|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 90
|
1. Info |
| To: | puruṣa | |
| From: | nārāyaṇa | |
| Metres: | 1st set of styles: nicṛdanuṣṭup (1-3, 7, 10, 12, 13); anuṣṭup (4-6, 9, 14, 15); virāḍanuṣṭup (8, 11); virāṭtrisṭup (16) 2nd set of styles: anuṣṭubh (1-15); triṣṭubh (16) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.090.01 (Mandala. Sukta. Rik)
8.4.17.01 (Ashtaka. Adhyaya. Varga. Rik)
10.07.133 (Mandala. Anuvāka. Rik)
Samhita Devanagari Accented
स॒हस्र॑शीर्षा॒ पुरु॑षः सहस्रा॒क्षः स॒हस्र॑पात् ।
स भूमिं॑ वि॒श्वतो॑ वृ॒त्वात्य॑तिष्ठद्दशांगु॒लं ॥
Samhita Devanagari Nonaccented
सहस्रशीर्षा पुरुषः सहस्राक्षः सहस्रपात् ।
स भूमिं विश्वतो वृत्वात्यतिष्ठद्दशांगुलं ॥
Samhita Transcription Accented
sahásraśīrṣā púruṣaḥ sahasrākṣáḥ sahásrapāt ǀ
sá bhū́mim viśváto vṛtvā́tyatiṣṭhaddaśāṅgulám ǁ
Samhita Transcription Nonaccented
sahasraśīrṣā puruṣaḥ sahasrākṣaḥ sahasrapāt ǀ
sa bhūmim viśvato vṛtvātyatiṣṭhaddaśāṅgulam ǁ
Padapatha Devanagari Accented
स॒हस्र॑ऽशीर्षा । पुरु॑षः । स॒ह॒स्र॒ऽअ॒क्षः । स॒हस्र॑ऽपात् ।
सः । भूमि॑म् । वि॒श्वतः॑ । वृ॒त्वा । अति॑ । अ॒ति॒ष्ठ॒त् । द॒श॒ऽअ॒ङ्गु॒लम् ॥
Padapatha Devanagari Nonaccented
सहस्रऽशीर्षा । पुरुषः । सहस्रऽअक्षः । सहस्रऽपात् ।
सः । भूमिम् । विश्वतः । वृत्वा । अति । अतिष्ठत् । दशऽअङ्गुलम् ॥
Padapatha Transcription Accented
sahásra-śīrṣā ǀ púruṣaḥ ǀ sahasra-akṣáḥ ǀ sahásra-pāt ǀ
sáḥ ǀ bhū́mim ǀ viśvátaḥ ǀ vṛtvā́ ǀ áti ǀ atiṣṭhat ǀ daśa-aṅgulám ǁ
Padapatha Transcription Nonaccented
sahasra-śīrṣā ǀ puruṣaḥ ǀ sahasra-akṣaḥ ǀ sahasra-pāt ǀ
saḥ ǀ bhūmim ǀ viśvataḥ ǀ vṛtvā ǀ ati ǀ atiṣṭhat ǀ daśa-aṅgulam ǁ
10.090.02 (Mandala. Sukta. Rik)
8.4.17.02 (Ashtaka. Adhyaya. Varga. Rik)
10.07.134 (Mandala. Anuvāka. Rik)
Samhita Devanagari Accented
पुरु॑ष ए॒वेदं सर्वं॒ यद्भू॒तं यच्च॒ भव्यं॑ ।
उ॒तामृ॑त॒त्वस्येशा॑नो॒ यदन्ने॑नाति॒रोह॑ति ॥
Samhita Devanagari Nonaccented
पुरुष एवेदं सर्वं यद्भूतं यच्च भव्यं ।
उतामृतत्वस्येशानो यदन्नेनातिरोहति ॥
Samhita Transcription Accented
púruṣa evédám sárvam yádbhūtám yácca bhávyam ǀ
utā́mṛtatvásyéśāno yádánnenātiróhati ǁ
Samhita Transcription Nonaccented
puruṣa evedam sarvam yadbhūtam yacca bhavyam ǀ
utāmṛtatvasyeśāno yadannenātirohati ǁ
Padapatha Devanagari Accented
पुरु॑षः । ए॒व । इ॒दम् । सर्व॑म् । यत् । भू॒तम् । यत् । च॒ । भव्य॑म् ।
उ॒त । अ॒मृ॒त॒ऽत्वस्य॑ । ईशा॑नः । यत् । अन्ने॑न । अ॒ति॒ऽरोह॑ति ॥
Padapatha Devanagari Nonaccented
पुरुषः । एव । इदम् । सर्वम् । यत् । भूतम् । यत् । च । भव्यम् ।
उत । अमृतऽत्वस्य । ईशानः । यत् । अन्नेन । अतिऽरोहति ॥
Padapatha Transcription Accented
púruṣaḥ ǀ evá ǀ idám ǀ sárvam ǀ yát ǀ bhūtám ǀ yát ǀ ca ǀ bhávyam ǀ
