|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 55
|
1. Info |
| To: | indra | |
| From: | bṛhaduktha vāmadevya | |
| Metres: | 1st set of styles: triṣṭup (3, 4, 6); nicṛttriṣṭup (1, 8); pādanicṛttriṣṭup (2, 5); virāṭtrisṭup (7) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.055.01 (Mandala. Sukta. Rik)
8.1.16.01 (Ashtaka. Adhyaya. Varga. Rik)
10.04.114 (Mandala. Anuvāka. Rik)
Samhita Devanagari Accented
दू॒रे तन्नाम॒ गुह्यं॑ परा॒चैर्यत्त्वा॑ भी॒ते अह्व॑येतां वयो॒धै ।
उद॑स्तभ्नाः पृथि॒वीं द्याम॒भीके॒ भ्रातुः॑ पु॒त्रान्म॑घवंतित्विषा॒णः ॥
Samhita Devanagari Nonaccented
दूरे तन्नाम गुह्यं पराचैर्यत्त्वा भीते अह्वयेतां वयोधै ।
उदस्तभ्नाः पृथिवीं द्यामभीके भ्रातुः पुत्रान्मघवंतित्विषाणः ॥
Samhita Transcription Accented
dūré tánnā́ma gúhyam parācáiryáttvā bhīté áhvayetām vayodhái ǀ
údastabhnāḥ pṛthivī́m dyā́mabhī́ke bhrā́tuḥ putrā́nmaghavantitviṣāṇáḥ ǁ
Samhita Transcription Nonaccented
dūre tannāma guhyam parācairyattvā bhīte ahvayetām vayodhai ǀ
udastabhnāḥ pṛthivīm dyāmabhīke bhrātuḥ putrānmaghavantitviṣāṇaḥ ǁ
Padapatha Devanagari Accented
दू॒रे । तत् । नाम॑ । गुह्य॑म् । प॒रा॒चैः । यत् । त्वा॒ । भी॒ते इति॑ । अह्व॑येताम् । व॒यः॒ऽधै ।
उत् । अ॒स्त॒भ्नाः॒ । पृ॒थि॒वीम् । द्याम् । अ॒भीके॑ । भ्रातुः॑ । पु॒त्रान् । म॒घ॒ऽव॒न् । ति॒त्वि॒षा॒णः ॥
Padapatha Devanagari Nonaccented
दूरे । तत् । नाम । गुह्यम् । पराचैः । यत् । त्वा । भीते इति । अह्वयेताम् । वयःऽधै ।
उत् । अस्तभ्नाः । पृथिवीम् । द्याम् । अभीके । भ्रातुः । पुत्रान् । मघऽवन् । तित्विषाणः ॥
Padapatha Transcription Accented
dūré ǀ tát ǀ nā́ma ǀ gúhyam ǀ parācáiḥ ǀ yát ǀ tvā ǀ bhīté íti ǀ áhvayetām ǀ vayaḥ-dhái ǀ
út ǀ astabhnāḥ ǀ pṛthivī́m ǀ dyā́m ǀ abhī́ke ǀ bhrā́tuḥ ǀ putrā́n ǀ magha-van ǀ titviṣāṇáḥ ǁ
Padapatha Transcription Nonaccented
dūre ǀ tat ǀ nāma ǀ guhyam ǀ parācaiḥ ǀ yat ǀ tvā ǀ bhīte iti ǀ ahvayetām ǀ vayaḥ-dhai ǀ
ut ǀ astabhnāḥ ǀ pṛthivīm ǀ dyām ǀ abhīke ǀ bhrātuḥ ǀ putrān ǀ magha-van ǀ titviṣāṇaḥ ǁ
10.055.02 (Mandala. Sukta. Rik)
8.1.16.02 (Ashtaka. Adhyaya. Varga. Rik)
10.04.115 (Mandala. Anuvāka. Rik)
Samhita Devanagari Accented
म॒हत्तन्नाम॒ गुह्यं॑ पुरु॒स्पृग्येन॑ भू॒तं ज॒नयो॒ येन॒ भव्यं॑ ।
