|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 121
|
1. Info |
| To: | ka (who?) | |
| From: | hiraṇyagarbha prājāpatya | |
| Metres: | 1st set of styles: triṣṭup (1, 3, 6, 8, 9); nicṛttriṣṭup (2, 5); virāṭtrisṭup (4, 10); svarāṭtriṣṭup (7) 2nd set of styles: triṣṭubh |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.121.01 (Mandala. Sukta. Rik)
8.7.03.01 (Ashtaka. Adhyaya. Varga. Rik)
10.10.079 (Mandala. Anuvāka. Rik)
Samhita Devanagari Accented
हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् ।
स दा॑धार पृथि॒वीं द्यामु॒तेमां कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
हिरण्यगर्भः समवर्तताग्रे भूतस्य जातः पतिरेक आसीत् ।
स दाधार पृथिवीं द्यामुतेमां कस्मै देवाय हविषा विधेम ॥
Samhita Transcription Accented
hiraṇyagarbháḥ sámavartatā́gre bhūtásya jātáḥ pátiréka āsīt ǀ
sá dādhāra pṛthivī́m dyā́mutémā́m kásmai devā́ya havíṣā vidhema ǁ
Samhita Transcription Nonaccented
hiraṇyagarbhaḥ samavartatāgre bhūtasya jātaḥ patireka āsīt ǀ
sa dādhāra pṛthivīm dyāmutemām kasmai devāya haviṣā vidhema ǁ
Padapatha Devanagari Accented
हि॒र॒ण्य॒ऽग॒र्भः । सम् । अ॒व॒र्त॒त॒ । अग्रे॑ । भू॒तस्य॑ । जा॒तः । पतिः॑ । एकः॑ । आ॒सी॒त् ।
सः । दा॒धा॒र॒ । पृ॒थि॒वीम् । द्याम् । उ॒त । इ॒माम् । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
हिरण्यऽगर्भः । सम् । अवर्तत । अग्रे । भूतस्य । जातः । पतिः । एकः । आसीत् ।
सः । दाधार । पृथिवीम् । द्याम् । उत । इमाम् । कस्मै । देवाय । हविषा । विधेम ॥
Padapatha Transcription Accented
hiraṇya-garbháḥ ǀ sám ǀ avartata ǀ ágre ǀ bhūtásya ǀ jātáḥ ǀ pátiḥ ǀ ékaḥ ǀ āsīt ǀ
sáḥ ǀ dādhāra ǀ pṛthivī́m ǀ dyā́m ǀ utá ǀ imā́m ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
hiraṇya-garbhaḥ ǀ sam ǀ avartata ǀ agre ǀ bhūtasya ǀ jātaḥ ǀ patiḥ ǀ ekaḥ ǀ āsīt ǀ
saḥ ǀ dādhāra ǀ pṛthivīm ǀ dyām ǀ uta ǀ imām ǀ kasmai ǀ devāya ǀ haviṣā ǀ vidhema ǁ
10.121.02 (Mandala. Sukta. Rik)
8.7.03.02 (Ashtaka. Adhyaya. Varga. Rik)
10.10.080 (Mandala. Anuvāka. Rik)
Samhita Devanagari Accented
य आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
यस्य॑ च्छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
य आत्मदा बलदा यस्य विश्व उपासते प्रशिषं यस्य देवाः ।
यस्य च्छायामृतं यस्य मृत्युः कस्मै देवाय हविषा विधेम ॥