utá ǀ amṛta-tvásya ǀ ī́śānaḥ ǀ yát ǀ ánnena ǀ ati-róhati ǁ
Padapatha Transcription Nonaccented
puruṣaḥ ǀ eva ǀ idam ǀ sarvam ǀ yat ǀ bhūtam ǀ yat ǀ ca ǀ bhavyam ǀ
uta ǀ amṛta-tvasya ǀ īśānaḥ ǀ yat ǀ annena ǀ ati-rohati ǁ
10.090.03 (Mandala. Sukta. Rik)
8.4.17.03 (Ashtaka. Adhyaya. Varga. Rik)
10.07.135 (Mandala. Anuvāka. Rik)
Samhita Devanagari Accented
ए॒तावा॑नस्य महि॒मातो॒ ज्यायां॑श्च॒ पूरु॑षः ।
पादो॑ऽस्य॒ विश्वा॑ भू॒तानि॑ त्रि॒पाद॑स्या॒मृतं॑ दि॒वि ॥
Samhita Devanagari Nonaccented
एतावानस्य महिमातो ज्यायांश्च पूरुषः ।
पादोऽस्य विश्वा भूतानि त्रिपादस्यामृतं दिवि ॥
Samhita Transcription Accented
etā́vānasya mahimā́to jyā́yāṃśca pū́ruṣaḥ ǀ
pā́do’sya víśvā bhūtā́ni tripā́dasyāmṛ́tam diví ǁ
Samhita Transcription Nonaccented
etāvānasya mahimāto jyāyāṃśca pūruṣaḥ ǀ
pādo’sya viśvā bhūtāni tripādasyāmṛtam divi ǁ
Padapatha Devanagari Accented
ए॒तावा॑न् । अ॒स्य॒ । म॒हि॒मा । अतः॑ । ज्याया॑न् । च॒ । पुरु॑षः ।
पादः॑ । अ॒स्य॒ । विश्वा॑ । भू॒तानि॑ । त्रि॒ऽपात् । अ॒स्य॒ । अ॒मृत॑म् । दि॒वि ॥
Padapatha Devanagari Nonaccented
एतावान् । अस्य । महिमा । अतः । ज्यायान् । च । पुरुषः ।
पादः । अस्य । विश्वा । भूतानि । त्रिऽपात् । अस्य । अमृतम् । दिवि ॥
Padapatha Transcription Accented
etā́vān ǀ asya ǀ mahimā́ ǀ átaḥ ǀ jyā́yān ǀ ca ǀ púruṣaḥ ǀ
pā́daḥ ǀ asya ǀ víśvā ǀ bhūtā́ni ǀ tri-pā́t ǀ asya ǀ amṛ́tam ǀ diví ǁ
Padapatha Transcription Nonaccented
etāvān ǀ asya ǀ mahimā ǀ ataḥ ǀ jyāyān ǀ ca ǀ puruṣaḥ ǀ
pādaḥ ǀ asya ǀ viśvā ǀ bhūtāni ǀ tri-pāt ǀ asya ǀ amṛtam ǀ divi ǁ
10.090.04 (Mandala. Sukta. Rik)
8.4.17.04 (Ashtaka. Adhyaya. Varga. Rik)
10.07.136 (Mandala. Anuvāka. Rik)
Samhita Devanagari Accented
त्रि॒पादू॒र्ध्व उदै॒त्पुरु॑षः॒ पादो॑ऽस्ये॒हाभ॑व॒त्पुनः॑ ।
ततो॒ विष्व॒ङ्व्य॑क्रामत्साशनानश॒ने अ॒भि ॥
Samhita Devanagari Nonaccented
त्रिपादूर्ध्व उदैत्पुरुषः पादोऽस्येहाभवत्पुनः ।
ततो विष्वङ्व्यक्रामत्साशनानशने अभि ॥
Samhita Transcription Accented
tripā́dūrdhvá údaitpúruṣaḥ pā́do’syehā́bhavatpúnaḥ ǀ
táto víṣvaṅvyákrāmatsāśanānaśané abhí ǁ
Samhita Transcription Nonaccented
tripādūrdhva udaitpuruṣaḥ pādo’syehābhavatpunaḥ ǀ
tato viṣvaṅvyakrāmatsāśanānaśane abhi ǁ
Padapatha Devanagari Accented
त्रि॒ऽपात् । ऊ॒र्ध्वः । उत् । ऐ॒त् । पुरु॑षः । पादः॑ । अ॒स्य॒ । इ॒ह । अ॒भ॒व॒त् । पुन॒रिति॑ ।
ततः॑ । विष्व॑ङ् । वि । अ॒क्रा॒म॒त् । सा॒श॒ना॒न॒श॒ने इति॑ । अ॒भि ॥
Padapatha Devanagari Nonaccented
त्रिऽपात् । ऊर्ध्वः । उत् । ऐत् । पुरुषः । पादः । अस्य । इह । अभवत् । पुनरिति ।
ततः । विष्वङ् । वि । अक्रामत् । साशनानशने इति । अभि ॥
Padapatha Transcription Accented
tri-pā́t ǀ ūrdhváḥ ǀ út ǀ ait ǀ púruṣaḥ ǀ pā́daḥ ǀ asya ǀ ihá ǀ abhavat ǀ púnaríti ǀ
tátaḥ ǀ víṣvaṅ ǀ ví ǀ akrāmat ǀ sāśanānaśané íti ǀ abhí ǁ
