|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 95
|
1. Info |
| To: | 1, 3, 6, 8-10, 12, 14, 17: urvaśī; 2, 4, 5, 7, 11, 13, 15, 16, 18: purūravas aiḷa |
|
| From: | 1, 3, 6, 8-10, 12, 14, 17: purūravas aiḷa; 2, 4, 5, 7, 11, 13, 15, 16, 18: urvaśī |
|
| Metres: | 1st set of styles: nicṛttriṣṭup (9, 11, 14, 17, 18); pādanicṛttriṣṭup (3, 4, 13, 16); virāṭtrisṭup (6-8, 15); triṣṭup (1, 2, 12); bhurigārcītriṣṭup (5, 10) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.095.01 (Mandala. Sukta. Rik)
8.5.01.01 (Ashtaka. Adhyaya. Varga. Rik)
10.08.060 (Mandala. Anuvāka. Rik)
Samhita Devanagari Accented
ह॒ये जाये॒ मन॑सा॒ तिष्ठ॑ घोरे॒ वचां॑सि मि॒श्रा कृ॑णवावहै॒ नु ।
न नौ॒ मंत्रा॒ अनु॑दितास ए॒ते मय॑स्कर॒न्पर॑तरे च॒नाह॑न् ॥
Samhita Devanagari Nonaccented
हये जाये मनसा तिष्ठ घोरे वचांसि मिश्रा कृणवावहै नु ।
न नौ मंत्रा अनुदितास एते मयस्करन्परतरे चनाहन् ॥
Samhita Transcription Accented
hayé jā́ye mánasā tíṣṭha ghore vácāṃsi miśrā́ kṛṇavāvahai nú ǀ
ná nau mántrā ánuditāsa eté máyaskaranpáratare canā́han ǁ
Samhita Transcription Nonaccented
haye jāye manasā tiṣṭha ghore vacāṃsi miśrā kṛṇavāvahai nu ǀ
na nau mantrā anuditāsa ete mayaskaranparatare canāhan ǁ
Padapatha Devanagari Accented
ह॒ये । जाये॑ । मन॑सा । तिष्ठ॑ । घो॒रे॒ । वचां॑सि । मि॒श्रा । कृ॒ण॒वा॒व॒है॒ । नु ।
न । नौ॒ । मन्त्राः॑ । अनु॑दितासः । ए॒ते । मयः॑ । क॒र॒न् । पर॑ऽतरे । च॒न । अह॑न् ॥
Padapatha Devanagari Nonaccented
हये । जाये । मनसा । तिष्ठ । घोरे । वचांसि । मिश्रा । कृणवावहै । नु ।
न । नौ । मन्त्राः । अनुदितासः । एते । मयः । करन् । परऽतरे । चन । अहन् ॥
Padapatha Transcription Accented
hayé ǀ jā́ye ǀ mánasā ǀ tíṣṭha ǀ ghore ǀ vácāṃsi ǀ miśrā́ ǀ kṛṇavāvahai ǀ nú ǀ
ná ǀ nau ǀ mántrāḥ ǀ ánuditāsaḥ ǀ eté ǀ máyaḥ ǀ karan ǀ pára-tare ǀ caná ǀ áhan ǁ
Padapatha Transcription Nonaccented
haye ǀ jāye ǀ manasā ǀ tiṣṭha ǀ ghore ǀ vacāṃsi ǀ miśrā ǀ kṛṇavāvahai ǀ nu ǀ
na ǀ nau ǀ mantrāḥ ǀ anuditāsaḥ ǀ ete ǀ mayaḥ ǀ karan ǀ para-tare ǀ cana ǀ ahan ǁ
10.095.02 (Mandala. Sukta. Rik)
8.5.01.02 (Ashtaka. Adhyaya. Varga. Rik)
10.08.061 (Mandala. Anuvāka. Rik)
Samhita Devanagari Accented
किमे॒ता वा॒चा कृ॑णवा॒ तवा॒हं प्राक्र॑मिषमु॒षसा॑मग्रि॒येव॑ ।
पुरू॑रवः॒ पुन॒रस्तं॒ परे॑हि दुराप॒ना वात॑ इवा॒हम॑स्मि ॥
Samhita Devanagari Nonaccented
किमेता वाचा कृणवा तवाहं प्राक्रमिषमुषसामग्रियेव ।
पुरूरवः पुनरस्तं परेहि दुरापना वात इवाहमस्मि ॥
Samhita Transcription Accented
kímetā́ vācā́ kṛṇavā távāhám prā́kramiṣamuṣásāmagriyéva ǀ
púrūravaḥ púnarástam párehi durāpanā́ vā́ta ivāhámasmi ǁ
Samhita Transcription Nonaccented
kimetā vācā kṛṇavā tavāham prākramiṣamuṣasāmagriyeva ǀ
purūravaḥ punarastam parehi durāpanā vāta ivāhamasmi ǁ
Padapatha Devanagari Accented
किम् । ए॒ता । वा॒चा । कृ॒ण॒व॒ । तव॑ । अ॒हम् । प्र । अ॒क्र॒मि॒ष॒म् । उ॒षसा॑म् । अ॒ग्रि॒याऽइ॑व ।
पुरू॑रवः । पुनः॑ । अस्त॑म् । परा॑ । इ॒हि॒ । दुः॒ऽआ॒प॒ना । वातः॑ऽइव । अ॒हम् । अ॒स्मि॒ ॥
Padapatha Devanagari Nonaccented
किम् । एता । वाचा । कृणव । तव । अहम् । प्र । अक्रमिषम् । उषसाम् । अग्रियाऽइव ।
पुरूरवः । पुनः । अस्तम् । परा । इहि । दुःऽआपना । वातःऽइव । अहम् । अस्मि ॥
Padapatha Transcription Accented
kím ǀ etā́ ǀ vācā́ ǀ kṛṇava ǀ táva ǀ ahám ǀ prá ǀ akramiṣam ǀ uṣásām ǀ agriyā́-iva ǀ
púrūravaḥ ǀ púnaḥ ǀ ástam ǀ párā ǀ ihi ǀ duḥ-āpanā́ ǀ vā́taḥ-iva ǀ ahám ǀ asmi ǁ
Padapatha Transcription Nonaccented
kim ǀ etā ǀ vācā ǀ kṛṇava ǀ tava ǀ aham ǀ pra ǀ akramiṣam ǀ uṣasām ǀ agriyā-iva ǀ
purūravaḥ ǀ punaḥ ǀ astam ǀ parā ǀ ihi ǀ duḥ-āpanā ǀ vātaḥ-iva ǀ aham ǀ asmi ǁ
10.095.03 (Mandala. Sukta. Rik)