Samhita Transcription Accented
yá ātmadā́ baladā́ yásya víśva upā́sate praśíṣam yásya devā́ḥ ǀ
yásya cchāyā́mṛ́tam yásya mṛtyúḥ kásmai devā́ya havíṣā vidhema ǁ
Samhita Transcription Nonaccented
ya ātmadā baladā yasya viśva upāsate praśiṣam yasya devāḥ ǀ
yasya cchāyāmṛtam yasya mṛtyuḥ kasmai devāya haviṣā vidhema ǁ
Padapatha Devanagari Accented
यः । आ॒त्म॒ऽदाः । ब॒ल॒ऽदाः । यस्य॑ । विश्वे॑ । उ॒प॒ऽआस॑ते । प्र॒ऽशिष॑म् । यस्य॑ । दे॒वाः ।
यस्य॑ । छा॒या । अ॒मृत॑म् । यस्य॑ । मृ॒त्युः । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
यः । आत्मऽदाः । बलऽदाः । यस्य । विश्वे । उपऽआसते । प्रऽशिषम् । यस्य । देवाः ।
यस्य । छाया । अमृतम् । यस्य । मृत्युः । कस्मै । देवाय । हविषा । विधेम ॥
Padapatha Transcription Accented
yáḥ ǀ ātma-dā́ḥ ǀ bala-dā́ḥ ǀ yásya ǀ víśve ǀ upa-ā́sate ǀ pra-śíṣam ǀ yásya ǀ devā́ḥ ǀ
yásya ǀ chāyā́ ǀ amṛ́tam ǀ yásya ǀ mṛtyúḥ ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yaḥ ǀ ātma-dāḥ ǀ bala-dāḥ ǀ yasya ǀ viśve ǀ upa-āsate ǀ pra-śiṣam ǀ yasya ǀ devāḥ ǀ
yasya ǀ chāyā ǀ amṛtam ǀ yasya ǀ mṛtyuḥ ǀ kasmai ǀ devāya ǀ haviṣā ǀ vidhema ǁ
10.121.03 (Mandala. Sukta. Rik)
8.7.03.03 (Ashtaka. Adhyaya. Varga. Rik)
10.10.081 (Mandala. Anuvāka. Rik)
Samhita Devanagari Accented
यः प्रा॑ण॒तो नि॑मिष॒तो म॑हि॒त्वैक॒ इद्राजा॒ जग॑तो ब॒भूव॑ ।
य ईशे॑ अ॒स्य द्वि॒पद॒श्चतु॑ष्पदः॒ कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
यः प्राणतो निमिषतो महित्वैक इद्राजा जगतो बभूव ।
य ईशे अस्य द्विपदश्चतुष्पदः कस्मै देवाय हविषा विधेम ॥
Samhita Transcription Accented
yáḥ prāṇató nimiṣató mahitváika ídrā́jā jágato babhū́va ǀ
yá ī́śe asyá dvipádaścátuṣpadaḥ kásmai devā́ya havíṣā vidhema ǁ
Samhita Transcription Nonaccented
yaḥ prāṇato nimiṣato mahitvaika idrājā jagato babhūva ǀ
ya īśe asya dvipadaścatuṣpadaḥ kasmai devāya haviṣā vidhema ǁ
Padapatha Devanagari Accented
यः । प्रा॒ण॒तः । नि॒ऽमि॒ष॒तः । म॒हि॒ऽत्वा । एकः॑ । इत् । राजा॑ । जग॑तः । ब॒भूव॑ ।
यः । ईशे॑ । अ॒स्य । द्वि॒ऽपदः॑ । चतुः॑ऽपदः । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
यः । प्राणतः । निऽमिषतः । महिऽत्वा । एकः । इत् । राजा । जगतः । बभूव ।
यः । ईशे । अस्य । द्विऽपदः । चतुःऽपदः । कस्मै । देवाय । हविषा । विधेम ॥
Padapatha Transcription Accented
