|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 82
|
1. Info |
| To: | viśvakarman | |
| From: | viśvakarman bhauvana | |
| Metres: | 1st set of styles: triṣṭup (1, 5, 6); bhuriktriṣṭup (2, 4); nicṛttriṣṭup (3); pādanicṛttriṣṭup (7) 2nd set of styles: triṣṭubh (1-5, 7); jagatī (6) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.082.01 (Mandala. Sukta. Rik)
8.3.17.01 (Ashtaka. Adhyaya. Varga. Rik)
10.06.115 (Mandala. Anuvāka. Rik)
Samhita Devanagari Accented
चक्षु॑षः पि॒ता मन॑सा॒ हि धीरो॑ घृ॒तमे॑ने अजन॒न्नन्न॑माने ।
य॒देदंता॒ अद॑दृहंत॒ पूर्व॒ आदिद्द्यावा॑पृथि॒वी अ॑प्रथेतां ॥
Samhita Devanagari Nonaccented
चक्षुषः पिता मनसा हि धीरो घृतमेने अजनन्नन्नमाने ।
यदेदंता अददृहंत पूर्व आदिद्द्यावापृथिवी अप्रथेतां ॥
Samhita Transcription Accented
cákṣuṣaḥ pitā́ mánasā hí dhī́ro ghṛtámene ajanannánnamāne ǀ
yadédántā ádadṛhanta pū́rva ā́díddyā́vāpṛthivī́ aprathetām ǁ
Samhita Transcription Nonaccented
cakṣuṣaḥ pitā manasā hi dhīro ghṛtamene ajanannannamāne ǀ
yadedantā adadṛhanta pūrva ādiddyāvāpṛthivī aprathetām ǁ
Padapatha Devanagari Accented
चक्षु॑षः । पि॒ता । मन॑सा । हि । धीरः॑ । घृ॒तम् । ए॒ने॒ इति॑ । अ॒ज॒न॒त् । नम्न॑माने॒ इति॑ ।
य॒दा । इत् । अन्ताः॑ । अद॑दृहन्त । पूर्वे॑ । आत् । इत् । द्यावा॑पृथि॒वी इति॑ । अ॒प्र॒थे॒ता॒म् ॥
Padapatha Devanagari Nonaccented
चक्षुषः । पिता । मनसा । हि । धीरः । घृतम् । एने इति । अजनत् । नम्नमाने इति ।
यदा । इत् । अन्ताः । अददृहन्त । पूर्वे । आत् । इत् । द्यावापृथिवी इति । अप्रथेताम् ॥
Padapatha Transcription Accented
cákṣuṣaḥ ǀ pitā́ ǀ mánasā ǀ hí ǀ dhī́raḥ ǀ ghṛtám ǀ ene íti ǀ ajanat ǀ námnamāne íti ǀ
yadā́ ǀ ít ǀ ántāḥ ǀ ádadṛhanta ǀ pū́rve ǀ ā́t ǀ ít ǀ dyā́vāpṛthivī́ íti ǀ aprathetām ǁ
Padapatha Transcription Nonaccented
cakṣuṣaḥ ǀ pitā ǀ manasā ǀ hi ǀ dhīraḥ ǀ ghṛtam ǀ ene iti ǀ ajanat ǀ namnamāne iti ǀ
yadā ǀ it ǀ antāḥ ǀ adadṛhanta ǀ pūrve ǀ āt ǀ it ǀ dyāvāpṛthivī iti ǀ aprathetām ǁ
10.082.02 (Mandala. Sukta. Rik)
8.3.17.02 (Ashtaka. Adhyaya. Varga. Rik)
10.06.116 (Mandala. Anuvāka. Rik)
Samhita Devanagari Accented
वि॒श्वक॑र्मा॒ विम॑ना॒ आद्विहा॑या धा॒ता वि॑धा॒ता प॑र॒मोत सं॒दृक् ।
तेषा॑मि॒ष्टानि॒ समि॒षा म॑दंति॒ यत्रा॑ सप्तऋ॒षीन्प॒र एक॑मा॒हुः ॥
Samhita Devanagari Nonaccented
विश्वकर्मा विमना आद्विहाया धाता विधाता परमोत संदृक् ।
