|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 16
|
1. Info |
| To: | agni | |
| From: | damana yāmāyana | |
| Metres: | 1st set of styles: nicṛttriṣṭup (1, 4, 7, 8); svarāṭtriṣṭup (6, 9, 10); virāṭtrisṭup (2, 5); virāḍanuṣṭup (13, 14); bhuriktriṣṭup (3); anuṣṭup (11); nicṛdanuṣṭup (12) 2nd set of styles: triṣṭubh (1-10); anuṣṭubh (11-14) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.016.01 (Mandala. Sukta. Rik)
7.6.20.01 (Ashtaka. Adhyaya. Varga. Rik)
10.01.135 (Mandala. Anuvāka. Rik)
Samhita Devanagari Accented
मैन॑मग्ने॒ वि द॑हो॒ माभि शो॑चो॒ मास्य॒ त्वचं॑ चिक्षिपो॒ मा शरी॑रं ।
य॒दा शृ॒तं कृ॒णवो॑ जातवे॒दोऽथे॑मेनं॒ प्र हि॑णुतात्पि॒तृभ्यः॑ ॥
Samhita Devanagari Nonaccented
मैनमग्ने वि दहो माभि शोचो मास्य त्वचं चिक्षिपो मा शरीरं ।
यदा शृतं कृणवो जातवेदोऽथेमेनं प्र हिणुतात्पितृभ्यः ॥
Samhita Transcription Accented
máinamagne ví daho mā́bhí śoco mā́sya tvácam cikṣipo mā́ śárīram ǀ
yadā́ śṛtám kṛṇávo jātavedó’themenam prá hiṇutātpitṛ́bhyaḥ ǁ
Samhita Transcription Nonaccented
mainamagne vi daho mābhi śoco māsya tvacam cikṣipo mā śarīram ǀ
yadā śṛtam kṛṇavo jātavedo’themenam pra hiṇutātpitṛbhyaḥ ǁ
Padapatha Devanagari Accented
मा । ए॒न॒म् । अ॒ग्ने॒ । वि । द॒हः॒ । मा । अ॒भि । शो॒चः॒ । मा । अ॒स्य॒ । त्वच॑म् । चि॒क्षि॒पः॒ । मा । शरी॑रम् ।
य॒दा । शृ॒तम् । कृ॒णवः॑ । जा॒त॒ऽवे॒दः॒ । अथ॑ । ई॒म् । ए॒न॒म् । प्र । हि॒णु॒ता॒त् । पि॒तृऽभ्यः॑ ॥
Padapatha Devanagari Nonaccented
मा । एनम् । अग्ने । वि । दहः । मा । अभि । शोचः । मा । अस्य । त्वचम् । चिक्षिपः । मा । शरीरम् ।
यदा । शृतम् । कृणवः । जातऽवेदः । अथ । ईम् । एनम् । प्र । हिणुतात् । पितृऽभ्यः ॥
Padapatha Transcription Accented
mā́ ǀ enam ǀ agne ǀ ví ǀ dahaḥ ǀ mā́ ǀ abhí ǀ śocaḥ ǀ mā́ ǀ asya ǀ tvácam ǀ cikṣipaḥ ǀ mā́ ǀ śárīram ǀ
yadā́ ǀ śṛtám ǀ kṛṇávaḥ ǀ jāta-vedaḥ ǀ átha ǀ īm ǀ enam ǀ prá ǀ hiṇutāt ǀ pitṛ́-bhyaḥ ǁ
Padapatha Transcription Nonaccented
mā ǀ enam ǀ agne ǀ vi ǀ dahaḥ ǀ mā ǀ abhi ǀ śocaḥ ǀ mā ǀ asya ǀ tvacam ǀ cikṣipaḥ ǀ mā ǀ śarīram ǀ
yadā ǀ śṛtam ǀ kṛṇavaḥ ǀ jāta-vedaḥ ǀ atha ǀ īm ǀ enam ǀ pra ǀ hiṇutāt ǀ pitṛ-bhyaḥ ǁ
10.016.02 (Mandala. Sukta. Rik)
7.6.20.02 (Ashtaka. Adhyaya. Varga. Rik)
10.01.136 (Mandala. Anuvāka. Rik)
Samhita Devanagari Accented
शृ॒तं य॒दा कर॑सि जातवे॒दोऽथे॑मेनं॒ परि॑ दत्तात्पि॒तृभ्यः॑ ।
य॒दा गच्छा॒त्यसु॑नीतिमे॒तामथा॑ दे॒वानां॑ वश॒नीर्भ॑वाति ॥
Samhita Devanagari Nonaccented
शृतं यदा करसि जातवेदोऽथेमेनं परि दत्तात्पितृभ्यः ।
यदा गच्छात्यसुनीतिमेतामथा देवानां वशनीर्भवाति ॥
Samhita Transcription Accented
śṛtám yadā́ kárasi jātavedó’themenam pári dattātpitṛ́bhyaḥ ǀ
yadā́ gácchātyásunītimetā́máthā devā́nām vaśanī́rbhavāti ǁ
Samhita Transcription Nonaccented
