|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 110
|
1. Info |
| To: | 1, 3, 10, 11: agni; 2, 4, 5, 7, 9: hymn āprī; 6: uṣás, nakta; 8: iḷā, bhāratī, sarasvatī |
|
| From: | jamadagni bhārgava or rāma jāmadagnya | |
| Metres: | 1st set of styles: nicṛttriṣṭup (1, 2, 5, 10, 11); triṣṭup (6, 7, 9); pādanicṛttriṣṭup (4, 8); ārcītriṣṭup (3) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.110.01 (Mandala. Sukta. Rik)
8.6.08.01 (Ashtaka. Adhyaya. Varga. Rik)
10.09.112 (Mandala. Anuvāka. Rik)
Samhita Devanagari Accented
समि॑द्धो अ॒द्य मनु॑षो दुरो॒णे दे॒वो दे॒वान्य॑जसि जातवेदः ।
आ च॒ वह॑ मित्रमहश्चिकि॒त्वांत्वं दू॒तः क॒विर॑सि॒ प्रचे॑ताः ॥
Samhita Devanagari Nonaccented
समिद्धो अद्य मनुषो दुरोणे देवो देवान्यजसि जातवेदः ।
आ च वह मित्रमहश्चिकित्वांत्वं दूतः कविरसि प्रचेताः ॥
Samhita Transcription Accented
sámiddho adyá mánuṣo duroṇé devó devā́nyajasi jātavedaḥ ǀ
ā́ ca váha mitramahaścikitvā́ntvám dūtáḥ kavírasi prácetāḥ ǁ
Samhita Transcription Nonaccented
samiddho adya manuṣo duroṇe devo devānyajasi jātavedaḥ ǀ
ā ca vaha mitramahaścikitvāntvam dūtaḥ kavirasi pracetāḥ ǁ
Padapatha Devanagari Accented
सम्ऽइ॑द्धः । अ॒द्य । मनु॑षः । दु॒रो॒णे । दे॒वः । दे॒वान् । य॒ज॒सि॒ । जा॒त॒ऽवे॒दः॒ ।
आ । च॒ । वह॑ । मि॒त्र॒ऽम॒हः॒ । चि॒कि॒त्वान् । त्वम् । दू॒तः । क॒विः । अ॒सि॒ । प्रऽचे॑ताः ॥
Padapatha Devanagari Nonaccented
सम्ऽइद्धः । अद्य । मनुषः । दुरोणे । देवः । देवान् । यजसि । जातऽवेदः ।
आ । च । वह । मित्रऽमहः । चिकित्वान् । त्वम् । दूतः । कविः । असि । प्रऽचेताः ॥
Padapatha Transcription Accented
sám-iddhaḥ ǀ adyá ǀ mánuṣaḥ ǀ duroṇé ǀ deváḥ ǀ devā́n ǀ yajasi ǀ jāta-vedaḥ ǀ
ā́ ǀ ca ǀ váha ǀ mitra-mahaḥ ǀ cikitvā́n ǀ tvám ǀ dūtáḥ ǀ kavíḥ ǀ asi ǀ prá-cetāḥ ǁ
Padapatha Transcription Nonaccented
sam-iddhaḥ ǀ adya ǀ manuṣaḥ ǀ duroṇe ǀ devaḥ ǀ devān ǀ yajasi ǀ jāta-vedaḥ ǀ
ā ǀ ca ǀ vaha ǀ mitra-mahaḥ ǀ cikitvān ǀ tvam ǀ dūtaḥ ǀ kaviḥ ǀ asi ǀ pra-cetāḥ ǁ
10.110.02 (Mandala. Sukta. Rik)
8.6.08.02 (Ashtaka. Adhyaya. Varga. Rik)
10.09.113 (Mandala. Anuvāka. Rik)
Samhita Devanagari Accented
तनू॑नपात्प॒थ ऋ॒तस्य॒ याना॒न्मध्वा॑ समं॒जन्त्स्व॑दया सुजिह्व ।
मन्मा॑नि धी॒भिरु॒त य॒ज्ञमृं॒धंदे॑व॒त्रा च॑ कृणुह्यध्व॒रं नः॑ ॥
