|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 52
|
1. Info |
| To: | 1: viśvedevās; 2: aśvins, maruts, viśvedevās; 3, 4: agni; 5, 6: agni, devāḥ |
|
| From: | agni saucīka | |
| Metres: | 1st set of styles: nicṛttriṣṭup (2-4); virāṭtrisṭup (5, 6); triṣṭup (1) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.052.01 (Mandala. Sukta. Rik)
8.1.12.01 (Ashtaka. Adhyaya. Varga. Rik)
10.04.091 (Mandala. Anuvāka. Rik)
Samhita Devanagari Accented
विश्वे॑ देवाः शा॒स्तन॑ मा॒ यथे॒ह होता॑ वृ॒तो म॒नवै॒ यन्नि॒षद्य॑ ।
प्र मे॑ ब्रूत भाग॒धेयं॒ यथा॑ वो॒ येन॑ प॒था ह॒व्यमा वो॒ वहा॑नि ॥
Samhita Devanagari Nonaccented
विश्वे देवाः शास्तन मा यथेह होता वृतो मनवै यन्निषद्य ।
प्र मे ब्रूत भागधेयं यथा वो येन पथा हव्यमा वो वहानि ॥
Samhita Transcription Accented
víśve devāḥ śāstána mā yáthehá hótā vṛtó manávai yánniṣádya ǀ
prá me brūta bhāgadhéyam yáthā vo yéna pathā́ havyámā́ vo váhāni ǁ
Samhita Transcription Nonaccented
viśve devāḥ śāstana mā yatheha hotā vṛto manavai yanniṣadya ǀ
pra me brūta bhāgadheyam yathā vo yena pathā havyamā vo vahāni ǁ
Padapatha Devanagari Accented
विश्वे॑ । दे॒वाः॒ । शा॒स्तन॑ । मा॒ । यथा॑ । इ॒ह । होता॑ । वृ॒तः । म॒नवै॑ । यत् । नि॒ऽसद्य॑ ।
प्र । मे॒ । ब्रू॒त॒ । भा॒ग॒ऽधेय॑म् । यथा॑ । वः॒ । येन॑ । प॒था । ह॒व्यम् । आ । वः॒ । वहा॑नि ॥
Padapatha Devanagari Nonaccented
विश्वे । देवाः । शास्तन । मा । यथा । इह । होता । वृतः । मनवै । यत् । निऽसद्य ।
प्र । मे । ब्रूत । भागऽधेयम् । यथा । वः । येन । पथा । हव्यम् । आ । वः । वहानि ॥
Padapatha Transcription Accented
víśve ǀ devāḥ ǀ śāstána ǀ mā ǀ yáthā ǀ ihá ǀ hótā ǀ vṛtáḥ ǀ manávai ǀ yát ǀ ni-sádya ǀ
prá ǀ me ǀ brūta ǀ bhāga-dhéyam ǀ yáthā ǀ vaḥ ǀ yéna ǀ pathā́ ǀ havyám ǀ ā́ ǀ vaḥ ǀ váhāni ǁ
Padapatha Transcription Nonaccented
viśve ǀ devāḥ ǀ śāstana ǀ mā ǀ yathā ǀ iha ǀ hotā ǀ vṛtaḥ ǀ manavai ǀ yat ǀ ni-sadya ǀ
pra ǀ me ǀ brūta ǀ bhāga-dheyam ǀ yathā ǀ vaḥ ǀ yena ǀ pathā ǀ havyam ǀ ā ǀ vaḥ ǀ vahāni ǁ
10.052.02 (Mandala. Sukta. Rik)
8.1.12.02 (Ashtaka. Adhyaya. Varga. Rik)
10.04.092 (Mandala. Anuvāka. Rik)
Samhita Devanagari Accented
अ॒हं होता॒ न्य॑सीदं॒ यजी॑या॒न्विश्वे॑ दे॒वा म॒रुतो॑ मा जुनंति ।
अह॑रहरश्वि॒नाध्व॑र्यवं वां ब्र॒ह्मा स॒मिद्भ॑वति॒ साहु॑तिर्वां ॥
Samhita Devanagari Nonaccented
अहं होता न्यसीदं यजीयान्विश्वे देवा मरुतो मा जुनंति ।
अहरहरश्विनाध्वर्यवं वां ब्रह्मा समिद्भवति साहुतिर्वां ॥
Samhita Transcription Accented
ahám hótā nyásīdam yájīyānvíśve devā́ marúto mā junanti ǀ
