|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 19
|
1. Info |
| To: | 1: apaḥ or gāvaḥ (ab); agni, soma (cd); 2: agni, indra; 3: agni; 4, 5, 7, 8: apaḥ or gāvaḥ; 6: indra |
|
| From: | mathita yāmāyana or bhṛgu vāruṇi or cyavana bhārgava | |
| Metres: | 1st set of styles: nicṛttriṣṭup (1, 3-5); anuṣṭup (7, 8); virāḍanuṣṭup (2); gāyatrī (6) 2nd set of styles: anuṣṭubh (1-5, 7, 8); gāyatrī (6) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.019.01 (Mandala. Sukta. Rik)
7.7.01.01 (Ashtaka. Adhyaya. Varga. Rik)
10.02.029 (Mandala. Anuvāka. Rik)
Samhita Devanagari Accented
नि व॑र्तध्वं॒ मानु॑ गाता॒स्मान्त्सि॑षक्त रेवतीः ।
अग्नी॑षोमा पुनर्वसू अ॒स्मे धा॑रयतं र॒यिं ॥
Samhita Devanagari Nonaccented
नि वर्तध्वं मानु गातास्मान्त्सिषक्त रेवतीः ।
अग्नीषोमा पुनर्वसू अस्मे धारयतं रयिं ॥
Samhita Transcription Accented
ní vartadhvam mā́nu gātāsmā́ntsiṣakta revatīḥ ǀ
ágnīṣomā punarvasū asmé dhārayatam rayím ǁ
Samhita Transcription Nonaccented
ni vartadhvam mānu gātāsmāntsiṣakta revatīḥ ǀ
agnīṣomā punarvasū asme dhārayatam rayim ǁ
Padapatha Devanagari Accented
नि । व॒र्त॒ध्व॒म् । मा । अनु॑ । गा॒त॒ । अ॒स्मान् । सि॒स॒क्त॒ । रे॒व॒तीः॒ ।
अग्नी॑षोमा । पु॒न॒र्व॒सू॒ इति॑ पुनःऽवसू । अ॒स्मे इति॑ । धा॒र॒य॒त॒म् । र॒यिम् ॥
Padapatha Devanagari Nonaccented
नि । वर्तध्वम् । मा । अनु । गात । अस्मान् । सिसक्त । रेवतीः ।
अग्नीषोमा । पुनर्वसू इति पुनःऽवसू । अस्मे इति । धारयतम् । रयिम् ॥
Padapatha Transcription Accented
ní ǀ vartadhvam ǀ mā́ ǀ ánu ǀ gāta ǀ asmā́n ǀ sisakta ǀ revatīḥ ǀ
ágnīṣomā ǀ punarvasū íti punaḥ-vasū ǀ asmé íti ǀ dhārayatam ǀ rayím ǁ
Padapatha Transcription Nonaccented
ni ǀ vartadhvam ǀ mā ǀ anu ǀ gāta ǀ asmān ǀ sisakta ǀ revatīḥ ǀ
agnīṣomā ǀ punarvasū iti punaḥ-vasū ǀ asme iti ǀ dhārayatam ǀ rayim ǁ
10.019.02 (Mandala. Sukta. Rik)
7.7.01.02 (Ashtaka. Adhyaya. Varga. Rik)
10.02.030 (Mandala. Anuvāka. Rik)
Samhita Devanagari Accented
पुन॑रेना॒ नि व॑र्तय॒ पुन॑रेना॒ न्या कु॑रु ।
इंद्र॑ एणा॒ नि य॑च्छत्व॒ग्निरे॑ना उ॒पाज॑तु ॥
Samhita Devanagari Nonaccented