śṛtam yadā karasi jātavedo’themenam pari dattātpitṛbhyaḥ ǀ
yadā gacchātyasunītimetāmathā devānām vaśanīrbhavāti ǁ
Padapatha Devanagari Accented
शृ॒तम् । य॒दा । कर॑सि । जा॒त॒ऽवे॒दः॒ । अथ॑ । ई॒म् । ए॒न॒म् । परि॑ । द॒त्ता॒त् । पि॒तृऽभ्यः॑ ।
य॒दा । गच्छा॑ति । असु॑ऽनीतिम् । ए॒ताम् । अथ॑ । दे॒वाना॑म् । व॒श॒ऽनीः । भ॒वा॒ति॒ ॥
Padapatha Devanagari Nonaccented
शृतम् । यदा । करसि । जातऽवेदः । अथ । ईम् । एनम् । परि । दत्तात् । पितृऽभ्यः ।
यदा । गच्छाति । असुऽनीतिम् । एताम् । अथ । देवानाम् । वशऽनीः । भवाति ॥
Padapatha Transcription Accented
śṛtám ǀ yadā́ ǀ kárasi ǀ jāta-vedaḥ ǀ átha ǀ īm ǀ enam ǀ pári ǀ dattāt ǀ pitṛ́-bhyaḥ ǀ
yadā́ ǀ gácchāti ǀ ásu-nītim ǀ etā́m ǀ átha ǀ devā́nām ǀ vaśa-nī́ḥ ǀ bhavāti ǁ
Padapatha Transcription Nonaccented
śṛtam ǀ yadā ǀ karasi ǀ jāta-vedaḥ ǀ atha ǀ īm ǀ enam ǀ pari ǀ dattāt ǀ pitṛ-bhyaḥ ǀ
yadā ǀ gacchāti ǀ asu-nītim ǀ etām ǀ atha ǀ devānām ǀ vaśa-nīḥ ǀ bhavāti ǁ
10.016.03 (Mandala. Sukta. Rik)
7.6.20.03 (Ashtaka. Adhyaya. Varga. Rik)
10.01.137 (Mandala. Anuvāka. Rik)
Samhita Devanagari Accented
सूर्यं॒ चक्षु॑र्गच्छतु॒ वात॑मा॒त्मा द्यां च॑ गच्छ पृथि॒वीं च॒ धर्म॑णा ।
अ॒पो वा॑ गच्छ॒ यदि॒ तत्र॑ ते हि॒तमोष॑धीषु॒ प्रति॑ तिष्ठा॒ शरी॑रैः ॥
Samhita Devanagari Nonaccented
सूर्यं चक्षुर्गच्छतु वातमात्मा द्यां च गच्छ पृथिवीं च धर्मणा ।
अपो वा गच्छ यदि तत्र ते हितमोषधीषु प्रति तिष्ठा शरीरैः ॥
Samhita Transcription Accented
sū́ryam cákṣurgacchatu vā́tamātmā́ dyā́m ca gaccha pṛthivī́m ca dhármaṇā ǀ
apó vā gaccha yádi tátra te hitámóṣadhīṣu práti tiṣṭhā śárīraiḥ ǁ
Samhita Transcription Nonaccented
sūryam cakṣurgacchatu vātamātmā dyām ca gaccha pṛthivīm ca dharmaṇā ǀ
apo vā gaccha yadi tatra te hitamoṣadhīṣu prati tiṣṭhā śarīraiḥ ǁ
Padapatha Devanagari Accented
सूर्य॑म् । चक्षुः॑ । ग॒च्छ॒तु॒ । वात॑म् । आ॒त्मा । द्याम् । च॒ । ग॒च्छ॒ । पृ॒थि॒वीम् । च॒ । धर्म॑णा ।
अ॒पः । वा॒ । ग॒च्छ॒ । यदि॑ । तत्र॑ । ते॒ । हि॒तम् । ओष॑धीषु । प्रति॑ । ति॒ष्ठ॒ । शरी॑रैः ॥
Padapatha Devanagari Nonaccented
सूर्यम् । चक्षुः । गच्छतु । वातम् । आत्मा । द्याम् । च । गच्छ । पृथिवीम् । च । धर्मणा ।
अपः । वा । गच्छ । यदि । तत्र । ते । हितम् । ओषधीषु । प्रति । तिष्ठ । शरीरैः ॥
Padapatha Transcription Accented
sū́ryam ǀ cákṣuḥ ǀ gacchatu ǀ vā́tam ǀ ātmā́ ǀ dyā́m ǀ ca ǀ gaccha ǀ pṛthivī́m ǀ ca ǀ dhármaṇā ǀ
apáḥ ǀ vā ǀ gaccha ǀ yádi ǀ tátra ǀ te ǀ hitám ǀ óṣadhīṣu ǀ práti ǀ tiṣṭha ǀ śárīraiḥ ǁ
Padapatha Transcription Nonaccented
sūryam ǀ cakṣuḥ ǀ gacchatu ǀ vātam ǀ ātmā ǀ dyām ǀ ca ǀ gaccha ǀ pṛthivīm ǀ ca ǀ dharmaṇā ǀ
apaḥ ǀ vā ǀ gaccha ǀ yadi ǀ tatra ǀ te ǀ hitam ǀ oṣadhīṣu ǀ prati ǀ tiṣṭha ǀ śarīraiḥ ǁ
10.016.04 (Mandala. Sukta. Rik)
7.6.20.04 (Ashtaka. Adhyaya. Varga. Rik)