8.5.01.03 (Ashtaka. Adhyaya. Varga. Rik)
10.08.062 (Mandala. Anuvāka. Rik)
Samhita Devanagari Accented
इषु॒र्न श्रि॒य इ॑षु॒धेर॑स॒ना गो॒षाः श॑त॒सा न रंहिः॑ ।
अ॒वीरे॒ क्रतौ॒ वि द॑विद्युत॒न्नोरा॒ न मा॒युं चि॑तयंत॒ धुन॑यः ॥
Samhita Devanagari Nonaccented
इषुर्न श्रिय इषुधेरसना गोषाः शतसा न रंहिः ।
अवीरे क्रतौ वि दविद्युतन्नोरा न मायुं चितयंत धुनयः ॥
Samhita Transcription Accented
íṣurná śriyá iṣudhérasanā́ goṣā́ḥ śatasā́ ná ráṃhiḥ ǀ
avī́re krátau ví davidyutannórā ná māyúm citayanta dhúnayaḥ ǁ
Samhita Transcription Nonaccented
iṣurna śriya iṣudherasanā goṣāḥ śatasā na raṃhiḥ ǀ
avīre kratau vi davidyutannorā na māyum citayanta dhunayaḥ ǁ
Padapatha Devanagari Accented
इषुः॑ । न । श्रि॒ये । इ॒षु॒ऽधेः । अ॒स॒ना । गो॒ऽसाः । श॒त॒ऽसाः । न । रंहिः॑ ।
अ॒वीरे॑ । क्रतौ॑ । वि । द॒वि॒द्यु॒त॒त् । न । उरा॑ । न । मा॒युम् । चि॒त॒य॒न्त॒ । धुन॑यः ॥
Padapatha Devanagari Nonaccented
इषुः । न । श्रिये । इषुऽधेः । असना । गोऽसाः । शतऽसाः । न । रंहिः ।
अवीरे । क्रतौ । वि । दविद्युतत् । न । उरा । न । मायुम् । चितयन्त । धुनयः ॥
Padapatha Transcription Accented
íṣuḥ ǀ ná ǀ śriyé ǀ iṣu-dhéḥ ǀ asanā́ ǀ go-sā́ḥ ǀ śata-sā́ḥ ǀ ná ǀ ráṃhiḥ ǀ
avī́re ǀ krátau ǀ ví ǀ davidyutat ǀ ná ǀ úrā ǀ ná ǀ māyúm ǀ citayanta ǀ dhúnayaḥ ǁ
Padapatha Transcription Nonaccented
iṣuḥ ǀ na ǀ śriye ǀ iṣu-dheḥ ǀ asanā ǀ go-sāḥ ǀ śata-sāḥ ǀ na ǀ raṃhiḥ ǀ
avīre ǀ kratau ǀ vi ǀ davidyutat ǀ na ǀ urā ǀ na ǀ māyum ǀ citayanta ǀ dhunayaḥ ǁ
10.095.04 (Mandala. Sukta. Rik)
8.5.01.04 (Ashtaka. Adhyaya. Varga. Rik)
10.08.063 (Mandala. Anuvāka. Rik)
Samhita Devanagari Accented
सा वसु॒ दध॑ती॒ श्वशु॑राय॒ वय॒ उषो॒ यदि॒ वष्ट्यंति॑गृहात् ।
अस्तं॑ ननक्षे॒ यस्मिं॑चा॒कंदिवा॒ नक्तं॑ श्नथि॒ता वै॑त॒सेन॑ ॥
Samhita Devanagari Nonaccented
सा वसु दधती श्वशुराय वय उषो यदि वष्ट्यंतिगृहात् ।
अस्तं ननक्षे यस्मिंचाकंदिवा नक्तं श्नथिता वैतसेन ॥
Samhita Transcription Accented
sā́ vásu dádhatī śváśurāya váya úṣo yádi váṣṭyántigṛhāt ǀ
ástam nanakṣe yásmiñcākándívā náktam śnathitā́ vaitaséna ǁ
Samhita Transcription Nonaccented
sā vasu dadhatī śvaśurāya vaya uṣo yadi vaṣṭyantigṛhāt ǀ
astam nanakṣe yasmiñcākandivā naktam śnathitā vaitasena ǁ
Padapatha Devanagari Accented
सा । वसु॑ । दध॑ती । श्वशु॑राय । वयः॑ । उषः॑ । यदि॑ । वष्टि॑ । अन्ति॑ऽगृहात् ।
अस्त॑म् । न॒न॒क्षे॒ । यस्मि॑न् । चा॒कन् । दिवा॑ । नक्त॑म् । श्न॒थि॒ता । वै॒त॒सेन॑ ॥
Padapatha Devanagari Nonaccented
सा । वसु । दधती । श्वशुराय । वयः । उषः । यदि । वष्टि । अन्तिऽगृहात् ।
अस्तम् । ननक्षे । यस्मिन् । चाकन् । दिवा । नक्तम् । श्नथिता । वैतसेन ॥
Padapatha Transcription Accented
sā́ ǀ vásu ǀ dádhatī ǀ śváśurāya ǀ váyaḥ ǀ úṣaḥ ǀ yádi ǀ váṣṭi ǀ ánti-gṛhāt ǀ
ástam ǀ nanakṣe ǀ yásmin ǀ cākán ǀ dívā ǀ náktam ǀ śnathitā́ ǀ vaitaséna ǁ
Padapatha Transcription Nonaccented
sā ǀ vasu ǀ dadhatī ǀ śvaśurāya ǀ vayaḥ ǀ uṣaḥ ǀ yadi ǀ vaṣṭi ǀ anti-gṛhāt ǀ
astam ǀ nanakṣe ǀ yasmin ǀ cākan ǀ divā ǀ naktam ǀ śnathitā ǀ vaitasena ǁ
10.095.05 (Mandala. Sukta. Rik)
8.5.01.05 (Ashtaka. Adhyaya. Varga. Rik)
10.08.064 (Mandala. Anuvāka. Rik)
Samhita Devanagari Accented
त्रिः स्म॒ माह्नः॑ श्नथयो वैत॒सेनो॒त स्म॒ मेऽव्य॑त्यै पृणासि ।
पुरू॑र॒वोऽनु॑ ते॒ केत॑मायं॒ राजा॑ मे वीर त॒न्व१॒॑स्तदा॑सीः ॥
Samhita Devanagari Nonaccented
त्रिः स्म माह्नः श्नथयो वैतसेनोत स्म मेऽव्यत्यै पृणासि ।
पुरूरवोऽनु ते केतमायं राजा मे वीर तन्वस्तदासीः ॥
Samhita Transcription Accented
tríḥ sma mā́hnaḥ śnathayo vaitasénotá sma mé’vyatyai pṛṇāsi ǀ
púrūravó’nu te kétamāyam rā́jā me vīra tanvástádāsīḥ ǁ
Samhita Transcription Nonaccented
triḥ sma māhnaḥ śnathayo vaitasenota sma me’vyatyai pṛṇāsi ǀ
