|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 9
Sūkta 108
|
1. Info |
| To: | soma pavamāna | |
| From: | 1, 2: gaurivīti śāktya; 3, 14-16: śakti vāsiṣṭha; 4, 5: ūru āṅgirasa; 6, 7: ṛjiśvan bhāradvāja; 8, 9: ūrdhvasadman āṅgirasa; 10, 11: kṛtayaśas āṅgirasa; 12, 13: ṛṇaṃcaya |
|
| Metres: | 1st set of styles: svarāḍbṛhatī (4, 6, 10, 12); kakubuṣṇik (1, 9, 11); nicṛduṣṇik (5, 7, 15); paṅktiḥ (8, 16); nicṛdbṛhatī (2); pādanicṛduṣṇik (3); gāyatrī (13); nicṛtpaṅkti (14) 2nd set of styles: satobṛhatī (2, 4, 6, 8, 10, 12, 14, 16); kakubh (1, 3, 5, 7, 9, 11, 15); gāyatrī yavamadhyā (13) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
09.108.01 (Mandala. Sukta. Rik)
7.5.17.01 (Ashtaka. Adhyaya. Varga. Rik)
09.07.053 (Mandala. Anuvāka. Rik)
Samhita Devanagari Accented
पव॑स्व॒ मधु॑मत्तम॒ इंद्रा॑य सोम क्रतु॒वित्त॑मो॒ मदः॑ ।
महि॑ द्यु॒क्षत॑मो॒ मदः॑ ॥
Samhita Devanagari Nonaccented
पवस्व मधुमत्तम इंद्राय सोम क्रतुवित्तमो मदः ।
महि द्युक्षतमो मदः ॥
Samhita Transcription Accented
pávasva mádhumattama índrāya soma kratuvíttamo mádaḥ ǀ
máhi dyukṣátamo mádaḥ ǁ
Samhita Transcription Nonaccented
pavasva madhumattama indrāya soma kratuvittamo madaḥ ǀ
mahi dyukṣatamo madaḥ ǁ
Padapatha Devanagari Accented
पव॑स्व । मधु॑मत्ऽतमः । इन्द्रा॑य । सो॒म॒ । क्र॒तु॒वित्ऽत॑मः । मदः॑ ।
महि॑ । द्यु॒क्षऽत॑मः । मदः॑ ॥
Padapatha Devanagari Nonaccented
पवस्व । मधुमत्ऽतमः । इन्द्राय । सोम । क्रतुवित्ऽतमः । मदः ।
महि । द्युक्षऽतमः । मदः ॥
Padapatha Transcription Accented
pávasva ǀ mádhumat-tamaḥ ǀ índrāya ǀ soma ǀ kratuvít-tamaḥ ǀ mádaḥ ǀ
máhi ǀ dyukṣá-tamaḥ ǀ mádaḥ ǁ
Padapatha Transcription Nonaccented
pavasva ǀ madhumat-tamaḥ ǀ indrāya ǀ soma ǀ kratuvit-tamaḥ ǀ madaḥ ǀ
mahi ǀ dyukṣa-tamaḥ ǀ madaḥ ǁ
09.108.02 (Mandala. Sukta. Rik)
7.5.17.02 (Ashtaka. Adhyaya. Varga. Rik)
09.07.054 (Mandala. Anuvāka. Rik)
Samhita Devanagari Accented
यस्य॑ ते पी॒त्वा वृ॑ष॒भो वृ॑षा॒यते॒ऽस्य पी॒ता स्व॒र्विदः॑ ।
स सु॒प्रके॑तो अ॒भ्य॑क्रमी॒दिषोऽच्छा॒ वाजं॒ नैत॑शः ॥
Samhita Devanagari Nonaccented
यस्य ते पीत्वा वृषभो वृषायतेऽस्य पीता स्वर्विदः ।
स सुप्रकेतो अभ्यक्रमीदिषोऽच्छा वाजं नैतशः ॥
Samhita Transcription Accented
yásya te pītvā́ vṛṣabhó vṛṣāyáte’syá pītā́ svarvídaḥ ǀ
sá supráketo abhyákramīdíṣó’cchā vā́jam náitaśaḥ ǁ
Samhita Transcription Nonaccented
yasya te pītvā vṛṣabho vṛṣāyate’sya pītā svarvidaḥ ǀ
sa supraketo abhyakramīdiṣo’cchā vājam naitaśaḥ ǁ
Padapatha Devanagari Accented
यस्य॑ । ते॒ । पी॒त्वा । वृ॒ष॒भः । वृ॒ष॒ऽयते॑ । अ॒स्य । पी॒ता । स्वः॒ऽविदः॑ ।
सः । सु॒ऽप्रके॑तः । अ॒भि । अ॒क्र॒मी॒त् । इषः॑ । अच्छ॑ । वाज॑म् । न । एत॑शः ॥
