samhita Devanagari Nonaccented
द्विर्यं पंच स्वयशसं स्वसारो अद्रिसंहतं ।
प्रियमिंद्रस्य काम्यं प्रस्नापयंत्यूर्मिणं ॥
Samhita Transcription Accented
dvíryám páñca sváyaśasam svásāro ádrisaṃhatam ǀ
priyámíndrasya kā́myam prasnāpáyantyūrmíṇam ǁ
Samhita Transcription Nonaccented
dviryam pañca svayaśasam svasāro adrisaṃhatam ǀ
priyamindrasya kāmyam prasnāpayantyūrmiṇam ǁ
Padapatha Devanagari Accented
द्विः । यम् । पञ्च॑ । स्वऽय॑शसम् । स्वसा॑रः । अद्रि॑ऽसंहतम् ।
प्रि॒यम् । इन्द्र॑स्य । काम्य॑म् । प्र॒ऽस्ना॒पय॑न्ति । ऊ॒र्मिण॑म् ॥
Padapatha Devanagari Nonaccented
द्विः । यम् । पञ्च । स्वऽयशसम् । स्वसारः । अद्रिऽसंहतम् ।
प्रियम् । इन्द्रस्य । काम्यम् । प्रऽस्नापयन्ति । ऊर्मिणम् ॥
Padapatha Transcription Accented
dvíḥ ǀ yám ǀ páñca ǀ svá-yaśasam ǀ svásāraḥ ǀ ádri-saṃhatam ǀ
priyám ǀ índrasya ǀ kā́myam ǀ pra-snāpáyanti ǀ ūrmíṇam ǁ
Padapatha Transcription Nonaccented
dviḥ ǀ yam ǀ pañca ǀ sva-yaśasam ǀ svasāraḥ ǀ adri-saṃhatam ǀ
priyam ǀ indrasya ǀ kāmyam ǀ pra-snāpayanti ǀ ūrmiṇam ǁ
09.098.07 (Mandala. Sukta. Rik)
7.4.24.01 (Ashtaka. Adhyaya. Varga. Rik)
09.06.065 (Mandala. Anuvāka. Rik)
Samhita Devanagari Accented
परि॒ त्यं ह॑र्य॒तं हरिं॑ ब॒भ्रुं पु॑नंति॒ वारे॑ण ।
यो दे॒वान्विश्वाँ॒ इत्परि॒ मदे॑न स॒ह गच्छ॑ति ॥
Samhita Devanagari Nonaccented
परि त्यं हर्यतं हरिं बभ्रुं पुनंति वारेण ।
यो देवान्विश्वाँ इत्परि मदेन सह गच्छति ॥
Samhita Transcription Accented
pári tyám haryatám hárim babhrúm punanti vā́reṇa ǀ
yó devā́nvíśvām̐ ítpári mádena sahá gácchati ǁ
Samhita Transcription Nonaccented
pari tyam haryatam harim babhrum punanti vāreṇa ǀ
yo devānviśvām̐ itpari madena saha gacchati ǁ
Padapatha Devanagari Accented
परि॑ । त्यम् । ह॒र्य॒तम् । हरि॑म् । ब॒भ्रुम् । पु॒न॒न्ति॒ । वारे॑ण ।
यः । दे॒वान् । विश्वा॑न् । इत् । परि॑ । मदे॑न । स॒ह । गच्छ॑ति ॥
Padapatha Devanagari Nonaccented
परि । त्यम् । हर्यतम् । हरिम् । बभ्रुम् । पुनन्ति । वारेण ।
यः । देवान् । विश्वान् । इत् । परि । मदेन । सह । गच्छति ॥
Padapatha Transcription Accented
pári ǀ tyám ǀ haryatám ǀ hárim ǀ babhrúm ǀ punanti ǀ vā́reṇa ǀ
yáḥ ǀ devā́n ǀ víśvān ǀ ít ǀ pári ǀ mádena ǀ sahá ǀ gácchati ǁ