प्र॒त्नं जा॒तं ज्योति॒र्यद॑स्य प्रि॒यं प्रि॒याः सम॑विशंत॒ पंच॑ ॥
Samhita Devanagari Nonaccented
महत्तन्नाम गुह्यं पुरुस्पृग्येन भूतं जनयो येन भव्यं ।
प्रत्नं जातं ज्योतिर्यदस्य प्रियं प्रियाः समविशंत पंच ॥
Samhita Transcription Accented
maháttánnā́ma gúhyam puruspṛ́gyéna bhūtám janáyo yéna bhávyam ǀ
pratnám jātám jyótiryádasya priyám priyā́ḥ sámaviśanta páñca ǁ
Samhita Transcription Nonaccented
mahattannāma guhyam puruspṛgyena bhūtam janayo yena bhavyam ǀ
pratnam jātam jyotiryadasya priyam priyāḥ samaviśanta pañca ǁ
Padapatha Devanagari Accented
म॒हत् । तत् । नाम॑ । गुह्य॑म् । पु॒रु॒ऽस्पृक् । येन॑ । भू॒तम् । ज॒नयः॑ । येन॑ । भव्य॑म् ।
प्र॒त्नम् । जा॒तम् । ज्योतिः॑ । यत् । अ॒स्य॒ । प्रि॒यम् । प्रि॒याः । सम् । अ॒वि॒श॒न्त॒ । पञ्च॑ ॥
Padapatha Devanagari Nonaccented
महत् । तत् । नाम । गुह्यम् । पुरुऽस्पृक् । येन । भूतम् । जनयः । येन । भव्यम् ।
प्रत्नम् । जातम् । ज्योतिः । यत् । अस्य । प्रियम् । प्रियाः । सम् । अविशन्त । पञ्च ॥
Padapatha Transcription Accented
mahát ǀ tát ǀ nā́ma ǀ gúhyam ǀ puru-spṛ́k ǀ yéna ǀ bhūtám ǀ janáyaḥ ǀ yéna ǀ bhávyam ǀ
pratnám ǀ jātám ǀ jyótiḥ ǀ yát ǀ asya ǀ priyám ǀ priyā́ḥ ǀ sám ǀ aviśanta ǀ páñca ǁ
Padapatha Transcription Nonaccented
mahat ǀ tat ǀ nāma ǀ guhyam ǀ puru-spṛk ǀ yena ǀ bhūtam ǀ janayaḥ ǀ yena ǀ bhavyam ǀ
pratnam ǀ jātam ǀ jyotiḥ ǀ yat ǀ asya ǀ priyam ǀ priyāḥ ǀ sam ǀ aviśanta ǀ pañca ǁ
10.055.03 (Mandala. Sukta. Rik)
8.1.16.03 (Ashtaka. Adhyaya. Varga. Rik)
10.04.116 (Mandala. Anuvāka. Rik)
Samhita Devanagari Accented
आ रोद॑सी अपृणा॒दोत मध्यं॒ पंच॑ दे॒वाँ ऋ॑तु॒शः स॒प्तस॑प्त ।
चतु॑स्त्रिंशता पुरु॒धा वि च॑ष्टे॒ सरू॑पेण॒ ज्योति॑षा॒ विव्र॑तेन ॥
Samhita Devanagari Nonaccented
आ रोदसी अपृणादोत मध्यं पंच देवाँ ऋतुशः सप्तसप्त ।
चतुस्त्रिंशता पुरुधा वि चष्टे सरूपेण ज्योतिषा विव्रतेन ॥
Samhita Transcription Accented
ā́ ródasī apṛṇādótá mádhyam páñca devā́m̐ ṛtuśáḥ saptásapta ǀ
cátustriṃśatā purudhā́ ví caṣṭe sárūpeṇa jyótiṣā vívratena ǁ
Samhita Transcription Nonaccented
ā rodasī apṛṇādota madhyam pañca devām̐ ṛtuśaḥ saptasapta ǀ
catustriṃśatā purudhā vi caṣṭe sarūpeṇa jyotiṣā vivratena ǁ