Padapatha Devanagari Nonaccented
यस्य । ते । पीत्वा । वृषभः । वृषऽयते । अस्य । पीता । स्वःऽविदः ।
सः । सुऽप्रकेतः । अभि । अक्रमीत् । इषः । अच्छ । वाजम् । न । एतशः ॥
Padapatha Transcription Accented
yásya ǀ te ǀ pītvā́ ǀ vṛṣabháḥ ǀ vṛṣa-yáte ǀ asyá ǀ pītā́ ǀ svaḥ-vídaḥ ǀ
sáḥ ǀ su-práketaḥ ǀ abhí ǀ akramīt ǀ íṣaḥ ǀ áccha ǀ vā́jam ǀ ná ǀ étaśaḥ ǁ
Padapatha Transcription Nonaccented
yasya ǀ te ǀ pītvā ǀ vṛṣabhaḥ ǀ vṛṣa-yate ǀ asya ǀ pītā ǀ svaḥ-vidaḥ ǀ
saḥ ǀ su-praketaḥ ǀ abhi ǀ akramīt ǀ iṣaḥ ǀ accha ǀ vājam ǀ na ǀ etaśaḥ ǁ
09.108.03 (Mandala. Sukta. Rik)
7.5.17.03 (Ashtaka. Adhyaya. Varga. Rik)
09.07.055 (Mandala. Anuvāka. Rik)
Samhita Devanagari Accented
त्वं ह्यं१॒॑ग दैव्या॒ पव॑मान॒ जनि॑मानि द्यु॒मत्त॑मः ।
अ॒मृ॒त॒त्वाय॑ घो॒षयः॑ ॥
Samhita Devanagari Nonaccented
त्वं ह्यंग दैव्या पवमान जनिमानि द्युमत्तमः ।
अमृतत्वाय घोषयः ॥
Samhita Transcription Accented
tvám hyáṅgá dáivyā pávamāna jánimāni dyumáttamaḥ ǀ
amṛtatvā́ya ghoṣáyaḥ ǁ
Samhita Transcription Nonaccented
tvam hyaṅga daivyā pavamāna janimāni dyumattamaḥ ǀ
amṛtatvāya ghoṣayaḥ ǁ
Padapatha Devanagari Accented
त्वम् । हि । अ॒ङ्ग । दैव्या॑ । पव॑मान । जनि॑मानि । द्यु॒मत्ऽत॑मः ।
अ॒मृ॒त॒ऽत्वाय॑ । घो॒षयः॑ ॥
Padapatha Devanagari Nonaccented
त्वम् । हि । अङ्ग । दैव्या । पवमान । जनिमानि । द्युमत्ऽतमः ।
अमृतऽत्वाय । घोषयः ॥
Padapatha Transcription Accented
tvám ǀ hí ǀ aṅgá ǀ dáivyā ǀ pávamāna ǀ jánimāni ǀ dyumát-tamaḥ ǀ
amṛta-tvā́ya ǀ ghoṣáyaḥ ǁ
Padapatha Transcription Nonaccented
tvam ǀ hi ǀ aṅga ǀ daivyā ǀ pavamāna ǀ janimāni ǀ dyumat-tamaḥ ǀ
amṛta-tvāya ǀ ghoṣayaḥ ǁ
09.108.04 (Mandala. Sukta. Rik)
7.5.17.04 (Ashtaka. Adhyaya. Varga. Rik)
09.07.056 (Mandala. Anuvāka. Rik)
Samhita Devanagari Accented
येना॒ नव॑ग्वो द॒ध्यङ्ङ॑पोर्णु॒ते येन॒ विप्रा॑स आपि॒रे ।
दे॒वानां॑ सु॒म्ने अ॒मृत॑स्य॒ चारु॑णो॒ येन॒ श्रवां॑स्यान॒शुः ॥
Samhita Devanagari Nonaccented
येना नवग्वो दध्यङ्ङपोर्णुते येन विप्रास आपिरे ।
देवानां सुम्ने अमृतस्य चारुणो येन श्रवांस्यानशुः ॥
Samhita Transcription Accented
yénā návagvo dadhyáṅṅaporṇuté yéna víprāsa āpiré ǀ
devā́nām sumné amṛ́tasya cā́ruṇo yéna śrávāṃsyānaśúḥ ǁ
Samhita Transcription Nonaccented
yenā navagvo dadhyaṅṅaporṇute yena viprāsa āpire ǀ
devānām sumne amṛtasya cāruṇo yena śravāṃsyānaśuḥ ǁ
Padapatha Devanagari Accented
येन॑ । नव॑ऽग्वः । द॒ध्यङ् । अ॒प॒ऽऊ॒र्णु॒ते । येन॑ । विप्रा॑सः । आ॒पि॒रे ।
दे॒वाना॑म् । सु॒म्ने । अ॒मृत॑स्य । चारु॑णः । येन॑ । श्रवां॑सि । आ॒न॒शुः ॥
Padapatha Devanagari Nonaccented
येन । नवऽग्वः । दध्यङ् । अपऽऊर्णुते । येन । विप्रासः । आपिरे ।
देवानाम् । सुम्ने । अमृतस्य । चारुणः । येन । श्रवांसि । आनशुः ॥