तेषामिष्टानि समिषा मदंति यत्रा सप्तऋषीन्पर एकमाहुः ॥
Samhita Transcription Accented
viśvákarmā vímanā ā́dvíhāyā dhātā́ vidhātā́ paramótá saṃdṛ́k ǀ
téṣāmiṣṭā́ni sámiṣā́ madanti yátrā saptaṛṣī́npará ékamāhúḥ ǁ
Samhita Transcription Nonaccented
viśvakarmā vimanā ādvihāyā dhātā vidhātā paramota saṃdṛk ǀ
teṣāmiṣṭāni samiṣā madanti yatrā saptaṛṣīnpara ekamāhuḥ ǁ
Padapatha Devanagari Accented
वि॒श्वऽक॑र्मा । विऽम॑नाः । आत् । विऽहा॑याः । धा॒ता । वि॒ऽधा॒ता । प॒र॒मा । उ॒त । स॒म्ऽदृक् ।
तेषा॑म् । इ॒ष्टानि॑ । सम् । इ॒षा । म॒द॒न्ति॒ । यत्र॑ । स॒प्त॒ऽऋ॒षीन् । प॒रः । एक॑म् । आ॒हुः ॥
Padapatha Devanagari Nonaccented
विश्वऽकर्मा । विऽमनाः । आत् । विऽहायाः । धाता । विऽधाता । परमा । उत । सम्ऽदृक् ।
तेषाम् । इष्टानि । सम् । इषा । मदन्ति । यत्र । सप्तऽऋषीन् । परः । एकम् । आहुः ॥
Padapatha Transcription Accented
viśvá-karmā ǀ ví-manāḥ ǀ ā́t ǀ ví-hāyāḥ ǀ dhātā́ ǀ vi-dhātā́ ǀ paramā́ ǀ utá ǀ sam-dṛ́k ǀ
téṣām ǀ iṣṭā́ni ǀ sám ǀ iṣā́ ǀ madanti ǀ yátra ǀ sapta-ṛṣī́n ǀ paráḥ ǀ ékam ǀ āhúḥ ǁ
Padapatha Transcription Nonaccented
viśva-karmā ǀ vi-manāḥ ǀ āt ǀ vi-hāyāḥ ǀ dhātā ǀ vi-dhātā ǀ paramā ǀ uta ǀ sam-dṛk ǀ
teṣām ǀ iṣṭāni ǀ sam ǀ iṣā ǀ madanti ǀ yatra ǀ sapta-ṛṣīn ǀ paraḥ ǀ ekam ǀ āhuḥ ǁ
10.082.03 (Mandala. Sukta. Rik)
8.3.17.03 (Ashtaka. Adhyaya. Varga. Rik)
10.06.117 (Mandala. Anuvāka. Rik)
Samhita Devanagari Accented
यो नः॑ पि॒ता ज॑नि॒ता यो वि॑धा॒ता धामा॑नि॒ वेद॒ भुव॑नानि॒ विश्वा॑ ।
यो दे॒वानां॑ नाम॒धा एक॑ ए॒व तं सं॑प्र॒श्नं भुव॑ना यंत्य॒न्या ॥
Samhita Devanagari Nonaccented
यो नः पिता जनिता यो विधाता धामानि वेद भुवनानि विश्वा ।
यो देवानां नामधा एक एव तं संप्रश्नं भुवना यंत्यन्या ॥
Samhita Transcription Accented
yó naḥ pitā́ janitā́ yó vidhātā́ dhā́māni véda bhúvanāni víśvā ǀ
yó devā́nām nāmadhā́ éka evá tám sampraśnám bhúvanā yantyanyā́ ǁ
Samhita Transcription Nonaccented
yo naḥ pitā janitā yo vidhātā dhāmāni veda bhuvanāni viśvā ǀ
yo devānām nāmadhā eka eva tam sampraśnam bhuvanā yantyanyā ǁ
Padapatha Devanagari Accented
यः । नः॒ । पि॒ता । ज॒नि॒ता । यः । वि॒ऽधा॒ता । धामा॑नि । वेद॑ । भुव॑नानि । विश्वा॑ ।
यः । दे॒वाना॑म् । ना॒म॒ऽधाः । एकः॑ । ए॒व । तम् । स॒म्ऽप्र॒श्नम् । भुव॑ना । य॒न्ति॒ । अ॒न्या ॥
Padapatha Devanagari Nonaccented
यः । नः । पिता । जनिता । यः । विऽधाता । धामानि । वेद । भुवनानि । विश्वा ।