10.01.138 (Mandala. Anuvāka. Rik)
Samhita Devanagari Accented
अ॒जो भा॒गस्तप॑सा॒ तं त॑पस्व॒ तं ते॑ शो॒चिस्त॑पतु॒ तं ते॑ अ॒र्चिः ।
यास्ते॑ शि॒वास्त॒न्वो॑ जातवेद॒स्ताभि॑र्वहैनं सु॒कृता॑मु लो॒कं ॥
Samhita Devanagari Nonaccented
अजो भागस्तपसा तं तपस्व तं ते शोचिस्तपतु तं ते अर्चिः ।
यास्ते शिवास्तन्वो जातवेदस्ताभिर्वहैनं सुकृतामु लोकं ॥
Samhita Transcription Accented
ajó bhāgástápasā tám tapasva tám te śocístapatu tám te arcíḥ ǀ
yā́ste śivā́stanvó jātavedastā́bhirvahainam sukṛ́tāmu lokám ǁ
Samhita Transcription Nonaccented
ajo bhāgastapasā tam tapasva tam te śocistapatu tam te arciḥ ǀ
yāste śivāstanvo jātavedastābhirvahainam sukṛtāmu lokam ǁ
Padapatha Devanagari Accented
अ॒जः । भा॒गः । तप॑सा । तम् । त॒प॒स्व॒ । तम् । ते॒ । शो॒चिः । त॒प॒तु॒ । तम् । ते॒ । अ॒र्चिः ।
याः । ते॒ । शि॒वाः । त॒न्वः॑ । जा॒त॒ऽवे॒दः॒ । ताभिः॑ । व॒ह॒ । ए॒न॒म् । सु॒ऽकृता॑म् । ऊं॒ इति॑ । लो॒कम् ॥
Padapatha Devanagari Nonaccented
अजः । भागः । तपसा । तम् । तपस्व । तम् । ते । शोचिः । तपतु । तम् । ते । अर्चिः ।
याः । ते । शिवाः । तन्वः । जातऽवेदः । ताभिः । वह । एनम् । सुऽकृताम् । ऊं इति । लोकम् ॥
Padapatha Transcription Accented
ajáḥ ǀ bhāgáḥ ǀ tápasā ǀ tám ǀ tapasva ǀ tám ǀ te ǀ śocíḥ ǀ tapatu ǀ tám ǀ te ǀ arcíḥ ǀ
yā́ḥ ǀ te ǀ śivā́ḥ ǀ tanváḥ ǀ jāta-vedaḥ ǀ tā́bhiḥ ǀ vaha ǀ enam ǀ su-kṛ́tām ǀ ūṃ íti ǀ lokám ǁ
Padapatha Transcription Nonaccented
ajaḥ ǀ bhāgaḥ ǀ tapasā ǀ tam ǀ tapasva ǀ tam ǀ te ǀ śociḥ ǀ tapatu ǀ tam ǀ te ǀ arciḥ ǀ
yāḥ ǀ te ǀ śivāḥ ǀ tanvaḥ ǀ jāta-vedaḥ ǀ tābhiḥ ǀ vaha ǀ enam ǀ su-kṛtām ǀ ūṃ iti ǀ lokam ǁ
10.016.05 (Mandala. Sukta. Rik)
7.6.20.05 (Ashtaka. Adhyaya. Varga. Rik)
10.01.139 (Mandala. Anuvāka. Rik)
Samhita Devanagari Accented
अव॑ सृज॒ पुन॑रग्ने पि॒तृभ्यो॒ यस्त॒ आहु॑त॒श्चर॑ति स्व॒धाभिः॑ ।
आयु॒र्वसा॑न॒ उप॑ वेतु॒ शेषः॒ सं ग॑च्छतां त॒न्वा॑ जातवेदः ॥
Samhita Devanagari Nonaccented
अव सृज पुनरग्ने पितृभ्यो यस्त आहुतश्चरति स्वधाभिः ।
आयुर्वसान उप वेतु शेषः सं गच्छतां तन्वा जातवेदः ॥
Samhita Transcription Accented
áva sṛja púnaragne pitṛ́bhyo yásta ā́hutaścárati svadhā́bhiḥ ǀ
ā́yurvásāna úpa vetu śéṣaḥ sám gacchatām tanvā́ jātavedaḥ ǁ
Samhita Transcription Nonaccented
ava sṛja punaragne pitṛbhyo yasta āhutaścarati svadhābhiḥ ǀ
āyurvasāna upa vetu śeṣaḥ sam gacchatām tanvā jātavedaḥ ǁ
Padapatha Devanagari Accented
अव॑ । सृ॒ज॒ । पुनः॑ । अ॒ग्ने॒ । पि॒तृऽभ्यः॑ । यः । ते॒ । आऽहु॑तः । चर॑ति । स्व॒धाभिः॑ ।
आयुः॑ । वसा॑नः । उप॑ । वे॒तु॒ । शेषः॑ । सम् । ग॒च्छ॒ता॒म् । त॒न्वा॑ । जा॒त॒ऽवे॒दः॒ ॥
Padapatha Devanagari Nonaccented
अव । सृज । पुनः । अग्ने । पितृऽभ्यः । यः । ते । आऽहुतः । चरति । स्वधाभिः ।
आयुः । वसानः । उप । वेतु । शेषः । सम् । गच्छताम् । तन्वा । जातऽवेदः ॥
