|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 13
|
1. Info |
| To: | soma carts | |
| From: | havirdhāna āṅgi or vivasvat āditya | |
| Metres: | 1st set of styles: nicṛttriṣṭup (2, 4); pādanicṛttriṣṭup (1); virāṭtrisṭup (3); nicṛjjagatī (5) 2nd set of styles: triṣṭubh (1-4); jagatī (5) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.013.01 (Mandala. Sukta. Rik)
7.6.13.01 (Ashtaka. Adhyaya. Varga. Rik)
10.01.100 (Mandala. Anuvāka. Rik)
Samhita Devanagari Accented
यु॒जे वां॒ ब्रह्म॑ पू॒र्व्यं नमो॑भि॒र्वि श्लोक॑ एतु प॒थ्ये॑व सू॒रेः ।
शृ॒ण्वंतु॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः ॥
Samhita Devanagari Nonaccented
युजे वां ब्रह्म पूर्व्यं नमोभिर्वि श्लोक एतु पथ्येव सूरेः ।
शृण्वंतु विश्वे अमृतस्य पुत्रा आ ये धामानि दिव्यानि तस्थुः ॥
Samhita Transcription Accented
yujé vām bráhma pūrvyám námobhirví ślóka etu pathyéva sūréḥ ǀ
śṛṇvántu víśve amṛ́tasya putrā́ ā́ yé dhā́māni divyā́ni tasthúḥ ǁ
Samhita Transcription Nonaccented
yuje vām brahma pūrvyam namobhirvi śloka etu pathyeva sūreḥ ǀ
śṛṇvantu viśve amṛtasya putrā ā ye dhāmāni divyāni tasthuḥ ǁ
Padapatha Devanagari Accented
यु॒जे । वा॒म् । ब्रह्म॑ । पू॒र्व्यम् । नमः॑ऽभिः । वि । श्लोकः॑ । ए॒तु॒ । प॒थ्या॑ऽइव । सू॒रेः ।
शृ॒ण्वन्तु॑ । विश्वे॑ । अ॒मृत॑स्य । पु॒त्राः । आ । ये । धामा॑नि । दि॒व्यानि॑ । त॒स्थुः ॥
Padapatha Devanagari Nonaccented
युजे । वाम् । ब्रह्म । पूर्व्यम् । नमःऽभिः । वि । श्लोकः । एतु । पथ्याऽइव । सूरेः ।
शृण्वन्तु । विश्वे । अमृतस्य । पुत्राः । आ । ये । धामानि । दिव्यानि । तस्थुः ॥
Padapatha Transcription Accented
yujé ǀ vām ǀ bráhma ǀ pūrvyám ǀ námaḥ-bhiḥ ǀ ví ǀ ślókaḥ ǀ etu ǀ pathyā́-iva ǀ sūréḥ ǀ
śṛṇvántu ǀ víśve ǀ amṛ́tasya ǀ putrā́ḥ ǀ ā́ ǀ yé ǀ dhā́māni ǀ divyā́ni ǀ tasthúḥ ǁ
Padapatha Transcription Nonaccented
yuje ǀ vām ǀ brahma ǀ pūrvyam ǀ namaḥ-bhiḥ ǀ vi ǀ ślokaḥ ǀ etu ǀ pathyā-iva ǀ sūreḥ ǀ
śṛṇvantu ǀ viśve ǀ amṛtasya ǀ putrāḥ ǀ ā ǀ ye ǀ dhāmāni ǀ divyāni ǀ tasthuḥ ǁ
10.013.02 (Mandala. Sukta. Rik)
7.6.13.02 (Ashtaka. Adhyaya. Varga. Rik)
10.01.101 (Mandala. Anuvāka. Rik)
