|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 15
|
1. Info |
| To: | pitaraḥ | |
| From: | śaṅkha yāmāyana | |
| Metres: | 1st set of styles: virāṭtrisṭup (1, 2, 7, 12-14); triṣṭup (3, 9, 10); pādanicṛttriṣṭup (4, 8); nicṛdārcītriṣṭup (5); nicṛttriṣṭup (6); nicṛjjagatī (11) 2nd set of styles: triṣṭubh (1-10, 12-14); jagatī (11) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.015.01 (Mandala. Sukta. Rik)
7.6.17.01 (Ashtaka. Adhyaya. Varga. Rik)
10.01.121 (Mandala. Anuvāka. Rik)
Samhita Devanagari Accented
उदी॑रता॒मव॑र॒ उत्परा॑स॒ उन्म॑ध्य॒माः पि॒तरः॑ सो॒म्यासः॑ ।
असुं॒ य ई॒युर॑वृ॒का ऋ॑त॒ज्ञास्ते नो॑ऽवंतु पि॒तरो॒ हवे॑षु ॥
Samhita Devanagari Nonaccented
उदीरतामवर उत्परास उन्मध्यमाः पितरः सोम्यासः ।
असुं य ईयुरवृका ऋतज्ञास्ते नोऽवंतु पितरो हवेषु ॥
Samhita Transcription Accented
údīratāmávara útpárāsa únmadhyamā́ḥ pitáraḥ somyā́saḥ ǀ
ásum yá īyúravṛkā́ ṛtajñā́sté no’vantu pitáro háveṣu ǁ
Samhita Transcription Nonaccented
udīratāmavara utparāsa unmadhyamāḥ pitaraḥ somyāsaḥ ǀ
asum ya īyuravṛkā ṛtajñāste no’vantu pitaro haveṣu ǁ
Padapatha Devanagari Accented
उत् । ई॒र॒ता॒म् । अव॑रे । उत् । परा॑सः । उत् । म॒ध्य॒माः । पि॒तरः॑ । सो॒म्यासः॑ ।
असु॑म् । ये । ई॒युः । अ॒वृ॒काः । ऋ॒त॒ऽज्ञाः । ते । नः॒ । अ॒व॒न्तु॒ । पि॒तरः॑ । हवे॑षु ॥
Padapatha Devanagari Nonaccented
उत् । ईरताम् । अवरे । उत् । परासः । उत् । मध्यमाः । पितरः । सोम्यासः ।
असुम् । ये । ईयुः । अवृकाः । ऋतऽज्ञाः । ते । नः । अवन्तु । पितरः । हवेषु ॥
Padapatha Transcription Accented
út ǀ īratām ǀ ávare ǀ út ǀ párāsaḥ ǀ út ǀ madhyamā́ḥ ǀ pitáraḥ ǀ somyā́saḥ ǀ
ásum ǀ yé ǀ īyúḥ ǀ avṛkā́ḥ ǀ ṛta-jñā́ḥ ǀ té ǀ naḥ ǀ avantu ǀ pitáraḥ ǀ háveṣu ǁ
Padapatha Transcription Nonaccented
ut ǀ īratām ǀ avare ǀ ut ǀ parāsaḥ ǀ ut ǀ madhyamāḥ ǀ pitaraḥ ǀ somyāsaḥ ǀ
asum ǀ ye ǀ īyuḥ ǀ avṛkāḥ ǀ ṛta-jñāḥ ǀ te ǀ naḥ ǀ avantu ǀ pitaraḥ ǀ haveṣu ǁ
10.015.02 (Mandala. Sukta. Rik)
7.6.17.02 (Ashtaka. Adhyaya. Varga. Rik)
10.01.122 (Mandala. Anuvāka. Rik)
Samhita Devanagari Accented
इ॒दं पि॒तृभ्यो॒ नमो॑ अस्त्व॒द्य ये पूर्वा॑सो॒ य उप॑रास ई॒युः ।
ये पार्थि॑वे॒ रज॒स्या निष॑त्ता॒ ये वा॑ नू॒नं सु॑वृ॒जना॑सु वि॒क्षु ॥
Samhita Devanagari Nonaccented
इदं पितृभ्यो नमो अस्त्वद्य ये पूर्वासो य उपरास ईयुः ।
ये पार्थिवे रजस्या निषत्ता ये वा नूनं सुवृजनासु विक्षु ॥
Samhita Transcription Accented
idám pitṛ́bhyo námo astvadyá yé pū́rvāso yá úparāsa īyúḥ ǀ
yé pā́rthive rájasyā́ níṣattā yé vā nūnám suvṛjánāsu vikṣú ǁ
Samhita Transcription Nonaccented
idam pitṛbhyo namo astvadya ye pūrvāso ya uparāsa īyuḥ ǀ
ye pārthive rajasyā niṣattā ye vā nūnam suvṛjanāsu vikṣu ǁ
Padapatha Devanagari Accented
इ॒दम् । पि॒तृऽभ्यः॑ । नमः॑ । अ॒स्तु॒ । अ॒द्य । ये । पूर्वा॑सः । ये । उप॑रासः । ई॒युः ।
ये । पार्थि॑वे । रज॑सि । आ । निऽस॑त्ताः । ये । वा॒ । नू॒नम् । सु॒ऽवृ॒जना॑सु । वि॒क्षु ॥