purūravo’nu te ketamāyam rājā me vīra tanvastadāsīḥ ǁ
Padapatha Devanagari Accented
त्रिः । स्म॒ । मा॒ । अह्नः॑ । श्न॒थ॒यः॒ । वै॒त॒सेन॑ । उ॒त । स्म॒ । मे॒ । अव्य॑त्यै । पृ॒णा॒सि॒ ।
पुरू॑रवः । अनु॑ । ते॒ । केत॑म् । आ॒य॒म् । राजा॑ । मे॒ । वी॒र॒ । त॒न्वः॑ । तत् । आ॒सीः॒ ॥
Padapatha Devanagari Nonaccented
त्रिः । स्म । मा । अह्नः । श्नथयः । वैतसेन । उत । स्म । मे । अव्यत्यै । पृणासि ।
पुरूरवः । अनु । ते । केतम् । आयम् । राजा । मे । वीर । तन्वः । तत् । आसीः ॥
Padapatha Transcription Accented
tríḥ ǀ sma ǀ mā ǀ áhnaḥ ǀ śnathayaḥ ǀ vaitaséna ǀ utá ǀ sma ǀ me ǀ ávyatyai ǀ pṛṇāsi ǀ
púrūravaḥ ǀ ánu ǀ te ǀ kétam ǀ āyam ǀ rā́jā ǀ me ǀ vīra ǀ tanváḥ ǀ tát ǀ āsīḥ ǁ
Padapatha Transcription Nonaccented
triḥ ǀ sma ǀ mā ǀ ahnaḥ ǀ śnathayaḥ ǀ vaitasena ǀ uta ǀ sma ǀ me ǀ avyatyai ǀ pṛṇāsi ǀ
purūravaḥ ǀ anu ǀ te ǀ ketam ǀ āyam ǀ rājā ǀ me ǀ vīra ǀ tanvaḥ ǀ tat ǀ āsīḥ ǁ
10.095.06 (Mandala. Sukta. Rik)
8.5.02.01 (Ashtaka. Adhyaya. Varga. Rik)
10.08.065 (Mandala. Anuvāka. Rik)
Samhita Devanagari Accented
या सु॑जू॒र्णिः श्रेणिः॑ सु॒म्नआ॑पिर्ह्र॒देच॑क्षु॒र्न ग्रं॒थिनी॑ चर॒ण्युः ।
ता अं॒जयो॑ऽरु॒णयो॒ न स॑स्रुः श्रि॒ये गावो॒ न धे॒नवो॑ऽनवंत ॥
Samhita Devanagari Nonaccented
या सुजूर्णिः श्रेणिः सुम्नआपिर्ह्रदेचक्षुर्न ग्रंथिनी चरण्युः ।
ता अंजयोऽरुणयो न सस्रुः श्रिये गावो न धेनवोऽनवंत ॥
Samhita Transcription Accented
yā́ sujūrṇíḥ śréṇiḥ sumnáāpirhradécakṣurná granthínī caraṇyúḥ ǀ
tā́ añjáyo’ruṇáyo ná sasruḥ śriyé gā́vo ná dhenávo’navanta ǁ
Samhita Transcription Nonaccented
yā sujūrṇiḥ śreṇiḥ sumnaāpirhradecakṣurna granthinī caraṇyuḥ ǀ
tā añjayo’ruṇayo na sasruḥ śriye gāvo na dhenavo’navanta ǁ
Padapatha Devanagari Accented
या । सु॒ऽजू॒र्णिः । श्रेणिः॑ । सु॒म्नेऽआ॑पिः । ह्र॒देऽच॑क्षुः । न । ग्र॒न्थिनी॑ । च॒र॒ण्युः ।
ताः । अ॒ञ्जयः॑ । अ॒रु॒णयः॑ । न । स॒स्रुः॒ । श्रि॒ये । गावः॑ । न । धे॒नवः॑ । अ॒न॒व॒न्त॒ ॥
Padapatha Devanagari Nonaccented
या । सुऽजूर्णिः । श्रेणिः । सुम्नेऽआपिः । ह्रदेऽचक्षुः । न । ग्रन्थिनी । चरण्युः ।
ताः । अञ्जयः । अरुणयः । न । सस्रुः । श्रिये । गावः । न । धेनवः । अनवन्त ॥
Padapatha Transcription Accented
yā́ ǀ su-jūrṇíḥ ǀ śréṇiḥ ǀ sumné-āpiḥ ǀ hradé-cakṣuḥ ǀ ná ǀ granthínī ǀ caraṇyúḥ ǀ
tā́ḥ ǀ añjáyaḥ ǀ aruṇáyaḥ ǀ ná ǀ sasruḥ ǀ śriyé ǀ gā́vaḥ ǀ ná ǀ dhenávaḥ ǀ anavanta ǁ
Padapatha Transcription Nonaccented
yā ǀ su-jūrṇiḥ ǀ śreṇiḥ ǀ sumne-āpiḥ ǀ hrade-cakṣuḥ ǀ na ǀ granthinī ǀ caraṇyuḥ ǀ
tāḥ ǀ añjayaḥ ǀ aruṇayaḥ ǀ na ǀ sasruḥ ǀ śriye ǀ gāvaḥ ǀ na ǀ dhenavaḥ ǀ anavanta ǁ
10.095.07 (Mandala. Sukta. Rik)
8.5.02.02 (Ashtaka. Adhyaya. Varga. Rik)
10.08.066 (Mandala. Anuvāka. Rik)
Samhita Devanagari Accented
सम॑स्मिं॒जाय॑मान आसत॒ ग्ना उ॒तेम॑वर्धन्न॒द्यः१॒॑ स्वगू॑र्ताः ।
म॒हे यत्त्वा॑ पुरूरवो॒ रणा॒याव॑र्धयंदस्यु॒हत्या॑य दे॒वाः ॥
Samhita Devanagari Nonaccented
समस्मिंजायमान आसत ग्ना उतेमवर्धन्नद्यः स्वगूर्ताः ।
महे यत्त्वा पुरूरवो रणायावर्धयंदस्युहत्याय देवाः ॥
Samhita Transcription Accented
sámasmiñjā́yamāna āsata gnā́ utémavardhannadyáḥ svágūrtāḥ ǀ
mahé yáttvā purūravo ráṇāyā́vardhayandasyuhátyāya devā́ḥ ǁ
Samhita Transcription Nonaccented
samasmiñjāyamāna āsata gnā utemavardhannadyaḥ svagūrtāḥ ǀ
mahe yattvā purūravo raṇāyāvardhayandasyuhatyāya devāḥ ǁ
Padapatha Devanagari Accented
सम् । अ॒स्मि॒न् । जाय॑माने । आ॒स॒त॒ । ग्नाः । उ॒त । ई॒म् । अ॒व॒र्ध॒न् । न॒द्यः॑ । स्वऽगू॑र्ताः ।
म॒हे । यत् । त्वा॒ । पु॒रू॒र॒वः॒ । रणा॑य । अव॑र्धयन् । द॒स्यु॒ऽहत्या॑य । दे॒वाः ॥
Padapatha Devanagari Nonaccented
सम् । अस्मिन् । जायमाने । आसत । ग्नाः । उत । ईम् । अवर्धन् । नद्यः । स्वऽगूर्ताः ।