Padapatha Transcription Accented
yéna ǀ náva-gvaḥ ǀ dadhyáṅ ǀ apa-ūrṇuté ǀ yéna ǀ víprāsaḥ ǀ āpiré ǀ
devā́nām ǀ sumné ǀ amṛ́tasya ǀ cā́ruṇaḥ ǀ yéna ǀ śrávāṃsi ǀ ānaśúḥ ǁ
Padapatha Transcription Nonaccented
yena ǀ nava-gvaḥ ǀ dadhyaṅ ǀ apa-ūrṇute ǀ yena ǀ viprāsaḥ ǀ āpire ǀ
devānām ǀ sumne ǀ amṛtasya ǀ cāruṇaḥ ǀ yena ǀ śravāṃsi ǀ ānaśuḥ ǁ
09.108.05 (Mandala. Sukta. Rik)
7.5.17.05 (Ashtaka. Adhyaya. Varga. Rik)
09.07.057 (Mandala. Anuvāka. Rik)
Samhita Devanagari Accented
ए॒ष स्य धार॑या सु॒तोऽव्यो॒ वारे॑भिः पवते म॒दिंत॑मः ।
क्रीळ॑न्नू॒र्मिर॒पामि॑व ॥
Samhita Devanagari Nonaccented
एष स्य धारया सुतोऽव्यो वारेभिः पवते मदिंतमः ।
क्रीळन्नूर्मिरपामिव ॥
Samhita Transcription Accented
eṣá syá dhā́rayā sutó’vyo vā́rebhiḥ pavate madíntamaḥ ǀ
krī́ḷannūrmírapā́miva ǁ
Samhita Transcription Nonaccented
eṣa sya dhārayā suto’vyo vārebhiḥ pavate madintamaḥ ǀ
krīḷannūrmirapāmiva ǁ
Padapatha Devanagari Accented
ए॒षः । स्यः । धार॑या । सु॒तः । अव्यः॑ । वारे॑भिः । प॒व॒ते॒ । म॒दिन्ऽत॑मः ।
क्रीळ॑न् । ऊ॒र्मिः । अ॒पाम्ऽइ॑व ॥
Padapatha Devanagari Nonaccented
एषः । स्यः । धारया । सुतः । अव्यः । वारेभिः । पवते । मदिन्ऽतमः ।
क्रीळन् । ऊर्मिः । अपाम्ऽइव ॥
Padapatha Transcription Accented
eṣáḥ ǀ syáḥ ǀ dhā́rayā ǀ sutáḥ ǀ ávyaḥ ǀ vā́rebhiḥ ǀ pavate ǀ madín-tamaḥ ǀ
krī́ḷan ǀ ūrmíḥ ǀ apā́m-iva ǁ
Padapatha Transcription Nonaccented
eṣaḥ ǀ syaḥ ǀ dhārayā ǀ sutaḥ ǀ avyaḥ ǀ vārebhiḥ ǀ pavate ǀ madin-tamaḥ ǀ
krīḷan ǀ ūrmiḥ ǀ apām-iva ǁ
09.108.06 (Mandala. Sukta. Rik)
7.5.18.01 (Ashtaka. Adhyaya. Varga. Rik)
09.07.058 (Mandala. Anuvāka. Rik)
Samhita Devanagari Accented
य उ॒स्रिया॒ अप्या॑ अं॒तरश्म॑नो॒ निर्गा अकृं॑त॒दोज॑सा ।
अ॒भि व्र॒जं त॑त्निषे॒ गव्य॒मश्व्यं॑ व॒र्मीव॑ धृष्ण॒वा रु॑ज ॥
Samhita Devanagari Nonaccented
य उस्रिया अप्या अंतरश्मनो निर्गा अकृंतदोजसा ।
अभि व्रजं तत्निषे गव्यमश्व्यं वर्मीव धृष्णवा रुज ॥
Samhita Transcription Accented
yá usríyā ápyā antáráśmano nírgā́ ákṛntadójasā ǀ
abhí vrajám tatniṣe gávyamáśvyam varmī́va dhṛṣṇavā́ ruja ǁ
Samhita Transcription Nonaccented
ya usriyā apyā antaraśmano nirgā akṛntadojasā ǀ
abhi vrajam tatniṣe gavyamaśvyam varmīva dhṛṣṇavā ruja ǁ
Padapatha Devanagari Accented
यः । उ॒स्रियाः॑ । अप्याः॑ । अ॒न्तः । अश्म॑नः । निः । गाः । अकृ॑न्तत् । ओज॑सा ।
अ॒भि । व्र॒जम् । त॒त्नि॒षे॒ । गव्य॑म् । अश्व्य॑म् । व॒र्मीऽइ॑व । धृ॒ष्णो॒ इति॑ । आ । रु॒ज॒ ॥
Padapatha Devanagari Nonaccented
यः । उस्रियाः । अप्याः । अन्तः । अश्मनः । निः । गाः । अकृन्तत् । ओजसा ।
अभि । व्रजम् । तत्निषे । गव्यम् । अश्व्यम् । वर्मीऽइव । धृष्णो इति । आ । रुज ॥
Padapatha Transcription Accented
