|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 119
|
1. Info |
| To: | laba aindra’s self praise | |
| From: | laba aindra | |
| Metres: | 1st set of styles: gāyatrī (1-5, 7-10); nicṛdgāyatrī (6, 12, 13); virāḍgāyatrī (11) 2nd set of styles: gāyatrī |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.119.01 (Mandala. Sukta. Rik)
8.6.26.01 (Ashtaka. Adhyaya. Varga. Rik)
10.10.057 (Mandala. Anuvāka. Rik)
Samhita Devanagari Accented
इति॒ वा इति॑ मे॒ मनो॒ गामश्वं॑ सनुया॒मिति॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
इति वा इति मे मनो गामश्वं सनुयामिति ।
कुवित्सोमस्यापामिति ॥
Samhita Transcription Accented
íti vā́ íti me máno gā́máśvam sanuyāmíti ǀ
kuvítsómasyā́pāmíti ǁ
Samhita Transcription Nonaccented
iti vā iti me mano gāmaśvam sanuyāmiti ǀ
kuvitsomasyāpāmiti ǁ
Padapatha Devanagari Accented
इति॑ । वै । इति॑ । मे॒ । मनः॑ । गाम् । अश्व॑म् । स॒नु॒या॒म् । इति॑ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
इति । वै । इति । मे । मनः । गाम् । अश्वम् । सनुयाम् । इति ।
कुवित् । सोमस्य । अपाम् । इति ॥
Padapatha Transcription Accented
íti ǀ vái ǀ íti ǀ me ǀ mánaḥ ǀ gā́m ǀ áśvam ǀ sanuyām ǀ íti ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
iti ǀ vai ǀ iti ǀ me ǀ manaḥ ǀ gām ǀ aśvam ǀ sanuyām ǀ iti ǀ
kuvit ǀ somasya ǀ apām ǀ iti ǁ
10.119.02 (Mandala. Sukta. Rik)
8.6.26.02 (Ashtaka. Adhyaya. Varga. Rik)
10.10.058 (Mandala. Anuvāka. Rik)
Samhita Devanagari Accented
प्र वाता॑ इव॒ दोध॑त॒ उन्मा॑ पी॒ता अ॑यंसत ।
कु॒वित्सोम॒स्यापा॒मिति॑ ॥
Samhita Devanagari Nonaccented
प्र वाता इव दोधत उन्मा पीता अयंसत ।
कुवित्सोमस्यापामिति ॥
Samhita Transcription Accented
prá vā́tā iva dódhata únmā pītā́ ayaṃsata ǀ
kuvítsómasyā́pāmíti ǁ
Samhita Transcription Nonaccented
pra vātā iva dodhata unmā pītā ayaṃsata ǀ
kuvitsomasyāpāmiti ǁ
Padapatha Devanagari Accented
प्र । वाताः॑ऽइव । दोध॑तः । उत् । मा॒ । पी॒ताः । अ॒यं॒स॒त॒ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
प्र । वाताःऽइव । दोधतः । उत् । मा । पीताः । अयंसत ।
कुवित् । सोमस्य । अपाम् । इति ॥
Padapatha Transcription Accented
prá ǀ vā́tāḥ-iva ǀ dódhataḥ ǀ út ǀ mā ǀ pītā́ḥ ǀ ayaṃsata ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
pra ǀ vātāḥ-iva ǀ dodhataḥ ǀ ut ǀ mā ǀ pītāḥ ǀ ayaṃsata ǀ
kuvit ǀ somasya ǀ apām ǀ iti ǁ
10.119.03 (Mandala. Sukta. Rik)
8.6.26.03 (Ashtaka. Adhyaya. Varga. Rik)
10.10.059 (Mandala. Anuvāka. Rik)
Samhita Devanagari Accented
उन्मा॑ पी॒ता अ॑यंसत॒ रथ॒मश्वा॑ इवा॒शवः॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
उन्मा पीता अयंसत रथमश्वा इवाशवः ।
कुवित्सोमस्यापामिति ॥
Samhita Transcription Accented
únmā pītā́ ayaṃsata ráthamáśvā ivāśávaḥ ǀ
kuvítsómasyā́pāmíti ǁ
