|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 113
|
1. Info |
| To: | indra | |
| From: | śataprabhedana vairūpa | |
| Metres: | 1st set of styles: virāḍjagatī (2, 6, 9); jagatī (1, 5); svarāḍārcījagatī (7, 8); nicṛjjagatī (3); pādanicṛjjgatī (4); pādanicṛttriṣṭup (10) 2nd set of styles: jagatī (1-9); triṣṭubh (10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.113.01 (Mandala. Sukta. Rik)
8.6.14.01 (Ashtaka. Adhyaya. Varga. Rik)
10.10.001 (Mandala. Anuvāka. Rik)
Samhita Devanagari Accented
तम॑स्य॒ द्यावा॑पृथि॒वी सचे॑तसा॒ विश्वे॑भिर्दे॒वैरनु॒ शुष्म॑मावतां ।
यदैत्कृ॑ण्वा॒नो म॑हि॒मान॑मिंद्रि॒यं पी॒त्वी सोम॑स्य॒ क्रतु॑माँ अवर्धत ॥
Samhita Devanagari Nonaccented
तमस्य द्यावापृथिवी सचेतसा विश्वेभिर्देवैरनु शुष्ममावतां ।
यदैत्कृण्वानो महिमानमिंद्रियं पीत्वी सोमस्य क्रतुमाँ अवर्धत ॥
Samhita Transcription Accented
támasya dyā́vāpṛthivī́ sácetasā víśvebhirdeváiránu śúṣmamāvatām ǀ
yádáitkṛṇvānó mahimā́namindriyám pītvī́ sómasya krátumām̐ avardhata ǁ
Samhita Transcription Nonaccented
tamasya dyāvāpṛthivī sacetasā viśvebhirdevairanu śuṣmamāvatām ǀ
yadaitkṛṇvāno mahimānamindriyam pītvī somasya kratumām̐ avardhata ǁ
Padapatha Devanagari Accented
तम् । अ॒स्य॒ । द्यावा॑पृथि॒वी इति॑ । सऽचे॑तसा । विश्वे॑भिः । दे॒वैः । अनु॑ । शुष्म॑म् । आ॒व॒ता॒म् ।
यत् । ऐत् । कृ॒ण्वा॒नः । म॒हि॒मान॑म् । इ॒न्द्रि॒यम् । पी॒त्वी । सोम॑स्य । क्रतु॑ऽमान् । अ॒व॒र्ध॒त॒ ॥
Padapatha Devanagari Nonaccented
तम् । अस्य । द्यावापृथिवी इति । सऽचेतसा । विश्वेभिः । देवैः । अनु । शुष्मम् । आवताम् ।
यत् । ऐत् । कृण्वानः । महिमानम् । इन्द्रियम् । पीत्वी । सोमस्य । क्रतुऽमान् । अवर्धत ॥
Padapatha Transcription Accented
tám ǀ asya ǀ dyā́vāpṛthivī́ íti ǀ sá-cetasā ǀ víśvebhiḥ ǀ deváiḥ ǀ ánu ǀ śúṣmam ǀ āvatām ǀ
yát ǀ áit ǀ kṛṇvānáḥ ǀ mahimā́nam ǀ indriyám ǀ pītvī́ ǀ sómasya ǀ krátu-mān ǀ avardhata ǁ
Padapatha Transcription Nonaccented
tam ǀ asya ǀ dyāvāpṛthivī iti ǀ sa-cetasā ǀ viśvebhiḥ ǀ devaiḥ ǀ anu ǀ śuṣmam ǀ āvatām ǀ
yat ǀ ait ǀ kṛṇvānaḥ ǀ mahimānam ǀ indriyam ǀ pītvī ǀ somasya ǀ kratu-mān ǀ avardhata ǁ
