|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 45
|
1. Info |
| To: | agni | |
| From: | vatsaprī bhālandana | |
| Metres: | 1st set of styles: nicṛttriṣṭup (1-5, 7); virāṭtrisṭup (9-12); triṣṭup (6); pādanicṛttriṣṭup (8) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.045.01 (Mandala. Sukta. Rik)
7.8.28.01 (Ashtaka. Adhyaya. Varga. Rik)
10.04.023 (Mandala. Anuvāka. Rik)
Samhita Devanagari Accented
दि॒वस्परि॑ प्रथ॒मं ज॑ज्ञे अ॒ग्निर॒स्मद्द्वि॒तीयं॒ परि॑ जा॒तवे॑दाः ।
तृ॒तीय॑म॒प्सु नृ॒मणा॒ अज॑स्र॒मिंधा॑न एनं जरते स्वा॒धीः ॥
Samhita Devanagari Nonaccented
दिवस्परि प्रथमं जज्ञे अग्निरस्मद्द्वितीयं परि जातवेदाः ।
तृतीयमप्सु नृमणा अजस्रमिंधान एनं जरते स्वाधीः ॥
Samhita Transcription Accented
diváspári prathamám jajñe agnírasmáddvitī́yam pári jātávedāḥ ǀ
tṛtī́yamapsú nṛmáṇā ájasramíndhāna enam jarate svādhī́ḥ ǁ
Samhita Transcription Nonaccented
divaspari prathamam jajñe agnirasmaddvitīyam pari jātavedāḥ ǀ
tṛtīyamapsu nṛmaṇā ajasramindhāna enam jarate svādhīḥ ǁ
Padapatha Devanagari Accented
दि॒वः । परि॑ । प्र॒थ॒मम् । ज॒ज्ञे॒ । अ॒ग्निः । अ॒स्मत् । द्वि॒तीय॑म् । परि॑ । जा॒तऽवे॑दाः ।
तृ॒तीय॑म् । अ॒प्ऽसु । नृ॒ऽमनाः॑ । अज॑स्रम् । इन्धा॑नः । ए॒न॒म् । ज॒र॒ते॒ । सु॒ऽआ॒धीः ॥
Padapatha Devanagari Nonaccented
दिवः । परि । प्रथमम् । जज्ञे । अग्निः । अस्मत् । द्वितीयम् । परि । जातऽवेदाः ।
तृतीयम् । अप्ऽसु । नृऽमनाः । अजस्रम् । इन्धानः । एनम् । जरते । सुऽआधीः ॥
Padapatha Transcription Accented
diváḥ ǀ pári ǀ prathamám ǀ jajñe ǀ agníḥ ǀ asmát ǀ dvitī́yam ǀ pári ǀ jātá-vedāḥ ǀ
tṛtī́yam ǀ ap-sú ǀ nṛ-mánāḥ ǀ ájasram ǀ índhānaḥ ǀ enam ǀ jarate ǀ su-ādhī́ḥ ǁ
Padapatha Transcription Nonaccented
divaḥ ǀ pari ǀ prathamam ǀ jajñe ǀ agniḥ ǀ asmat ǀ dvitīyam ǀ pari ǀ jāta-vedāḥ ǀ
tṛtīyam ǀ ap-su ǀ nṛ-manāḥ ǀ ajasram ǀ indhānaḥ ǀ enam ǀ jarate ǀ su-ādhīḥ ǁ
10.045.02 (Mandala. Sukta. Rik)
7.8.28.02 (Ashtaka. Adhyaya. Varga. Rik)
10.04.024 (Mandala. Anuvāka. Rik)
Samhita Devanagari Accented
वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ धाम॒ विभृ॑ता पुरु॒त्रा ।
वि॒द्मा ते॒ नाम॑ पर॒मं गुहा॒ यद्वि॒द्मा तमुत्सं॒ यत॑ आज॒गंथ॑ ॥
Samhita Devanagari Nonaccented
विद्मा ते अग्ने त्रेधा त्रयाणि विद्मा ते धाम विभृता पुरुत्रा ।
विद्मा ते नाम परमं गुहा यद्विद्मा तमुत्सं यत आजगंथ ॥
Samhita Transcription Accented
vidmā́ te agne tredhā́ trayā́ṇi vidmā́ te dhā́ma víbhṛtā purutrā́ ǀ