Padapatha Devanagari Nonaccented
इदम् । पितृऽभ्यः । नमः । अस्तु । अद्य । ये । पूर्वासः । ये । उपरासः । ईयुः ।
ये । पार्थिवे । रजसि । आ । निऽसत्ताः । ये । वा । नूनम् । सुऽवृजनासु । विक्षु ॥
Padapatha Transcription Accented
idám ǀ pitṛ́-bhyaḥ ǀ námaḥ ǀ astu ǀ adyá ǀ yé ǀ pū́rvāsaḥ ǀ yé ǀ úparāsaḥ ǀ īyúḥ ǀ
yé ǀ pā́rthive ǀ rájasi ǀ ā́ ǀ ní-sattāḥ ǀ yé ǀ vā ǀ nūnám ǀ su-vṛjánāsu ǀ vikṣú ǁ
Padapatha Transcription Nonaccented
idam ǀ pitṛ-bhyaḥ ǀ namaḥ ǀ astu ǀ adya ǀ ye ǀ pūrvāsaḥ ǀ ye ǀ uparāsaḥ ǀ īyuḥ ǀ
ye ǀ pārthive ǀ rajasi ǀ ā ǀ ni-sattāḥ ǀ ye ǀ vā ǀ nūnam ǀ su-vṛjanāsu ǀ vikṣu ǁ
10.015.03 (Mandala. Sukta. Rik)
7.6.17.03 (Ashtaka. Adhyaya. Varga. Rik)
10.01.123 (Mandala. Anuvāka. Rik)
Samhita Devanagari Accented
आहं पि॒तॄन्त्सु॑वि॒दत्राँ॑ अवित्सि॒ नपा॑तं च वि॒क्रम॑णं च॒ विष्णोः॑ ।
ब॒र्हि॒षदो॒ ये स्व॒धया॑ सु॒तस्य॒ भजं॑त पि॒त्वस्त इ॒हाग॑मिष्ठाः ॥
Samhita Devanagari Nonaccented
आहं पितॄन्त्सुविदत्राँ अवित्सि नपातं च विक्रमणं च विष्णोः ।
बर्हिषदो ये स्वधया सुतस्य भजंत पित्वस्त इहागमिष्ठाः ॥
Samhita Transcription Accented
ā́hám pitṝ́ntsuvidátrām̐ avitsi nápātam ca vikrámaṇam ca víṣṇoḥ ǀ
barhiṣádo yé svadháyā sutásya bhájanta pitvástá ihā́gamiṣṭhāḥ ǁ
Samhita Transcription Nonaccented
āham pitṝntsuvidatrām̐ avitsi napātam ca vikramaṇam ca viṣṇoḥ ǀ
barhiṣado ye svadhayā sutasya bhajanta pitvasta ihāgamiṣṭhāḥ ǁ
Padapatha Devanagari Accented
आ । अ॒हम् । पि॒तॄन् । सु॒ऽवि॒दत्रा॑न् । अ॒वि॒त्सि॒ । नपा॑तम् । च॒ । वि॒ऽक्रम॑णम् । च॒ । विष्णोः॑ ।
ब॒र्हि॒ऽसदः॑ । ये । स्व॒धया॑ । सु॒तस्य॑ । भज॑न्त । पि॒त्वः । ते । इ॒ह । आऽग॑मिष्ठाः ॥
Padapatha Devanagari Nonaccented
आ । अहम् । पितॄन् । सुऽविदत्रान् । अवित्सि । नपातम् । च । विऽक्रमणम् । च । विष्णोः ।
बर्हिऽसदः । ये । स्वधया । सुतस्य । भजन्त । पित्वः । ते । इह । आऽगमिष्ठाः ॥
Padapatha Transcription Accented
ā́ ǀ ahám ǀ pitṝ́n ǀ su-vidátrān ǀ avitsi ǀ nápātam ǀ ca ǀ vi-krámaṇam ǀ ca ǀ víṣṇoḥ ǀ
barhi-sádaḥ ǀ yé ǀ svadháyā ǀ sutásya ǀ bhájanta ǀ pitváḥ ǀ té ǀ ihá ǀ ā́-gamiṣṭhāḥ ǁ
Padapatha Transcription Nonaccented
ā ǀ aham ǀ pitṝn ǀ su-vidatrān ǀ avitsi ǀ napātam ǀ ca ǀ vi-kramaṇam ǀ ca ǀ viṣṇoḥ ǀ
barhi-sadaḥ ǀ ye ǀ svadhayā ǀ sutasya ǀ bhajanta ǀ pitvaḥ ǀ te ǀ iha ǀ ā-gamiṣṭhāḥ ǁ
10.015.04 (Mandala. Sukta. Rik)
7.6.17.04 (Ashtaka. Adhyaya. Varga. Rik)
10.01.124 (Mandala. Anuvāka. Rik)
Samhita Devanagari Accented
बर्हि॑षदः पितर ऊ॒त्य१॒॑र्वागि॒मा वो॑ ह॒व्या च॑कृमा जु॒षध्वं॑ ।
त आ ग॒ताव॑सा॒ शंत॑मे॒नाथा॑ नः॒ शं योर॑र॒पो द॑धात ॥
Samhita Devanagari Nonaccented
बर्हिषदः पितर ऊत्यर्वागिमा वो हव्या चकृमा जुषध्वं ।
त आ गतावसा शंतमेनाथा नः शं योररपो दधात ॥
Samhita Transcription Accented
bárhiṣadaḥ pitara ūtyárvā́gimā́ vo havyā́ cakṛmā juṣádhvam ǀ
tá ā́ gatā́vasā śáṃtamenā́thā naḥ śám yórarapó dadhāta ǁ
