|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 92
|
1. Info |
| To: | viśvedevās | |
| From: | śāryāta mānava | |
| Metres: | 1st set of styles: jagatī (2, 5, 8, 10, 11, 15); nicṛjjagatī (1, 6, 12, 14); virāḍjagatī (3, 4, 9, 13); pādanicṛjjgatī (7) 2nd set of styles: jagatī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.092.01 (Mandala. Sukta. Rik)
8.4.23.01 (Ashtaka. Adhyaya. Varga. Rik)
10.08.016 (Mandala. Anuvāka. Rik)
Samhita Devanagari Accented
य॒ज्ञस्य॑ वो र॒थ्यं॑ वि॒श्पतिं॑ वि॒शां होता॑रम॒क्तोरति॑थिं वि॒भाव॑सुं ।
शोचं॒छुष्का॑सु॒ हरि॑णीषु॒ जर्भु॑र॒द्वृषा॑ के॒तुर्य॑ज॒तो द्याम॑शायत ॥
Samhita Devanagari Nonaccented
यज्ञस्य वो रथ्यं विश्पतिं विशां होतारमक्तोरतिथिं विभावसुं ।
शोचंछुष्कासु हरिणीषु जर्भुरद्वृषा केतुर्यजतो द्यामशायत ॥
Samhita Transcription Accented
yajñásya vo rathyám viśpátim viśā́m hótāramaktórátithim vibhā́vasum ǀ
śócañchúṣkāsu háriṇīṣu járbhuradvṛ́ṣā ketúryajató dyā́maśāyata ǁ
Samhita Transcription Nonaccented
yajñasya vo rathyam viśpatim viśām hotāramaktoratithim vibhāvasum ǀ
śocañchuṣkāsu hariṇīṣu jarbhuradvṛṣā keturyajato dyāmaśāyata ǁ
Padapatha Devanagari Accented
य॒ज्ञस्य॑ । वः॒ । र॒थ्य॑म् । वि॒श्पति॑म् । वि॒शाम् । होता॑रम् । अ॒क्तोः । अति॑थिम् । वि॒भाऽव॑सुम् ।
शोच॑न् । शुष्का॑सु । हरि॑णीषु । जर्भु॑रत् । वृषा॑ । के॒तुः । य॒ज॒तः । द्याम् । अ॒शा॒य॒त॒ ॥
Padapatha Devanagari Nonaccented
यज्ञस्य । वः । रथ्यम् । विश्पतिम् । विशाम् । होतारम् । अक्तोः । अतिथिम् । विभाऽवसुम् ।
शोचन् । शुष्कासु । हरिणीषु । जर्भुरत् । वृषा । केतुः । यजतः । द्याम् । अशायत ॥
Padapatha Transcription Accented
yajñásya ǀ vaḥ ǀ rathyám ǀ viśpátim ǀ viśā́m ǀ hótāram ǀ aktóḥ ǀ átithim ǀ vibhā́-vasum ǀ
śócan ǀ śúṣkāsu ǀ háriṇīṣu ǀ járbhurat ǀ vṛ́ṣā ǀ ketúḥ ǀ yajatáḥ ǀ dyā́m ǀ aśāyata ǁ
Padapatha Transcription Nonaccented
yajñasya ǀ vaḥ ǀ rathyam ǀ viśpatim ǀ viśām ǀ hotāram ǀ aktoḥ ǀ atithim ǀ vibhā-vasum ǀ
śocan ǀ śuṣkāsu ǀ hariṇīṣu ǀ jarbhurat ǀ vṛṣā ǀ ketuḥ ǀ yajataḥ ǀ dyām ǀ aśāyata ǁ
10.092.02 (Mandala. Sukta. Rik)
8.4.23.02 (Ashtaka. Adhyaya. Varga. Rik)
10.08.017 (Mandala. Anuvāka. Rik)
Samhita Devanagari Accented
इ॒ममं॑ज॒स्पामु॒भये॑ अकृण्वत ध॒र्माण॑म॒ग्निं वि॒दथ॑स्य॒ साध॑नं ।
अ॒क्तुं न य॒ह्वमु॒षसः॑ पु॒रोहि॑तं॒ तनू॒नपा॑तमरु॒षस्य॑ निंसते ॥
Samhita Devanagari Nonaccented
इममंजस्पामुभये अकृण्वत धर्माणमग्निं विदथस्य साधनं ।
अक्तुं न यह्वमुषसः पुरोहितं तनूनपातमरुषस्य निंसते ॥
Samhita Transcription Accented
imámañjaspā́mubháye akṛṇvata dharmā́ṇamagním vidáthasya sā́dhanam ǀ
aktúm ná yahvámuṣásaḥ puróhitam tánūnápātamaruṣásya niṃsate ǁ
Samhita Transcription Nonaccented
imamañjaspāmubhaye akṛṇvata dharmāṇamagnim vidathasya sādhanam ǀ
aktum na yahvamuṣasaḥ purohitam tanūnapātamaruṣasya niṃsate ǁ
Padapatha Devanagari Accented
इ॒मम् । अ॒ञ्जः॒ऽपाम् । उ॒भये॑ । अ॒कृ॒ण्व॒त॒ । ध॒र्माण॑म् । अ॒ग्निम् । वि॒दथ॑स्य । साध॑नम् ।
अ॒क्तुम् । न । य॒ह्वम् । उ॒षसः॑ । पु॒रःऽहि॑तम् । तनू॒३॒॑ऽनपा॑तम् । अ॒रु॒षस्य॑ । निं॒स॒ते॒ ॥
Padapatha Devanagari Nonaccented
इमम् । अञ्जःऽपाम् । उभये । अकृण्वत । धर्माणम् । अग्निम् । विदथस्य । साधनम् ।