vidmā́ te nā́ma paramám gúhā yádvidmā́ támútsam yáta ājagántha ǁ
Samhita Transcription Nonaccented
vidmā te agne tredhā trayāṇi vidmā te dhāma vibhṛtā purutrā ǀ
vidmā te nāma paramam guhā yadvidmā tamutsam yata ājagantha ǁ
Padapatha Devanagari Accented
वि॒द्म । ते॒ । अ॒ग्ने॒ । त्रे॒धा । त्र॒याणि॑ । वि॒द्म । ते॒ । धाम॑ । विऽभृ॑ता । पु॒रु॒ऽत्रा ।
वि॒द्म । ते॒ । नाम॑ । प॒र॒मम् । गुहा॑ । यत् । वि॒द्म । तम् । उत्स॑म् । यतः॑ । आ॒ऽज॒गन्थ॑ ॥
Padapatha Devanagari Nonaccented
विद्म । ते । अग्ने । त्रेधा । त्रयाणि । विद्म । ते । धाम । विऽभृता । पुरुऽत्रा ।
विद्म । ते । नाम । परमम् । गुहा । यत् । विद्म । तम् । उत्सम् । यतः । आऽजगन्थ ॥
Padapatha Transcription Accented
vidmá ǀ te ǀ agne ǀ tredhā́ ǀ trayā́ṇi ǀ vidmá ǀ te ǀ dhā́ma ǀ ví-bhṛtā ǀ puru-trā́ ǀ
vidmá ǀ te ǀ nā́ma ǀ paramám ǀ gúhā ǀ yát ǀ vidmá ǀ tám ǀ útsam ǀ yátaḥ ǀ ā-jagántha ǁ
Padapatha Transcription Nonaccented
vidma ǀ te ǀ agne ǀ tredhā ǀ trayāṇi ǀ vidma ǀ te ǀ dhāma ǀ vi-bhṛtā ǀ puru-trā ǀ
vidma ǀ te ǀ nāma ǀ paramam ǀ guhā ǀ yat ǀ vidma ǀ tam ǀ utsam ǀ yataḥ ǀ ā-jagantha ǁ
10.045.03 (Mandala. Sukta. Rik)
7.8.28.03 (Ashtaka. Adhyaya. Varga. Rik)
10.04.025 (Mandala. Anuvāka. Rik)
Samhita Devanagari Accented
स॒मु॒द्रे त्वा॑ नृ॒मणा॑ अ॒प्स्वं१॒॑तर्नृ॒चक्षा॑ ईधे दि॒वो अ॑ग्न॒ ऊध॑न् ।
तृ॒तीये॑ त्वा॒ रज॑सि तस्थि॒वांस॑म॒पामु॒पस्थे॑ महि॒षा अ॑वर्धन् ॥
Samhita Devanagari Nonaccented
समुद्रे त्वा नृमणा अप्स्वंतर्नृचक्षा ईधे दिवो अग्न ऊधन् ।
तृतीये त्वा रजसि तस्थिवांसमपामुपस्थे महिषा अवर्धन् ॥
Samhita Transcription Accented
samudré tvā nṛmáṇā apsvántárnṛcákṣā īdhe divó agna ū́dhan ǀ
tṛtī́ye tvā rájasi tasthivā́ṃsamapā́mupásthe mahiṣā́ avardhan ǁ
Samhita Transcription Nonaccented
samudre tvā nṛmaṇā apsvantarnṛcakṣā īdhe divo agna ūdhan ǀ
tṛtīye tvā rajasi tasthivāṃsamapāmupasthe mahiṣā avardhan ǁ
Padapatha Devanagari Accented
स॒मु॒द्रे । त्वा॒ । नृ॒ऽमनाः॑ । अ॒प्ऽसु । अ॒न्तः । नृ॒ऽचक्षाः॑ । ई॒धे॒ । दि॒वः । अ॒ग्ने॒ । ऊध॑न् ।
तृ॒तीये॑ । त्वा॒ । रज॑सि । त॒स्थि॒ऽवांस॑म् । अ॒पाम् । उ॒पऽस्थे॑ । म॒हि॒षाः । अ॒व॒र्ध॒न् ॥
Padapatha Devanagari Nonaccented
समुद्रे । त्वा । नृऽमनाः । अप्ऽसु । अन्तः । नृऽचक्षाः । ईधे । दिवः । अग्ने । ऊधन् ।
तृतीये । त्वा । रजसि । तस्थिऽवांसम् । अपाम् । उपऽस्थे । महिषाः । अवर्धन् ॥
Padapatha Transcription Accented
samudré ǀ tvā ǀ nṛ-mánāḥ ǀ ap-sú ǀ antáḥ ǀ nṛ-cákṣāḥ ǀ īdhe ǀ diváḥ ǀ agne ǀ ū́dhan ǀ