Samhita Transcription Nonaccented
barhiṣadaḥ pitara ūtyarvāgimā vo havyā cakṛmā juṣadhvam ǀ
ta ā gatāvasā śaṃtamenāthā naḥ śam yorarapo dadhāta ǁ
Padapatha Devanagari Accented
बर्हि॑ऽसदः । पि॒त॒रः॒ । ऊ॒ती । अ॒र्वाक् । इ॒मा । वः॒ । ह॒व्या । च॒कृ॒म॒ । जु॒षध्व॑म् ।
ते । आ । ग॒त॒ । अव॑सा । शम्ऽत॑मेन । अथ॑ । नः॒ । शम् । योः । अ॒र॒पः । द॒धा॒त॒ ॥
Padapatha Devanagari Nonaccented
बर्हिऽसदः । पितरः । ऊती । अर्वाक् । इमा । वः । हव्या । चकृम । जुषध्वम् ।
ते । आ । गत । अवसा । शम्ऽतमेन । अथ । नः । शम् । योः । अरपः । दधात ॥
Padapatha Transcription Accented
bárhi-sadaḥ ǀ pitaraḥ ǀ ūtī́ ǀ arvā́k ǀ imā́ ǀ vaḥ ǀ havyā́ ǀ cakṛma ǀ juṣádhvam ǀ
té ǀ ā́ ǀ gata ǀ ávasā ǀ śám-tamena ǀ átha ǀ naḥ ǀ śám ǀ yóḥ ǀ arapáḥ ǀ dadhāta ǁ
Padapatha Transcription Nonaccented
barhi-sadaḥ ǀ pitaraḥ ǀ ūtī ǀ arvāk ǀ imā ǀ vaḥ ǀ havyā ǀ cakṛma ǀ juṣadhvam ǀ
te ǀ ā ǀ gata ǀ avasā ǀ śam-tamena ǀ atha ǀ naḥ ǀ śam ǀ yoḥ ǀ arapaḥ ǀ dadhāta ǁ
10.015.05 (Mandala. Sukta. Rik)
7.6.17.05 (Ashtaka. Adhyaya. Varga. Rik)
10.01.125 (Mandala. Anuvāka. Rik)
Samhita Devanagari Accented
उप॑हूताः पि॒तरः॑ सो॒म्यासो॑ बर्हि॒ष्ये॑षु नि॒धिषु॑ प्रि॒येषु॑ ।
त आ ग॑मंतु॒ त इ॒ह श्रु॑वं॒त्वधि॑ ब्रुवंतु॒ ते॑ऽवंत्व॒स्मान् ॥
Samhita Devanagari Nonaccented
उपहूताः पितरः सोम्यासो बर्हिष्येषु निधिषु प्रियेषु ।
त आ गमंतु त इह श्रुवंत्वधि ब्रुवंतु तेऽवंत्वस्मान् ॥
Samhita Transcription Accented
úpahūtāḥ pitáraḥ somyā́so barhiṣyéṣu nidhíṣu priyéṣu ǀ
tá ā́ gamantu tá ihá śruvantvádhi bruvantu té’vantvasmā́n ǁ
Samhita Transcription Nonaccented
upahūtāḥ pitaraḥ somyāso barhiṣyeṣu nidhiṣu priyeṣu ǀ
ta ā gamantu ta iha śruvantvadhi bruvantu te’vantvasmān ǁ
Padapatha Devanagari Accented
उप॑ऽहूताः । पि॒तरः॑ । सो॒म्यासः॑ । ब॒र्हि॒ष्ये॑षु । नि॒ऽधिषु॑ । प्रि॒येषु॑ ।
ते । आ । ग॒म॒न्तु॒ । ते । इ॒ह । श्रु॒व॒न्तु॒ । अधि॑ । ब्रु॒व॒न्तु॒ । ते । अ॒व॒न्तु॒ । अ॒स्मान् ॥
Padapatha Devanagari Nonaccented
उपऽहूताः । पितरः । सोम्यासः । बर्हिष्येषु । निऽधिषु । प्रियेषु ।
ते । आ । गमन्तु । ते । इह । श्रुवन्तु । अधि । ब्रुवन्तु । ते । अवन्तु । अस्मान् ॥
Padapatha Transcription Accented
úpa-hūtāḥ ǀ pitáraḥ ǀ somyā́saḥ ǀ barhiṣyéṣu ǀ ni-dhíṣu ǀ priyéṣu ǀ
té ǀ ā́ ǀ gamantu ǀ té ǀ ihá ǀ śruvantu ǀ ádhi ǀ bruvantu ǀ té ǀ avantu ǀ asmā́n ǁ
Padapatha Transcription Nonaccented
upa-hūtāḥ ǀ pitaraḥ ǀ somyāsaḥ ǀ barhiṣyeṣu ǀ ni-dhiṣu ǀ priyeṣu ǀ
te ǀ ā ǀ gamantu ǀ te ǀ iha ǀ śruvantu ǀ adhi ǀ bruvantu ǀ te ǀ avantu ǀ asmān ǁ
10.015.06 (Mandala. Sukta. Rik)
7.6.18.01 (Ashtaka. Adhyaya. Varga. Rik)
10.01.126 (Mandala. Anuvāka. Rik)
Samhita Devanagari Accented
आच्या॒ जानु॑ दक्षिण॒तो नि॒षद्ये॒मं य॒ज्ञम॒भि गृ॑णीत॒ विश्वे॑ ।
मा हिं॑सिष्ट पितरः॒ केन॑ चिन्नो॒ यद्व॒ आगः॑ पुरु॒षता॒ करा॑म ॥
Samhita Devanagari Nonaccented
आच्या जानु दक्षिणतो निषद्येमं यज्ञमभि गृणीत विश्वे ।