10.113.02 (Mandala. Sukta. Rik)
8.6.14.02 (Ashtaka. Adhyaya. Varga. Rik)
10.10.002 (Mandala. Anuvāka. Rik)
Samhita Devanagari Accented
तम॑स्य॒ विष्णु॑र्महि॒मान॒मोज॑सां॒शुं द॑ध॒न्वान्मधु॑नो॒ वि र॑प्शते ।
दे॒वेभि॒रिंद्रो॑ म॒घवा॑ स॒याव॑भिर्वृ॒त्रं ज॑घ॒न्वाँ अ॑भव॒द्वरे॑ण्यः ॥
Samhita Devanagari Nonaccented
तमस्य विष्णुर्महिमानमोजसांशुं दधन्वान्मधुनो वि रप्शते ।
देवेभिरिंद्रो मघवा सयावभिर्वृत्रं जघन्वाँ अभवद्वरेण्यः ॥
Samhita Transcription Accented
támasya víṣṇurmahimā́namójasāṃśúm dadhanvā́nmádhuno ví rapśate ǀ
devébhiríndro maghávā sayā́vabhirvṛtrám jaghanvā́m̐ abhavadváreṇyaḥ ǁ
Samhita Transcription Nonaccented
tamasya viṣṇurmahimānamojasāṃśum dadhanvānmadhuno vi rapśate ǀ
devebhirindro maghavā sayāvabhirvṛtram jaghanvām̐ abhavadvareṇyaḥ ǁ
Padapatha Devanagari Accented
तम् । अ॒स्य॒ । विष्णुः॑ । म॒हि॒मान॑म् । ओज॑सा । अं॒शुम् । द॒ध॒न्वान् । मधु॑नः । वि । र॒प्श॒ते॒ ।
दे॒वेभिः॑ । इन्द्रः॑ । म॒घऽवा॑ । स॒याव॑ऽभिः । वृ॒त्रम् । ज॒घ॒न्वान् । अ॒भ॒व॒त् । वरे॑ण्यः ॥
Padapatha Devanagari Nonaccented
तम् । अस्य । विष्णुः । महिमानम् । ओजसा । अंशुम् । दधन्वान् । मधुनः । वि । रप्शते ।
देवेभिः । इन्द्रः । मघऽवा । सयावऽभिः । वृत्रम् । जघन्वान् । अभवत् । वरेण्यः ॥
Padapatha Transcription Accented
tám ǀ asya ǀ víṣṇuḥ ǀ mahimā́nam ǀ ójasā ǀ aṃśúm ǀ dadhanvā́n ǀ mádhunaḥ ǀ ví ǀ rapśate ǀ
devébhiḥ ǀ índraḥ ǀ maghá-vā ǀ sayā́va-bhiḥ ǀ vṛtrám ǀ jaghanvā́n ǀ abhavat ǀ váreṇyaḥ ǁ
Padapatha Transcription Nonaccented
tam ǀ asya ǀ viṣṇuḥ ǀ mahimānam ǀ ojasā ǀ aṃśum ǀ dadhanvān ǀ madhunaḥ ǀ vi ǀ rapśate ǀ
devebhiḥ ǀ indraḥ ǀ magha-vā ǀ sayāva-bhiḥ ǀ vṛtram ǀ jaghanvān ǀ abhavat ǀ vareṇyaḥ ǁ
10.113.03 (Mandala. Sukta. Rik)
8.6.14.03 (Ashtaka. Adhyaya. Varga. Rik)
10.10.003 (Mandala. Anuvāka. Rik)
Samhita Devanagari Accented
वृ॒त्रेण॒ यदहि॑ना॒ बिभ्र॒दायु॑धा स॒मस्थि॑था यु॒धये॒ शंस॑मा॒विदे॑ ।
विश्वे॑ ते॒ अत्र॑ म॒रुतः॑ स॒ह त्मनाव॑र्धन्नुग्र महि॒मान॑मिंद्रि॒यं ॥
Samhita Devanagari Nonaccented
वृत्रेण यदहिना बिभ्रदायुधा समस्थिथा युधये शंसमाविदे ।
विश्वे ते अत्र मरुतः सह त्मनावर्धन्नुग्र महिमानमिंद्रियं ॥