Samhita Devanagari Nonaccented
तनूनपात्पथ ऋतस्य यानान्मध्वा समंजन्त्स्वदया सुजिह्व ।
मन्मानि धीभिरुत यज्ञमृंधंदेवत्रा च कृणुह्यध्वरं नः ॥
Samhita Transcription Accented
tánūnapātpathá ṛtásya yā́nānmádhvā samañjántsvadayā sujihva ǀ
mánmāni dhībhírutá yajñámṛndhándevatrā́ ca kṛṇuhyadhvarám naḥ ǁ
Samhita Transcription Nonaccented
tanūnapātpatha ṛtasya yānānmadhvā samañjantsvadayā sujihva ǀ
manmāni dhībhiruta yajñamṛndhandevatrā ca kṛṇuhyadhvaram naḥ ǁ
Padapatha Devanagari Accented
तनू॑ऽनपात् । प॒थः । ऋ॒तस्य॑ । याना॑न् । मध्वा॑ । स॒म्ऽअ॒ञ्जन् । स्व॒द॒य॒ । सु॒ऽजि॒ह्व॒ ।
मन्मा॑नि । धी॒भिः । उ॒त । य॒ज्ञम् । ऋ॒न्धन् । दे॒व॒ऽत्रा । च॒ । कृ॒णु॒हि॒ । अ॒ध्व॒रम् । नः॒ ॥
Padapatha Devanagari Nonaccented
तनूऽनपात् । पथः । ऋतस्य । यानान् । मध्वा । सम्ऽअञ्जन् । स्वदय । सुऽजिह्व ।
मन्मानि । धीभिः । उत । यज्ञम् । ऋन्धन् । देवऽत्रा । च । कृणुहि । अध्वरम् । नः ॥
Padapatha Transcription Accented
tánū-napāt ǀ patháḥ ǀ ṛtásya ǀ yā́nān ǀ mádhvā ǀ sam-añján ǀ svadaya ǀ su-jihva ǀ
mánmāni ǀ dhībhíḥ ǀ utá ǀ yajñám ǀ ṛndhán ǀ deva-trā́ ǀ ca ǀ kṛṇuhi ǀ adhvarám ǀ naḥ ǁ
Padapatha Transcription Nonaccented
tanū-napāt ǀ pathaḥ ǀ ṛtasya ǀ yānān ǀ madhvā ǀ sam-añjan ǀ svadaya ǀ su-jihva ǀ
manmāni ǀ dhībhiḥ ǀ uta ǀ yajñam ǀ ṛndhan ǀ deva-trā ǀ ca ǀ kṛṇuhi ǀ adhvaram ǀ naḥ ǁ
10.110.03 (Mandala. Sukta. Rik)
8.6.08.03 (Ashtaka. Adhyaya. Varga. Rik)
10.09.114 (Mandala. Anuvāka. Rik)
Samhita Devanagari Accented
आ॒जुह्वा॑न॒ ईड्यो॒ वंद्य॒श्चा या॑ह्यग्ने॒ वसु॑भिः स॒जोषाः॑ ।
त्वं दे॒वाना॑मसि यह्व॒ होता॒ स ए॑नान्यक्षीषि॒तो यजी॑यान् ॥
Samhita Devanagari Nonaccented
आजुह्वान ईड्यो वंद्यश्चा याह्यग्ने वसुभिः सजोषाः ।
त्वं देवानामसि यह्व होता स एनान्यक्षीषितो यजीयान् ॥
Samhita Transcription Accented
ājúhvāna ī́ḍyo vándyaścā́ yāhyagne vásubhiḥ sajóṣāḥ ǀ
tvám devā́nāmasi yahva hótā sá enānyakṣīṣitó yájīyān ǁ
Samhita Transcription Nonaccented
ājuhvāna īḍyo vandyaścā yāhyagne vasubhiḥ sajoṣāḥ ǀ
tvam devānāmasi yahva hotā sa enānyakṣīṣito yajīyān ǁ
Padapatha Devanagari Accented
आ॒ऽजुह्वा॑नः । ईड्यः॑ । वन्द्यः॑ । च॒ । आ । या॒हि॒ । अ॒ग्ने॒ । वसु॑ऽभिः । स॒ऽजोषाः॑ ।
त्वम् । दे॒वाना॑म् । अ॒सि॒ । य॒ह्व॒ । होता॑ । सः । ए॒ना॒न् । य॒क्षि॒ । इ॒षि॒तः । यजी॑यान् ॥