tṛtī́ye ǀ tvā ǀ rájasi ǀ tasthi-vā́ṃsam ǀ apā́m ǀ upá-sthe ǀ mahiṣā́ḥ ǀ avardhan ǁ
Padapatha Transcription Nonaccented
samudre ǀ tvā ǀ nṛ-manāḥ ǀ ap-su ǀ antaḥ ǀ nṛ-cakṣāḥ ǀ īdhe ǀ divaḥ ǀ agne ǀ ūdhan ǀ
tṛtīye ǀ tvā ǀ rajasi ǀ tasthi-vāṃsam ǀ apām ǀ upa-sthe ǀ mahiṣāḥ ǀ avardhan ǁ
10.045.04 (Mandala. Sukta. Rik)
7.8.28.04 (Ashtaka. Adhyaya. Varga. Rik)
10.04.026 (Mandala. Anuvāka. Rik)
Samhita Devanagari Accented
अक्रं॑दद॒ग्निः स्त॒नय॑न्निव॒ द्यौः क्षामा॒ रेरि॑हद्वी॒रुधः॑ समं॒जन् ।
स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्यं॒तः ॥
Samhita Devanagari Nonaccented
अक्रंददग्निः स्तनयन्निव द्यौः क्षामा रेरिहद्वीरुधः समंजन् ।
सद्यो जज्ञानो वि हीमिद्धो अख्यदा रोदसी भानुना भात्यंतः ॥
Samhita Transcription Accented
ákrandadagníḥ stanáyanniva dyáuḥ kṣā́mā rérihadvīrúdhaḥ samañján ǀ
sadyó jajñānó ví hī́middhó ákhyadā́ ródasī bhānúnā bhātyantáḥ ǁ
Samhita Transcription Nonaccented
akrandadagniḥ stanayanniva dyauḥ kṣāmā rerihadvīrudhaḥ samañjan ǀ
sadyo jajñāno vi hīmiddho akhyadā rodasī bhānunā bhātyantaḥ ǁ
Padapatha Devanagari Accented
अक्र॑न्दत् । अ॒ग्निः । स्त॒नय॑न्ऽइव । द्यौः । क्षाम॑ । रेरि॑हत् । वी॒रुधः॑ । स॒म्ऽअ॒ञ्जन् ।
स॒द्यः । ज॒ज्ञा॒नः । वि । हि । ई॒म् । इ॒द्धः । अख्य॑त् । आ । रोद॑सी॒ इति॑ । भा॒नुना॑ । भा॒ति॒ । अ॒न्तरिति॑ ॥
Padapatha Devanagari Nonaccented
अक्रन्दत् । अग्निः । स्तनयन्ऽइव । द्यौः । क्षाम । रेरिहत् । वीरुधः । सम्ऽअञ्जन् ।
सद्यः । जज्ञानः । वि । हि । ईम् । इद्धः । अख्यत् । आ । रोदसी इति । भानुना । भाति । अन्तरिति ॥
Padapatha Transcription Accented
ákrandat ǀ agníḥ ǀ stanáyan-iva ǀ dyáuḥ ǀ kṣā́ma ǀ rérihat ǀ vīrúdhaḥ ǀ sam-añján ǀ
sadyáḥ ǀ jajñānáḥ ǀ ví ǀ hí ǀ īm ǀ iddháḥ ǀ ákhyat ǀ ā́ ǀ ródasī íti ǀ bhānúnā ǀ bhāti ǀ antáríti ǁ
Padapatha Transcription Nonaccented
akrandat ǀ agniḥ ǀ stanayan-iva ǀ dyauḥ ǀ kṣāma ǀ rerihat ǀ vīrudhaḥ ǀ sam-añjan ǀ
sadyaḥ ǀ jajñānaḥ ǀ vi ǀ hi ǀ īm ǀ iddhaḥ ǀ akhyat ǀ ā ǀ rodasī iti ǀ bhānunā ǀ bhāti ǀ antariti ǁ
10.045.05 (Mandala. Sukta. Rik)
7.8.28.05 (Ashtaka. Adhyaya. Varga. Rik)
10.04.027 (Mandala. Anuvāka. Rik)
Samhita Devanagari Accented
श्री॒णामु॑दा॒रो ध॒रुणो॑ रयी॒णां म॑नी॒षाणां॒ प्रार्प॑णः॒ सोम॑गोपाः ।
वसुः॑ सू॒नुः सह॑सो अ॒प्सु राजा॒ वि भा॒त्यग्र॑ उ॒षसा॑मिधा॒नः ॥
Samhita Devanagari Nonaccented
श्रीणामुदारो धरुणो रयीणां मनीषाणां प्रार्पणः सोमगोपाः ।
वसुः सूनुः सहसो अप्सु राजा वि भात्यग्र उषसामिधानः ॥
Samhita Transcription Accented