yáḥ ǀ prāṇatáḥ ǀ ni-miṣatáḥ ǀ mahi-tvā́ ǀ ékaḥ ǀ ít ǀ rā́jā ǀ jágataḥ ǀ babhū́va ǀ
yáḥ ǀ ī́śe ǀ asyá ǀ dvi-pádaḥ ǀ cátuḥ-padaḥ ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yaḥ ǀ prāṇataḥ ǀ ni-miṣataḥ ǀ mahi-tvā ǀ ekaḥ ǀ it ǀ rājā ǀ jagataḥ ǀ babhūva ǀ
yaḥ ǀ īśe ǀ asya ǀ dvi-padaḥ ǀ catuḥ-padaḥ ǀ kasmai ǀ devāya ǀ haviṣā ǀ vidhema ǁ
10.121.04 (Mandala. Sukta. Rik)
8.7.03.04 (Ashtaka. Adhyaya. Varga. Rik)
10.10.082 (Mandala. Anuvāka. Rik)
Samhita Devanagari Accented
यस्ये॒मे हि॒मवं॑तो महि॒त्वा यस्य॑ समु॒द्रं र॒सया॑ स॒हाहुः ।
यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
यस्येमे हिमवंतो महित्वा यस्य समुद्रं रसया सहाहुः ।
यस्येमाः प्रदिशो यस्य बाहू कस्मै देवाय हविषा विधेम ॥
Samhita Transcription Accented
yásyemé himávanto mahitvā́ yásya samudrám rasáyā sahā́húḥ ǀ
yásyemā́ḥ pradíśo yásya bāhū́ kásmai devā́ya havíṣā vidhema ǁ
Samhita Transcription Nonaccented
yasyeme himavanto mahitvā yasya samudram rasayā sahāhuḥ ǀ
yasyemāḥ pradiśo yasya bāhū kasmai devāya haviṣā vidhema ǁ
Padapatha Devanagari Accented
यस्य॑ । इ॒मे । हि॒मऽव॑न्तः । म॒हि॒ऽत्वा । यस्य॑ । स॒मु॒द्रम् । र॒सया॑ । स॒ह । आ॒हुः ।
यस्य॑ । इ॒माः । प्र॒ऽदिशः॑ । यस्य॑ । बा॒हू इति॑ । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
यस्य । इमे । हिमऽवन्तः । महिऽत्वा । यस्य । समुद्रम् । रसया । सह । आहुः ।
यस्य । इमाः । प्रऽदिशः । यस्य । बाहू इति । कस्मै । देवाय । हविषा । विधेम ॥
Padapatha Transcription Accented
yásya ǀ imé ǀ himá-vantaḥ ǀ mahi-tvā́ ǀ yásya ǀ samudrám ǀ rasáyā ǀ sahá ǀ āhúḥ ǀ
yásya ǀ imā́ḥ ǀ pra-díśaḥ ǀ yásya ǀ bāhū́ íti ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yasya ǀ ime ǀ hima-vantaḥ ǀ mahi-tvā ǀ yasya ǀ samudram ǀ rasayā ǀ saha ǀ āhuḥ ǀ
yasya ǀ imāḥ ǀ pra-diśaḥ ǀ yasya ǀ bāhū iti ǀ kasmai ǀ devāya ǀ haviṣā ǀ vidhema ǁ
10.121.05 (Mandala. Sukta. Rik)
8.7.03.05 (Ashtaka. Adhyaya. Varga. Rik)
10.10.083 (Mandala. Anuvāka. Rik)
Samhita Devanagari Accented
येन॒ द्यौरु॒ग्रा पृ॑थि॒वी च॑ दृ॒ळ्हा येन॒ स्वः॑ स्तभि॒तं येन॒ नाकः॑ ।
यो अं॒तरि॑क्षे॒ रज॑सो वि॒मानः॒ कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
येन द्यौरुग्रा पृथिवी च दृळ्हा येन स्वः स्तभितं येन नाकः ।
यो अंतरिक्षे रजसो विमानः कस्मै देवाय हविषा विधेम ॥