áharaharaśvinā́dhvaryavam vām brahmā́ samídbhavati sā́hutirvām ǁ
Samhita Transcription Nonaccented
aham hotā nyasīdam yajīyānviśve devā maruto mā junanti ǀ
aharaharaśvinādhvaryavam vām brahmā samidbhavati sāhutirvām ǁ
Padapatha Devanagari Accented
अ॒हम् । होता॑ । नि । अ॒सी॒द॒म् । यजी॑यान् । विश्वे॑ । दे॒वाः । म॒रुतः॑ । मा॒ । जु॒न॒न्ति॒ ।
अहः॑ऽअहः । अ॒श्वि॒ना॒ । आध्व॑र्यवम् । वा॒म् । ब्र॒ह्मा । स॒म्ऽइत् । भ॒व॒ति॒ । सा । आऽहु॑तिः । वा॒म् ॥
Padapatha Devanagari Nonaccented
अहम् । होता । नि । असीदम् । यजीयान् । विश्वे । देवाः । मरुतः । मा । जुनन्ति ।
अहःऽअहः । अश्विना । आध्वर्यवम् । वाम् । ब्रह्मा । सम्ऽइत् । भवति । सा । आऽहुतिः । वाम् ॥
Padapatha Transcription Accented
ahám ǀ hótā ǀ ní ǀ asīdam ǀ yájīyān ǀ víśve ǀ devā́ḥ ǀ marútaḥ ǀ mā ǀ junanti ǀ
áhaḥ-ahaḥ ǀ aśvinā ǀ ā́dhvaryavam ǀ vām ǀ brahmā́ ǀ sam-ít ǀ bhavati ǀ sā́ ǀ ā́-hutiḥ ǀ vām ǁ
Padapatha Transcription Nonaccented
aham ǀ hotā ǀ ni ǀ asīdam ǀ yajīyān ǀ viśve ǀ devāḥ ǀ marutaḥ ǀ mā ǀ junanti ǀ
ahaḥ-ahaḥ ǀ aśvinā ǀ ādhvaryavam ǀ vām ǀ brahmā ǀ sam-it ǀ bhavati ǀ sā ǀ ā-hutiḥ ǀ vām ǁ
10.052.03 (Mandala. Sukta. Rik)
8.1.12.03 (Ashtaka. Adhyaya. Varga. Rik)
10.04.093 (Mandala. Anuvāka. Rik)
Samhita Devanagari Accented
अ॒यं यो होता॒ किरु॒ स य॒मस्य॒ कमप्यू॑हे॒ यत्स॑मं॒जंति॑ दे॒वाः ।
अह॑रहर्जायते मा॒सिमा॒स्यथा॑ दे॒वा द॑धिरे हव्य॒वाहं॑ ॥
Samhita Devanagari Nonaccented
अयं यो होता किरु स यमस्य कमप्यूहे यत्समंजंति देवाः ।
अहरहर्जायते मासिमास्यथा देवा दधिरे हव्यवाहं ॥
Samhita Transcription Accented
ayám yó hótā kíru sá yamásya kámápyūhe yátsamañjánti devā́ḥ ǀ
áharaharjāyate māsímāsyáthā devā́ dadhire havyavā́ham ǁ
Samhita Transcription Nonaccented
ayam yo hotā kiru sa yamasya kamapyūhe yatsamañjanti devāḥ ǀ
aharaharjāyate māsimāsyathā devā dadhire havyavāham ǁ
Padapatha Devanagari Accented
अ॒यम् । यः । होता॑ । किः । ऊं॒ इति॑ । सः । य॒मस्य॑ । कम् । अपि॑ । ऊ॒हे॒ । यत् । स॒म्ऽअ॒ञ्जन्ति॑ । दे॒वाः ।
अहः॑ऽअहः । जा॒य॒ते॒ । मा॒सिऽमा॑सि । अथ॑ । दे॒वाः । द॒धि॒रे॒ । ह॒व्य॒ऽवाह॑म् ॥
Padapatha Devanagari Nonaccented
अयम् । यः । होता । किः । ऊं इति । सः । यमस्य । कम् । अपि । ऊहे । यत् । सम्ऽअञ्जन्ति । देवाः ।
अहःऽअहः । जायते । मासिऽमासि । अथ । देवाः । दधिरे । हव्यऽवाहम् ॥
Padapatha Transcription Accented
ayám ǀ yáḥ ǀ hótā ǀ kíḥ ǀ ūṃ íti ǀ sáḥ ǀ yamásya ǀ kám ǀ ápi ǀ ūhe ǀ yát ǀ sam-añjánti ǀ devā́ḥ ǀ
áhaḥ-ahaḥ ǀ jāyate ǀ māsí-māsi ǀ átha ǀ devā́ḥ ǀ dadhire ǀ havya-vā́ham ǁ
Padapatha Transcription Nonaccented