Padapatha Devanagari Nonaccented
आऽजुह्वानः । ईड्यः । वन्द्यः । च । आ । याहि । अग्ने । वसुऽभिः । सऽजोषाः ।
त्वम् । देवानाम् । असि । यह्व । होता । सः । एनान् । यक्षि । इषितः । यजीयान् ॥
Padapatha Transcription Accented
ā-júhvānaḥ ǀ ī́ḍyaḥ ǀ vándyaḥ ǀ ca ǀ ā́ ǀ yāhi ǀ agne ǀ vásu-bhiḥ ǀ sa-jóṣāḥ ǀ
tvám ǀ devā́nām ǀ asi ǀ yahva ǀ hótā ǀ sáḥ ǀ enān ǀ yakṣi ǀ iṣitáḥ ǀ yájīyān ǁ
Padapatha Transcription Nonaccented
ā-juhvānaḥ ǀ īḍyaḥ ǀ vandyaḥ ǀ ca ǀ ā ǀ yāhi ǀ agne ǀ vasu-bhiḥ ǀ sa-joṣāḥ ǀ
tvam ǀ devānām ǀ asi ǀ yahva ǀ hotā ǀ saḥ ǀ enān ǀ yakṣi ǀ iṣitaḥ ǀ yajīyān ǁ
10.110.04 (Mandala. Sukta. Rik)
8.6.08.04 (Ashtaka. Adhyaya. Varga. Rik)
10.09.115 (Mandala. Anuvāka. Rik)
Samhita Devanagari Accented
प्रा॒चीनं॑ ब॒र्हिः प्र॒दिशा॑ पृथि॒व्या वस्तो॑र॒स्या वृ॑ज्यते॒ अग्रे॒ अह्नां॑ ।
व्यु॑ प्रथते वित॒रं वरी॑यो दे॒वेभ्यो॒ अदि॑तये स्यो॒नं ॥
Samhita Devanagari Nonaccented
प्राचीनं बर्हिः प्रदिशा पृथिव्या वस्तोरस्या वृज्यते अग्रे अह्नां ।
व्यु प्रथते वितरं वरीयो देवेभ्यो अदितये स्योनं ॥
Samhita Transcription Accented
prācī́nam barhíḥ pradíśā pṛthivyā́ vástorasyā́ vṛjyate ágre áhnām ǀ
vyú prathate vitarám várīyo devébhyo áditaye syonám ǁ
Samhita Transcription Nonaccented
prācīnam barhiḥ pradiśā pṛthivyā vastorasyā vṛjyate agre ahnām ǀ
vyu prathate vitaram varīyo devebhyo aditaye syonam ǁ
Padapatha Devanagari Accented
प्रा॒चीन॑म् । ब॒र्हिः । प्र॒ऽदिशा॑ । पृ॒थि॒व्याः । वस्तोः॑ । अ॒स्याः । वृ॒ज्य॒ते॒ । अग्रे॑ । अह्ना॑म् ।
वि । ऊं॒ इति॑ । प्र॒थ॒ते॒ । वि॒ऽत॒रम् । वरी॑यः । दे॒वेभ्यः॑ । अदि॑तये । स्यो॒नम् ॥
Padapatha Devanagari Nonaccented
प्राचीनम् । बर्हिः । प्रऽदिशा । पृथिव्याः । वस्तोः । अस्याः । वृज्यते । अग्रे । अह्नाम् ।
वि । ऊं इति । प्रथते । विऽतरम् । वरीयः । देवेभ्यः । अदितये । स्योनम् ॥
Padapatha Transcription Accented
prācī́nam ǀ barhíḥ ǀ pra-díśā ǀ pṛthivyā́ḥ ǀ vástoḥ ǀ asyā́ḥ ǀ vṛjyate ǀ ágre ǀ áhnām ǀ
ví ǀ ūṃ íti ǀ prathate ǀ vi-tarám ǀ várīyaḥ ǀ devébhyaḥ ǀ áditaye ǀ syonám ǁ
Padapatha Transcription Nonaccented
prācīnam ǀ barhiḥ ǀ pra-diśā ǀ pṛthivyāḥ ǀ vastoḥ ǀ asyāḥ ǀ vṛjyate ǀ agre ǀ ahnām ǀ
vi ǀ ūṃ iti ǀ prathate ǀ vi-taram ǀ varīyaḥ ǀ devebhyaḥ ǀ aditaye ǀ syonam ǁ