Samhita Transcription Nonaccented
unmā pītā ayaṃsata rathamaśvā ivāśavaḥ ǀ
kuvitsomasyāpāmiti ǁ
Padapatha Devanagari Accented
उत् । मा॒ । पी॒ताः । अ॒यं॒स॒त॒ । रथ॑म् । अश्वाः॑ऽइव । आ॒शवः॑ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
उत् । मा । पीताः । अयंसत । रथम् । अश्वाःऽइव । आशवः ।
कुवित् । सोमस्य । अपाम् । इति ॥
Padapatha Transcription Accented
út ǀ mā ǀ pītā́ḥ ǀ ayaṃsata ǀ rátham ǀ áśvāḥ-iva ǀ āśávaḥ ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
ut ǀ mā ǀ pītāḥ ǀ ayaṃsata ǀ ratham ǀ aśvāḥ-iva ǀ āśavaḥ ǀ
kuvit ǀ somasya ǀ apām ǀ iti ǁ
10.119.04 (Mandala. Sukta. Rik)
8.6.26.04 (Ashtaka. Adhyaya. Varga. Rik)
10.10.060 (Mandala. Anuvāka. Rik)
Samhita Devanagari Accented
उप॑ मा म॒तिर॑स्थित वा॒श्रा पु॒त्रमि॑व प्रि॒यं ।
कु॒वित्सोम॒स्यापा॒मिति॑ ॥
Samhita Devanagari Nonaccented
उप मा मतिरस्थित वाश्रा पुत्रमिव प्रियं ।
कुवित्सोमस्यापामिति ॥
Samhita Transcription Accented
úpa mā matírasthita vāśrā́ putrámiva priyám ǀ
kuvítsómasyā́pāmíti ǁ
Samhita Transcription Nonaccented
upa mā matirasthita vāśrā putramiva priyam ǀ
kuvitsomasyāpāmiti ǁ
Padapatha Devanagari Accented
उप॑ । मा॒ । म॒तिः । अ॒स्थि॒त॒ । वा॒श्रा । पु॒त्रम्ऽइ॑व । प्रि॒यम् ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
उप । मा । मतिः । अस्थित । वाश्रा । पुत्रम्ऽइव । प्रियम् ।
कुवित् । सोमस्य । अपाम् । इति ॥
Padapatha Transcription Accented
úpa ǀ mā ǀ matíḥ ǀ asthita ǀ vāśrā́ ǀ putrám-iva ǀ priyám ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
upa ǀ mā ǀ matiḥ ǀ asthita ǀ vāśrā ǀ putram-iva ǀ priyam ǀ
kuvit ǀ somasya ǀ apām ǀ iti ǁ
10.119.05 (Mandala. Sukta. Rik)
8.6.26.05 (Ashtaka. Adhyaya. Varga. Rik)
10.10.061 (Mandala. Anuvāka. Rik)
Samhita Devanagari Accented
अ॒हं तष्टे॑व वं॒धुरं॒ पर्य॑चामि हृ॒दा म॒तिं ।
कु॒वित्सोम॒स्यापा॒मिति॑ ॥
Samhita Devanagari Nonaccented
अहं तष्टेव वंधुरं पर्यचामि हृदा मतिं ।
कुवित्सोमस्यापामिति ॥
Samhita Transcription Accented
ahám táṣṭeva vandhúram páryacāmi hṛdā́ matím ǀ
kuvítsómasyā́pāmíti ǁ
Samhita Transcription Nonaccented
aham taṣṭeva vandhuram paryacāmi hṛdā matim ǀ
kuvitsomasyāpāmiti ǁ
Padapatha Devanagari Accented
अ॒हम् । तष्टा॑ऽइव । व॒न्धुर॑म् । परि॑ । अ॒चा॒मि॒ । हृ॒दा । म॒तिम् ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
अहम् । तष्टाऽइव । वन्धुरम् । परि । अचामि । हृदा । मतिम् ।
कुवित् । सोमस्य । अपाम् । इति ॥
Padapatha Transcription Accented
ahám ǀ táṣṭā-iva ǀ vandhúram ǀ pári ǀ acāmi ǀ hṛdā́ ǀ matím ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
aham ǀ taṣṭā-iva ǀ vandhuram ǀ pari ǀ acāmi ǀ hṛdā ǀ matim ǀ
kuvit ǀ somasya ǀ apām ǀ iti ǁ
10.119.06 (Mandala. Sukta. Rik)
8.6.26.06 (Ashtaka. Adhyaya. Varga. Rik)
