|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 93
|
1. Info |
| To: | viśvedevās | |
| From: | tānva pārtha | |
| Metres: | 1st set of styles: nicṛtpaṅkti (6, 7, 10, 14); bhurigārcyanuṣṭup (2, 13); virāḍpaṅkti (1); pādanicṛdanuṣṭup (3); pādanicṛtpaṅkti (4); bhurigārcīpaṅkti (5); āstārapaṅkti (8); akṣarapaṅkti (9); nyaṅkusāriṇībṛhatī (11); ārcīpaṅkti (12); pādnicṛdbṛhatī (15) 2nd set of styles: prastārapaṅkti (1, 4-8, 10, 12, 14); anuṣṭubh (2, 3, 13); paṅkti according to syllable count (9); nyaṅkusāriṇī (11); purastādbṛhatī (15) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.093.01 (Mandala. Sukta. Rik)
8.4.26.01 (Ashtaka. Adhyaya. Varga. Rik)
10.08.031 (Mandala. Anuvāka. Rik)
Samhita Devanagari Accented
महि॑ द्यावापृथिवी भूतमु॒र्वी नारी॑ य॒ह्वी न रोद॑सी॒ सदं॑ नः ।
तेभि॑र्नः पातं॒ सह्य॑स ए॒भिर्नः॑ पातं शू॒षणि॑ ॥
Samhita Devanagari Nonaccented
महि द्यावापृथिवी भूतमुर्वी नारी यह्वी न रोदसी सदं नः ।
तेभिर्नः पातं सह्यस एभिर्नः पातं शूषणि ॥
Samhita Transcription Accented
máhi dyāvāpṛthivī bhūtamurvī́ nā́rī yahvī́ ná ródasī sádam naḥ ǀ
tébhirnaḥ pātam sáhyasa ebhírnaḥ pātam śūṣáṇi ǁ
Samhita Transcription Nonaccented
mahi dyāvāpṛthivī bhūtamurvī nārī yahvī na rodasī sadam naḥ ǀ
tebhirnaḥ pātam sahyasa ebhirnaḥ pātam śūṣaṇi ǁ
Padapatha Devanagari Accented
महि॑ । द्या॒वा॒पृ॒थि॒वी॒ इति॑ । भू॒त॒म् । उ॒र्वी इति॑ । नारी॒ इति॑ । य॒ह्वी इति॑ । न । रोद॑सी॒ इति॑ । सद॑म् । नः॒ ।
तेभिः॑ । नः॒ । पा॒त॒म् । सह्य॑सः । ए॒भिः । नः॒ । पा॒त॒म् । शू॒षणि॑ ॥
Padapatha Devanagari Nonaccented
महि । द्यावापृथिवी इति । भूतम् । उर्वी इति । नारी इति । यह्वी इति । न । रोदसी इति । सदम् । नः ।
तेभिः । नः । पातम् । सह्यसः । एभिः । नः । पातम् । शूषणि ॥
Padapatha Transcription Accented
máhi ǀ dyāvāpṛthivī íti ǀ bhūtam ǀ urvī́ íti ǀ nā́rī íti ǀ yahvī́ íti ǀ ná ǀ ródasī íti ǀ sádam ǀ naḥ ǀ
tébhiḥ ǀ naḥ ǀ pātam ǀ sáhyasaḥ ǀ ebhíḥ ǀ naḥ ǀ pātam ǀ śūṣáṇi ǁ
Padapatha Transcription Nonaccented
mahi ǀ dyāvāpṛthivī iti ǀ bhūtam ǀ urvī iti ǀ nārī iti ǀ yahvī iti ǀ na ǀ rodasī iti ǀ sadam ǀ naḥ ǀ
tebhiḥ ǀ naḥ ǀ pātam ǀ sahyasaḥ ǀ ebhiḥ ǀ naḥ ǀ pātam ǀ śūṣaṇi ǁ
10.093.02 (Mandala. Sukta. Rik)
8.4.26.02 (Ashtaka. Adhyaya. Varga. Rik)
10.08.032 (Mandala. Anuvāka. Rik)
Samhita Devanagari Accented
य॒ज्ञेय॑ज्ञे॒ स मर्त्यो॑ दे॒वान्त्स॑पर्यति ।
यः सु॒म्नैर्दी॑र्घ॒श्रुत्त॑म आ॒विवा॑सत्येनान् ॥
Samhita Devanagari Nonaccented
यज्ञेयज्ञे स मर्त्यो देवान्त्सपर्यति ।
यः सुम्नैर्दीर्घश्रुत्तम आविवासत्येनान् ॥
Samhita Transcription Accented
yajñéyajñe sá mártyo devā́ntsaparyati ǀ
yáḥ sumnáirdīrghaśrúttama āvívāsatyenān ǁ
Samhita Transcription Nonaccented
yajñeyajñe sa martyo devāntsaparyati ǀ