महे । यत् । त्वा । पुरूरवः । रणाय । अवर्धयन् । दस्युऽहत्याय । देवाः ॥
Padapatha Transcription Accented
sám ǀ asmin ǀ jā́yamāne ǀ āsata ǀ gnā́ḥ ǀ utá ǀ īm ǀ avardhan ǀ nadyáḥ ǀ svá-gūrtāḥ ǀ
mahé ǀ yát ǀ tvā ǀ purūravaḥ ǀ ráṇāya ǀ ávardhayan ǀ dasyu-hátyāya ǀ devā́ḥ ǁ
Padapatha Transcription Nonaccented
sam ǀ asmin ǀ jāyamāne ǀ āsata ǀ gnāḥ ǀ uta ǀ īm ǀ avardhan ǀ nadyaḥ ǀ sva-gūrtāḥ ǀ
mahe ǀ yat ǀ tvā ǀ purūravaḥ ǀ raṇāya ǀ avardhayan ǀ dasyu-hatyāya ǀ devāḥ ǁ
10.095.08 (Mandala. Sukta. Rik)
8.5.02.03 (Ashtaka. Adhyaya. Varga. Rik)
10.08.067 (Mandala. Anuvāka. Rik)
Samhita Devanagari Accented
सचा॒ यदा॑सु॒ जह॑ती॒ष्वत्क॒ममा॑नुषीषु॒ मानु॑षो नि॒षेवे॑ ।
अप॑ स्म॒ मत्त॒रसं॑ती॒ न भु॒ज्युस्ता अ॑त्रसन्रथ॒स्पृशो॒ नाश्वाः॑ ॥
Samhita Devanagari Nonaccented
सचा यदासु जहतीष्वत्कममानुषीषु मानुषो निषेवे ।
अप स्म मत्तरसंती न भुज्युस्ता अत्रसन्रथस्पृशो नाश्वाः ॥
Samhita Transcription Accented
sácā yádāsu jáhatīṣvátkamámānuṣīṣu mā́nuṣo niṣéve ǀ
ápa sma máttarásantī ná bhujyústā́ atrasanrathaspṛ́śo nā́śvāḥ ǁ
Samhita Transcription Nonaccented
sacā yadāsu jahatīṣvatkamamānuṣīṣu mānuṣo niṣeve ǀ
apa sma mattarasantī na bhujyustā atrasanrathaspṛśo nāśvāḥ ǁ
Padapatha Devanagari Accented
सचा॑ । यत् । आ॒सु॒ । जह॑तीषु । अत्क॑म् । अमा॑नुषीषु । मानु॑षः । नि॒ऽसेवे॑ ।
अप॑ । स्म॒ । मत् । त॒रस॑न्ती । न । भु॒ज्युः । ताः । अ॒त्र॒स॒न् । र॒थ॒ऽस्पृशः॑ । न । अश्वाः॑ ॥
Padapatha Devanagari Nonaccented
सचा । यत् । आसु । जहतीषु । अत्कम् । अमानुषीषु । मानुषः । निऽसेवे ।
अप । स्म । मत् । तरसन्ती । न । भुज्युः । ताः । अत्रसन् । रथऽस्पृशः । न । अश्वाः ॥
Padapatha Transcription Accented
sácā ǀ yát ǀ āsu ǀ jáhatīṣu ǀ átkam ǀ ámānuṣīṣu ǀ mā́nuṣaḥ ǀ ni-séve ǀ
ápa ǀ sma ǀ mát ǀ tarásantī ǀ ná ǀ bhujyúḥ ǀ tā́ḥ ǀ atrasan ǀ ratha-spṛ́śaḥ ǀ ná ǀ áśvāḥ ǁ
Padapatha Transcription Nonaccented
sacā ǀ yat ǀ āsu ǀ jahatīṣu ǀ atkam ǀ amānuṣīṣu ǀ mānuṣaḥ ǀ ni-seve ǀ
apa ǀ sma ǀ mat ǀ tarasantī ǀ na ǀ bhujyuḥ ǀ tāḥ ǀ atrasan ǀ ratha-spṛśaḥ ǀ na ǀ aśvāḥ ǁ
10.095.09 (Mandala. Sukta. Rik)
8.5.02.04 (Ashtaka. Adhyaya. Varga. Rik)
10.08.068 (Mandala. Anuvāka. Rik)
Samhita Devanagari Accented
यदा॑सु॒ मर्तो॑ अ॒मृता॑सु नि॒स्पृक्सं क्षो॒णीभिः॒ क्रतु॑भि॒र्न पृं॒क्ते ।
ता आ॒तयो॒ न त॒न्वः॑ शुंभत॒ स्वा अश्वा॑सो॒ न क्री॒ळयो॒ दंद॑शानाः ॥
Samhita Devanagari Nonaccented
यदासु मर्तो अमृतासु निस्पृक्सं क्षोणीभिः क्रतुभिर्न पृंक्ते ।
ता आतयो न तन्वः शुंभत स्वा अश्वासो न क्रीळयो दंदशानाः ॥
Samhita Transcription Accented
yádāsu márto amṛ́tāsu nispṛ́ksám kṣoṇī́bhiḥ krátubhirná pṛṅkté ǀ
tā́ ātáyo ná tanváḥ śumbhata svā́ áśvāso ná krīḷáyo dándaśānāḥ ǁ
Samhita Transcription Nonaccented
yadāsu marto amṛtāsu nispṛksam kṣoṇībhiḥ kratubhirna pṛṅkte ǀ
tā ātayo na tanvaḥ śumbhata svā aśvāso na krīḷayo dandaśānāḥ ǁ
Padapatha Devanagari Accented
यत् । आ॒सु॒ । मर्तः॑ । अ॒मृता॑सु । नि॒ऽस्पृक् । सम् । क्षो॒णीभिः॑ । क्रतु॑ऽभिः । न । पृ॒ङ्क्ते ।
ताः । आ॒तयः॑ । न । त॒न्वः॑ । शु॒म्भ॒त॒ । स्वाः । अश्वा॑सः । न । क्री॒ळयः॑ । दन्द॑शानाः ॥
Padapatha Devanagari Nonaccented
यत् । आसु । मर्तः । अमृतासु । निऽस्पृक् । सम् । क्षोणीभिः । क्रतुऽभिः । न । पृङ्क्ते ।
ताः । आतयः । न । तन्वः । शुम्भत । स्वाः । अश्वासः । न । क्रीळयः । दन्दशानाः ॥
Padapatha Transcription Accented
yát ǀ āsu ǀ mártaḥ ǀ amṛ́tāsu ǀ ni-spṛ́k ǀ sám ǀ kṣoṇī́bhiḥ ǀ krátu-bhiḥ ǀ ná ǀ pṛṅkté ǀ
tā́ḥ ǀ ātáyaḥ ǀ ná ǀ tanváḥ ǀ śumbhata ǀ svā́ḥ ǀ áśvāsaḥ ǀ ná ǀ krīḷáyaḥ ǀ dándaśānāḥ ǁ
Padapatha Transcription Nonaccented
yat ǀ āsu ǀ martaḥ ǀ amṛtāsu ǀ ni-spṛk ǀ sam ǀ kṣoṇībhiḥ ǀ kratu-bhiḥ ǀ na ǀ pṛṅkte ǀ