Padapatha Transcription Nonaccented
pari ǀ tyam ǀ haryatam ǀ harim ǀ babhrum ǀ punanti ǀ vāreṇa ǀ
yaḥ ǀ devān ǀ viśvān ǀ it ǀ pari ǀ madena ǀ saha ǀ gacchati ǁ
09.098.08 (Mandala. Sukta. Rik)
7.4.24.02 (Ashtaka. Adhyaya. Varga. Rik)
09.06.066 (Mandala. Anuvāka. Rik)
Samhita Devanagari Accented
अ॒स्य वो॒ ह्यव॑सा॒ पांतो॑ दक्ष॒साध॑नं ।
यः सू॒रिषु॒ श्रवो॑ बृ॒हद्द॒धे स्व१॒॑र्ण ह॑र्य॒तः ॥
Samhita Devanagari Nonaccented
अस्य वो ह्यवसा पांतो दक्षसाधनं ।
यः सूरिषु श्रवो बृहद्दधे स्वर्ण हर्यतः ॥
Samhita Transcription Accented
asyá vo hyávasā pā́nto dakṣasā́dhanam ǀ
yáḥ sūríṣu śrávo bṛháddadhé svárṇá haryatáḥ ǁ
Samhita Transcription Nonaccented
asya vo hyavasā pānto dakṣasādhanam ǀ
yaḥ sūriṣu śravo bṛhaddadhe svarṇa haryataḥ ǁ
Padapatha Devanagari Accented
अ॒स्य । वः॒ । हि । अव॑सा । पान्तः॑ । द॒क्ष॒ऽसाध॑नम् ।
यः । सू॒रिषु॑ । श्रवः॑ । बृ॒हत् । द॒धे । स्वः॑ । न । ह॒र्य॒तः ॥
Padapatha Devanagari Nonaccented
अस्य । वः । हि । अवसा । पान्तः । दक्षऽसाधनम् ।
यः । सूरिषु । श्रवः । बृहत् । दधे । स्वः । न । हर्यतः ॥
Padapatha Transcription Accented
asyá ǀ vaḥ ǀ hí ǀ ávasā ǀ pā́ntaḥ ǀ dakṣa-sā́dhanam ǀ
yáḥ ǀ sūríṣu ǀ śrávaḥ ǀ bṛhát ǀ dadhé ǀ sváḥ ǀ ná ǀ haryatáḥ ǁ
Padapatha Transcription Nonaccented
asya ǀ vaḥ ǀ hi ǀ avasā ǀ pāntaḥ ǀ dakṣa-sādhanam ǀ
yaḥ ǀ sūriṣu ǀ śravaḥ ǀ bṛhat ǀ dadhe ǀ svaḥ ǀ na ǀ haryataḥ ǁ
09.098.09 (Mandala. Sukta. Rik)
7.4.24.03 (Ashtaka. Adhyaya. Varga. Rik)
09.06.067 (Mandala. Anuvāka. Rik)
Samhita Devanagari Accented
स वां॑ य॒ज्ञेषु॑ मानवी॒ इंदु॑र्जनिष्ट रोदसी ।
दे॒वो दे॑वी गिरि॒ष्ठा अस्रे॑धं॒तं तु॑वि॒ष्वणि॑ ॥
Samhita Devanagari Nonaccented
स वां यज्ञेषु मानवी इंदुर्जनिष्ट रोदसी ।
देवो देवी गिरिष्ठा अस्रेधंतं तुविष्वणि ॥
Samhita Transcription Accented
sá vām yajñéṣu mānavī índurjaniṣṭa rodasī ǀ
devó devī giriṣṭhā́ ásredhantám tuviṣváṇi ǁ
Samhita Transcription Nonaccented
sa vām yajñeṣu mānavī indurjaniṣṭa rodasī ǀ
devo devī giriṣṭhā asredhantam tuviṣvaṇi ǁ
Padapatha Devanagari Accented
सः । वा॒म् । य॒ज्ञेषु॑ । मा॒न॒वी॒ इति॑ । इन्दुः॑ । ज॒नि॒ष्ट॒ । रो॒द॒सी॒ इति॑ ।