Padapatha Transcription Nonaccented
tri-pāt ǀ ūrdhvaḥ ǀ ut ǀ ait ǀ puruṣaḥ ǀ pādaḥ ǀ asya ǀ iha ǀ abhavat ǀ punariti ǀ
tataḥ ǀ viṣvaṅ ǀ vi ǀ akrāmat ǀ sāśanānaśane iti ǀ abhi ǁ
10.090.05 (Mandala. Sukta. Rik)
8.4.17.05 (Ashtaka. Adhyaya. Varga. Rik)
10.07.137 (Mandala. Anuvāka. Rik)
Samhita Devanagari Accented
तस्मा॑द्वि॒राळ॑जायत वि॒राजो॒ अधि॒ पूरु॑षः ।
स जा॒तो अत्य॑रिच्यत प॒श्चाद्भूमि॒मथो॑ पु॒रः ॥
Samhita Devanagari Nonaccented
तस्माद्विराळजायत विराजो अधि पूरुषः ।
स जातो अत्यरिच्यत पश्चाद्भूमिमथो पुरः ॥
Samhita Transcription Accented
tásmādvirā́ḷajāyata virā́jo ádhi pū́ruṣaḥ ǀ
sá jātó átyaricyata paścā́dbhū́mimátho puráḥ ǁ
Samhita Transcription Nonaccented
tasmādvirāḷajāyata virājo adhi pūruṣaḥ ǀ
sa jāto atyaricyata paścādbhūmimatho puraḥ ǁ
Padapatha Devanagari Accented
तस्मा॑त् । वि॒राट् । अ॒जा॒य॒त॒ । वि॒ऽराजः॑ । अधि॑ । पुरु॑षः ।
सः । जा॒तः । अति॑ । अ॒रि॒च्य॒त॒ । प॒श्चात् । भूमि॑म् । अथो॒ इति॑ । पु॒रः ॥
Padapatha Devanagari Nonaccented
तस्मात् । विराट् । अजायत । विऽराजः । अधि । पुरुषः ।
सः । जातः । अति । अरिच्यत । पश्चात् । भूमिम् । अथो इति । पुरः ॥
Padapatha Transcription Accented
tásmāt ǀ virā́ṭ ǀ ajāyata ǀ vi-rā́jaḥ ǀ ádhi ǀ púruṣaḥ ǀ
sáḥ ǀ jātáḥ ǀ áti ǀ aricyata ǀ paścā́t ǀ bhū́mim ǀ átho íti ǀ puráḥ ǁ
Padapatha Transcription Nonaccented
tasmāt ǀ virāṭ ǀ ajāyata ǀ vi-rājaḥ ǀ adhi ǀ puruṣaḥ ǀ
saḥ ǀ jātaḥ ǀ ati ǀ aricyata ǀ paścāt ǀ bhūmim ǀ atho iti ǀ puraḥ ǁ
10.090.06 (Mandala. Sukta. Rik)
8.4.18.01 (Ashtaka. Adhyaya. Varga. Rik)
10.07.138 (Mandala. Anuvāka. Rik)
Samhita Devanagari Accented
यत्पुरु॑षेण ह॒विषा॑ दे॒वा य॒ज्ञमत॑न्वत ।
व॒सं॒तो अ॑स्यासी॒दाज्यं॑ ग्री॒ष्म इ॒ध्मः श॒रद्ध॒विः ॥
Samhita Devanagari Nonaccented
यत्पुरुषेण हविषा देवा यज्ञमतन्वत ।
वसंतो अस्यासीदाज्यं ग्रीष्म इध्मः शरद्धविः ॥
Samhita Transcription Accented
yátpúruṣeṇa havíṣā devā́ yajñámátanvata ǀ
vasantó asyāsīdā́jyam grīṣmá idhmáḥ śaráddhavíḥ ǁ
Samhita Transcription Nonaccented
yatpuruṣeṇa haviṣā devā yajñamatanvata ǀ
vasanto asyāsīdājyam grīṣma idhmaḥ śaraddhaviḥ ǁ
Padapatha Devanagari Accented
यत् । पुरु॑षेण । ह॒विषा॑ । दे॒वाः । य॒ज्ञम् । अत॑न्वत ।
व॒स॒न्तः । अ॒स्य॒ । आ॒सी॒त् । आज्य॑म् । ग्री॒ष्मः । इ॒ध्मः । श॒रत् । ह॒विः ॥
Padapatha Devanagari Nonaccented
यत् । पुरुषेण । हविषा । देवाः । यज्ञम् । अतन्वत ।
वसन्तः । अस्य । आसीत् । आज्यम् । ग्रीष्मः । इध्मः । शरत् । हविः ॥
Padapatha Transcription Accented
yát ǀ púruṣeṇa ǀ havíṣā ǀ devā́ḥ ǀ yajñám ǀ átanvata ǀ
vasantáḥ ǀ asya ǀ āsīt ǀ ā́jyam ǀ grīṣmáḥ ǀ idhmáḥ ǀ śarát ǀ havíḥ ǁ
Padapatha Transcription Nonaccented
yat ǀ puruṣeṇa ǀ haviṣā ǀ devāḥ ǀ yajñam ǀ atanvata ǀ
