|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 106
|
1. Info |
| To: | soma pavamāna | |
| From: | 1-3, 10-14: agni cakṣuṣa; 4-6: cakṣus mānava; 7-9: manu āpsava |
|
| Metres: | 1st set of styles: nicṛduṣṇik (1, 3, 4, 8, 10, 14); uṣṇik (2, 5-7, 11, 12); virāḍuṣnik (9, 13) 2nd set of styles: uṣṇih |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.106.01 (Mandala. Sukta. Rik)
7.5.09.01 (Ashtaka. Adhyaya. Varga. Rik)
09.07.013 (Mandala. Anuvāka. Rik)
Samhita Devanagari Accented
इंद्र॒मच्छ॑ सु॒ता इ॒मे वृष॑णं यंतु॒ हर॑यः ।
श्रु॒ष्टी जा॒तास॒ इंद॑वः स्व॒र्विदः॑ ॥
Samhita Devanagari Nonaccented
इंद्रमच्छ सुता इमे वृषणं यंतु हरयः ।
श्रुष्टी जातास इंदवः स्वर्विदः ॥
Samhita Transcription Accented
índramáccha sutā́ imé vṛ́ṣaṇam yantu hárayaḥ ǀ
śruṣṭī́ jātā́sa índavaḥ svarvídaḥ ǁ
Samhita Transcription Nonaccented
indramaccha sutā ime vṛṣaṇam yantu harayaḥ ǀ
śruṣṭī jātāsa indavaḥ svarvidaḥ ǁ
Padapatha Devanagari Accented
इन्द्र॑म् । अच्छ॑ । सु॒ताः । इ॒मे । वृष॑णम् । य॒न्तु॒ । हर॑यः ।
श्रु॒ष्टी । जा॒तासः॑ । इन्द॑वः । स्वः॒ऽविदः॑ ॥
Padapatha Devanagari Nonaccented
इन्द्रम् । अच्छ । सुताः । इमे । वृषणम् । यन्तु । हरयः ।
श्रुष्टी । जातासः । इन्दवः । स्वःऽविदः ॥
Padapatha Transcription Accented
índram ǀ áccha ǀ sutā́ḥ ǀ imé ǀ vṛ́ṣaṇam ǀ yantu ǀ hárayaḥ ǀ
śruṣṭī́ ǀ jātā́saḥ ǀ índavaḥ ǀ svaḥ-vídaḥ ǁ
Padapatha Transcription Nonaccented
indram ǀ accha ǀ sutāḥ ǀ ime ǀ vṛṣaṇam ǀ yantu ǀ harayaḥ ǀ
śruṣṭī ǀ jātāsaḥ ǀ indavaḥ ǀ svaḥ-vidaḥ ǁ
09.106.02 (Mandala. Sukta. Rik)
7.5.09.02 (Ashtaka. Adhyaya. Varga. Rik)
09.07.014 (Mandala. Anuvāka. Rik)
Samhita Devanagari Accented
अ॒यं भरा॑य सान॒सिरिंद्रा॑य पवते सु॒तः ।
सोमो॒ जैत्र॑स्य चेतति॒ यथा॑ वि॒दे ॥
Samhita Devanagari Nonaccented
अयं भराय सानसिरिंद्राय पवते सुतः ।
सोमो जैत्रस्य चेतति यथा विदे ॥
Samhita Transcription Accented
ayám bhárāya sānasíríndrāya pavate sutáḥ ǀ
sómo jáitrasya cetati yáthā vidé ǁ
Samhita Transcription Nonaccented
ayam bharāya sānasirindrāya pavate sutaḥ ǀ
