|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 35
|
1. Info |
| To: | 1: divaḥ, pṛthivī, viśvedevās; 2: uṣas, divaḥ, pṛthivī, viśvedevās, sūrya, soma; 3: agni, uṣas, divaḥ, pṛthivī, viśvedevās; 4, 5: agni, uṣas, viśvedevās; 6: agni, aśvins, uṣas, viśvedevās; 7: agni, viśvedevās, savitṛ; 8: agni, viśvedevās, sūrya; 9, 12: agni, ādityās, viśvedevās; 10: agni, indra, bhaga, mitra, varuṇa, viśvedevās; 11: agni, aśvins, ādityās, pūṣan, bṛhaspati, bhaga, viśvedevās; 13: maruts, viśvedevās; 14: viśvedevās |
|
| From: | luśa dhānāka | |
| Metres: | 1st set of styles: virāḍjagatī (1, 6, 9, 11); pādanicṛjjgatī (3, 7, 10, 12); svarāḍārcījagatī (4, 8); bhurigjagatī (2); bhurigārcījagatī (5); nicṛttriṣṭup (13); virāṭtrisṭup (14) 2nd set of styles: jagatī (1-12); triṣṭubh (13, 14) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.035.01 (Mandala. Sukta. Rik)
7.8.06.01 (Ashtaka. Adhyaya. Varga. Rik)
10.03.059 (Mandala. Anuvāka. Rik)
Samhita Devanagari Accented
अबु॑ध्रमु॒ त्य इंद्र॑वंतो अ॒ग्नयो॒ ज्योति॒र्भरं॑त उ॒षसो॒ व्यु॑ष्टिषु ।
म॒ही द्यावा॑पृथि॒वी चे॑तता॒मपो॒ऽद्या दे॒वाना॒मव॒ आ वृ॑णीमहे ॥
Samhita Devanagari Nonaccented
अबुध्रमु त्य इंद्रवंतो अग्नयो ज्योतिर्भरंत उषसो व्युष्टिषु ।
मही द्यावापृथिवी चेततामपोऽद्या देवानामव आ वृणीमहे ॥
Samhita Transcription Accented
ábudhramu tyá índravanto agnáyo jyótirbháranta uṣáso vyúṣṭiṣu ǀ
mahī́ dyā́vāpṛthivī́ cetatāmápo’dyā́ devā́nāmáva ā́ vṛṇīmahe ǁ
Samhita Transcription Nonaccented
abudhramu tya indravanto agnayo jyotirbharanta uṣaso vyuṣṭiṣu ǀ
mahī dyāvāpṛthivī cetatāmapo’dyā devānāmava ā vṛṇīmahe ǁ
Padapatha Devanagari Accented
अबु॑ध्रम् । ऊं॒ इति॑ । त्ये । इन्द्र॑ऽवन्तः । अ॒ग्नयः॑ । ज्योतिः॑ । भर॑न्तः । उ॒षसः॑ । विऽउ॑ष्टिषु ।
म॒ही इति॑ । द्यावा॑पृथि॒वी इति॑ । चे॒त॒ता॒म् । अपः॑ । अ॒द्य । दे॒वाना॑म् । अवः॑ । आ । वृ॒णी॒म॒हे॒ ॥
Padapatha Devanagari Nonaccented
अबुध्रम् । ऊं इति । त्ये । इन्द्रऽवन्तः । अग्नयः । ज्योतिः । भरन्तः । उषसः । विऽउष्टिषु ।
मही इति । द्यावापृथिवी इति । चेतताम् । अपः । अद्य । देवानाम् । अवः । आ । वृणीमहे ॥
Padapatha Transcription Accented
ábudhram ǀ ūṃ íti ǀ tyé ǀ índra-vantaḥ ǀ agnáyaḥ ǀ jyótiḥ ǀ bhárantaḥ ǀ uṣásaḥ ǀ ví-uṣṭiṣu ǀ
mahī́ íti ǀ dyā́vāpṛthivī́ íti ǀ cetatām ǀ ápaḥ ǀ adyá ǀ devā́nām ǀ ávaḥ ǀ ā́ ǀ vṛṇīmahe ǁ
Padapatha Transcription Nonaccented
abudhram ǀ ūṃ iti ǀ tye ǀ indra-vantaḥ ǀ agnayaḥ ǀ jyotiḥ ǀ bharantaḥ ǀ uṣasaḥ ǀ vi-uṣṭiṣu ǀ
mahī iti ǀ dyāvāpṛthivī iti ǀ cetatām ǀ apaḥ ǀ adya ǀ devānām ǀ avaḥ ǀ ā ǀ vṛṇīmahe ǁ
10.035.02 (Mandala. Sukta. Rik)
7.8.06.02 (Ashtaka. Adhyaya. Varga. Rik)
10.03.060 (Mandala. Anuvāka. Rik)
Samhita Devanagari Accented
दि॒वस्पृ॑थि॒व्योरव॒ आ वृ॑णीमहे मा॒तॄन्त्सिंधू॒न्पर्व॑तांछर्य॒णाव॑तः ।
अ॒ना॒गा॒स्त्वं सूर्य॑मु॒षास॑मीमहे भ॒द्रं सोमः॑ सुवा॒नो अ॒द्या कृ॑णोतु नः ॥
Samhita Devanagari Nonaccented