vasantaḥ ǀ asya ǀ āsīt ǀ ājyam ǀ grīṣmaḥ ǀ idhmaḥ ǀ śarat ǀ haviḥ ǁ
10.090.07 (Mandala. Sukta. Rik)
8.4.18.02 (Ashtaka. Adhyaya. Varga. Rik)
10.07.139 (Mandala. Anuvāka. Rik)
Samhita Devanagari Accented
तं य॒ज्ञं ब॒र्हिषि॒ प्रौक्ष॒न्पुरु॑षं जा॒तम॑ग्र॒तः ।
तेन॑ दे॒वा अ॑यजंत सा॒ध्या ऋष॑यश्च॒ ये ॥
Samhita Devanagari Nonaccented
तं यज्ञं बर्हिषि प्रौक्षन्पुरुषं जातमग्रतः ।
तेन देवा अयजंत साध्या ऋषयश्च ये ॥
Samhita Transcription Accented
tám yajñám barhíṣi práukṣanpúruṣam jātámagratáḥ ǀ
téna devā́ ayajanta sādhyā́ ṛ́ṣayaśca yé ǁ
Samhita Transcription Nonaccented
tam yajñam barhiṣi praukṣanpuruṣam jātamagrataḥ ǀ
tena devā ayajanta sādhyā ṛṣayaśca ye ǁ
Padapatha Devanagari Accented
तम् । य॒ज्ञम् । ब॒र्हिषि॑ । प्र । औ॒क्ष॒न् । पुरु॑षम् । जा॒तम् । अ॒ग्र॒तः ।
तेन॑ । दे॒वाः । अ॒य॒ज॒न्त॒ । सा॒ध्याः । ऋष॑यः । च॒ । ये ॥
Padapatha Devanagari Nonaccented
तम् । यज्ञम् । बर्हिषि । प्र । औक्षन् । पुरुषम् । जातम् । अग्रतः ।
तेन । देवाः । अयजन्त । साध्याः । ऋषयः । च । ये ॥
Padapatha Transcription Accented
tám ǀ yajñám ǀ barhíṣi ǀ prá ǀ aukṣan ǀ púruṣam ǀ jātám ǀ agratáḥ ǀ
téna ǀ devā́ḥ ǀ ayajanta ǀ sādhyā́ḥ ǀ ṛ́ṣayaḥ ǀ ca ǀ yé ǁ
Padapatha Transcription Nonaccented
tam ǀ yajñam ǀ barhiṣi ǀ pra ǀ aukṣan ǀ puruṣam ǀ jātam ǀ agrataḥ ǀ
tena ǀ devāḥ ǀ ayajanta ǀ sādhyāḥ ǀ ṛṣayaḥ ǀ ca ǀ ye ǁ
10.090.08 (Mandala. Sukta. Rik)
8.4.18.03 (Ashtaka. Adhyaya. Varga. Rik)
10.07.140 (Mandala. Anuvāka. Rik)
Samhita Devanagari Accented
तस्मा॑द्य॒ज्ञात्स॑र्व॒हुतः॒ संभृ॑तं पृषदा॒ज्यं ।
प॒शूंतांश्च॑क्रे वाय॒व्या॑नार॒ण्यान्ग्रा॒म्याश्च॒ ये ॥
Samhita Devanagari Nonaccented
तस्माद्यज्ञात्सर्वहुतः संभृतं पृषदाज्यं ।
पशूंतांश्चक्रे वायव्यानारण्यान्ग्राम्याश्च ये ॥
Samhita Transcription Accented
tásmādyajñā́tsarvahútaḥ sámbhṛtam pṛṣadājyám ǀ
paśū́ntā́ṃścakre vāyavyā́nāraṇyā́ngrāmyā́śca yé ǁ
Samhita Transcription Nonaccented
tasmādyajñātsarvahutaḥ sambhṛtam pṛṣadājyam ǀ
paśūntāṃścakre vāyavyānāraṇyāngrāmyāśca ye ǁ
Padapatha Devanagari Accented
तस्मा॑त् । य॒ज्ञात् । स॒र्व॒ऽहुतः॑ । सम्ऽभृ॑तम् । पृ॒ष॒त्ऽआ॒ज्यम् ।
प॒शून् । तान् । च॒क्रे॒ । वा॒य॒व्या॑न् । आ॒र॒ण्यान् । ग्रा॒म्याः । च॒ । ये ॥
Padapatha Devanagari Nonaccented
तस्मात् । यज्ञात् । सर्वऽहुतः । सम्ऽभृतम् । पृषत्ऽआज्यम् ।
पशून् । तान् । चक्रे । वायव्यान् । आरण्यान् । ग्राम्याः । च । ये ॥
Padapatha Transcription Accented
tásmāt ǀ yajñā́t ǀ sarva-hútaḥ ǀ sám-bhṛtam ǀ pṛṣat-ājyám ǀ
paśū́n ǀ tā́n ǀ cakre ǀ vāyavyā́n ǀ āraṇyā́n ǀ grāmyā́ḥ ǀ ca ǀ yé ǁ
Padapatha Transcription Nonaccented
tasmāt ǀ yajñāt ǀ sarva-hutaḥ ǀ sam-bhṛtam ǀ pṛṣat-ājyam ǀ
paśūn ǀ tān ǀ cakre ǀ vāyavyān ǀ āraṇyān ǀ grāmyāḥ ǀ ca ǀ ye ǁ
10.090.09 (Mandala. Sukta. Rik)
