|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 5
|
1. Info |
| To: | agni | |
| From: | trita āptya | |
| Metres: | 1st set of styles: triṣṭup (2-5); nicṛttriṣṭup (6, 7); virāṭtrisṭup (1) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.005.01 (Mandala. Sukta. Rik)
7.5.33.01 (Ashtaka. Adhyaya. Varga. Rik)
10.01.029 (Mandala. Anuvāka. Rik)
Samhita Devanagari Accented
एकः॑ समु॒द्रो ध॒रुणो॑ रयी॒णाम॒स्मद्धृ॒दो भूरि॑जन्मा॒ वि च॑ष्टे ।
सिष॒क्त्यूध॑र्नि॒ण्योरु॒पस्थ॒ उत्स॑स्य॒ मध्ये॒ निहि॑तं प॒दं वेः ॥
Samhita Devanagari Nonaccented
एकः समुद्रो धरुणो रयीणामस्मद्धृदो भूरिजन्मा वि चष्टे ।
सिषक्त्यूधर्निण्योरुपस्थ उत्सस्य मध्ये निहितं पदं वेः ॥
Samhita Transcription Accented
ékaḥ samudró dharúṇo rayīṇā́masmáddhṛdó bhū́rijanmā ví caṣṭe ǀ
síṣaktyū́dharniṇyórupástha útsasya mádhye níhitam padám veḥ ǁ
Samhita Transcription Nonaccented
ekaḥ samudro dharuṇo rayīṇāmasmaddhṛdo bhūrijanmā vi caṣṭe ǀ
siṣaktyūdharniṇyorupastha utsasya madhye nihitam padam veḥ ǁ
Padapatha Devanagari Accented
एकः॑ । स॒मु॒द्रः । ध॒रुणः॑ । र॒यी॒णाम् । अ॒स्मत् । हृ॒दः । भूरि॑ऽजन्मा । वि । च॒ष्टे॒ ।
सिस॑क्ति । ऊधः॑ । नि॒ण्योः । उ॒पऽस्थे॑ । उत्स॑स्य । मध्ये॑ । निऽहि॑तम् । प॒दम् । वेरिति॒ वेः ॥
Padapatha Devanagari Nonaccented
एकः । समुद्रः । धरुणः । रयीणाम् । अस्मत् । हृदः । भूरिऽजन्मा । वि । चष्टे ।
सिसक्ति । ऊधः । निण्योः । उपऽस्थे । उत्सस्य । मध्ये । निऽहितम् । पदम् । वेरिति वेः ॥
Padapatha Transcription Accented
ékaḥ ǀ samudráḥ ǀ dharúṇaḥ ǀ rayīṇā́m ǀ asmát ǀ hṛdáḥ ǀ bhū́ri-janmā ǀ ví ǀ caṣṭe ǀ
sísakti ǀ ū́dhaḥ ǀ niṇyóḥ ǀ upá-sthe ǀ útsasya ǀ mádhye ǀ ní-hitam ǀ padám ǀ véríti véḥ ǁ
Padapatha Transcription Nonaccented
ekaḥ ǀ samudraḥ ǀ dharuṇaḥ ǀ rayīṇām ǀ asmat ǀ hṛdaḥ ǀ bhūri-janmā ǀ vi ǀ caṣṭe ǀ
sisakti ǀ ūdhaḥ ǀ niṇyoḥ ǀ upa-sthe ǀ utsasya ǀ madhye ǀ ni-hitam ǀ padam ǀ veriti veḥ ǁ
10.005.02 (Mandala. Sukta. Rik)
7.5.33.02 (Ashtaka. Adhyaya. Varga. Rik)
10.01.030 (Mandala. Anuvāka. Rik)
Samhita Devanagari Accented
स॒मा॒नं नी॒ळं वृष॑णो॒ वसा॑नाः॒ सं ज॑ग्मिरे महि॒षा अर्व॑तीभिः ।
ऋ॒तस्य॑ प॒दं क॒वयो॒ नि पां॑ति॒ गुहा॒ नामा॑नि दधिरे॒ परा॑णि ॥
Samhita Devanagari Nonaccented
समानं नीळं वृषणो वसानाः सं जग्मिरे महिषा अर्वतीभिः ।
ऋतस्य पदं कवयो नि पांति गुहा नामानि दधिरे पराणि ॥