yaḥ sumnairdīrghaśruttama āvivāsatyenān ǁ
Padapatha Devanagari Accented
य॒ज्ञेऽय॑ज्ञे । सः । मर्त्यः॑ । दे॒वान् । स॒प॒र्य॒ति॒ ।
यः । सु॒म्नैः । दी॒र्घ॒श्रुत्ऽत॑मः । आ॒ऽविवा॑साति । ए॒ना॒न् ॥
Padapatha Devanagari Nonaccented
यज्ञेऽयज्ञे । सः । मर्त्यः । देवान् । सपर्यति ।
यः । सुम्नैः । दीर्घश्रुत्ऽतमः । आऽविवासाति । एनान् ॥
Padapatha Transcription Accented
yajñé-yajñe ǀ sáḥ ǀ mártyaḥ ǀ devā́n ǀ saparyati ǀ
yáḥ ǀ sumnáiḥ ǀ dīrghaśrút-tamaḥ ǀ ā-vívāsāti ǀ enān ǁ
Padapatha Transcription Nonaccented
yajñe-yajñe ǀ saḥ ǀ martyaḥ ǀ devān ǀ saparyati ǀ
yaḥ ǀ sumnaiḥ ǀ dīrghaśrut-tamaḥ ǀ ā-vivāsāti ǀ enān ǁ
10.093.03 (Mandala. Sukta. Rik)
8.4.26.03 (Ashtaka. Adhyaya. Varga. Rik)
10.08.033 (Mandala. Anuvāka. Rik)
Samhita Devanagari Accented
विश्वे॑षामिरज्यवो दे॒वानां॒ वार्म॒हः ।
विश्वे॒ हि वि॒श्वम॑हसो॒ विश्वे॑ य॒ज्ञेषु॑ य॒ज्ञियाः॑ ॥
Samhita Devanagari Nonaccented
विश्वेषामिरज्यवो देवानां वार्महः ।
विश्वे हि विश्वमहसो विश्वे यज्ञेषु यज्ञियाः ॥
Samhita Transcription Accented
víśveṣāmirajyavo devā́nām vā́rmaháḥ ǀ
víśve hí viśvámahaso víśve yajñéṣu yajñíyāḥ ǁ
Samhita Transcription Nonaccented
viśveṣāmirajyavo devānām vārmahaḥ ǀ
viśve hi viśvamahaso viśve yajñeṣu yajñiyāḥ ǁ
Padapatha Devanagari Accented
विश्वे॑षाम् । इ॒र॒ज्य॒वः॒ । दे॒वाना॑म् । वाः । म॒हः ।
विश्वे॑ । हि । वि॒श्वऽम॑हसः । विश्वे॑ । य॒ज्ञेषु॑ । य॒ज्ञियाः॑ ॥
Padapatha Devanagari Nonaccented
विश्वेषाम् । इरज्यवः । देवानाम् । वाः । महः ।
विश्वे । हि । विश्वऽमहसः । विश्वे । यज्ञेषु । यज्ञियाः ॥
Padapatha Transcription Accented
víśveṣām ǀ irajyavaḥ ǀ devā́nām ǀ vā́ḥ ǀ maháḥ ǀ
víśve ǀ hí ǀ viśvá-mahasaḥ ǀ víśve ǀ yajñéṣu ǀ yajñíyāḥ ǁ
Padapatha Transcription Nonaccented
viśveṣām ǀ irajyavaḥ ǀ devānām ǀ vāḥ ǀ mahaḥ ǀ
viśve ǀ hi ǀ viśva-mahasaḥ ǀ viśve ǀ yajñeṣu ǀ yajñiyāḥ ǁ
10.093.04 (Mandala. Sukta. Rik)
8.4.26.04 (Ashtaka. Adhyaya. Varga. Rik)
10.08.034 (Mandala. Anuvāka. Rik)
Samhita Devanagari Accented
ते घा॒ राजा॑नो अ॒मृत॑स्य मं॒द्रा अ॑र्य॒मा मि॒त्रो वरु॑णः॒ परि॑ज्मा ।
कद्रु॒द्रो नृ॒णां स्तु॒तो म॒रुतः॑ पू॒षणो॒ भगः॑ ॥
Samhita Devanagari Nonaccented
ते घा राजानो अमृतस्य मंद्रा अर्यमा मित्रो वरुणः परिज्मा ।
कद्रुद्रो नृणां स्तुतो मरुतः पूषणो भगः ॥
Samhita Transcription Accented
té ghā rā́jāno amṛ́tasya mandrā́ aryamā́ mitró váruṇaḥ párijmā ǀ
kádrudró nṛṇā́m stutó marútaḥ pūṣáṇo bhágaḥ ǁ
Samhita Transcription Nonaccented
te ghā rājāno amṛtasya mandrā aryamā mitro varuṇaḥ parijmā ǀ
kadrudro nṛṇām stuto marutaḥ pūṣaṇo bhagaḥ ǁ
Padapatha Devanagari Accented
ते । घ॒ । राजा॑नः । अ॒मृत॑स्य । म॒न्द्राः । अ॒र्य॒मा । मि॒त्रः । वरु॑णः । परि॑ऽज्मा ।
कत् । रु॒द्रः । नृ॒णाम् । स्तु॒तः । म॒रुतः॑ । पू॒षणः॑ । भगः॑ ॥