Samhita Transcription Accented
yéna dyáurugrā́ pṛthivī́ ca dṛḷhā́ yéna sváḥ stabhitám yéna nā́kaḥ ǀ
yó antárikṣe rájaso vimā́naḥ kásmai devā́ya havíṣā vidhema ǁ
Samhita Transcription Nonaccented
yena dyaurugrā pṛthivī ca dṛḷhā yena svaḥ stabhitam yena nākaḥ ǀ
yo antarikṣe rajaso vimānaḥ kasmai devāya haviṣā vidhema ǁ
Padapatha Devanagari Accented
येन॑ । द्यौः । उ॒ग्रा । पृ॒थि॒वी । च॒ । दृ॒ळ्हा । येन॑ । स्व१॒॑रिति॑ स्वः॑ । स्त॒भि॒तम् । येन॑ । नाकः॑ ।
यः । अ॒न्तरि॑क्षे । रज॑सः । वि॒ऽमानः॑ । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
येन । द्यौः । उग्रा । पृथिवी । च । दृळ्हा । येन । स्वरिति स्वः । स्तभितम् । येन । नाकः ।
यः । अन्तरिक्षे । रजसः । विऽमानः । कस्मै । देवाय । हविषा । विधेम ॥
Padapatha Transcription Accented
yéna ǀ dyáuḥ ǀ ugrā́ ǀ pṛthivī́ ǀ ca ǀ dṛḷhā́ ǀ yéna ǀ sváríti sváḥ ǀ stabhitám ǀ yéna ǀ nā́kaḥ ǀ
yáḥ ǀ antárikṣe ǀ rájasaḥ ǀ vi-mā́naḥ ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yena ǀ dyauḥ ǀ ugrā ǀ pṛthivī ǀ ca ǀ dṛḷhā ǀ yena ǀ svariti svaḥ ǀ stabhitam ǀ yena ǀ nākaḥ ǀ
yaḥ ǀ antarikṣe ǀ rajasaḥ ǀ vi-mānaḥ ǀ kasmai ǀ devāya ǀ haviṣā ǀ vidhema ǁ
10.121.06 (Mandala. Sukta. Rik)
8.7.04.01 (Ashtaka. Adhyaya. Varga. Rik)
10.10.084 (Mandala. Anuvāka. Rik)
Samhita Devanagari Accented
यं क्रंद॑सी॒ अव॑सा तस्तभा॒ने अ॒भ्यैक्षे॑तां॒ मन॑सा॒ रेज॑माने ।
यत्राधि॒ सूर॒ उदि॑तो वि॒भाति॒ कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
यं क्रंदसी अवसा तस्तभाने अभ्यैक्षेतां मनसा रेजमाने ।
यत्राधि सूर उदितो विभाति कस्मै देवाय हविषा विधेम ॥
Samhita Transcription Accented
yám krándasī ávasā tastabhāné abhyáikṣetām mánasā réjamāne ǀ
yátrā́dhi sū́ra údito vibhā́ti kásmai devā́ya havíṣā vidhema ǁ
Samhita Transcription Nonaccented
yam krandasī avasā tastabhāne abhyaikṣetām manasā rejamāne ǀ
yatrādhi sūra udito vibhāti kasmai devāya haviṣā vidhema ǁ
Padapatha Devanagari Accented
यम् । क्रन्द॑सी॒ इति॑ । अव॑सा । त॒स्त॒भा॒ने इति॑ । अ॒भि । ऐक्षे॑ताम् । मन॑सा । रेज॑माने॒ इति॑ ।
यत्र॑ । अधि॑ । सूरः॑ । उत्ऽइ॑तः । वि॒ऽभाति॑ । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
यम् । क्रन्दसी इति । अवसा । तस्तभाने इति । अभि । ऐक्षेताम् । मनसा । रेजमाने इति ।