10.10.062 (Mandala. Anuvāka. Rik)
Samhita Devanagari Accented
न॒हि मे॑ अक्षि॒पच्च॒नाच्छां॑त्सुः॒ पंच॑ कृ॒ष्टयः॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
नहि मे अक्षिपच्चनाच्छांत्सुः पंच कृष्टयः ।
कुवित्सोमस्यापामिति ॥
Samhita Transcription Accented
nahí me akṣipáccanā́cchāntsuḥ páñca kṛṣṭáyaḥ ǀ
kuvítsómasyā́pāmíti ǁ
Samhita Transcription Nonaccented
nahi me akṣipaccanācchāntsuḥ pañca kṛṣṭayaḥ ǀ
kuvitsomasyāpāmiti ǁ
Padapatha Devanagari Accented
न॒हि । मे॒ । अ॒क्षि॒ऽपत् । च॒न । अच्छा॑न्त्सुः । पञ्च॑ । कृ॒ष्टयः॑ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
नहि । मे । अक्षिऽपत् । चन । अच्छान्त्सुः । पञ्च । कृष्टयः ।
कुवित् । सोमस्य । अपाम् । इति ॥
Padapatha Transcription Accented
nahí ǀ me ǀ akṣi-pát ǀ caná ǀ ácchāntsuḥ ǀ páñca ǀ kṛṣṭáyaḥ ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
nahi ǀ me ǀ akṣi-pat ǀ cana ǀ acchāntsuḥ ǀ pañca ǀ kṛṣṭayaḥ ǀ
kuvit ǀ somasya ǀ apām ǀ iti ǁ
10.119.07 (Mandala. Sukta. Rik)
8.6.27.01 (Ashtaka. Adhyaya. Varga. Rik)
10.10.063 (Mandala. Anuvāka. Rik)
Samhita Devanagari Accented
न॒हि मे॒ रोद॑सी उ॒भे अ॒न्यं प॒क्षं च॒न प्रति॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
नहि मे रोदसी उभे अन्यं पक्षं चन प्रति ।
कुवित्सोमस्यापामिति ॥
Samhita Transcription Accented
nahí me ródasī ubhé anyám pakṣám caná práti ǀ
kuvítsómasyā́pāmíti ǁ
Samhita Transcription Nonaccented
nahi me rodasī ubhe anyam pakṣam cana prati ǀ
kuvitsomasyāpāmiti ǁ
Padapatha Devanagari Accented
न॒हि । मे॒ । रोद॑सी॒ इति॑ । उ॒भे इति॑ । अ॒न्यम् । प॒क्षम् । च॒न । प्रति॑ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
नहि । मे । रोदसी इति । उभे इति । अन्यम् । पक्षम् । चन । प्रति ।
कुवित् । सोमस्य । अपाम् । इति ॥
Padapatha Transcription Accented
nahí ǀ me ǀ ródasī íti ǀ ubhé íti ǀ anyám ǀ pakṣám ǀ caná ǀ práti ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
nahi ǀ me ǀ rodasī iti ǀ ubhe iti ǀ anyam ǀ pakṣam ǀ cana ǀ prati ǀ
kuvit ǀ somasya ǀ apām ǀ iti ǁ
10.119.08 (Mandala. Sukta. Rik)
8.6.27.02 (Ashtaka. Adhyaya. Varga. Rik)
10.10.064 (Mandala. Anuvāka. Rik)
Samhita Devanagari Accented
अ॒भि द्यां म॑हि॒ना भु॑वम॒भी॒३॒॑मां पृ॑थि॒वीं म॒हीं ।
कु॒वित्सोम॒स्यापा॒मिति॑ ॥
Samhita Devanagari Nonaccented
अभि द्यां महिना भुवमभीमां पृथिवीं महीं ।
कुवित्सोमस्यापामिति ॥
Samhita Transcription Accented
abhí dyā́m mahinā́ bhuvamabhī́mā́m pṛthivī́m mahī́m ǀ
kuvítsómasyā́pāmíti ǁ
Samhita Transcription Nonaccented
abhi dyām mahinā bhuvamabhīmām pṛthivīm mahīm ǀ
kuvitsomasyāpāmiti ǁ
Padapatha Devanagari Accented
अ॒भि । द्याम् । म॒हि॒ना । भु॒व॒म् । अ॒भि । इ॒माम् । पृ॒थि॒वीम् । म॒हीम् ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