somo jaitrasya cetati yathā vide ǁ
Padapatha Devanagari Accented
अ॒यम् । भरा॑य । सा॒न॒सिः । इन्द्रा॑य । प॒व॒ते॒ । सु॒तः ।
सोमः॑ । जैत्र॑स्य । चे॒त॒ति॒ । यथा॑ । वि॒दे ॥
Padapatha Devanagari Nonaccented
अयम् । भराय । सानसिः । इन्द्राय । पवते । सुतः ।
सोमः । जैत्रस्य । चेतति । यथा । विदे ॥
Padapatha Transcription Accented
ayám ǀ bhárāya ǀ sānasíḥ ǀ índrāya ǀ pavate ǀ sutáḥ ǀ
sómaḥ ǀ jáitrasya ǀ cetati ǀ yáthā ǀ vidé ǁ
Padapatha Transcription Nonaccented
ayam ǀ bharāya ǀ sānasiḥ ǀ indrāya ǀ pavate ǀ sutaḥ ǀ
somaḥ ǀ jaitrasya ǀ cetati ǀ yathā ǀ vide ǁ
09.106.03 (Mandala. Sukta. Rik)
7.5.09.03 (Ashtaka. Adhyaya. Varga. Rik)
09.07.015 (Mandala. Anuvāka. Rik)
Samhita Devanagari Accented
अ॒स्येदिंद्रो॒ मदे॒ष्वा ग्रा॒भं गृ॑भ्णीत सान॒सिं ।
वज्रं॑ च॒ वृष॑णं भर॒त्सम॑प्सु॒जित् ॥
Samhita Devanagari Nonaccented
अस्येदिंद्रो मदेष्वा ग्राभं गृभ्णीत सानसिं ।
वज्रं च वृषणं भरत्समप्सुजित् ॥
Samhita Transcription Accented
asyédíndro mádeṣvā́ grābhám gṛbhṇīta sānasím ǀ
vájram ca vṛ́ṣaṇam bharatsámapsujít ǁ
Samhita Transcription Nonaccented
asyedindro madeṣvā grābham gṛbhṇīta sānasim ǀ
vajram ca vṛṣaṇam bharatsamapsujit ǁ
Padapatha Devanagari Accented
अ॒स्य । इत् । इन्द्रः॑ । मदे॑षु । आ । ग्रा॒भम् । गृ॒भ्णी॒त॒ । सा॒न॒सिम् ।
वज्र॑म् । च॒ । वृष॑णम् । भ॒र॒त् । सम् । अ॒प्सु॒ऽजित् ॥
Padapatha Devanagari Nonaccented
अस्य । इत् । इन्द्रः । मदेषु । आ । ग्राभम् । गृभ्णीत । सानसिम् ।
वज्रम् । च । वृषणम् । भरत् । सम् । अप्सुऽजित् ॥
Padapatha Transcription Accented
asyá ǀ ít ǀ índraḥ ǀ mádeṣu ǀ ā́ ǀ grābhám ǀ gṛbhṇīta ǀ sānasím ǀ
vájram ǀ ca ǀ vṛ́ṣaṇam ǀ bharat ǀ sám ǀ apsu-jít ǁ
Padapatha Transcription Nonaccented
asya ǀ it ǀ indraḥ ǀ madeṣu ǀ ā ǀ grābham ǀ gṛbhṇīta ǀ sānasim ǀ
vajram ǀ ca ǀ vṛṣaṇam ǀ bharat ǀ sam ǀ apsu-jit ǁ
09.106.04 (Mandala. Sukta. Rik)
7.5.09.04 (Ashtaka. Adhyaya. Varga. Rik)
09.07.016 (Mandala. Anuvāka. Rik)
Samhita Devanagari Accented
प्र ध॑न्वा सोम॒ जागृ॑वि॒रिंद्रा॑येंदो॒ परि॑ स्रव ।
द्यु॒मंतं॒ शुष्म॒मा भ॑रा स्व॒र्विदं॑ ॥