Samhita Transcription Accented
samānám nīḷám vṛ́ṣaṇo vásānāḥ sám jagmire mahiṣā́ árvatībhiḥ ǀ
ṛtásya padám kaváyo ní pānti gúhā nā́māni dadhire párāṇi ǁ
Samhita Transcription Nonaccented
samānam nīḷam vṛṣaṇo vasānāḥ sam jagmire mahiṣā arvatībhiḥ ǀ
ṛtasya padam kavayo ni pānti guhā nāmāni dadhire parāṇi ǁ
Padapatha Devanagari Accented
स॒मा॒नम् । नी॒ळम् । वृष॑णः । वसा॑नाः । सम् । ज॒ग्मि॒रे॒ । म॒हि॒षाः । अर्व॑तीभिः ।
ऋ॒तस्य॑ । प॒दम् । क॒वयः॑ । नि । पा॒न्ति॒ । गुहा॑ । नामा॑नि । द॒धि॒रे॒ । परा॑णि ॥
Padapatha Devanagari Nonaccented
समानम् । नीळम् । वृषणः । वसानाः । सम् । जग्मिरे । महिषाः । अर्वतीभिः ।
ऋतस्य । पदम् । कवयः । नि । पान्ति । गुहा । नामानि । दधिरे । पराणि ॥
Padapatha Transcription Accented
samānám ǀ nīḷám ǀ vṛ́ṣaṇaḥ ǀ vásānāḥ ǀ sám ǀ jagmire ǀ mahiṣā́ḥ ǀ árvatībhiḥ ǀ
ṛtásya ǀ padám ǀ kaváyaḥ ǀ ní ǀ pānti ǀ gúhā ǀ nā́māni ǀ dadhire ǀ párāṇi ǁ
Padapatha Transcription Nonaccented
samānam ǀ nīḷam ǀ vṛṣaṇaḥ ǀ vasānāḥ ǀ sam ǀ jagmire ǀ mahiṣāḥ ǀ arvatībhiḥ ǀ
ṛtasya ǀ padam ǀ kavayaḥ ǀ ni ǀ pānti ǀ guhā ǀ nāmāni ǀ dadhire ǀ parāṇi ǁ
10.005.03 (Mandala. Sukta. Rik)
7.5.33.03 (Ashtaka. Adhyaya. Varga. Rik)
10.01.031 (Mandala. Anuvāka. Rik)
Samhita Devanagari Accented
ऋ॒ता॒यिनी॑ मा॒यिनी॒ सं द॑धाते मि॒त्वा शिशुं॑ जज्ञतुर्व॒र्धयं॑ती ।
विश्व॑स्य॒ नाभिं॒ चर॑तो ध्रु॒वस्य॑ क॒वेश्चि॒त्तंतुं॒ मन॑सा वि॒यंतः॑ ॥
Samhita Devanagari Nonaccented
ऋतायिनी मायिनी सं दधाते मित्वा शिशुं जज्ञतुर्वर्धयंती ।
विश्वस्य नाभिं चरतो ध्रुवस्य कवेश्चित्तंतुं मनसा वियंतः ॥
Samhita Transcription Accented
ṛtāyínī māyínī sám dadhāte mitvā́ śíśum jajñaturvardháyantī ǀ
víśvasya nā́bhim cárato dhruvásya kavéścittántum mánasā viyántaḥ ǁ
Samhita Transcription Nonaccented
ṛtāyinī māyinī sam dadhāte mitvā śiśum jajñaturvardhayantī ǀ
viśvasya nābhim carato dhruvasya kaveścittantum manasā viyantaḥ ǁ
Padapatha Devanagari Accented
ऋ॒त॒यिनी॒ इत्यृ॑त॒ऽयिनी॑ । मा॒यिनी॒ इति॑ । सम् । द॒धा॒ते॒ इति॑ । मि॒त्वा । शिशु॑म् । ज॒ज्ञ॒तुः॒ । व॒र्धय॑न्ती॒ इति॑ ।
विश्व॑स्य । नाभि॑म् । चर॑तः । ध्रु॒वस्य॑ । क॒वेः । चि॒त् । तन्तु॑म् । मन॑सा । वि॒ऽयन्तः॑ ॥
Padapatha Devanagari Nonaccented
ऋतयिनी इत्यृतऽयिनी । मायिनी इति । सम् । दधाते इति । मित्वा । शिशुम् । जज्ञतुः । वर्धयन्ती इति ।