8.4.18.04 (Ashtaka. Adhyaya. Varga. Rik)
10.07.141 (Mandala. Anuvāka. Rik)
Samhita Devanagari Accented
तस्मा॑द्य॒ज्ञात्स॑र्व॒हुत॒ ऋचः॒ सामा॑नि जज्ञिरे ।
छंदां॑सि जज्ञिरे॒ तस्मा॒द्यजु॒स्तस्मा॑दजायत ॥
Samhita Devanagari Nonaccented
तस्माद्यज्ञात्सर्वहुत ऋचः सामानि जज्ञिरे ।
छंदांसि जज्ञिरे तस्माद्यजुस्तस्मादजायत ॥
Samhita Transcription Accented
tásmādyajñā́tsarvahúta ṛ́caḥ sā́māni jajñire ǀ
chándāṃsi jajñire tásmādyájustásmādajāyata ǁ
Samhita Transcription Nonaccented
tasmādyajñātsarvahuta ṛcaḥ sāmāni jajñire ǀ
chandāṃsi jajñire tasmādyajustasmādajāyata ǁ
Padapatha Devanagari Accented
तस्मा॑त् । य॒ज्ञात् । स॒र्व॒ऽहुतः॑ । ऋचः॑ । सामा॑नि । ज॒ज्ञि॒रे॒ ।
छन्दां॑सि । ज॒ज्ञि॒रे॒ । तस्मा॑त् । यजुः॑ । तस्मा॑त् । अ॒जा॒य॒त॒ ॥
Padapatha Devanagari Nonaccented
तस्मात् । यज्ञात् । सर्वऽहुतः । ऋचः । सामानि । जज्ञिरे ।
छन्दांसि । जज्ञिरे । तस्मात् । यजुः । तस्मात् । अजायत ॥
Padapatha Transcription Accented
tásmāt ǀ yajñā́t ǀ sarva-hútaḥ ǀ ṛ́caḥ ǀ sā́māni ǀ jajñire ǀ
chándāṃsi ǀ jajñire ǀ tásmāt ǀ yájuḥ ǀ tásmāt ǀ ajāyata ǁ
Padapatha Transcription Nonaccented
tasmāt ǀ yajñāt ǀ sarva-hutaḥ ǀ ṛcaḥ ǀ sāmāni ǀ jajñire ǀ
chandāṃsi ǀ jajñire ǀ tasmāt ǀ yajuḥ ǀ tasmāt ǀ ajāyata ǁ
10.090.10 (Mandala. Sukta. Rik)
8.4.18.05 (Ashtaka. Adhyaya. Varga. Rik)
10.07.142 (Mandala. Anuvāka. Rik)
Samhita Devanagari Accented
तस्मा॒दश्वा॑ अजायंत॒ ये के चो॑भ॒याद॑तः ।
गावो॑ ह जज्ञिरे॒ तस्मा॒त्तस्मा॑ज्जा॒ता अ॑जा॒वयः॑ ॥
Samhita Devanagari Nonaccented
तस्मादश्वा अजायंत ये के चोभयादतः ।
गावो ह जज्ञिरे तस्मात्तस्माज्जाता अजावयः ॥
Samhita Transcription Accented
tásmādáśvā ajāyanta yé ké cobhayā́dataḥ ǀ
gā́vo ha jajñire tásmāttásmājjātā́ ajāváyaḥ ǁ
Samhita Transcription Nonaccented
tasmādaśvā ajāyanta ye ke cobhayādataḥ ǀ
gāvo ha jajñire tasmāttasmājjātā ajāvayaḥ ǁ
Padapatha Devanagari Accented
तस्मा॑त् । अश्वाः॑ । अ॒जा॒य॒न्त॒ । ये । के । च॒ । उ॒भ॒याद॑तः ।
गावः॑ । ह॒ । ज॒ज्ञि॒रे॒ । तस्मा॑त् । तस्मा॑त् । जा॒ताः । अ॒जा॒वयः॑ ॥
Padapatha Devanagari Nonaccented
तस्मात् । अश्वाः । अजायन्त । ये । के । च । उभयादतः ।
गावः । ह । जज्ञिरे । तस्मात् । तस्मात् । जाताः । अजावयः ॥
Padapatha Transcription Accented
tásmāt ǀ áśvāḥ ǀ ajāyanta ǀ yé ǀ ké ǀ ca ǀ ubhayā́dataḥ ǀ
gā́vaḥ ǀ ha ǀ jajñire ǀ tásmāt ǀ tásmāt ǀ jātā́ḥ ǀ ajāváyaḥ ǁ
Padapatha Transcription Nonaccented
tasmāt ǀ aśvāḥ ǀ ajāyanta ǀ ye ǀ ke ǀ ca ǀ ubhayādataḥ ǀ
gāvaḥ ǀ ha ǀ jajñire ǀ tasmāt ǀ tasmāt ǀ jātāḥ ǀ ajāvayaḥ ǁ
10.090.11 (Mandala. Sukta. Rik)
8.4.19.01 (Ashtaka. Adhyaya. Varga. Rik)
10.07.143 (Mandala. Anuvāka. Rik)
Samhita Devanagari Accented
यत्पुरु॑षं॒ व्यद॑धुः कति॒धा व्य॑कल्पयन् ।