अक्तुम् । न । यह्वम् । उषसः । पुरःऽहितम् । तनूऽनपातम् । अरुषस्य । निंसते ॥
Padapatha Transcription Accented
imám ǀ añjaḥ-pā́m ǀ ubháye ǀ akṛṇvata ǀ dharmā́ṇam ǀ agním ǀ vidáthasya ǀ sā́dhanam ǀ
aktúm ǀ ná ǀ yahvám ǀ uṣásaḥ ǀ puráḥ-hitam ǀ tanū́-nápātam ǀ aruṣásya ǀ niṃsate ǁ
Padapatha Transcription Nonaccented
imam ǀ añjaḥ-pām ǀ ubhaye ǀ akṛṇvata ǀ dharmāṇam ǀ agnim ǀ vidathasya ǀ sādhanam ǀ
aktum ǀ na ǀ yahvam ǀ uṣasaḥ ǀ puraḥ-hitam ǀ tanū-napātam ǀ aruṣasya ǀ niṃsate ǁ
10.092.03 (Mandala. Sukta. Rik)
8.4.23.03 (Ashtaka. Adhyaya. Varga. Rik)
10.08.018 (Mandala. Anuvāka. Rik)
Samhita Devanagari Accented
बळ॑स्य नी॒था वि प॒णेश्च॑ मन्महे व॒या अ॑स्य॒ प्रहु॑ता आसु॒रत्त॑वे ।
य॒दा घो॒रासो॑ अमृत॒त्वमाश॒तादिज्जन॑स्य॒ दैव्य॑स्य चर्किरन् ॥
Samhita Devanagari Nonaccented
बळस्य नीथा वि पणेश्च मन्महे वया अस्य प्रहुता आसुरत्तवे ।
यदा घोरासो अमृतत्वमाशतादिज्जनस्य दैव्यस्य चर्किरन् ॥
Samhita Transcription Accented
báḷasya nīthā́ ví paṇéśca manmahe vayā́ asya práhutā āsuráttave ǀ
yadā́ ghorā́so amṛtatvámā́śatā́díjjánasya dáivyasya carkiran ǁ
Samhita Transcription Nonaccented
baḷasya nīthā vi paṇeśca manmahe vayā asya prahutā āsurattave ǀ
yadā ghorāso amṛtatvamāśatādijjanasya daivyasya carkiran ǁ
Padapatha Devanagari Accented
बट् । अ॒स्य॒ । नी॒था । वि । प॒णेः । च॒ । म॒न्म॒हे॒ । व॒याः । अ॒स्य॒ । प्रऽहु॑ताः । आ॒सुः॒ । अत्त॑वे ।
य॒दा । घो॒रासः॑ । अ॒मृ॒त॒ऽत्वम् । आश॑त । आत् । इत् । जन॑स्य । दैव्य॑स्य । च॒र्कि॒र॒न् ॥
Padapatha Devanagari Nonaccented
बट् । अस्य । नीथा । वि । पणेः । च । मन्महे । वयाः । अस्य । प्रऽहुताः । आसुः । अत्तवे ।
यदा । घोरासः । अमृतऽत्वम् । आशत । आत् । इत् । जनस्य । दैव्यस्य । चर्किरन् ॥
Padapatha Transcription Accented
báṭ ǀ asya ǀ nīthā́ ǀ ví ǀ paṇéḥ ǀ ca ǀ manmahe ǀ vayā́ḥ ǀ asya ǀ prá-hutāḥ ǀ āsuḥ ǀ áttave ǀ
yadā́ ǀ ghorā́saḥ ǀ amṛta-tvám ǀ ā́śata ǀ ā́t ǀ ít ǀ jánasya ǀ dáivyasya ǀ carkiran ǁ
Padapatha Transcription Nonaccented
baṭ ǀ asya ǀ nīthā ǀ vi ǀ paṇeḥ ǀ ca ǀ manmahe ǀ vayāḥ ǀ asya ǀ pra-hutāḥ ǀ āsuḥ ǀ attave ǀ
yadā ǀ ghorāsaḥ ǀ amṛta-tvam ǀ āśata ǀ āt ǀ it ǀ janasya ǀ daivyasya ǀ carkiran ǁ
10.092.04 (Mandala. Sukta. Rik)
8.4.23.04 (Ashtaka. Adhyaya. Varga. Rik)
10.08.019 (Mandala. Anuvāka. Rik)
Samhita Devanagari Accented
ऋ॒तस्य॒ हि प्रसि॑ति॒र्द्यौरु॒रु व्यचो॒ नमो॑ म॒ह्य१॒॑रम॑तिः॒ पनी॑यसी ।
इंद्रो॑ मि॒त्रो वरु॑णः॒ सं चि॑कित्रि॒रेऽथो॒ भगः॑ सवि॒ता पू॒तद॑क्षसः ॥
Samhita Devanagari Nonaccented
ऋतस्य हि प्रसितिर्द्यौरुरु व्यचो नमो मह्यरमतिः पनीयसी ।
इंद्रो मित्रो वरुणः सं चिकित्रिरेऽथो भगः सविता पूतदक्षसः ॥
Samhita Transcription Accented
ṛtásya hí prásitirdyáururú vyáco námo mahyárámatiḥ pánīyasī ǀ
índro mitró váruṇaḥ sám cikitriré’tho bhágaḥ savitā́ pūtádakṣasaḥ ǁ
Samhita Transcription Nonaccented
ṛtasya hi prasitirdyaururu vyaco namo mahyaramatiḥ panīyasī ǀ
indro mitro varuṇaḥ sam cikitrire’tho bhagaḥ savitā pūtadakṣasaḥ ǁ
Padapatha Devanagari Accented
ऋ॒तस्य॑ । हि । प्रऽसि॑तिः । द्यौः । उ॒रु । व्यचः॑ । नमः॑ । म॒ही । अ॒रम॑तिः । पनी॑यसी ।
इन्द्रः॑ । मि॒त्रः । वरु॑णः । सम् । चि॒कि॒त्रि॒रे॒ । अथो॒ इति॑ । भगः॑ । स॒वि॒ता । पू॒तऽद॑क्षसः ॥
Padapatha Devanagari Nonaccented