मा हिंसिष्ट पितरः केन चिन्नो यद्व आगः पुरुषता कराम ॥
Samhita Transcription Accented
ā́cyā jā́nu dakṣiṇató niṣádyemám yajñámabhí gṛṇīta víśve ǀ
mā́ hiṃsiṣṭa pitaraḥ kéna cinno yádva ā́gaḥ puruṣátā kárāma ǁ
Samhita Transcription Nonaccented
ācyā jānu dakṣiṇato niṣadyemam yajñamabhi gṛṇīta viśve ǀ
mā hiṃsiṣṭa pitaraḥ kena cinno yadva āgaḥ puruṣatā karāma ǁ
Padapatha Devanagari Accented
आ॒ऽअच्य॑ । जानु॑ । द॒क्षि॒ण॒तः । नि॒ऽसद्य॑ । इ॒मम् । य॒ज्ञम् । अ॒भि । गृ॒णी॒त॒ । विश्वे॑ ।
मा । हिं॒सि॒ष्ट॒ । पि॒त॒रः॒ । केन॑ । चि॒त् । नः॒ । यत् । वः॒ । आगः॑ । पु॒रु॒षता॑ । करा॑म ॥
Padapatha Devanagari Nonaccented
आऽअच्य । जानु । दक्षिणतः । निऽसद्य । इमम् । यज्ञम् । अभि । गृणीत । विश्वे ।
मा । हिंसिष्ट । पितरः । केन । चित् । नः । यत् । वः । आगः । पुरुषता । कराम ॥
Padapatha Transcription Accented
ā-ácya ǀ jā́nu ǀ dakṣiṇatáḥ ǀ ni-sádya ǀ imám ǀ yajñám ǀ abhí ǀ gṛṇīta ǀ víśve ǀ
mā́ ǀ hiṃsiṣṭa ǀ pitaraḥ ǀ kéna ǀ cit ǀ naḥ ǀ yát ǀ vaḥ ǀ ā́gaḥ ǀ puruṣátā ǀ kárāma ǁ
Padapatha Transcription Nonaccented
ā-acya ǀ jānu ǀ dakṣiṇataḥ ǀ ni-sadya ǀ imam ǀ yajñam ǀ abhi ǀ gṛṇīta ǀ viśve ǀ
mā ǀ hiṃsiṣṭa ǀ pitaraḥ ǀ kena ǀ cit ǀ naḥ ǀ yat ǀ vaḥ ǀ āgaḥ ǀ puruṣatā ǀ karāma ǁ
10.015.07 (Mandala. Sukta. Rik)
7.6.18.02 (Ashtaka. Adhyaya. Varga. Rik)
10.01.127 (Mandala. Anuvāka. Rik)
Samhita Devanagari Accented
आसी॑नासो अरु॒णीना॑मु॒पस्थे॑ र॒यिं ध॑त्त दा॒शुषे॒ मर्त्या॑य ।
पु॒त्रेभ्यः॑ पितर॒स्तस्य॒ वस्वः॒ प्र य॑च्छत॒ त इ॒होर्जं॑ दधात ॥
Samhita Devanagari Nonaccented
आसीनासो अरुणीनामुपस्थे रयिं धत्त दाशुषे मर्त्याय ।
पुत्रेभ्यः पितरस्तस्य वस्वः प्र यच्छत त इहोर्जं दधात ॥
Samhita Transcription Accented
ā́sīnāso aruṇī́nāmupásthe rayím dhatta dāśúṣe mártyāya ǀ
putrébhyaḥ pitarastásya vásvaḥ prá yacchata tá ihórjam dadhāta ǁ
Samhita Transcription Nonaccented
āsīnāso aruṇīnāmupasthe rayim dhatta dāśuṣe martyāya ǀ
putrebhyaḥ pitarastasya vasvaḥ pra yacchata ta ihorjam dadhāta ǁ
Padapatha Devanagari Accented
आसी॑नासः । अ॒रु॒णीना॑म् । उ॒पऽस्थे॑ । र॒यिम् । ध॒त्त॒ । दा॒शुषे॑ । मर्त्या॑य ।
पु॒त्रेभ्यः॑ । पि॒त॒रः॒ । तस्य॑ । वस्वः॑ । प्र । य॒च्छ॒त॒ । ते । इ॒ह । ऊर्ज॑म् । द॒धा॒त॒ ॥
Padapatha Devanagari Nonaccented
आसीनासः । अरुणीनाम् । उपऽस्थे । रयिम् । धत्त । दाशुषे । मर्त्याय ।
पुत्रेभ्यः । पितरः । तस्य । वस्वः । प्र । यच्छत । ते । इह । ऊर्जम् । दधात ॥
Padapatha Transcription Accented
ā́sīnāsaḥ ǀ aruṇī́nām ǀ upá-sthe ǀ rayím ǀ dhatta ǀ dāśúṣe ǀ mártyāya ǀ
putrébhyaḥ ǀ pitaraḥ ǀ tásya ǀ vásvaḥ ǀ prá ǀ yacchata ǀ té ǀ ihá ǀ ū́rjam ǀ dadhāta ǁ
Padapatha Transcription Nonaccented
āsīnāsaḥ ǀ aruṇīnām ǀ upa-sthe ǀ rayim ǀ dhatta ǀ dāśuṣe ǀ martyāya ǀ
putrebhyaḥ ǀ pitaraḥ ǀ tasya ǀ vasvaḥ ǀ pra ǀ yacchata ǀ te ǀ iha ǀ ūrjam ǀ dadhāta ǁ
10.015.08 (Mandala. Sukta. Rik)