tāḥ ǀ ātayaḥ ǀ na ǀ tanvaḥ ǀ śumbhata ǀ svāḥ ǀ aśvāsaḥ ǀ na ǀ krīḷayaḥ ǀ dandaśānāḥ ǁ
10.095.10 (Mandala. Sukta. Rik)
8.5.02.05 (Ashtaka. Adhyaya. Varga. Rik)
10.08.069 (Mandala. Anuvāka. Rik)
Samhita Devanagari Accented
वि॒द्युन्न या पतं॑ती॒ दवि॑द्यो॒द्भरं॑ती मे॒ अप्या॒ काम्या॑नि ।
जनि॑ष्टो अ॒पो नर्यः॒ सुजा॑तः॒ प्रोर्वशी॑ तिरत दी॒र्घमायुः॑ ॥
Samhita Devanagari Nonaccented
विद्युन्न या पतंती दविद्योद्भरंती मे अप्या काम्यानि ।
जनिष्टो अपो नर्यः सुजातः प्रोर्वशी तिरत दीर्घमायुः ॥
Samhita Transcription Accented
vidyúnná yā́ pátantī dávidyodbhárantī me ápyā kā́myāni ǀ
jániṣṭo apó náryaḥ sújātaḥ prórváśī tirata dīrghámā́yuḥ ǁ
Samhita Transcription Nonaccented
vidyunna yā patantī davidyodbharantī me apyā kāmyāni ǀ
janiṣṭo apo naryaḥ sujātaḥ prorvaśī tirata dīrghamāyuḥ ǁ
Padapatha Devanagari Accented
वि॒ऽद्युत् । न । या । पत॑न्ती । दवि॑द्योत् । भर॑न्ती । मे॒ । अप्या॑ । काम्या॑नि ।
जनि॑ष्टो॒ इति॑ । अ॒पः । नर्यः॑ । सुऽजा॑तः । प्र । उ॒र्वशी॑ । ति॒र॒त॒ । दी॒र्घम् । आयुः॑ ॥
Padapatha Devanagari Nonaccented
विऽद्युत् । न । या । पतन्ती । दविद्योत् । भरन्ती । मे । अप्या । काम्यानि ।
जनिष्टो इति । अपः । नर्यः । सुऽजातः । प्र । उर्वशी । तिरत । दीर्घम् । आयुः ॥
Padapatha Transcription Accented
vi-dyút ǀ ná ǀ yā́ ǀ pátantī ǀ dávidyot ǀ bhárantī ǀ me ǀ ápyā ǀ kā́myāni ǀ
jániṣṭo íti ǀ apáḥ ǀ náryaḥ ǀ sú-jātaḥ ǀ prá ǀ urváśī ǀ tirata ǀ dīrghám ǀ ā́yuḥ ǁ
Padapatha Transcription Nonaccented
vi-dyut ǀ na ǀ yā ǀ patantī ǀ davidyot ǀ bharantī ǀ me ǀ apyā ǀ kāmyāni ǀ
janiṣṭo iti ǀ apaḥ ǀ naryaḥ ǀ su-jātaḥ ǀ pra ǀ urvaśī ǀ tirata ǀ dīrgham ǀ āyuḥ ǁ
10.095.11 (Mandala. Sukta. Rik)
8.5.03.01 (Ashtaka. Adhyaya. Varga. Rik)
10.08.070 (Mandala. Anuvāka. Rik)
Samhita Devanagari Accented
ज॒ज्ञि॒ष इ॒त्था गो॒पीथ्या॑य॒ हि द॒धाथ॒ तत्पु॑रूरवो म॒ ओजः॑ ।
अशा॑सं त्वा वि॒दुषी॒ सस्मि॒न्नह॒न्न म॒ आशृ॑णोः॒ किम॒भुग्व॑दासि ॥
Samhita Devanagari Nonaccented
जज्ञिष इत्था गोपीथ्याय हि दधाथ तत्पुरूरवो म ओजः ।
अशासं त्वा विदुषी सस्मिन्नहन्न म आशृणोः किमभुग्वदासि ॥
Samhita Transcription Accented
jajñiṣá itthā́ gopī́thyāya hí dadhā́tha tátpurūravo ma ójaḥ ǀ
áśāsam tvā vidúṣī sásminnáhanná ma ā́śṛṇoḥ kímabhúgvadāsi ǁ
Samhita Transcription Nonaccented
jajñiṣa itthā gopīthyāya hi dadhātha tatpurūravo ma ojaḥ ǀ
aśāsam tvā viduṣī sasminnahanna ma āśṛṇoḥ kimabhugvadāsi ǁ
Padapatha Devanagari Accented
ज॒ज्ञि॒षे । इ॒त्था । गो॒ऽपीथ्या॑य । हि । द॒धाथ॑ । तत् । पु॒रू॒र॒वः॒ । मे॒ । ओजः॑ ।
अशा॑सम् । त्वा॒ । वि॒दुषी॑ । सस्मि॑न् । अह॑न् । न । मे॒ । आ । अ॒शृ॒णोः॒ । किम् । अ॒भुक् । व॒दा॒सि॒ ॥
Padapatha Devanagari Nonaccented
जज्ञिषे । इत्था । गोऽपीथ्याय । हि । दधाथ । तत् । पुरूरवः । मे । ओजः ।
अशासम् । त्वा । विदुषी । सस्मिन् । अहन् । न । मे । आ । अशृणोः । किम् । अभुक् । वदासि ॥
Padapatha Transcription Accented
jajñiṣé ǀ itthā́ ǀ go-pī́thyāya ǀ hí ǀ dadhā́tha ǀ tát ǀ purūravaḥ ǀ me ǀ ójaḥ ǀ
áśāsam ǀ tvā ǀ vidúṣī ǀ sásmin ǀ áhan ǀ ná ǀ me ǀ ā́ ǀ aśṛṇoḥ ǀ kím ǀ abhúk ǀ vadāsi ǁ
Padapatha Transcription Nonaccented
jajñiṣe ǀ itthā ǀ go-pīthyāya ǀ hi ǀ dadhātha ǀ tat ǀ purūravaḥ ǀ me ǀ ojaḥ ǀ
aśāsam ǀ tvā ǀ viduṣī ǀ sasmin ǀ ahan ǀ na ǀ me ǀ ā ǀ aśṛṇoḥ ǀ kim ǀ abhuk ǀ vadāsi ǁ
10.095.12 (Mandala. Sukta. Rik)
8.5.03.02 (Ashtaka. Adhyaya. Varga. Rik)
10.08.071 (Mandala. Anuvāka. Rik)
Samhita Devanagari Accented
क॒दा सू॒नुः पि॒तरं॑ जा॒त इ॑च्छाच्च॒क्रन्नाश्रु॑ वर्तयद्विजा॒नन् ।
को दंप॑ती॒ सम॑नसा॒ वि यू॑यो॒दध॒ यद॒ग्निः श्वशु॑रेषु॒ दीद॑यत् ॥
Samhita Devanagari Nonaccented
कदा सूनुः पितरं जात इच्छाच्चक्रन्नाश्रु वर्तयद्विजानन् ।
को दंपती समनसा वि यूयोदध यदग्निः श्वशुरेषु दीदयत् ॥