Padapatha Transcription Accented
áva ǀ sṛja ǀ púnaḥ ǀ agne ǀ pitṛ́-bhyaḥ ǀ yáḥ ǀ te ǀ ā́-hutaḥ ǀ cárati ǀ svadhā́bhiḥ ǀ
ā́yuḥ ǀ vásānaḥ ǀ úpa ǀ vetu ǀ śéṣaḥ ǀ sám ǀ gacchatām ǀ tanvā́ ǀ jāta-vedaḥ ǁ
Padapatha Transcription Nonaccented
ava ǀ sṛja ǀ punaḥ ǀ agne ǀ pitṛ-bhyaḥ ǀ yaḥ ǀ te ǀ ā-hutaḥ ǀ carati ǀ svadhābhiḥ ǀ
āyuḥ ǀ vasānaḥ ǀ upa ǀ vetu ǀ śeṣaḥ ǀ sam ǀ gacchatām ǀ tanvā ǀ jāta-vedaḥ ǁ
10.016.06 (Mandala. Sukta. Rik)
7.6.21.01 (Ashtaka. Adhyaya. Varga. Rik)
10.01.140 (Mandala. Anuvāka. Rik)
Samhita Devanagari Accented
यत्ते॑ कृ॒ष्णः श॑कु॒न आ॑तु॒तोद॑ पिपी॒लः स॒र्प उ॒त वा॒ श्वाप॑दः ।
अ॒ग्निष्टद्वि॒श्वाद॑ग॒दं कृ॑णोतु॒ सोम॑श्च॒ यो ब्रा॑ह्म॒णाँ आ॑वि॒वेश॑ ॥
Samhita Devanagari Nonaccented
यत्ते कृष्णः शकुन आतुतोद पिपीलः सर्प उत वा श्वापदः ।
अग्निष्टद्विश्वादगदं कृणोतु सोमश्च यो ब्राह्मणाँ आविवेश ॥
Samhita Transcription Accented
yátte kṛṣṇáḥ śakuná ātutóda pipīláḥ sarpá utá vā śvā́padaḥ ǀ
agníṣṭádviśvā́dagadám kṛṇotu sómaśca yó brāhmaṇā́m̐ āvivéśa ǁ
Samhita Transcription Nonaccented
yatte kṛṣṇaḥ śakuna ātutoda pipīlaḥ sarpa uta vā śvāpadaḥ ǀ
agniṣṭadviśvādagadam kṛṇotu somaśca yo brāhmaṇām̐ āviveśa ǁ
Padapatha Devanagari Accented
यत् । ते॒ । कृ॒ष्णः । श॒कु॒नः । आ॒ऽतु॒तोद॑ । पि॒पी॒लः । स॒र्पः । उ॒त । वा॒ । श्वाप॑दः ।
अ॒ग्निः । तत् । वि॒श्व॒ऽअत् । अ॒ग॒दम् । कृ॒णो॒तु॒ । सोमः॑ । च॒ । यः । ब्रा॒ह्म॒णान् । आ॒ऽवि॒वेश॑ ॥
Padapatha Devanagari Nonaccented
यत् । ते । कृष्णः । शकुनः । आऽतुतोद । पिपीलः । सर्पः । उत । वा । श्वापदः ।
अग्निः । तत् । विश्वऽअत् । अगदम् । कृणोतु । सोमः । च । यः । ब्राह्मणान् । आऽविवेश ॥
Padapatha Transcription Accented
yát ǀ te ǀ kṛṣṇáḥ ǀ śakunáḥ ǀ ā-tutóda ǀ pipīláḥ ǀ sarpáḥ ǀ utá ǀ vā ǀ śvā́padaḥ ǀ
agníḥ ǀ tát ǀ viśva-át ǀ agadám ǀ kṛṇotu ǀ sómaḥ ǀ ca ǀ yáḥ ǀ brāhmaṇā́n ǀ ā-vivéśa ǁ
Padapatha Transcription Nonaccented
yat ǀ te ǀ kṛṣṇaḥ ǀ śakunaḥ ǀ ā-tutoda ǀ pipīlaḥ ǀ sarpaḥ ǀ uta ǀ vā ǀ śvāpadaḥ ǀ
agniḥ ǀ tat ǀ viśva-at ǀ agadam ǀ kṛṇotu ǀ somaḥ ǀ ca ǀ yaḥ ǀ brāhmaṇān ǀ ā-viveśa ǁ
10.016.07 (Mandala. Sukta. Rik)
7.6.21.02 (Ashtaka. Adhyaya. Varga. Rik)
10.01.141 (Mandala. Anuvāka. Rik)
Samhita Devanagari Accented
अ॒ग्नेर्वर्म॒ परि॒ गोभि॑र्व्ययस्व॒ सं प्रोर्णु॑ष्व॒ पीव॑सा॒ मेद॑सा च ।
नेत्त्वा॑ धृ॒ष्णुर्हर॑सा॒ जर्हृ॑षाणो द॒धृग्वि॑ध॒क्ष्यन्प॑र्यं॒खया॑ते ॥
Samhita Devanagari Nonaccented
अग्नेर्वर्म परि गोभिर्व्ययस्व सं प्रोर्णुष्व पीवसा मेदसा च ।
नेत्त्वा धृष्णुर्हरसा जर्हृषाणो दधृग्विधक्ष्यन्पर्यंखयाते ॥
Samhita Transcription Accented
agnérvárma pári góbhirvyayasva sám prórṇuṣva pī́vasā médasā ca ǀ
néttvā dhṛṣṇúrhárasā járhṛṣāṇo dadhṛ́gvidhakṣyánparyaṅkháyāte ǁ
Samhita Transcription Nonaccented