मुखं॒ किम॑स्य॒ कौ बा॒हू का ऊ॒रू पादा॑ उच्येते ॥
Samhita Devanagari Nonaccented
यत्पुरुषं व्यदधुः कतिधा व्यकल्पयन् ।
मुखं किमस्य कौ बाहू का ऊरू पादा उच्येते ॥
Samhita Transcription Accented
yátpúruṣam vyádadhuḥ katidhā́ vyákalpayan ǀ
múkham kímasya káu bāhū́ kā́ ūrū́ pā́dā ucyete ǁ
Samhita Transcription Nonaccented
yatpuruṣam vyadadhuḥ katidhā vyakalpayan ǀ
mukham kimasya kau bāhū kā ūrū pādā ucyete ǁ
Padapatha Devanagari Accented
यत् । पुरु॑षम् । वि । अद॑धुः । क॒ति॒धा । वि । अ॒क॒ल्प॒य॒न् ।
मुख॑म् । किम् । अ॒स्य॒ । कौ । बा॒हू इति॑ । कौ । ऊ॒रू इति॑ । पादौ॑ । उ॒च्ये॒ते॒ इति॑ ॥
Padapatha Devanagari Nonaccented
यत् । पुरुषम् । वि । अदधुः । कतिधा । वि । अकल्पयन् ।
मुखम् । किम् । अस्य । कौ । बाहू इति । कौ । ऊरू इति । पादौ । उच्येते इति ॥
Padapatha Transcription Accented
yát ǀ púruṣam ǀ ví ǀ ádadhuḥ ǀ katidhā́ ǀ ví ǀ akalpayan ǀ
múkham ǀ kím ǀ asya ǀ káu ǀ bāhū́ íti ǀ káu ǀ ūrū́ íti ǀ pā́dau ǀ ucyete íti ǁ
Padapatha Transcription Nonaccented
yat ǀ puruṣam ǀ vi ǀ adadhuḥ ǀ katidhā ǀ vi ǀ akalpayan ǀ
mukham ǀ kim ǀ asya ǀ kau ǀ bāhū iti ǀ kau ǀ ūrū iti ǀ pādau ǀ ucyete iti ǁ
10.090.12 (Mandala. Sukta. Rik)
8.4.19.02 (Ashtaka. Adhyaya. Varga. Rik)
10.07.144 (Mandala. Anuvāka. Rik)
Samhita Devanagari Accented
ब्रा॒ह्म॒णो॑ऽस्य॒ मुख॑मासीद्बा॒हू रा॑ज॒न्यः॑ कृ॒तः ।
ऊ॒रू तद॑स्य॒ यद्वैश्यः॑ प॒द्भ्यां शू॒द्रो अ॑जायत ॥
Samhita Devanagari Nonaccented
ब्राह्मणोऽस्य मुखमासीद्बाहू राजन्यः कृतः ।
ऊरू तदस्य यद्वैश्यः पद्भ्यां शूद्रो अजायत ॥
Samhita Transcription Accented
brāhmaṇó’sya múkhamāsīdbāhū́ rājanyáḥ kṛtáḥ ǀ
ūrū́ tádasya yádváiśyaḥ padbhyā́m śūdró ajāyata ǁ
Samhita Transcription Nonaccented
brāhmaṇo’sya mukhamāsīdbāhū rājanyaḥ kṛtaḥ ǀ
ūrū tadasya yadvaiśyaḥ padbhyām śūdro ajāyata ǁ
Padapatha Devanagari Accented
ब्रा॒ह्म॒णः । अ॒स्य॒ । मुख॑म् । आ॒सी॒त् । बा॒हू इति॑ । रा॒ज॒न्यः॑ । कृ॒तः ।
ऊ॒रू इति॑ । तत् । अ॒स्य॒ । यत् । वैश्यः॑ । प॒त्ऽभ्याम् । शू॒द्रः । अ॒जा॒य॒त॒ ॥
Padapatha Devanagari Nonaccented
ब्राह्मणः । अस्य । मुखम् । आसीत् । बाहू इति । राजन्यः । कृतः ।
ऊरू इति । तत् । अस्य । यत् । वैश्यः । पत्ऽभ्याम् । शूद्रः । अजायत ॥
Padapatha Transcription Accented
brāhmaṇáḥ ǀ asya ǀ múkham ǀ āsīt ǀ bāhū́ íti ǀ rājanyáḥ ǀ kṛtáḥ ǀ
ūrū́ íti ǀ tát ǀ asya ǀ yát ǀ váiśyaḥ ǀ pat-bhyā́m ǀ śūdráḥ ǀ ajāyata ǁ
Padapatha Transcription Nonaccented
brāhmaṇaḥ ǀ asya ǀ mukham ǀ āsīt ǀ bāhū iti ǀ rājanyaḥ ǀ kṛtaḥ ǀ
ūrū iti ǀ tat ǀ asya ǀ yat ǀ vaiśyaḥ ǀ pat-bhyām ǀ śūdraḥ ǀ ajāyata ǁ
10.090.13 (Mandala. Sukta. Rik)
8.4.19.03 (Ashtaka. Adhyaya. Varga. Rik)
10.07.145 (Mandala. Anuvāka. Rik)
Samhita Devanagari Accented
चं॒द्रमा॒ मन॑सो जा॒तश्चक्षोः॒ सूर्यो॑ अजायत ।