Padapatha Devanagari Accented
आ । रोद॑सी॒ इति॑ । अ॒पृ॒णा॒त् । आ । उ॒त । मध्य॑म् । पञ्च॑ । दे॒वान् । ऋ॒तु॒ऽशः । स॒प्तऽस॑प्त ।
चतुः॑ऽत्रिंशता । पु॒रु॒धा । वि । च॒ष्टे॒ । सऽरू॑पेण । ज्योति॑षा । विऽव्र॑तेन ॥
Padapatha Devanagari Nonaccented
आ । रोदसी इति । अपृणात् । आ । उत । मध्यम् । पञ्च । देवान् । ऋतुऽशः । सप्तऽसप्त ।
चतुःऽत्रिंशता । पुरुधा । वि । चष्टे । सऽरूपेण । ज्योतिषा । विऽव्रतेन ॥
Padapatha Transcription Accented
ā́ ǀ ródasī íti ǀ apṛṇāt ǀ ā́ ǀ utá ǀ mádhyam ǀ páñca ǀ devā́n ǀ ṛtu-śáḥ ǀ saptá-sapta ǀ
cátuḥ-triṃśatā ǀ purudhā́ ǀ ví ǀ caṣṭe ǀ sá-rūpeṇa ǀ jyótiṣā ǀ ví-vratena ǁ
Padapatha Transcription Nonaccented
ā ǀ rodasī iti ǀ apṛṇāt ǀ ā ǀ uta ǀ madhyam ǀ pañca ǀ devān ǀ ṛtu-śaḥ ǀ sapta-sapta ǀ
catuḥ-triṃśatā ǀ purudhā ǀ vi ǀ caṣṭe ǀ sa-rūpeṇa ǀ jyotiṣā ǀ vi-vratena ǁ
10.055.04 (Mandala. Sukta. Rik)
8.1.16.04 (Ashtaka. Adhyaya. Varga. Rik)
10.04.117 (Mandala. Anuvāka. Rik)
Samhita Devanagari Accented
यदु॑ष॒ औच्छः॑ प्रथ॒मा वि॒भाना॒मज॑नयो॒ येन॑ पु॒ष्टस्य॑ पु॒ष्टं ।
यत्ते॑ जामि॒त्वमव॑रं॒ पर॑स्या म॒हन्म॑ह॒त्या अ॑सुर॒त्वमेकं॑ ॥
Samhita Devanagari Nonaccented
यदुष औच्छः प्रथमा विभानामजनयो येन पुष्टस्य पुष्टं ।
यत्ते जामित्वमवरं परस्या महन्महत्या असुरत्वमेकं ॥
Samhita Transcription Accented
yáduṣa áucchaḥ prathamā́ vibhā́nāmájanayo yéna puṣṭásya puṣṭám ǀ
yátte jāmitvámávaram párasyā mahánmahatyā́ asuratvámékam ǁ
Samhita Transcription Nonaccented
yaduṣa aucchaḥ prathamā vibhānāmajanayo yena puṣṭasya puṣṭam ǀ
yatte jāmitvamavaram parasyā mahanmahatyā asuratvamekam ǁ
Padapatha Devanagari Accented
यत् । उ॒षः॒ । औच्छः॑ । प्र॒थ॒मा । वि॒ऽभाना॑म् । अज॑नयः । येन॑ । पु॒ष्टस्य॑ । पु॒ष्टम् ।
यत् । ते॒ । जा॒मि॒ऽत्वम् । अव॑रम् । पर॑स्याः । म॒हत् । म॒ह॒त्याः । अ॒सु॒र॒ऽत्वम् । एक॑म् ॥
Padapatha Devanagari Nonaccented
यत् । उषः । औच्छः । प्रथमा । विऽभानाम् । अजनयः । येन । पुष्टस्य । पुष्टम् ।
यत् । ते । जामिऽत्वम् । अवरम् । परस्याः । महत् । महत्याः । असुरऽत्वम् । एकम् ॥
Padapatha Transcription Accented
yát ǀ uṣaḥ ǀ áucchaḥ ǀ prathamā́ ǀ vi-bhā́nām ǀ ájanayaḥ ǀ yéna ǀ puṣṭásya ǀ puṣṭám ǀ
yát ǀ te ǀ jāmi-tvám ǀ ávaram ǀ párasyāḥ ǀ mahát ǀ mahatyā́ḥ ǀ asura-tvám ǀ ékam ǁ