10.110.05 (Mandala. Sukta. Rik)
8.6.08.05 (Ashtaka. Adhyaya. Varga. Rik)
10.09.116 (Mandala. Anuvāka. Rik)
Samhita Devanagari Accented
व्यच॑स्वतीरुर्वि॒या वि श्र॑यंतां॒ पति॑भ्यो॒ न जन॑यः॒ शुंभ॑मानाः ।
देवी॑र्द्वारो बृहतीर्विश्वमिन्वा दे॒वेभ्यो॑ भवत सुप्राय॒णाः ॥
Samhita Devanagari Nonaccented
व्यचस्वतीरुर्विया वि श्रयंतां पतिभ्यो न जनयः शुंभमानाः ।
देवीर्द्वारो बृहतीर्विश्वमिन्वा देवेभ्यो भवत सुप्रायणाः ॥
Samhita Transcription Accented
vyácasvatīrurviyā́ ví śrayantām pátibhyo ná jánayaḥ śúmbhamānāḥ ǀ
dévīrdvāro bṛhatīrviśvaminvā devébhyo bhavata suprāyaṇā́ḥ ǁ
Samhita Transcription Nonaccented
vyacasvatīrurviyā vi śrayantām patibhyo na janayaḥ śumbhamānāḥ ǀ
devīrdvāro bṛhatīrviśvaminvā devebhyo bhavata suprāyaṇāḥ ǁ
Padapatha Devanagari Accented
व्यच॑स्वतीः । उ॒र्वि॒या । वि । श्र॒य॒न्ता॒म् । पति॑ऽभ्यः । न । जन॑यः । शुम्भ॑मानाः ।
देवीः॑ । द्वा॒रः॒ । बृ॒ह॒तीः॒ । वि॒श्व॒म्ऽइ॒न्वाः॒ । दे॒वेभ्यः॑ । भ॒व॒त॒ । सु॒प्र॒ऽअ॒य॒नाः ॥
Padapatha Devanagari Nonaccented
व्यचस्वतीः । उर्विया । वि । श्रयन्ताम् । पतिऽभ्यः । न । जनयः । शुम्भमानाः ।
देवीः । द्वारः । बृहतीः । विश्वम्ऽइन्वाः । देवेभ्यः । भवत । सुप्रऽअयनाः ॥
Padapatha Transcription Accented
vyácasvatīḥ ǀ urviyā́ ǀ ví ǀ śrayantām ǀ páti-bhyaḥ ǀ ná ǀ jánayaḥ ǀ śúmbhamānāḥ ǀ
dévīḥ ǀ dvāraḥ ǀ bṛhatīḥ ǀ viśvam-invāḥ ǀ devébhyaḥ ǀ bhavata ǀ supra-ayanā́ḥ ǁ
Padapatha Transcription Nonaccented
vyacasvatīḥ ǀ urviyā ǀ vi ǀ śrayantām ǀ pati-bhyaḥ ǀ na ǀ janayaḥ ǀ śumbhamānāḥ ǀ
devīḥ ǀ dvāraḥ ǀ bṛhatīḥ ǀ viśvam-invāḥ ǀ devebhyaḥ ǀ bhavata ǀ supra-ayanāḥ ǁ
10.110.06 (Mandala. Sukta. Rik)
8.6.09.01 (Ashtaka. Adhyaya. Varga. Rik)
10.09.117 (Mandala. Anuvāka. Rik)
Samhita Devanagari Accented
आ सु॒ष्वयं॑ती यज॒ते उपा॑के उ॒षासा॒नक्ता॑ सदतां॒ नि योनौ॑ ।
दि॒व्ये योष॑णे बृह॒ती सु॑रु॒क्मे अधि॒ श्रियं॑ शुक्र॒पिशं॒ दधा॑ने ॥
Samhita Devanagari Nonaccented
आ सुष्वयंती यजते उपाके उषासानक्ता सदतां नि योनौ ।
दिव्ये योषणे बृहती सुरुक्मे अधि श्रियं शुक्रपिशं दधाने ॥
Samhita Transcription Accented
ā́ suṣváyantī yajaté úpāke uṣā́sānáktā sadatām ní yónau ǀ
divyé yóṣaṇe bṛhatī́ surukmé ádhi śríyam śukrapíśam dádhāne ǁ
Samhita Transcription Nonaccented
ā suṣvayantī yajate upāke uṣāsānaktā sadatām ni yonau ǀ