ऋतस्य । हि । प्रऽसितिः । द्यौः । उरु । व्यचः । नमः । मही । अरमतिः । पनीयसी ।
इन्द्रः । मित्रः । वरुणः । सम् । चिकित्रिरे । अथो इति । भगः । सविता । पूतऽदक्षसः ॥
Padapatha Transcription Accented
ṛtásya ǀ hí ǀ prá-sitiḥ ǀ dyáuḥ ǀ urú ǀ vyácaḥ ǀ námaḥ ǀ mahī́ ǀ arámatiḥ ǀ pánīyasī ǀ
índraḥ ǀ mitráḥ ǀ váruṇaḥ ǀ sám ǀ cikitrire ǀ átho íti ǀ bhágaḥ ǀ savitā́ ǀ pūtá-dakṣasaḥ ǁ
Padapatha Transcription Nonaccented
ṛtasya ǀ hi ǀ pra-sitiḥ ǀ dyauḥ ǀ uru ǀ vyacaḥ ǀ namaḥ ǀ mahī ǀ aramatiḥ ǀ panīyasī ǀ
indraḥ ǀ mitraḥ ǀ varuṇaḥ ǀ sam ǀ cikitrire ǀ atho iti ǀ bhagaḥ ǀ savitā ǀ pūta-dakṣasaḥ ǁ
10.092.05 (Mandala. Sukta. Rik)
8.4.23.05 (Ashtaka. Adhyaya. Varga. Rik)
10.08.020 (Mandala. Anuvāka. Rik)
Samhita Devanagari Accented
प्र रु॒द्रेण॑ य॒यिना॑ यंति॒ सिंध॑वस्ति॒रो म॒हीम॒रम॑तिं दधन्विरे ।
येभिः॒ परि॑ज्मा परि॒यन्नु॒रु ज्रयो॒ वि रोरु॑वज्ज॒ठरे॒ विश्व॑मु॒क्षते॑ ॥
Samhita Devanagari Nonaccented
प्र रुद्रेण ययिना यंति सिंधवस्तिरो महीमरमतिं दधन्विरे ।
येभिः परिज्मा परियन्नुरु ज्रयो वि रोरुवज्जठरे विश्वमुक्षते ॥
Samhita Transcription Accented
prá rudréṇa yayínā yanti síndhavastiró mahī́marámatim dadhanvire ǀ
yébhiḥ párijmā pariyánnurú jráyo ví róruvajjaṭháre víśvamukṣáte ǁ
Samhita Transcription Nonaccented
pra rudreṇa yayinā yanti sindhavastiro mahīmaramatim dadhanvire ǀ
yebhiḥ parijmā pariyannuru jrayo vi roruvajjaṭhare viśvamukṣate ǁ
Padapatha Devanagari Accented
प्र । रु॒द्रेण॑ । य॒यिना॑ । य॒न्ति॒ । सिन्ध॑वः । ति॒रः । म॒हीम् । अ॒रम॑तिम् । द॒ध॒न्वि॒रे॒ ।
येभिः॑ । परि॑ऽज्मा । प॒रि॒ऽयन् । उ॒रु । ज्रयः॑ । वि । रोरु॑वत् । ज॒ठरे॑ । विश्व॑म् । उ॒क्षते॑ ॥
Padapatha Devanagari Nonaccented
प्र । रुद्रेण । ययिना । यन्ति । सिन्धवः । तिरः । महीम् । अरमतिम् । दधन्विरे ।
येभिः । परिऽज्मा । परिऽयन् । उरु । ज्रयः । वि । रोरुवत् । जठरे । विश्वम् । उक्षते ॥
Padapatha Transcription Accented
prá ǀ rudréṇa ǀ yayínā ǀ yanti ǀ síndhavaḥ ǀ tiráḥ ǀ mahī́m ǀ arámatim ǀ dadhanvire ǀ
yébhiḥ ǀ pári-jmā ǀ pari-yán ǀ urú ǀ jráyaḥ ǀ ví ǀ róruvat ǀ jaṭháre ǀ víśvam ǀ ukṣáte ǁ
Padapatha Transcription Nonaccented
pra ǀ rudreṇa ǀ yayinā ǀ yanti ǀ sindhavaḥ ǀ tiraḥ ǀ mahīm ǀ aramatim ǀ dadhanvire ǀ
yebhiḥ ǀ pari-jmā ǀ pari-yan ǀ uru ǀ jrayaḥ ǀ vi ǀ roruvat ǀ jaṭhare ǀ viśvam ǀ ukṣate ǁ
10.092.06 (Mandala. Sukta. Rik)
8.4.24.01 (Ashtaka. Adhyaya. Varga. Rik)
10.08.021 (Mandala. Anuvāka. Rik)
Samhita Devanagari Accented
क्रा॒णा रु॒द्रा म॒रुतो॑ वि॒श्वकृ॑ष्टयो दि॒वः श्ये॒नासो॒ असु॑रस्य नी॒ळयः॑ ।
तेभि॑श्चष्टे॒ वरु॑णो मि॒त्रो अ॑र्य॒मेंद्रो॑ दे॒वेभि॑रर्व॒शेभि॒रर्व॑शः ॥
Samhita Devanagari Nonaccented
क्राणा रुद्रा मरुतो विश्वकृष्टयो दिवः श्येनासो असुरस्य नीळयः ।
तेभिश्चष्टे वरुणो मित्रो अर्यमेंद्रो देवेभिरर्वशेभिरर्वशः ॥
Samhita Transcription Accented
krāṇā́ rudrā́ marúto viśvákṛṣṭayo diváḥ śyenā́so ásurasya nīḷáyaḥ ǀ
tébhiścaṣṭe váruṇo mitró aryaméndro devébhirarvaśébhirárvaśaḥ ǁ
Samhita Transcription Nonaccented
krāṇā rudrā maruto viśvakṛṣṭayo divaḥ śyenāso asurasya nīḷayaḥ ǀ
tebhiścaṣṭe varuṇo mitro aryamendro devebhirarvaśebhirarvaśaḥ ǁ
Padapatha Devanagari Accented