मुखा॒दिंद्र॑श्चा॒ग्निश्च॑ प्रा॒णाद्वा॒युर॑जायत ॥
Samhita Devanagari Nonaccented
चंद्रमा मनसो जातश्चक्षोः सूर्यो अजायत ।
मुखादिंद्रश्चाग्निश्च प्राणाद्वायुरजायत ॥
Samhita Transcription Accented
candrámā mánaso jātáścákṣoḥ sū́ryo ajāyata ǀ
múkhādíndraścāgníśca prāṇā́dvāyúrajāyata ǁ
Samhita Transcription Nonaccented
candramā manaso jātaścakṣoḥ sūryo ajāyata ǀ
mukhādindraścāgniśca prāṇādvāyurajāyata ǁ
Padapatha Devanagari Accented
च॒न्द्रमाः॑ । मन॑सः । जा॒तः । चक्षोः॑ । सूर्यः॑ । अ॒जा॒य॒त॒ ।
मुखा॑त् । इन्द्रः॑ । च॒ । अ॒ग्निः । च॒ । प्रा॒णात् । वा॒युः । अ॒जा॒य॒त॒ ॥
Padapatha Devanagari Nonaccented
चन्द्रमाः । मनसः । जातः । चक्षोः । सूर्यः । अजायत ।
मुखात् । इन्द्रः । च । अग्निः । च । प्राणात् । वायुः । अजायत ॥
Padapatha Transcription Accented
candrámāḥ ǀ mánasaḥ ǀ jātáḥ ǀ cákṣoḥ ǀ sū́ryaḥ ǀ ajāyata ǀ
múkhāt ǀ índraḥ ǀ ca ǀ agníḥ ǀ ca ǀ prāṇā́t ǀ vāyúḥ ǀ ajāyata ǁ
Padapatha Transcription Nonaccented
candramāḥ ǀ manasaḥ ǀ jātaḥ ǀ cakṣoḥ ǀ sūryaḥ ǀ ajāyata ǀ
mukhāt ǀ indraḥ ǀ ca ǀ agniḥ ǀ ca ǀ prāṇāt ǀ vāyuḥ ǀ ajāyata ǁ
10.090.14 (Mandala. Sukta. Rik)
8.4.19.04 (Ashtaka. Adhyaya. Varga. Rik)
10.07.146 (Mandala. Anuvāka. Rik)
Samhita Devanagari Accented
नाभ्या॑ आसीदं॒तरि॑क्षं शी॒र्ष्णो द्यौः सम॑वर्तत ।
प॒द्भ्यां भूमि॒र्दिशः॒ श्रोत्रा॒त्तथा॑ लो॒काँ अ॑कल्पयन् ॥
Samhita Devanagari Nonaccented
नाभ्या आसीदंतरिक्षं शीर्ष्णो द्यौः समवर्तत ।
पद्भ्यां भूमिर्दिशः श्रोत्रात्तथा लोकाँ अकल्पयन् ॥
Samhita Transcription Accented
nā́bhyā āsīdantárikṣam śīrṣṇó dyáuḥ sámavartata ǀ
padbhyā́m bhū́mirdíśaḥ śrótrāttáthā lokā́m̐ akalpayan ǁ
Samhita Transcription Nonaccented
nābhyā āsīdantarikṣam śīrṣṇo dyauḥ samavartata ǀ
padbhyām bhūmirdiśaḥ śrotrāttathā lokām̐ akalpayan ǁ
Padapatha Devanagari Accented
नाभ्याः॑ । आ॒सी॒त् । अ॒न्तरि॑क्षम् । शी॒र्ष्णः । द्यौः । सम् । अ॒व॒र्त॒त॒ ।
प॒त्ऽभ्याम् । भूमिः॑ । दिशः॑ । श्रोत्रा॑त् । तथा॑ । लो॒कान् । अ॒क॒ल्प॒य॒न् ॥
Padapatha Devanagari Nonaccented
नाभ्याः । आसीत् । अन्तरिक्षम् । शीर्ष्णः । द्यौः । सम् । अवर्तत ।
पत्ऽभ्याम् । भूमिः । दिशः । श्रोत्रात् । तथा । लोकान् । अकल्पयन् ॥
Padapatha Transcription Accented
nā́bhyāḥ ǀ āsīt ǀ antárikṣam ǀ śīrṣṇáḥ ǀ dyáuḥ ǀ sám ǀ avartata ǀ
pat-bhyā́m ǀ bhū́miḥ ǀ díśaḥ ǀ śrótrāt ǀ táthā ǀ lokā́n ǀ akalpayan ǁ
Padapatha Transcription Nonaccented
nābhyāḥ ǀ āsīt ǀ antarikṣam ǀ śīrṣṇaḥ ǀ dyauḥ ǀ sam ǀ avartata ǀ
pat-bhyām ǀ bhūmiḥ ǀ diśaḥ ǀ śrotrāt ǀ tathā ǀ lokān ǀ akalpayan ǁ
10.090.15 (Mandala. Sukta. Rik)
8.4.19.05 (Ashtaka. Adhyaya. Varga. Rik)
10.07.147 (Mandala. Anuvāka. Rik)
Samhita Devanagari Accented
स॒प्तास्या॑सन्परि॒धय॒स्त्रिः स॒प्त स॒मिधः॑ कृ॒ताः ।
दे॒वा यद्य॒ज्ञं त॑न्वा॒ना अब॑ध्न॒न्पुरु॑षं प॒शुं ॥