दे॒वः । दे॒वी॒ इति॑ । गि॒रि॒ऽस्थाः । अस्रे॑धन् । तम् । तु॒वि॒ऽस्वनि॑ ॥
Padapatha Devanagari Nonaccented
सः । वाम् । यज्ञेषु । मानवी इति । इन्दुः । जनिष्ट । रोदसी इति ।
देवः । देवी इति । गिरिऽस्थाः । अस्रेधन् । तम् । तुविऽस्वनि ॥
Padapatha Transcription Accented
sáḥ ǀ vām ǀ yajñéṣu ǀ mānavī íti ǀ índuḥ ǀ janiṣṭa ǀ rodasī íti ǀ
deváḥ ǀ devī íti ǀ giri-sthā́ḥ ǀ ásredhan ǀ tám ǀ tuvi-sváni ǁ
Padapatha Transcription Nonaccented
saḥ ǀ vām ǀ yajñeṣu ǀ mānavī iti ǀ induḥ ǀ janiṣṭa ǀ rodasī iti ǀ
devaḥ ǀ devī iti ǀ giri-sthāḥ ǀ asredhan ǀ tam ǀ tuvi-svani ǁ
09.098.10 (Mandala. Sukta. Rik)
7.4.24.04 (Ashtaka. Adhyaya. Varga. Rik)
09.06.068 (Mandala. Anuvāka. Rik)
Samhita Devanagari Accented
इंद्रा॑य सोम॒ पात॑वे वृत्र॒घ्ने परि॑ षिच्यसे ।
नरे॑ च॒ दक्षि॑णावते दे॒वाय॑ सदना॒सदे॑ ॥
Samhita Devanagari Nonaccented
इंद्राय सोम पातवे वृत्रघ्ने परि षिच्यसे ।
नरे च दक्षिणावते देवाय सदनासदे ॥
Samhita Transcription Accented
índrāya soma pā́tave vṛtraghné pári ṣicyase ǀ
náre ca dákṣiṇāvate devā́ya sadanāsáde ǁ
Samhita Transcription Nonaccented
indrāya soma pātave vṛtraghne pari ṣicyase ǀ
nare ca dakṣiṇāvate devāya sadanāsade ǁ
Padapatha Devanagari Accented
इन्द्रा॑य । सो॒म॒ । पात॑वे । वृ॒त्र॒ऽघ्ने । परि॑ । सि॒च्य॒से॒ ।
नरे॑ । च॒ । दक्षि॑णाऽवते । दे॒वाय॑ । स॒द॒न॒ऽसदे॑ ॥
Padapatha Devanagari Nonaccented
इन्द्राय । सोम । पातवे । वृत्रऽघ्ने । परि । सिच्यसे ।
नरे । च । दक्षिणाऽवते । देवाय । सदनऽसदे ॥
Padapatha Transcription Accented
índrāya ǀ soma ǀ pā́tave ǀ vṛtra-ghné ǀ pári ǀ sicyase ǀ
náre ǀ ca ǀ dákṣiṇā-vate ǀ devā́ya ǀ sadana-sáde ǁ
Padapatha Transcription Nonaccented
indrāya ǀ soma ǀ pātave ǀ vṛtra-ghne ǀ pari ǀ sicyase ǀ
nare ǀ ca ǀ dakṣiṇā-vate ǀ devāya ǀ sadana-sade ǁ
09.098.11 (Mandala. Sukta. Rik)
7.4.24.05 (Ashtaka. Adhyaya. Varga. Rik)
09.06.069 (Mandala. Anuvāka. Rik)
Samhita Devanagari Accented
ते प्र॒त्नासो॒ व्यु॑ष्टिषु॒ सोमाः॑ प॒वित्रे॑ अक्षरन् ।
अ॒प॒प्रोथं॑तः सनु॒तर्हु॑र॒श्चितः॑ प्रा॒तस्ताँ अप्र॑चेतसः ॥
Samhita Devanagari Nonaccented
ते प्रत्नासो व्युष्टिषु सोमाः पवित्रे अक्षरन् ।
अपप्रोथंतः सनुतर्हुरश्चितः प्रातस्ताँ अप्रचेतसः ॥
Samhita Transcription Accented