Samhita Devanagari Nonaccented
प्र धन्वा सोम जागृविरिंद्रायेंदो परि स्रव ।
द्युमंतं शुष्ममा भरा स्वर्विदं ॥
Samhita Transcription Accented
prá dhanvā soma jā́gṛviríndrāyendo pári srava ǀ
dyumántam śúṣmamā́ bharā svarvídam ǁ
Samhita Transcription Nonaccented
pra dhanvā soma jāgṛvirindrāyendo pari srava ǀ
dyumantam śuṣmamā bharā svarvidam ǁ
Padapatha Devanagari Accented
प्र । ध॒न्व॒ । सो॒म॒ । जागृ॑विः । इन्द्रा॑य । इ॒न्दो॒ इति॑ । परि॑ । स्र॒व॒ ।
द्यु॒ऽमन्त॑म् । शुष्म॑म् । आ । भ॒र॒ । स्वः॒ऽविद॑म् ॥
Padapatha Devanagari Nonaccented
प्र । धन्व । सोम । जागृविः । इन्द्राय । इन्दो इति । परि । स्रव ।
द्युऽमन्तम् । शुष्मम् । आ । भर । स्वःऽविदम् ॥
Padapatha Transcription Accented
prá ǀ dhanva ǀ soma ǀ jā́gṛviḥ ǀ índrāya ǀ indo íti ǀ pári ǀ srava ǀ
dyu-mántam ǀ śúṣmam ǀ ā́ ǀ bhara ǀ svaḥ-vídam ǁ
Padapatha Transcription Nonaccented
pra ǀ dhanva ǀ soma ǀ jāgṛviḥ ǀ indrāya ǀ indo iti ǀ pari ǀ srava ǀ
dyu-mantam ǀ śuṣmam ǀ ā ǀ bhara ǀ svaḥ-vidam ǁ
09.106.05 (Mandala. Sukta. Rik)
7.5.09.05 (Ashtaka. Adhyaya. Varga. Rik)
09.07.017 (Mandala. Anuvāka. Rik)
Samhita Devanagari Accented
इंद्रा॑य॒ वृष॑णं॒ मदं॒ पव॑स्व वि॒श्वद॑र्शतः ।
स॒हस्र॑यामा पथि॒कृद्वि॑चक्ष॒णः ॥
Samhita Devanagari Nonaccented
इंद्राय वृषणं मदं पवस्व विश्वदर्शतः ।
सहस्रयामा पथिकृद्विचक्षणः ॥
Samhita Transcription Accented
índrāya vṛ́ṣaṇam mádam pávasva viśvádarśataḥ ǀ
sahásrayāmā pathikṛ́dvicakṣaṇáḥ ǁ
Samhita Transcription Nonaccented
indrāya vṛṣaṇam madam pavasva viśvadarśataḥ ǀ
sahasrayāmā pathikṛdvicakṣaṇaḥ ǁ
Padapatha Devanagari Accented
इन्द्रा॑य । वृष॑णम् । मद॑म् । पव॑स्व । वि॒श्वऽद॑र्शतः ।
स॒हस्र॑ऽयामा । प॒थि॒ऽकृत् । वि॒ऽच॒क्ष॒णः ॥
Padapatha Devanagari Nonaccented
इन्द्राय । वृषणम् । मदम् । पवस्व । विश्वऽदर्शतः ।
सहस्रऽयामा । पथिऽकृत् । विऽचक्षणः ॥
Padapatha Transcription Accented
índrāya ǀ vṛ́ṣaṇam ǀ mádam ǀ pávasva ǀ viśvá-darśataḥ ǀ
sahásra-yāmā ǀ pathi-kṛ́t ǀ vi-cakṣaṇáḥ ǁ
Padapatha Transcription Nonaccented
indrāya ǀ vṛṣaṇam ǀ madam ǀ pavasva ǀ viśva-darśataḥ ǀ