यः । देवानाम् । नामऽधाः । एकः । एव । तम् । सम्ऽप्रश्नम् । भुवना । यन्ति । अन्या ॥
Padapatha Transcription Accented
yáḥ ǀ naḥ ǀ pitā́ ǀ janitā́ ǀ yáḥ ǀ vi-dhātā́ ǀ dhā́māni ǀ véda ǀ bhúvanāni ǀ víśvā ǀ
yáḥ ǀ devā́nām ǀ nāma-dhā́ḥ ǀ ékaḥ ǀ evá ǀ tám ǀ sam-praśnám ǀ bhúvanā ǀ yanti ǀ anyā́ ǁ
Padapatha Transcription Nonaccented
yaḥ ǀ naḥ ǀ pitā ǀ janitā ǀ yaḥ ǀ vi-dhātā ǀ dhāmāni ǀ veda ǀ bhuvanāni ǀ viśvā ǀ
yaḥ ǀ devānām ǀ nāma-dhāḥ ǀ ekaḥ ǀ eva ǀ tam ǀ sam-praśnam ǀ bhuvanā ǀ yanti ǀ anyā ǁ
10.082.04 (Mandala. Sukta. Rik)
8.3.17.04 (Ashtaka. Adhyaya. Varga. Rik)
10.06.118 (Mandala. Anuvāka. Rik)
Samhita Devanagari Accented
त आय॑जंत॒ द्रवि॑णं॒ सम॑स्मा॒ ऋष॑यः॒ पूर्वे॑ जरि॒तारो॒ न भू॒ना ।
अ॒सूर्ते॒ सूर्ते॒ रज॑सि निष॒त्ते ये भू॒तानि॑ स॒मकृ॑ण्वन्नि॒मानि॑ ॥
Samhita Devanagari Nonaccented
त आयजंत द्रविणं समस्मा ऋषयः पूर्वे जरितारो न भूना ।
असूर्ते सूर्ते रजसि निषत्ते ये भूतानि समकृण्वन्निमानि ॥
Samhita Transcription Accented
tá ā́yajanta dráviṇam sámasmā ṛ́ṣayaḥ pū́rve jaritā́ro ná bhūnā́ ǀ
asū́rte sū́rte rájasi niṣatté yé bhūtā́ni samákṛṇvannimā́ni ǁ
Samhita Transcription Nonaccented
ta āyajanta draviṇam samasmā ṛṣayaḥ pūrve jaritāro na bhūnā ǀ
asūrte sūrte rajasi niṣatte ye bhūtāni samakṛṇvannimāni ǁ
Padapatha Devanagari Accented
ते । आ । अ॒य॒ज॒न्त॒ । द्रवि॑णम् । सम् । अ॒स्मै॒ । ऋष॑यः । पूर्वे॑ । ज॒रि॒तारः॑ । न । भू॒ना ।
अ॒सूर्ते॑ । सूर्ते॑ । रज॑सि । नि॒ऽस॒त्ते । ये । भू॒तानि॑ । स॒म्ऽअकृ॑ण्वन् । इ॒मानि॑ ॥
Padapatha Devanagari Nonaccented
ते । आ । अयजन्त । द्रविणम् । सम् । अस्मै । ऋषयः । पूर्वे । जरितारः । न । भूना ।
असूर्ते । सूर्ते । रजसि । निऽसत्ते । ये । भूतानि । सम्ऽअकृण्वन् । इमानि ॥
Padapatha Transcription Accented
té ǀ ā́ ǀ ayajanta ǀ dráviṇam ǀ sám ǀ asmai ǀ ṛ́ṣayaḥ ǀ pū́rve ǀ jaritā́raḥ ǀ ná ǀ bhūnā́ ǀ
asū́rte ǀ sū́rte ǀ rájasi ǀ ni-satté ǀ yé ǀ bhūtā́ni ǀ sam-ákṛṇvan ǀ imā́ni ǁ
Padapatha Transcription Nonaccented
te ǀ ā ǀ ayajanta ǀ draviṇam ǀ sam ǀ asmai ǀ ṛṣayaḥ ǀ pūrve ǀ jaritāraḥ ǀ na ǀ bhūnā ǀ
asūrte ǀ sūrte ǀ rajasi ǀ ni-satte ǀ ye ǀ bhūtāni ǀ sam-akṛṇvan ǀ imāni ǁ
10.082.05 (Mandala. Sukta. Rik)
8.3.17.05 (Ashtaka. Adhyaya. Varga. Rik)
10.06.119 (Mandala. Anuvāka. Rik)
Samhita Devanagari Accented
प॒रो दि॒वा प॒र ए॒ना पृ॑थि॒व्या प॒रो दे॒वेभि॒रसु॑रै॒र्यदस्ति॑ ।