Padapatha Transcription Nonaccented
yat ǀ uṣaḥ ǀ aucchaḥ ǀ prathamā ǀ vi-bhānām ǀ ajanayaḥ ǀ yena ǀ puṣṭasya ǀ puṣṭam ǀ
yat ǀ te ǀ jāmi-tvam ǀ avaram ǀ parasyāḥ ǀ mahat ǀ mahatyāḥ ǀ asura-tvam ǀ ekam ǁ
10.055.05 (Mandala. Sukta. Rik)
8.1.16.05 (Ashtaka. Adhyaya. Varga. Rik)
10.04.118 (Mandala. Anuvāka. Rik)
Samhita Devanagari Accented
वि॒धुं द॑द्रा॒णं सम॑ने बहू॒नां युवा॑नं॒ संतं॑ पलि॒तो ज॑गार ।
दे॒वस्य॑ पश्य॒ काव्यं॑ महि॒त्वाद्या म॒मार॒ स ह्यः समा॑न ॥
Samhita Devanagari Nonaccented
विधुं दद्राणं समने बहूनां युवानं संतं पलितो जगार ।
देवस्य पश्य काव्यं महित्वाद्या ममार स ह्यः समान ॥
Samhita Transcription Accented
vidhúm dadrāṇám sámane bahūnā́m yúvānam sántam palitó jagāra ǀ
devásya paśya kā́vyam mahitvā́dyā́ mamā́ra sá hyáḥ sámāna ǁ
Samhita Transcription Nonaccented
vidhum dadrāṇam samane bahūnām yuvānam santam palito jagāra ǀ
devasya paśya kāvyam mahitvādyā mamāra sa hyaḥ samāna ǁ
Padapatha Devanagari Accented
वि॒ऽधुम् । द॒द्रा॒णम् । सम॑ने । ब॒हू॒नाम् । युवा॑नम् । सन्त॑म् । प॒लि॒तः । ज॒गा॒र॒ ।
दे॒वस्य॑ । प॒श्य॒ । काव्य॑म् । म॒हि॒ऽत्वा । अ॒द्य । म॒मार॑ । सः । ह्यः । सम् । आ॒न॒ ॥
Padapatha Devanagari Nonaccented
विऽधुम् । दद्राणम् । समने । बहूनाम् । युवानम् । सन्तम् । पलितः । जगार ।
देवस्य । पश्य । काव्यम् । महिऽत्वा । अद्य । ममार । सः । ह्यः । सम् । आन ॥
Padapatha Transcription Accented
vi-dhúm ǀ dadrāṇám ǀ sámane ǀ bahūnā́m ǀ yúvānam ǀ sántam ǀ palitáḥ ǀ jagāra ǀ
devásya ǀ paśya ǀ kā́vyam ǀ mahi-tvā́ ǀ adyá ǀ mamā́ra ǀ sáḥ ǀ hyáḥ ǀ sám ǀ āna ǁ
Padapatha Transcription Nonaccented
vi-dhum ǀ dadrāṇam ǀ samane ǀ bahūnām ǀ yuvānam ǀ santam ǀ palitaḥ ǀ jagāra ǀ
devasya ǀ paśya ǀ kāvyam ǀ mahi-tvā ǀ adya ǀ mamāra ǀ saḥ ǀ hyaḥ ǀ sam ǀ āna ǁ
10.055.06 (Mandala. Sukta. Rik)
8.1.17.01 (Ashtaka. Adhyaya. Varga. Rik)
10.04.119 (Mandala. Anuvāka. Rik)
Samhita Devanagari Accented
शाक्म॑ना शा॒को अ॑रु॒णः सु॑प॒र्ण आ यो म॒हः शूरः॑ स॒नादनी॑ळः ।
यच्चि॒केत॑ स॒त्यमित्तन्न मोघं॒ वसु॑ स्पा॒र्हमु॒त जेतो॒त दाता॑ ॥
Samhita Devanagari Nonaccented
शाक्मना शाको अरुणः सुपर्ण आ यो महः शूरः सनादनीळः ।
यच्चिकेत सत्यमित्तन्न मोघं वसु स्पार्हमुत जेतोत दाता ॥