sahasra-yāmā ǀ pathi-kṛt ǀ vi-cakṣaṇaḥ ǁ
09.106.06 (Mandala. Sukta. Rik)
7.5.10.01 (Ashtaka. Adhyaya. Varga. Rik)
09.07.018 (Mandala. Anuvāka. Rik)
Samhita Devanagari Accented
अ॒स्मभ्यं॑ गातु॒वित्त॑मो दे॒वेभ्यो॒ मधु॑मत्तमः ।
स॒हस्रं॑ याहि प॒थिभिः॒ कनि॑क्रदत् ॥
Samhita Devanagari Nonaccented
अस्मभ्यं गातुवित्तमो देवेभ्यो मधुमत्तमः ।
सहस्रं याहि पथिभिः कनिक्रदत् ॥
Samhita Transcription Accented
asmábhyam gātuvíttamo devébhyo mádhumattamaḥ ǀ
sahásram yāhi pathíbhiḥ kánikradat ǁ
Samhita Transcription Nonaccented
asmabhyam gātuvittamo devebhyo madhumattamaḥ ǀ
sahasram yāhi pathibhiḥ kanikradat ǁ
Padapatha Devanagari Accented
अ॒स्मभ्य॑म् । गा॒तु॒वित्ऽत॑मः । दे॒वेभ्यः॑ । मधु॑मत्ऽतमः ।
स॒हस्र॑म् । या॒हि॒ । प॒थिऽभिः॑ । कनि॑क्रदत् ॥
Padapatha Devanagari Nonaccented
अस्मभ्यम् । गातुवित्ऽतमः । देवेभ्यः । मधुमत्ऽतमः ।
सहस्रम् । याहि । पथिऽभिः । कनिक्रदत् ॥
Padapatha Transcription Accented
asmábhyam ǀ gātuvít-tamaḥ ǀ devébhyaḥ ǀ mádhumat-tamaḥ ǀ
sahásram ǀ yāhi ǀ pathí-bhiḥ ǀ kánikradat ǁ
Padapatha Transcription Nonaccented
asmabhyam ǀ gātuvit-tamaḥ ǀ devebhyaḥ ǀ madhumat-tamaḥ ǀ
sahasram ǀ yāhi ǀ pathi-bhiḥ ǀ kanikradat ǁ
09.106.07 (Mandala. Sukta. Rik)
7.5.10.02 (Ashtaka. Adhyaya. Varga. Rik)
09.07.019 (Mandala. Anuvāka. Rik)
Samhita Devanagari Accented
पव॑स्व दे॒ववी॑तय॒ इंदो॒ धारा॑भि॒रोज॑सा ।
आ क॒लशं॒ मधु॑मान्त्सोम नः सदः ॥
Samhita Devanagari Nonaccented
पवस्व देववीतय इंदो धाराभिरोजसा ।
आ कलशं मधुमान्त्सोम नः सदः ॥
Samhita Transcription Accented
pávasva devávītaya índo dhā́rābhirójasā ǀ
ā́ kaláśam mádhumāntsoma naḥ sadaḥ ǁ
Samhita Transcription Nonaccented
pavasva devavītaya indo dhārābhirojasā ǀ
ā kalaśam madhumāntsoma naḥ sadaḥ ǁ
Padapatha Devanagari Accented
पव॑स्व । दे॒वऽवी॑तये । इन्दो॒ इति॑ । धारा॑भिः । ओज॑सा ।
आ । क॒लश॑म् । मधु॑ऽमान् । सो॒म॒ । नः॒ । स॒दः॒ ॥
Padapatha Devanagari Nonaccented
पवस्व । देवऽवीतये । इन्दो इति । धाराभिः । ओजसा ।
आ । कलशम् । मधुऽमान् । सोम । नः । सदः ॥
Padapatha Transcription Accented