agnervarma pari gobhirvyayasva sam prorṇuṣva pīvasā medasā ca ǀ
nettvā dhṛṣṇurharasā jarhṛṣāṇo dadhṛgvidhakṣyanparyaṅkhayāte ǁ
Padapatha Devanagari Accented
अ॒ग्नेः । वर्म॑ । परि॑ । गोभिः॑ । व्य॒य॒स्व॒ । सम् । प्र । ऊ॒र्णु॒ष्व॒ । पीव॑सा । मेद॑सा । च॒ ।
न । इत् । त्वा॒ । धृ॒ष्णुः । हर॑सा । जर्हृ॑षाणः । द॒धृक् । वि॒ऽध॒क्ष्यन् । प॒रि॒ऽअ॒ङ्खया॑ते ॥
Padapatha Devanagari Nonaccented
अग्नेः । वर्म । परि । गोभिः । व्ययस्व । सम् । प्र । ऊर्णुष्व । पीवसा । मेदसा । च ।
न । इत् । त्वा । धृष्णुः । हरसा । जर्हृषाणः । दधृक् । विऽधक्ष्यन् । परिऽअङ्खयाते ॥
Padapatha Transcription Accented
agnéḥ ǀ várma ǀ pári ǀ góbhiḥ ǀ vyayasva ǀ sám ǀ prá ǀ ūrṇuṣva ǀ pī́vasā ǀ médasā ǀ ca ǀ
ná ǀ ít ǀ tvā ǀ dhṛṣṇúḥ ǀ hárasā ǀ járhṛṣāṇaḥ ǀ dadhṛ́k ǀ vi-dhakṣyán ǀ pari-aṅkháyāte ǁ
Padapatha Transcription Nonaccented
agneḥ ǀ varma ǀ pari ǀ gobhiḥ ǀ vyayasva ǀ sam ǀ pra ǀ ūrṇuṣva ǀ pīvasā ǀ medasā ǀ ca ǀ
na ǀ it ǀ tvā ǀ dhṛṣṇuḥ ǀ harasā ǀ jarhṛṣāṇaḥ ǀ dadhṛk ǀ vi-dhakṣyan ǀ pari-aṅkhayāte ǁ
10.016.08 (Mandala. Sukta. Rik)
7.6.21.03 (Ashtaka. Adhyaya. Varga. Rik)
10.01.142 (Mandala. Anuvāka. Rik)
Samhita Devanagari Accented
इ॒मम॑ग्ने चम॒सं मा वि जि॑ह्वरः प्रि॒यो दे॒वाना॑मु॒त सो॒म्यानां॑ ।
ए॒ष यश्च॑म॒सो दे॑व॒पान॒स्तस्मिं॑दे॒वा अ॒मृता॑ मादयंते ॥
Samhita Devanagari Nonaccented
इममग्ने चमसं मा वि जिह्वरः प्रियो देवानामुत सोम्यानां ।
एष यश्चमसो देवपानस्तस्मिंदेवा अमृता मादयंते ॥
Samhita Transcription Accented
imámagne camasám mā́ ví jihvaraḥ priyó devā́nāmutá somyā́nām ǀ
eṣá yáścamasó devapā́nastásmindevā́ amṛ́tā mādayante ǁ
Samhita Transcription Nonaccented
imamagne camasam mā vi jihvaraḥ priyo devānāmuta somyānām ǀ
eṣa yaścamaso devapānastasmindevā amṛtā mādayante ǁ
Padapatha Devanagari Accented
इ॒मम् । अ॒ग्ने॒ । च॒म॒सम् । मा । वि । जि॒ह्व॒रः॒ । प्रि॒यः । दे॒वाना॑म् । उ॒त । सो॒म्याना॑म् ।
ए॒षः । यः । च॒म॒सः । दे॒व॒ऽपानः॑ । तस्मि॑न् । दे॒वाः । अ॒मृताः॑ । मा॒द॒य॒न्ते॒ ॥
Padapatha Devanagari Nonaccented
इमम् । अग्ने । चमसम् । मा । वि । जिह्वरः । प्रियः । देवानाम् । उत । सोम्यानाम् ।
एषः । यः । चमसः । देवऽपानः । तस्मिन् । देवाः । अमृताः । मादयन्ते ॥
Padapatha Transcription Accented
imám ǀ agne ǀ camasám ǀ mā́ ǀ ví ǀ jihvaraḥ ǀ priyáḥ ǀ devā́nām ǀ utá ǀ somyā́nām ǀ
eṣáḥ ǀ yáḥ ǀ camasáḥ ǀ deva-pā́naḥ ǀ tásmin ǀ devā́ḥ ǀ amṛ́tāḥ ǀ mādayante ǁ
Padapatha Transcription Nonaccented
imam ǀ agne ǀ camasam ǀ mā ǀ vi ǀ jihvaraḥ ǀ priyaḥ ǀ devānām ǀ uta ǀ somyānām ǀ
eṣaḥ ǀ yaḥ ǀ camasaḥ ǀ deva-pānaḥ ǀ tasmin ǀ devāḥ ǀ amṛtāḥ ǀ mādayante ǁ
10.016.09 (Mandala. Sukta. Rik)
7.6.21.04 (Ashtaka. Adhyaya. Varga. Rik)
10.01.143 (Mandala. Anuvāka. Rik)
Samhita Devanagari Accented
क्र॒व्याद॑म॒ग्निं प्र हि॑णोमि दू॒रं य॒मरा॑ज्ञो गच्छतु रिप्रवा॒हः ।