पुनरेना नि वर्तय पुनरेना न्या कुरु ।
इंद्र एणा नि यच्छत्वग्निरेना उपाजतु ॥
Samhita Transcription Accented
púnarenā ní vartaya púnarenā nyā́ kuru ǀ
índra eṇā ní yacchatvagnírenā upā́jatu ǁ
Samhita Transcription Nonaccented
punarenā ni vartaya punarenā nyā kuru ǀ
indra eṇā ni yacchatvagnirenā upājatu ǁ
Padapatha Devanagari Accented
पुनः॑ । ए॒नाः॒ । नि । व॒र्त॒य॒ । पुनः॑ । ए॒नाः॒ । नि । आ । कु॒रु॒ ।
इन्द्रः॑ । ए॒नाः॒ । नि । य॒च्छ॒तु॒ । अ॒ग्निः । ए॒नाः॒ । उ॒प॒ऽआज॑तु ॥
Padapatha Devanagari Nonaccented
पुनः । एनाः । नि । वर्तय । पुनः । एनाः । नि । आ । कुरु ।
इन्द्रः । एनाः । नि । यच्छतु । अग्निः । एनाः । उपऽआजतु ॥
Padapatha Transcription Accented
púnaḥ ǀ enāḥ ǀ ní ǀ vartaya ǀ púnaḥ ǀ enāḥ ǀ ní ǀ ā́ ǀ kuru ǀ
índraḥ ǀ enāḥ ǀ ní ǀ yacchatu ǀ agníḥ ǀ enāḥ ǀ upa-ā́jatu ǁ
Padapatha Transcription Nonaccented
punaḥ ǀ enāḥ ǀ ni ǀ vartaya ǀ punaḥ ǀ enāḥ ǀ ni ǀ ā ǀ kuru ǀ
indraḥ ǀ enāḥ ǀ ni ǀ yacchatu ǀ agniḥ ǀ enāḥ ǀ upa-ājatu ǁ
10.019.03 (Mandala. Sukta. Rik)
7.7.01.03 (Ashtaka. Adhyaya. Varga. Rik)
10.02.031 (Mandala. Anuvāka. Rik)
Samhita Devanagari Accented
पुन॑रे॒ता नि व॑र्तंताम॒स्मिन्पु॑ष्यंतु॒ गोप॑तौ ।
इ॒हैवाग्ने॒ नि धा॑रये॒ह ति॑ष्ठतु॒ या र॒यिः ॥
Samhita Devanagari Nonaccented
पुनरेता नि वर्तंतामस्मिन्पुष्यंतु गोपतौ ।
इहैवाग्ने नि धारयेह तिष्ठतु या रयिः ॥
Samhita Transcription Accented
púnaretā́ ní vartantāmasmínpuṣyantu gópatau ǀ
iháivā́gne ní dhārayehá tiṣṭhatu yā́ rayíḥ ǁ
Samhita Transcription Nonaccented
punaretā ni vartantāmasminpuṣyantu gopatau ǀ
ihaivāgne ni dhārayeha tiṣṭhatu yā rayiḥ ǁ
Padapatha Devanagari Accented
पुनः॑ । ए॒ताः । नि । व॒र्त॒न्ता॒म् । अ॒स्मिन् । पु॒ष्य॒न्तु॒ । गोऽप॑तौ ।
इ॒ह । ए॒व । अ॒ग्ने॒ । नि । धा॒र॒य॒ । इ॒ह । ति॒ष्ठ॒तु॒ । या । र॒यिः ॥
Padapatha Devanagari Nonaccented
पुनः । एताः । नि । वर्तन्ताम् । अस्मिन् । पुष्यन्तु । गोऽपतौ ।
इह । एव । अग्ने । नि । धारय । इह । तिष्ठतु । या । रयिः ॥
Padapatha Transcription Accented
púnaḥ ǀ etā́ḥ ǀ ní ǀ vartantām ǀ asmín ǀ puṣyantu ǀ gó-patau ǀ
ihá ǀ evá ǀ agne ǀ ní ǀ dhāraya ǀ ihá ǀ tiṣṭhatu ǀ yā́ ǀ rayíḥ ǁ