विश्वस्य । नाभिम् । चरतः । ध्रुवस्य । कवेः । चित् । तन्तुम् । मनसा । विऽयन्तः ॥
Padapatha Transcription Accented
ṛtayínī ítyṛta-yínī ǀ māyínī íti ǀ sám ǀ dadhāte íti ǀ mitvā́ ǀ śíśum ǀ jajñatuḥ ǀ vardháyantī íti ǀ
víśvasya ǀ nā́bhim ǀ cárataḥ ǀ dhruvásya ǀ kavéḥ ǀ cit ǀ tántum ǀ mánasā ǀ vi-yántaḥ ǁ
Padapatha Transcription Nonaccented
ṛtayinī ityṛta-yinī ǀ māyinī iti ǀ sam ǀ dadhāte iti ǀ mitvā ǀ śiśum ǀ jajñatuḥ ǀ vardhayantī iti ǀ
viśvasya ǀ nābhim ǀ carataḥ ǀ dhruvasya ǀ kaveḥ ǀ cit ǀ tantum ǀ manasā ǀ vi-yantaḥ ǁ
10.005.04 (Mandala. Sukta. Rik)
7.5.33.04 (Ashtaka. Adhyaya. Varga. Rik)
10.01.032 (Mandala. Anuvāka. Rik)
Samhita Devanagari Accented
ऋ॒तस्य॒ हि व॑र्त॒नयः॒ सुजा॑त॒मिषो॒ वाजा॑य प्र॒दिवः॒ सचं॑ते ।
अ॒धी॒वा॒सं रोद॑सी वावसा॒ने घृ॒तैरन्नै॑र्वावृधाते॒ मधू॑नां ॥
Samhita Devanagari Nonaccented
ऋतस्य हि वर्तनयः सुजातमिषो वाजाय प्रदिवः सचंते ।
अधीवासं रोदसी वावसाने घृतैरन्नैर्वावृधाते मधूनां ॥
Samhita Transcription Accented
ṛtásya hí vartanáyaḥ sújātamíṣo vā́jāya pradívaḥ sácante ǀ
adhīvāsám ródasī vāvasāné ghṛtáiránnairvāvṛdhāte mádhūnām ǁ
Samhita Transcription Nonaccented
ṛtasya hi vartanayaḥ sujātamiṣo vājāya pradivaḥ sacante ǀ
adhīvāsam rodasī vāvasāne ghṛtairannairvāvṛdhāte madhūnām ǁ
Padapatha Devanagari Accented
ऋ॒तस्य॑ । हि । व॒र्त॒नयः॑ । सुऽजा॑तम् । इषः॑ । वाजा॑य । प्र॒ऽदिवः॑ । सच॑न्ते ।
अ॒धी॒वा॒सम् । रोद॑सी॒ इति॑ । व॒व॒सा॒ने इति॑ । घृ॒तैः । अन्नैः॑ । व॒वृ॒धा॒ते॒ इति॑ । मधू॑नाम् ॥
Padapatha Devanagari Nonaccented
ऋतस्य । हि । वर्तनयः । सुऽजातम् । इषः । वाजाय । प्रऽदिवः । सचन्ते ।
अधीवासम् । रोदसी इति । ववसाने इति । घृतैः । अन्नैः । ववृधाते इति । मधूनाम् ॥
Padapatha Transcription Accented
ṛtásya ǀ hí ǀ vartanáyaḥ ǀ sú-jātam ǀ íṣaḥ ǀ vā́jāya ǀ pra-dívaḥ ǀ sácante ǀ
adhīvāsám ǀ ródasī íti ǀ vavasāné íti ǀ ghṛtáiḥ ǀ ánnaiḥ ǀ vavṛdhāte íti ǀ mádhūnām ǁ
Padapatha Transcription Nonaccented
ṛtasya ǀ hi ǀ vartanayaḥ ǀ su-jātam ǀ iṣaḥ ǀ vājāya ǀ pra-divaḥ ǀ sacante ǀ
adhīvāsam ǀ rodasī iti ǀ vavasāne iti ǀ ghṛtaiḥ ǀ annaiḥ ǀ vavṛdhāte iti ǀ madhūnām ǁ
10.005.05 (Mandala. Sukta. Rik)
7.5.33.05 (Ashtaka. Adhyaya. Varga. Rik)
10.01.033 (Mandala. Anuvāka. Rik)
Samhita Devanagari Accented
स॒प्त स्वसॄ॒ररु॑षीर्वावशा॒नो वि॒द्वान्मध्व॒ उज्ज॑भारा दृ॒शे कं ।