divye yoṣaṇe bṛhatī surukme adhi śriyam śukrapiśam dadhāne ǁ
Padapatha Devanagari Accented
आ । सु॒स्वय॑न्ती॒ इति॑ । य॒ज॒ते इति॑ । उपा॑के॒ इति॑ । उ॒षसा॒नक्ता॑ । स॒द॒ता॒म् । नि । योनौ॑ ।
दि॒व्ये इति॑ । योष॑णे॒ इति॑ । बृ॒ह॒ती इति॑ । सु॒रु॒क्मे इति॑ सु॒ऽरु॒क्मे । अधि॑ । श्रिय॑म् । शु॒क्र॒ऽपिश॑म् । दधा॑ने॒ इति॑ ॥
Padapatha Devanagari Nonaccented
आ । सुस्वयन्ती इति । यजते इति । उपाके इति । उषसानक्ता । सदताम् । नि । योनौ ।
दिव्ये इति । योषणे इति । बृहती इति । सुरुक्मे इति सुऽरुक्मे । अधि । श्रियम् । शुक्रऽपिशम् । दधाने इति ॥
Padapatha Transcription Accented
ā́ ǀ susváyantī íti ǀ yajaté íti ǀ úpāke íti ǀ uṣásānáktā ǀ sadatām ǀ ní ǀ yónau ǀ
divyé íti ǀ yóṣaṇe íti ǀ bṛhatī́ íti ǀ surukmé íti su-rukmé ǀ ádhi ǀ śríyam ǀ śukra-píśam ǀ dádhāne íti ǁ
Padapatha Transcription Nonaccented
ā ǀ susvayantī iti ǀ yajate iti ǀ upāke iti ǀ uṣasānaktā ǀ sadatām ǀ ni ǀ yonau ǀ
divye iti ǀ yoṣaṇe iti ǀ bṛhatī iti ǀ surukme iti su-rukme ǀ adhi ǀ śriyam ǀ śukra-piśam ǀ dadhāne iti ǁ
10.110.07 (Mandala. Sukta. Rik)
8.6.09.02 (Ashtaka. Adhyaya. Varga. Rik)
10.09.118 (Mandala. Anuvāka. Rik)
Samhita Devanagari Accented
दैव्या॒ होता॑रा प्रथ॒मा सु॒वाचा॒ मिमा॑ना य॒ज्ञं मनु॑षो॒ यज॑ध्यै ।
प्र॒चो॒दयं॑ता वि॒दथे॑षु का॒रू प्रा॒चीनं॒ ज्योतिः॑ प्र॒दिशा॑ दि॒शंता॑ ॥
Samhita Devanagari Nonaccented
दैव्या होतारा प्रथमा सुवाचा मिमाना यज्ञं मनुषो यजध्यै ।
प्रचोदयंता विदथेषु कारू प्राचीनं ज्योतिः प्रदिशा दिशंता ॥
Samhita Transcription Accented
dáivyā hótārā prathamā́ suvā́cā mímānā yajñám mánuṣo yájadhyai ǀ
pracodáyantā vidátheṣu kārū́ prācī́nam jyótiḥ pradíśā diśántā ǁ
Samhita Transcription Nonaccented
daivyā hotārā prathamā suvācā mimānā yajñam manuṣo yajadhyai ǀ
pracodayantā vidatheṣu kārū prācīnam jyotiḥ pradiśā diśantā ǁ
Padapatha Devanagari Accented
दैव्या॑ । होता॑रा । प्र॒थ॒मा । सु॒ऽवाचा॑ । मिमा॑ना । य॒ज्ञम् । मनु॑षः । यज॑ध्यै ।
प्र॒ऽचो॒दय॑न्ता । वि॒दथे॑षु । का॒रू इति॑ । प्रा॒चीन॑म् । ज्योतिः॑ । प्र॒ऽदिशा॑ । दि॒शन्ता॑ ॥
Padapatha Devanagari Nonaccented
दैव्या । होतारा । प्रथमा । सुऽवाचा । मिमाना । यज्ञम् । मनुषः । यजध्यै ।
प्रऽचोदयन्ता । विदथेषु । कारू इति । प्राचीनम् । ज्योतिः । प्रऽदिशा । दिशन्ता ॥