क्रा॒णाः । रु॒द्राः । म॒रुतः॑ । वि॒श्वऽकृ॑ष्टयः । दि॒वः । श्ये॒नासः॑ । असु॑रस्य । नी॒ळयः॑ ।
तेभिः॑ । च॒ष्टे॒ । वरु॑णः । मि॒त्रः । अ॒र्य॒मा । इन्द्रः॑ । दे॒वेभिः॑ । अ॒र्व॒शेभिः॑ । अर्व॑शः ॥
Padapatha Devanagari Nonaccented
क्राणाः । रुद्राः । मरुतः । विश्वऽकृष्टयः । दिवः । श्येनासः । असुरस्य । नीळयः ।
तेभिः । चष्टे । वरुणः । मित्रः । अर्यमा । इन्द्रः । देवेभिः । अर्वशेभिः । अर्वशः ॥
Padapatha Transcription Accented
krāṇā́ḥ ǀ rudrā́ḥ ǀ marútaḥ ǀ viśvá-kṛṣṭayaḥ ǀ diváḥ ǀ śyenā́saḥ ǀ ásurasya ǀ nīḷáyaḥ ǀ
tébhiḥ ǀ caṣṭe ǀ váruṇaḥ ǀ mitráḥ ǀ aryamā́ ǀ índraḥ ǀ devébhiḥ ǀ arvaśébhiḥ ǀ árvaśaḥ ǁ
Padapatha Transcription Nonaccented
krāṇāḥ ǀ rudrāḥ ǀ marutaḥ ǀ viśva-kṛṣṭayaḥ ǀ divaḥ ǀ śyenāsaḥ ǀ asurasya ǀ nīḷayaḥ ǀ
tebhiḥ ǀ caṣṭe ǀ varuṇaḥ ǀ mitraḥ ǀ aryamā ǀ indraḥ ǀ devebhiḥ ǀ arvaśebhiḥ ǀ arvaśaḥ ǁ
10.092.07 (Mandala. Sukta. Rik)
8.4.24.02 (Ashtaka. Adhyaya. Varga. Rik)
10.08.022 (Mandala. Anuvāka. Rik)
Samhita Devanagari Accented
इंद्रे॒ भुजं॑ शशमा॒नास॑ आशत॒ सूरो॒ दृशी॑के॒ वृष॑णश्च॒ पौंस्ये॑ ।
प्र ये न्व॑स्या॒र्हणा॑ ततक्षि॒रे युजं॒ वज्रं॑ नृ॒षद॑नेषु का॒रवः॑ ॥
Samhita Devanagari Nonaccented
इंद्रे भुजं शशमानास आशत सूरो दृशीके वृषणश्च पौंस्ये ।
प्र ये न्वस्यार्हणा ततक्षिरे युजं वज्रं नृषदनेषु कारवः ॥
Samhita Transcription Accented
índre bhújam śaśamānā́sa āśata sū́ro dṛ́śīke vṛ́ṣaṇaśca páuṃsye ǀ
prá yé nvásyārháṇā tatakṣiré yújam vájram nṛṣádaneṣu kārávaḥ ǁ
Samhita Transcription Nonaccented
indre bhujam śaśamānāsa āśata sūro dṛśīke vṛṣaṇaśca pauṃsye ǀ
pra ye nvasyārhaṇā tatakṣire yujam vajram nṛṣadaneṣu kāravaḥ ǁ
Padapatha Devanagari Accented
इन्द्रे॑ । भुज॑म् । श॒श॒मा॒नासः॑ । आ॒श॒त॒ । सूरः॑ । दृशी॑के । वृष॑णः । च॒ । पौंस्ये॑ ।
प्र । ये । नु । अ॒स्य॒ । अ॒र्हणा॑ । त॒त॒क्षि॒रे । युज॑म् । वज्र॑म् । नृ॒ऽसद॑नेषु । का॒रवः॑ ॥
Padapatha Devanagari Nonaccented
इन्द्रे । भुजम् । शशमानासः । आशत । सूरः । दृशीके । वृषणः । च । पौंस्ये ।
प्र । ये । नु । अस्य । अर्हणा । ततक्षिरे । युजम् । वज्रम् । नृऽसदनेषु । कारवः ॥
Padapatha Transcription Accented
índre ǀ bhújam ǀ śaśamānā́saḥ ǀ āśata ǀ sū́raḥ ǀ dṛ́śīke ǀ vṛ́ṣaṇaḥ ǀ ca ǀ páuṃsye ǀ
prá ǀ yé ǀ nú ǀ asya ǀ arháṇā ǀ tatakṣiré ǀ yújam ǀ vájram ǀ nṛ-sádaneṣu ǀ kārávaḥ ǁ
Padapatha Transcription Nonaccented
indre ǀ bhujam ǀ śaśamānāsaḥ ǀ āśata ǀ sūraḥ ǀ dṛśīke ǀ vṛṣaṇaḥ ǀ ca ǀ pauṃsye ǀ
pra ǀ ye ǀ nu ǀ asya ǀ arhaṇā ǀ tatakṣire ǀ yujam ǀ vajram ǀ nṛ-sadaneṣu ǀ kāravaḥ ǁ
10.092.08 (Mandala. Sukta. Rik)
8.4.24.03 (Ashtaka. Adhyaya. Varga. Rik)
10.08.023 (Mandala. Anuvāka. Rik)
Samhita Devanagari Accented
सूर॑श्चि॒दा ह॒रितो॑ अस्य रीरम॒दिंद्रा॒दा कश्चि॑द्भयते॒ तवी॑यसः ।
भी॒मस्य॒ वृष्णो॑ ज॒ठरा॑दभि॒श्वसो॑ दि॒वेदि॑वे॒ सहु॑रिः स्त॒न्नबा॑धितः ॥
Samhita Devanagari Nonaccented
सूरश्चिदा हरितो अस्य रीरमदिंद्रादा कश्चिद्भयते तवीयसः ।
भीमस्य वृष्णो जठरादभिश्वसो दिवेदिवे सहुरिः स्तन्नबाधितः ॥
Samhita Transcription Accented
sū́raścidā́ haríto asya rīramadíndrādā́ káścidbhayate távīyasaḥ ǀ
bhīmásya vṛ́ṣṇo jaṭhárādabhiśváso divédive sáhuriḥ stannábādhitaḥ ǁ
Samhita Transcription Nonaccented
sūraścidā harito asya rīramadindrādā kaścidbhayate tavīyasaḥ ǀ