इ॒हैवायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन् ॥
Samhita Devanagari Nonaccented
क्रव्यादमग्निं प्र हिणोमि दूरं यमराज्ञो गच्छतु रिप्रवाहः ।
इहैवायमितरो जातवेदा देवेभ्यो हव्यं वहतु प्रजानन् ॥
Samhita Transcription Accented
kravyā́damagním prá hiṇomi dūrám yamárājño gacchatu ripravāháḥ ǀ
iháivā́yámítaro jātávedā devébhyo havyám vahatu prajānán ǁ
Samhita Transcription Nonaccented
kravyādamagnim pra hiṇomi dūram yamarājño gacchatu ripravāhaḥ ǀ
ihaivāyamitaro jātavedā devebhyo havyam vahatu prajānan ǁ
Padapatha Devanagari Accented
क्र॒व्य॒ऽअद॑म् । अ॒ग्निम् । प्र । हि॒णो॒मि॒ । दू॒रम् । य॒मऽरा॑ज्ञः । ग॒च्छ॒तु॒ । रि॒प्र॒ऽवा॒हः ।
इ॒ह । ए॒व । अ॒यम् । इत॑रः । जा॒तऽवे॑दाः । दे॒वेभ्यः॑ । ह॒व्यम् । व॒ह॒तु॒ । प्र॒ऽजा॒नन् ॥
Padapatha Devanagari Nonaccented
क्रव्यऽअदम् । अग्निम् । प्र । हिणोमि । दूरम् । यमऽराज्ञः । गच्छतु । रिप्रऽवाहः ।
इह । एव । अयम् । इतरः । जातऽवेदाः । देवेभ्यः । हव्यम् । वहतु । प्रऽजानन् ॥
Padapatha Transcription Accented
kravya-ádam ǀ agním ǀ prá ǀ hiṇomi ǀ dūrám ǀ yamá-rājñaḥ ǀ gacchatu ǀ ripra-vāháḥ ǀ
ihá ǀ evá ǀ ayám ǀ ítaraḥ ǀ jātá-vedāḥ ǀ devébhyaḥ ǀ havyám ǀ vahatu ǀ pra-jānán ǁ
Padapatha Transcription Nonaccented
kravya-adam ǀ agnim ǀ pra ǀ hiṇomi ǀ dūram ǀ yama-rājñaḥ ǀ gacchatu ǀ ripra-vāhaḥ ǀ
iha ǀ eva ǀ ayam ǀ itaraḥ ǀ jāta-vedāḥ ǀ devebhyaḥ ǀ havyam ǀ vahatu ǀ pra-jānan ǁ
10.016.10 (Mandala. Sukta. Rik)
7.6.21.05 (Ashtaka. Adhyaya. Varga. Rik)
10.01.144 (Mandala. Anuvāka. Rik)
Samhita Devanagari Accented
यो अ॒ग्निः क्र॒व्यात्प्र॑वि॒वेश॑ वो गृ॒हमि॒मं पश्य॒न्नित॑रं जा॒तवे॑दसं ।
तं ह॑रामि पितृय॒ज्ञाय॑ दे॒वं स घ॒र्ममि॑न्वात्पर॒मे स॒धस्थे॑ ॥
Samhita Devanagari Nonaccented
यो अग्निः क्रव्यात्प्रविवेश वो गृहमिमं पश्यन्नितरं जातवेदसं ।
तं हरामि पितृयज्ञाय देवं स घर्ममिन्वात्परमे सधस्थे ॥
Samhita Transcription Accented
yó agníḥ kravyā́tpravivéśa vo gṛhámimám páśyannítaram jātávedasam ǀ
tám harāmi pitṛyajñā́ya devám sá gharmáminvātparamé sadhásthe ǁ
Samhita Transcription Nonaccented
yo agniḥ kravyātpraviveśa vo gṛhamimam paśyannitaram jātavedasam ǀ
tam harāmi pitṛyajñāya devam sa gharmaminvātparame sadhasthe ǁ
Padapatha Devanagari Accented
यः । अ॒ग्निः । क्र॒व्य॒ऽअत् । प्र॒ऽवि॒वेश॑ । वः॒ । गृ॒हम् । इ॒मम् । पश्य॑न् । इत॑रम् । जा॒तऽवे॑दसम् ।
तम् । ह॒रा॒मि॒ । पि॒तृ॒ऽय॒ज्ञाय॑ । दे॒वम् । सः । घ॒र्मम् । इ॒न्वा॒त् । प॒र॒मे । स॒धऽस्थे॑ ॥
Padapatha Devanagari Nonaccented
यः । अग्निः । क्रव्यऽअत् । प्रऽविवेश । वः । गृहम् । इमम् । पश्यन् । इतरम् । जातऽवेदसम् ।
तम् । हरामि । पितृऽयज्ञाय । देवम् । सः । घर्मम् । इन्वात् । परमे । सधऽस्थे ॥
Padapatha Transcription Accented