yáḥ ǀ usríyāḥ ǀ ápyāḥ ǀ antáḥ ǀ áśmanaḥ ǀ níḥ ǀ gā́ḥ ǀ ákṛntat ǀ ójasā ǀ
abhí ǀ vrajám ǀ tatniṣe ǀ gávyam ǀ áśvyam ǀ varmī́-iva ǀ dhṛṣṇo íti ǀ ā́ ǀ ruja ǁ
Padapatha Transcription Nonaccented
yaḥ ǀ usriyāḥ ǀ apyāḥ ǀ antaḥ ǀ aśmanaḥ ǀ niḥ ǀ gāḥ ǀ akṛntat ǀ ojasā ǀ
abhi ǀ vrajam ǀ tatniṣe ǀ gavyam ǀ aśvyam ǀ varmī-iva ǀ dhṛṣṇo iti ǀ ā ǀ ruja ǁ
09.108.07 (Mandala. Sukta. Rik)
7.5.18.02 (Ashtaka. Adhyaya. Varga. Rik)
09.07.059 (Mandala. Anuvāka. Rik)
Samhita Devanagari Accented
आ सो॑ता॒ परि॑ षिंच॒ताश्वं॒ न स्तोम॑म॒प्तुरं॑ रज॒स्तुरं॑ ।
व॒न॒क्र॒क्षमु॑द॒प्रुतं॑ ॥
Samhita Devanagari Nonaccented
आ सोता परि षिंचताश्वं न स्तोममप्तुरं रजस्तुरं ।
वनक्रक्षमुदप्रुतं ॥
Samhita Transcription Accented
ā́ sotā pári ṣiñcatā́śvam ná stómamaptúram rajastúram ǀ
vanakrakṣámudaprútam ǁ
Samhita Transcription Nonaccented
ā sotā pari ṣiñcatāśvam na stomamapturam rajasturam ǀ
vanakrakṣamudaprutam ǁ
Padapatha Devanagari Accented
आ । सो॒त॒ । परि॑ । सि॒ञ्च॒त॒ । अश्व॑म् । न । स्तोम॑म् । अ॒प्ऽतुर॑म् । र॒जः॒ऽतुर॑म् ।
व॒न॒ऽक्र॒क्षम् । उ॒द॒ऽप्रुत॑म् ॥
Padapatha Devanagari Nonaccented
आ । सोत । परि । सिञ्चत । अश्वम् । न । स्तोमम् । अप्ऽतुरम् । रजःऽतुरम् ।
वनऽक्रक्षम् । उदऽप्रुतम् ॥
Padapatha Transcription Accented
ā́ ǀ sota ǀ pári ǀ siñcata ǀ áśvam ǀ ná ǀ stómam ǀ ap-túram ǀ rajaḥ-túram ǀ
vana-krakṣám ǀ uda-prútam ǁ
Padapatha Transcription Nonaccented
ā ǀ sota ǀ pari ǀ siñcata ǀ aśvam ǀ na ǀ stomam ǀ ap-turam ǀ rajaḥ-turam ǀ
vana-krakṣam ǀ uda-prutam ǁ
09.108.08 (Mandala. Sukta. Rik)
7.5.18.03 (Ashtaka. Adhyaya. Varga. Rik)
09.07.060 (Mandala. Anuvāka. Rik)
Samhita Devanagari Accented
स॒हस्र॑धारं वृष॒भं प॑यो॒वृधं॑ प्रि॒यं दे॒वाय॒ जन्म॑ने ।
ऋ॒तेन॒ य ऋ॒तजा॑तो विवावृ॒धे राजा॑ दे॒व ऋ॒तं बृ॒हत् ॥
Samhita Devanagari Nonaccented
सहस्रधारं वृषभं पयोवृधं प्रियं देवाय जन्मने ।
ऋतेन य ऋतजातो विवावृधे राजा देव ऋतं बृहत् ॥
Samhita Transcription Accented
sahásradhāram vṛṣabhám payovṛ́dham priyám devā́ya jánmane ǀ
ṛténa yá ṛtájāto vivāvṛdhé rā́jā devá ṛtám bṛhát ǁ
Samhita Transcription Nonaccented
sahasradhāram vṛṣabham payovṛdham priyam devāya janmane ǀ
ṛtena ya ṛtajāto vivāvṛdhe rājā deva ṛtam bṛhat ǁ
Padapatha Devanagari Accented
स॒हस्र॑ऽधारम् । वृ॒ष॒भम् । प॒यः॒ऽवृध॑म् । प्रि॒यम् । दे॒वाय॑ । जन्म॑ने ।
ऋ॒तेन॑ । यः । ऋ॒तऽजा॑तः । वि॒ऽव॒वृ॒धे । राजा॑ । दे॒वः । ऋ॒तम् । बृ॒हत् ॥
Padapatha Devanagari Nonaccented
सहस्रऽधारम् । वृषभम् । पयःऽवृधम् । प्रियम् । देवाय । जन्मने ।
ऋतेन । यः । ऋतऽजातः । विऽववृधे । राजा । देवः । ऋतम् । बृहत् ॥
Padapatha Transcription Accented
sahásra-dhāram ǀ vṛṣabhám ǀ payaḥ-vṛ́dham ǀ priyám ǀ devā́ya ǀ jánmane ǀ