Samhita Transcription Accented
vṛtréṇa yádáhinā bíbhradā́yudhā samásthithā yudháye śáṃsamāvíde ǀ
víśve te átra marútaḥ sahá tmánā́vardhannugra mahimā́namindriyám ǁ
Samhita Transcription Nonaccented
vṛtreṇa yadahinā bibhradāyudhā samasthithā yudhaye śaṃsamāvide ǀ
viśve te atra marutaḥ saha tmanāvardhannugra mahimānamindriyam ǁ
Padapatha Devanagari Accented
वृ॒त्रेण॑ । यत् । अहि॑ना । बिभ्र॑त् । आयु॑धा । स॒म्ऽअस्थि॑थाः । यु॒धये॑ । शंस॑म् । आ॒ऽविदे॑ ।
विश्वे॑ । ते॒ । अत्र॑ । म॒रुतः॑ । स॒ह । त्मना॑ । अव॑र्धन् । उ॒ग्र॒ । म॒हि॒मान॑म् । इ॒न्द्रि॒यम् ॥
Padapatha Devanagari Nonaccented
वृत्रेण । यत् । अहिना । बिभ्रत् । आयुधा । सम्ऽअस्थिथाः । युधये । शंसम् । आऽविदे ।
विश्वे । ते । अत्र । मरुतः । सह । त्मना । अवर्धन् । उग्र । महिमानम् । इन्द्रियम् ॥
Padapatha Transcription Accented
vṛtréṇa ǀ yát ǀ áhinā ǀ bíbhrat ǀ ā́yudhā ǀ sam-ásthithāḥ ǀ yudháye ǀ śáṃsam ǀ ā-víde ǀ
víśve ǀ te ǀ átra ǀ marútaḥ ǀ sahá ǀ tmánā ǀ ávardhan ǀ ugra ǀ mahimā́nam ǀ indriyám ǁ
Padapatha Transcription Nonaccented
vṛtreṇa ǀ yat ǀ ahinā ǀ bibhrat ǀ āyudhā ǀ sam-asthithāḥ ǀ yudhaye ǀ śaṃsam ǀ ā-vide ǀ
viśve ǀ te ǀ atra ǀ marutaḥ ǀ saha ǀ tmanā ǀ avardhan ǀ ugra ǀ mahimānam ǀ indriyam ǁ
10.113.04 (Mandala. Sukta. Rik)
8.6.14.04 (Ashtaka. Adhyaya. Varga. Rik)
10.10.004 (Mandala. Anuvāka. Rik)
Samhita Devanagari Accented
ज॒ज्ञा॒न ए॒व व्य॑बाधत॒ स्पृधः॒ प्राप॑श्यद्वी॒रो अ॒भि पौंस्यं॒ रणं॑ ।
अवृ॑श्च॒दद्रि॒मव॑ स॒स्यदः॑ सृज॒दस्त॑भ्ना॒न्नाकं॑ स्वप॒स्यया॑ पृ॒थुं ॥
Samhita Devanagari Nonaccented
जज्ञान एव व्यबाधत स्पृधः प्रापश्यद्वीरो अभि पौंस्यं रणं ।
अवृश्चदद्रिमव सस्यदः सृजदस्तभ्नान्नाकं स्वपस्यया पृथुं ॥
Samhita Transcription Accented
jajñāná evá vyábādhata spṛ́dhaḥ prā́paśyadvīró abhí páuṃsyam ráṇam ǀ
ávṛścadádrimáva sasyádaḥ sṛjadástabhnānnā́kam svapasyáyā pṛthúm ǁ
Samhita Transcription Nonaccented
jajñāna eva vyabādhata spṛdhaḥ prāpaśyadvīro abhi pauṃsyam raṇam ǀ
avṛścadadrimava sasyadaḥ sṛjadastabhnānnākam svapasyayā pṛthum ǁ
Padapatha Devanagari Accented
ज॒ज्ञा॒नः । ए॒व । वि । अ॒बा॒ध॒त॒ । स्पृधः॑ । प्र । अ॒प॒श्य॒त् । वी॒रः । अ॒भि । पौंस्य॑म् । रण॑म् ।