कं स्वि॒द्गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मप॑श्यंत॒ विश्वे॑ ॥
Samhita Devanagari Nonaccented
परो दिवा पर एना पृथिव्या परो देवेभिरसुरैर्यदस्ति ।
कं स्विद्गर्भं प्रथमं दध्र आपो यत्र देवाः समपश्यंत विश्वे ॥
Samhita Transcription Accented
paró divā́ pará enā́ pṛthivyā́ paró devébhirásurairyádásti ǀ
kám svidgárbham prathamám dadhra ā́po yátra devā́ḥ samápaśyanta víśve ǁ
Samhita Transcription Nonaccented
paro divā para enā pṛthivyā paro devebhirasurairyadasti ǀ
kam svidgarbham prathamam dadhra āpo yatra devāḥ samapaśyanta viśve ǁ
Padapatha Devanagari Accented
प॒रः । दि॒वा । प॒रः । ए॒ना । पृ॒थि॒व्या । प॒रः । दे॒वेभिः॑ । असु॑रैः । यत् । अस्ति॑ ।
कम् । स्वि॒त् । गर्भ॑म् । प्र॒थ॒मम् । द॒ध्रे॒ । आपः॑ । यत्र॑ । दे॒वाः । स॒म्ऽअप॑श्यन्त । विश्वे॑ ॥
Padapatha Devanagari Nonaccented
परः । दिवा । परः । एना । पृथिव्या । परः । देवेभिः । असुरैः । यत् । अस्ति ।
कम् । स्वित् । गर्भम् । प्रथमम् । दध्रे । आपः । यत्र । देवाः । सम्ऽअपश्यन्त । विश्वे ॥
Padapatha Transcription Accented
paráḥ ǀ divā́ ǀ paráḥ ǀ enā́ ǀ pṛthivyā́ ǀ paráḥ ǀ devébhiḥ ǀ ásuraiḥ ǀ yát ǀ ásti ǀ
kám ǀ svit ǀ gárbham ǀ prathamám ǀ dadhre ǀ ā́paḥ ǀ yátra ǀ devā́ḥ ǀ sam-ápaśyanta ǀ víśve ǁ
Padapatha Transcription Nonaccented
paraḥ ǀ divā ǀ paraḥ ǀ enā ǀ pṛthivyā ǀ paraḥ ǀ devebhiḥ ǀ asuraiḥ ǀ yat ǀ asti ǀ
kam ǀ svit ǀ garbham ǀ prathamam ǀ dadhre ǀ āpaḥ ǀ yatra ǀ devāḥ ǀ sam-apaśyanta ǀ viśve ǁ
10.082.06 (Mandala. Sukta. Rik)
8.3.17.06 (Ashtaka. Adhyaya. Varga. Rik)
10.06.120 (Mandala. Anuvāka. Rik)
Samhita Devanagari Accented
तमिद्गर्भं॑ प्रथ॒मं द॑ध्र॒ आपो॒ यत्र॑ दे॒वाः स॒मग॑च्छंत॒ विश्वे॑ ।
अ॒जस्य॒ नाभा॒वध्येक॒मर्पि॑तं॒ यस्मि॒न्विश्वा॑नि॒ भुव॑नानि त॒स्थुः ॥
Samhita Devanagari Nonaccented
तमिद्गर्भं प्रथमं दध्र आपो यत्र देवाः समगच्छंत विश्वे ।
अजस्य नाभावध्येकमर्पितं यस्मिन्विश्वानि भुवनानि तस्थुः ॥
Samhita Transcription Accented
támídgárbham prathamám dadhra ā́po yátra devā́ḥ samágacchanta víśve ǀ
ajásya nā́bhāvádhyékamárpitam yásminvíśvāni bhúvanāni tasthúḥ ǁ
Samhita Transcription Nonaccented
tamidgarbham prathamam dadhra āpo yatra devāḥ samagacchanta viśve ǀ
ajasya nābhāvadhyekamarpitam yasminviśvāni bhuvanāni tasthuḥ ǁ
Padapatha Devanagari Accented