Padapatha Devanagari Nonaccented
ते । घ । राजानः । अमृतस्य । मन्द्राः । अर्यमा । मित्रः । वरुणः । परिऽज्मा ।
कत् । रुद्रः । नृणाम् । स्तुतः । मरुतः । पूषणः । भगः ॥
Padapatha Transcription Accented
té ǀ gha ǀ rā́jānaḥ ǀ amṛ́tasya ǀ mandrā́ḥ ǀ aryamā́ ǀ mitráḥ ǀ váruṇaḥ ǀ pári-jmā ǀ
kát ǀ rudráḥ ǀ nṛṇā́m ǀ stutáḥ ǀ marútaḥ ǀ pūṣáṇaḥ ǀ bhágaḥ ǁ
Padapatha Transcription Nonaccented
te ǀ gha ǀ rājānaḥ ǀ amṛtasya ǀ mandrāḥ ǀ aryamā ǀ mitraḥ ǀ varuṇaḥ ǀ pari-jmā ǀ
kat ǀ rudraḥ ǀ nṛṇām ǀ stutaḥ ǀ marutaḥ ǀ pūṣaṇaḥ ǀ bhagaḥ ǁ
10.093.05 (Mandala. Sukta. Rik)
8.4.26.05 (Ashtaka. Adhyaya. Varga. Rik)
10.08.035 (Mandala. Anuvāka. Rik)
Samhita Devanagari Accented
उ॒त नो॒ नक्त॑म॒पां वृ॑षण्वसू॒ सूर्या॒मासा॒ सद॑नाय सध॒न्या॑ ।
सचा॒ यत्साद्ये॑षा॒महि॑र्बु॒ध्नेषु॑ बु॒ध्न्यः॑ ॥
Samhita Devanagari Nonaccented
उत नो नक्तमपां वृषण्वसू सूर्यामासा सदनाय सधन्या ।
सचा यत्साद्येषामहिर्बुध्नेषु बुध्न्यः ॥
Samhita Transcription Accented
utá no náktamapā́m vṛṣaṇvasū sū́ryāmā́sā sádanāya sadhanyā́ ǀ
sácā yátsā́dyeṣāmáhirbudhnéṣu budhnyaḥ ǁ
Samhita Transcription Nonaccented
uta no naktamapām vṛṣaṇvasū sūryāmāsā sadanāya sadhanyā ǀ
sacā yatsādyeṣāmahirbudhneṣu budhnyaḥ ǁ
Padapatha Devanagari Accented
उ॒त । नः॒ । नक्त॑म् । अ॒पाम् । वृ॒ष॒ण्व॒सू॒ इति॑ वृषण्ऽवसू । सूर्या॒मासा॑ । सद॑नाय । स॒ऽध॒न्या॑ ।
सचा॑ । यत् । सादि॑ । ए॒षा॒म् । अहिः॑ । बु॒ध्नेषु॑ । बु॒ध्न्यः॑ ॥
Padapatha Devanagari Nonaccented
उत । नः । नक्तम् । अपाम् । वृषण्वसू इति वृषण्ऽवसू । सूर्यामासा । सदनाय । सऽधन्या ।
सचा । यत् । सादि । एषाम् । अहिः । बुध्नेषु । बुध्न्यः ॥
Padapatha Transcription Accented
utá ǀ naḥ ǀ náktam ǀ apā́m ǀ vṛṣaṇvasū íti vṛṣaṇ-vasū ǀ sū́ryāmā́sā ǀ sádanāya ǀ sa-dhanyā́ ǀ
sácā ǀ yát ǀ sā́di ǀ eṣām ǀ áhiḥ ǀ budhnéṣu ǀ budhnyáḥ ǁ
Padapatha Transcription Nonaccented
uta ǀ naḥ ǀ naktam ǀ apām ǀ vṛṣaṇvasū iti vṛṣaṇ-vasū ǀ sūryāmāsā ǀ sadanāya ǀ sa-dhanyā ǀ
sacā ǀ yat ǀ sādi ǀ eṣām ǀ ahiḥ ǀ budhneṣu ǀ budhnyaḥ ǁ
10.093.06 (Mandala. Sukta. Rik)
8.4.27.01 (Ashtaka. Adhyaya. Varga. Rik)
10.08.036 (Mandala. Anuvāka. Rik)
Samhita Devanagari Accented
उ॒त नो॑ दे॒वाव॒श्विना॑ शु॒भस्पती॒ धाम॑भिर्मि॒त्रावरु॑णा उरुष्यतां ।
म॒हः स रा॒य एष॒तेऽति॒ धन्वे॑व दुरि॒ता ॥
Samhita Devanagari Nonaccented
उत नो देवावश्विना शुभस्पती धामभिर्मित्रावरुणा उरुष्यतां ।
महः स राय एषतेऽति धन्वेव दुरिता ॥
Samhita Transcription Accented
utá no devā́vaśvínā śubháspátī dhā́mabhirmitrā́váruṇā uruṣyatām ǀ
maháḥ sá rāyá éṣaté’ti dhánveva duritā́ ǁ
Samhita Transcription Nonaccented
uta no devāvaśvinā śubhaspatī dhāmabhirmitrāvaruṇā uruṣyatām ǀ
mahaḥ sa rāya eṣate’ti dhanveva duritā ǁ
Padapatha Devanagari Accented
उ॒त । नः॒ । दे॒वौ । अ॒श्विना॑ । शु॒भः । पती॒ इति॑ । धाम॑ऽभिः । मि॒त्रावरु॑णौ । उ॒रु॒ष्य॒ता॒म् ।