7.6.18.03 (Ashtaka. Adhyaya. Varga. Rik)
10.01.128 (Mandala. Anuvāka. Rik)
Samhita Devanagari Accented
ये नः॒ पूर्वे॑ पि॒तरः॑ सो॒म्यासो॑ऽनूहि॒रे सो॑मपी॒थं वसि॑ष्ठाः ।
तेभि॑र्य॒मः सं॑ररा॒णो ह॒वींष्यु॒शन्नु॒शद्भिः॑ प्रतिका॒मम॑त्तु ॥
Samhita Devanagari Nonaccented
ये नः पूर्वे पितरः सोम्यासोऽनूहिरे सोमपीथं वसिष्ठाः ।
तेभिर्यमः संरराणो हवींष्युशन्नुशद्भिः प्रतिकाममत्तु ॥
Samhita Transcription Accented
yé naḥ pū́rve pitáraḥ somyā́so’nūhiré somapīthám vásiṣṭhāḥ ǀ
tébhiryamáḥ saṃrarāṇó havī́ṃṣyuśánnuśádbhiḥ pratikāmámattu ǁ
Samhita Transcription Nonaccented
ye naḥ pūrve pitaraḥ somyāso’nūhire somapītham vasiṣṭhāḥ ǀ
tebhiryamaḥ saṃrarāṇo havīṃṣyuśannuśadbhiḥ pratikāmamattu ǁ
Padapatha Devanagari Accented
ये । नः॒ । पूर्वे॑ । पि॒तरः॑ । सो॒म्यासः॑ । अ॒नु॒ऽऊ॒हि॒रे । सो॒म॒ऽपी॒थम् । वसि॑ष्ठाः ।
तेभिः॑ । य॒मः । स॒म्ऽर॒रा॒णः । ह॒वींषि॑ । उ॒शन् । उ॒शत्ऽभिः॑ । प्र॒ति॒ऽका॒मम् । अ॒त्तु॒ ॥
Padapatha Devanagari Nonaccented
ये । नः । पूर्वे । पितरः । सोम्यासः । अनुऽऊहिरे । सोमऽपीथम् । वसिष्ठाः ।
तेभिः । यमः । सम्ऽरराणः । हवींषि । उशन् । उशत्ऽभिः । प्रतिऽकामम् । अत्तु ॥
Padapatha Transcription Accented
yé ǀ naḥ ǀ pū́rve ǀ pitáraḥ ǀ somyā́saḥ ǀ anu-ūhiré ǀ soma-pīthám ǀ vásiṣṭhāḥ ǀ
tébhiḥ ǀ yamáḥ ǀ sam-rarāṇáḥ ǀ havī́ṃṣi ǀ uśán ǀ uśát-bhiḥ ǀ prati-kāmám ǀ attu ǁ
Padapatha Transcription Nonaccented
ye ǀ naḥ ǀ pūrve ǀ pitaraḥ ǀ somyāsaḥ ǀ anu-ūhire ǀ soma-pītham ǀ vasiṣṭhāḥ ǀ
tebhiḥ ǀ yamaḥ ǀ sam-rarāṇaḥ ǀ havīṃṣi ǀ uśan ǀ uśat-bhiḥ ǀ prati-kāmam ǀ attu ǁ
10.015.09 (Mandala. Sukta. Rik)
7.6.18.04 (Ashtaka. Adhyaya. Varga. Rik)
10.01.129 (Mandala. Anuvāka. Rik)
Samhita Devanagari Accented
ये ता॑तृ॒षुर्दे॑व॒त्रा जेह॑माना होत्रा॒विदः॒ स्तोम॑तष्टासो अ॒र्कैः ।
आग्ने॑ याहि सुवि॒दत्रे॑भिर॒र्वाङ्स॒त्यैः क॒व्यैः पि॒तृभि॑र्घर्म॒सद्भिः॑ ॥
Samhita Devanagari Nonaccented
ये तातृषुर्देवत्रा जेहमाना होत्राविदः स्तोमतष्टासो अर्कैः ।
आग्ने याहि सुविदत्रेभिरर्वाङ्सत्यैः कव्यैः पितृभिर्घर्मसद्भिः ॥
Samhita Transcription Accented
yé tātṛṣúrdevatrā́ jéhamānā hotrāvídaḥ stómataṣṭāso arkáiḥ ǀ
ā́gne yāhi suvidátrebhirarvā́ṅsatyáiḥ kavyáiḥ pitṛ́bhirgharmasádbhiḥ ǁ
Samhita Transcription Nonaccented
ye tātṛṣurdevatrā jehamānā hotrāvidaḥ stomataṣṭāso arkaiḥ ǀ
āgne yāhi suvidatrebhirarvāṅsatyaiḥ kavyaiḥ pitṛbhirgharmasadbhiḥ ǁ
Padapatha Devanagari Accented
ये । त॒तृ॒षुः । दे॒व॒ऽत्रा । जेह॑मानाः । हो॒त्रा॒ऽविदः॑ । स्तोम॑ऽतष्टासः । अ॒र्कैः ।
आ । अ॒ग्ने॒ । या॒हि॒ । सु॒ऽवि॒दत्रे॑भिः । अ॒र्वाङ् । स॒त्यैः । क॒व्यैः । पि॒तृऽभिः॑ । घ॒र्म॒सत्ऽभिः॑ ॥
Padapatha Devanagari Nonaccented
ये । ततृषुः । देवऽत्रा । जेहमानाः । होत्राऽविदः । स्तोमऽतष्टासः । अर्कैः ।
आ । अग्ने । याहि । सुऽविदत्रेभिः । अर्वाङ् । सत्यैः । कव्यैः । पितृऽभिः । घर्मसत्ऽभिः ॥
Padapatha Transcription Accented
yé ǀ tatṛṣúḥ ǀ deva-trā́ ǀ jéhamānāḥ ǀ hotrā-vídaḥ ǀ stóma-taṣṭāsaḥ ǀ arkáiḥ ǀ