Samhita Transcription Accented
śā́kmanā śākó aruṇáḥ suparṇá ā́ yó maháḥ śū́raḥ sanā́dánīḷaḥ ǀ
yáccikéta satyámíttánná mógham vásu spārhámutá jétotá dā́tā ǁ
Samhita Transcription Nonaccented
śākmanā śāko aruṇaḥ suparṇa ā yo mahaḥ śūraḥ sanādanīḷaḥ ǀ
yacciketa satyamittanna mogham vasu spārhamuta jetota dātā ǁ
Padapatha Devanagari Accented
शाक्म॑ना । शा॒कः । अ॒रु॒णः । सु॒ऽप॒र्णः । आ । यः । म॒हः । शूरः॑ । स॒नात् । अनी॑ळः ।
यत् । चि॒केत॑ । स॒त्यम् । इत् । तत् । न । मोघ॑म् । वसु॑ । स्पा॒र्हम् । उ॒त । जेता॑ । उ॒त । दाता॑ ॥
Padapatha Devanagari Nonaccented
शाक्मना । शाकः । अरुणः । सुऽपर्णः । आ । यः । महः । शूरः । सनात् । अनीळः ।
यत् । चिकेत । सत्यम् । इत् । तत् । न । मोघम् । वसु । स्पार्हम् । उत । जेता । उत । दाता ॥
Padapatha Transcription Accented
śā́kmanā ǀ śākáḥ ǀ aruṇáḥ ǀ su-parṇáḥ ǀ ā́ ǀ yáḥ ǀ maháḥ ǀ śū́raḥ ǀ sanā́t ǀ ánīḷaḥ ǀ
yát ǀ cikéta ǀ satyám ǀ ít ǀ tát ǀ ná ǀ mógham ǀ vásu ǀ spārhám ǀ utá ǀ jétā ǀ utá ǀ dā́tā ǁ
Padapatha Transcription Nonaccented
śākmanā ǀ śākaḥ ǀ aruṇaḥ ǀ su-parṇaḥ ǀ ā ǀ yaḥ ǀ mahaḥ ǀ śūraḥ ǀ sanāt ǀ anīḷaḥ ǀ
yat ǀ ciketa ǀ satyam ǀ it ǀ tat ǀ na ǀ mogham ǀ vasu ǀ spārham ǀ uta ǀ jetā ǀ uta ǀ dātā ǁ
10.055.07 (Mandala. Sukta. Rik)
8.1.17.02 (Ashtaka. Adhyaya. Varga. Rik)
10.04.120 (Mandala. Anuvāka. Rik)
Samhita Devanagari Accented
ऐभि॑र्ददे॒ वृष्ण्या॒ पौंस्या॑नि॒ येभि॒रौक्ष॑द्वृत्र॒हत्या॑य व॒ज्री ।
ये कर्म॑णः क्रि॒यमा॑णस्य म॒ह्न ऋ॑तेक॒र्ममु॒दजा॑यंत दे॒वाः ॥
Samhita Devanagari Nonaccented
ऐभिर्ददे वृष्ण्या पौंस्यानि येभिरौक्षद्वृत्रहत्याय वज्री ।
ये कर्मणः क्रियमाणस्य मह्न ऋतेकर्ममुदजायंत देवाः ॥
Samhita Transcription Accented
áibhirdade vṛ́ṣṇyā páuṃsyāni yébhiráukṣadvṛtrahátyāya vajrī́ ǀ
yé kármaṇaḥ kriyámāṇasya mahná ṛtekarmámudájāyanta devā́ḥ ǁ
Samhita Transcription Nonaccented
aibhirdade vṛṣṇyā pauṃsyāni yebhiraukṣadvṛtrahatyāya vajrī ǀ
ye karmaṇaḥ kriyamāṇasya mahna ṛtekarmamudajāyanta devāḥ ǁ
Padapatha Devanagari Accented
आ । ए॒भिः॒ । द॒दे॒ । वृष्ण्या॑ । पौंस्या॑नि । येभिः॑ । औक्ष॑त् । वृ॒त्र॒ऽहत्या॑य । व॒ज्री ।
ये । कर्म॑णः । क्रि॒यमा॑णस्य । म॒ह्ना । ऋ॒ते॒ऽक॒र्मम् । उ॒त्ऽअजा॑यन्त । दे॒वाः ॥