bhīmasya vṛṣṇo jaṭharādabhiśvaso divedive sahuriḥ stannabādhitaḥ ǁ
Padapatha Devanagari Accented
सूरः॑ । चि॒त् । आ । ह॒रितः॑ । अ॒स्य॒ । री॒र॒म॒त् । इन्द्रा॑त् । आ । कः । चि॒त् । भ॒य॒ते॒ । तवी॑यसः ।
भी॒मस्य॑ । वृष्णः॑ । ज॒ठरा॑त् । अ॒भि॒ऽश्वसः॑ । दि॒वेऽदि॑वे । सहु॑रिः । स्त॒न् । अबा॑धितः ॥
Padapatha Devanagari Nonaccented
सूरः । चित् । आ । हरितः । अस्य । रीरमत् । इन्द्रात् । आ । कः । चित् । भयते । तवीयसः ।
भीमस्य । वृष्णः । जठरात् । अभिऽश्वसः । दिवेऽदिवे । सहुरिः । स्तन् । अबाधितः ॥
Padapatha Transcription Accented
sū́raḥ ǀ cit ǀ ā́ ǀ harítaḥ ǀ asya ǀ rīramat ǀ índrāt ǀ ā́ ǀ káḥ ǀ cit ǀ bhayate ǀ távīyasaḥ ǀ
bhīmásya ǀ vṛ́ṣṇaḥ ǀ jaṭhárāt ǀ abhi-śvásaḥ ǀ divé-dive ǀ sáhuriḥ ǀ stan ǀ ábādhitaḥ ǁ
Padapatha Transcription Nonaccented
sūraḥ ǀ cit ǀ ā ǀ haritaḥ ǀ asya ǀ rīramat ǀ indrāt ǀ ā ǀ kaḥ ǀ cit ǀ bhayate ǀ tavīyasaḥ ǀ
bhīmasya ǀ vṛṣṇaḥ ǀ jaṭharāt ǀ abhi-śvasaḥ ǀ dive-dive ǀ sahuriḥ ǀ stan ǀ abādhitaḥ ǁ
10.092.09 (Mandala. Sukta. Rik)
8.4.24.04 (Ashtaka. Adhyaya. Varga. Rik)
10.08.024 (Mandala. Anuvāka. Rik)
Samhita Devanagari Accented
स्तोमं॑ वो अ॒द्य रु॒द्राय॒ शिक्व॑से क्ष॒यद्वी॑राय॒ नम॑सा दिदिष्टन ।
येभिः॑ शि॒वः स्ववाँ॑ एव॒याव॑भिर्दि॒वः सिष॑क्ति॒ स्वय॑शा॒ निका॑मभिः ॥
Samhita Devanagari Nonaccented
स्तोमं वो अद्य रुद्राय शिक्वसे क्षयद्वीराय नमसा दिदिष्टन ।
येभिः शिवः स्ववाँ एवयावभिर्दिवः सिषक्ति स्वयशा निकामभिः ॥
Samhita Transcription Accented
stómam vo adyá rudrā́ya śíkvase kṣayádvīrāya námasā didiṣṭana ǀ
yébhiḥ śiváḥ svávām̐ evayā́vabhirdiváḥ síṣakti sváyaśā níkāmabhiḥ ǁ
Samhita Transcription Nonaccented
stomam vo adya rudrāya śikvase kṣayadvīrāya namasā didiṣṭana ǀ
yebhiḥ śivaḥ svavām̐ evayāvabhirdivaḥ siṣakti svayaśā nikāmabhiḥ ǁ
Padapatha Devanagari Accented
स्तोम॑म् । वः॒ । अ॒द्य । रु॒द्राय॑ । शिक्व॑से । क्ष॒यत्ऽवी॑राय । नम॑सा । दि॒दि॒ष्ट॒न॒ ।
येभिः॑ । शि॒वः । स्वऽवा॑न् । ए॒व॒याव॑ऽभिः । दि॒वः । सिस॑क्ति । स्वऽय॑शाः । निका॑मऽभिः ॥
Padapatha Devanagari Nonaccented
स्तोमम् । वः । अद्य । रुद्राय । शिक्वसे । क्षयत्ऽवीराय । नमसा । दिदिष्टन ।
येभिः । शिवः । स्वऽवान् । एवयावऽभिः । दिवः । सिसक्ति । स्वऽयशाः । निकामऽभिः ॥
Padapatha Transcription Accented
stómam ǀ vaḥ ǀ adyá ǀ rudrā́ya ǀ śíkvase ǀ kṣayát-vīrāya ǀ námasā ǀ didiṣṭana ǀ
yébhiḥ ǀ śiváḥ ǀ svá-vān ǀ evayā́va-bhiḥ ǀ diváḥ ǀ sísakti ǀ svá-yaśāḥ ǀ níkāma-bhiḥ ǁ
Padapatha Transcription Nonaccented
stomam ǀ vaḥ ǀ adya ǀ rudrāya ǀ śikvase ǀ kṣayat-vīrāya ǀ namasā ǀ didiṣṭana ǀ
yebhiḥ ǀ śivaḥ ǀ sva-vān ǀ evayāva-bhiḥ ǀ divaḥ ǀ sisakti ǀ sva-yaśāḥ ǀ nikāma-bhiḥ ǁ
10.092.10 (Mandala. Sukta. Rik)
8.4.24.05 (Ashtaka. Adhyaya. Varga. Rik)
10.08.025 (Mandala. Anuvāka. Rik)
Samhita Devanagari Accented
ते हि प्र॒जाया॒ अभ॑रंत॒ वि श्रवो॒ बृह॒स्पति॑र्वृष॒भः सोम॑जामयः ।
य॒ज्ञैरथ॑र्वा प्रथ॒मो वि धा॑रयद्दे॒वा दक्षै॒र्भृग॑वः॒ सं चि॑कित्रिरे ॥
Samhita Devanagari Nonaccented
ते हि प्रजाया अभरंत वि श्रवो बृहस्पतिर्वृषभः सोमजामयः ।
यज्ञैरथर्वा प्रथमो वि धारयद्देवा दक्षैर्भृगवः सं चिकित्रिरे ॥
Samhita Transcription Accented
té hí prajā́yā ábharanta ví śrávo bṛ́haspátirvṛṣabháḥ sómajāmayaḥ ǀ