Samhita Devanagari Nonaccented
सप्तास्यासन्परिधयस्त्रिः सप्त समिधः कृताः ।
देवा यद्यज्ञं तन्वाना अबध्नन्पुरुषं पशुं ॥
Samhita Transcription Accented
saptā́syāsanparidháyastríḥ saptá samídhaḥ kṛtā́ḥ ǀ
devā́ yádyajñám tanvānā́ ábadhnanpúruṣam paśúm ǁ
Samhita Transcription Nonaccented
saptāsyāsanparidhayastriḥ sapta samidhaḥ kṛtāḥ ǀ
devā yadyajñam tanvānā abadhnanpuruṣam paśum ǁ
Padapatha Devanagari Accented
स॒प्त । अ॒स्य॒ । आ॒स॒न् । प॒रि॒ऽधयः॑ । त्रिः । स॒प्त । स॒म्ऽइधः॑ । कृ॒ताः ।
दे॒वाः । यत् । य॒ज्ञम् । त॒न्वा॒नाः । अब॑ध्नन् । पुरु॑षम् । प॒शुम् ॥
Padapatha Devanagari Nonaccented
सप्त । अस्य । आसन् । परिऽधयः । त्रिः । सप्त । सम्ऽइधः । कृताः ।
देवाः । यत् । यज्ञम् । तन्वानाः । अबध्नन् । पुरुषम् । पशुम् ॥
Padapatha Transcription Accented
saptá ǀ asya ǀ āsan ǀ pari-dháyaḥ ǀ tríḥ ǀ saptá ǀ sam-ídhaḥ ǀ kṛtā́ḥ ǀ
devā́ḥ ǀ yát ǀ yajñám ǀ tanvānā́ḥ ǀ ábadhnan ǀ púruṣam ǀ paśúm ǁ
Padapatha Transcription Nonaccented
sapta ǀ asya ǀ āsan ǀ pari-dhayaḥ ǀ triḥ ǀ sapta ǀ sam-idhaḥ ǀ kṛtāḥ ǀ
devāḥ ǀ yat ǀ yajñam ǀ tanvānāḥ ǀ abadhnan ǀ puruṣam ǀ paśum ǁ
10.090.16 (Mandala. Sukta. Rik)
8.4.19.06 (Ashtaka. Adhyaya. Varga. Rik)
10.07.148 (Mandala. Anuvāka. Rik)
Samhita Devanagari Accented
य॒ज्ञेन॑ य॒ज्ञम॑यजंत दे॒वास्तानि॒ धर्मा॑णि प्रथ॒मान्या॑सन् ।
ते ह॒ नाकं॑ महि॒मानः॑ सचंत॒ यत्र॒ पूर्वे॑ सा॒ध्याः संति॑ दे॒वाः ॥
Samhita Devanagari Nonaccented
यज्ञेन यज्ञमयजंत देवास्तानि धर्माणि प्रथमान्यासन् ।
ते ह नाकं महिमानः सचंत यत्र पूर्वे साध्याः संति देवाः ॥
Samhita Transcription Accented
yajñéna yajñámayajanta devā́stā́ni dhármāṇi prathamā́nyāsan ǀ
té ha nā́kam mahimā́naḥ sacanta yátra pū́rve sādhyā́ḥ sánti devā́ḥ ǁ
Samhita Transcription Nonaccented
yajñena yajñamayajanta devāstāni dharmāṇi prathamānyāsan ǀ
te ha nākam mahimānaḥ sacanta yatra pūrve sādhyāḥ santi devāḥ ǁ
Padapatha Devanagari Accented
य॒ज्ञेन॑ । य॒ज्ञम् । अ॒य॒ज॒न्त॒ । दे॒वाः । तानि॑ । धर्मा॑णि । प्र॒थ॒मानि॑ । आ॒स॒न् ।
ते । ह॒ । नाक॑म् । म॒हि॒मानः॑ । स॒च॒न्त॒ । यत्र॑ । पूर्वे॑ । सा॒ध्याः । सन्ति॑ । दे॒वाः ॥
Padapatha Devanagari Nonaccented
यज्ञेन । यज्ञम् । अयजन्त । देवाः । तानि । धर्माणि । प्रथमानि । आसन् ।
ते । ह । नाकम् । महिमानः । सचन्त । यत्र । पूर्वे । साध्याः । सन्ति । देवाः ॥
Padapatha Transcription Accented
yajñéna ǀ yajñám ǀ ayajanta ǀ devā́ḥ ǀ tā́ni ǀ dhármāṇi ǀ prathamā́ni ǀ āsan ǀ
té ǀ ha ǀ nā́kam ǀ mahimā́naḥ ǀ sacanta ǀ yátra ǀ pū́rve ǀ sādhyā́ḥ ǀ sánti ǀ devā́ḥ ǁ
Padapatha Transcription Nonaccented
yajñena ǀ yajñam ǀ ayajanta ǀ devāḥ ǀ tāni ǀ dharmāṇi ǀ prathamāni ǀ āsan ǀ
te ǀ ha ǀ nākam ǀ mahimānaḥ ǀ sacanta ǀ yatra ǀ pūrve ǀ sādhyāḥ ǀ santi ǀ devāḥ ǁ