Samhita Devanagari Accented
य॒मे इ॑व॒ यत॑माने॒ यदैतं॒ प्र वां॑ भर॒न्मानु॑षा देव॒यंतः॑ ।
आ सी॑दतं॒ स्वमु॑ लो॒कं विदा॑ने स्वास॒स्थे भ॑वत॒मिंद॑वे नः ॥
Samhita Devanagari Nonaccented
यमे इव यतमाने यदैतं प्र वां भरन्मानुषा देवयंतः ।
आ सीदतं स्वमु लोकं विदाने स्वासस्थे भवतमिंदवे नः ॥
Samhita Transcription Accented
yamé iva yátamāne yádáitam prá vām bharanmā́nuṣā devayántaḥ ǀ
ā́ sīdatam svámu lokám vídāne svāsasthé bhavatamíndave naḥ ǁ
Samhita Transcription Nonaccented
yame iva yatamāne yadaitam pra vām bharanmānuṣā devayantaḥ ǀ
ā sīdatam svamu lokam vidāne svāsasthe bhavatamindave naḥ ǁ
Padapatha Devanagari Accented
य॒मे इ॒वेति॑ य॒मेऽइ॑व । यत॑माने॒ इति॑ । यत् । ऐत॑म् । प्र । वा॒म् । भ॒र॒न् । मानु॑षाः । दे॒व॒ऽयन्तः॑ ।
आ । सी॒द॒त॒म् । स्वम् । ऊं॒ इति॑ । लो॒कम् । विदा॑ने॒ इति॑ । स्वा॒स॒स्थे इति॑ सु॒ऽआ॒स॒स्थे । भ॒व॒त॒म् । इन्द॑वे । नः॒ ॥
Padapatha Devanagari Nonaccented
यमे इवेति यमेऽइव । यतमाने इति । यत् । ऐतम् । प्र । वाम् । भरन् । मानुषाः । देवऽयन्तः ।
आ । सीदतम् । स्वम् । ऊं इति । लोकम् । विदाने इति । स्वासस्थे इति सुऽआसस्थे । भवतम् । इन्दवे । नः ॥
Padapatha Transcription Accented
yamé ivéti yamé-iva ǀ yátamāne íti ǀ yát ǀ áitam ǀ prá ǀ vām ǀ bharan ǀ mā́nuṣāḥ ǀ deva-yántaḥ ǀ
ā́ ǀ sīdatam ǀ svám ǀ ūṃ íti ǀ lokám ǀ vídāne íti ǀ svāsasthé íti su-āsasthé ǀ bhavatam ǀ índave ǀ naḥ ǁ
Padapatha Transcription Nonaccented
yame iveti yame-iva ǀ yatamāne iti ǀ yat ǀ aitam ǀ pra ǀ vām ǀ bharan ǀ mānuṣāḥ ǀ deva-yantaḥ ǀ
ā ǀ sīdatam ǀ svam ǀ ūṃ iti ǀ lokam ǀ vidāne iti ǀ svāsasthe iti su-āsasthe ǀ bhavatam ǀ indave ǀ naḥ ǁ
10.013.03 (Mandala. Sukta. Rik)
7.6.13.03 (Ashtaka. Adhyaya. Varga. Rik)
10.01.102 (Mandala. Anuvāka. Rik)
Samhita Devanagari Accented
पंच॑ प॒दानि॑ रु॒पो अन्व॑रोहं॒ चतु॑ष्पदी॒मन्वे॑मि व्र॒तेन॑ ।
अ॒क्षरे॑ण॒ प्रति॑ मिम ए॒तामृ॒तस्य॒ नाभा॒वधि॒ सं पु॑नामि ॥
Samhita Devanagari Nonaccented
पंच पदानि रुपो अन्वरोहं चतुष्पदीमन्वेमि व्रतेन ।
अक्षरेण प्रति मिम एतामृतस्य नाभावधि सं पुनामि ॥
Samhita Transcription Accented
páñca padā́ni rupó ánvaroham cátuṣpadīmánvemi vraténa ǀ