yajñáirátharvā prathamó ví dhārayaddevā́ dákṣairbhṛ́gavaḥ sám cikitrire ǁ
Samhita Transcription Nonaccented
te hi prajāyā abharanta vi śravo bṛhaspatirvṛṣabhaḥ somajāmayaḥ ǀ
yajñairatharvā prathamo vi dhārayaddevā dakṣairbhṛgavaḥ sam cikitrire ǁ
Padapatha Devanagari Accented
ते । हि । प्र॒ऽजायाः॑ । अभ॑रन्त । वि । श्रवः॑ । बृह॒स्पतिः॑ । वृ॒ष॒भः । सोम॑ऽजामयः ।
य॒ज्ञैः । अथ॑र्वा । प्र॒थ॒मः । वि । धा॒र॒य॒त् । दे॒वाः । दक्षैः॑ । भृग॑वः । सम् । चि॒कि॒त्रि॒रे॒ ॥
Padapatha Devanagari Nonaccented
ते । हि । प्रऽजायाः । अभरन्त । वि । श्रवः । बृहस्पतिः । वृषभः । सोमऽजामयः ।
यज्ञैः । अथर्वा । प्रथमः । वि । धारयत् । देवाः । दक्षैः । भृगवः । सम् । चिकित्रिरे ॥
Padapatha Transcription Accented
té ǀ hí ǀ pra-jā́yāḥ ǀ ábharanta ǀ ví ǀ śrávaḥ ǀ bṛ́haspátiḥ ǀ vṛṣabháḥ ǀ sóma-jāmayaḥ ǀ
yajñáiḥ ǀ átharvā ǀ prathamáḥ ǀ ví ǀ dhārayat ǀ devā́ḥ ǀ dákṣaiḥ ǀ bhṛ́gavaḥ ǀ sám ǀ cikitrire ǁ
Padapatha Transcription Nonaccented
te ǀ hi ǀ pra-jāyāḥ ǀ abharanta ǀ vi ǀ śravaḥ ǀ bṛhaspatiḥ ǀ vṛṣabhaḥ ǀ soma-jāmayaḥ ǀ
yajñaiḥ ǀ atharvā ǀ prathamaḥ ǀ vi ǀ dhārayat ǀ devāḥ ǀ dakṣaiḥ ǀ bhṛgavaḥ ǀ sam ǀ cikitrire ǁ
10.092.11 (Mandala. Sukta. Rik)
8.4.25.01 (Ashtaka. Adhyaya. Varga. Rik)
10.08.026 (Mandala. Anuvāka. Rik)
Samhita Devanagari Accented
ते हि द्यावा॑पृथि॒वी भूरि॑रेतसा॒ नरा॒शंस॒श्चतु॑रंगो य॒मोऽदि॑तिः ।
दे॒वस्त्वष्टा॑ द्रविणो॒दा ऋ॑भु॒क्षणः॒ प्र रो॑द॒सी म॒रुतो॒ विष्णु॑रर्हिरे ॥
Samhita Devanagari Nonaccented
ते हि द्यावापृथिवी भूरिरेतसा नराशंसश्चतुरंगो यमोऽदितिः ।
देवस्त्वष्टा द्रविणोदा ऋभुक्षणः प्र रोदसी मरुतो विष्णुरर्हिरे ॥
Samhita Transcription Accented
té hí dyā́vāpṛthivī́ bhū́riretasā nárāśáṃsaścáturaṅgo yamó’ditiḥ ǀ
devástváṣṭā draviṇodā́ ṛbhukṣáṇaḥ prá rodasī́ marúto víṣṇurarhire ǁ
Samhita Transcription Nonaccented
te hi dyāvāpṛthivī bhūriretasā narāśaṃsaścaturaṅgo yamo’ditiḥ ǀ
devastvaṣṭā draviṇodā ṛbhukṣaṇaḥ pra rodasī maruto viṣṇurarhire ǁ
Padapatha Devanagari Accented
ते । हि । द्यावा॑पृथि॒वी इति॑ । भूरि॑ऽरेतसा । नरा॒शंसः॑ । चतुः॑ऽअङ्गः । य॒मः । अदि॑तिः ।
दे॒वः । त्वष्टा॑ । द्र॒वि॒णः॒ऽदाः । ऋ॒भु॒क्षणः॑ । प्र । रो॒द॒सी इति॑ । म॒रुतः॑ । विष्णुः॑ । अ॒र्हि॒रे॒ ॥
Padapatha Devanagari Nonaccented
ते । हि । द्यावापृथिवी इति । भूरिऽरेतसा । नराशंसः । चतुःऽअङ्गः । यमः । अदितिः ।
देवः । त्वष्टा । द्रविणःऽदाः । ऋभुक्षणः । प्र । रोदसी इति । मरुतः । विष्णुः । अर्हिरे ॥
Padapatha Transcription Accented
té ǀ hí ǀ dyā́vāpṛthivī́ íti ǀ bhū́ri-retasā ǀ nárāśáṃsaḥ ǀ cátuḥ-aṅgaḥ ǀ yamáḥ ǀ áditiḥ ǀ
deváḥ ǀ tváṣṭā ǀ draviṇaḥ-dā́ḥ ǀ ṛbhukṣáṇaḥ ǀ prá ǀ rodasī́ íti ǀ marútaḥ ǀ víṣṇuḥ ǀ arhire ǁ
Padapatha Transcription Nonaccented
te ǀ hi ǀ dyāvāpṛthivī iti ǀ bhūri-retasā ǀ narāśaṃsaḥ ǀ catuḥ-aṅgaḥ ǀ yamaḥ ǀ aditiḥ ǀ
devaḥ ǀ tvaṣṭā ǀ draviṇaḥ-dāḥ ǀ ṛbhukṣaṇaḥ ǀ pra ǀ rodasī iti ǀ marutaḥ ǀ viṣṇuḥ ǀ arhire ǁ
10.092.12 (Mandala. Sukta. Rik)
8.4.25.02 (Ashtaka. Adhyaya. Varga. Rik)
10.08.027 (Mandala. Anuvāka. Rik)
Samhita Devanagari Accented
उ॒त स्य न॑ उ॒शिजा॑मुर्वि॒या क॒विरहिः॑ शृणोतु बु॒ध्न्यो॒३॒॑ हवी॑मनि ।
सूर्या॒मासा॑ वि॒चरं॑ता दिवि॒क्षिता॑ धि॒या श॑मीनहुषी अ॒स्य बो॑धतं ॥
Samhita Devanagari Nonaccented