Padapatha Transcription Accented
dáivyā ǀ hótārā ǀ prathamā́ ǀ su-vā́cā ǀ mímānā ǀ yajñám ǀ mánuṣaḥ ǀ yájadhyai ǀ
pra-codáyantā ǀ vidátheṣu ǀ kārū́ íti ǀ prācī́nam ǀ jyótiḥ ǀ pra-díśā ǀ diśántā ǁ
Padapatha Transcription Nonaccented
daivyā ǀ hotārā ǀ prathamā ǀ su-vācā ǀ mimānā ǀ yajñam ǀ manuṣaḥ ǀ yajadhyai ǀ
pra-codayantā ǀ vidatheṣu ǀ kārū iti ǀ prācīnam ǀ jyotiḥ ǀ pra-diśā ǀ diśantā ǁ
10.110.08 (Mandala. Sukta. Rik)
8.6.09.03 (Ashtaka. Adhyaya. Varga. Rik)
10.09.119 (Mandala. Anuvāka. Rik)
Samhita Devanagari Accented
आ नो॑ य॒ज्ञं भार॑ती॒ तूय॑मे॒त्विळा॑ मनु॒ष्वदि॒ह चे॒तयं॑ती ।
ति॒स्रो दे॒वीर्ब॒र्हिरेदं स्यो॒नं सर॑स्वती॒ स्वप॑सः सदंतु ॥
Samhita Devanagari Nonaccented
आ नो यज्ञं भारती तूयमेत्विळा मनुष्वदिह चेतयंती ।
तिस्रो देवीर्बर्हिरेदं स्योनं सरस्वती स्वपसः सदंतु ॥
Samhita Transcription Accented
ā́ no yajñám bhā́ratī tū́yametvíḷā manuṣvádihá cetáyantī ǀ
tisró devī́rbarhírédám syonám sárasvatī svápasaḥ sadantu ǁ
Samhita Transcription Nonaccented
ā no yajñam bhāratī tūyametviḷā manuṣvadiha cetayantī ǀ
tisro devīrbarhiredam syonam sarasvatī svapasaḥ sadantu ǁ
Padapatha Devanagari Accented
आ । नः॒ । य॒ज्ञम् । भार॑ती । तूय॑म् । ए॒तु॒ । इळा॑ । म॒नु॒ष्वत् । इ॒ह । चे॒तय॑न्ती ।
ति॒स्रः । दे॒वीः । ब॒र्हिः । आ । इ॒दम् । स्यो॒नम् । सर॑स्वती । सु॒ऽअप॑सः । स॒द॒न्तु॒ ॥
Padapatha Devanagari Nonaccented
आ । नः । यज्ञम् । भारती । तूयम् । एतु । इळा । मनुष्वत् । इह । चेतयन्ती ।
तिस्रः । देवीः । बर्हिः । आ । इदम् । स्योनम् । सरस्वती । सुऽअपसः । सदन्तु ॥
Padapatha Transcription Accented
ā́ ǀ naḥ ǀ yajñám ǀ bhā́ratī ǀ tū́yam ǀ etu ǀ íḷā ǀ manuṣvát ǀ ihá ǀ cetáyantī ǀ
tisráḥ ǀ devī́ḥ ǀ barhíḥ ǀ ā́ ǀ idám ǀ syonám ǀ sárasvatī ǀ su-ápasaḥ ǀ sadantu ǁ
Padapatha Transcription Nonaccented
ā ǀ naḥ ǀ yajñam ǀ bhāratī ǀ tūyam ǀ etu ǀ iḷā ǀ manuṣvat ǀ iha ǀ cetayantī ǀ
tisraḥ ǀ devīḥ ǀ barhiḥ ǀ ā ǀ idam ǀ syonam ǀ sarasvatī ǀ su-apasaḥ ǀ sadantu ǁ
10.110.09 (Mandala. Sukta. Rik)
8.6.09.04 (Ashtaka. Adhyaya. Varga. Rik)
10.09.120 (Mandala. Anuvāka. Rik)
Samhita Devanagari Accented
य इ॒मे द्यावा॑पृथि॒वी जनि॑त्री रू॒पैरपिं॑श॒द्भुव॑नानि॒ विश्वा॑ ।
तम॒द्य हो॑तरिषि॒तो यजी॑यांदे॒वं त्वष्टा॑रमि॒ह य॑क्षि वि॒द्वान् ॥