śrīṇā́mudāró dharúṇo rayīṇā́m manīṣā́ṇām prā́rpaṇaḥ sómagopāḥ ǀ
vásuḥ sūnúḥ sáhaso apsú rā́jā ví bhātyágra uṣásāmidhānáḥ ǁ
Samhita Transcription Nonaccented
śrīṇāmudāro dharuṇo rayīṇām manīṣāṇām prārpaṇaḥ somagopāḥ ǀ
vasuḥ sūnuḥ sahaso apsu rājā vi bhātyagra uṣasāmidhānaḥ ǁ
Padapatha Devanagari Accented
श्री॒णाम् । उ॒त्ऽआ॒रः । ध॒रुणः॑ । र॒यी॒णाम् । म॒नी॒षाणा॑म् । प्र॒ऽअर्प॑णः । सोम॑ऽगोपाः ।
वसुः॑ । सू॒नुः । सह॑सः । अ॒प्ऽसु । राजा॑ । वि । भा॒ति॒ । अग्रे॑ । उ॒षसा॑म् । इ॒धा॒नः ॥
Padapatha Devanagari Nonaccented
श्रीणाम् । उत्ऽआरः । धरुणः । रयीणाम् । मनीषाणाम् । प्रऽअर्पणः । सोमऽगोपाः ।
वसुः । सूनुः । सहसः । अप्ऽसु । राजा । वि । भाति । अग्रे । उषसाम् । इधानः ॥
Padapatha Transcription Accented
śrīṇā́m ǀ ut-āráḥ ǀ dharúṇaḥ ǀ rayīṇā́m ǀ manīṣā́ṇām ǀ pra-árpaṇaḥ ǀ sóma-gopāḥ ǀ
vásuḥ ǀ sūnúḥ ǀ sáhasaḥ ǀ ap-sú ǀ rā́jā ǀ ví ǀ bhāti ǀ ágre ǀ uṣásām ǀ idhānáḥ ǁ
Padapatha Transcription Nonaccented
śrīṇām ǀ ut-āraḥ ǀ dharuṇaḥ ǀ rayīṇām ǀ manīṣāṇām ǀ pra-arpaṇaḥ ǀ soma-gopāḥ ǀ
vasuḥ ǀ sūnuḥ ǀ sahasaḥ ǀ ap-su ǀ rājā ǀ vi ǀ bhāti ǀ agre ǀ uṣasām ǀ idhānaḥ ǁ
10.045.06 (Mandala. Sukta. Rik)
7.8.28.06 (Ashtaka. Adhyaya. Varga. Rik)
10.04.028 (Mandala. Anuvāka. Rik)
Samhita Devanagari Accented
विश्व॑स्य के॒तुर्भुव॑नस्य॒ गर्भ॒ आ रोद॑सी अपृणा॒ज्जाय॑मानः ।
वी॒ळुं चि॒दद्रि॑मभिनत्परा॒यंजना॒ यद॒ग्निमय॑जंत॒ पंच॑ ॥
Samhita Devanagari Nonaccented
विश्वस्य केतुर्भुवनस्य गर्भ आ रोदसी अपृणाज्जायमानः ।
वीळुं चिदद्रिमभिनत्परायंजना यदग्निमयजंत पंच ॥
Samhita Transcription Accented
víśvasya ketúrbhúvanasya gárbha ā́ ródasī apṛṇājjā́yamānaḥ ǀ
vīḷúm cidádrimabhinatparāyáñjánā yádagnímáyajanta páñca ǁ
Samhita Transcription Nonaccented
viśvasya keturbhuvanasya garbha ā rodasī apṛṇājjāyamānaḥ ǀ
vīḷum cidadrimabhinatparāyañjanā yadagnimayajanta pañca ǁ
Padapatha Devanagari Accented
विश्व॑स्य । के॒तुः । भुव॑नस्य । गर्भः॑ । आ । रोद॑सी॒ इति॑ । अ॒पृ॒णा॒त् । जाय॑मानः ।
वी॒ळुम् । चि॒त् । अद्रि॑म् । अ॒भि॒न॒त् । प॒रा॒ऽयन् । जनाः॑ । यत् । अ॒ग्निम् । अय॑जन्त । पञ्च॑ ॥
Padapatha Devanagari Nonaccented
विश्वस्य । केतुः । भुवनस्य । गर्भः । आ । रोदसी इति । अपृणात् । जायमानः ।
वीळुम् । चित् । अद्रिम् । अभिनत् । पराऽयन् । जनाः । यत् । अग्निम् । अयजन्त । पञ्च ॥
Padapatha Transcription Accented
víśvasya ǀ ketúḥ ǀ bhúvanasya ǀ gárbhaḥ ǀ ā́ ǀ ródasī íti ǀ apṛṇāt ǀ jā́yamānaḥ ǀ
vīḷúm ǀ cit ǀ ádrim ǀ abhinat ǀ parā-yán ǀ jánāḥ ǀ yát ǀ agním ǀ áyajanta ǀ páñca ǁ