ṛténa ǀ yáḥ ǀ ṛtá-jātaḥ ǀ vi-vavṛdhé ǀ rā́jā ǀ deváḥ ǀ ṛtám ǀ bṛhát ǁ
Padapatha Transcription Nonaccented
sahasra-dhāram ǀ vṛṣabham ǀ payaḥ-vṛdham ǀ priyam ǀ devāya ǀ janmane ǀ
ṛtena ǀ yaḥ ǀ ṛta-jātaḥ ǀ vi-vavṛdhe ǀ rājā ǀ devaḥ ǀ ṛtam ǀ bṛhat ǁ
09.108.09 (Mandala. Sukta. Rik)
7.5.18.04 (Ashtaka. Adhyaya. Varga. Rik)
09.07.061 (Mandala. Anuvāka. Rik)
Samhita Devanagari Accented
अ॒भि द्यु॒म्नं बृ॒हद्यश॒ इष॑स्पते दिदी॒हि दे॑व देव॒युः ।
वि कोशं॑ मध्य॒मं यु॑व ॥
Samhita Devanagari Nonaccented
अभि द्युम्नं बृहद्यश इषस्पते दिदीहि देव देवयुः ।
वि कोशं मध्यमं युव ॥
Samhita Transcription Accented
abhí dyumnám bṛhádyáśa íṣaspate didīhí deva devayúḥ ǀ
ví kóśam madhyamám yuva ǁ
Samhita Transcription Nonaccented
abhi dyumnam bṛhadyaśa iṣaspate didīhi deva devayuḥ ǀ
vi kośam madhyamam yuva ǁ
Padapatha Devanagari Accented
अ॒भि । द्यु॒म्नम् । बृ॒हत् । यशः॑ । इषः॑ । प॒ते॒ । दि॒दी॒हि । दे॒व॒ । दे॒व॒ऽयुः ।
वि । कोश॑म् । म॒ध्य॒मम् । यु॒व॒ ॥
Padapatha Devanagari Nonaccented
अभि । द्युम्नम् । बृहत् । यशः । इषः । पते । दिदीहि । देव । देवऽयुः ।
वि । कोशम् । मध्यमम् । युव ॥
Padapatha Transcription Accented
abhí ǀ dyumnám ǀ bṛhát ǀ yáśaḥ ǀ íṣaḥ ǀ pate ǀ didīhí ǀ deva ǀ deva-yúḥ ǀ
ví ǀ kóśam ǀ madhyamám ǀ yuva ǁ
Padapatha Transcription Nonaccented
abhi ǀ dyumnam ǀ bṛhat ǀ yaśaḥ ǀ iṣaḥ ǀ pate ǀ didīhi ǀ deva ǀ deva-yuḥ ǀ
vi ǀ kośam ǀ madhyamam ǀ yuva ǁ
09.108.10 (Mandala. Sukta. Rik)
7.5.18.05 (Ashtaka. Adhyaya. Varga. Rik)
09.07.062 (Mandala. Anuvāka. Rik)
Samhita Devanagari Accented
आ व॑च्यस्व सुदक्ष च॒म्वोः॑ सु॒तो वि॒शां वह्नि॒र्न वि॒श्पतिः॑ ।
वृ॒ष्टिं दि॒वः प॑वस्व री॒तिम॒पां जिन्वा॒ गवि॑ष्टये॒ धियः॑ ॥
Samhita Devanagari Nonaccented
आ वच्यस्व सुदक्ष चम्वोः सुतो विशां वह्निर्न विश्पतिः ।
वृष्टिं दिवः पवस्व रीतिमपां जिन्वा गविष्टये धियः ॥
Samhita Transcription Accented
ā́ vacyasva sudakṣa camvóḥ sutó viśā́m váhnirná viśpátiḥ ǀ
vṛṣṭím diváḥ pavasva rītímapā́m jínvā gáviṣṭaye dhíyaḥ ǁ
Samhita Transcription Nonaccented
ā vacyasva sudakṣa camvoḥ suto viśām vahnirna viśpatiḥ ǀ
vṛṣṭim divaḥ pavasva rītimapām jinvā gaviṣṭaye dhiyaḥ ǁ
Padapatha Devanagari Accented
आ । व॒च्य॒स्व॒ । सु॒ऽद॒क्ष॒ । च॒म्वोः॑ । सु॒तः । वि॒शाम् । वह्निः॑ । न । वि॒श्पतिः॑ ।
वृ॒ष्टिम् । दि॒वः । प॒व॒स्व॒ । री॒तिम् । अ॒पाम् । जिन्व॑ । गोऽइ॑ष्टये । धियः॑ ॥
Padapatha Devanagari Nonaccented
आ । वच्यस्व । सुऽदक्ष । चम्वोः । सुतः । विशाम् । वह्निः । न । विश्पतिः ।
वृष्टिम् । दिवः । पवस्व । रीतिम् । अपाम् । जिन्व । गोऽइष्टये । धियः ॥
Padapatha Transcription Accented
ā́ ǀ vacyasva ǀ su-dakṣa ǀ camvóḥ ǀ sutáḥ ǀ viśā́m ǀ váhniḥ ǀ ná ǀ viśpátiḥ ǀ
vṛṣṭím ǀ diváḥ ǀ pavasva ǀ rītím ǀ apā́m ǀ jínva ǀ gó-iṣṭaye ǀ dhíyaḥ ǁ