ā́ ǀ agne ǀ yāhi ǀ su-vidátrebhiḥ ǀ arvā́ṅ ǀ satyáiḥ ǀ kavyáiḥ ǀ pitṛ́-bhiḥ ǀ gharmasát-bhiḥ ǁ
Padapatha Transcription Nonaccented
ye ǀ tatṛṣuḥ ǀ deva-trā ǀ jehamānāḥ ǀ hotrā-vidaḥ ǀ stoma-taṣṭāsaḥ ǀ arkaiḥ ǀ
ā ǀ agne ǀ yāhi ǀ su-vidatrebhiḥ ǀ arvāṅ ǀ satyaiḥ ǀ kavyaiḥ ǀ pitṛ-bhiḥ ǀ gharmasat-bhiḥ ǁ
10.015.10 (Mandala. Sukta. Rik)
7.6.18.05 (Ashtaka. Adhyaya. Varga. Rik)
10.01.130 (Mandala. Anuvāka. Rik)
Samhita Devanagari Accented
ये स॒त्यासो॑ हवि॒रदो॑ हवि॒ष्पा इंद्रे॑ण दे॒वैः स॒रथं॒ दधा॑नाः ।
आग्ने॑ याहि स॒हस्रं॑ देववं॒दैः परैः॒ पूर्वैः॑ पि॒तृभि॑र्घर्म॒सद्भिः॑ ॥
Samhita Devanagari Nonaccented
ये सत्यासो हविरदो हविष्पा इंद्रेण देवैः सरथं दधानाः ।
आग्ने याहि सहस्रं देववंदैः परैः पूर्वैः पितृभिर्घर्मसद्भिः ॥
Samhita Transcription Accented
yé satyā́so havirádo haviṣpā́ índreṇa deváiḥ sarátham dádhānāḥ ǀ
ā́gne yāhi sahásram devavandáiḥ páraiḥ pū́rvaiḥ pitṛ́bhirgharmasádbhiḥ ǁ
Samhita Transcription Nonaccented
ye satyāso havirado haviṣpā indreṇa devaiḥ saratham dadhānāḥ ǀ
āgne yāhi sahasram devavandaiḥ paraiḥ pūrvaiḥ pitṛbhirgharmasadbhiḥ ǁ
Padapatha Devanagari Accented
ये । स॒त्यासः॑ । ह॒विः॒ऽअदः॑ । ह॒विः॒ऽपाः । इन्द्रे॑ण । दे॒वैः । स॒ऽरथ॑म् । दधा॑नाः ।
आ । अ॒ग्ने॒ । या॒हि॒ । स॒हस्र॑म् । दे॒व॒ऽव॒न्दैः । परैः॑ । पूर्वैः॑ । पि॒तृऽभिः॑ । घ॒र्म॒सत्ऽभिः॑ ॥
Padapatha Devanagari Nonaccented
ये । सत्यासः । हविःऽअदः । हविःऽपाः । इन्द्रेण । देवैः । सऽरथम् । दधानाः ।
आ । अग्ने । याहि । सहस्रम् । देवऽवन्दैः । परैः । पूर्वैः । पितृऽभिः । घर्मसत्ऽभिः ॥
Padapatha Transcription Accented
yé ǀ satyā́saḥ ǀ haviḥ-ádaḥ ǀ haviḥ-pā́ḥ ǀ índreṇa ǀ deváiḥ ǀ sa-rátham ǀ dádhānāḥ ǀ
ā́ ǀ agne ǀ yāhi ǀ sahásram ǀ deva-vandáiḥ ǀ páraiḥ ǀ pū́rvaiḥ ǀ pitṛ́-bhiḥ ǀ gharmasát-bhiḥ ǁ
Padapatha Transcription Nonaccented
ye ǀ satyāsaḥ ǀ haviḥ-adaḥ ǀ haviḥ-pāḥ ǀ indreṇa ǀ devaiḥ ǀ sa-ratham ǀ dadhānāḥ ǀ
ā ǀ agne ǀ yāhi ǀ sahasram ǀ deva-vandaiḥ ǀ paraiḥ ǀ pūrvaiḥ ǀ pitṛ-bhiḥ ǀ gharmasat-bhiḥ ǁ
10.015.11 (Mandala. Sukta. Rik)
7.6.19.01 (Ashtaka. Adhyaya. Varga. Rik)
10.01.131 (Mandala. Anuvāka. Rik)
Samhita Devanagari Accented
अग्नि॑ष्वात्ताः पितर॒ एह ग॑च्छत॒ सदः॑सदः सदत सुप्रणीतयः ।
अ॒त्ता ह॒वींषि॒ प्रय॑तानि ब॒र्हिष्यथा॑ र॒यिं सर्व॑वीरं दधातन ॥
Samhita Devanagari Nonaccented
अग्निष्वात्ताः पितर एह गच्छत सदःसदः सदत सुप्रणीतयः ।
अत्ता हवींषि प्रयतानि बर्हिष्यथा रयिं सर्ववीरं दधातन ॥
Samhita Transcription Accented
ágniṣvāttāḥ pitara éhá gacchata sádaḥsadaḥ sadata supraṇītayaḥ ǀ
attā́ havī́ṃṣi práyatāni barhíṣyáthā rayím sárvavīram dadhātana ǁ
Samhita Transcription Nonaccented
agniṣvāttāḥ pitara eha gacchata sadaḥsadaḥ sadata supraṇītayaḥ ǀ
attā havīṃṣi prayatāni barhiṣyathā rayim sarvavīram dadhātana ǁ
Padapatha Devanagari Accented