Samhita Devanagari Nonaccented
य इमे द्यावापृथिवी जनित्री रूपैरपिंशद्भुवनानि विश्वा ।
तमद्य होतरिषितो यजीयांदेवं त्वष्टारमिह यक्षि विद्वान् ॥
Samhita Transcription Accented
yá imé dyā́vāpṛthivī́ jánitrī rūpáirápiṃśadbhúvanāni víśvā ǀ
támadyá hotariṣitó yájīyāndevám tváṣṭāramihá yakṣi vidvā́n ǁ
Samhita Transcription Nonaccented
ya ime dyāvāpṛthivī janitrī rūpairapiṃśadbhuvanāni viśvā ǀ
tamadya hotariṣito yajīyāndevam tvaṣṭāramiha yakṣi vidvān ǁ
Padapatha Devanagari Accented
यः । इ॒मे इति॑ । द्यावा॑पृथि॒वी इति॑ । जनि॑त्री॒ इति॑ । रू॒पैः । अपिं॑शत् । भुव॑नानि । विश्वा॑ ।
तम् । अ॒द्य । हो॒तः॒ । इ॒षि॒तः । यजी॑यान् । दे॒वम् । त्वष्टा॑रम् । इ॒ह । य॒क्षि॒ । वि॒द्वान् ॥
Padapatha Devanagari Nonaccented
यः । इमे इति । द्यावापृथिवी इति । जनित्री इति । रूपैः । अपिंशत् । भुवनानि । विश्वा ।
तम् । अद्य । होतः । इषितः । यजीयान् । देवम् । त्वष्टारम् । इह । यक्षि । विद्वान् ॥
Padapatha Transcription Accented
yáḥ ǀ imé íti ǀ dyā́vāpṛthivī́ íti ǀ jánitrī íti ǀ rūpáiḥ ǀ ápiṃśat ǀ bhúvanāni ǀ víśvā ǀ
tám ǀ adyá ǀ hotaḥ ǀ iṣitáḥ ǀ yájīyān ǀ devám ǀ tváṣṭāram ǀ ihá ǀ yakṣi ǀ vidvā́n ǁ
Padapatha Transcription Nonaccented
yaḥ ǀ ime iti ǀ dyāvāpṛthivī iti ǀ janitrī iti ǀ rūpaiḥ ǀ apiṃśat ǀ bhuvanāni ǀ viśvā ǀ
tam ǀ adya ǀ hotaḥ ǀ iṣitaḥ ǀ yajīyān ǀ devam ǀ tvaṣṭāram ǀ iha ǀ yakṣi ǀ vidvān ǁ
10.110.10 (Mandala. Sukta. Rik)
8.6.09.05 (Ashtaka. Adhyaya. Varga. Rik)
10.09.121 (Mandala. Anuvāka. Rik)
Samhita Devanagari Accented
उ॒पाव॑सृज॒ त्मन्या॑ समं॒जंदे॒वानां॒ पाथ॑ ऋतु॒था ह॒वींषि॑ ।
वन॒स्पतिः॑ शमि॒ता दे॒वो अ॒ग्निः स्वदं॑तु ह॒व्यं मधु॑ना घृ॒तेन॑ ॥
Samhita Devanagari Nonaccented
उपावसृज त्मन्या समंजंदेवानां पाथ ऋतुथा हवींषि ।
वनस्पतिः शमिता देवो अग्निः स्वदंतु हव्यं मधुना घृतेन ॥
Samhita Transcription Accented
upā́vasṛja tmányā samañjándevā́nām pā́tha ṛtuthā́ havī́ṃṣi ǀ
vánaspátiḥ śamitā́ devó agníḥ svádantu havyám mádhunā ghṛténa ǁ
Samhita Transcription Nonaccented
upāvasṛja tmanyā samañjandevānām pātha ṛtuthā havīṃṣi ǀ
vanaspatiḥ śamitā devo agniḥ svadantu havyam madhunā ghṛtena ǁ
Padapatha Devanagari Accented
उ॒प॒ऽअव॑सृज । त्मन्या॑ । स॒म्ऽअ॒ञ्जन् । दे॒वाना॑म् । पाथः॑ । ऋ॒तु॒ऽथा । ह॒वींषि॑ ।