ayam ǀ yaḥ ǀ hotā ǀ kiḥ ǀ ūṃ iti ǀ saḥ ǀ yamasya ǀ kam ǀ api ǀ ūhe ǀ yat ǀ sam-añjanti ǀ devāḥ ǀ
ahaḥ-ahaḥ ǀ jāyate ǀ māsi-māsi ǀ atha ǀ devāḥ ǀ dadhire ǀ havya-vāham ǁ
10.052.04 (Mandala. Sukta. Rik)
8.1.12.04 (Ashtaka. Adhyaya. Varga. Rik)
10.04.094 (Mandala. Anuvāka. Rik)
Samhita Devanagari Accented
मां दे॒वा द॑धिरे हव्य॒वाह॒मप॑म्लुक्तं ब॒हु कृ॒च्छ्रा चरं॑तं ।
अ॒ग्निर्वि॒द्वान्य॒ज्ञं नः॑ कल्पयाति॒ पंच॑यामं त्रि॒वृतं॑ स॒प्ततं॑तुं ॥
Samhita Devanagari Nonaccented
मां देवा दधिरे हव्यवाहमपम्लुक्तं बहु कृच्छ्रा चरंतं ।
अग्निर्विद्वान्यज्ञं नः कल्पयाति पंचयामं त्रिवृतं सप्ततंतुं ॥
Samhita Transcription Accented
mā́m devā́ dadhire havyavā́hamápamluktam bahú kṛcchrā́ cárantam ǀ
agnírvidvā́nyajñám naḥ kalpayāti páñcayāmam trivṛ́tam saptátantum ǁ
Samhita Transcription Nonaccented
mām devā dadhire havyavāhamapamluktam bahu kṛcchrā carantam ǀ
agnirvidvānyajñam naḥ kalpayāti pañcayāmam trivṛtam saptatantum ǁ
Padapatha Devanagari Accented
माम् । दे॒वाः । द॒धि॒रे॒ । ह॒व्य॒ऽवाह॑म् । अप॑ऽम्लुक्तम् । ब॒हु । कृ॒च्छ्रा । चर॑न्तम् ।
अ॒ग्निः । वि॒द्वान् । य॒ज्ञम् । नः॒ । क॒ल्प॒या॒ति॒ । पञ्च॑ऽयामम् । त्रि॒ऽवृत॑म् । स॒प्तऽत॑न्तुम् ॥
Padapatha Devanagari Nonaccented
माम् । देवाः । दधिरे । हव्यऽवाहम् । अपऽम्लुक्तम् । बहु । कृच्छ्रा । चरन्तम् ।
अग्निः । विद्वान् । यज्ञम् । नः । कल्पयाति । पञ्चऽयामम् । त्रिऽवृतम् । सप्तऽतन्तुम् ॥
Padapatha Transcription Accented
mā́m ǀ devā́ḥ ǀ dadhire ǀ havya-vā́ham ǀ ápa-mluktam ǀ bahú ǀ kṛcchrā́ ǀ cárantam ǀ
agníḥ ǀ vidvā́n ǀ yajñám ǀ naḥ ǀ kalpayāti ǀ páñca-yāmam ǀ tri-vṛ́tam ǀ saptá-tantum ǁ
Padapatha Transcription Nonaccented
mām ǀ devāḥ ǀ dadhire ǀ havya-vāham ǀ apa-mluktam ǀ bahu ǀ kṛcchrā ǀ carantam ǀ
agniḥ ǀ vidvān ǀ yajñam ǀ naḥ ǀ kalpayāti ǀ pañca-yāmam ǀ tri-vṛtam ǀ sapta-tantum ǁ
10.052.05 (Mandala. Sukta. Rik)
8.1.12.05 (Ashtaka. Adhyaya. Varga. Rik)
10.04.095 (Mandala. Anuvāka. Rik)
Samhita Devanagari Accented
आ वो॑ यक्ष्यमृत॒त्वं सु॒वीरं॒ यथा॑ वो देवा॒ वरि॑वः॒ करा॑णि ।
आ बा॒ह्वोर्वज्र॒मिंद्र॑स्य धेया॒मथे॒मा विश्वाः॒ पृत॑ना जयाति ॥
Samhita Devanagari Nonaccented
आ वो यक्ष्यमृतत्वं सुवीरं यथा वो देवा वरिवः कराणि ।
आ बाह्वोर्वज्रमिंद्रस्य धेयामथेमा विश्वाः पृतना जयाति ॥
Samhita Transcription Accented
ā́ vo yakṣyamṛtatvám suvī́ram yáthā vo devā várivaḥ kárāṇi ǀ
ā́ bāhvórvájramíndrasya dheyāmáthemā́ víśvāḥ pṛ́tanā jayāti ǁ
Samhita Transcription Nonaccented
ā vo yakṣyamṛtatvam suvīram yathā vo devā varivaḥ karāṇi ǀ
ā bāhvorvajramindrasya dheyāmathemā viśvāḥ pṛtanā jayāti ǁ