Samhita Transcription Accented
kadā́ sūnúḥ pitáram jātá icchāccakránnā́śru vartayadvijānán ǀ
kó dámpatī sámanasā ví yūyodádha yádagníḥ śváśureṣu dī́dayat ǁ
Samhita Transcription Nonaccented
kadā sūnuḥ pitaram jāta icchāccakrannāśru vartayadvijānan ǀ
ko dampatī samanasā vi yūyodadha yadagniḥ śvaśureṣu dīdayat ǁ
Padapatha Devanagari Accented
क॒दा । सू॒नुः । पि॒तर॑म् । जा॒तः । इ॒च्छा॒त् । च॒क्रन् । न । अश्रु॑ । व॒र्त॒य॒त् । वि॒ऽजा॒नन् ।
कः । दम्प॑ती॒ इति॒ दम्ऽप॑ती । सऽम॑नसा । वि । यू॒यो॒त् । अध॑ । यत् । अ॒ग्निः । श्वशु॑रेषु । दीद॑यत् ॥
Padapatha Devanagari Nonaccented
कदा । सूनुः । पितरम् । जातः । इच्छात् । चक्रन् । न । अश्रु । वर्तयत् । विऽजानन् ।
कः । दम्पती इति दम्ऽपती । सऽमनसा । वि । यूयोत् । अध । यत् । अग्निः । श्वशुरेषु । दीदयत् ॥
Padapatha Transcription Accented
kadā́ ǀ sūnúḥ ǀ pitáram ǀ jātáḥ ǀ icchāt ǀ cakrán ǀ ná ǀ áśru ǀ vartayat ǀ vi-jānán ǀ
káḥ ǀ dámpatī íti dám-patī ǀ sá-manasā ǀ ví ǀ yūyot ǀ ádha ǀ yát ǀ agníḥ ǀ śváśureṣu ǀ dī́dayat ǁ
Padapatha Transcription Nonaccented
kadā ǀ sūnuḥ ǀ pitaram ǀ jātaḥ ǀ icchāt ǀ cakran ǀ na ǀ aśru ǀ vartayat ǀ vi-jānan ǀ
kaḥ ǀ dampatī iti dam-patī ǀ sa-manasā ǀ vi ǀ yūyot ǀ adha ǀ yat ǀ agniḥ ǀ śvaśureṣu ǀ dīdayat ǁ
10.095.13 (Mandala. Sukta. Rik)
8.5.03.03 (Ashtaka. Adhyaya. Varga. Rik)
10.08.072 (Mandala. Anuvāka. Rik)
Samhita Devanagari Accented
प्रति॑ ब्रवाणि व॒र्तय॑ते॒ अश्रु॑ च॒क्रन्न क्रं॑ददा॒ध्ये॑ शि॒वायै॑ ।
प्र तत्ते॑ हिनवा॒ यत्ते॑ अ॒स्मे परे॒ह्यस्तं॑ न॒हि मू॑र॒ मापः॑ ॥
Samhita Devanagari Nonaccented
प्रति ब्रवाणि वर्तयते अश्रु चक्रन्न क्रंददाध्ये शिवायै ।
प्र तत्ते हिनवा यत्ते अस्मे परेह्यस्तं नहि मूर मापः ॥
Samhita Transcription Accented
práti bravāṇi vartáyate áśru cakránná krandadādhyé śivā́yai ǀ
prá tátte hinavā yátte asmé párehyástam nahí mūra mā́paḥ ǁ
Samhita Transcription Nonaccented
prati bravāṇi vartayate aśru cakranna krandadādhye śivāyai ǀ
pra tatte hinavā yatte asme parehyastam nahi mūra māpaḥ ǁ
Padapatha Devanagari Accented
प्रति॑ । ब्र॒वा॒णि॒ । व॒र्तय॑ते । अश्रु॑ । च॒क्रन् । न । क्र॒न्द॒त् । आ॒ऽध्ये॑ । शि॒वायै॑ ।
प्र । तत् । ते॒ । हि॒न॒व॒ । यत् । ते॒ । अ॒स्मे इति॑ । परा॑ । इ॒हि॒ । अस्त॑म् । न॒हि । मू॒र॒ । मा॒ । आपः॑ ॥
Padapatha Devanagari Nonaccented
प्रति । ब्रवाणि । वर्तयते । अश्रु । चक्रन् । न । क्रन्दत् । आऽध्ये । शिवायै ।
प्र । तत् । ते । हिनव । यत् । ते । अस्मे इति । परा । इहि । अस्तम् । नहि । मूर । मा । आपः ॥
Padapatha Transcription Accented
práti ǀ bravāṇi ǀ vartáyate ǀ áśru ǀ cakrán ǀ ná ǀ krandat ǀ ā-dhyé ǀ śivā́yai ǀ
prá ǀ tát ǀ te ǀ hinava ǀ yát ǀ te ǀ asmé íti ǀ párā ǀ ihi ǀ ástam ǀ nahí ǀ mūra ǀ mā ǀ ā́paḥ ǁ
Padapatha Transcription Nonaccented
prati ǀ bravāṇi ǀ vartayate ǀ aśru ǀ cakran ǀ na ǀ krandat ǀ ā-dhye ǀ śivāyai ǀ
pra ǀ tat ǀ te ǀ hinava ǀ yat ǀ te ǀ asme iti ǀ parā ǀ ihi ǀ astam ǀ nahi ǀ mūra ǀ mā ǀ āpaḥ ǁ
10.095.14 (Mandala. Sukta. Rik)
8.5.03.04 (Ashtaka. Adhyaya. Varga. Rik)
10.08.073 (Mandala. Anuvāka. Rik)
Samhita Devanagari Accented
सु॒दे॒वो अ॒द्य प्र॒पते॒दना॑वृत्परा॒वतं॑ पर॒मां गंत॒वा उ॑ ।
अधा॒ शयी॑त॒ निर्ऋ॑तेरु॒पस्थेऽधै॑नं॒ वृका॑ रभ॒सासो॑ अ॒द्युः ॥
Samhita Devanagari Nonaccented
सुदेवो अद्य प्रपतेदनावृत्परावतं परमां गंतवा उ ।
अधा शयीत निर्ऋतेरुपस्थेऽधैनं वृका रभसासो अद्युः ॥
Samhita Transcription Accented
sudevó adyá prapátedánāvṛtparāvátam paramā́m gántavā́ u ǀ
ádhā śáyīta nírṛterupásthé’dhainam vṛ́kā rabhasā́so adyúḥ ǁ
Samhita Transcription Nonaccented
sudevo adya prapatedanāvṛtparāvatam paramām gantavā u ǀ
adhā śayīta nirṛterupasthe’dhainam vṛkā rabhasāso adyuḥ ǁ