उत स्य न उशिजामुर्विया कविरहिः शृणोतु बुध्न्यो हवीमनि ।
सूर्यामासा विचरंता दिविक्षिता धिया शमीनहुषी अस्य बोधतं ॥
Samhita Transcription Accented
utá syá na uśíjāmurviyā́ kavíráhiḥ śṛṇotu budhnyó hávīmani ǀ
sū́ryāmā́sā vicárantā divikṣítā dhiyā́ śamīnahuṣī asyá bodhatam ǁ
Samhita Transcription Nonaccented
uta sya na uśijāmurviyā kavirahiḥ śṛṇotu budhnyo havīmani ǀ
sūryāmāsā vicarantā divikṣitā dhiyā śamīnahuṣī asya bodhatam ǁ
Padapatha Devanagari Accented
उ॒त । स्यः । नः॒ । उ॒शिजा॑म् । उ॒र्वि॒या । क॒विः । अहिः॑ । शृ॒णो॒तु॒ । बु॒ध्न्यः॑ । हवी॑मनि ।
सूर्या॒मासा॑ । वि॒ऽचर॑न्ता । दि॒वि॒ऽक्षिता॑ । धि॒या । श॒मी॒न॒हु॒षी॒ इति॑ । अ॒स्य । बो॒ध॒त॒म् ॥
Padapatha Devanagari Nonaccented
उत । स्यः । नः । उशिजाम् । उर्विया । कविः । अहिः । शृणोतु । बुध्न्यः । हवीमनि ।
सूर्यामासा । विऽचरन्ता । दिविऽक्षिता । धिया । शमीनहुषी इति । अस्य । बोधतम् ॥
Padapatha Transcription Accented
utá ǀ syáḥ ǀ naḥ ǀ uśíjām ǀ urviyā́ ǀ kavíḥ ǀ áhiḥ ǀ śṛṇotu ǀ budhnyáḥ ǀ hávīmani ǀ
sū́ryāmā́sā ǀ vi-cárantā ǀ divi-kṣítā ǀ dhiyā́ ǀ śamīnahuṣī íti ǀ asyá ǀ bodhatam ǁ
Padapatha Transcription Nonaccented
uta ǀ syaḥ ǀ naḥ ǀ uśijām ǀ urviyā ǀ kaviḥ ǀ ahiḥ ǀ śṛṇotu ǀ budhnyaḥ ǀ havīmani ǀ
sūryāmāsā ǀ vi-carantā ǀ divi-kṣitā ǀ dhiyā ǀ śamīnahuṣī iti ǀ asya ǀ bodhatam ǁ
10.092.13 (Mandala. Sukta. Rik)
8.4.25.03 (Ashtaka. Adhyaya. Varga. Rik)
10.08.028 (Mandala. Anuvāka. Rik)
Samhita Devanagari Accented
प्र नः॑ पू॒षा च॒रथं॑ वि॒श्वदे॑व्यो॒ऽपां नपा॑दवतु वा॒युरि॒ष्टये॑ ।
आ॒त्मानं॒ वस्यो॑ अ॒भि वात॑मर्चत॒ तद॑श्विना सुहवा॒ याम॑नि श्रुतं ॥
Samhita Devanagari Nonaccented
प्र नः पूषा चरथं विश्वदेव्योऽपां नपादवतु वायुरिष्टये ।
आत्मानं वस्यो अभि वातमर्चत तदश्विना सुहवा यामनि श्रुतं ॥
Samhita Transcription Accented
prá naḥ pūṣā́ carátham viśvádevyo’pā́m nápādavatu vāyúriṣṭáye ǀ
ātmā́nam vásyo abhí vā́tamarcata tádaśvinā suhavā yā́mani śrutam ǁ
Samhita Transcription Nonaccented
pra naḥ pūṣā caratham viśvadevyo’pām napādavatu vāyuriṣṭaye ǀ
ātmānam vasyo abhi vātamarcata tadaśvinā suhavā yāmani śrutam ǁ
Padapatha Devanagari Accented
प्र । नः॒ । पू॒षा । च॒रथ॑म् । वि॒श्वऽदे॑व्यः । अ॒पाम् । नपा॑त् । अ॒व॒तु॒ । वा॒युः । इ॒ष्टये॑ ।
आ॒त्मान॑म् । वस्यः॑ । अ॒भि । वात॑म् । अ॒र्च॒त॒ । तत् । अ॒श्वि॒ना॒ । सु॒ऽह॒वा॒ । याम॑नि । श्रु॒त॒म् ॥
Padapatha Devanagari Nonaccented
प्र । नः । पूषा । चरथम् । विश्वऽदेव्यः । अपाम् । नपात् । अवतु । वायुः । इष्टये ।
आत्मानम् । वस्यः । अभि । वातम् । अर्चत । तत् । अश्विना । सुऽहवा । यामनि । श्रुतम् ॥
Padapatha Transcription Accented
prá ǀ naḥ ǀ pūṣā́ ǀ carátham ǀ viśvá-devyaḥ ǀ apā́m ǀ nápāt ǀ avatu ǀ vāyúḥ ǀ iṣṭáye ǀ
ātmā́nam ǀ vásyaḥ ǀ abhí ǀ vā́tam ǀ arcata ǀ tát ǀ aśvinā ǀ su-havā ǀ yā́mani ǀ śrutam ǁ
Padapatha Transcription Nonaccented
pra ǀ naḥ ǀ pūṣā ǀ caratham ǀ viśva-devyaḥ ǀ apām ǀ napāt ǀ avatu ǀ vāyuḥ ǀ iṣṭaye ǀ
ātmānam ǀ vasyaḥ ǀ abhi ǀ vātam ǀ arcata ǀ tat ǀ aśvinā ǀ su-havā ǀ yāmani ǀ śrutam ǁ
10.092.14 (Mandala. Sukta. Rik)
8.4.25.04 (Ashtaka. Adhyaya. Varga. Rik)
10.08.029 (Mandala. Anuvāka. Rik)
Samhita Devanagari Accented
वि॒शामा॒सामभ॑यानामधि॒क्षितं॑ गी॒र्भिरु॒ स्वय॑शसं गृणीमसि ।