yáḥ ǀ agníḥ ǀ kravya-át ǀ pra-vivéśa ǀ vaḥ ǀ gṛhám ǀ imám ǀ páśyan ǀ ítaram ǀ jātá-vedasam ǀ
tám ǀ harāmi ǀ pitṛ-yajñā́ya ǀ devám ǀ sáḥ ǀ gharmám ǀ invāt ǀ paramé ǀ sadhá-sthe ǁ
Padapatha Transcription Nonaccented
yaḥ ǀ agniḥ ǀ kravya-at ǀ pra-viveśa ǀ vaḥ ǀ gṛham ǀ imam ǀ paśyan ǀ itaram ǀ jāta-vedasam ǀ
tam ǀ harāmi ǀ pitṛ-yajñāya ǀ devam ǀ saḥ ǀ gharmam ǀ invāt ǀ parame ǀ sadha-sthe ǁ
10.016.11 (Mandala. Sukta. Rik)
7.6.22.01 (Ashtaka. Adhyaya. Varga. Rik)
10.01.145 (Mandala. Anuvāka. Rik)
Samhita Devanagari Accented
यो अ॒ग्निः क्र॑व्य॒वाह॑नः पि॒तॄन्यक्ष॑दृता॒वृधः॑ ।
प्रेदु॑ ह॒व्यानि॑ वोचति दे॒वेभ्य॑श्च पि॒तृभ्य॒ आ ॥
Samhita Devanagari Nonaccented
यो अग्निः क्रव्यवाहनः पितॄन्यक्षदृतावृधः ।
प्रेदु हव्यानि वोचति देवेभ्यश्च पितृभ्य आ ॥
Samhita Transcription Accented
yó agníḥ kravyavā́hanaḥ pitṝ́nyákṣadṛtāvṛ́dhaḥ ǀ
prédu havyā́ni vocati devébhyaśca pitṛ́bhya ā́ ǁ
Samhita Transcription Nonaccented
yo agniḥ kravyavāhanaḥ pitṝnyakṣadṛtāvṛdhaḥ ǀ
predu havyāni vocati devebhyaśca pitṛbhya ā ǁ
Padapatha Devanagari Accented
यः । अ॒ग्निः । क्र॒व्य॒ऽवाह॑नः । पि॒तॄन् । यक्ष॑त् । ऋ॒त॒ऽवृधः॑ ।
प्र । इत् । ऊं॒ इति॑ । ह॒व्यानि॑ । वो॒च॒ति॒ । दे॒वेभ्यः॑ । च॒ । पि॒तृऽभ्यः॑ । आ ॥
Padapatha Devanagari Nonaccented
यः । अग्निः । क्रव्यऽवाहनः । पितॄन् । यक्षत् । ऋतऽवृधः ।
प्र । इत् । ऊं इति । हव्यानि । वोचति । देवेभ्यः । च । पितृऽभ्यः । आ ॥
Padapatha Transcription Accented
yáḥ ǀ agníḥ ǀ kravya-vā́hanaḥ ǀ pitṝ́n ǀ yákṣat ǀ ṛta-vṛ́dhaḥ ǀ
prá ǀ ít ǀ ūṃ íti ǀ havyā́ni ǀ vocati ǀ devébhyaḥ ǀ ca ǀ pitṛ́-bhyaḥ ǀ ā́ ǁ
Padapatha Transcription Nonaccented
yaḥ ǀ agniḥ ǀ kravya-vāhanaḥ ǀ pitṝn ǀ yakṣat ǀ ṛta-vṛdhaḥ ǀ
pra ǀ it ǀ ūṃ iti ǀ havyāni ǀ vocati ǀ devebhyaḥ ǀ ca ǀ pitṛ-bhyaḥ ǀ ā ǁ
10.016.12 (Mandala. Sukta. Rik)
7.6.22.02 (Ashtaka. Adhyaya. Varga. Rik)
10.01.146 (Mandala. Anuvāka. Rik)
Samhita Devanagari Accented
उ॒शंत॑स्त्वा॒ नि धी॑मह्यु॒शंतः॒ समि॑धीमहि ।
उ॒शन्नु॑श॒त आ व॑ह पि॒तॄन्ह॒विषे॒ अत्त॑वे ॥
Samhita Devanagari Nonaccented
उशंतस्त्वा नि धीमह्युशंतः समिधीमहि ।
उशन्नुशत आ वह पितॄन्हविषे अत्तवे ॥
Samhita Transcription Accented
uśántastvā ní dhīmahyuśántaḥ sámidhīmahi ǀ
uśánnuśatá ā́ vaha pitṝ́nhavíṣe áttave ǁ
Samhita Transcription Nonaccented
uśantastvā ni dhīmahyuśantaḥ samidhīmahi ǀ
uśannuśata ā vaha pitṝnhaviṣe attave ǁ
Padapatha Devanagari Accented
उ॒शन्तः॑ । त्वा॒ । नि । धी॒म॒हि॒ । उ॒शन्तः॑ । सम् । इ॒धी॒म॒हि॒ ।
उ॒शन् । उ॒श॒तः । आ । व॒ह॒ । पि॒तॄन् । ह॒विषे॑ । अत्त॑वे ॥
Padapatha Devanagari Nonaccented
उशन्तः । त्वा । नि । धीमहि । उशन्तः । सम् । इधीमहि ।
उशन् । उशतः । आ । वह । पितॄन् । हविषे । अत्तवे ॥
Padapatha Transcription Accented
uśántaḥ ǀ tvā ǀ ní ǀ dhīmahi ǀ uśántaḥ ǀ sám ǀ idhīmahi ǀ