यत्र । अधि । सूरः । उत्ऽइतः । विऽभाति । कस्मै । देवाय । हविषा । विधेम ॥
Padapatha Transcription Accented
yám ǀ krándasī íti ǀ ávasā ǀ tastabhāné íti ǀ abhí ǀ áikṣetām ǀ mánasā ǀ réjamāne íti ǀ
yátra ǀ ádhi ǀ sū́raḥ ǀ út-itaḥ ǀ vi-bhā́ti ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yam ǀ krandasī iti ǀ avasā ǀ tastabhāne iti ǀ abhi ǀ aikṣetām ǀ manasā ǀ rejamāne iti ǀ
yatra ǀ adhi ǀ sūraḥ ǀ ut-itaḥ ǀ vi-bhāti ǀ kasmai ǀ devāya ǀ haviṣā ǀ vidhema ǁ
10.121.07 (Mandala. Sukta. Rik)
8.7.04.02 (Ashtaka. Adhyaya. Varga. Rik)
10.10.085 (Mandala. Anuvāka. Rik)
Samhita Devanagari Accented
आपो॑ ह॒ यद्बृ॑ह॒तीर्विश्व॒माय॒न्गर्भं॒ दधा॑ना ज॒नयं॑तीर॒ग्निं ।
ततो॑ दे॒वानां॒ सम॑वर्त॒तासु॒रेकः॒ कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
आपो ह यद्बृहतीर्विश्वमायन्गर्भं दधाना जनयंतीरग्निं ।
ततो देवानां समवर्ततासुरेकः कस्मै देवाय हविषा विधेम ॥
Samhita Transcription Accented
ā́po ha yádbṛhatī́rvíśvamā́yangárbham dádhānā janáyantīragním ǀ
táto devā́nām sámavartatā́surékaḥ kásmai devā́ya havíṣā vidhema ǁ
Samhita Transcription Nonaccented
āpo ha yadbṛhatīrviśvamāyangarbham dadhānā janayantīragnim ǀ
tato devānām samavartatāsurekaḥ kasmai devāya haviṣā vidhema ǁ
Padapatha Devanagari Accented
आपः॑ । ह॒ । यत् । बृ॒ह॒तीः । विश्व॑म् । आय॑न् । गर्भ॑म् । दधा॑नाः । ज॒नय॑न्तीः । अ॒ग्निम् ।
ततः॑ । दे॒वाना॑म् । सम् । अ॒व॒र्त॒त॒ । असुः॑ । एकः॑ । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
आपः । ह । यत् । बृहतीः । विश्वम् । आयन् । गर्भम् । दधानाः । जनयन्तीः । अग्निम् ।
ततः । देवानाम् । सम् । अवर्तत । असुः । एकः । कस्मै । देवाय । हविषा । विधेम ॥
Padapatha Transcription Accented
ā́paḥ ǀ ha ǀ yát ǀ bṛhatī́ḥ ǀ víśvam ǀ ā́yan ǀ gárbham ǀ dádhānāḥ ǀ janáyantīḥ ǀ agním ǀ
tátaḥ ǀ devā́nām ǀ sám ǀ avartata ǀ ásuḥ ǀ ékaḥ ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
āpaḥ ǀ ha ǀ yat ǀ bṛhatīḥ ǀ viśvam ǀ āyan ǀ garbham ǀ dadhānāḥ ǀ janayantīḥ ǀ agnim ǀ
tataḥ ǀ devānām ǀ sam ǀ avartata ǀ asuḥ ǀ ekaḥ ǀ kasmai ǀ devāya ǀ haviṣā ǀ vidhema ǁ
10.121.08 (Mandala. Sukta. Rik)
8.7.04.03 (Ashtaka. Adhyaya. Varga. Rik)
10.10.086 (Mandala. Anuvāka. Rik)
Samhita Devanagari Accented
यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नयं॑तीर्य॒ज्ञं ।