दिवस्पृथिव्योरव आ वृणीमहे मातॄन्त्सिंधून्पर्वतांछर्यणावतः ।
अनागास्त्वं सूर्यमुषासमीमहे भद्रं सोमः सुवानो अद्या कृणोतु नः ॥
Samhita Transcription Accented
diváspṛthivyóráva ā́ vṛṇīmahe mātṝ́ntsíndhūnpárvatāñcharyaṇā́vataḥ ǀ
anāgāstvám sū́ryamuṣā́samīmahe bhadrám sómaḥ suvānó adyā́ kṛṇotu naḥ ǁ
Samhita Transcription Nonaccented
divaspṛthivyorava ā vṛṇīmahe mātṝntsindhūnparvatāñcharyaṇāvataḥ ǀ
anāgāstvam sūryamuṣāsamīmahe bhadram somaḥ suvāno adyā kṛṇotu naḥ ǁ
Padapatha Devanagari Accented
दि॒वःपृ॑थि॒व्योः । अवः॑ । आ । वृ॒णी॒म॒हे॒ । मा॒तॄन् । सिन्धू॑न् । पर्व॑तान् । श॒र्य॒णाऽव॑तः ।
अ॒ना॒गाः॒ऽत्वम् । सूर्य॑म् । उ॒षस॑म् । ई॒म॒हे॒ । भ॒द्रम् । सोमः॑ । सु॒वा॒नः । अ॒द्य । कृ॒णो॒तु॒ । नः॒ ॥
Padapatha Devanagari Nonaccented
दिवःपृथिव्योः । अवः । आ । वृणीमहे । मातॄन् । सिन्धून् । पर्वतान् । शर्यणाऽवतः ।
अनागाःऽत्वम् । सूर्यम् । उषसम् । ईमहे । भद्रम् । सोमः । सुवानः । अद्य । कृणोतु । नः ॥
Padapatha Transcription Accented
diváḥpṛthivyóḥ ǀ ávaḥ ǀ ā́ ǀ vṛṇīmahe ǀ mātṝ́n ǀ síndhūn ǀ párvatān ǀ śaryaṇā́-vataḥ ǀ
anāgāḥ-tvám ǀ sū́ryam ǀ uṣásam ǀ īmahe ǀ bhadrám ǀ sómaḥ ǀ suvānáḥ ǀ adyá ǀ kṛṇotu ǀ naḥ ǁ
Padapatha Transcription Nonaccented
divaḥpṛthivyoḥ ǀ avaḥ ǀ ā ǀ vṛṇīmahe ǀ mātṝn ǀ sindhūn ǀ parvatān ǀ śaryaṇā-vataḥ ǀ
anāgāḥ-tvam ǀ sūryam ǀ uṣasam ǀ īmahe ǀ bhadram ǀ somaḥ ǀ suvānaḥ ǀ adya ǀ kṛṇotu ǀ naḥ ǁ
10.035.03 (Mandala. Sukta. Rik)
7.8.06.03 (Ashtaka. Adhyaya. Varga. Rik)
10.03.061 (Mandala. Anuvāka. Rik)
Samhita Devanagari Accented
द्यावा॑ नो अ॒द्य पृ॑थि॒वी अना॑गसो म॒ही त्रा॑येतां सुवि॒ताय॑ मा॒तरा॑ ।
उ॒षा उ॒च्छंत्यप॑ बाधताम॒घं स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
द्यावा नो अद्य पृथिवी अनागसो मही त्रायेतां सुविताय मातरा ।
उषा उच्छंत्यप बाधतामघं स्वस्त्यग्निं समिधानमीमहे ॥
Samhita Transcription Accented
dyā́vā no adyá pṛthivī́ ánāgaso mahī́ trāyetām suvitā́ya mātárā ǀ
uṣā́ ucchántyápa bādhatāmaghám svastyágním samidhānámīmahe ǁ
Samhita Transcription Nonaccented
dyāvā no adya pṛthivī anāgaso mahī trāyetām suvitāya mātarā ǀ
uṣā ucchantyapa bādhatāmagham svastyagnim samidhānamīmahe ǁ
Padapatha Devanagari Accented
द्यावा॑ । नः॒ । अ॒द्य । पृ॒थि॒वी इति॑ । अना॑गसः । म॒ही इति॑ । त्रा॒ये॒ता॒म् । सु॒वि॒ताय॑ । मा॒तरा॑ ।
उ॒षाः । उ॒च्छन्ती॑ । अप॑ । बा॒ध॒ता॒म् । अ॒घम् । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
द्यावा । नः । अद्य । पृथिवी इति । अनागसः । मही इति । त्रायेताम् । सुविताय । मातरा ।
उषाः । उच्छन्ती । अप । बाधताम् । अघम् । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
dyā́vā ǀ naḥ ǀ adyá ǀ pṛthivī́ íti ǀ ánāgasaḥ ǀ mahī́ íti ǀ trāyetām ǀ suvitā́ya ǀ mātárā ǀ
uṣā́ḥ ǀ ucchántī ǀ ápa ǀ bādhatām ǀ aghám ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
dyāvā ǀ naḥ ǀ adya ǀ pṛthivī iti ǀ anāgasaḥ ǀ mahī iti ǀ trāyetām ǀ suvitāya ǀ mātarā ǀ
uṣāḥ ǀ ucchantī ǀ apa ǀ bādhatām ǀ agham ǀ svasti ǀ agnim ǀ sam-idhānam ǀ īmahe ǁ