म॒हः । सः । रा॒यः । आ । ई॒ष॒ते॒ । अति॑ । धन्व॑ऽइव । दुः॒ऽइ॒ता ॥
Padapatha Devanagari Nonaccented
उत । नः । देवौ । अश्विना । शुभः । पती इति । धामऽभिः । मित्रावरुणौ । उरुष्यताम् ।
महः । सः । रायः । आ । ईषते । अति । धन्वऽइव । दुःऽइता ॥
Padapatha Transcription Accented
utá ǀ naḥ ǀ deváu ǀ aśvínā ǀ śubháḥ ǀ pátī íti ǀ dhā́ma-bhiḥ ǀ mitrā́váruṇau ǀ uruṣyatām ǀ
maháḥ ǀ sáḥ ǀ rāyáḥ ǀ ā́ ǀ īṣate ǀ áti ǀ dhánva-iva ǀ duḥ-itā́ ǁ
Padapatha Transcription Nonaccented
uta ǀ naḥ ǀ devau ǀ aśvinā ǀ śubhaḥ ǀ patī iti ǀ dhāma-bhiḥ ǀ mitrāvaruṇau ǀ uruṣyatām ǀ
mahaḥ ǀ saḥ ǀ rāyaḥ ǀ ā ǀ īṣate ǀ ati ǀ dhanva-iva ǀ duḥ-itā ǁ
10.093.07 (Mandala. Sukta. Rik)
8.4.27.02 (Ashtaka. Adhyaya. Varga. Rik)
10.08.037 (Mandala. Anuvāka. Rik)
Samhita Devanagari Accented
उ॒त नो॑ रु॒द्रा चि॑न्मृळताम॒श्विना॒ विश्वे॑ दे॒वासो॒ रथ॒स्पति॒र्भगः॑ ।
ऋ॒भुर्वाज॑ ऋभुक्षणः॒ परि॑ज्मा विश्ववेदसः ॥
Samhita Devanagari Nonaccented
उत नो रुद्रा चिन्मृळतामश्विना विश्वे देवासो रथस्पतिर्भगः ।
ऋभुर्वाज ऋभुक्षणः परिज्मा विश्ववेदसः ॥
Samhita Transcription Accented
utá no rudrā́ cinmṛḷatāmaśvínā víśve devā́so ráthaspátirbhágaḥ ǀ
ṛbhúrvā́ja ṛbhukṣaṇaḥ párijmā viśvavedasaḥ ǁ
Samhita Transcription Nonaccented
uta no rudrā cinmṛḷatāmaśvinā viśve devāso rathaspatirbhagaḥ ǀ
ṛbhurvāja ṛbhukṣaṇaḥ parijmā viśvavedasaḥ ǁ
Padapatha Devanagari Accented
उ॒त । नः॒ । रु॒द्रा । चि॒त् । मृ॒ळ॒ता॒म् । अ॒श्विना॑ । विश्वे॑ । दे॒वासः॑ । रथः॒पतिः॑ । भगः॑ ।
ऋ॒भुः । वाजः॑ । ऋ॒भु॒क्ष॒णः॒ । परि॑ऽज्मा । वि॒श्व॒ऽवे॒द॒सः॒ ॥
Padapatha Devanagari Nonaccented
उत । नः । रुद्रा । चित् । मृळताम् । अश्विना । विश्वे । देवासः । रथःपतिः । भगः ।
ऋभुः । वाजः । ऋभुक्षणः । परिऽज्मा । विश्वऽवेदसः ॥
Padapatha Transcription Accented
utá ǀ naḥ ǀ rudrā́ ǀ cit ǀ mṛḷatām ǀ aśvínā ǀ víśve ǀ devā́saḥ ǀ ráthaḥpátiḥ ǀ bhágaḥ ǀ
ṛbhúḥ ǀ vā́jaḥ ǀ ṛbhukṣaṇaḥ ǀ pári-jmā ǀ viśva-vedasaḥ ǁ
Padapatha Transcription Nonaccented
uta ǀ naḥ ǀ rudrā ǀ cit ǀ mṛḷatām ǀ aśvinā ǀ viśve ǀ devāsaḥ ǀ rathaḥpatiḥ ǀ bhagaḥ ǀ
ṛbhuḥ ǀ vājaḥ ǀ ṛbhukṣaṇaḥ ǀ pari-jmā ǀ viśva-vedasaḥ ǁ
10.093.08 (Mandala. Sukta. Rik)
8.4.27.03 (Ashtaka. Adhyaya. Varga. Rik)
10.08.038 (Mandala. Anuvāka. Rik)
Samhita Devanagari Accented
ऋ॒भुर्ऋ॑भु॒क्षा ऋ॒भुर्वि॑ध॒तो मद॒ आ ते॒ हरी॑ जूजुवा॒नस्य॑ वा॒जिना॑ ।
दु॒ष्टरं॒ यस्य॒ साम॑ चि॒दृध॑ग्य॒ज्ञो न मानु॑षः ॥
Samhita Devanagari Nonaccented
ऋभुर्ऋभुक्षा ऋभुर्विधतो मद आ ते हरी जूजुवानस्य वाजिना ।
दुष्टरं यस्य साम चिदृधग्यज्ञो न मानुषः ॥
Samhita Transcription Accented
ṛbhúrṛbhukṣā́ ṛbhúrvidható máda ā́ te hárī jūjuvānásya vājínā ǀ
duṣṭáram yásya sā́ma cidṛ́dhagyajñó ná mā́nuṣaḥ ǁ
Samhita Transcription Nonaccented