यो दे॒वेष्वधि॑ दे॒व एक॒ आसी॒त्कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
यश्चिदापो महिना पर्यपश्यद्दक्षं दधाना जनयंतीर्यज्ञं ।
यो देवेष्वधि देव एक आसीत्कस्मै देवाय हविषा विधेम ॥
Samhita Transcription Accented
yáścidā́po mahinā́ paryápaśyaddákṣam dádhānā janáyantīryajñám ǀ
yó devéṣvádhi devá éka ā́sītkásmai devā́ya havíṣā vidhema ǁ
Samhita Transcription Nonaccented
yaścidāpo mahinā paryapaśyaddakṣam dadhānā janayantīryajñam ǀ
yo deveṣvadhi deva eka āsītkasmai devāya haviṣā vidhema ǁ
Padapatha Devanagari Accented
यः । चि॒त् । आपः॑ । म॒हि॒ना । प॒रि॒ऽअप॑श्यत् । दक्ष॑म् । दधा॑नाः । ज॒नय॑न्तीः । य॒ज्ञम् ।
यः । दे॒वेषु॑ । अधि॑ । दे॒वः । एकः॑ । आसी॑त् । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
यः । चित् । आपः । महिना । परिऽअपश्यत् । दक्षम् । दधानाः । जनयन्तीः । यज्ञम् ।
यः । देवेषु । अधि । देवः । एकः । आसीत् । कस्मै । देवाय । हविषा । विधेम ॥
Padapatha Transcription Accented
yáḥ ǀ cit ǀ ā́paḥ ǀ mahinā́ ǀ pari-ápaśyat ǀ dákṣam ǀ dádhānāḥ ǀ janáyantīḥ ǀ yajñám ǀ
yáḥ ǀ devéṣu ǀ ádhi ǀ deváḥ ǀ ékaḥ ǀ ā́sīt ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
yaḥ ǀ cit ǀ āpaḥ ǀ mahinā ǀ pari-apaśyat ǀ dakṣam ǀ dadhānāḥ ǀ janayantīḥ ǀ yajñam ǀ
yaḥ ǀ deveṣu ǀ adhi ǀ devaḥ ǀ ekaḥ ǀ āsīt ǀ kasmai ǀ devāya ǀ haviṣā ǀ vidhema ǁ
10.121.09 (Mandala. Sukta. Rik)
8.7.04.04 (Ashtaka. Adhyaya. Varga. Rik)
10.10.087 (Mandala. Anuvāka. Rik)
Samhita Devanagari Accented
मा नो॑ हिंसीज्जनि॒ता यः पृ॑थि॒व्या यो वा॒ दिवं॑ स॒त्यध॑र्मा ज॒जान॑ ।
यश्चा॒पश्चं॒द्रा बृ॑ह॒तीर्ज॒जान॒ कस्मै॑ दे॒वाय॑ ह॒विषा॑ विधेम ॥
Samhita Devanagari Nonaccented
मा नो हिंसीज्जनिता यः पृथिव्या यो वा दिवं सत्यधर्मा जजान ।
यश्चापश्चंद्रा बृहतीर्जजान कस्मै देवाय हविषा विधेम ॥
Samhita Transcription Accented
mā́ no hiṃsījjanitā́ yáḥ pṛthivyā́ yó vā dívam satyádharmā jajā́na ǀ
yáścāpáścandrā́ bṛhatī́rjajā́na kásmai devā́ya havíṣā vidhema ǁ
Samhita Transcription Nonaccented
mā no hiṃsījjanitā yaḥ pṛthivyā yo vā divam satyadharmā jajāna ǀ
yaścāpaścandrā bṛhatīrjajāna kasmai devāya haviṣā vidhema ǁ
Padapatha Devanagari Accented
मा । नः॒ । हिं॒सी॒त् । ज॒नि॒ता । यः । पृ॒थि॒व्याः । यः । वा॒ । दिव॑म् । स॒त्यऽध॑र्मा । ज॒जान॑ ।
यः । च॒ । अ॒पः । च॒न्द्राः । बृ॒ह॒तीः । ज॒जान॑ । कस्मै॑ । दे॒वाय॑ । ह॒विषा॑ । वि॒धे॒म॒ ॥