अवृ॑श्चत् । अद्रि॑म् । अव॑ । स॒ऽस्यदः॑ । सृ॒ज॒त् । अस्त॑भ्नात् । नाक॑म् । सु॒ऽअ॒प॒स्यया॑ । पृ॒थुम् ॥
Padapatha Devanagari Nonaccented
जज्ञानः । एव । वि । अबाधत । स्पृधः । प्र । अपश्यत् । वीरः । अभि । पौंस्यम् । रणम् ।
अवृश्चत् । अद्रिम् । अव । सऽस्यदः । सृजत् । अस्तभ्नात् । नाकम् । सुऽअपस्यया । पृथुम् ॥
Padapatha Transcription Accented
jajñānáḥ ǀ evá ǀ ví ǀ abādhata ǀ spṛ́dhaḥ ǀ prá ǀ apaśyat ǀ vīráḥ ǀ abhí ǀ páuṃsyam ǀ ráṇam ǀ
ávṛścat ǀ ádrim ǀ áva ǀ sa-syádaḥ ǀ sṛjat ǀ ástabhnāt ǀ nā́kam ǀ su-apasyáyā ǀ pṛthúm ǁ
Padapatha Transcription Nonaccented
jajñānaḥ ǀ eva ǀ vi ǀ abādhata ǀ spṛdhaḥ ǀ pra ǀ apaśyat ǀ vīraḥ ǀ abhi ǀ pauṃsyam ǀ raṇam ǀ
avṛścat ǀ adrim ǀ ava ǀ sa-syadaḥ ǀ sṛjat ǀ astabhnāt ǀ nākam ǀ su-apasyayā ǀ pṛthum ǁ
10.113.05 (Mandala. Sukta. Rik)
8.6.14.05 (Ashtaka. Adhyaya. Varga. Rik)
10.10.005 (Mandala. Anuvāka. Rik)
Samhita Devanagari Accented
आदिंद्रः॑ स॒त्रा तवि॑षीरपत्यत॒ वरी॑यो॒ द्यावा॑पृथि॒वी अ॑बाधत ।
अवा॑भरद्धृषि॒तो वज्र॑माय॒सं शेवं॑ मि॒त्राय॒ वरु॑णाय दा॒शुषे॑ ॥
Samhita Devanagari Nonaccented
आदिंद्रः सत्रा तविषीरपत्यत वरीयो द्यावापृथिवी अबाधत ।
अवाभरद्धृषितो वज्रमायसं शेवं मित्राय वरुणाय दाशुषे ॥
Samhita Transcription Accented
ā́díndraḥ satrā́ táviṣīrapatyata várīyo dyā́vāpṛthivī́ abādhata ǀ
ávābharaddhṛṣitó vájramāyasám śévam mitrā́ya váruṇāya dāśúṣe ǁ
Samhita Transcription Nonaccented
ādindraḥ satrā taviṣīrapatyata varīyo dyāvāpṛthivī abādhata ǀ
avābharaddhṛṣito vajramāyasam śevam mitrāya varuṇāya dāśuṣe ǁ
Padapatha Devanagari Accented
आत् । इन्द्रः॑ । स॒त्रा । तवि॑षीः । अ॒प॒त्य॒त॒ । वरी॑यः । द्यावा॑पृथि॒वी इति॑ । अ॒बा॒ध॒त॒ ।
अव॑ । अ॒भ॒र॒त् । धृ॒षि॒तः । वज्र॑म् । आ॒य॒सम् । शेव॑म् । मि॒त्राय॑ । वरु॑णाय । दा॒शुषे॑ ॥
Padapatha Devanagari Nonaccented
आत् । इन्द्रः । सत्रा । तविषीः । अपत्यत । वरीयः । द्यावापृथिवी इति । अबाधत ।
अव । अभरत् । धृषितः । वज्रम् । आयसम् । शेवम् । मित्राय । वरुणाय । दाशुषे ॥
Padapatha Transcription Accented
ā́t ǀ índraḥ ǀ satrā́ ǀ táviṣīḥ ǀ apatyata ǀ várīyaḥ ǀ dyā́vāpṛthivī́ íti ǀ abādhata ǀ