Padapatha Transcription Nonaccented
viśvasya ǀ ketuḥ ǀ bhuvanasya ǀ garbhaḥ ǀ ā ǀ rodasī iti ǀ apṛṇāt ǀ jāyamānaḥ ǀ
vīḷum ǀ cit ǀ adrim ǀ abhinat ǀ parā-yan ǀ janāḥ ǀ yat ǀ agnim ǀ ayajanta ǀ pañca ǁ
10.045.07 (Mandala. Sukta. Rik)
7.8.29.01 (Ashtaka. Adhyaya. Varga. Rik)
10.04.029 (Mandala. Anuvāka. Rik)
Samhita Devanagari Accented
उ॒शिक्पा॑व॒को अ॑र॒तिः सु॑मे॒धा मर्ते॑ष्व॒ग्निर॒मृतो॒ नि धा॑यि ।
इय॑र्ति धू॒मम॑रु॒षं भरि॑भ्र॒दुच्छु॒क्रेण॑ शो॒चिषा॒ द्यामिन॑क्षन् ॥
Samhita Devanagari Nonaccented
उशिक्पावको अरतिः सुमेधा मर्तेष्वग्निरमृतो नि धायि ।
इयर्ति धूममरुषं भरिभ्रदुच्छुक्रेण शोचिषा द्यामिनक्षन् ॥
Samhita Transcription Accented
uśíkpāvakó aratíḥ sumedhā́ márteṣvagníramṛ́to ní dhāyi ǀ
íyarti dhūmámaruṣám bháribhradúcchukréṇa śocíṣā dyā́mínakṣan ǁ
Samhita Transcription Nonaccented
uśikpāvako aratiḥ sumedhā marteṣvagniramṛto ni dhāyi ǀ
iyarti dhūmamaruṣam bharibhraducchukreṇa śociṣā dyāminakṣan ǁ
Padapatha Devanagari Accented
उ॒शिक् । पा॒व॒कः । अ॒र॒तिः । सु॒ऽमे॒धाः । मर्ते॑षु । अ॒ग्निः । अ॒मृतः॑ । नि । धा॒यि॒ ।
इय॑र्ति । धू॒मम् । अ॒रु॒षम् । भरि॑भ्रत् । उत् । शु॒क्रेण॑ । शो॒चिषा॑ । द्याम् । इन॑क्षन् ॥
Padapatha Devanagari Nonaccented
उशिक् । पावकः । अरतिः । सुऽमेधाः । मर्तेषु । अग्निः । अमृतः । नि । धायि ।
इयर्ति । धूमम् । अरुषम् । भरिभ्रत् । उत् । शुक्रेण । शोचिषा । द्याम् । इनक्षन् ॥
Padapatha Transcription Accented
uśík ǀ pāvakáḥ ǀ aratíḥ ǀ su-medhā́ḥ ǀ márteṣu ǀ agníḥ ǀ amṛ́taḥ ǀ ní ǀ dhāyi ǀ
íyarti ǀ dhūmám ǀ aruṣám ǀ bháribhrat ǀ út ǀ śukréṇa ǀ śocíṣā ǀ dyā́m ǀ ínakṣan ǁ
Padapatha Transcription Nonaccented
uśik ǀ pāvakaḥ ǀ aratiḥ ǀ su-medhāḥ ǀ marteṣu ǀ agniḥ ǀ amṛtaḥ ǀ ni ǀ dhāyi ǀ
iyarti ǀ dhūmam ǀ aruṣam ǀ bharibhrat ǀ ut ǀ śukreṇa ǀ śociṣā ǀ dyām ǀ inakṣan ǁ
10.045.08 (Mandala. Sukta. Rik)
7.8.29.02 (Ashtaka. Adhyaya. Varga. Rik)
10.04.030 (Mandala. Anuvāka. Rik)
Samhita Devanagari Accented
दृ॒शा॒नो रु॒क्म उ॑र्वि॒या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः ।
अ॒ग्निर॒मृतो॑ अभव॒द्वयो॑भि॒र्यदे॑नं॒ द्यौर्ज॒नय॑त्सु॒रेताः॑ ॥
Samhita Devanagari Nonaccented
दृशानो रुक्म उर्विया व्यद्यौद्दुर्मर्षमायुः श्रिये रुचानः ।
अग्निरमृतो अभवद्वयोभिर्यदेनं द्यौर्जनयत्सुरेताः ॥
Samhita Transcription Accented
dṛśānó rukmá urviyā́ vyádyauddurmárṣamā́yuḥ śriyé rucānáḥ ǀ
agníramṛ́to abhavadváyobhiryádenam dyáurjanáyatsurétāḥ ǁ
Samhita Transcription Nonaccented