10.035.04 (Mandala. Sukta. Rik)
7.8.06.04 (Ashtaka. Adhyaya. Varga. Rik)
10.03.062 (Mandala. Anuvāka. Rik)
Samhita Devanagari Accented
इ॒यं न॑ उ॒स्रा प्र॑थ॒मा सु॑दे॒व्यं॑ रे॒वत्स॒निभ्यो॑ रे॒वती॒ व्यु॑च्छतु ।
आ॒रे म॒न्युं दु॑र्वि॒दत्र॑स्य धीमहि स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
इयं न उस्रा प्रथमा सुदेव्यं रेवत्सनिभ्यो रेवती व्युच्छतु ।
आरे मन्युं दुर्विदत्रस्य धीमहि स्वस्त्यग्निं समिधानमीमहे ॥
Samhita Transcription Accented
iyám na usrā́ prathamā́ sudevyám revátsaníbhyo revátī vyúcchatu ǀ
āré manyúm durvidátrasya dhīmahi svastyágním samidhānámīmahe ǁ
Samhita Transcription Nonaccented
iyam na usrā prathamā sudevyam revatsanibhyo revatī vyucchatu ǀ
āre manyum durvidatrasya dhīmahi svastyagnim samidhānamīmahe ǁ
Padapatha Devanagari Accented
इ॒यम् । नः॒ । उ॒स्रा । प्र॒थ॒मा । सु॒ऽदे॒व्य॑म् । रे॒वत् । स॒निऽभ्यः॑ । रे॒वती॑ । वि । उ॒च्छ॒तु॒ ।
आ॒रे । म॒न्युम् । दुः॒ऽवि॒दत्र॑स्य । धी॒म॒हि॒ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
इयम् । नः । उस्रा । प्रथमा । सुऽदेव्यम् । रेवत् । सनिऽभ्यः । रेवती । वि । उच्छतु ।
आरे । मन्युम् । दुःऽविदत्रस्य । धीमहि । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
iyám ǀ naḥ ǀ usrā́ ǀ prathamā́ ǀ su-devyám ǀ revát ǀ saní-bhyaḥ ǀ revátī ǀ ví ǀ ucchatu ǀ
āré ǀ manyúm ǀ duḥ-vidátrasya ǀ dhīmahi ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
iyam ǀ naḥ ǀ usrā ǀ prathamā ǀ su-devyam ǀ revat ǀ sani-bhyaḥ ǀ revatī ǀ vi ǀ ucchatu ǀ
āre ǀ manyum ǀ duḥ-vidatrasya ǀ dhīmahi ǀ svasti ǀ agnim ǀ sam-idhānam ǀ īmahe ǁ
10.035.05 (Mandala. Sukta. Rik)
7.8.06.05 (Ashtaka. Adhyaya. Varga. Rik)
10.03.063 (Mandala. Anuvāka. Rik)
Samhita Devanagari Accented
प्र याः सिस्र॑ते॒ सूर्य॑स्य र॒श्मिभि॒र्ज्योति॒र्भरं॑तीरु॒षसो॒ व्यु॑ष्टिषु ।
भ॒द्रा नो॑ अ॒द्य श्रव॑से॒ व्यु॑च्छत स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
प्र याः सिस्रते सूर्यस्य रश्मिभिर्ज्योतिर्भरंतीरुषसो व्युष्टिषु ।
भद्रा नो अद्य श्रवसे व्युच्छत स्वस्त्यग्निं समिधानमीमहे ॥
Samhita Transcription Accented
prá yā́ḥ sísrate sū́ryasya raśmíbhirjyótirbhárantīruṣáso vyúṣṭiṣu ǀ
bhadrā́ no adyá śrávase vyúcchata svastyágním samidhānámīmahe ǁ
Samhita Transcription Nonaccented
pra yāḥ sisrate sūryasya raśmibhirjyotirbharantīruṣaso vyuṣṭiṣu ǀ
bhadrā no adya śravase vyucchata svastyagnim samidhānamīmahe ǁ
Padapatha Devanagari Accented
प्र । याः । सिस्र॑ते । सूर्य॑स्य । र॒श्मिऽभिः॑ । ज्योतिः॑ । भर॑न्तीः । उ॒षसः॑ । विऽउ॑ष्टिषु ।
भ॒द्राः । नः॒ । अ॒द्य । श्रव॑से । वि । उ॒च्छ॒त॒ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
प्र । याः । सिस्रते । सूर्यस्य । रश्मिऽभिः । ज्योतिः । भरन्तीः । उषसः । विऽउष्टिषु ।
भद्राः । नः । अद्य । श्रवसे । वि । उच्छत । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
prá ǀ yā́ḥ ǀ sísrate ǀ sū́ryasya ǀ raśmí-bhiḥ ǀ jyótiḥ ǀ bhárantīḥ ǀ uṣásaḥ ǀ ví-uṣṭiṣu ǀ