Padapatha Devanagari Nonaccented
आ । एभिः । ददे । वृष्ण्या । पौंस्यानि । येभिः । औक्षत् । वृत्रऽहत्याय । वज्री ।
ये । कर्मणः । क्रियमाणस्य । मह्ना । ऋतेऽकर्मम् । उत्ऽअजायन्त । देवाः ॥
Padapatha Transcription Accented
ā́ ǀ ebhiḥ ǀ dade ǀ vṛ́ṣṇyā ǀ páuṃsyāni ǀ yébhiḥ ǀ áukṣat ǀ vṛtra-hátyāya ǀ vajrī́ ǀ
yé ǀ kármaṇaḥ ǀ kriyámāṇasya ǀ mahnā́ ǀ ṛte-karmám ǀ ut-ájāyanta ǀ devā́ḥ ǁ
Padapatha Transcription Nonaccented
ā ǀ ebhiḥ ǀ dade ǀ vṛṣṇyā ǀ pauṃsyāni ǀ yebhiḥ ǀ aukṣat ǀ vṛtra-hatyāya ǀ vajrī ǀ
ye ǀ karmaṇaḥ ǀ kriyamāṇasya ǀ mahnā ǀ ṛte-karmam ǀ ut-ajāyanta ǀ devāḥ ǁ
10.055.08 (Mandala. Sukta. Rik)
8.1.17.03 (Ashtaka. Adhyaya. Varga. Rik)
10.04.121 (Mandala. Anuvāka. Rik)
Samhita Devanagari Accented
यु॒जा कर्मा॑णि ज॒नय॑न्वि॒श्वौजा॑ अशस्ति॒हा वि॒श्वम॑नास्तुरा॒षाट् ।
पी॒त्वी सोम॑स्य दि॒व आ वृ॑धा॒नः शूरो॒ निर्यु॒धाध॑म॒द्दस्यू॑न् ॥
Samhita Devanagari Nonaccented
युजा कर्माणि जनयन्विश्वौजा अशस्तिहा विश्वमनास्तुराषाट् ।
पीत्वी सोमस्य दिव आ वृधानः शूरो निर्युधाधमद्दस्यून् ॥
Samhita Transcription Accented
yujā́ kármāṇi janáyanviśváujā aśastihā́ viśvámanāsturāṣā́ṭ ǀ
pītvī́ sómasya divá ā́ vṛdhānáḥ śū́ro níryudhā́dhamaddásyūn ǁ
Samhita Transcription Nonaccented
yujā karmāṇi janayanviśvaujā aśastihā viśvamanāsturāṣāṭ ǀ
pītvī somasya diva ā vṛdhānaḥ śūro niryudhādhamaddasyūn ǁ
Padapatha Devanagari Accented
यु॒जा । कर्मा॑णि । ज॒नय॑न् । वि॒श्वऽओ॑जाः । अ॒श॒स्ति॒ऽहा । वि॒श्वऽम॑नाः । तु॒रा॒षाट् ।
पी॒त्वी । सोम॑स्य । दि॒वः । आ । वृ॒धा॒नः । शूरः॑ । निः । यु॒धा । अ॒ध॒म॒त् । दस्यू॑न् ॥
Padapatha Devanagari Nonaccented
युजा । कर्माणि । जनयन् । विश्वऽओजाः । अशस्तिऽहा । विश्वऽमनाः । तुराषाट् ।
पीत्वी । सोमस्य । दिवः । आ । वृधानः । शूरः । निः । युधा । अधमत् । दस्यून् ॥
Padapatha Transcription Accented
yujā́ ǀ kármāṇi ǀ janáyan ǀ viśvá-ojāḥ ǀ aśasti-hā́ ǀ viśvá-manāḥ ǀ turāṣā́ṭ ǀ
pītvī́ ǀ sómasya ǀ diváḥ ǀ ā́ ǀ vṛdhānáḥ ǀ śū́raḥ ǀ níḥ ǀ yudhā́ ǀ adhamat ǀ dásyūn ǁ
Padapatha Transcription Nonaccented
yujā ǀ karmāṇi ǀ janayan ǀ viśva-ojāḥ ǀ aśasti-hā ǀ viśva-manāḥ ǀ turāṣāṭ ǀ
pītvī ǀ somasya ǀ divaḥ ǀ ā ǀ vṛdhānaḥ ǀ śūraḥ ǀ niḥ ǀ yudhā ǀ adhamat ǀ dasyūn ǁ