अं॒तर्ये॑मे अं॒तरि॑क्षे पुरा॒जा इ॒च्छन्व॒व्रिम॑विदत्पूष॒णस्य॑ ॥
Samhita Devanagari Nonaccented
सप्त स्वसॄररुषीर्वावशानो विद्वान्मध्व उज्जभारा दृशे कं ।
अंतर्येमे अंतरिक्षे पुराजा इच्छन्वव्रिमविदत्पूषणस्य ॥
Samhita Transcription Accented
saptá svásṝráruṣīrvāvaśānó vidvā́nmádhva újjabhārā dṛśé kám ǀ
antáryeme antárikṣe purājā́ icchánvavrímavidatpūṣaṇásya ǁ
Samhita Transcription Nonaccented
sapta svasṝraruṣīrvāvaśāno vidvānmadhva ujjabhārā dṛśe kam ǀ
antaryeme antarikṣe purājā icchanvavrimavidatpūṣaṇasya ǁ
Padapatha Devanagari Accented
स॒प्त । स्वसॄः॑ । अरु॑षीः । वा॒व॒शा॒नः । वि॒द्वान् । मध्वः॑ । उत् । ज॒भा॒र॒ । दृ॒शे । कम् ।
अ॒न्तः । ये॒मे॒ । अ॒न्तरि॑क्षे । पु॒रा॒ऽजाः । इ॒च्छन् । व॒व्रिम् । अ॒वि॒द॒त् । पू॒ष॒णस्य॑ ॥
Padapatha Devanagari Nonaccented
सप्त । स्वसॄः । अरुषीः । वावशानः । विद्वान् । मध्वः । उत् । जभार । दृशे । कम् ।
अन्तः । येमे । अन्तरिक्षे । पुराऽजाः । इच्छन् । वव्रिम् । अविदत् । पूषणस्य ॥
Padapatha Transcription Accented
saptá ǀ svásṝḥ ǀ áruṣīḥ ǀ vāvaśānáḥ ǀ vidvā́n ǀ mádhvaḥ ǀ út ǀ jabhāra ǀ dṛśé ǀ kám ǀ
antáḥ ǀ yeme ǀ antárikṣe ǀ purā-jā́ḥ ǀ icchán ǀ vavrím ǀ avidat ǀ pūṣaṇásya ǁ
Padapatha Transcription Nonaccented
sapta ǀ svasṝḥ ǀ aruṣīḥ ǀ vāvaśānaḥ ǀ vidvān ǀ madhvaḥ ǀ ut ǀ jabhāra ǀ dṛśe ǀ kam ǀ
antaḥ ǀ yeme ǀ antarikṣe ǀ purā-jāḥ ǀ icchan ǀ vavrim ǀ avidat ǀ pūṣaṇasya ǁ
10.005.06 (Mandala. Sukta. Rik)
7.5.33.06 (Ashtaka. Adhyaya. Varga. Rik)
10.01.034 (Mandala. Anuvāka. Rik)
Samhita Devanagari Accented
स॒प्त म॒र्यादाः॑ क॒वय॑स्ततक्षु॒स्तासा॒मेका॒मिद॒भ्यं॑हु॒रो गा॑त् ।
आ॒योर्ह॑ स्कं॒भ उ॑प॒मस्य॑ नी॒ळे प॒थां वि॑स॒र्गे ध॒रुणे॑षु तस्थौ ॥
Samhita Devanagari Nonaccented
सप्त मर्यादाः कवयस्ततक्षुस्तासामेकामिदभ्यंहुरो गात् ।
आयोर्ह स्कंभ उपमस्य नीळे पथां विसर्गे धरुणेषु तस्थौ ॥
Samhita Transcription Accented
saptá maryā́dāḥ kaváyastatakṣustā́sāmékāmídabhyáṃhuró gāt ǀ
āyórha skambhá upamásya nīḷé pathā́m visargé dharúṇeṣu tasthau ǁ
Samhita Transcription Nonaccented
sapta maryādāḥ kavayastatakṣustāsāmekāmidabhyaṃhuro gāt ǀ
āyorha skambha upamasya nīḷe pathām visarge dharuṇeṣu tasthau ǁ
Padapatha Devanagari Accented
स॒प्त । म॒र्यादाः॑ । क॒वयः॑ । त॒त॒क्षुः॒ । तासा॑म् । एका॑म् । इत् । अ॒भि । अं॒हु॒रः । गा॒त् ।