Padapatha Devanagari Nonaccented
मा । नः । हिंसीत् । जनिता । यः । पृथिव्याः । यः । वा । दिवम् । सत्यऽधर्मा । जजान ।
यः । च । अपः । चन्द्राः । बृहतीः । जजान । कस्मै । देवाय । हविषा । विधेम ॥
Padapatha Transcription Accented
mā́ ǀ naḥ ǀ hiṃsīt ǀ janitā́ ǀ yáḥ ǀ pṛthivyā́ḥ ǀ yáḥ ǀ vā ǀ dívam ǀ satyá-dharmā ǀ jajā́na ǀ
yáḥ ǀ ca ǀ apáḥ ǀ candrā́ḥ ǀ bṛhatī́ḥ ǀ jajā́na ǀ kásmai ǀ devā́ya ǀ havíṣā ǀ vidhema ǁ
Padapatha Transcription Nonaccented
mā ǀ naḥ ǀ hiṃsīt ǀ janitā ǀ yaḥ ǀ pṛthivyāḥ ǀ yaḥ ǀ vā ǀ divam ǀ satya-dharmā ǀ jajāna ǀ
yaḥ ǀ ca ǀ apaḥ ǀ candrāḥ ǀ bṛhatīḥ ǀ jajāna ǀ kasmai ǀ devāya ǀ haviṣā ǀ vidhema ǁ
10.121.10 (Mandala. Sukta. Rik)
8.7.04.05 (Ashtaka. Adhyaya. Varga. Rik)
10.10.088 (Mandala. Anuvāka. Rik)
Samhita Devanagari Accented
प्रजा॑पते॒ न त्वदे॒तान्य॒न्यो विश्वा॑ जा॒तानि॒ परि॒ ता ब॑भूव ।
यत्का॑मास्ते जुहु॒मस्तन्नो॑ अस्तु व॒यं स्या॑म॒ पत॑यो रयी॒णां ॥
Samhita Devanagari Nonaccented
प्रजापते न त्वदेतान्यन्यो विश्वा जातानि परि ता बभूव ।
यत्कामास्ते जुहुमस्तन्नो अस्तु वयं स्याम पतयो रयीणां ॥
Samhita Transcription Accented
prájāpate ná tvádetā́nyanyó víśvā jātā́ni pári tā́ babhūva ǀ
yátkāmāste juhumástánno astu vayám syāma pátayo rayīṇā́m ǁ
Samhita Transcription Nonaccented
prajāpate na tvadetānyanyo viśvā jātāni pari tā babhūva ǀ
yatkāmāste juhumastanno astu vayam syāma patayo rayīṇām ǁ
Padapatha Devanagari Accented
प्रजा॑ऽपते । न । त्वत् । ए॒तानि॑ । अ॒न्यः । विश्वा॑ । जा॒तानि॑ । परि॑ । ता । ब॒भू॒व॒ ।
यत्ऽका॑माः । ते॒ । जु॒हु॒मः । तत् । नः॒ । अ॒स्तु॒ । व॒यम् । स्या॒म॒ । पत॑यः । र॒यी॒णाम् ॥
Padapatha Devanagari Nonaccented
प्रजाऽपते । न । त्वत् । एतानि । अन्यः । विश्वा । जातानि । परि । ता । बभूव ।
यत्ऽकामाः । ते । जुहुमः । तत् । नः । अस्तु । वयम् । स्याम । पतयः । रयीणाम् ॥
Padapatha Transcription Accented
prájā-pate ǀ ná ǀ tvát ǀ etā́ni ǀ anyáḥ ǀ víśvā ǀ jātā́ni ǀ pári ǀ tā́ ǀ babhūva ǀ
yát-kāmāḥ ǀ te ǀ juhumáḥ ǀ tát ǀ naḥ ǀ astu ǀ vayám ǀ syāma ǀ pátayaḥ ǀ rayīṇā́m ǁ
Padapatha Transcription Nonaccented
prajā-pate ǀ na ǀ tvat ǀ etāni ǀ anyaḥ ǀ viśvā ǀ jātāni ǀ pari ǀ tā ǀ babhūva ǀ
yat-kāmāḥ ǀ te ǀ juhumaḥ ǀ tat ǀ naḥ ǀ astu ǀ vayam ǀ syāma ǀ patayaḥ ǀ rayīṇām ǁ