áva ǀ abharat ǀ dhṛṣitáḥ ǀ vájram ǀ āyasám ǀ śévam ǀ mitrā́ya ǀ váruṇāya ǀ dāśúṣe ǁ
Padapatha Transcription Nonaccented
āt ǀ indraḥ ǀ satrā ǀ taviṣīḥ ǀ apatyata ǀ varīyaḥ ǀ dyāvāpṛthivī iti ǀ abādhata ǀ
ava ǀ abharat ǀ dhṛṣitaḥ ǀ vajram ǀ āyasam ǀ śevam ǀ mitrāya ǀ varuṇāya ǀ dāśuṣe ǁ
10.113.06 (Mandala. Sukta. Rik)
8.6.15.01 (Ashtaka. Adhyaya. Varga. Rik)
10.10.006 (Mandala. Anuvāka. Rik)
Samhita Devanagari Accented
इंद्र॒स्यात्र॒ तवि॑षीभ्यो विर॒प्शिन॑ ऋघाय॒तो अ॑रंहयंत म॒न्यवे॑ ।
वृ॒त्रं यदु॒ग्रो व्यवृ॑श्च॒दोज॑सा॒पो बिभ्र॑तं॒ तम॑सा॒ परी॑वृतं ॥
Samhita Devanagari Nonaccented
इंद्रस्यात्र तविषीभ्यो विरप्शिन ऋघायतो अरंहयंत मन्यवे ।
वृत्रं यदुग्रो व्यवृश्चदोजसापो बिभ्रतं तमसा परीवृतं ॥
Samhita Transcription Accented
índrasyā́tra táviṣībhyo virapśína ṛghāyató araṃhayanta manyáve ǀ
vṛtrám yádugró vyávṛścadójasāpó bíbhratam támasā párīvṛtam ǁ
Samhita Transcription Nonaccented
indrasyātra taviṣībhyo virapśina ṛghāyato araṃhayanta manyave ǀ
vṛtram yadugro vyavṛścadojasāpo bibhratam tamasā parīvṛtam ǁ
Padapatha Devanagari Accented
इन्द्र॑स्य । अत्र॑ । तवि॑षीभ्यः । वि॒ऽर॒प्शिनः॑ । ऋ॒घा॒य॒तः । अ॒रं॒ह॒य॒न्त॒ । म॒न्यवे॑ ।
वृ॒त्रम् । यत् । उ॒ग्रः । वि । अवृ॑श्चत् । ओज॑सा । अ॒पः । बिभ्र॑तम् । तम॑सा । परि॑ऽवृतम् ॥
Padapatha Devanagari Nonaccented
इन्द्रस्य । अत्र । तविषीभ्यः । विऽरप्शिनः । ऋघायतः । अरंहयन्त । मन्यवे ।
वृत्रम् । यत् । उग्रः । वि । अवृश्चत् । ओजसा । अपः । बिभ्रतम् । तमसा । परिऽवृतम् ॥
Padapatha Transcription Accented
índrasya ǀ átra ǀ táviṣībhyaḥ ǀ vi-rapśínaḥ ǀ ṛghāyatáḥ ǀ araṃhayanta ǀ manyáve ǀ
vṛtrám ǀ yát ǀ ugráḥ ǀ ví ǀ ávṛścat ǀ ójasā ǀ apáḥ ǀ bíbhratam ǀ támasā ǀ pári-vṛtam ǁ
Padapatha Transcription Nonaccented
indrasya ǀ atra ǀ taviṣībhyaḥ ǀ vi-rapśinaḥ ǀ ṛghāyataḥ ǀ araṃhayanta ǀ manyave ǀ
vṛtram ǀ yat ǀ ugraḥ ǀ vi ǀ avṛścat ǀ ojasā ǀ apaḥ ǀ bibhratam ǀ tamasā ǀ pari-vṛtam ǁ
10.113.07 (Mandala. Sukta. Rik)
8.6.15.02 (Ashtaka. Adhyaya. Varga. Rik)
10.10.007 (Mandala. Anuvāka. Rik)
Samhita Devanagari Accented
या वी॒र्या॑णि प्रथ॒मानि॒ कर्त्वा॑ महि॒त्वेभि॒र्यत॑मानौ समी॒यतुः॑ ।