uśán ǀ uśatáḥ ǀ ā́ ǀ vaha ǀ pitṝ́n ǀ havíṣe ǀ áttave ǁ
Padapatha Transcription Nonaccented
uśantaḥ ǀ tvā ǀ ni ǀ dhīmahi ǀ uśantaḥ ǀ sam ǀ idhīmahi ǀ
uśan ǀ uśataḥ ǀ ā ǀ vaha ǀ pitṝn ǀ haviṣe ǀ attave ǁ
10.016.13 (Mandala. Sukta. Rik)
7.6.22.03 (Ashtaka. Adhyaya. Varga. Rik)
10.01.147 (Mandala. Anuvāka. Rik)
Samhita Devanagari Accented
यं त्वम॑ग्ने स॒मद॑ह॒स्तमु॒ निर्वा॑पया॒ पुनः॑ ।
कि॒यांब्वत्र॑ रोहतु पाकदू॒र्वा व्य॑ल्कशा ॥
Samhita Devanagari Nonaccented
यं त्वमग्ने समदहस्तमु निर्वापया पुनः ।
कियांब्वत्र रोहतु पाकदूर्वा व्यल्कशा ॥
Samhita Transcription Accented
yám tvámagne samádahastámu nírvāpayā púnaḥ ǀ
kiyā́mbvátra rohatu pākadūrvā́ vyálkaśā ǁ
Samhita Transcription Nonaccented
yam tvamagne samadahastamu nirvāpayā punaḥ ǀ
kiyāmbvatra rohatu pākadūrvā vyalkaśā ǁ
Padapatha Devanagari Accented
यम् । त्वम् । अ॒ग्ने॒ । स॒म्ऽअद॑हः । तम् । ऊं॒ इति॑ । निः । वा॒प॒य॒ । पुन॒रिति॑ ।
कि॒याम्बु॑ । अत्र॑ । रो॒ह॒तु॒ । पा॒क॒ऽदू॒र्वा । विऽअ॑ल्कशा ॥
Padapatha Devanagari Nonaccented
यम् । त्वम् । अग्ने । सम्ऽअदहः । तम् । ऊं इति । निः । वापय । पुनरिति ।
कियाम्बु । अत्र । रोहतु । पाकऽदूर्वा । विऽअल्कशा ॥
Padapatha Transcription Accented
yám ǀ tvám ǀ agne ǀ sam-ádahaḥ ǀ tám ǀ ūṃ íti ǀ níḥ ǀ vāpaya ǀ púnaríti ǀ
kiyā́mbu ǀ átra ǀ rohatu ǀ pāka-dūrvā́ ǀ ví-alkaśā ǁ
Padapatha Transcription Nonaccented
yam ǀ tvam ǀ agne ǀ sam-adahaḥ ǀ tam ǀ ūṃ iti ǀ niḥ ǀ vāpaya ǀ punariti ǀ
kiyāmbu ǀ atra ǀ rohatu ǀ pāka-dūrvā ǀ vi-alkaśā ǁ
10.016.14 (Mandala. Sukta. Rik)
7.6.22.04 (Ashtaka. Adhyaya. Varga. Rik)
10.01.148 (Mandala. Anuvāka. Rik)
Samhita Devanagari Accented
शीति॑के॒ शीति॑कावति॒ ह्लादि॑के॒ ह्लादि॑कावति ।
मं॒डू॒क्या॒३॒॑ सु सं ग॑म इ॒मं स्व१॒॑ग्निं ह॑र्षय ॥
Samhita Devanagari Nonaccented
शीतिके शीतिकावति ह्लादिके ह्लादिकावति ।
मंडूक्या सु सं गम इमं स्वग्निं हर्षय ॥
Samhita Transcription Accented
śī́tike śī́tikāvati hlā́dike hlā́dikāvati ǀ
maṇḍūkyā́ sú sám gama imám svágním harṣaya ǁ
Samhita Transcription Nonaccented
śītike śītikāvati hlādike hlādikāvati ǀ
maṇḍūkyā su sam gama imam svagnim harṣaya ǁ
Padapatha Devanagari Accented
शीति॑के । शीति॑काऽवति । ह्लादि॑के । ह्लादि॑काऽवति ।
म॒ण्डू॒क्या॑ । सु । सम् । ग॒मः॒ । इ॒मम् । सु । अ॒ग्निम् । ह॒र्ष॒य॒ ॥
Padapatha Devanagari Nonaccented
शीतिके । शीतिकाऽवति । ह्लादिके । ह्लादिकाऽवति ।
मण्डूक्या । सु । सम् । गमः । इमम् । सु । अग्निम् । हर्षय ॥
Padapatha Transcription Accented
śī́tike ǀ śī́tikā-vati ǀ hlā́dike ǀ hlā́dikā-vati ǀ
maṇḍūkyā́ ǀ sú ǀ sám ǀ gamaḥ ǀ imám ǀ sú ǀ agním ǀ harṣaya ǁ
Padapatha Transcription Nonaccented
śītike ǀ śītikā-vati ǀ hlādike ǀ hlādikā-vati ǀ
maṇḍūkyā ǀ su ǀ sam ǀ gamaḥ ǀ imam ǀ su ǀ agnim ǀ harṣaya ǁ