pávasva ǀ devá-vītaye ǀ índo íti ǀ dhā́rābhiḥ ǀ ójasā ǀ
ā́ ǀ kaláśam ǀ mádhu-mān ǀ soma ǀ naḥ ǀ sadaḥ ǁ
Padapatha Transcription Nonaccented
pavasva ǀ deva-vītaye ǀ indo iti ǀ dhārābhiḥ ǀ ojasā ǀ
ā ǀ kalaśam ǀ madhu-mān ǀ soma ǀ naḥ ǀ sadaḥ ǁ
09.106.08 (Mandala. Sukta. Rik)
7.5.10.03 (Ashtaka. Adhyaya. Varga. Rik)
09.07.020 (Mandala. Anuvāka. Rik)
Samhita Devanagari Accented
तव॑ द्र॒प्सा उ॑द॒प्रुत॒ इंद्रं॒ मदा॑य वावृधुः ।
त्वां दे॒वासो॑ अ॒मृता॑य॒ कं प॑पुः ॥
Samhita Devanagari Nonaccented
तव द्रप्सा उदप्रुत इंद्रं मदाय वावृधुः ।
त्वां देवासो अमृताय कं पपुः ॥
Samhita Transcription Accented
táva drapsā́ udaprúta índram mádāya vāvṛdhuḥ ǀ
tvā́m devā́so amṛ́tāya kám papuḥ ǁ
Samhita Transcription Nonaccented
tava drapsā udapruta indram madāya vāvṛdhuḥ ǀ
tvām devāso amṛtāya kam papuḥ ǁ
Padapatha Devanagari Accented
तव॑ । द्र॒प्साः । उ॒द॒ऽप्रुतः॑ । इन्द्र॑म् । मदा॑य । व॒वृ॒धुः॒ ।
त्वाम् । दे॒वासः॑ । अ॒मृता॑य । कम् । प॒पुः॒ ॥
Padapatha Devanagari Nonaccented
तव । द्रप्साः । उदऽप्रुतः । इन्द्रम् । मदाय । ववृधुः ।
त्वाम् । देवासः । अमृताय । कम् । पपुः ॥
Padapatha Transcription Accented
táva ǀ drapsā́ḥ ǀ uda-prútaḥ ǀ índram ǀ mádāya ǀ vavṛdhuḥ ǀ
tvā́m ǀ devā́saḥ ǀ amṛ́tāya ǀ kám ǀ papuḥ ǁ
Padapatha Transcription Nonaccented
tava ǀ drapsāḥ ǀ uda-prutaḥ ǀ indram ǀ madāya ǀ vavṛdhuḥ ǀ
tvām ǀ devāsaḥ ǀ amṛtāya ǀ kam ǀ papuḥ ǁ
09.106.09 (Mandala. Sukta. Rik)
7.5.10.04 (Ashtaka. Adhyaya. Varga. Rik)
09.07.021 (Mandala. Anuvāka. Rik)
Samhita Devanagari Accented
आ नः॑ सुतास इंदवः पुना॒ना धा॑वता र॒यिं ।
वृ॒ष्टिद्या॑वो रीत्यापः स्व॒र्विदः॑ ॥
Samhita Devanagari Nonaccented
आ नः सुतास इंदवः पुनाना धावता रयिं ।
वृष्टिद्यावो रीत्यापः स्वर्विदः ॥
Samhita Transcription Accented
ā́ naḥ sutāsa indavaḥ punānā́ dhāvatā rayím ǀ
vṛṣṭídyāvo rītyāpaḥ svarvídaḥ ǁ
Samhita Transcription Nonaccented
ā naḥ sutāsa indavaḥ punānā dhāvatā rayim ǀ
vṛṣṭidyāvo rītyāpaḥ svarvidaḥ ǁ
Padapatha Devanagari Accented
आ । नः॒ । सु॒ता॒सः॒ । इ॒न्द॒वः॒ । पु॒ना॒नाः । धा॒व॒त॒ । र॒यिम् ।