Padapatha Transcription Nonaccented
ā ǀ vacyasva ǀ su-dakṣa ǀ camvoḥ ǀ sutaḥ ǀ viśām ǀ vahniḥ ǀ na ǀ viśpatiḥ ǀ
vṛṣṭim ǀ divaḥ ǀ pavasva ǀ rītim ǀ apām ǀ jinva ǀ go-iṣṭaye ǀ dhiyaḥ ǁ
09.108.11 (Mandala. Sukta. Rik)
7.5.19.01 (Ashtaka. Adhyaya. Varga. Rik)
09.07.063 (Mandala. Anuvāka. Rik)
Samhita Devanagari Accented
ए॒तमु॒ त्यं म॑द॒च्युतं॑ स॒हस्र॑धारं वृष॒भं दिवो॑ दुहुः ।
विश्वा॒ वसू॑नि॒ बिभ्र॑तं ॥
Samhita Devanagari Nonaccented
एतमु त्यं मदच्युतं सहस्रधारं वृषभं दिवो दुहुः ।
विश्वा वसूनि बिभ्रतं ॥
Samhita Transcription Accented
etámu tyám madacyútam sahásradhāram vṛṣabhám dívo duhuḥ ǀ
víśvā vásūni bíbhratam ǁ
Samhita Transcription Nonaccented
etamu tyam madacyutam sahasradhāram vṛṣabham divo duhuḥ ǀ
viśvā vasūni bibhratam ǁ
Padapatha Devanagari Accented
ए॒तम् । ऊं॒ इति॑ । त्यम् । म॒द॒ऽच्युत॑म् । स॒हस्र॑ऽधारम् । वृ॒ष॒भम् । दिवः॑ । दु॒हुः॒ ।
विश्वा॑ । वसू॑नि । बिभ्र॑तम् ॥
Padapatha Devanagari Nonaccented
एतम् । ऊं इति । त्यम् । मदऽच्युतम् । सहस्रऽधारम् । वृषभम् । दिवः । दुहुः ।
विश्वा । वसूनि । बिभ्रतम् ॥
Padapatha Transcription Accented
etám ǀ ūṃ íti ǀ tyám ǀ mada-cyútam ǀ sahásra-dhāram ǀ vṛṣabhám ǀ dívaḥ ǀ duhuḥ ǀ
víśvā ǀ vásūni ǀ bíbhratam ǁ
Padapatha Transcription Nonaccented
etam ǀ ūṃ iti ǀ tyam ǀ mada-cyutam ǀ sahasra-dhāram ǀ vṛṣabham ǀ divaḥ ǀ duhuḥ ǀ
viśvā ǀ vasūni ǀ bibhratam ǁ
09.108.12 (Mandala. Sukta. Rik)
7.5.19.02 (Ashtaka. Adhyaya. Varga. Rik)
09.07.064 (Mandala. Anuvāka. Rik)
Samhita Devanagari Accented
वृषा॒ वि ज॑ज्ञे ज॒नय॒न्नम॑र्त्यः प्र॒तपं॒ज्योति॑षा॒ तमः॑ ।
स सुष्टु॑तः क॒विभि॑र्नि॒र्णिजं॑ दधे त्रि॒धात्व॑स्य॒ दंस॑सा ॥
Samhita Devanagari Nonaccented
वृषा वि जज्ञे जनयन्नमर्त्यः प्रतपंज्योतिषा तमः ।
स सुष्टुतः कविभिर्निर्णिजं दधे त्रिधात्वस्य दंससा ॥
Samhita Transcription Accented
vṛ́ṣā ví jajñe janáyannámartyaḥ pratápañjyótiṣā támaḥ ǀ
sá súṣṭutaḥ kavíbhirnirṇíjam dadhe tridhā́tvasya dáṃsasā ǁ
Samhita Transcription Nonaccented
vṛṣā vi jajñe janayannamartyaḥ pratapañjyotiṣā tamaḥ ǀ
sa suṣṭutaḥ kavibhirnirṇijam dadhe tridhātvasya daṃsasā ǁ
Padapatha Devanagari Accented
वृषा॑ । वि । ज॒ज्ञे॒ । ज॒नय॑न् । अम॑र्त्यः । प्र॒ऽतप॑न् । ज्योति॑षा । तमः॑ ।
सः । सुऽस्तु॑तः । क॒विऽभिः॑ । निः॒ऽनिज॑म् । द॒धे॒ । त्रि॒ऽधातु॑ । अ॒स्य॒ । दंस॑सा ॥
Padapatha Devanagari Nonaccented
वृषा । वि । जज्ञे । जनयन् । अमर्त्यः । प्रऽतपन् । ज्योतिषा । तमः ।
सः । सुऽस्तुतः । कविऽभिः । निःऽनिजम् । दधे । त्रिऽधातु । अस्य । दंससा ॥
Padapatha Transcription Accented
vṛ́ṣā ǀ ví ǀ jajñe ǀ janáyan ǀ ámartyaḥ ǀ pra-tápan ǀ jyótiṣā ǀ támaḥ ǀ