अग्नि॑ऽस्वात्ताः । पि॒त॒रः॒ । आ । इ॒ह । ग॒च्छ॒त॒ । सदः॑ऽसदः । स॒द॒त॒ । सु॒ऽप्र॒नी॒त॒यः॒ ।
अ॒त्त । ह॒वींषि॑ । प्रऽय॑तानि । ब॒र्हिषि॑ । अथ॑ । र॒यिम् । सर्व॑ऽवीरम् । द॒धा॒त॒न॒ ॥
Padapatha Devanagari Nonaccented
अग्निऽस्वात्ताः । पितरः । आ । इह । गच्छत । सदःऽसदः । सदत । सुऽप्रनीतयः ।
अत्त । हवींषि । प्रऽयतानि । बर्हिषि । अथ । रयिम् । सर्वऽवीरम् । दधातन ॥
Padapatha Transcription Accented
ágni-svāttāḥ ǀ pitaraḥ ǀ ā́ ǀ ihá ǀ gacchata ǀ sádaḥ-sadaḥ ǀ sadata ǀ su-pranītayaḥ ǀ
attá ǀ havī́ṃṣi ǀ prá-yatāni ǀ barhíṣi ǀ átha ǀ rayím ǀ sárva-vīram ǀ dadhātana ǁ
Padapatha Transcription Nonaccented
agni-svāttāḥ ǀ pitaraḥ ǀ ā ǀ iha ǀ gacchata ǀ sadaḥ-sadaḥ ǀ sadata ǀ su-pranītayaḥ ǀ
atta ǀ havīṃṣi ǀ pra-yatāni ǀ barhiṣi ǀ atha ǀ rayim ǀ sarva-vīram ǀ dadhātana ǁ
10.015.12 (Mandala. Sukta. Rik)
7.6.19.02 (Ashtaka. Adhyaya. Varga. Rik)
10.01.132 (Mandala. Anuvāka. Rik)
Samhita Devanagari Accented
त्वम॑ग्न ईळि॒तो जा॑तवे॒दोऽवा॑ड्ढ॒व्यानि॑ सुर॒भीणि॑ कृ॒त्वी ।
प्रादाः॑ पि॒तृभ्यः॑ स्व॒धया॒ ते अ॑क्षन्न॒द्धि त्वं दे॑व॒ प्रय॑ता ह॒वींषि॑ ॥
Samhita Devanagari Nonaccented
त्वमग्न ईळितो जातवेदोऽवाड्ढव्यानि सुरभीणि कृत्वी ।
प्रादाः पितृभ्यः स्वधया ते अक्षन्नद्धि त्वं देव प्रयता हवींषि ॥
Samhita Transcription Accented
tvámagna īḷitó jātavedó’vāḍḍhavyā́ni surabhī́ṇi kṛtvī́ ǀ
prā́dāḥ pitṛ́bhyaḥ svadháyā té akṣannaddhí tvám deva práyatā havī́ṃṣi ǁ
Samhita Transcription Nonaccented
tvamagna īḷito jātavedo’vāḍḍhavyāni surabhīṇi kṛtvī ǀ
prādāḥ pitṛbhyaḥ svadhayā te akṣannaddhi tvam deva prayatā havīṃṣi ǁ
Padapatha Devanagari Accented
त्वम् । अ॒ग्ने॒ । ई॒ळि॒तः । जा॒त॒ऽवे॒दः॒ । अवा॑ट् । ह॒व्यानि॑ । सु॒र॒भीणि॑ । कृ॒त्वी ।
प्र । अ॒दाः॒ । पि॒तृऽभ्यः॑ । स्व॒धया॑ । ते । अ॒क्ष॒न् । अ॒द्धि । त्वम् । दे॒व॒ । प्रऽय॑ता । ह॒वींषि॑ ॥
Padapatha Devanagari Nonaccented
त्वम् । अग्ने । ईळितः । जातऽवेदः । अवाट् । हव्यानि । सुरभीणि । कृत्वी ।
प्र । अदाः । पितृऽभ्यः । स्वधया । ते । अक्षन् । अद्धि । त्वम् । देव । प्रऽयता । हवींषि ॥
Padapatha Transcription Accented
tvám ǀ agne ǀ īḷitáḥ ǀ jāta-vedaḥ ǀ ávāṭ ǀ havyā́ni ǀ surabhī́ṇi ǀ kṛtvī́ ǀ
prá ǀ adāḥ ǀ pitṛ́-bhyaḥ ǀ svadháyā ǀ té ǀ akṣan ǀ addhí ǀ tvám ǀ deva ǀ prá-yatā ǀ havī́ṃṣi ǁ
Padapatha Transcription Nonaccented
tvam ǀ agne ǀ īḷitaḥ ǀ jāta-vedaḥ ǀ avāṭ ǀ havyāni ǀ surabhīṇi ǀ kṛtvī ǀ
pra ǀ adāḥ ǀ pitṛ-bhyaḥ ǀ svadhayā ǀ te ǀ akṣan ǀ addhi ǀ tvam ǀ deva ǀ pra-yatā ǀ havīṃṣi ǁ
10.015.13 (Mandala. Sukta. Rik)
7.6.19.03 (Ashtaka. Adhyaya. Varga. Rik)
10.01.133 (Mandala. Anuvāka. Rik)
Samhita Devanagari Accented
ये चे॒ह पि॒तरो॒ ये च॒ नेह यांश्च॑ वि॒द्म याँ उ॑ च॒ न प्र॑वि॒द्म ।
त्वं वे॑त्थ॒ यति॒ ते जा॑तवेदः स्व॒धाभि॑र्य॒ज्ञं सुकृ॑तं जुषस्व ॥
Samhita Devanagari Nonaccented
ये चेह पितरो ये च नेह यांश्च विद्म याँ उ च न प्रविद्म ।
त्वं वेत्थ यति ते जातवेदः स्वधाभिर्यज्ञं सुकृतं जुषस्व ॥