वृ॒ष्टिऽद्या॑वः । री॒ति॒ऽआ॒पः॒ । स्वः॒ऽविदः॑ ॥
Padapatha Devanagari Nonaccented
आ । नः । सुतासः । इन्दवः । पुनानाः । धावत । रयिम् ।
वृष्टिऽद्यावः । रीतिऽआपः । स्वःऽविदः ॥
Padapatha Transcription Accented
ā́ ǀ naḥ ǀ sutāsaḥ ǀ indavaḥ ǀ punānā́ḥ ǀ dhāvata ǀ rayím ǀ
vṛṣṭí-dyāvaḥ ǀ rīti-āpaḥ ǀ svaḥ-vídaḥ ǁ
Padapatha Transcription Nonaccented
ā ǀ naḥ ǀ sutāsaḥ ǀ indavaḥ ǀ punānāḥ ǀ dhāvata ǀ rayim ǀ
vṛṣṭi-dyāvaḥ ǀ rīti-āpaḥ ǀ svaḥ-vidaḥ ǁ
09.106.10 (Mandala. Sukta. Rik)
7.5.10.05 (Ashtaka. Adhyaya. Varga. Rik)
09.07.022 (Mandala. Anuvāka. Rik)
Samhita Devanagari Accented
सोमः॑ पुना॒न ऊ॒र्मिणाव्यो॒ वारं॒ वि धा॑वति ।
अग्रे॑ वा॒चः पव॑मानः॒ कनि॑क्रदत् ॥
Samhita Devanagari Nonaccented
सोमः पुनान ऊर्मिणाव्यो वारं वि धावति ।
अग्रे वाचः पवमानः कनिक्रदत् ॥
Samhita Transcription Accented
sómaḥ punāná ūrmíṇā́vyo vā́ram ví dhāvati ǀ
ágre vācáḥ pávamānaḥ kánikradat ǁ
Samhita Transcription Nonaccented
somaḥ punāna ūrmiṇāvyo vāram vi dhāvati ǀ
agre vācaḥ pavamānaḥ kanikradat ǁ
Padapatha Devanagari Accented
सोमः॑ । पु॒ना॒नः । ऊ॒र्मिणा॑ । अव्यः॑ । वार॑म् । वि । धा॒व॒ति॒ ।
अग्रे॑ । वा॒चः । पव॑मानः । कनि॑क्रदत् ॥
Padapatha Devanagari Nonaccented
सोमः । पुनानः । ऊर्मिणा । अव्यः । वारम् । वि । धावति ।
अग्रे । वाचः । पवमानः । कनिक्रदत् ॥
Padapatha Transcription Accented
sómaḥ ǀ punānáḥ ǀ ūrmíṇā ǀ ávyaḥ ǀ vā́ram ǀ ví ǀ dhāvati ǀ
ágre ǀ vācáḥ ǀ pávamānaḥ ǀ kánikradat ǁ
Padapatha Transcription Nonaccented
somaḥ ǀ punānaḥ ǀ ūrmiṇā ǀ avyaḥ ǀ vāram ǀ vi ǀ dhāvati ǀ
agre ǀ vācaḥ ǀ pavamānaḥ ǀ kanikradat ǁ
09.106.11 (Mandala. Sukta. Rik)
7.5.11.01 (Ashtaka. Adhyaya. Varga. Rik)
09.07.023 (Mandala. Anuvāka. Rik)
Samhita Devanagari Accented
धी॒भिर्हि॑न्वंति वा॒जिनं॒ वने॒ क्रीळं॑त॒मत्य॑विं ।
अ॒भि त्रि॑पृ॒ष्ठं म॒तयः॒ सम॑स्वरन् ॥
Samhita Devanagari Nonaccented
धीभिर्हिन्वंति वाजिनं वने क्रीळंतमत्यविं ।
अभि त्रिपृष्ठं मतयः समस्वरन् ॥
Samhita Transcription Accented
dhībhírhinvanti vājínam váne krī́ḷantamátyavim ǀ
abhí tripṛṣṭhám matáyaḥ sámasvaran ǁ