ध्वां॒तं तमोऽव॑ दध्वसे ह॒त इंद्रो॑ म॒ह्ना पू॒र्वहू॑तावपत्यत ॥
Samhita Devanagari Nonaccented
या वीर्याणि प्रथमानि कर्त्वा महित्वेभिर्यतमानौ समीयतुः ।
ध्वांतं तमोऽव दध्वसे हत इंद्रो मह्ना पूर्वहूतावपत्यत ॥
Samhita Transcription Accented
yā́ vīryā́ṇi prathamā́ni kártvā mahitvébhiryátamānau samīyátuḥ ǀ
dhvāntám támó’va dadhvase hatá índro mahnā́ pūrváhūtāvapatyata ǁ
Samhita Transcription Nonaccented
yā vīryāṇi prathamāni kartvā mahitvebhiryatamānau samīyatuḥ ǀ
dhvāntam tamo’va dadhvase hata indro mahnā pūrvahūtāvapatyata ǁ
Padapatha Devanagari Accented
या । वी॒र्या॑णि । प्र॒थ॒मानि॑ । कर्त्वा॑ । म॒हि॒ऽत्वेभिः॑ । यत॑मानौ । स॒म्ऽई॒यतुः॑ ।
ध्वा॒न्तम् । तमः॑ । अव॑ । द॒ध्व॒से॒ । ह॒ते । इन्द्रः॑ । म॒ह्ना । पू॒र्वऽहू॑तौ । अ॒प॒त्य॒त॒ ॥
Padapatha Devanagari Nonaccented
या । वीर्याणि । प्रथमानि । कर्त्वा । महिऽत्वेभिः । यतमानौ । सम्ऽईयतुः ।
ध्वान्तम् । तमः । अव । दध्वसे । हते । इन्द्रः । मह्ना । पूर्वऽहूतौ । अपत्यत ॥
Padapatha Transcription Accented
yā́ ǀ vīryā́ṇi ǀ prathamā́ni ǀ kártvā ǀ mahi-tvébhiḥ ǀ yátamānau ǀ sam-īyátuḥ ǀ
dhvāntám ǀ támaḥ ǀ áva ǀ dadhvase ǀ haté ǀ índraḥ ǀ mahnā́ ǀ pūrvá-hūtau ǀ apatyata ǁ
Padapatha Transcription Nonaccented
yā ǀ vīryāṇi ǀ prathamāni ǀ kartvā ǀ mahi-tvebhiḥ ǀ yatamānau ǀ sam-īyatuḥ ǀ
dhvāntam ǀ tamaḥ ǀ ava ǀ dadhvase ǀ hate ǀ indraḥ ǀ mahnā ǀ pūrva-hūtau ǀ apatyata ǁ
10.113.08 (Mandala. Sukta. Rik)
8.6.15.03 (Ashtaka. Adhyaya. Varga. Rik)
10.10.008 (Mandala. Anuvāka. Rik)
Samhita Devanagari Accented
विश्वे॑ दे॒वासो॒ अध॒ वृष्ण्या॑नि॒ तेऽव॑र्धय॒न्त्सोम॑वत्या वच॒स्यया॑ ।
र॒द्धं वृ॒त्रमहि॒मिंद्र॑स्य॒ हन्म॑ना॒ग्निर्न जंभै॑स्तृ॒ष्वन्न॑मावयत् ॥
Samhita Devanagari Nonaccented
विश्वे देवासो अध वृष्ण्यानि तेऽवर्धयन्त्सोमवत्या वचस्यया ।
रद्धं वृत्रमहिमिंद्रस्य हन्मनाग्निर्न जंभैस्तृष्वन्नमावयत् ॥
Samhita Transcription Accented
víśve devā́so ádha vṛ́ṣṇyāni té’vardhayantsómavatyā vacasyáyā ǀ
raddhám vṛtrámáhimíndrasya hánmanāgnírná jámbhaistṛṣvánnamāvayat ǁ
Samhita Transcription Nonaccented
viśve devāso adha vṛṣṇyāni te’vardhayantsomavatyā vacasyayā ǀ