ṛbhurṛbhukṣā ṛbhurvidhato mada ā te harī jūjuvānasya vājinā ǀ
duṣṭaram yasya sāma cidṛdhagyajño na mānuṣaḥ ǁ
Padapatha Devanagari Accented
ऋ॒भुः । ऋ॒भु॒क्षाः । ऋ॒भुः । वि॒ध॒तः । मदः॑ । आ । ते॒ । हरी॒ इति॑ । जू॒जु॒वा॒नस्य॑ । वा॒जिना॑ ।
दु॒स्तर॑म् । यस्य॑ । साम॑ । चि॒त् । ऋध॑क् । य॒ज्ञः । न । मानु॑षः ॥
Padapatha Devanagari Nonaccented
ऋभुः । ऋभुक्षाः । ऋभुः । विधतः । मदः । आ । ते । हरी इति । जूजुवानस्य । वाजिना ।
दुस्तरम् । यस्य । साम । चित् । ऋधक् । यज्ञः । न । मानुषः ॥
Padapatha Transcription Accented
ṛbhúḥ ǀ ṛbhukṣā́ḥ ǀ ṛbhúḥ ǀ vidhatáḥ ǀ mádaḥ ǀ ā́ ǀ te ǀ hárī íti ǀ jūjuvānásya ǀ vājínā ǀ
dustáram ǀ yásya ǀ sā́ma ǀ cit ǀ ṛ́dhak ǀ yajñáḥ ǀ ná ǀ mā́nuṣaḥ ǁ
Padapatha Transcription Nonaccented
ṛbhuḥ ǀ ṛbhukṣāḥ ǀ ṛbhuḥ ǀ vidhataḥ ǀ madaḥ ǀ ā ǀ te ǀ harī iti ǀ jūjuvānasya ǀ vājinā ǀ
dustaram ǀ yasya ǀ sāma ǀ cit ǀ ṛdhak ǀ yajñaḥ ǀ na ǀ mānuṣaḥ ǁ
10.093.09 (Mandala. Sukta. Rik)
8.4.27.04 (Ashtaka. Adhyaya. Varga. Rik)
10.08.039 (Mandala. Anuvāka. Rik)
Samhita Devanagari Accented
कृ॒धी नो॒ अह्र॑यो देव सवितः॒ स च॑ स्तुषे म॒घोनां॑ ।
स॒हो न॒ इंद्रो॒ वह्नि॑भि॒र्न्ये॑षां चर्षणी॒नां च॒क्रं र॒श्मिं न यो॑युवे ॥
Samhita Devanagari Nonaccented
कृधी नो अह्रयो देव सवितः स च स्तुषे मघोनां ।
सहो न इंद्रो वह्निभिर्न्येषां चर्षणीनां चक्रं रश्मिं न योयुवे ॥
Samhita Transcription Accented
kṛdhī́ no áhrayo deva savitaḥ sá ca stuṣe maghónām ǀ
sahó na índro váhnibhirnyéṣām carṣaṇīnā́m cakrám raśmím ná yoyuve ǁ
Samhita Transcription Nonaccented
kṛdhī no ahrayo deva savitaḥ sa ca stuṣe maghonām ǀ
saho na indro vahnibhirnyeṣām carṣaṇīnām cakram raśmim na yoyuve ǁ
Padapatha Devanagari Accented
कृ॒धि । नः॒ । अह्र॑यः । दे॒व॒ । स॒वि॒त॒रिति॑ । सः । च॒ । स्तु॒षे॒ । म॒घोना॑म् ।
स॒हो इति॑ । नः॒ । इन्द्रः॑ । वह्नि॑ऽभिः । नि । ए॒षा॒म् । च॒र्ष॒णी॒नाम् । च॒क्रम् । र॒श्मिम् । न । यो॒यु॒वे॒ ॥
Padapatha Devanagari Nonaccented
कृधि । नः । अह्रयः । देव । सवितरिति । सः । च । स्तुषे । मघोनाम् ।
सहो इति । नः । इन्द्रः । वह्निऽभिः । नि । एषाम् । चर्षणीनाम् । चक्रम् । रश्मिम् । न । योयुवे ॥
Padapatha Transcription Accented
kṛdhí ǀ naḥ ǀ áhrayaḥ ǀ deva ǀ savitaríti ǀ sáḥ ǀ ca ǀ stuṣe ǀ maghónām ǀ
sahó íti ǀ naḥ ǀ índraḥ ǀ váhni-bhiḥ ǀ ní ǀ eṣām ǀ carṣaṇīnā́m ǀ cakrám ǀ raśmím ǀ ná ǀ yoyuve ǁ
Padapatha Transcription Nonaccented
kṛdhi ǀ naḥ ǀ ahrayaḥ ǀ deva ǀ savitariti ǀ saḥ ǀ ca ǀ stuṣe ǀ maghonām ǀ
saho iti ǀ naḥ ǀ indraḥ ǀ vahni-bhiḥ ǀ ni ǀ eṣām ǀ carṣaṇīnām ǀ cakram ǀ raśmim ǀ na ǀ yoyuve ǁ
10.093.10 (Mandala. Sukta. Rik)
8.4.27.05 (Ashtaka. Adhyaya. Varga. Rik)
10.08.040 (Mandala. Anuvāka. Rik)
Samhita Devanagari Accented
ऐषु॑ द्यावापृथिवी धातं म॒हद॒स्मे वी॒रेषु॑ वि॒श्वच॑र्षणि॒ श्रवः॑ ।