té pratnā́so vyúṣṭiṣu sómāḥ pavítre akṣaran ǀ
apapróthantaḥ sanutárhuraścítaḥ prātástā́m̐ ápracetasaḥ ǁ
Samhita Transcription Nonaccented
te pratnāso vyuṣṭiṣu somāḥ pavitre akṣaran ǀ
apaprothantaḥ sanutarhuraścitaḥ prātastām̐ apracetasaḥ ǁ
Padapatha Devanagari Accented
ते । प्र॒त्नासः॑ । विऽउ॑ष्टिषु । सोमाः॑ । प॒वित्रे॑ । अ॒क्ष॒र॒न् ।
अ॒प॒ऽप्रोथ॑न्तः । स॒नु॒तः । हु॒रः॒ऽचितः॑ । प्रा॒तरिति॑ । तान् । अप्र॑ऽचेतसः ॥
Padapatha Devanagari Nonaccented
ते । प्रत्नासः । विऽउष्टिषु । सोमाः । पवित्रे । अक्षरन् ।
अपऽप्रोथन्तः । सनुतः । हुरःऽचितः । प्रातरिति । तान् । अप्रऽचेतसः ॥
Padapatha Transcription Accented
té ǀ pratnā́saḥ ǀ ví-uṣṭiṣu ǀ sómāḥ ǀ pavítre ǀ akṣaran ǀ
apa-próthantaḥ ǀ sanutáḥ ǀ huraḥ-cítaḥ ǀ prātáríti ǀ tā́n ǀ ápra-cetasaḥ ǁ
Padapatha Transcription Nonaccented
te ǀ pratnāsaḥ ǀ vi-uṣṭiṣu ǀ somāḥ ǀ pavitre ǀ akṣaran ǀ
apa-prothantaḥ ǀ sanutaḥ ǀ huraḥ-citaḥ ǀ prātariti ǀ tān ǀ apra-cetasaḥ ǁ
09.098.12 (Mandala. Sukta. Rik)
7.4.24.06 (Ashtaka. Adhyaya. Varga. Rik)
09.06.070 (Mandala. Anuvāka. Rik)
Samhita Devanagari Accented
तं स॑खायः पुरो॒रुचं॑ यू॒यं व॒यं च॑ सू॒रयः॑ ।
अ॒श्याम॒ वाज॑गंध्यं स॒नेम॒ वाज॑पस्त्यं ॥
Samhita Devanagari Nonaccented
तं सखायः पुरोरुचं यूयं वयं च सूरयः ।
अश्याम वाजगंध्यं सनेम वाजपस्त्यं ॥
Samhita Transcription Accented
tám sakhāyaḥ purorúcam yūyám vayám ca sūráyaḥ ǀ
aśyā́ma vā́jagandhyam sanéma vā́japastyam ǁ
Samhita Transcription Nonaccented
tam sakhāyaḥ purorucam yūyam vayam ca sūrayaḥ ǀ
aśyāma vājagandhyam sanema vājapastyam ǁ
Padapatha Devanagari Accented
तम् । स॒खा॒यः॒ । पु॒रः॒ऽरुच॑म् । यू॒यम् । व॒यम् । च॒ । सू॒रयः॑ ।
अ॒श्याम॑ । वाज॑ऽगन्ध्यम् । स॒नेम॑ । वाज॑ऽपस्त्यम् ॥
Padapatha Devanagari Nonaccented
तम् । सखायः । पुरःऽरुचम् । यूयम् । वयम् । च । सूरयः ।
अश्याम । वाजऽगन्ध्यम् । सनेम । वाजऽपस्त्यम् ॥
Padapatha Transcription Accented
tám ǀ sakhāyaḥ ǀ puraḥ-rúcam ǀ yūyám ǀ vayám ǀ ca ǀ sūráyaḥ ǀ
aśyā́ma ǀ vā́ja-gandhyam ǀ sanéma ǀ vā́ja-pastyam ǁ
Padapatha Transcription Nonaccented
tam ǀ sakhāyaḥ ǀ puraḥ-rucam ǀ yūyam ǀ vayam ǀ ca ǀ sūrayaḥ ǀ
aśyāma ǀ vāja-gandhyam ǀ sanema ǀ vāja-pastyam ǁ