वन॒स्पतिः॑ । श॒मि॒ता । दे॒वः । अ॒ग्निः । स्वद॑न्तु । ह॒व्यम् । मधु॑ना । घृ॒तेन॑ ॥
Padapatha Devanagari Nonaccented
उपऽअवसृज । त्मन्या । सम्ऽअञ्जन् । देवानाम् । पाथः । ऋतुऽथा । हवींषि ।
वनस्पतिः । शमिता । देवः । अग्निः । स्वदन्तु । हव्यम् । मधुना । घृतेन ॥
Padapatha Transcription Accented
upa-ávasṛja ǀ tmányā ǀ sam-añján ǀ devā́nām ǀ pā́thaḥ ǀ ṛtu-thā́ ǀ havī́ṃṣi ǀ
vánaspátiḥ ǀ śamitā́ ǀ deváḥ ǀ agníḥ ǀ svádantu ǀ havyám ǀ mádhunā ǀ ghṛténa ǁ
Padapatha Transcription Nonaccented
upa-avasṛja ǀ tmanyā ǀ sam-añjan ǀ devānām ǀ pāthaḥ ǀ ṛtu-thā ǀ havīṃṣi ǀ
vanaspatiḥ ǀ śamitā ǀ devaḥ ǀ agniḥ ǀ svadantu ǀ havyam ǀ madhunā ǀ ghṛtena ǁ
10.110.11 (Mandala. Sukta. Rik)
8.6.09.06 (Ashtaka. Adhyaya. Varga. Rik)
10.09.122 (Mandala. Anuvāka. Rik)
Samhita Devanagari Accented
स॒द्यो जा॒तो व्य॑मिमीत य॒ज्ञम॒ग्निर्दे॒वाना॑मभवत्पुरो॒गाः ।
अ॒स्य होतुः॑ प्र॒दिश्यृ॒तस्य॑ वा॒चि स्वाहा॑कृतं ह॒विर॑दंतु दे॒वाः ॥
Samhita Devanagari Nonaccented
सद्यो जातो व्यमिमीत यज्ञमग्निर्देवानामभवत्पुरोगाः ।
अस्य होतुः प्रदिश्यृतस्य वाचि स्वाहाकृतं हविरदंतु देवाः ॥
Samhita Transcription Accented
sadyó jātó vyámimīta yajñámagnírdevā́nāmabhavatpurogā́ḥ ǀ
asyá hótuḥ pradíśyṛtásya vācí svā́hākṛtam havíradantu devā́ḥ ǁ
Samhita Transcription Nonaccented
sadyo jāto vyamimīta yajñamagnirdevānāmabhavatpurogāḥ ǀ
asya hotuḥ pradiśyṛtasya vāci svāhākṛtam haviradantu devāḥ ǁ
Padapatha Devanagari Accented
स॒द्यः । जा॒तः । वि । अ॒मि॒मी॒त॒ । य॒ज्ञम् । अ॒ग्निः । दे॒वाना॑म् । अ॒भ॒व॒त् । पु॒रः॒ऽगाः ।
अ॒स्य । होतुः॑ । प्र॒ऽदिशि॑ । ऋ॒तस्य॑ । वा॒चि । स्वाहा॑ऽकृतम् । ह॒विः । अ॒द॒न्तु॒ । दे॒वाः ॥
Padapatha Devanagari Nonaccented
सद्यः । जातः । वि । अमिमीत । यज्ञम् । अग्निः । देवानाम् । अभवत् । पुरःऽगाः ।
अस्य । होतुः । प्रऽदिशि । ऋतस्य । वाचि । स्वाहाऽकृतम् । हविः । अदन्तु । देवाः ॥
Padapatha Transcription Accented
sadyáḥ ǀ jātáḥ ǀ ví ǀ amimīta ǀ yajñám ǀ agníḥ ǀ devā́nām ǀ abhavat ǀ puraḥ-gā́ḥ ǀ
asyá ǀ hótuḥ ǀ pra-díśi ǀ ṛtásya ǀ vācí ǀ svā́hā-kṛtam ǀ havíḥ ǀ adantu ǀ devā́ḥ ǁ
Padapatha Transcription Nonaccented
sadyaḥ ǀ jātaḥ ǀ vi ǀ amimīta ǀ yajñam ǀ agniḥ ǀ devānām ǀ abhavat ǀ puraḥ-gāḥ ǀ
asya ǀ hotuḥ ǀ pra-diśi ǀ ṛtasya ǀ vāci ǀ svāhā-kṛtam ǀ haviḥ ǀ adantu ǀ devāḥ ǁ