Padapatha Transcription Nonaccented
punaḥ ǀ etāḥ ǀ ni ǀ vartantām ǀ asmin ǀ puṣyantu ǀ go-patau ǀ
iha ǀ eva ǀ agne ǀ ni ǀ dhāraya ǀ iha ǀ tiṣṭhatu ǀ yā ǀ rayiḥ ǁ
10.019.04 (Mandala. Sukta. Rik)
7.7.01.04 (Ashtaka. Adhyaya. Varga. Rik)
10.02.032 (Mandala. Anuvāka. Rik)
Samhita Devanagari Accented
यन्नि॒यानं॒ न्यय॑नं सं॒ज्ञानं॒ यत्प॒राय॑णं ।
आ॒वर्त॑नं नि॒वर्त॑नं॒ यो गो॒पा अपि॒ तं हु॑वे ॥
Samhita Devanagari Nonaccented
यन्नियानं न्ययनं संज्ञानं यत्परायणं ।
आवर्तनं निवर्तनं यो गोपा अपि तं हुवे ॥
Samhita Transcription Accented
yánniyā́nam nyáyanam saṃjñā́nam yátparā́yaṇam ǀ
āvártanam nivártanam yó gopā́ ápi tám huve ǁ
Samhita Transcription Nonaccented
yanniyānam nyayanam saṃjñānam yatparāyaṇam ǀ
āvartanam nivartanam yo gopā api tam huve ǁ
Padapatha Devanagari Accented
यत् । नि॒ऽयान॑म् । नि॒ऽअय॑नम् । स॒म्ऽज्ञान॑म् । यत् । प॒रा॒ऽअय॑नम् ।
आ॒ऽवर्त॑नम् । नि॒ऽवर्त॑नम् । यः । गो॒पाः । अपि॑ । तम् । हु॒वे॒ ॥
Padapatha Devanagari Nonaccented
यत् । निऽयानम् । निऽअयनम् । सम्ऽज्ञानम् । यत् । पराऽअयनम् ।
आऽवर्तनम् । निऽवर्तनम् । यः । गोपाः । अपि । तम् । हुवे ॥
Padapatha Transcription Accented
yát ǀ ni-yā́nam ǀ ni-áyanam ǀ sam-jñā́nam ǀ yát ǀ parā-áyanam ǀ
ā-vártanam ǀ ni-vártanam ǀ yáḥ ǀ gopā́ḥ ǀ ápi ǀ tám ǀ huve ǁ
Padapatha Transcription Nonaccented
yat ǀ ni-yānam ǀ ni-ayanam ǀ sam-jñānam ǀ yat ǀ parā-ayanam ǀ
ā-vartanam ǀ ni-vartanam ǀ yaḥ ǀ gopāḥ ǀ api ǀ tam ǀ huve ǁ
10.019.05 (Mandala. Sukta. Rik)
7.7.01.05 (Ashtaka. Adhyaya. Varga. Rik)
10.02.033 (Mandala. Anuvāka. Rik)
Samhita Devanagari Accented
य उ॒दान॒ड्व्यय॑नं॒ य उ॒दान॑ट् प॒राय॑णं ।
आ॒वर्त॑नं नि॒वर्त॑न॒मपि॑ गो॒पा नि व॑र्ततां ॥
Samhita Devanagari Nonaccented
य उदानड्व्ययनं य उदानट् परायणं ।
आवर्तनं निवर्तनमपि गोपा नि वर्ततां ॥
Samhita Transcription Accented
yá udā́naḍvyáyanam yá udā́naṭ parā́yaṇam ǀ
āvártanam nivártanamápi gopā́ ní vartatām ǁ
Samhita Transcription Nonaccented
ya udānaḍvyayanam ya udānaṭ parāyaṇam ǀ
āvartanam nivartanamapi gopā ni vartatām ǁ
Padapatha Devanagari Accented