bhadrā́ḥ ǀ naḥ ǀ adyá ǀ śrávase ǀ ví ǀ ucchata ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
pra ǀ yāḥ ǀ sisrate ǀ sūryasya ǀ raśmi-bhiḥ ǀ jyotiḥ ǀ bharantīḥ ǀ uṣasaḥ ǀ vi-uṣṭiṣu ǀ
bhadrāḥ ǀ naḥ ǀ adya ǀ śravase ǀ vi ǀ ucchata ǀ svasti ǀ agnim ǀ sam-idhānam ǀ īmahe ǁ
10.035.06 (Mandala. Sukta. Rik)
7.8.07.01 (Ashtaka. Adhyaya. Varga. Rik)
10.03.064 (Mandala. Anuvāka. Rik)
Samhita Devanagari Accented
अ॒न॒मी॒वा उ॒षस॒ आ च॑रंतु न॒ उद॒ग्नयो॑ जिहतां॒ ज्योति॑षा बृ॒हत् ।
आयु॑क्षाताम॒श्विना॒ तूतु॑जिं॒ रथं॑ स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
अनमीवा उषस आ चरंतु न उदग्नयो जिहतां ज्योतिषा बृहत् ।
आयुक्षातामश्विना तूतुजिं रथं स्वस्त्यग्निं समिधानमीमहे ॥
Samhita Transcription Accented
anamīvā́ uṣása ā́ carantu na údagnáyo jihatām jyótiṣā bṛhát ǀ
ā́yukṣātāmaśvínā tū́tujim rátham svastyágním samidhānámīmahe ǁ
Samhita Transcription Nonaccented
anamīvā uṣasa ā carantu na udagnayo jihatām jyotiṣā bṛhat ǀ
āyukṣātāmaśvinā tūtujim ratham svastyagnim samidhānamīmahe ǁ
Padapatha Devanagari Accented
अ॒न॒मी॒वाः । उ॒षसः॑ । आ । च॒र॒न्तु॒ । नः॒ । उत् । अ॒ग्नयः॑ । जि॒ह॒ता॒म् । ज्योति॑षा । बृ॒हत् ।
अयु॑क्षाताम् । अ॒श्विना॑ । तूतु॑जिम् । रथ॑म् । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
अनमीवाः । उषसः । आ । चरन्तु । नः । उत् । अग्नयः । जिहताम् । ज्योतिषा । बृहत् ।
अयुक्षाताम् । अश्विना । तूतुजिम् । रथम् । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
anamīvā́ḥ ǀ uṣásaḥ ǀ ā́ ǀ carantu ǀ naḥ ǀ út ǀ agnáyaḥ ǀ jihatām ǀ jyótiṣā ǀ bṛhát ǀ
áyukṣātām ǀ aśvínā ǀ tū́tujim ǀ rátham ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
anamīvāḥ ǀ uṣasaḥ ǀ ā ǀ carantu ǀ naḥ ǀ ut ǀ agnayaḥ ǀ jihatām ǀ jyotiṣā ǀ bṛhat ǀ
ayukṣātām ǀ aśvinā ǀ tūtujim ǀ ratham ǀ svasti ǀ agnim ǀ sam-idhānam ǀ īmahe ǁ
10.035.07 (Mandala. Sukta. Rik)
7.8.07.02 (Ashtaka. Adhyaya. Varga. Rik)
10.03.065 (Mandala. Anuvāka. Rik)
Samhita Devanagari Accented
श्रेष्ठं॑ नो अ॒द्य स॑वित॒र्वरे॑ण्यं भा॒गमा सु॑व॒ स हि र॑त्न॒धा असि॑ ।
रा॒यो जनि॑त्रीं धि॒षणा॒मुप॑ ब्रुवे स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
श्रेष्ठं नो अद्य सवितर्वरेण्यं भागमा सुव स हि रत्नधा असि ।
रायो जनित्रीं धिषणामुप ब्रुवे स्वस्त्यग्निं समिधानमीमहे ॥
Samhita Transcription Accented
śréṣṭham no adyá savitarváreṇyam bhāgámā́ suva sá hí ratnadhā́ ási ǀ
rāyó jánitrīm dhiṣáṇāmúpa bruve svastyágním samidhānámīmahe ǁ
Samhita Transcription Nonaccented
śreṣṭham no adya savitarvareṇyam bhāgamā suva sa hi ratnadhā asi ǀ
rāyo janitrīm dhiṣaṇāmupa bruve svastyagnim samidhānamīmahe ǁ
Padapatha Devanagari Accented
श्रेष्ठ॑म् । नः॒ । अ॒द्य । स॒वि॒तः॒ । वरे॑ण्यम् । भा॒गम् । आ । सु॒व॒ । सः । हि । र॒त्न॒ऽधाः । असि॑ ।
रा॒यः । जनि॑त्रीन् । धि॒षणा॑म् । उप॑ । ब्रु॒वे॒ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
श्रेष्ठम् । नः । अद्य । सवितः । वरेण्यम् । भागम् । आ । सुव । सः । हि । रत्नऽधाः । असि ।