dṛśāno rukma urviyā vyadyauddurmarṣamāyuḥ śriye rucānaḥ ǀ
agniramṛto abhavadvayobhiryadenam dyaurjanayatsuretāḥ ǁ
Padapatha Devanagari Accented
दृ॒शा॒नः । रु॒क्मः । उ॒र्वि॒या । वि । अ॒द्यौ॒त् । दुः॒ऽमर्ष॑म् । आयुः॑ । श्रि॒ये । रु॒चा॒नः ।
अ॒ग्निः । अ॒मृतः॑ । अ॒भ॒व॒त् । वयः॑ऽभिः । यत् । ए॒न॒म् । द्यौः । ज॒नय॑त् । सु॒ऽरेताः॑ ॥
Padapatha Devanagari Nonaccented
दृशानः । रुक्मः । उर्विया । वि । अद्यौत् । दुःऽमर्षम् । आयुः । श्रिये । रुचानः ।
अग्निः । अमृतः । अभवत् । वयःऽभिः । यत् । एनम् । द्यौः । जनयत् । सुऽरेताः ॥
Padapatha Transcription Accented
dṛśānáḥ ǀ rukmáḥ ǀ urviyā́ ǀ ví ǀ adyaut ǀ duḥ-márṣam ǀ ā́yuḥ ǀ śriyé ǀ rucānáḥ ǀ
agníḥ ǀ amṛ́taḥ ǀ abhavat ǀ váyaḥ-bhiḥ ǀ yát ǀ enam ǀ dyáuḥ ǀ janáyat ǀ su-rétāḥ ǁ
Padapatha Transcription Nonaccented
dṛśānaḥ ǀ rukmaḥ ǀ urviyā ǀ vi ǀ adyaut ǀ duḥ-marṣam ǀ āyuḥ ǀ śriye ǀ rucānaḥ ǀ
agniḥ ǀ amṛtaḥ ǀ abhavat ǀ vayaḥ-bhiḥ ǀ yat ǀ enam ǀ dyauḥ ǀ janayat ǀ su-retāḥ ǁ
10.045.09 (Mandala. Sukta. Rik)
7.8.29.03 (Ashtaka. Adhyaya. Varga. Rik)
10.04.031 (Mandala. Anuvāka. Rik)
Samhita Devanagari Accented
यस्ते॑ अ॒द्य कृ॒णव॑द्भद्रशोचेऽपू॒पं दे॑व घृ॒तवं॑तमग्ने ।
प्र तं न॑य प्रत॒रं वस्यो॒ अच्छा॒भि सु॒म्नं दे॒वभ॑क्तं यविष्ठ ॥
Samhita Devanagari Nonaccented
यस्ते अद्य कृणवद्भद्रशोचेऽपूपं देव घृतवंतमग्ने ।
प्र तं नय प्रतरं वस्यो अच्छाभि सुम्नं देवभक्तं यविष्ठ ॥
Samhita Transcription Accented
yáste adyá kṛṇávadbhadraśoce’pūpám deva ghṛtávantamagne ǀ
prá tám naya pratarám vásyo ácchābhí sumnám devábhaktam yaviṣṭha ǁ
Samhita Transcription Nonaccented
yaste adya kṛṇavadbhadraśoce’pūpam deva ghṛtavantamagne ǀ
pra tam naya prataram vasyo acchābhi sumnam devabhaktam yaviṣṭha ǁ
Padapatha Devanagari Accented
यः । ते॒ । अ॒द्य । कृ॒णव॑त् । भ॒द्र॒ऽशो॒चे॒ । अ॒पू॒पम् । दे॒व॒ । घृ॒तऽव॑न्तम् । अ॒ग्ने॒ ।
प्र । तम् । न॒य॒ । प्र॒ऽत॒रम् । वस्यः॑ । अच्छ॑ । अ॒भि । सु॒म्नम् । दे॒वऽभ॑क्तम् । य॒वि॒ष्ठ॒ ॥
Padapatha Devanagari Nonaccented
यः । ते । अद्य । कृणवत् । भद्रऽशोचे । अपूपम् । देव । घृतऽवन्तम् । अग्ने ।
प्र । तम् । नय । प्रऽतरम् । वस्यः । अच्छ । अभि । सुम्नम् । देवऽभक्तम् । यविष्ठ ॥
Padapatha Transcription Accented
yáḥ ǀ te ǀ adyá ǀ kṛṇávat ǀ bhadra-śoce ǀ apūpám ǀ deva ǀ ghṛtá-vantam ǀ agne ǀ
prá ǀ tám ǀ naya ǀ pra-tarám ǀ vásyaḥ ǀ áccha ǀ abhí ǀ sumnám ǀ devá-bhaktam ǀ yaviṣṭha ǁ
Padapatha Transcription Nonaccented
yaḥ ǀ te ǀ adya ǀ kṛṇavat ǀ bhadra-śoce ǀ apūpam ǀ deva ǀ ghṛta-vantam ǀ agne ǀ