यः । उ॒त्ऽआन॑ट् । वि॒ऽअय॑नम् । यः । उ॒त्ऽआन॑ट् । प॒रा॒ऽअय॑नम् ।
आ॒ऽवर्त॑नम् । नि॒ऽवर्त॑नम् । अपि॑ । गो॒पाः । नि । व॒र्त॒ता॒म् ॥
Padapatha Devanagari Nonaccented
यः । उत्ऽआनट् । विऽअयनम् । यः । उत्ऽआनट् । पराऽअयनम् ।
आऽवर्तनम् । निऽवर्तनम् । अपि । गोपाः । नि । वर्तताम् ॥
Padapatha Transcription Accented
yáḥ ǀ ut-ā́naṭ ǀ vi-áyanam ǀ yáḥ ǀ ut-ā́naṭ ǀ parā-áyanam ǀ
ā-vártanam ǀ ni-vártanam ǀ ápi ǀ gopā́ḥ ǀ ní ǀ vartatām ǁ
Padapatha Transcription Nonaccented
yaḥ ǀ ut-ānaṭ ǀ vi-ayanam ǀ yaḥ ǀ ut-ānaṭ ǀ parā-ayanam ǀ
ā-vartanam ǀ ni-vartanam ǀ api ǀ gopāḥ ǀ ni ǀ vartatām ǁ
10.019.06 (Mandala. Sukta. Rik)
7.7.01.06 (Ashtaka. Adhyaya. Varga. Rik)
10.02.034 (Mandala. Anuvāka. Rik)
Samhita Devanagari Accented
आ नि॑वर्त॒ नि व॑र्तय॒ पुन॑र्न इंद्र॒ गा दे॑हि ।
जी॒वाभि॑र्भुनजामहै ॥
Samhita Devanagari Nonaccented
आ निवर्त नि वर्तय पुनर्न इंद्र गा देहि ।
जीवाभिर्भुनजामहै ॥
Samhita Transcription Accented
ā́ nivarta ní vartaya púnarna indra gā́ dehi ǀ
jīvā́bhirbhunajāmahai ǁ
Samhita Transcription Nonaccented
ā nivarta ni vartaya punarna indra gā dehi ǀ
jīvābhirbhunajāmahai ǁ
Padapatha Devanagari Accented
आ । नि॒ऽव॒र्त॒ । नि । व॒र्त॒य॒ । पुनः॑ । नः॒ । इ॒न्द्र॒ । गाः । दे॒हि॒ ।
जी॒वाभिः॑ । भु॒न॒जा॒म॒है॒ ॥
Padapatha Devanagari Nonaccented
आ । निऽवर्त । नि । वर्तय । पुनः । नः । इन्द्र । गाः । देहि ।
जीवाभिः । भुनजामहै ॥
Padapatha Transcription Accented
ā́ ǀ ni-varta ǀ ní ǀ vartaya ǀ púnaḥ ǀ naḥ ǀ indra ǀ gā́ḥ ǀ dehi ǀ
jīvā́bhiḥ ǀ bhunajāmahai ǁ
Padapatha Transcription Nonaccented
ā ǀ ni-varta ǀ ni ǀ vartaya ǀ punaḥ ǀ naḥ ǀ indra ǀ gāḥ ǀ dehi ǀ
jīvābhiḥ ǀ bhunajāmahai ǁ
10.019.07 (Mandala. Sukta. Rik)
7.7.01.07 (Ashtaka. Adhyaya. Varga. Rik)
10.02.035 (Mandala. Anuvāka. Rik)
Samhita Devanagari Accented
परि॑ वो वि॒श्वतो॑ दध ऊ॒र्जा घृ॒तेन॒ पय॑सा ।
ये दे॒वाः के च॑ य॒ज्ञिया॒स्ते र॒य्या सं सृ॑जंतु नः ॥
Samhita Devanagari Nonaccented
परि वो विश्वतो दध ऊर्जा घृतेन पयसा ।
ये देवाः के च यज्ञियास्ते रय्या सं सृजंतु नः ॥
Samhita Transcription Accented
pári vo viśváto dadha ūrjā́ ghṛténa páyasā ǀ
yé devā́ḥ ké ca yajñíyāsté rayyā́ sám sṛjantu naḥ ǁ