akṣáreṇa práti mima etā́mṛtásya nā́bhāvádhi sám punāmi ǁ
Samhita Transcription Nonaccented
pañca padāni rupo anvaroham catuṣpadīmanvemi vratena ǀ
akṣareṇa prati mima etāmṛtasya nābhāvadhi sam punāmi ǁ
Padapatha Devanagari Accented
पञ्च॑ । प॒दानि॑ । रु॒पः । अनु॑ । अ॒रो॒ह॒म् । चतुः॑ऽपदीम् । अनु॑ । ए॒मि॒ । व्र॒तेन॑ ।
अ॒क्षरे॑ण । प्रति॑ । मि॒मे॒ । ए॒ताम् । ऋ॒तस्य॑ । नाभौ॑ । अधि॑ । सम् । पु॒ना॒मि॒ ॥
Padapatha Devanagari Nonaccented
पञ्च । पदानि । रुपः । अनु । अरोहम् । चतुःऽपदीम् । अनु । एमि । व्रतेन ।
अक्षरेण । प्रति । मिमे । एताम् । ऋतस्य । नाभौ । अधि । सम् । पुनामि ॥
Padapatha Transcription Accented
páñca ǀ padā́ni ǀ rupáḥ ǀ ánu ǀ aroham ǀ cátuḥ-padīm ǀ ánu ǀ emi ǀ vraténa ǀ
akṣáreṇa ǀ práti ǀ mime ǀ etā́m ǀ ṛtásya ǀ nā́bhau ǀ ádhi ǀ sám ǀ punāmi ǁ
Padapatha Transcription Nonaccented
pañca ǀ padāni ǀ rupaḥ ǀ anu ǀ aroham ǀ catuḥ-padīm ǀ anu ǀ emi ǀ vratena ǀ
akṣareṇa ǀ prati ǀ mime ǀ etām ǀ ṛtasya ǀ nābhau ǀ adhi ǀ sam ǀ punāmi ǁ
10.013.04 (Mandala. Sukta. Rik)
7.6.13.04 (Ashtaka. Adhyaya. Varga. Rik)
10.01.103 (Mandala. Anuvāka. Rik)
Samhita Devanagari Accented
दे॒वेभ्यः॒ कम॑वृणीत मृ॒त्युं प्र॒जायै॒ कम॒मृतं॒ नावृ॑णीत ।
बृह॒स्पतिं॑ य॒ज्ञम॑कृण्वत॒ ऋषिं॑ प्रि॒यां य॒मस्त॒न्वं१॒॑ प्रारि॑रेचीत् ॥
Samhita Devanagari Nonaccented
देवेभ्यः कमवृणीत मृत्युं प्रजायै कममृतं नावृणीत ।
बृहस्पतिं यज्ञमकृण्वत ऋषिं प्रियां यमस्तन्वं प्रारिरेचीत् ॥
Samhita Transcription Accented
devébhyaḥ kámavṛṇīta mṛtyúm prajā́yai kámamṛ́tam nā́vṛṇīta ǀ
bṛ́haspátim yajñámakṛṇvata ṛ́ṣim priyā́m yamástanvám prā́rirecīt ǁ
Samhita Transcription Nonaccented
devebhyaḥ kamavṛṇīta mṛtyum prajāyai kamamṛtam nāvṛṇīta ǀ
bṛhaspatim yajñamakṛṇvata ṛṣim priyām yamastanvam prārirecīt ǁ
Padapatha Devanagari Accented
दे॒वेभ्यः॑ । कम् । अ॒वृ॒णी॒त॒ । मृ॒त्युम् । प्र॒ऽजायै॑ । कम् । अ॒मृत॑म् । न । अ॒वृ॒णी॒त॒ ।
बृह॒स्पति॑म् । य॒ज्ञम् । अ॒कृ॒ण्व॒त॒ । ऋषि॑म् । प्रि॒याम् । य॒मः । त॒न्व॑म् । प्र । अ॒रि॒रे॒ची॒त् ॥
Padapatha Devanagari Nonaccented
देवेभ्यः । कम् । अवृणीत । मृत्युम् । प्रऽजायै । कम् । अमृतम् । न । अवृणीत ।