Samhita Transcription Accented
yé cehá pitáro yé ca néhá yā́ṃśca vidmá yā́m̐ u ca ná pravidmá ǀ
tvám vettha yáti té jātavedaḥ svadhā́bhiryajñám súkṛtam juṣasva ǁ
Samhita Transcription Nonaccented
ye ceha pitaro ye ca neha yāṃśca vidma yām̐ u ca na pravidma ǀ
tvam vettha yati te jātavedaḥ svadhābhiryajñam sukṛtam juṣasva ǁ
Padapatha Devanagari Accented
ये । च॒ । इ॒ह । पि॒तरः॑ । ये । च॒ । न । इ॒ह । यान् । च॒ । वि॒द्म । यान् । ऊं॒ इति॑ । च॒ । न । प्र॒ऽवि॒द्म ।
त्वम् । वे॒त्थ॒ । यति॑ । ते । जा॒त॒ऽवे॒दः॒ । स्व॒धाभिः॑ । य॒ज्ञम् । सुऽकृ॑तम् । जु॒ष॒स्व॒ ॥
Padapatha Devanagari Nonaccented
ये । च । इह । पितरः । ये । च । न । इह । यान् । च । विद्म । यान् । ऊं इति । च । न । प्रऽविद्म ।
त्वम् । वेत्थ । यति । ते । जातऽवेदः । स्वधाभिः । यज्ञम् । सुऽकृतम् । जुषस्व ॥
Padapatha Transcription Accented
yé ǀ ca ǀ ihá ǀ pitáraḥ ǀ yé ǀ ca ǀ ná ǀ ihá ǀ yā́n ǀ ca ǀ vidmá ǀ yā́n ǀ ūṃ íti ǀ ca ǀ ná ǀ pra-vidmá ǀ
tvám ǀ vettha ǀ yáti ǀ té ǀ jāta-vedaḥ ǀ svadhā́bhiḥ ǀ yajñám ǀ sú-kṛtam ǀ juṣasva ǁ
Padapatha Transcription Nonaccented
ye ǀ ca ǀ iha ǀ pitaraḥ ǀ ye ǀ ca ǀ na ǀ iha ǀ yān ǀ ca ǀ vidma ǀ yān ǀ ūṃ iti ǀ ca ǀ na ǀ pra-vidma ǀ
tvam ǀ vettha ǀ yati ǀ te ǀ jāta-vedaḥ ǀ svadhābhiḥ ǀ yajñam ǀ su-kṛtam ǀ juṣasva ǁ
10.015.14 (Mandala. Sukta. Rik)
7.6.19.04 (Ashtaka. Adhyaya. Varga. Rik)
10.01.134 (Mandala. Anuvāka. Rik)
Samhita Devanagari Accented
ये अ॑ग्निद॒ग्धा ये अन॑ग्निदग्धा॒ मध्ये॑ दि॒वः स्व॒धया॑ मा॒दयं॑ते ।
तेभिः॑ स्व॒राळसु॑नीतिमे॒तां य॑थाव॒शं त॒न्वं॑ कल्पयस्व ॥
Samhita Devanagari Nonaccented
ये अग्निदग्धा ये अनग्निदग्धा मध्ये दिवः स्वधया मादयंते ।
तेभिः स्वराळसुनीतिमेतां यथावशं तन्वं कल्पयस्व ॥
Samhita Transcription Accented
yé agnidagdhā́ yé ánagnidagdhā mádhye diváḥ svadháyā mādáyante ǀ
tébhiḥ svarā́ḷásunītimetā́m yathāvaśám tanvám kalpayasva ǁ
Samhita Transcription Nonaccented
ye agnidagdhā ye anagnidagdhā madhye divaḥ svadhayā mādayante ǀ
tebhiḥ svarāḷasunītimetām yathāvaśam tanvam kalpayasva ǁ
Padapatha Devanagari Accented
ये । अ॒ग्नि॒ऽद॒ग्धाः । ये । अन॑ग्निऽदग्धाः । मध्ये॑ । दि॒वः । स्व॒धया॑ । मा॒दय॑न्ते ।
तेभिः॑ । स्व॒ऽराट् । असु॑ऽनीतिम् । ए॒ताम् । य॒था॒ऽव॒शम् । त॒न्व॑म् । क॒ल्प॒य॒स्व॒ ॥
Padapatha Devanagari Nonaccented
ये । अग्निऽदग्धाः । ये । अनग्निऽदग्धाः । मध्ये । दिवः । स्वधया । मादयन्ते ।
तेभिः । स्वऽराट् । असुऽनीतिम् । एताम् । यथाऽवशम् । तन्वम् । कल्पयस्व ॥
Padapatha Transcription Accented
yé ǀ agni-dagdhā́ḥ ǀ yé ǀ ánagni-dagdhāḥ ǀ mádhye ǀ diváḥ ǀ svadháyā ǀ mādáyante ǀ
tébhiḥ ǀ sva-rā́ṭ ǀ ásu-nītim ǀ etā́m ǀ yathā-vaśám ǀ tanvám ǀ kalpayasva ǁ
Padapatha Transcription Nonaccented
ye ǀ agni-dagdhāḥ ǀ ye ǀ anagni-dagdhāḥ ǀ madhye ǀ divaḥ ǀ svadhayā ǀ mādayante ǀ
tebhiḥ ǀ sva-rāṭ ǀ asu-nītim ǀ etām ǀ yathā-vaśam ǀ tanvam ǀ kalpayasva ǁ