Samhita Transcription Nonaccented
pari vo viśvato dadha ūrjā ghṛtena payasā ǀ
ye devāḥ ke ca yajñiyāste rayyā sam sṛjantu naḥ ǁ
Padapatha Devanagari Accented
परि॑ । वः॒ । वि॒श्वतः॑ । द॒धे॒ । ऊ॒र्जा । घृ॒तेन॑ । पय॑सा ।
ये । दे॒वाः । के । च॒ । य॒ज्ञियाः॑ । ते । र॒य्या । सम् । सृ॒ज॒न्तु॒ । नः॒ ॥
Padapatha Devanagari Nonaccented
परि । वः । विश्वतः । दधे । ऊर्जा । घृतेन । पयसा ।
ये । देवाः । के । च । यज्ञियाः । ते । रय्या । सम् । सृजन्तु । नः ॥
Padapatha Transcription Accented
pári ǀ vaḥ ǀ viśvátaḥ ǀ dadhe ǀ ūrjā́ ǀ ghṛténa ǀ páyasā ǀ
yé ǀ devā́ḥ ǀ ké ǀ ca ǀ yajñíyāḥ ǀ té ǀ rayyā́ ǀ sám ǀ sṛjantu ǀ naḥ ǁ
Padapatha Transcription Nonaccented
pari ǀ vaḥ ǀ viśvataḥ ǀ dadhe ǀ ūrjā ǀ ghṛtena ǀ payasā ǀ
ye ǀ devāḥ ǀ ke ǀ ca ǀ yajñiyāḥ ǀ te ǀ rayyā ǀ sam ǀ sṛjantu ǀ naḥ ǁ
10.019.08 (Mandala. Sukta. Rik)
7.7.01.08 (Ashtaka. Adhyaya. Varga. Rik)
10.02.036 (Mandala. Anuvāka. Rik)
Samhita Devanagari Accented
आ नि॑वर्तन वर्तय॒ नि नि॑वर्तन वर्तय ।
भूम्या॒श्चत॑स्रः प्र॒दिश॒स्ताभ्य॑ एना॒ नि व॑र्तय ॥
Samhita Devanagari Nonaccented
आ निवर्तन वर्तय नि निवर्तन वर्तय ।
भूम्याश्चतस्रः प्रदिशस्ताभ्य एना नि वर्तय ॥
Samhita Transcription Accented
ā́ nivartana vartaya ní nivartana vartaya ǀ
bhū́myāścátasraḥ pradíśastā́bhya enā ní vartaya ǁ
Samhita Transcription Nonaccented
ā nivartana vartaya ni nivartana vartaya ǀ
bhūmyāścatasraḥ pradiśastābhya enā ni vartaya ǁ
Padapatha Devanagari Accented
आ । नि॒ऽव॒र्त॒न॒ । व॒र्त॒य॒ । नि । नि॒ऽव॒र्त॒न॒ । व॒र्त॒य॒ ।
भूम्याः॑ । चत॑स्रः । प्र॒ऽदिशः॑ । ताभ्यः॑ । ए॒नाः॒ । नि । व॒र्त॒य॒ ॥
Padapatha Devanagari Nonaccented
आ । निऽवर्तन । वर्तय । नि । निऽवर्तन । वर्तय ।
भूम्याः । चतस्रः । प्रऽदिशः । ताभ्यः । एनाः । नि । वर्तय ॥
Padapatha Transcription Accented
ā́ ǀ ni-vartana ǀ vartaya ǀ ní ǀ ni-vartana ǀ vartaya ǀ
bhū́myāḥ ǀ cátasraḥ ǀ pra-díśaḥ ǀ tā́bhyaḥ ǀ enāḥ ǀ ní ǀ vartaya ǁ
Padapatha Transcription Nonaccented
ā ǀ ni-vartana ǀ vartaya ǀ ni ǀ ni-vartana ǀ vartaya ǀ
bhūmyāḥ ǀ catasraḥ ǀ pra-diśaḥ ǀ tābhyaḥ ǀ enāḥ ǀ ni ǀ vartaya ǁ