रायः । जनित्रीन् । धिषणाम् । उप । ब्रुवे । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
śréṣṭham ǀ naḥ ǀ adyá ǀ savitaḥ ǀ váreṇyam ǀ bhāgám ǀ ā́ ǀ suva ǀ sáḥ ǀ hí ǀ ratna-dhā́ḥ ǀ ási ǀ
rāyáḥ ǀ jánitrīn ǀ dhiṣáṇām ǀ úpa ǀ bruve ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
śreṣṭham ǀ naḥ ǀ adya ǀ savitaḥ ǀ vareṇyam ǀ bhāgam ǀ ā ǀ suva ǀ saḥ ǀ hi ǀ ratna-dhāḥ ǀ asi ǀ
rāyaḥ ǀ janitrīn ǀ dhiṣaṇām ǀ upa ǀ bruve ǀ svasti ǀ agnim ǀ sam-idhānam ǀ īmahe ǁ
10.035.08 (Mandala. Sukta. Rik)
7.8.07.03 (Ashtaka. Adhyaya. Varga. Rik)
10.03.066 (Mandala. Anuvāka. Rik)
Samhita Devanagari Accented
पिप॑र्तु मा॒ तदृ॒तस्य॑ प्र॒वाच॑नं दे॒वानां॒ यन्म॑नु॒ष्या॒३॒॑ अम॑न्महि ।
विश्वा॒ इदु॒स्राः स्पळुदे॑ति॒ सूर्यः॑ स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
पिपर्तु मा तदृतस्य प्रवाचनं देवानां यन्मनुष्या अमन्महि ।
विश्वा इदुस्राः स्पळुदेति सूर्यः स्वस्त्यग्निं समिधानमीमहे ॥
Samhita Transcription Accented
pípartu mā tádṛtásya pravā́canam devā́nām yánmanuṣyā́ ámanmahi ǀ
víśvā ídusrā́ḥ spáḷúdeti sū́ryaḥ svastyágním samidhānámīmahe ǁ
Samhita Transcription Nonaccented
pipartu mā tadṛtasya pravācanam devānām yanmanuṣyā amanmahi ǀ
viśvā idusrāḥ spaḷudeti sūryaḥ svastyagnim samidhānamīmahe ǁ
Padapatha Devanagari Accented
पिप॑र्तु । मा॒ । तत् । ऋ॒तस्य॑ । प्र॒ऽवाच॑नम् । दे॒वाना॑म् । यत् । म॒नु॒ष्याः॑ । अम॑न्महि ।
विश्वाः॑ । इत् । उ॒स्राः । स्पट् । उत् । ए॒ति॒ । सूर्यः॑ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
पिपर्तु । मा । तत् । ऋतस्य । प्रऽवाचनम् । देवानाम् । यत् । मनुष्याः । अमन्महि ।
विश्वाः । इत् । उस्राः । स्पट् । उत् । एति । सूर्यः । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
pípartu ǀ mā ǀ tát ǀ ṛtásya ǀ pra-vā́canam ǀ devā́nām ǀ yát ǀ manuṣyā́ḥ ǀ ámanmahi ǀ
víśvāḥ ǀ ít ǀ usrā́ḥ ǀ spáṭ ǀ út ǀ eti ǀ sū́ryaḥ ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
pipartu ǀ mā ǀ tat ǀ ṛtasya ǀ pra-vācanam ǀ devānām ǀ yat ǀ manuṣyāḥ ǀ amanmahi ǀ
viśvāḥ ǀ it ǀ usrāḥ ǀ spaṭ ǀ ut ǀ eti ǀ sūryaḥ ǀ svasti ǀ agnim ǀ sam-idhānam ǀ īmahe ǁ
10.035.09 (Mandala. Sukta. Rik)
7.8.07.04 (Ashtaka. Adhyaya. Varga. Rik)
10.03.067 (Mandala. Anuvāka. Rik)
Samhita Devanagari Accented
अ॒द्वे॒षो अ॒द्य ब॒र्हिषः॒ स्तरी॑मणि॒ ग्राव्णां॒ योगे॒ मन्म॑नः॒ साध॑ ईमहे ।
आ॒दि॒त्यानां॒ शर्म॑णि॒ स्था भु॑रण्यसि स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
अद्वेषो अद्य बर्हिषः स्तरीमणि ग्राव्णां योगे मन्मनः साध ईमहे ।
आदित्यानां शर्मणि स्था भुरण्यसि स्वस्त्यग्निं समिधानमीमहे ॥
Samhita Transcription Accented
adveṣó adyá barhíṣaḥ stárīmaṇi grā́vṇām yóge mánmanaḥ sā́dha īmahe ǀ
ādityā́nām śármaṇi sthā́ bhuraṇyasi svastyágním samidhānámīmahe ǁ
Samhita Transcription Nonaccented
adveṣo adya barhiṣaḥ starīmaṇi grāvṇām yoge manmanaḥ sādha īmahe ǀ
ādityānām śarmaṇi sthā bhuraṇyasi svastyagnim samidhānamīmahe ǁ
Padapatha Devanagari Accented