आ॒योः । ह॒ । स्क॒म्भः । उ॒प॒ऽमस्य॑ । नी॒ळे । प॒थाम् । वि॒ऽस॒र्गे । ध॒रुणे॑षु । त॒स्थौ॒ ॥
Padapatha Devanagari Nonaccented
सप्त । मर्यादाः । कवयः । ततक्षुः । तासाम् । एकाम् । इत् । अभि । अंहुरः । गात् ।
आयोः । ह । स्कम्भः । उपऽमस्य । नीळे । पथाम् । विऽसर्गे । धरुणेषु । तस्थौ ॥
Padapatha Transcription Accented
saptá ǀ maryā́dāḥ ǀ kaváyaḥ ǀ tatakṣuḥ ǀ tā́sām ǀ ékām ǀ ít ǀ abhí ǀ aṃhuráḥ ǀ gāt ǀ
āyóḥ ǀ ha ǀ skambháḥ ǀ upa-másya ǀ nīḷé ǀ pathā́m ǀ vi-sargé ǀ dharúṇeṣu ǀ tasthau ǁ
Padapatha Transcription Nonaccented
sapta ǀ maryādāḥ ǀ kavayaḥ ǀ tatakṣuḥ ǀ tāsām ǀ ekām ǀ it ǀ abhi ǀ aṃhuraḥ ǀ gāt ǀ
āyoḥ ǀ ha ǀ skambhaḥ ǀ upa-masya ǀ nīḷe ǀ pathām ǀ vi-sarge ǀ dharuṇeṣu ǀ tasthau ǁ
10.005.07 (Mandala. Sukta. Rik)
7.5.33.07 (Ashtaka. Adhyaya. Varga. Rik)
10.01.035 (Mandala. Anuvāka. Rik)
Samhita Devanagari Accented
अस॑च्च॒ सच्च॑ पर॒मे व्यो॑मं॒दक्ष॑स्य॒ जन्म॒न्नदि॑तेरु॒पस्थे॑ ।
अ॒ग्निर्ह॑ नः प्रथम॒जा ऋ॒तस्य॒ पूर्व॒ आयु॑नि वृष॒भश्च॑ धे॒नुः ॥
Samhita Devanagari Nonaccented
असच्च सच्च परमे व्योमंदक्षस्य जन्मन्नदितेरुपस्थे ।
अग्निर्ह नः प्रथमजा ऋतस्य पूर्व आयुनि वृषभश्च धेनुः ॥
Samhita Transcription Accented
ásacca sácca paramé vyómandákṣasya jánmannáditerupásthe ǀ
agnírha naḥ prathamajā́ ṛtásya pū́rva ā́yuni vṛṣabháśca dhenúḥ ǁ
Samhita Transcription Nonaccented
asacca sacca parame vyomandakṣasya janmannaditerupasthe ǀ
agnirha naḥ prathamajā ṛtasya pūrva āyuni vṛṣabhaśca dhenuḥ ǁ
Padapatha Devanagari Accented
अस॑त् । च॒ । सत् । च॒ । प॒र॒मे । विऽओ॑मन् । दक्ष॑स्य । जन्म॑न् । अदि॑तेः । उ॒पऽस्थे॑ ।
अ॒ग्निः । ह॒ । नः॒ । प्र॒थ॒म॒ऽजाः । ऋ॒तस्य॑ । पूर्वे॑ । आयु॑नि । वृ॒ष॒भः । च॒ । धे॒नुः ॥
Padapatha Devanagari Nonaccented
असत् । च । सत् । च । परमे । विऽओमन् । दक्षस्य । जन्मन् । अदितेः । उपऽस्थे ।
अग्निः । ह । नः । प्रथमऽजाः । ऋतस्य । पूर्वे । आयुनि । वृषभः । च । धेनुः ॥
Padapatha Transcription Accented
ásat ǀ ca ǀ sát ǀ ca ǀ paramé ǀ ví-oman ǀ dákṣasya ǀ jánman ǀ áditeḥ ǀ upá-sthe ǀ
agníḥ ǀ ha ǀ naḥ ǀ prathama-jā́ḥ ǀ ṛtásya ǀ pū́rve ǀ ā́yuni ǀ vṛṣabháḥ ǀ ca ǀ dhenúḥ ǁ
Padapatha Transcription Nonaccented
asat ǀ ca ǀ sat ǀ ca ǀ parame ǀ vi-oman ǀ dakṣasya ǀ janman ǀ aditeḥ ǀ upa-sthe ǀ
agniḥ ǀ ha ǀ naḥ ǀ prathama-jāḥ ǀ ṛtasya ǀ pūrve ǀ āyuni ǀ vṛṣabhaḥ ǀ ca ǀ dhenuḥ ǁ