पृ॒क्षं वाज॑स्य सा॒तये॑ पृ॒क्षं रा॒योत तु॒र्वणे॑ ॥
Samhita Devanagari Nonaccented
ऐषु द्यावापृथिवी धातं महदस्मे वीरेषु विश्वचर्षणि श्रवः ।
पृक्षं वाजस्य सातये पृक्षं रायोत तुर्वणे ॥
Samhita Transcription Accented
áiṣu dyāvāpṛthivī dhātam mahádasmé vīréṣu viśvácarṣaṇi śrávaḥ ǀ
pṛkṣám vā́jasya sātáye pṛkṣám rāyótá turváṇe ǁ
Samhita Transcription Nonaccented
aiṣu dyāvāpṛthivī dhātam mahadasme vīreṣu viśvacarṣaṇi śravaḥ ǀ
pṛkṣam vājasya sātaye pṛkṣam rāyota turvaṇe ǁ
Padapatha Devanagari Accented
आ । ए॒षु॒ । द्या॒वा॒पृ॒थि॒वी॒ इति॑ । धा॒त॒म् । म॒हत् । अ॒स्मे इति॑ । वी॒रेषु॑ । वि॒श्वऽच॑र्षणि । श्रवः॑ ।
पृ॒क्षम् । वाज॑स्य । सा॒तये॑ । पृ॒क्षम् । रा॒या । उ॒त । तु॒र्वणे॑ ॥
Padapatha Devanagari Nonaccented
आ । एषु । द्यावापृथिवी इति । धातम् । महत् । अस्मे इति । वीरेषु । विश्वऽचर्षणि । श्रवः ।
पृक्षम् । वाजस्य । सातये । पृक्षम् । राया । उत । तुर्वणे ॥
Padapatha Transcription Accented
ā́ ǀ eṣu ǀ dyāvāpṛthivī íti ǀ dhātam ǀ mahát ǀ asmé íti ǀ vīréṣu ǀ viśvá-carṣaṇi ǀ śrávaḥ ǀ
pṛkṣám ǀ vā́jasya ǀ sātáye ǀ pṛkṣám ǀ rāyā́ ǀ utá ǀ turváṇe ǁ
Padapatha Transcription Nonaccented
ā ǀ eṣu ǀ dyāvāpṛthivī iti ǀ dhātam ǀ mahat ǀ asme iti ǀ vīreṣu ǀ viśva-carṣaṇi ǀ śravaḥ ǀ
pṛkṣam ǀ vājasya ǀ sātaye ǀ pṛkṣam ǀ rāyā ǀ uta ǀ turvaṇe ǁ
10.093.11 (Mandala. Sukta. Rik)
8.4.28.01 (Ashtaka. Adhyaya. Varga. Rik)
10.08.041 (Mandala. Anuvāka. Rik)
Samhita Devanagari Accented
ए॒तं शंस॑मिंद्रास्म॒युष्ट्वं कूचि॒त्संतं॑ सहसावन्न॒भिष्ट॑ये ।
सदा॑ पाह्य॒भिष्ट॑ये मे॒दतां॑ वे॒दता॑ वसो ॥
Samhita Devanagari Nonaccented
एतं शंसमिंद्रास्मयुष्ट्वं कूचित्संतं सहसावन्नभिष्टये ।
सदा पाह्यभिष्टये मेदतां वेदता वसो ॥
Samhita Transcription Accented
etám śáṃsamindrāsmayúṣṭvám kū́citsántam sahasāvannabhíṣṭaye ǀ
sádā pāhyabhíṣṭaye medátām vedátā vaso ǁ
Samhita Transcription Nonaccented
etam śaṃsamindrāsmayuṣṭvam kūcitsantam sahasāvannabhiṣṭaye ǀ
sadā pāhyabhiṣṭaye medatām vedatā vaso ǁ
Padapatha Devanagari Accented
ए॒तम् । शंस॑म् । इ॒न्द्र॒ । अ॒स्म॒ऽयुः । त्वम् । कूऽचि॑त् । सन्त॑म् । स॒ह॒सा॒ऽव॒न् । अ॒भिष्ट॑ये । सदा॑ । पा॒हि॒ । अ॒भिष्ट॑ये ।
मे॒दता॑म् । वे॒दता॑ । व॒सो॒ इति॑ ॥
Padapatha Devanagari Nonaccented
एतम् । शंसम् । इन्द्र । अस्मऽयुः । त्वम् । कूऽचित् । सन्तम् । सहसाऽवन् । अभिष्टये । सदा । पाहि । अभिष्टये ।
मेदताम् । वेदता । वसो इति ॥
Padapatha Transcription Accented
etám ǀ śáṃsam ǀ indra ǀ asma-yúḥ ǀ tvám ǀ kū́-cit ǀ sántam ǀ sahasā-van ǀ abhíṣṭaye ǀ sádā ǀ pāhi ǀ abhíṣṭaye ǀ
medátām ǀ vedátā ǀ vaso íti ǁ
Padapatha Transcription Nonaccented
etam ǀ śaṃsam ǀ indra ǀ asma-yuḥ ǀ tvam ǀ kū-cit ǀ santam ǀ sahasā-van ǀ abhiṣṭaye ǀ sadā ǀ pāhi ǀ abhiṣṭaye ǀ
medatām ǀ vedatā ǀ vaso iti ǁ
10.093.12 (Mandala. Sukta. Rik)