pra ǀ tam ǀ naya ǀ pra-taram ǀ vasyaḥ ǀ accha ǀ abhi ǀ sumnam ǀ deva-bhaktam ǀ yaviṣṭha ǁ
10.045.10 (Mandala. Sukta. Rik)
7.8.29.04 (Ashtaka. Adhyaya. Varga. Rik)
10.04.032 (Mandala. Anuvāka. Rik)
Samhita Devanagari Accented
आ तं भ॑ज सौश्रव॒सेष्व॑ग्न उ॒क्थौ॑क्थ॒ आ भ॑ज श॒स्यमा॑ने ।
प्रि॒यः सूर्ये॑ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः ॥
Samhita Devanagari Nonaccented
आ तं भज सौश्रवसेष्वग्न उक्थौक्थ आ भज शस्यमाने ।
प्रियः सूर्ये प्रियो अग्ना भवात्युज्जातेन भिनददुज्जनित्वैः ॥
Samhita Transcription Accented
ā́ tám bhaja sauśravaséṣvagna uktháuktha ā́ bhaja śasyámāne ǀ
priyáḥ sū́rye priyó agnā́ bhavātyújjāténa bhinádadújjánitvaiḥ ǁ
Samhita Transcription Nonaccented
ā tam bhaja sauśravaseṣvagna ukthauktha ā bhaja śasyamāne ǀ
priyaḥ sūrye priyo agnā bhavātyujjātena bhinadadujjanitvaiḥ ǁ
Padapatha Devanagari Accented
आ । तम् । भ॒ज॒ । सौ॒श्र॒व॒सेषु॑ । अ॒ग्ने॒ । उ॒क्थेऽउ॑क्थे । आ । भ॒ज॒ । श॒स्यमा॑ने ।
प्रि॒यः । सूर्ये॑ । प्रि॒यः । अ॒ग्ना । भ॒वा॒ति॒ । उत् । जा॒तेन॑ । भि॒नद॑त् । उत् । जनि॑ऽत्वैः ॥
Padapatha Devanagari Nonaccented
आ । तम् । भज । सौश्रवसेषु । अग्ने । उक्थेऽउक्थे । आ । भज । शस्यमाने ।
प्रियः । सूर्ये । प्रियः । अग्ना । भवाति । उत् । जातेन । भिनदत् । उत् । जनिऽत्वैः ॥
Padapatha Transcription Accented
ā́ ǀ tám ǀ bhaja ǀ sauśravaséṣu ǀ agne ǀ ukthé-ukthe ǀ ā́ ǀ bhaja ǀ śasyámāne ǀ
priyáḥ ǀ sū́rye ǀ priyáḥ ǀ agnā́ ǀ bhavāti ǀ út ǀ jāténa ǀ bhinádat ǀ út ǀ jáni-tvaiḥ ǁ
Padapatha Transcription Nonaccented
ā ǀ tam ǀ bhaja ǀ sauśravaseṣu ǀ agne ǀ ukthe-ukthe ǀ ā ǀ bhaja ǀ śasyamāne ǀ
priyaḥ ǀ sūrye ǀ priyaḥ ǀ agnā ǀ bhavāti ǀ ut ǀ jātena ǀ bhinadat ǀ ut ǀ jani-tvaiḥ ǁ
10.045.11 (Mandala. Sukta. Rik)
7.8.29.05 (Ashtaka. Adhyaya. Varga. Rik)
10.04.033 (Mandala. Anuvāka. Rik)
Samhita Devanagari Accented
त्वाम॑ग्ने॒ यज॑माना॒ अनु॒ द्यून्विश्वा॒ वसु॑ दधिरे॒ वार्या॑णि ।
त्वया॑ स॒ह द्रवि॑णमि॒च्छमा॑ना व्र॒जं गोमं॑तमु॒शिजो॒ वि व॑व्रुः ॥
Samhita Devanagari Nonaccented
त्वामग्ने यजमाना अनु द्यून्विश्वा वसु दधिरे वार्याणि ।
त्वया सह द्रविणमिच्छमाना व्रजं गोमंतमुशिजो वि वव्रुः ॥
Samhita Transcription Accented
tvā́magne yájamānā ánu dyū́nvíśvā vásu dadhire vā́ryāṇi ǀ
tváyā sahá dráviṇamicchámānā vrajám gómantamuśíjo ví vavruḥ ǁ
Samhita Transcription Nonaccented
tvāmagne yajamānā anu dyūnviśvā vasu dadhire vāryāṇi ǀ