Padapatha Devanagari Accented
सु॒ऽदे॒वः । अ॒द्य । प्र॒ऽपते॑त् । अना॑वृत् । प॒रा॒ऽवत॑म् । प॒र॒माम् । गन्त॒वै । ऊं॒ इति॑ ।
अध॑ । शयी॑त । निःऽऋ॑तेः । उ॒पऽस्थे॑ । अध॑ । ए॒न॒म् । वृकाः॑ । र॒भ॒सासः॑ । अ॒द्युः ॥
Padapatha Devanagari Nonaccented
सुऽदेवः । अद्य । प्रऽपतेत् । अनावृत् । पराऽवतम् । परमाम् । गन्तवै । ऊं इति ।
अध । शयीत । निःऽऋतेः । उपऽस्थे । अध । एनम् । वृकाः । रभसासः । अद्युः ॥
Padapatha Transcription Accented
su-deváḥ ǀ adyá ǀ pra-pátet ǀ ánāvṛt ǀ parā-vátam ǀ paramā́m ǀ gántavái ǀ ūṃ íti ǀ
ádha ǀ śáyīta ǀ níḥ-ṛteḥ ǀ upá-sthe ǀ ádha ǀ enam ǀ vṛ́kāḥ ǀ rabhasā́saḥ ǀ adyúḥ ǁ
Padapatha Transcription Nonaccented
su-devaḥ ǀ adya ǀ pra-patet ǀ anāvṛt ǀ parā-vatam ǀ paramām ǀ gantavai ǀ ūṃ iti ǀ
adha ǀ śayīta ǀ niḥ-ṛteḥ ǀ upa-sthe ǀ adha ǀ enam ǀ vṛkāḥ ǀ rabhasāsaḥ ǀ adyuḥ ǁ
10.095.15 (Mandala. Sukta. Rik)
8.5.03.05 (Ashtaka. Adhyaya. Varga. Rik)
10.08.074 (Mandala. Anuvāka. Rik)
Samhita Devanagari Accented
पुरू॑रवो॒ मा मृ॑था॒ मा प्र प॑प्तो॒ मा त्वा॒ वृका॑सो॒ अशि॑वास उ क्षन् ।
न वै स्त्रैणा॑नि स॒ख्यानि॑ संति सालावृ॒काणां॒ हृद॑यान्ये॒ता ॥
Samhita Devanagari Nonaccented
पुरूरवो मा मृथा मा प्र पप्तो मा त्वा वृकासो अशिवास उ क्षन् ।
न वै स्त्रैणानि सख्यानि संति सालावृकाणां हृदयान्येता ॥
Samhita Transcription Accented
púrūravo mā́ mṛthā mā́ prá papto mā́ tvā vṛ́kāso áśivāsa u kṣan ǀ
ná vái stráiṇāni sakhyā́ni santi sālāvṛkā́ṇām hṛ́dayānyetā́ ǁ
Samhita Transcription Nonaccented
purūravo mā mṛthā mā pra papto mā tvā vṛkāso aśivāsa u kṣan ǀ
na vai straiṇāni sakhyāni santi sālāvṛkāṇām hṛdayānyetā ǁ
Padapatha Devanagari Accented
पुरू॑रवः । मा । मृ॒थाः॒ । मा । प्र । प॒प्तः॒ । मा । त्वा॒ । वृका॑सः । अशि॑वासः । ऊं॒ इति॑ । क्ष॒न् ।
न । वै । स्त्रैणा॑नि । स॒ख्यानि॑ । स॒न्ति॒ । सा॒ला॒वृ॒काणा॑म् । हृद॑यानि । ए॒ता ॥
Padapatha Devanagari Nonaccented
पुरूरवः । मा । मृथाः । मा । प्र । पप्तः । मा । त्वा । वृकासः । अशिवासः । ऊं इति । क्षन् ।
न । वै । स्त्रैणानि । सख्यानि । सन्ति । सालावृकाणाम् । हृदयानि । एता ॥
Padapatha Transcription Accented
púrūravaḥ ǀ mā́ ǀ mṛthāḥ ǀ mā́ ǀ prá ǀ paptaḥ ǀ mā́ ǀ tvā ǀ vṛ́kāsaḥ ǀ áśivāsaḥ ǀ ūṃ íti ǀ kṣan ǀ
ná ǀ vái ǀ stráiṇāni ǀ sakhyā́ni ǀ santi ǀ sālāvṛkā́ṇām ǀ hṛ́dayāni ǀ etā́ ǁ
Padapatha Transcription Nonaccented
purūravaḥ ǀ mā ǀ mṛthāḥ ǀ mā ǀ pra ǀ paptaḥ ǀ mā ǀ tvā ǀ vṛkāsaḥ ǀ aśivāsaḥ ǀ ūṃ iti ǀ kṣan ǀ
na ǀ vai ǀ straiṇāni ǀ sakhyāni ǀ santi ǀ sālāvṛkāṇām ǀ hṛdayāni ǀ etā ǁ
10.095.16 (Mandala. Sukta. Rik)
8.5.04.01 (Ashtaka. Adhyaya. Varga. Rik)
10.08.075 (Mandala. Anuvāka. Rik)
Samhita Devanagari Accented
यद्विरू॒पाच॑रं॒ मर्त्ये॒ष्वव॑सं॒ रात्रीः॑ श॒रद॒श्चत॑स्रः ।
घृ॒तस्य॑ स्तो॒कं स॒कृदह्न॑ आश्नां॒ तादे॒वेदं ता॑तृपा॒णा च॑रामि ॥
Samhita Devanagari Nonaccented
यद्विरूपाचरं मर्त्येष्ववसं रात्रीः शरदश्चतस्रः ।
घृतस्य स्तोकं सकृदह्न आश्नां तादेवेदं तातृपाणा चरामि ॥
Samhita Transcription Accented
yádvírūpā́caram mártyeṣvávasam rā́trīḥ śarádaścátasraḥ ǀ
ghṛtásya stokám sakṛ́dáhna āśnām tā́devédám tātṛpāṇā́ carāmi ǁ
Samhita Transcription Nonaccented
yadvirūpācaram martyeṣvavasam rātrīḥ śaradaścatasraḥ ǀ
ghṛtasya stokam sakṛdahna āśnām tādevedam tātṛpāṇā carāmi ǁ
Padapatha Devanagari Accented
यत् । विऽरू॑पा । अच॑रम् । मर्त्ये॑षु । अव॑सम् । रात्रीः॑ । श॒रदः॑ । चत॑स्रः ।
घृ॒तस्य॑ । स्तो॒कम् । स॒कृत् । अह्नः॑ । आ॒श्ना॒म् । तात् । ए॒व । इ॒दम् । त॒तृ॒पा॒णा । च॒रा॒मि॒ ॥
Padapatha Devanagari Nonaccented
यत् । विऽरूपा । अचरम् । मर्त्येषु । अवसम् । रात्रीः । शरदः । चतस्रः ।
घृतस्य । स्तोकम् । सकृत् । अह्नः । आश्नाम् । तात् । एव । इदम् । ततृपाणा । चरामि ॥