8.4.28.02 (Ashtaka. Adhyaya. Varga. Rik)
10.08.042 (Mandala. Anuvāka. Rik)
Samhita Devanagari Accented
ए॒तं मे॒ स्तोमं॑ त॒ना न सूर्ये॑ द्यु॒तद्या॑मानं वावृधंत नृ॒णां ।
सं॒वन॑नं॒ नाश्व्यं॒ तष्टे॒वान॑पच्युतं ॥
Samhita Devanagari Nonaccented
एतं मे स्तोमं तना न सूर्ये द्युतद्यामानं वावृधंत नृणां ।
संवननं नाश्व्यं तष्टेवानपच्युतं ॥
Samhita Transcription Accented
etám me stómam tanā́ ná sū́rye dyutádyāmānam vāvṛdhanta nṛṇā́m ǀ
saṃvánanam nā́śvyam táṣṭevā́napacyutam ǁ
Samhita Transcription Nonaccented
etam me stomam tanā na sūrye dyutadyāmānam vāvṛdhanta nṛṇām ǀ
saṃvananam nāśvyam taṣṭevānapacyutam ǁ
Padapatha Devanagari Accented
ए॒तम् । मे॒ । स्तोम॑म् । त॒ना । न । सूर्ये॑ । द्यु॒तत्ऽया॑मानम् । व॒वृ॒ध॒न्त॒ । नृ॒णाम् ।
स॒म्ऽवन॑नम् । न । अश्व्य॑म् । तष्टा॑ऽइव । अन॑पऽच्युतम् ॥
Padapatha Devanagari Nonaccented
एतम् । मे । स्तोमम् । तना । न । सूर्ये । द्युतत्ऽयामानम् । ववृधन्त । नृणाम् ।
सम्ऽवननम् । न । अश्व्यम् । तष्टाऽइव । अनपऽच्युतम् ॥
Padapatha Transcription Accented
etám ǀ me ǀ stómam ǀ tanā́ ǀ ná ǀ sū́rye ǀ dyutát-yāmānam ǀ vavṛdhanta ǀ nṛṇā́m ǀ
sam-vánanam ǀ ná ǀ áśvyam ǀ táṣṭā-iva ǀ ánapa-cyutam ǁ
Padapatha Transcription Nonaccented
etam ǀ me ǀ stomam ǀ tanā ǀ na ǀ sūrye ǀ dyutat-yāmānam ǀ vavṛdhanta ǀ nṛṇām ǀ
sam-vananam ǀ na ǀ aśvyam ǀ taṣṭā-iva ǀ anapa-cyutam ǁ
10.093.13 (Mandala. Sukta. Rik)
8.4.28.03 (Ashtaka. Adhyaya. Varga. Rik)
10.08.043 (Mandala. Anuvāka. Rik)
Samhita Devanagari Accented
वा॒वर्त॒ येषां॑ रा॒या यु॒क्तैषां॑ हिर॒ण्ययी॑ ।
ने॒मधि॑ता॒ न पौंस्या॒ वृथे॑व वि॒ष्टांता॑ ॥
Samhita Devanagari Nonaccented
वावर्त येषां राया युक्तैषां हिरण्ययी ।
नेमधिता न पौंस्या वृथेव विष्टांता ॥
Samhita Transcription Accented
vāvárta yéṣām rāyā́ yuktáiṣām hiraṇyáyī ǀ
nemádhitā ná páuṃsyā vṛ́theva viṣṭā́ntā ǁ
Samhita Transcription Nonaccented
vāvarta yeṣām rāyā yuktaiṣām hiraṇyayī ǀ
nemadhitā na pauṃsyā vṛtheva viṣṭāntā ǁ
Padapatha Devanagari Accented
व॒वर्त॑ । येषा॑म् । रा॒या । यु॒क्ता । ए॒षा॒म् । हि॒र॒ण्ययी॑ ।
ने॒मऽधि॑ता । न । पौंस्या॑ । वृथा॑ऽइव । वि॒ष्टऽअ॑न्ता ॥
Padapatha Devanagari Nonaccented
ववर्त । येषाम् । राया । युक्ता । एषाम् । हिरण्ययी ।
नेमऽधिता । न । पौंस्या । वृथाऽइव । विष्टऽअन्ता ॥
Padapatha Transcription Accented
vavárta ǀ yéṣām ǀ rāyā́ ǀ yuktā́ ǀ eṣām ǀ hiraṇyáyī ǀ
nemá-dhitā ǀ ná ǀ páuṃsyā ǀ vṛ́thā-iva ǀ viṣṭá-antā ǁ
Padapatha Transcription Nonaccented
vavarta ǀ yeṣām ǀ rāyā ǀ yuktā ǀ eṣām ǀ hiraṇyayī ǀ
nema-dhitā ǀ na ǀ pauṃsyā ǀ vṛthā-iva ǀ viṣṭa-antā ǁ
10.093.14 (Mandala. Sukta. Rik)
8.4.28.04 (Ashtaka. Adhyaya. Varga. Rik)
10.08.044 (Mandala. Anuvāka. Rik)
Samhita Devanagari Accented
प्र तद्दुः॒शीमे॒ पृथ॑वाने वे॒ने प्र रा॒मे वो॑च॒मसु॑रे म॒घव॑त्सु ।