Samhita Transcription Nonaccented
dhībhirhinvanti vājinam vane krīḷantamatyavim ǀ
abhi tripṛṣṭham matayaḥ samasvaran ǁ
Padapatha Devanagari Accented
धी॒भिः । हि॒न्व॒न्ति॒ । वा॒जिन॑म् । वने॑ । क्रीळ॑न्तम् । अति॑ऽअविम् ।
अ॒भि । त्रि॒ऽपृ॒ष्ठम् । म॒तयः॑ । सम् । अ॒स्व॒र॒न् ॥
Padapatha Devanagari Nonaccented
धीभिः । हिन्वन्ति । वाजिनम् । वने । क्रीळन्तम् । अतिऽअविम् ।
अभि । त्रिऽपृष्ठम् । मतयः । सम् । अस्वरन् ॥
Padapatha Transcription Accented
dhībhíḥ ǀ hinvanti ǀ vājínam ǀ váne ǀ krī́ḷantam ǀ áti-avim ǀ
abhí ǀ tri-pṛṣṭhám ǀ matáyaḥ ǀ sám ǀ asvaran ǁ
Padapatha Transcription Nonaccented
dhībhiḥ ǀ hinvanti ǀ vājinam ǀ vane ǀ krīḷantam ǀ ati-avim ǀ
abhi ǀ tri-pṛṣṭham ǀ matayaḥ ǀ sam ǀ asvaran ǁ
09.106.12 (Mandala. Sukta. Rik)
7.5.11.02 (Ashtaka. Adhyaya. Varga. Rik)
09.07.024 (Mandala. Anuvāka. Rik)
Samhita Devanagari Accented
अस॑र्जि क॒लशाँ॑ अ॒भि मी॒ळ्हे सप्ति॒र्न वा॑ज॒युः ।
पु॒ना॒नो वाचं॑ ज॒नय॑न्नसिष्यदत् ॥
Samhita Devanagari Nonaccented
असर्जि कलशाँ अभि मीळ्हे सप्तिर्न वाजयुः ।
पुनानो वाचं जनयन्नसिष्यदत् ॥
Samhita Transcription Accented
ásarji kaláśām̐ abhí mīḷhé sáptirná vājayúḥ ǀ
punānó vā́cam janáyannasiṣyadat ǁ
Samhita Transcription Nonaccented
asarji kalaśām̐ abhi mīḷhe saptirna vājayuḥ ǀ
punāno vācam janayannasiṣyadat ǁ
Padapatha Devanagari Accented
अस॑र्जि । क॒लशा॑न् । अ॒भि । मी॒ळ्हे । सप्तिः॑ । न । वा॒ज॒ऽयुः ।
पु॒ना॒नः । वाच॑म् । ज॒नय॑न् । अ॒सि॒स्य॒द॒त् ॥
Padapatha Devanagari Nonaccented
असर्जि । कलशान् । अभि । मीळ्हे । सप्तिः । न । वाजऽयुः ।
पुनानः । वाचम् । जनयन् । असिस्यदत् ॥
Padapatha Transcription Accented
ásarji ǀ kaláśān ǀ abhí ǀ mīḷhé ǀ sáptiḥ ǀ ná ǀ vāja-yúḥ ǀ
punānáḥ ǀ vā́cam ǀ janáyan ǀ asisyadat ǁ
Padapatha Transcription Nonaccented
asarji ǀ kalaśān ǀ abhi ǀ mīḷhe ǀ saptiḥ ǀ na ǀ vāja-yuḥ ǀ
punānaḥ ǀ vācam ǀ janayan ǀ asisyadat ǁ
09.106.13 (Mandala. Sukta. Rik)
7.5.11.03 (Ashtaka. Adhyaya. Varga. Rik)
09.07.025 (Mandala. Anuvāka. Rik)
Samhita Devanagari Accented
पव॑ते हर्य॒तो हरि॒रति॒ ह्वरां॑सि॒ रंह्या॑ ।