raddham vṛtramahimindrasya hanmanāgnirna jambhaistṛṣvannamāvayat ǁ
Padapatha Devanagari Accented
विश्वे॑ । दे॒वासः॑ । अध॑ । वृष्ण्या॑नि । ते॒ । अव॑र्धयन् । सोम॑ऽवत्या । व॒च॒स्यया॑ ।
र॒द्धम् । वृ॒त्रम् । अहि॑म् । इन्द्र॑स्य । हन्म॑ना । अ॒ग्निः । न । जम्भैः॑ । तृ॒षु । अन्न॑म् । आ॒व॒य॒त् ॥
Padapatha Devanagari Nonaccented
विश्वे । देवासः । अध । वृष्ण्यानि । ते । अवर्धयन् । सोमऽवत्या । वचस्यया ।
रद्धम् । वृत्रम् । अहिम् । इन्द्रस्य । हन्मना । अग्निः । न । जम्भैः । तृषु । अन्नम् । आवयत् ॥
Padapatha Transcription Accented
víśve ǀ devā́saḥ ǀ ádha ǀ vṛ́ṣṇyāni ǀ te ǀ ávardhayan ǀ sóma-vatyā ǀ vacasyáyā ǀ
raddhám ǀ vṛtrám ǀ áhim ǀ índrasya ǀ hánmanā ǀ agníḥ ǀ ná ǀ jámbhaiḥ ǀ tṛṣú ǀ ánnam ǀ āvayat ǁ
Padapatha Transcription Nonaccented
viśve ǀ devāsaḥ ǀ adha ǀ vṛṣṇyāni ǀ te ǀ avardhayan ǀ soma-vatyā ǀ vacasyayā ǀ
raddham ǀ vṛtram ǀ ahim ǀ indrasya ǀ hanmanā ǀ agniḥ ǀ na ǀ jambhaiḥ ǀ tṛṣu ǀ annam ǀ āvayat ǁ
10.113.09 (Mandala. Sukta. Rik)
8.6.15.04 (Ashtaka. Adhyaya. Varga. Rik)
10.10.009 (Mandala. Anuvāka. Rik)
Samhita Devanagari Accented
भूरि॒ दक्षे॑भिर्वच॒नेभि॒र्ऋक्व॑भिः स॒ख्येभिः॑ स॒ख्यानि॒ प्र वो॑चत ।
इंद्रो॒ धुनिं॑ च॒ चुमु॑रिं च दं॒भयं॑छ्रद्धामन॒स्या शृ॑णुते द॒भीत॑ये ॥
Samhita Devanagari Nonaccented
भूरि दक्षेभिर्वचनेभिर्ऋक्वभिः सख्येभिः सख्यानि प्र वोचत ।
इंद्रो धुनिं च चुमुरिं च दंभयंछ्रद्धामनस्या शृणुते दभीतये ॥
Samhita Transcription Accented
bhū́ri dákṣebhirvacanébhirṛ́kvabhiḥ sakhyébhiḥ sakhyā́ni prá vocata ǀ
índro dhúnim ca cúmurim ca dambháyañchraddhāmanasyā́ śṛṇute dabhī́taye ǁ
Samhita Transcription Nonaccented
bhūri dakṣebhirvacanebhirṛkvabhiḥ sakhyebhiḥ sakhyāni pra vocata ǀ
indro dhunim ca cumurim ca dambhayañchraddhāmanasyā śṛṇute dabhītaye ǁ
Padapatha Devanagari Accented
भूरि॑ । दक्षे॑भिः । व॒च॒नेभिः॑ । ऋक्व॑ऽभिः । स॒ख्येभिः॑ । स॒ख्यानि॑ । प्र । वो॒च॒त॒ ।
इन्द्रः॑ । धुनि॑म् । च॒ । चुमु॑रिम् । च॒ । द॒म्भय॑न् । श्र॒द्धा॒ऽम॒न॒स्या । शृ॒णु॒ते॒ । द॒भीत॑ये ॥
Padapatha Devanagari Nonaccented
भूरि । दक्षेभिः । वचनेभिः । ऋक्वऽभिः । सख्येभिः । सख्यानि । प्र । वोचत ।