ये यु॒क्त्वाय॒ पंच॑ श॒तास्म॒यु प॒था वि॒श्राव्ये॑षां ॥
Samhita Devanagari Nonaccented
प्र तद्दुःशीमे पृथवाने वेने प्र रामे वोचमसुरे मघवत्सु ।
ये युक्त्वाय पंच शतास्मयु पथा विश्राव्येषां ॥
Samhita Transcription Accented
prá tádduḥśī́me pṛ́thavāne vené prá rāmé vocamásure maghávatsu ǀ
yé yuktvā́ya páñca śatā́smayú pathā́ viśrā́vyeṣām ǁ
Samhita Transcription Nonaccented
pra tadduḥśīme pṛthavāne vene pra rāme vocamasure maghavatsu ǀ
ye yuktvāya pañca śatāsmayu pathā viśrāvyeṣām ǁ
Padapatha Devanagari Accented
प्र । तत् । दुः॒ऽशीमे॑ । पृथ॑वाने । वे॒ने । प्र । रा॒मे । वो॒च॒म् । असु॑रे । म॒घव॑त्ऽसु ।
ये । यु॒क्त्वाय॑ । पञ्च॑ । श॒ता । अ॒स्म॒ऽयु । प॒था । वि॒ऽश्रावि॑ । ए॒षा॒म् ॥
Padapatha Devanagari Nonaccented
प्र । तत् । दुःऽशीमे । पृथवाने । वेने । प्र । रामे । वोचम् । असुरे । मघवत्ऽसु ।
ये । युक्त्वाय । पञ्च । शता । अस्मऽयु । पथा । विऽश्रावि । एषाम् ॥
Padapatha Transcription Accented
prá ǀ tát ǀ duḥ-śī́me ǀ pṛ́thavāne ǀ vené ǀ prá ǀ rāmé ǀ vocam ǀ ásure ǀ maghávat-su ǀ
yé ǀ yuktvā́ya ǀ páñca ǀ śatā́ ǀ asma-yú ǀ pathā́ ǀ vi-śrā́vi ǀ eṣām ǁ
Padapatha Transcription Nonaccented
pra ǀ tat ǀ duḥ-śīme ǀ pṛthavāne ǀ vene ǀ pra ǀ rāme ǀ vocam ǀ asure ǀ maghavat-su ǀ
ye ǀ yuktvāya ǀ pañca ǀ śatā ǀ asma-yu ǀ pathā ǀ vi-śrāvi ǀ eṣām ǁ
10.093.15 (Mandala. Sukta. Rik)
8.4.28.05 (Ashtaka. Adhyaya. Varga. Rik)
10.08.045 (Mandala. Anuvāka. Rik)
Samhita Devanagari Accented
अधीन्न्वत्र॑ सप्त॒तिं च॑ स॒प्त च॑ ।
स॒द्यो दि॑दिष्ट॒ तान्वः॑ स॒द्यो दि॑दिष्ट पा॒र्थ्यः स॒द्यो दि॑दिष्ट माय॒वः ॥
Samhita Devanagari Nonaccented
अधीन्न्वत्र सप्ततिं च सप्त च ।
सद्यो दिदिष्ट तान्वः सद्यो दिदिष्ट पार्थ्यः सद्यो दिदिष्ट मायवः ॥
Samhita Transcription Accented
ádhī́nnvátra saptatím ca saptá ca ǀ
sadyó didiṣṭa tā́nvaḥ sadyó didiṣṭa pārthyáḥ sadyó didiṣṭa māyaváḥ ǁ
Samhita Transcription Nonaccented
adhīnnvatra saptatim ca sapta ca ǀ
sadyo didiṣṭa tānvaḥ sadyo didiṣṭa pārthyaḥ sadyo didiṣṭa māyavaḥ ǁ
Padapatha Devanagari Accented
अधि॑ । इत् । नु । अत्र॑ । स॒प्त॒तिम् । च॒ । स॒प्त । च॒ ।
स॒द्यः । दि॒दि॒ष्ट॒ । तान्वः॑ । स॒द्यः । दि॒दि॒ष्ट॒ । पा॒र्थ्यः॑ । स॒द्यः । दि॒दि॒ष्ट॒ । मा॒य॒वः ॥
Padapatha Devanagari Nonaccented
अधि । इत् । नु । अत्र । सप्ततिम् । च । सप्त । च ।
सद्यः । दिदिष्ट । तान्वः । सद्यः । दिदिष्ट । पार्थ्यः । सद्यः । दिदिष्ट । मायवः ॥
Padapatha Transcription Accented
ádhi ǀ ít ǀ nú ǀ átra ǀ saptatím ǀ ca ǀ saptá ǀ ca ǀ
sadyáḥ ǀ didiṣṭa ǀ tā́nvaḥ ǀ sadyáḥ ǀ didiṣṭa ǀ pārthyáḥ ǀ sadyáḥ ǀ didiṣṭa ǀ māyaváḥ ǁ
Padapatha Transcription Nonaccented
adhi ǀ it ǀ nu ǀ atra ǀ saptatim ǀ ca ǀ sapta ǀ ca ǀ
sadyaḥ ǀ didiṣṭa ǀ tānvaḥ ǀ sadyaḥ ǀ didiṣṭa ǀ pārthyaḥ ǀ sadyaḥ ǀ didiṣṭa ǀ māyavaḥ ǁ