तम् । इत् । गर्भ॑म् । प्र॒थ॒मम् । द॒ध्रे॒ । आपः॑ । यत्र॑ । दे॒वाः । स॒म्ऽअग॑च्छन्त । विश्वे॑ ।
अ॒जस्य॑ । नाभौ॑ । अधि॑ । एक॑म् । अर्पि॑तम् । यस्मि॑न् । विश्वा॑नि । भुव॑नानि । त॒स्थुः ॥
Padapatha Devanagari Nonaccented
तम् । इत् । गर्भम् । प्रथमम् । दध्रे । आपः । यत्र । देवाः । सम्ऽअगच्छन्त । विश्वे ।
अजस्य । नाभौ । अधि । एकम् । अर्पितम् । यस्मिन् । विश्वानि । भुवनानि । तस्थुः ॥
Padapatha Transcription Accented
tám ǀ ít ǀ gárbham ǀ prathamám ǀ dadhre ǀ ā́paḥ ǀ yátra ǀ devā́ḥ ǀ sam-ágacchanta ǀ víśve ǀ
ajásya ǀ nā́bhau ǀ ádhi ǀ ékam ǀ árpitam ǀ yásmin ǀ víśvāni ǀ bhúvanāni ǀ tasthúḥ ǁ
Padapatha Transcription Nonaccented
tam ǀ it ǀ garbham ǀ prathamam ǀ dadhre ǀ āpaḥ ǀ yatra ǀ devāḥ ǀ sam-agacchanta ǀ viśve ǀ
ajasya ǀ nābhau ǀ adhi ǀ ekam ǀ arpitam ǀ yasmin ǀ viśvāni ǀ bhuvanāni ǀ tasthuḥ ǁ
10.082.07 (Mandala. Sukta. Rik)
8.3.17.07 (Ashtaka. Adhyaya. Varga. Rik)
10.06.121 (Mandala. Anuvāka. Rik)
Samhita Devanagari Accented
न तं वि॑दाथ॒ य इ॒मा ज॒जाना॒न्यद्यु॒ष्माक॒मंत॑रं बभूव ।
नी॒हा॒रेण॒ प्रावृ॑ता॒ जल्प्या॑ चासु॒तृप॑ उक्थ॒शास॑श्चरंति ॥
Samhita Devanagari Nonaccented
न तं विदाथ य इमा जजानान्यद्युष्माकमंतरं बभूव ।
नीहारेण प्रावृता जल्प्या चासुतृप उक्थशासश्चरंति ॥
Samhita Transcription Accented
ná tám vidātha yá imā́ jajā́nānyádyuṣmā́kamántaram babhūva ǀ
nīhāréṇa prā́vṛtā jálpyā cāsutṛ́pa ukthaśā́saścaranti ǁ
Samhita Transcription Nonaccented
na tam vidātha ya imā jajānānyadyuṣmākamantaram babhūva ǀ
nīhāreṇa prāvṛtā jalpyā cāsutṛpa ukthaśāsaścaranti ǁ
Padapatha Devanagari Accented
न । तम् । वि॒दा॒थ॒ । यः । इ॒मा । ज॒जान॑ । अ॒न्यत् । यु॒ष्माक॑म् । अन्त॑रम् । ब॒भू॒व॒ ।
नी॒हा॒रेण॑ । प्रावृ॑ताः । जल्प्या॑ । च॒ । अ॒सु॒ऽतृपः॑ । उ॒क्थ॒ऽशसः॑ । च॒र॒न्ति॒ ॥
Padapatha Devanagari Nonaccented
न । तम् । विदाथ । यः । इमा । जजान । अन्यत् । युष्माकम् । अन्तरम् । बभूव ।
नीहारेण । प्रावृताः । जल्प्या । च । असुऽतृपः । उक्थऽशसः । चरन्ति ॥
Padapatha Transcription Accented
ná ǀ tám ǀ vidātha ǀ yáḥ ǀ imā́ ǀ jajā́na ǀ anyát ǀ yuṣmā́kam ǀ ántaram ǀ babhūva ǀ
nīhāréṇa ǀ prā́vṛtāḥ ǀ jálpyā ǀ ca ǀ asu-tṛ́paḥ ǀ uktha-śásaḥ ǀ caranti ǁ
Padapatha Transcription Nonaccented
na ǀ tam ǀ vidātha ǀ yaḥ ǀ imā ǀ jajāna ǀ anyat ǀ yuṣmākam ǀ antaram ǀ babhūva ǀ
nīhāreṇa ǀ prāvṛtāḥ ǀ jalpyā ǀ ca ǀ asu-tṛpaḥ ǀ uktha-śasaḥ ǀ caranti ǁ