बृहस्पतिम् । यज्ञम् । अकृण्वत । ऋषिम् । प्रियाम् । यमः । तन्वम् । प्र । अरिरेचीत् ॥
Padapatha Transcription Accented
devébhyaḥ ǀ kám ǀ avṛṇīta ǀ mṛtyúm ǀ pra-jā́yai ǀ kám ǀ amṛ́tam ǀ ná ǀ avṛṇīta ǀ
bṛ́haspátim ǀ yajñám ǀ akṛṇvata ǀ ṛ́ṣim ǀ priyā́m ǀ yamáḥ ǀ tanvám ǀ prá ǀ arirecīt ǁ
Padapatha Transcription Nonaccented
devebhyaḥ ǀ kam ǀ avṛṇīta ǀ mṛtyum ǀ pra-jāyai ǀ kam ǀ amṛtam ǀ na ǀ avṛṇīta ǀ
bṛhaspatim ǀ yajñam ǀ akṛṇvata ǀ ṛṣim ǀ priyām ǀ yamaḥ ǀ tanvam ǀ pra ǀ arirecīt ǁ
10.013.05 (Mandala. Sukta. Rik)
7.6.13.05 (Ashtaka. Adhyaya. Varga. Rik)
10.01.104 (Mandala. Anuvāka. Rik)
Samhita Devanagari Accented
स॒प्त क्ष॑रंति॒ शिश॑वे म॒रुत्व॑ते पि॒त्रे पु॒त्रासो॒ अप्य॑वीवतन्नृ॒तं ।
उ॒भे इद॑स्यो॒भय॑स्य राजत उ॒भे य॑तेते उ॒भय॑स्य पुष्यतः ॥
Samhita Devanagari Nonaccented
सप्त क्षरंति शिशवे मरुत्वते पित्रे पुत्रासो अप्यवीवतन्नृतं ।
उभे इदस्योभयस्य राजत उभे यतेते उभयस्य पुष्यतः ॥
Samhita Transcription Accented
saptá kṣaranti śíśave marútvate pitré putrā́so ápyavīvatannṛtám ǀ
ubhé ídasyobháyasya rājata ubhé yatete ubháyasya puṣyataḥ ǁ
Samhita Transcription Nonaccented
sapta kṣaranti śiśave marutvate pitre putrāso apyavīvatannṛtam ǀ
ubhe idasyobhayasya rājata ubhe yatete ubhayasya puṣyataḥ ǁ
Padapatha Devanagari Accented
स॒प्त । क्ष॒र॒न्ति॒ । शिश॑वे । म॒रुत्व॑ते । पि॒त्रे । पु॒त्रासः॑ । अपि॑ । अ॒वी॒व॒त॒न् । ऋ॒तम् ।
उ॒भे इति॑ । इत् । अ॒स्य॒ । उ॒भय॑स्य । रा॒ज॒तः॒ । उ॒भे इति॑ । य॒ते॒ते॒ इति॑ । उ॒भय॑स्य । पु॒ष्य॒तः॒ ॥
Padapatha Devanagari Nonaccented
सप्त । क्षरन्ति । शिशवे । मरुत्वते । पित्रे । पुत्रासः । अपि । अवीवतन् । ऋतम् ।
उभे इति । इत् । अस्य । उभयस्य । राजतः । उभे इति । यतेते इति । उभयस्य । पुष्यतः ॥
Padapatha Transcription Accented
saptá ǀ kṣaranti ǀ śíśave ǀ marútvate ǀ pitré ǀ putrā́saḥ ǀ ápi ǀ avīvatan ǀ ṛtám ǀ
ubhé íti ǀ ít ǀ asya ǀ ubháyasya ǀ rājataḥ ǀ ubhé íti ǀ yatete íti ǀ ubháyasya ǀ puṣyataḥ ǁ
Padapatha Transcription Nonaccented
sapta ǀ kṣaranti ǀ śiśave ǀ marutvate ǀ pitre ǀ putrāsaḥ ǀ api ǀ avīvatan ǀ ṛtam ǀ
ubhe iti ǀ it ǀ asya ǀ ubhayasya ǀ rājataḥ ǀ ubhe iti ǀ yatete iti ǀ ubhayasya ǀ puṣyataḥ ǁ