इन्द्रः । धुनिम् । च । चुमुरिम् । च । दम्भयन् । श्रद्धाऽमनस्या । शृणुते । दभीतये ॥
Padapatha Transcription Accented
bhū́ri ǀ dákṣebhiḥ ǀ vacanébhiḥ ǀ ṛ́kva-bhiḥ ǀ sakhyébhiḥ ǀ sakhyā́ni ǀ prá ǀ vocata ǀ
índraḥ ǀ dhúnim ǀ ca ǀ cúmurim ǀ ca ǀ dambháyan ǀ śraddhā-manasyā́ ǀ śṛṇute ǀ dabhī́taye ǁ
Padapatha Transcription Nonaccented
bhūri ǀ dakṣebhiḥ ǀ vacanebhiḥ ǀ ṛkva-bhiḥ ǀ sakhyebhiḥ ǀ sakhyāni ǀ pra ǀ vocata ǀ
indraḥ ǀ dhunim ǀ ca ǀ cumurim ǀ ca ǀ dambhayan ǀ śraddhā-manasyā ǀ śṛṇute ǀ dabhītaye ǁ
10.113.10 (Mandala. Sukta. Rik)
8.6.15.05 (Ashtaka. Adhyaya. Varga. Rik)
10.10.010 (Mandala. Anuvāka. Rik)
Samhita Devanagari Accented
त्वं पु॒रूण्या भ॑रा॒ स्वश्व्या॒ येभि॒र्मंसै॑ नि॒वच॑नानि॒ शंस॑न् ।
सु॒गेभि॒र्विश्वा॑ दुरि॒ता त॑रेम वि॒दो षु ण॑ उर्वि॒या गा॒धम॒द्य ॥
Samhita Devanagari Nonaccented
त्वं पुरूण्या भरा स्वश्व्या येभिर्मंसै निवचनानि शंसन् ।
सुगेभिर्विश्वा दुरिता तरेम विदो षु ण उर्विया गाधमद्य ॥
Samhita Transcription Accented
tvám purū́ṇyā́ bharā sváśvyā yébhirmáṃsai nivácanāni śáṃsan ǀ
sugébhirvíśvā duritā́ tarema vidó ṣú ṇa urviyā́ gādhámadyá ǁ
Samhita Transcription Nonaccented
tvam purūṇyā bharā svaśvyā yebhirmaṃsai nivacanāni śaṃsan ǀ
sugebhirviśvā duritā tarema vido ṣu ṇa urviyā gādhamadya ǁ
Padapatha Devanagari Accented
त्वम् । पु॒रूणि॑ । आ । भ॒र॒ । सु॒ऽअश्व्या॑ । येभिः॑ । मंसै॑ । नि॒ऽवच॑नानि । शंस॑न् ।
सु॒ऽगेभिः॑ । विश्वा॑ । दुः॒ऽइ॒ता । त॒रे॒म॒ । वि॒दो इति॑ । सु । नः॒ । उ॒र्वि॒या । गा॒धम् । अ॒द्य ॥
Padapatha Devanagari Nonaccented
त्वम् । पुरूणि । आ । भर । सुऽअश्व्या । येभिः । मंसै । निऽवचनानि । शंसन् ।
सुऽगेभिः । विश्वा । दुःऽइता । तरेम । विदो इति । सु । नः । उर्विया । गाधम् । अद्य ॥
Padapatha Transcription Accented
tvám ǀ purū́ṇi ǀ ā́ ǀ bhara ǀ su-áśvyā ǀ yébhiḥ ǀ máṃsai ǀ ni-vácanāni ǀ śáṃsan ǀ
su-gébhiḥ ǀ víśvā ǀ duḥ-itā́ ǀ tarema ǀ vidó íti ǀ sú ǀ naḥ ǀ urviyā́ ǀ gādhám ǀ adyá ǁ
Padapatha Transcription Nonaccented
tvam ǀ purūṇi ǀ ā ǀ bhara ǀ su-aśvyā ǀ yebhiḥ ǀ maṃsai ǀ ni-vacanāni ǀ śaṃsan ǀ
su-gebhiḥ ǀ viśvā ǀ duḥ-itā ǀ tarema ǀ vido iti ǀ su ǀ naḥ ǀ urviyā ǀ gādham ǀ adya ǁ