अ॒द्वे॒षः । अ॒द्य । ब॒र्हिषः॑ । स्तरी॑मणि । ग्राव्णा॑म् । योगे॑ । मन्म॑नः । साधे॑ । ई॒म॒हे॒ ।
आ॒दि॒त्याना॑म् । शर्म॑णि । स्थाः । भु॒र॒ण्य॒सि॒ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
अद्वेषः । अद्य । बर्हिषः । स्तरीमणि । ग्राव्णाम् । योगे । मन्मनः । साधे । ईमहे ।
आदित्यानाम् । शर्मणि । स्थाः । भुरण्यसि । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
adveṣáḥ ǀ adyá ǀ barhíṣaḥ ǀ stárīmaṇi ǀ grā́vṇām ǀ yóge ǀ mánmanaḥ ǀ sā́dhe ǀ īmahe ǀ
ādityā́nām ǀ śármaṇi ǀ sthā́ḥ ǀ bhuraṇyasi ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
adveṣaḥ ǀ adya ǀ barhiṣaḥ ǀ starīmaṇi ǀ grāvṇām ǀ yoge ǀ manmanaḥ ǀ sādhe ǀ īmahe ǀ
ādityānām ǀ śarmaṇi ǀ sthāḥ ǀ bhuraṇyasi ǀ svasti ǀ agnim ǀ sam-idhānam ǀ īmahe ǁ
10.035.10 (Mandala. Sukta. Rik)
7.8.07.05 (Ashtaka. Adhyaya. Varga. Rik)
10.03.068 (Mandala. Anuvāka. Rik)
Samhita Devanagari Accented
आ नो॑ ब॒र्हिः स॑ध॒मादे॑ बृ॒हद्दि॒वि दे॒वाँ ई॑ळे सा॒दया॑ स॒प्त होतॄ॑न् ।
इंद्रं॑ मि॒त्रं वरु॑णं सा॒तये॒ भगं॑ स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
आ नो बर्हिः सधमादे बृहद्दिवि देवाँ ईळे सादया सप्त होतॄन् ।
इंद्रं मित्रं वरुणं सातये भगं स्वस्त्यग्निं समिधानमीमहे ॥
Samhita Transcription Accented
ā́ no barhíḥ sadhamā́de bṛháddiví devā́m̐ īḷe sādáyā saptá hótṝn ǀ
índram mitrám váruṇam sātáye bhágam svastyágním samidhānámīmahe ǁ
Samhita Transcription Nonaccented
ā no barhiḥ sadhamāde bṛhaddivi devām̐ īḷe sādayā sapta hotṝn ǀ
indram mitram varuṇam sātaye bhagam svastyagnim samidhānamīmahe ǁ
Padapatha Devanagari Accented
आ । नः॒ । ब॒र्हिः । स॒ध॒ऽमादे॑ । बृ॒हत् । दि॒वि । दे॒वान् । ई॒ळे॒ । सा॒दय॑ । स॒प्त । होतॄ॑न् ।
इन्द्र॑म् । मि॒त्रम् । वरु॑णम् । सा॒तये॑ । भग॑म् । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
आ । नः । बर्हिः । सधऽमादे । बृहत् । दिवि । देवान् । ईळे । सादय । सप्त । होतॄन् ।
इन्द्रम् । मित्रम् । वरुणम् । सातये । भगम् । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
ā́ ǀ naḥ ǀ barhíḥ ǀ sadha-mā́de ǀ bṛhát ǀ diví ǀ devā́n ǀ īḷe ǀ sādáya ǀ saptá ǀ hótṝn ǀ
índram ǀ mitrám ǀ váruṇam ǀ sātáye ǀ bhágam ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
ā ǀ naḥ ǀ barhiḥ ǀ sadha-māde ǀ bṛhat ǀ divi ǀ devān ǀ īḷe ǀ sādaya ǀ sapta ǀ hotṝn ǀ
indram ǀ mitram ǀ varuṇam ǀ sātaye ǀ bhagam ǀ svasti ǀ agnim ǀ sam-idhānam ǀ īmahe ǁ
10.035.11 (Mandala. Sukta. Rik)
7.8.08.01 (Ashtaka. Adhyaya. Varga. Rik)
10.03.069 (Mandala. Anuvāka. Rik)
Samhita Devanagari Accented
त आ॑दित्या॒ आ ग॑ता स॒र्वता॑तये वृ॒धे नो॑ य॒ज्ञम॑वता सजोषसः ।
बृह॒स्पतिं॑ पू॒षण॑म॒श्विना॒ भगं॑ स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
त आदित्या आ गता सर्वतातये वृधे नो यज्ञमवता सजोषसः ।
बृहस्पतिं पूषणमश्विना भगं स्वस्त्यग्निं समिधानमीमहे ॥
Samhita Transcription Accented
tá ādityā ā́ gatā sarvátātaye vṛdhé no yajñámavatā sajoṣasaḥ ǀ
bṛ́haspátim pūṣáṇamaśvínā bhágam svastyágním samidhānámīmahe ǁ