अ॒भ्यर्ष॑न्त्स्तो॒तृभ्यो॑ वी॒रव॒द्यशः॑ ॥
Samhita Devanagari Nonaccented
पवते हर्यतो हरिरति ह्वरांसि रंह्या ।
अभ्यर्षन्त्स्तोतृभ्यो वीरवद्यशः ॥
Samhita Transcription Accented
pávate haryató háriráti hvárāṃsi ráṃhyā ǀ
abhyárṣantstotṛ́bhyo vīrávadyáśaḥ ǁ
Samhita Transcription Nonaccented
pavate haryato harirati hvarāṃsi raṃhyā ǀ
abhyarṣantstotṛbhyo vīravadyaśaḥ ǁ
Padapatha Devanagari Accented
पव॑ते । ह॒र्य॒तः । हरिः॑ । अति॑ । ह्वरां॑सि । रंह्या॑ ।
अ॒भि॒ऽअर्ष॑न् । स्तो॒तृऽभ्यः॑ । वी॒रऽव॑त् । यशः॑ ॥
Padapatha Devanagari Nonaccented
पवते । हर्यतः । हरिः । अति । ह्वरांसि । रंह्या ।
अभिऽअर्षन् । स्तोतृऽभ्यः । वीरऽवत् । यशः ॥
Padapatha Transcription Accented
pávate ǀ haryatáḥ ǀ háriḥ ǀ áti ǀ hvárāṃsi ǀ ráṃhyā ǀ
abhi-árṣan ǀ stotṛ́-bhyaḥ ǀ vīrá-vat ǀ yáśaḥ ǁ
Padapatha Transcription Nonaccented
pavate ǀ haryataḥ ǀ hariḥ ǀ ati ǀ hvarāṃsi ǀ raṃhyā ǀ
abhi-arṣan ǀ stotṛ-bhyaḥ ǀ vīra-vat ǀ yaśaḥ ǁ
09.106.14 (Mandala. Sukta. Rik)
7.5.11.04 (Ashtaka. Adhyaya. Varga. Rik)
09.07.026 (Mandala. Anuvāka. Rik)
Samhita Devanagari Accented
अ॒या प॑वस्व देव॒युर्मधो॒र्धारा॑ असृक्षत ।
रेभ॑न्प॒वित्रं॒ पर्ये॑षि वि॒श्वतः॑ ॥
Samhita Devanagari Nonaccented
अया पवस्व देवयुर्मधोर्धारा असृक्षत ।
रेभन्पवित्रं पर्येषि विश्वतः ॥
Samhita Transcription Accented
ayā́ pavasva devayúrmádhordhā́rā asṛkṣata ǀ
rébhanpavítram páryeṣi viśvátaḥ ǁ
Samhita Transcription Nonaccented
ayā pavasva devayurmadhordhārā asṛkṣata ǀ
rebhanpavitram paryeṣi viśvataḥ ǁ
Padapatha Devanagari Accented
अ॒या । प॒व॒स्व॒ । दे॒व॒ऽयुः । मधोः॑ । धाराः॑ । अ॒सृ॒क्ष॒त॒ ।
रेभ॑न् । प॒वित्र॑म् । परि॑ । ए॒षि॒ । वि॒श्वतः॑ ॥
Padapatha Devanagari Nonaccented
अया । पवस्व । देवऽयुः । मधोः । धाराः । असृक्षत ।
रेभन् । पवित्रम् । परि । एषि । विश्वतः ॥
Padapatha Transcription Accented
ayā́ ǀ pavasva ǀ deva-yúḥ ǀ mádhoḥ ǀ dhā́rāḥ ǀ asṛkṣata ǀ
rébhan ǀ pavítram ǀ pári ǀ eṣi ǀ viśvátaḥ ǁ
Padapatha Transcription Nonaccented
ayā ǀ pavasva ǀ deva-yuḥ ǀ madhoḥ ǀ dhārāḥ ǀ asṛkṣata ǀ
rebhan ǀ pavitram ǀ pari ǀ eṣi ǀ viśvataḥ ǁ