अभि । द्याम् । महिना । भुवम् । अभि । इमाम् । पृथिवीम् । महीम् ।
कुवित् । सोमस्य । अपाम् । इति ॥
Padapatha Transcription Accented
abhí ǀ dyā́m ǀ mahinā́ ǀ bhuvam ǀ abhí ǀ imā́m ǀ pṛthivī́m ǀ mahī́m ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
abhi ǀ dyām ǀ mahinā ǀ bhuvam ǀ abhi ǀ imām ǀ pṛthivīm ǀ mahīm ǀ
kuvit ǀ somasya ǀ apām ǀ iti ǁ
10.119.09 (Mandala. Sukta. Rik)
8.6.27.03 (Ashtaka. Adhyaya. Varga. Rik)
10.10.065 (Mandala. Anuvāka. Rik)
Samhita Devanagari Accented
हंता॒हं पृ॑थि॒वीमि॒मां नि द॑धानी॒ह वे॒ह वा॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
हंताहं पृथिवीमिमां नि दधानीह वेह वा ।
कुवित्सोमस्यापामिति ॥
Samhita Transcription Accented
hántāhám pṛthivī́mimā́m ní dadhānīhá vehá vā ǀ
kuvítsómasyā́pāmíti ǁ
Samhita Transcription Nonaccented
hantāham pṛthivīmimām ni dadhānīha veha vā ǀ
kuvitsomasyāpāmiti ǁ
Padapatha Devanagari Accented
हन्त॑ । अ॒हम् । पृ॒थि॒वीम् । इ॒माम् । नि । द॒धा॒नि॒ । इ॒ह । वा॒ । इ॒ह । वा॒ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
हन्त । अहम् । पृथिवीम् । इमाम् । नि । दधानि । इह । वा । इह । वा ।
कुवित् । सोमस्य । अपाम् । इति ॥
Padapatha Transcription Accented
hánta ǀ ahám ǀ pṛthivī́m ǀ imā́m ǀ ní ǀ dadhāni ǀ ihá ǀ vā ǀ ihá ǀ vā ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
hanta ǀ aham ǀ pṛthivīm ǀ imām ǀ ni ǀ dadhāni ǀ iha ǀ vā ǀ iha ǀ vā ǀ
kuvit ǀ somasya ǀ apām ǀ iti ǁ
10.119.10 (Mandala. Sukta. Rik)
8.6.27.04 (Ashtaka. Adhyaya. Varga. Rik)
10.10.066 (Mandala. Anuvāka. Rik)
Samhita Devanagari Accented
ओ॒षमित्पृ॑थि॒वीम॒हं जं॒घना॑नी॒ह वे॒ह वा॑ ।
कु॒वित्सोम॒स्यापा॒मिति॑ ॥
Samhita Devanagari Nonaccented
ओषमित्पृथिवीमहं जंघनानीह वेह वा ।
कुवित्सोमस्यापामिति ॥
Samhita Transcription Accented
oṣámítpṛthivī́mahám jaṅghánānīhá vehá vā ǀ
kuvítsómasyā́pāmíti ǁ
Samhita Transcription Nonaccented
oṣamitpṛthivīmaham jaṅghanānīha veha vā ǀ
kuvitsomasyāpāmiti ǁ
Padapatha Devanagari Accented
ओ॒षम् । इत् । पृ॒थि॒वीम् । अ॒हम् । ज॒ङ्घना॑नि । इ॒ह । वा॒ । इ॒ह । वा॒ ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
ओषम् । इत् । पृथिवीम् । अहम् । जङ्घनानि । इह । वा । इह । वा ।
कुवित् । सोमस्य । अपाम् । इति ॥
Padapatha Transcription Accented
oṣám ǀ ít ǀ pṛthivī́m ǀ ahám ǀ jaṅghánāni ǀ ihá ǀ vā ǀ ihá ǀ vā ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
oṣam ǀ it ǀ pṛthivīm ǀ aham ǀ jaṅghanāni ǀ iha ǀ vā ǀ iha ǀ vā ǀ
kuvit ǀ somasya ǀ apām ǀ iti ǁ
10.119.11 (Mandala. Sukta. Rik)
8.6.27.05 (Ashtaka. Adhyaya. Varga. Rik)
10.10.067 (Mandala. Anuvāka. Rik)
Samhita Devanagari Accented
दि॒वि मे॑ अ॒न्यः प॒क्षो॒३॒॑ऽधो अ॒न्यम॑चीकृषं ।
कु॒वित्सोम॒स्यापा॒मिति॑ ॥
Samhita Devanagari Nonaccented