Padapatha Transcription Accented
yát ǀ ví-rūpā ǀ ácaram ǀ mártyeṣu ǀ ávasam ǀ rā́trīḥ ǀ śarádaḥ ǀ cátasraḥ ǀ
ghṛtásya ǀ stokám ǀ sakṛ́t ǀ áhnaḥ ǀ āśnām ǀ tā́t ǀ evá ǀ idám ǀ tatṛpāṇā́ ǀ carāmi ǁ
Padapatha Transcription Nonaccented
yat ǀ vi-rūpā ǀ acaram ǀ martyeṣu ǀ avasam ǀ rātrīḥ ǀ śaradaḥ ǀ catasraḥ ǀ
ghṛtasya ǀ stokam ǀ sakṛt ǀ ahnaḥ ǀ āśnām ǀ tāt ǀ eva ǀ idam ǀ tatṛpāṇā ǀ carāmi ǁ
10.095.17 (Mandala. Sukta. Rik)
8.5.04.02 (Ashtaka. Adhyaya. Varga. Rik)
10.08.076 (Mandala. Anuvāka. Rik)
Samhita Devanagari Accented
अं॒त॒रि॒क्ष॒प्रां रज॑सो वि॒मानी॒मुप॑ शिक्षाम्यु॒र्वशीं॒ वसि॑ष्ठः ।
उप॑ त्वा रा॒तिः सु॑कृ॒तस्य॒ तिष्ठा॒न्नि व॑र्तस्व॒ हृद॑यं तप्यते मे ॥
Samhita Devanagari Nonaccented
अंतरिक्षप्रां रजसो विमानीमुप शिक्षाम्युर्वशीं वसिष्ठः ।
उप त्वा रातिः सुकृतस्य तिष्ठान्नि वर्तस्व हृदयं तप्यते मे ॥
Samhita Transcription Accented
antarikṣaprā́m rájaso vimā́nīmúpa śikṣāmyurváśīm vásiṣṭhaḥ ǀ
úpa tvā rātíḥ sukṛtásya tíṣṭhānní vartasva hṛ́dayam tapyate me ǁ
Samhita Transcription Nonaccented
antarikṣaprām rajaso vimānīmupa śikṣāmyurvaśīm vasiṣṭhaḥ ǀ
upa tvā rātiḥ sukṛtasya tiṣṭhānni vartasva hṛdayam tapyate me ǁ
Padapatha Devanagari Accented
अ॒न्त॒रि॒क्ष॒ऽप्राम् । रज॑सः । वि॒ऽमानी॑म् । उप॑ । शि॒क्षा॒मि॒ । उ॒र्वशी॑म् । वसि॑ष्ठः ।
उप॑ । त्वा॒ । रा॒तिः । सु॒ऽकृ॒तस्य॑ । तिष्ठा॑त् । नि । व॒र्त॒स्व॒ । हृद॑यम् । त॒प्य॒ते॒ । मे॒ ॥
Padapatha Devanagari Nonaccented
अन्तरिक्षऽप्राम् । रजसः । विऽमानीम् । उप । शिक्षामि । उर्वशीम् । वसिष्ठः ।
उप । त्वा । रातिः । सुऽकृतस्य । तिष्ठात् । नि । वर्तस्व । हृदयम् । तप्यते । मे ॥
Padapatha Transcription Accented
antarikṣa-prā́m ǀ rájasaḥ ǀ vi-mā́nīm ǀ úpa ǀ śikṣāmi ǀ urváśīm ǀ vásiṣṭhaḥ ǀ
úpa ǀ tvā ǀ rātíḥ ǀ su-kṛtásya ǀ tíṣṭhāt ǀ ní ǀ vartasva ǀ hṛ́dayam ǀ tapyate ǀ me ǁ
Padapatha Transcription Nonaccented
antarikṣa-prām ǀ rajasaḥ ǀ vi-mānīm ǀ upa ǀ śikṣāmi ǀ urvaśīm ǀ vasiṣṭhaḥ ǀ
upa ǀ tvā ǀ rātiḥ ǀ su-kṛtasya ǀ tiṣṭhāt ǀ ni ǀ vartasva ǀ hṛdayam ǀ tapyate ǀ me ǁ
10.095.18 (Mandala. Sukta. Rik)
8.5.04.03 (Ashtaka. Adhyaya. Varga. Rik)
10.08.077 (Mandala. Anuvāka. Rik)
Samhita Devanagari Accented
इति॑ त्वा दे॒वा इ॒म आ॑हुरैळ॒ यथे॑मे॒तद्भव॑सि मृ॒त्युबं॑धुः ।
प्र॒जा ते॑ दे॒वान्ह॒विषा॑ यजाति स्व॒र्ग उ॒ त्वमपि॑ मादयासे ॥
Samhita Devanagari Nonaccented
इति त्वा देवा इम आहुरैळ यथेमेतद्भवसि मृत्युबंधुः ।
प्रजा ते देवान्हविषा यजाति स्वर्ग उ त्वमपि मादयासे ॥
Samhita Transcription Accented
íti tvā devā́ imá āhuraiḷa yáthemetádbhávasi mṛtyúbandhuḥ ǀ
prajā́ te devā́nhavíṣā yajāti svargá u tvámápi mādayāse ǁ
Samhita Transcription Nonaccented
iti tvā devā ima āhuraiḷa yathemetadbhavasi mṛtyubandhuḥ ǀ
prajā te devānhaviṣā yajāti svarga u tvamapi mādayāse ǁ
Padapatha Devanagari Accented
इति॑ । त्वा॒ । दे॒वाः । इ॒मे । आ॒हुः॒ । ऐ॒ळ॒ । यथा॑ । ई॒म् । ए॒तत् । भव॑सि । मृ॒त्युऽब॑न्धुः ।
प्र॒ऽजा । ते॒ । दे॒वान् । ह॒विषा॑ । य॒जा॒ति॒ । स्वः॒ऽगे । ऊं॒ इति॑ । त्वम् । अपि॑ । मा॒द॒या॒से॒ ॥
Padapatha Devanagari Nonaccented
इति । त्वा । देवाः । इमे । आहुः । ऐळ । यथा । ईम् । एतत् । भवसि । मृत्युऽबन्धुः ।
प्रऽजा । ते । देवान् । हविषा । यजाति । स्वःऽगे । ऊं इति । त्वम् । अपि । मादयासे ॥
Padapatha Transcription Accented
íti ǀ tvā ǀ devā́ḥ ǀ imé ǀ āhuḥ ǀ aiḷa ǀ yáthā ǀ īm ǀ etát ǀ bhávasi ǀ mṛtyú-bandhuḥ ǀ
pra-jā́ ǀ te ǀ devā́n ǀ havíṣā ǀ yajāti ǀ svaḥ-gé ǀ ūṃ íti ǀ tvám ǀ ápi ǀ mādayāse ǁ
Padapatha Transcription Nonaccented
iti ǀ tvā ǀ devāḥ ǀ ime ǀ āhuḥ ǀ aiḷa ǀ yathā ǀ īm ǀ etat ǀ bhavasi ǀ mṛtyu-bandhuḥ ǀ
pra-jā ǀ te ǀ devān ǀ haviṣā ǀ yajāti ǀ svaḥ-ge ǀ ūṃ iti ǀ tvam ǀ api ǀ mādayāse ǁ