Samhita Transcription Nonaccented
ta ādityā ā gatā sarvatātaye vṛdhe no yajñamavatā sajoṣasaḥ ǀ
bṛhaspatim pūṣaṇamaśvinā bhagam svastyagnim samidhānamīmahe ǁ
Padapatha Devanagari Accented
ते । आ॒दि॒त्याः॒ । आ । ग॒त॒ । स॒र्वता॑तये । वृ॒धे । नः॒ । य॒ज्ञम् । अ॒व॒त॒ । स॒ऽजो॒ष॒सः॒ ।
बृह॒स्पति॑म् । पू॒षण॑म् । अ॒श्विना॑ । भग॑म् । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
ते । आदित्याः । आ । गत । सर्वतातये । वृधे । नः । यज्ञम् । अवत । सऽजोषसः ।
बृहस्पतिम् । पूषणम् । अश्विना । भगम् । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
té ǀ ādityāḥ ǀ ā́ ǀ gata ǀ sarvátātaye ǀ vṛdhé ǀ naḥ ǀ yajñám ǀ avata ǀ sa-joṣasaḥ ǀ
bṛ́haspátim ǀ pūṣáṇam ǀ aśvínā ǀ bhágam ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
te ǀ ādityāḥ ǀ ā ǀ gata ǀ sarvatātaye ǀ vṛdhe ǀ naḥ ǀ yajñam ǀ avata ǀ sa-joṣasaḥ ǀ
bṛhaspatim ǀ pūṣaṇam ǀ aśvinā ǀ bhagam ǀ svasti ǀ agnim ǀ sam-idhānam ǀ īmahe ǁ
10.035.12 (Mandala. Sukta. Rik)
7.8.08.02 (Ashtaka. Adhyaya. Varga. Rik)
10.03.070 (Mandala. Anuvāka. Rik)
Samhita Devanagari Accented
तन्नो॑ देवा यच्छत सुप्रवाच॒नं छ॒र्दिरा॑दित्याः सु॒भरं॑ नृ॒पाय्यं॑ ।
पश्वे॑ तो॒काय॒ तन॑याय जी॒वसे॑ स्व॒स्त्य१॒॑ग्निं स॑मिधा॒नमी॑महे ॥
Samhita Devanagari Nonaccented
तन्नो देवा यच्छत सुप्रवाचनं छर्दिरादित्याः सुभरं नृपाय्यं ।
पश्वे तोकाय तनयाय जीवसे स्वस्त्यग्निं समिधानमीमहे ॥
Samhita Transcription Accented
tánno devā yacchata supravācanám chardírādityāḥ subháram nṛpā́yyam ǀ
páśve tokā́ya tánayāya jīváse svastyágním samidhānámīmahe ǁ
Samhita Transcription Nonaccented
tanno devā yacchata supravācanam chardirādityāḥ subharam nṛpāyyam ǀ
paśve tokāya tanayāya jīvase svastyagnim samidhānamīmahe ǁ
Padapatha Devanagari Accented
तत् । नः॒ । दे॒वाः॒ । य॒च्छ॒त॒ । सु॒ऽप्र॒वा॒च॒नम् । छ॒र्दिः । आ॒दि॒त्याः॒ । सु॒ऽभर॑म् । नृ॒ऽपाय्य॑म् ।
पश्वे॑ । तो॒काय॑ । तन॑याय । जी॒वसे॑ । स्व॒स्ति । अ॒ग्निम् । स॒म्ऽइ॒धा॒नम् । ई॒म॒हे॒ ॥
Padapatha Devanagari Nonaccented
तत् । नः । देवाः । यच्छत । सुऽप्रवाचनम् । छर्दिः । आदित्याः । सुऽभरम् । नृऽपाय्यम् ।
पश्वे । तोकाय । तनयाय । जीवसे । स्वस्ति । अग्निम् । सम्ऽइधानम् । ईमहे ॥
Padapatha Transcription Accented
tát ǀ naḥ ǀ devāḥ ǀ yacchata ǀ su-pravācanám ǀ chardíḥ ǀ ādityāḥ ǀ su-bháram ǀ nṛ-pā́yyam ǀ
páśve ǀ tokā́ya ǀ tánayāya ǀ jīváse ǀ svastí ǀ agním ǀ sam-idhānám ǀ īmahe ǁ
Padapatha Transcription Nonaccented
tat ǀ naḥ ǀ devāḥ ǀ yacchata ǀ su-pravācanam ǀ chardiḥ ǀ ādityāḥ ǀ su-bharam ǀ nṛ-pāyyam ǀ
paśve ǀ tokāya ǀ tanayāya ǀ jīvase ǀ svasti ǀ agnim ǀ sam-idhānam ǀ īmahe ǁ
10.035.13 (Mandala. Sukta. Rik)
7.8.08.03 (Ashtaka. Adhyaya. Varga. Rik)
10.03.071 (Mandala. Anuvāka. Rik)
Samhita Devanagari Accented
विश्वे॑ अ॒द्य म॒रुतो॒ विश्व॑ ऊ॒ती विश्वे॑ भवंत्व॒ग्नयः॒ समि॑द्धाः ।
विश्वे॑ नो दे॒वा अव॒सा ग॑मंतु॒ विश्व॑मस्तु॒ द्रवि॑णं॒ वाजो॑ अ॒स्मे ॥
Samhita Devanagari Nonaccented