tvayā saha draviṇamicchamānā vrajam gomantamuśijo vi vavruḥ ǁ
Padapatha Devanagari Accented
त्वाम् । अ॒ग्ने॒ । यज॑मानाः । अनु॑ । द्यून् । विश्वा॑ । वसु॑ । द॒धि॒रे॒ । वार्या॑णि ।
त्वया॑ । स॒ह । द्रवि॑णम् । इ॒च्छमा॑नाः । व्र॒जम् । गोऽम॑न्तम् । उ॒शिजः॑ । वि । व॒व्रुः॒ ॥
Padapatha Devanagari Nonaccented
त्वाम् । अग्ने । यजमानाः । अनु । द्यून् । विश्वा । वसु । दधिरे । वार्याणि ।
त्वया । सह । द्रविणम् । इच्छमानाः । व्रजम् । गोऽमन्तम् । उशिजः । वि । वव्रुः ॥
Padapatha Transcription Accented
tvā́m ǀ agne ǀ yájamānāḥ ǀ ánu ǀ dyū́n ǀ víśvā ǀ vásu ǀ dadhire ǀ vā́ryāṇi ǀ
tváyā ǀ sahá ǀ dráviṇam ǀ icchámānāḥ ǀ vrajám ǀ gó-mantam ǀ uśíjaḥ ǀ ví ǀ vavruḥ ǁ
Padapatha Transcription Nonaccented
tvām ǀ agne ǀ yajamānāḥ ǀ anu ǀ dyūn ǀ viśvā ǀ vasu ǀ dadhire ǀ vāryāṇi ǀ
tvayā ǀ saha ǀ draviṇam ǀ icchamānāḥ ǀ vrajam ǀ go-mantam ǀ uśijaḥ ǀ vi ǀ vavruḥ ǁ
10.045.12 (Mandala. Sukta. Rik)
7.8.29.06 (Ashtaka. Adhyaya. Varga. Rik)
10.04.034 (Mandala. Anuvāka. Rik)
Samhita Devanagari Accented
अस्ता॑व्य॒ग्निर्न॒रां सु॒शेवो॑ वैश्वान॒र ऋषि॑भिः॒ सोम॑गोपाः ।
अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीरं॑ ॥
Samhita Devanagari Nonaccented
अस्ताव्यग्निर्नरां सुशेवो वैश्वानर ऋषिभिः सोमगोपाः ।
अद्वेषे द्यावापृथिवी हुवेम देवा धत्त रयिमस्मे सुवीरं ॥
Samhita Transcription Accented
ástāvyagnírnarā́m suśévo vaiśvānará ṛ́ṣibhiḥ sómagopāḥ ǀ
adveṣé dyā́vāpṛthivī́ huvema dévā dhattá rayímasmé suvī́ram ǁ
Samhita Transcription Nonaccented
astāvyagnirnarām suśevo vaiśvānara ṛṣibhiḥ somagopāḥ ǀ
adveṣe dyāvāpṛthivī huvema devā dhatta rayimasme suvīram ǁ
Padapatha Devanagari Accented
अस्ता॑वि । अ॒ग्निः । न॒राम् । सु॒ऽशेवः॑ । वै॒श्वा॒न॒रः । ऋषि॑ऽभिः । सोम॑ऽगोपाः ।
अ॒द्वे॒षे इति॑ । द्यावा॑पृथि॒वी इति॑ । हु॒वे॒म॒ । देवाः॑ । ध॒त्त । र॒यिम् । अ॒स्मे इति॑ । सु॒ऽवीर॑म् ॥
Padapatha Devanagari Nonaccented
अस्तावि । अग्निः । नराम् । सुऽशेवः । वैश्वानरः । ऋषिऽभिः । सोमऽगोपाः ।
अद्वेषे इति । द्यावापृथिवी इति । हुवेम । देवाः । धत्त । रयिम् । अस्मे इति । सुऽवीरम् ॥
Padapatha Transcription Accented
ástāvi ǀ agníḥ ǀ narā́m ǀ su-śévaḥ ǀ vaiśvānaráḥ ǀ ṛ́ṣi-bhiḥ ǀ sóma-gopāḥ ǀ
adveṣé íti ǀ dyā́vāpṛthivī́ íti ǀ huvema ǀ dévāḥ ǀ dhattá ǀ rayím ǀ asmé íti ǀ su-vī́ram ǁ
Padapatha Transcription Nonaccented
astāvi ǀ agniḥ ǀ narām ǀ su-śevaḥ ǀ vaiśvānaraḥ ǀ ṛṣi-bhiḥ ǀ soma-gopāḥ ǀ
adveṣe iti ǀ dyāvāpṛthivī iti ǀ huvema ǀ devāḥ ǀ dhatta ǀ rayim ǀ asme iti ǀ su-vīram ǁ