Padapatha Devanagari Accented
आ । वः॒ । य॒क्षि॒ । अ॒मृ॒त॒ऽत्वम् । सु॒ऽवीर॑म् । यथा॑ । वः॒ । दे॒वाः॒ । वरि॑वः । करा॑णि ।
आ । बा॒ह्वोः । वज्र॑म् । इन्द्र॑स्य । धे॒या॒म् । अथ॑ । इ॒माः । विश्वाः॑ । पृत॑नाः । ज॒या॒ति॒ ॥
Padapatha Devanagari Nonaccented
आ । वः । यक्षि । अमृतऽत्वम् । सुऽवीरम् । यथा । वः । देवाः । वरिवः । कराणि ।
आ । बाह्वोः । वज्रम् । इन्द्रस्य । धेयाम् । अथ । इमाः । विश्वाः । पृतनाः । जयाति ॥
Padapatha Transcription Accented
ā́ ǀ vaḥ ǀ yakṣi ǀ amṛta-tvám ǀ su-vī́ram ǀ yáthā ǀ vaḥ ǀ devāḥ ǀ várivaḥ ǀ kárāṇi ǀ
ā́ ǀ bāhvóḥ ǀ vájram ǀ índrasya ǀ dheyām ǀ átha ǀ imā́ḥ ǀ víśvāḥ ǀ pṛ́tanāḥ ǀ jayāti ǁ
Padapatha Transcription Nonaccented
ā ǀ vaḥ ǀ yakṣi ǀ amṛta-tvam ǀ su-vīram ǀ yathā ǀ vaḥ ǀ devāḥ ǀ varivaḥ ǀ karāṇi ǀ
ā ǀ bāhvoḥ ǀ vajram ǀ indrasya ǀ dheyām ǀ atha ǀ imāḥ ǀ viśvāḥ ǀ pṛtanāḥ ǀ jayāti ǁ
10.052.06 (Mandala. Sukta. Rik)
8.1.12.06 (Ashtaka. Adhyaya. Varga. Rik)
10.04.096 (Mandala. Anuvāka. Rik)
Samhita Devanagari Accented
त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न्घृ॒तैरस्तृ॑णन्ब॒र्हिर॑स्मा॒ आदिद्धोता॑रं॒ न्य॑सादयंत ॥
Samhita Devanagari Nonaccented
त्रीणि शता त्री सहस्राण्यग्निं त्रिंशच्च देवा नव चासपर्यन् ।
औक्षन्घृतैरस्तृणन्बर्हिरस्मा आदिद्धोतारं न्यसादयंत ॥
Samhita Transcription Accented
trī́ṇi śatā́ trī́ sahásrāṇyagním triṃśácca devā́ náva cāsaparyan ǀ
áukṣanghṛtáirástṛṇanbarhírasmā ā́díddhótāram nyásādayanta ǁ
Samhita Transcription Nonaccented
trīṇi śatā trī sahasrāṇyagnim triṃśacca devā nava cāsaparyan ǀ
aukṣanghṛtairastṛṇanbarhirasmā ādiddhotāram nyasādayanta ǁ
Padapatha Devanagari Accented
त्रीणि॑ । श॒ता । त्री । स॒हस्रा॑णि । अ॒ग्निम् । त्रिं॒शत् । च॒ । दे॒वाः । नव॑ । च॒ । अ॒स॒प॒र्य॒न् ।
औक्ष॑न् । घृ॒तैः । अस्तृ॑णन् । ब॒र्हिः । अ॒स्मै॒ । आत् । इत् । होता॑रम् । नि । अ॒सा॒द॒य॒न्त॒ ॥
Padapatha Devanagari Nonaccented
त्रीणि । शता । त्री । सहस्राणि । अग्निम् । त्रिंशत् । च । देवाः । नव । च । असपर्यन् ।
औक्षन् । घृतैः । अस्तृणन् । बर्हिः । अस्मै । आत् । इत् । होतारम् । नि । असादयन्त ॥
Padapatha Transcription Accented
trī́ṇi ǀ śatā́ ǀ trī́ ǀ sahásrāṇi ǀ agním ǀ triṃśát ǀ ca ǀ devā́ḥ ǀ náva ǀ ca ǀ asaparyan ǀ
áukṣan ǀ ghṛtáiḥ ǀ ástṛṇan ǀ barhíḥ ǀ asmai ǀ ā́t ǀ ít ǀ hótāram ǀ ní ǀ asādayanta ǁ
Padapatha Transcription Nonaccented
trīṇi ǀ śatā ǀ trī ǀ sahasrāṇi ǀ agnim ǀ triṃśat ǀ ca ǀ devāḥ ǀ nava ǀ ca ǀ asaparyan ǀ
aukṣan ǀ ghṛtaiḥ ǀ astṛṇan ǀ barhiḥ ǀ asmai ǀ āt ǀ it ǀ hotāram ǀ ni ǀ asādayanta ǁ