विश्वे अद्य मरुतो विश्व ऊती विश्वे भवंत्वग्नयः समिद्धाः ।
विश्वे नो देवा अवसा गमंतु विश्वमस्तु द्रविणं वाजो अस्मे ॥
Samhita Transcription Accented
víśve adyá marúto víśva ūtī́ víśve bhavantvagnáyaḥ sámiddhāḥ ǀ
víśve no devā́ ávasā́ gamantu víśvamastu dráviṇam vā́jo asmé ǁ
Samhita Transcription Nonaccented
viśve adya maruto viśva ūtī viśve bhavantvagnayaḥ samiddhāḥ ǀ
viśve no devā avasā gamantu viśvamastu draviṇam vājo asme ǁ
Padapatha Devanagari Accented
विश्वे॑ । अ॒द्य । म॒रुतः॑ । विश्वे॑ । ऊ॒ती । विश्वे॑ । भ॒व॒न्तु॒ । अ॒ग्नयः॑ । सम्ऽइ॑द्धाः ।
विश्वे॑ । नः॒ । दे॒वाः । अव॑सा । आ । ग॒म॒न्तु॒ । विश्व॑म् । अ॒स्तु॒ । द्रवि॑णम् । वाजः॑ । अ॒स्मे इति॑ ॥
Padapatha Devanagari Nonaccented
विश्वे । अद्य । मरुतः । विश्वे । ऊती । विश्वे । भवन्तु । अग्नयः । सम्ऽइद्धाः ।
विश्वे । नः । देवाः । अवसा । आ । गमन्तु । विश्वम् । अस्तु । द्रविणम् । वाजः । अस्मे इति ॥
Padapatha Transcription Accented
víśve ǀ adyá ǀ marútaḥ ǀ víśve ǀ ūtī́ ǀ víśve ǀ bhavantu ǀ agnáyaḥ ǀ sám-iddhāḥ ǀ
víśve ǀ naḥ ǀ devā́ḥ ǀ ávasā ǀ ā́ ǀ gamantu ǀ víśvam ǀ astu ǀ dráviṇam ǀ vā́jaḥ ǀ asmé íti ǁ
Padapatha Transcription Nonaccented
viśve ǀ adya ǀ marutaḥ ǀ viśve ǀ ūtī ǀ viśve ǀ bhavantu ǀ agnayaḥ ǀ sam-iddhāḥ ǀ
viśve ǀ naḥ ǀ devāḥ ǀ avasā ǀ ā ǀ gamantu ǀ viśvam ǀ astu ǀ draviṇam ǀ vājaḥ ǀ asme iti ǁ
10.035.14 (Mandala. Sukta. Rik)
7.8.08.04 (Ashtaka. Adhyaya. Varga. Rik)
10.03.072 (Mandala. Anuvāka. Rik)
Samhita Devanagari Accented
यं दे॑वा॒सोऽव॑थ॒ वाज॑सातौ॒ यं त्राय॑ध्वे॒ यं पि॑पृ॒थात्यंहः॑ ।
यो वो॑ गोपी॒थे न भ॒यस्य॒ वेद॒ ते स्या॑म दे॒ववी॑तये तुरासः ॥
Samhita Devanagari Nonaccented
यं देवासोऽवथ वाजसातौ यं त्रायध्वे यं पिपृथात्यंहः ।
यो वो गोपीथे न भयस्य वेद ते स्याम देववीतये तुरासः ॥
Samhita Transcription Accented
yám devāsó’vatha vā́jasātau yám trā́yadhve yám pipṛthā́tyáṃhaḥ ǀ
yó vo gopīthé ná bhayásya véda té syāma devávītaye turāsaḥ ǁ
Samhita Transcription Nonaccented
yam devāso’vatha vājasātau yam trāyadhve yam pipṛthātyaṃhaḥ ǀ
yo vo gopīthe na bhayasya veda te syāma devavītaye turāsaḥ ǁ
Padapatha Devanagari Accented
यम् । दे॒वा॒सः॒ । अव॑थ । वाज॑ऽसातौ । यम् । त्राय॑ध्वे । यम् । पि॒पृ॒थ । अति॑ । अंहः॑ ।
यः । वः॒ । गो॒ऽपी॒थे । न । भ॒यस्य॑ । वेद॑ । ते । स्या॒म॒ । दे॒वऽवी॑तये । तु॒रा॒सः॒ ॥
Padapatha Devanagari Nonaccented
यम् । देवासः । अवथ । वाजऽसातौ । यम् । त्रायध्वे । यम् । पिपृथ । अति । अंहः ।
यः । वः । गोऽपीथे । न । भयस्य । वेद । ते । स्याम । देवऽवीतये । तुरासः ॥
Padapatha Transcription Accented
yám ǀ devāsaḥ ǀ ávatha ǀ vā́ja-sātau ǀ yám ǀ trā́yadhve ǀ yám ǀ pipṛthá ǀ áti ǀ áṃhaḥ ǀ
yáḥ ǀ vaḥ ǀ go-pīthé ǀ ná ǀ bhayásya ǀ véda ǀ té ǀ syāma ǀ devá-vītaye ǀ turāsaḥ ǁ
Padapatha Transcription Nonaccented
yam ǀ devāsaḥ ǀ avatha ǀ vāja-sātau ǀ yam ǀ trāyadhve ǀ yam ǀ pipṛtha ǀ ati ǀ aṃhaḥ ǀ
yaḥ ǀ vaḥ ǀ go-pīthe ǀ na ǀ bhayasya ǀ veda ǀ te ǀ syāma ǀ deva-vītaye ǀ turāsaḥ ǁ