sáḥ ǀ sú-stutaḥ ǀ kaví-bhiḥ ǀ niḥ-níjam ǀ dadhe ǀ tri-dhā́tu ǀ asya ǀ dáṃsasā ǁ
Padapatha Transcription Nonaccented
vṛṣā ǀ vi ǀ jajñe ǀ janayan ǀ amartyaḥ ǀ pra-tapan ǀ jyotiṣā ǀ tamaḥ ǀ
saḥ ǀ su-stutaḥ ǀ kavi-bhiḥ ǀ niḥ-nijam ǀ dadhe ǀ tri-dhātu ǀ asya ǀ daṃsasā ǁ
09.108.13 (Mandala. Sukta. Rik)
7.5.19.03 (Ashtaka. Adhyaya. Varga. Rik)
09.07.065 (Mandala. Anuvāka. Rik)
Samhita Devanagari Accented
स सु॑न्वे॒ यो वसू॑नां॒ यो रा॒यामा॑ने॒ता य इळा॑नां ।
सोमो॒ यः सु॑क्षिती॒नां ॥
Samhita Devanagari Nonaccented
स सुन्वे यो वसूनां यो रायामानेता य इळानां ।
सोमो यः सुक्षितीनां ॥
Samhita Transcription Accented
sá sunve yó vásūnām yó rāyā́mānetā́ yá íḷānām ǀ
sómo yáḥ sukṣitīnā́m ǁ
Samhita Transcription Nonaccented
sa sunve yo vasūnām yo rāyāmānetā ya iḷānām ǀ
somo yaḥ sukṣitīnām ǁ
Padapatha Devanagari Accented
सः । सु॒न्वे॒ । यः । वसू॑नाम् । यः । रा॒याम् । आ॒ऽने॒ता । यः । इळा॑नाम् ।
सोमः॑ । यः । सु॒ऽक्षि॒ती॒नाम् ॥
Padapatha Devanagari Nonaccented
सः । सुन्वे । यः । वसूनाम् । यः । रायाम् । आऽनेता । यः । इळानाम् ।
सोमः । यः । सुऽक्षितीनाम् ॥
Padapatha Transcription Accented
sáḥ ǀ sunve ǀ yáḥ ǀ vásūnām ǀ yáḥ ǀ rāyā́m ǀ ā-netā́ ǀ yáḥ ǀ íḷānām ǀ
sómaḥ ǀ yáḥ ǀ su-kṣitīnā́m ǁ
Padapatha Transcription Nonaccented
saḥ ǀ sunve ǀ yaḥ ǀ vasūnām ǀ yaḥ ǀ rāyām ǀ ā-netā ǀ yaḥ ǀ iḷānām ǀ
somaḥ ǀ yaḥ ǀ su-kṣitīnām ǁ
09.108.14 (Mandala. Sukta. Rik)
7.5.19.04 (Ashtaka. Adhyaya. Varga. Rik)
09.07.066 (Mandala. Anuvāka. Rik)
Samhita Devanagari Accented
यस्य॑ न॒ इंद्रः॒ पिबा॒द्यस्य॑ म॒रुतो॒ यस्य॑ वार्य॒मणा॒ भगः॑ ।
आ येन॑ मि॒त्रावरु॑णा॒ करा॑मह॒ एंद्र॒मव॑से म॒हे ॥
Samhita Devanagari Nonaccented
यस्य न इंद्रः पिबाद्यस्य मरुतो यस्य वार्यमणा भगः ।
आ येन मित्रावरुणा करामह एंद्रमवसे महे ॥
Samhita Transcription Accented
yásya na índraḥ píbādyásya marúto yásya vāryamáṇā bhágaḥ ǀ
ā́ yéna mitrā́váruṇā kárāmaha éndramávase mahé ǁ
Samhita Transcription Nonaccented
yasya na indraḥ pibādyasya maruto yasya vāryamaṇā bhagaḥ ǀ
ā yena mitrāvaruṇā karāmaha endramavase mahe ǁ
Padapatha Devanagari Accented
यस्य॑ । नः॒ । इन्द्रः॑ । पिबा॑त् । यस्य॑ । म॒रुतः॑ । यस्य॑ । वा॒ । अ॒र्य॒मणा॑ । भगः॑ ।
आ । येन॑ । मि॒त्रावरु॑णा । करा॑महे । आ । इन्द्र॑म् । अव॑से । म॒हे ॥
Padapatha Devanagari Nonaccented
यस्य । नः । इन्द्रः । पिबात् । यस्य । मरुतः । यस्य । वा । अर्यमणा । भगः ।
आ । येन । मित्रावरुणा । करामहे । आ । इन्द्रम् । अवसे । महे ॥
Padapatha Transcription Accented
yásya ǀ naḥ ǀ índraḥ ǀ píbāt ǀ yásya ǀ marútaḥ ǀ yásya ǀ vā ǀ aryamáṇā ǀ bhágaḥ ǀ
ā́ ǀ yéna ǀ mitrā́váruṇā ǀ kárāmahe ǀ ā́ ǀ índram ǀ ávase ǀ mahé ǁ
Padapatha Transcription Nonaccented