दिवि मे अन्यः पक्षोऽधो अन्यमचीकृषं ।
कुवित्सोमस्यापामिति ॥
Samhita Transcription Accented
diví me anyáḥ pakṣó’dhó anyámacīkṛṣam ǀ
kuvítsómasyā́pāmíti ǁ
Samhita Transcription Nonaccented
divi me anyaḥ pakṣo’dho anyamacīkṛṣam ǀ
kuvitsomasyāpāmiti ǁ
Padapatha Devanagari Accented
दि॒वि । मे॒ । अ॒न्यः । प॒क्षः । अ॒धः । अ॒न्यम् । अ॒ची॒कृ॒ष॒म् ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
दिवि । मे । अन्यः । पक्षः । अधः । अन्यम् । अचीकृषम् ।
कुवित् । सोमस्य । अपाम् । इति ॥
Padapatha Transcription Accented
diví ǀ me ǀ anyáḥ ǀ pakṣáḥ ǀ adháḥ ǀ anyám ǀ acīkṛṣam ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
divi ǀ me ǀ anyaḥ ǀ pakṣaḥ ǀ adhaḥ ǀ anyam ǀ acīkṛṣam ǀ
kuvit ǀ somasya ǀ apām ǀ iti ǁ
10.119.12 (Mandala. Sukta. Rik)
8.6.27.06 (Ashtaka. Adhyaya. Varga. Rik)
10.10.068 (Mandala. Anuvāka. Rik)
Samhita Devanagari Accented
अ॒हम॑स्मि महाम॒हो॑ऽभिन॒भ्यमुदी॑षितः ।
कु॒वित्सोम॒स्यापा॒मिति॑ ॥
Samhita Devanagari Nonaccented
अहमस्मि महामहोऽभिनभ्यमुदीषितः ।
कुवित्सोमस्यापामिति ॥
Samhita Transcription Accented
ahámasmi mahāmahó’bhinabhyámúdīṣitaḥ ǀ
kuvítsómasyā́pāmíti ǁ
Samhita Transcription Nonaccented
ahamasmi mahāmaho’bhinabhyamudīṣitaḥ ǀ
kuvitsomasyāpāmiti ǁ
Padapatha Devanagari Accented
अ॒हम् । अ॒स्मि॒ । म॒हा॒ऽम॒हः । अ॒भि॒ऽन॒भ्यम् । उत्ऽई॑षितः ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
अहम् । अस्मि । महाऽमहः । अभिऽनभ्यम् । उत्ऽईषितः ।
कुवित् । सोमस्य । अपाम् । इति ॥
Padapatha Transcription Accented
ahám ǀ asmi ǀ mahā-maháḥ ǀ abhi-nabhyám ǀ út-īṣitaḥ ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
aham ǀ asmi ǀ mahā-mahaḥ ǀ abhi-nabhyam ǀ ut-īṣitaḥ ǀ
kuvit ǀ somasya ǀ apām ǀ iti ǁ
10.119.13 (Mandala. Sukta. Rik)
8.6.27.07 (Ashtaka. Adhyaya. Varga. Rik)
10.10.069 (Mandala. Anuvāka. Rik)
Samhita Devanagari Accented
गृ॒हो या॒म्यरं॑कृतो दे॒वेभ्यो॑ हव्य॒वाह॑नः ।
कु॒वित्सोम॒स्यापा॒मिति॑ ॥
Samhita Devanagari Nonaccented
गृहो याम्यरंकृतो देवेभ्यो हव्यवाहनः ।
कुवित्सोमस्यापामिति ॥
Samhita Transcription Accented
gṛhó yāmyáraṃkṛto devébhyo havyavā́hanaḥ ǀ
kuvítsómasyā́pāmíti ǁ
Samhita Transcription Nonaccented
gṛho yāmyaraṃkṛto devebhyo havyavāhanaḥ ǀ
kuvitsomasyāpāmiti ǁ
Padapatha Devanagari Accented
गृ॒हः । या॒मि॒ । अर॑म्ऽकृतः । दे॒वेभ्यः॑ । ह॒व्य॒ऽवाह॑नः ।
कु॒वित् । सोम॑स्य । अपा॑म् । इति॑ ॥
Padapatha Devanagari Nonaccented
गृहः । यामि । अरम्ऽकृतः । देवेभ्यः । हव्यऽवाहनः ।
कुवित् । सोमस्य । अपाम् । इति ॥
Padapatha Transcription Accented
gṛháḥ ǀ yāmi ǀ áram-kṛtaḥ ǀ devébhyaḥ ǀ havya-vā́hanaḥ ǀ
kuvít ǀ sómasya ǀ ápām ǀ íti ǁ
Padapatha Transcription Nonaccented
gṛhaḥ ǀ yāmi ǀ aram-kṛtaḥ ǀ devebhyaḥ ǀ havya-vāhanaḥ ǀ
kuvit ǀ somasya ǀ apām ǀ iti ǁ