ग्नाभि॒र्विश्वा॑भि॒रदि॑तिमन॒र्वण॑म॒क्तोर्युवा॑नं नृ॒मणा॒ अधा॒ पतिं॑ ॥
Samhita Devanagari Nonaccented
विशामासामभयानामधिक्षितं गीर्भिरु स्वयशसं गृणीमसि ।
ग्नाभिर्विश्वाभिरदितिमनर्वणमक्तोर्युवानं नृमणा अधा पतिं ॥
Samhita Transcription Accented
viśā́māsā́mábhayānāmadhikṣítam gīrbhíru sváyaśasam gṛṇīmasi ǀ
gnā́bhirvíśvābhiráditimanarváṇamaktóryúvānam nṛmáṇā ádhā pátim ǁ
Samhita Transcription Nonaccented
viśāmāsāmabhayānāmadhikṣitam gīrbhiru svayaśasam gṛṇīmasi ǀ
gnābhirviśvābhiraditimanarvaṇamaktoryuvānam nṛmaṇā adhā patim ǁ
Padapatha Devanagari Accented
वि॒शाम् । आ॒साम् । अभ॑यानाम् । अ॒धि॒ऽक्षित॑म् । गीः॒ऽभिः । ऊं॒ इति॑ । स्वऽय॑शसम् । गृ॒णी॒म॒सि॒ ।
ग्नाभिः॑ । विश्वा॑भिः । अदि॑तिम् । अ॒न॒र्वण॑म् । अ॒क्तोः । युवा॑नम् । नृ॒ऽमनाः॑ । अध॑ । पति॑म् ॥
Padapatha Devanagari Nonaccented
विशाम् । आसाम् । अभयानाम् । अधिऽक्षितम् । गीःऽभिः । ऊं इति । स्वऽयशसम् । गृणीमसि ।
ग्नाभिः । विश्वाभिः । अदितिम् । अनर्वणम् । अक्तोः । युवानम् । नृऽमनाः । अध । पतिम् ॥
Padapatha Transcription Accented
viśā́m ǀ āsā́m ǀ ábhayānām ǀ adhi-kṣítam ǀ gīḥ-bhíḥ ǀ ūṃ íti ǀ svá-yaśasam ǀ gṛṇīmasi ǀ
gnā́bhiḥ ǀ víśvābhiḥ ǀ áditim ǀ anarváṇam ǀ aktóḥ ǀ yúvānam ǀ nṛ-mánāḥ ǀ ádha ǀ pátim ǁ
Padapatha Transcription Nonaccented
viśām ǀ āsām ǀ abhayānām ǀ adhi-kṣitam ǀ gīḥ-bhiḥ ǀ ūṃ iti ǀ sva-yaśasam ǀ gṛṇīmasi ǀ
gnābhiḥ ǀ viśvābhiḥ ǀ aditim ǀ anarvaṇam ǀ aktoḥ ǀ yuvānam ǀ nṛ-manāḥ ǀ adha ǀ patim ǁ
10.092.15 (Mandala. Sukta. Rik)
8.4.25.05 (Ashtaka. Adhyaya. Varga. Rik)
10.08.030 (Mandala. Anuvāka. Rik)
Samhita Devanagari Accented
रेभ॒दत्र॑ ज॒नुषा॒ पूर्वो॒ अंगि॑रा॒ ग्रावा॑ण ऊ॒र्ध्वा अ॒भि च॑क्षुरध्व॒रं ।
येभि॒र्विहा॑या॒ अभ॑वद्विचक्ष॒णः पाथः॑ सु॒मेकं॒ स्वधि॑ति॒र्वन॑न्वति ॥
Samhita Devanagari Nonaccented
रेभदत्र जनुषा पूर्वो अंगिरा ग्रावाण ऊर्ध्वा अभि चक्षुरध्वरं ।
येभिर्विहाया अभवद्विचक्षणः पाथः सुमेकं स्वधितिर्वनन्वति ॥
Samhita Transcription Accented
rébhadátra janúṣā pū́rvo áṅgirā grā́vāṇa ūrdhvā́ abhí cakṣuradhvarám ǀ
yébhirvíhāyā ábhavadvicakṣaṇáḥ pā́thaḥ sumékam svádhitirvánanvati ǁ
Samhita Transcription Nonaccented
rebhadatra januṣā pūrvo aṅgirā grāvāṇa ūrdhvā abhi cakṣuradhvaram ǀ
yebhirvihāyā abhavadvicakṣaṇaḥ pāthaḥ sumekam svadhitirvananvati ǁ
Padapatha Devanagari Accented
रेभ॑त् । अत्र॑ । ज॒नुषा॑ । पूर्वः॑ । अङ्गि॑राः । ग्रावा॑णः । ऊ॒र्ध्वाः । अ॒भि । च॒क्षुः॒ । अ॒ध्व॒रम् ।
येभिः॑ । विऽहा॑याः । अभ॑वत् । वि॒ऽच॒क्ष॒णः । पाथः॑ । सु॒ऽमेक॑म् । स्वऽधि॑तिः । वन॑न्ऽवति ॥
Padapatha Devanagari Nonaccented
रेभत् । अत्र । जनुषा । पूर्वः । अङ्गिराः । ग्रावाणः । ऊर्ध्वाः । अभि । चक्षुः । अध्वरम् ।
येभिः । विऽहायाः । अभवत् । विऽचक्षणः । पाथः । सुऽमेकम् । स्वऽधितिः । वनन्ऽवति ॥
Padapatha Transcription Accented
rébhat ǀ átra ǀ janúṣā ǀ pū́rvaḥ ǀ áṅgirāḥ ǀ grā́vāṇaḥ ǀ ūrdhvā́ḥ ǀ abhí ǀ cakṣuḥ ǀ adhvarám ǀ
yébhiḥ ǀ ví-hāyāḥ ǀ ábhavat ǀ vi-cakṣaṇáḥ ǀ pā́thaḥ ǀ su-mékam ǀ svá-dhitiḥ ǀ vánan-vati ǁ
Padapatha Transcription Nonaccented
rebhat ǀ atra ǀ januṣā ǀ pūrvaḥ ǀ aṅgirāḥ ǀ grāvāṇaḥ ǀ ūrdhvāḥ ǀ abhi ǀ cakṣuḥ ǀ adhvaram ǀ
yebhiḥ ǀ vi-hāyāḥ ǀ abhavat ǀ vi-cakṣaṇaḥ ǀ pāthaḥ ǀ su-mekam ǀ sva-dhitiḥ ǀ vanan-vati ǁ