yasya ǀ naḥ ǀ indraḥ ǀ pibāt ǀ yasya ǀ marutaḥ ǀ yasya ǀ vā ǀ aryamaṇā ǀ bhagaḥ ǀ
ā ǀ yena ǀ mitrāvaruṇā ǀ karāmahe ǀ ā ǀ indram ǀ avase ǀ mahe ǁ
09.108.15 (Mandala. Sukta. Rik)
7.5.19.05 (Ashtaka. Adhyaya. Varga. Rik)
09.07.067 (Mandala. Anuvāka. Rik)
Samhita Devanagari Accented
इंद्रा॑य सोम॒ पात॑वे॒ नृभि॑र्य॒तः स्वा॑यु॒धो म॒दिंत॑मः ।
पव॑स्व॒ मधु॑मत्तमः ॥
Samhita Devanagari Nonaccented
इंद्राय सोम पातवे नृभिर्यतः स्वायुधो मदिंतमः ।
पवस्व मधुमत्तमः ॥
Samhita Transcription Accented
índrāya soma pā́tave nṛ́bhiryatáḥ svāyudhó madíntamaḥ ǀ
pávasva mádhumattamaḥ ǁ
Samhita Transcription Nonaccented
indrāya soma pātave nṛbhiryataḥ svāyudho madintamaḥ ǀ
pavasva madhumattamaḥ ǁ
Padapatha Devanagari Accented
इन्द्रा॑य । सो॒म॒ । पात॑वे । नृऽभिः॑ । य॒तः । सु॒ऽआ॒यु॒धः । म॒दिन्ऽत॑मः ।
पव॑स्व । मधु॑मत्ऽतमः ॥
Padapatha Devanagari Nonaccented
इन्द्राय । सोम । पातवे । नृऽभिः । यतः । सुऽआयुधः । मदिन्ऽतमः ।
पवस्व । मधुमत्ऽतमः ॥
Padapatha Transcription Accented
índrāya ǀ soma ǀ pā́tave ǀ nṛ́-bhiḥ ǀ yatáḥ ǀ su-āyudháḥ ǀ madín-tamaḥ ǀ
pávasva ǀ mádhumat-tamaḥ ǁ
Padapatha Transcription Nonaccented
indrāya ǀ soma ǀ pātave ǀ nṛ-bhiḥ ǀ yataḥ ǀ su-āyudhaḥ ǀ madin-tamaḥ ǀ
pavasva ǀ madhumat-tamaḥ ǁ
09.108.16 (Mandala. Sukta. Rik)
7.5.19.06 (Ashtaka. Adhyaya. Varga. Rik)
09.07.068 (Mandala. Anuvāka. Rik)
Samhita Devanagari Accented
इंद्र॑स्य॒ हार्दि॑ सोम॒धान॒मा वि॑श समु॒द्रमि॑व॒ सिंध॑वः ।
जुष्टो॑ मि॒त्राय॒ वरु॑णाय वा॒यवे॑ दि॒वो वि॑ष्टं॒भ उ॑त्त॒मः ॥
Samhita Devanagari Nonaccented
इंद्रस्य हार्दि सोमधानमा विश समुद्रमिव सिंधवः ।
जुष्टो मित्राय वरुणाय वायवे दिवो विष्टंभ उत्तमः ॥
Samhita Transcription Accented
índrasya hā́rdi somadhā́namā́ viśa samudrámiva síndhavaḥ ǀ
júṣṭo mitrā́ya váruṇāya vāyáve divó viṣṭambhá uttamáḥ ǁ
Samhita Transcription Nonaccented
indrasya hārdi somadhānamā viśa samudramiva sindhavaḥ ǀ
juṣṭo mitrāya varuṇāya vāyave divo viṣṭambha uttamaḥ ǁ
Padapatha Devanagari Accented
इन्द्र॑स्य । हार्दि॑ । सो॒म॒ऽधान॑म् । आ । वि॒श॒ । स॒मु॒द्रम्ऽइ॑व । सिन्ध॑वः ।
जुष्टः॑ । मि॒त्राय॑ । वरु॑णाय । वा॒यवे॑ । दि॒वः । वि॒ष्ट॒म्भः । उ॒त्ऽत॒मः ॥
Padapatha Devanagari Nonaccented
इन्द्रस्य । हार्दि । सोमऽधानम् । आ । विश । समुद्रम्ऽइव । सिन्धवः ।
जुष्टः । मित्राय । वरुणाय । वायवे । दिवः । विष्टम्भः । उत्ऽतमः ॥
Padapatha Transcription Accented
índrasya ǀ hā́rdi ǀ soma-dhā́nam ǀ ā́ ǀ viśa ǀ samudrám-iva ǀ síndhavaḥ ǀ
júṣṭaḥ ǀ mitrā́ya ǀ váruṇāya ǀ vāyáve ǀ diváḥ ǀ viṣṭambháḥ ǀ ut-tamáḥ ǁ
Padapatha Transcription Nonaccented
indrasya ǀ hārdi ǀ soma-dhānam ǀ ā ǀ viśa ǀ samudram-iva ǀ sindhavaḥ ǀ
juṣṭaḥ ǀ mitrāya ǀ varuṇāya ǀ vāyave ǀ divaḥ ǀ viṣṭambhaḥ ǀ ut-tamaḥ ǁ